Ахы 19 — «Ршәырқәа рыла дара еилышәкаалоит»
GSAM 299.1«Иара иҳаиҭеит џьоукы апостолцәас, џьоукы аԥааимбарцәас, џьоукы Аевангелие аларҵәҩцәас, џьоукы ахьчацәас, арҵаҩцәас; иԥшьоу рынаӡара азы, амаҵура аус азы, Христос ицәеижь аргылара азы; ҳара зегьы ахаҵараҿы, Анцәа Иԥа иахь ҳдырраҿы акзаара ҳаианӡа, инаӡоу уаҩны ҳҟалаанӡа, Христос инаӡара азҳара аҟара ҳаианӡа.»1
GSAM 299.2Аиқәырхаҩ Идоуҳа аҳамҭақәа ауахәамаҿы ианеиҭа, «Иара ишиҭахыз ала», инаӡоу амш ааиаанӡа Иҳақәиҭу иус нарыгӡаларц азы, ижәлар дара рхала еилыргарц имыжьит арҭ аарԥшрақәа жәҩантә иҟоума, ма адоуҳақәа цәгьақәа рахьтә иҟоума ҳәа; уи адоуҳа Анцәа иҟынтә иааума иаамума еилҳаргартә еиԥш аԥҟарақәа ҳаиҭоит. Арҭ аҵыхәтәи амшқәа раангьы, аԥааимбар Иоиль заа иҳәахьаз еиԥш, Иҳақәиҭу Идоуҳа ауаа зегьы рықәиҭәаны, аԥацәеи аԥҳацәеи аԥааимбаражәақәа анрҳәаша,2 Павел иҳәоит: ауаа аԥааимбаражәақәа пату рықәырҵалароуп, «зегьы ԥыршәалароуп», насгьы «ибзиоу шәҽыжәдырҳәала.»3
GSAM 299.3Ишԥауҭҵаари абас еиԥш иҟоу аарԥшрақәа, Анцәа Идоуҳа иус еилыркааразы Иԥшьоу Аҩыраҿы иану аԥҟарақәа ирыдкыланы уанрыхәаԥшы уаҵкыс? Зылшара ԥкьаҭу ауаҩ ихшыҩ аилкаара иахыҵуа зегьы Анцәа иҟынтә иаауазар акәым. Абиблиа иҳәоит, аҵыхәтәи амшқәа раан Сатана аџьашьахәқәа ҟаиҵалоит, адунеиа ижьарц, Зегьзымчу Анцәа имш ду аидысларахь ауаа еизигоурц азы.4 Ус анакәха, аарԥшра Абиблиа аԥҟарақәа наӡаҭҵааны ирыдкыланы ауп иҵабыргыҵәҟьоу адоуҳатә ҳамҭа еилкаара злыршахо. Абри аҿы иаҭахуп ауаа ԥарцәа аанырԥшуа иҟарҵои еиԥш иҟоу агәцаракра.
GSAM 300Аԥарцәа раарԥшра
GSAM 300.1«Детроиттәи абанктә ԥарақәа рыхәаԥшыҩ» 1863 шықәса мшаԥымзатәи аҭыжьымҭаҿы мистер Престон аԥарцәа раарԥшразы хә-ԥҟарак ҟаиҵеит. Иара иҳәеит: арҭ аԥҟарақәа рыла инапы иҵало аԥара бӷьыццы ԥхьаӡа наӡаҭҵааны иахәаԥшыуа дарбанзаалак, ддыржьоит ҳәа уаҳа дшәозар аҭахым.
GSAM 300.2Аԥааимбаражәа аҳәаразы аҳамҭа ԥшәаразы, Иԥшьоу Аҩыраҿы зыҩбахәы ҳәоу ажәытәамҭақәа раан ицәырԥшуаз аҳамҭақәа рыхҳәаа иадкыланы, уаҟа иану аԥҟарақәа рыла иԥшәара еиҳаны иӷәӷәоу мҩак ыҟаӡам. Иԥшьоу Аҩыра аус бзиа зегьы азы инагӡаны ҳнархиоит (2 Тимофеи иахь 3:16, 17); уи аԥааимбаражәа аҳәаразы аҳамҭа аарԥшрақәа ииашаны иануп, насгьы Анцәа Идоуҳа иус ҵабырг Сатана аҳамҭақәа ԥарцәа рыла инаигӡо аус аҟынтә ишыршьатәу ҳнарбоит.
GSAM 300ИҴАБЫРГЫҴӘҞЬОУ АҲАМҬАҚӘА РЕИЛЫРКААРАЗЫ АԤҞАРАҚӘА
GSAM 300.3Иҳақәиҭу Ижәаҿы, иҵабыргыҵәҟьоу Анцәа Идоуҳа аарԥшрақәа Сатана иус аҟынтә еилыркаара злауа, имаҷныгьы быжь-ԥҟарак хаз-хазы ҳаиҭеит.
GSAM 300Актәи аԥҟара — иҷыдоу амҩақәҵара
GSAM 300.4Аԥааимбар Исаиа аҵыхәтәи амшқәа раан иҟалараны иҟоу данрыхцәажәо, иҳәоит: «Ашаҳаҭра еидышәкыл, азакон сыҵаҩцәа рыгәҭа амҳәыр адышәҵа. Иакоб иҭаацәара Ихы зцәызҵәахыз Иҳақәиҭу сизыԥшызаалоит, Иара гәӷа сиқәызаалоит.... Ишәанырҳәалак: „Аԥсцәа рдоуҳақәа ирыҿцәажәо, насгьы иҵысҵысуа, иҳәынҵәауа амагицәа шәрызҵаа“, — жәлар рНцәа изҵаар акәӡами? Зыԥсы ҭоу рзы иԥсхьоу ирыҵаауама? Азакони ашаҳаҭреи рахь! Арҭ ажәақәа ирықәымшәо акы рҳәозар, уи дара алашара ахьрымам азоуп.»5
GSAM 301.1Иԥшьоу Аҩыра абри ахәҭаҿы, Анцәа изакон ахь амҳәыр архынҳәра зҽазызшәо жәлар ҳахшыҩ рызнархоит — Иҳақәиҭу изыԥшу, Имаҵ азыҳәан аус зуа жәлар. Дара Иара изыԥшуп, даҽакала, Иаара изыԥшуп; ари ҟалоит, иԥсхьоу рдоуҳақәоуп ҳәа зхы аазырԥшуа адоуҳақәа ауаа дара рахь инарыԥхьо аан. Шьоукы рааԥхьара иазҿлымҳахоит, адыррақәа рыԥшааразы иԥсхьоу рахь ицоит; аха Иҳақәиҭу ижәлар Иара диԥшааларц рааԥхьара риҭоит. Уи иаанаго, Иара диԥшаалар, иҷыдоу амҩақәҵара шриҭо ауп. Дара иԥсхьоу рахь рцара аҭахым, избанзар дара дыррак рызҭауам; «амра ҵаҟа иҟало аус дарбанзаалак аҿы уаҳа ахаангьы хәҭа рымам;» насгьы «иԥсхьоу акгьы рыздырӡом.»6
GSAM 301.2Хыхь зыҩбахәы ҳҳәааз Иԥшьоу Аҩыраҿы аацҳарақәа зегьы аԥышәара злаҭатәу аԥҟара ҳаҭоуп: «Арҭ ажәақәа ирықәымшәо акы рҳәозар, уи дара алашара ахьрымам азоуп.» Иҳақәиҭу иҟынтә иаау аацҳарақәа зегьы Ижәеи Изакони ирықәныҟәалоит.
GSAM 301.3Ари аԥҟара миссис Уаит лҩымҭақәа ирыдкыланы, исҳәар сылшоит: аҵыхәтәи 52 шықәса рыҩныҵҟа лшаҳаҭрақәа наӡаҭҵааны срыԥхьон, Анцәа изакони Абиблиа ашаҳаҭреи ирыдкыланы, насгьы урҭ ҩба ирыбжьоу инаӡоу аиқәшәара збоит. Лырҵарақәа Иԥшьоу Аҩыра аԥыԥсахра зылшо аатра ҽыц ҳаҭара акәым хықәкыс ирымоу, аха арҭ ҳаамҭақәа раан ауаа закәытә ҭыԥқәеи мҩақәеи рыла рымҩа шырцәыӡыр алшо, Анцәа Ижәа ишахырҟьар алшо ҳарбара ауп. Миссис Уаит лшаҳаҭрақәа рҭаҭыԥ, дара рзы лара лхаҭа илҩхьоу рыла еиҳаны ибзианы иҳарҳәар алшоит:—
GSAM 301.4«Анцәа Ижәа еиҳагьы еиқәаҵәоу ахшыҩ арлашаразы иазхоит, уи аилкаара зҭахыу зегьы еилыргар рылшоит. Аха, арҭ зегьы шыҟагьы, Анцәа Ижәа ҭырҵаауеит ҳәа зҳәоу рахьтә шьоукы уи еиҳагьы еилыкка иану арҵарақәа ирҿагылаҵәҟьаны инхоит. Усҟан Анцәа ахацәеи аԥҳәсацәеи рхәыцрақәа рыла рҽырҭҟәра рылмшарц азы, еилыкка, ииашаны иҳәоу ашаҳаҭрақәа риҭоит; дара ирыхдырҵәаз, иазымӡырҩуаз Анцәа Ижәа ахь ирхынҳәуеит.
GSAM 302.1«Анцәа Ижәаҿы имаҷым ииашоу аԥсҭазаашьатә ҵасқәа ршьаҭақәҵаразы азеиԥш ԥҟарақәа, насгьы азеиԥштәии хатәии ашаҳаҭрақәа арҭ аԥҟарақәа рахь иҷыдоула рхшыҩ архынҳәразы ирхиоуп.... Шәара Иԥшьоу Аҩыра ибзианы ишәыздырӡацым. Абиблиа ишәзышьақәнаргыло аҩаӡарақәа шәнаӡарц, ақьырсиантә инаӡара шәоурц шәыҭахны, Анцәа Ижәа шәтәҵара алшараны иҟашәҵахьазҭгьы, ашаҳаҭрақәа шәҭаххомызт....
GSAM 302.2«Иҳақәиҭу иаҭаз ашаҳаҭрақәа рыла шәагәиҽаниҵарц, шәаиргьежьарц, абжьгара шәиҭарц игәы иҭоуп, насгьы Ижәа аҵабырг ҵак ду шалоу шәахшыҩ иҭеиҵарц иҭахуп. Иҩу ашаҳаҭрақәа алашара ҽыц ҳаҭаразы акәым, аха Анцәа иҟынтә иаатхьоу аҵабыргқәа агәы иҭарҵәарц азы ирхиоуп.... Аҵабырг ацҵақәа ҳзаадмыртуеит; аха Анцәа ашаҳаҭрақәа рыла уаанӡатәи аҵабырг дуқәа еилкаара арманшәалеит, Иара иалихыз амҩала ауаа рахь инаигеит, урҭ рыла рхшыҩ арҿыхаразы, агәы иҭарҵәаразы, зегьы аҽырҭҟәразы амзыз рмоурц азы....
GSAM 302.3«Ашаҳаҭрақәа Анцәа Ижәа армаҷразы акәым, аха ишьҭыхразы, насгьы ауаа рхшыҩ ахь архынҳәразы ирхиоуп, аҵабырг аԥшӡара зҵоу амариара зегьы ргәы иҭаларц азы.... Уажәшьҭа Анцәа иҷыдоу мазара ҳауп ҳәа зҽызшьо ауаа, Ижәаҿы ишиҳәоу еиԥш, Иҭахрақәа нарыгӡозҭгьы, рыуал ахь рҿыхаразы иҷыдоу ашаҳаҭрақәа ирырҭомызт, насгьы Анцәа Ижәа азыӡырҩра ахдырҵәо рыгәнаҳареи иӷәӷәоу ашәарҭеи еилыркааразы урҭ рҭахымызт».7
GSAM 302Аҩбатәи аԥҟара — иҵабыргыҵәҟьоу аԥааимбарцәа
GSAM 302.4Ҳара иҳдырухьеит, иҵабыргыҵәҟьоу аԥааимбарцәа зегьы Анцәа изакони Ижәа ашаҳаҭреи ирықәныҟәаны ишцәажәо. Апостол Иоанн иҵабыргыҵәҟьоу аԥааимбарцәа рырҵара еилызкаауа даҽаӡәык аԥҟара ҳаиҭоит. Иара иҳәоит: «Сызгәакьоу, адоуҳацы ԥхьаӡа шәазымхаҵалан, аха адоуҳақәа ԥышәара рышәҭала, Анцәа иҟынтә иааума ҳәа, избанзар амцԥааимбарцәа рацәа адунеиаҿы ицәырцахьеит. Абри ала Анцәа Идоуҳа еилышәкаалоит: Иисус Христос цәеижьла дшаахьоу зыршаҳаҭуа адоуҳацы ԥхьаӡа Анцәа иҟынтә ауп; Иисус Христос цәеижьла дшаахьоу зыршаҳаҭымуа адоуҳацы ԥхьаӡа Анцәа иҟынтә акәым. Уи Христос иҿагылаҩ идоуҳа ауп, уи шаауа шәара ишаҳахьоу, насгьы уи уажәнатә адунеиаҿы иҟоуп.»8
GSAM 303.1Хыхь иаагау Иԥшьоу Аҩыра ахәҭа шәазҿлымҳала. Уаҟа Иисус Христос «цәеижьла даахьан» ҳәа зыршаҳаҭуа дарбанзаалак ҳәа акәым иану, аха «цәеижьла даахьеит» ҳәа ауп; даҽакала, ҳхаҵара аҭакс, Идоуҳа ала даауеит, насгьы ҳара ҳҟны дынхоит. Иҵабыргыҵәҟьаны, ари Аевангелие агәҭатәи аҵабырг ауп: «Христос шәара шәыҩныҵҟа, ахьӡ-аԥша агәыӷра.»9
GSAM 303.2Миссис Уаит лҩымҭақәа зегьы рыҩныҵҟа иуԥыло аԥсҭазаара иазку аҵакы хада, жәҩантәи амҩаҿы ԥхьаҟа ацара ҳҭахызар, ҳаҩныҵҟа инхо Аиқәырхаҩ Христос дахьҳҭахыу ауп. Лҩымҭақәа ҳарҳәоит: Христос аԥхьагьы, аҵыхәтәагьы, есымша дҳҭахуп. Абри еиҳаны еилыркааразы лышәҟәа «Христос иахь ашьаҿақәа» шәазхьаԥшыр шәылшоит. Англыз бызшәала уи 100000 екземплиар раасҭа ҭиуп, уажәшьҭа излаҭыҵуа 18 тәым бызшәала иҭыжьу уи зықьҩыла аекземплиарқәа уҳәаргьы. Пресвитериантә динмаҵзуҩк ари ашәҟәа даныԥхьеит, иуахәама ауаа рзы, иҩызацәа рзы 300 екземплиар раасҭа иҿаҵеит, насгьы иҳәеит: «Ари ашәҟәа зыҩыз Иҳақәиҭу Иисус Христос ибзианы дыздыруа иоуп».
GSAM 303Ахԥатәи аԥҟара — амцԥааимбарцәа
GSAM 303.3Иоанн амцԥааимбарцәа раарԥшразы аԥҟара ҳаиҭоит: «Дара адунеиа иҟынтә ауп: азоурагьы адунеиа иадҳәалоу ауп ирҳәогьы, адунеиа дырзыӡырҩуеит.»10 Амцԥааимбарцәа рырҵара ахы мап ацәакреи аџьар агара амҩа ашьҭыхра ацынхәрас, ацәеижьтә гәы иазгәаԥхалоит. Амцԥааимбарцәа «Израиль Иԥшьоу» ашьҭыхра ацынхәрас, «игәырӷьартә иҟоу» раԥхьырҳәоит.11 Миссис Уаит лҩымҭақәа адаҟьақәак заҵәыкгьы изыԥхьо еиликаар илшоит: дара ахы мап ацәакреи аџьар агареи амҩа ианызҵогьы, адунеиа ацәеижьтә гәы агәырӷьара азымзырҿыхогьы шракәу.
GSAM 304Аԥшьбатәи аԥҟара — агәырҩеи ачҳареи
GSAM 304.1Ари азҵаатә ҭҵаара наҳагӡо, аԥшьбатәи ԥҟарас апостол Иакоб ижәақәа ҳгоит: «Сашьцәа, Иҳақәиҭу Ихьӡала ицәажәоз аԥааимбарцәа агәырҩеи ачҳареи рҿы ҿырԥшыс ишәоуааит.»12 Ажәытә аԥааимбарцәа рԥышәа ҳанаԥхьо, иҳалкаауа, дара ироуаз реиҳа иуадаҩу аԥышәарақәа рахьтә акы, Израиль иара иахь иҳәоу, еилыкка иаарԥшу ашаҳаҭрақәа мап шрыцәикуаз, ма ирыҿагылара шзалихыз абара шракәыз ауп. Арҭ аамҭақәа кьаҿкала рыҭҵаара, иҵабыргыҵәҟьоу аԥааимбарцәагьы амцԥааимбарцәагьы зеиԥшраз ахара имгакуа иҳарбауеит. «Арқәа Рҳақәиҭу абас иҳәоит: Шәара шәзы аԥааимбаражәақәа зҳәо аԥааимбарцәа ржәақәа шәрызымӡырҩлан; дара баша агәыӷра шәырҭоит; Иҳақәиҭу Иҿы иҭыҵуа акәым, ргәы аҟынтә иаау абара ауп ирҳәогьы.»13
GSAM 304.2Миссис Уаит лҩымҭақәа рҿы аԥхьараҩ баша агәышьҭыхра иахьызцәырызго акгьы ыҟаӡам; аха даҽаӡәык ишиҳәаз еиԥш: «Ашаҳаҭрақәа рыла адоуҳатә хәарҭара ду акырынтә исоухьеит, уи сзыԥхьаӡом. Иҵабыргыҵәҟьаны, дара срыԥхьо еснагь исызныруеит, Анцәа иахь схаҵара ахьазымхо, Имаҵура азы сгәы ахьазымкуа, аԥсқәа реиқәырхаразы сгәацԥыҳәара ахьазымхо азы аҿаԥҽра шсоуа». Ус анакәха, миссис Уаит лшаҳаҭрақәа рылҵшәа, Иеремиа ишахцәажәаз амцԥааимбарцәа рырҵара арҭо алҵшәа аҟынтә зынӡаск еиԥшым.
GSAM 304.3Аԥааимбар амцԥааимбарцәа ишырҵарагьы ҳаҳәоит: «Сара пату сзақәымҵауа ауаа ирҳәалоит: „Иҳақәиҭу Иҳәеит: аҭынчра шәоуеит“; насгьы ргәы рзырҳәогьы инақәныҟәо зегьы ирҳәоит: „Шәара арыцҳара шәықәшәауам“.»14
GSAM 304.4Миссис Уаит лшаҳаҭрақәа рыла илырҵара ҵакыс иамоуз атәы ҳҳәозар, азҿлымҳара зҵоу аԥхьараҩк ижәақәа абра исаагап:
GSAM 304.4«Лшаҳаҭрақәа зегьы нҵәаанӡа срыԥхьеит, урҭ реиҳараҩкы акырынтәгьы, аха урҭ зегьы рҿы ламысдарак зҵоу жәакгьы, ма ицқьоу ақьырсиантә ҵабырг иақәымшәо акы, ахаангьы исзыԥшаам. Аӡәгьы Абиблиа аҟынтә ма Христос иҟынтә ихазго акгьы рыҵам; аха Анцәа изыӡырҩра, Иисус иахь абзиабара, Иԥшьоу Аҩыра агәра агара, уи есымша аҭҵааразы иаарту, иӷәӷәоу ааԥхьарақәа рыҩныҵҟа иԥшаауп. Абас Анцәа иахь иааигәоу аҟазаареи, абас аламысла Имаҵ ауреи, иԥшьоу аԥсҭазааразы абас ацқьара зҵоу ааԥхьарақәеи, Анцәа Идоуҳа мацара ауп урҭ зыҟынтә иаау».
GSAM 305.1Лшаҳаҭрақәа алагамҭанатә азҿлымҳара рыҭаны ирыхәаԥшуаз аӡәы абас иҳәоит:
GSAM 305.1«Еилыкка, иаартызны, аҵабырг ԥсахрада, ашәарада, еилыхрада ауаа рыҿцаара аилкааразы, сара ашаҳаҭра сыҟазар сҭахуп, ари аҿы игу ак шыҟамыз. Илаҟәу, ицәгьоу амзызқәа ари аус напхгара азҭозҭгьы, ахаҿдзыӷӷарақәа агәы зҭҵаауа ашаҳаҭрақәеи ииашоу ариашарақәеи рҭыԥ ааныркылон. Еилыкка ацәажәареи, агхақәа рзы иаарту ариашарақәеи, Аиқәырхаҩ изҭахны илакҩакуа аԥсқәа рахь арыцҳашьареи ргәы ашьҭыхреи, насгьы агхақәа ҟазҵаз, ахынрааларала урҭ раԥыхра зҽазызшәо рзы абжьгарақәа — арҭ зегьы лара лусураҿы азеиԥш ԥҟа еиԥш иалан. Миссис Уаит абараҿы илбаз аӡәырҩы ауаа рыцәгьарақәа зырҽеиуа ашаҳаҭра аҵабырг ԥсахрада илҳәон, уи еиҳагьы ибзиоу алҵшәақәа аанагон».15
GSAM 305Ахәатәи аԥҟара — иҵабыргыҵәҟьоу аԥааимбаражәақәа наӡоит
GSAM 305.2Иҵабыргыҵәҟьоу аԥааимбарцәеи амцԥааимбарцәеи рзы Моисеи иҳәамҭа Ҩынтәзакон 18-тәи ахаҿы иуԥылоит. Иара иҳәоит: «Иҳақәиҭу имҳәаз ажәа шԥаҳдырри? Аԥааимбар Иҳақәиҭу Ихьӡала акы иҳәозар, аха уи ҟаламзар, инаӡамзар, уи Иҳақәиҭу имҳәаз ауп, аԥааимбар ихы агәра ганы иҳәаз ауп; иара уимшәалан.»16
GSAM 305.3Ари еиԥш иҟоу Иԥшьоу Аҩыра абриҭ ахәҭаҿы иуԥылоит: «Дарбану акы зҳәогьы, уи зынаӡогьы, Иҳақәиҭу уи ҟаларц адҵа анимыҭа?»17 Аԥааимбар Самуил изы абас рҳәон: «Иара ииҳәогьы зегьы хымԥада наӡоит.»18 «Аԥааимбар ижәа анаӡалак, Иҳақәиҭу дшааишьҭызҵәҟьаз еилкаахоит.»19
GSAM 306.1Миссис Е. Г. Уаит аԥааимбаратә бара ланымаз, ари ашәҟәа автор раԥхьатәи акәны даниба иахыжьит 53 шықәса инареиҳаны. Арҭ ашықәсақәа рыҩныҵҟа лара иҟалаша ахҭысқәа рзы аԥааимбаражәақәа рацәа лҳәахьеит. Лԥааимбаражәақәа реиқәак инаӡахьоу ахҭысқәа ирыдҳәалоуп, реиқәак рынаӡара амҩан игылоуп, егьырҭ макьана аԥеиԥш иадҳәалоуп. Иахысыз ма иахьатәи ахҭысқәа ирыдҳәалоу ракәзар, инамыгӡаз ҭыԥкгьы сыздырӡом. Лԥааимбаражәақәа реиқәак рыҩбахәы ҳҳәахьеит. Ҳахҳәаа анаҳагӡо, егьырҭ анаҩстәи ахқәа рҿы иаарԥшхоит.
GSAM 306Афбатәи аԥҟара — аџьашьахәқәа иҵабыргыҵәҟьоу аԥааимбар идыргам
GSAM 306.2Адинтә ҩыҩцәа рацәа иазырышьақәнарӷәӷәоит, насгьы Иԥшьоу Аҩыра ахҳәаақәа рҿы иануп: иҵабыргыҵәҟьоу аԥааимбар идыргас иҟауа, аџьашьахәқәа шиқәдыргылоу. Аха Иԥшьоу Аҩыраҿы абас иҟоу аԥҟара ҳара макьана иҳԥшааӡацым.
GSAM 306.3Аџьашьахәқәа рыҟаҵара иҵабыргыҵәҟьоу аԥааимбар дшакәу азы шьақәнарӷәӷәаразар, Аатра 19:20 аҿы зыҩбахәы ҳәоу «амцԥааимбаргьы», аҵыхәтәаан, иҵабыргыҵәҟьоу аԥааимбарс дрылаҟалашт. Избанзар уаҟа иҳәоуп: «Агыгшәыг дыркит, насгьы иара ицны иара иҿаԥхьа аџьашьахәқәа ҟазҵоз амцԥааимбаргьы; урҭ рыла агыгшәыг адырга зыдызкылаз ауаа ижьон.» Арҭ амчқәа Аатра 13:14 аҿгьы рыҩбахәы ҳәоуп, «адгьыл аҿы инхо ауаа агыгшәыг иҿаԥхьа ҟаиҵар алшоз аџьашьахәқәа рыла» шижьо. Ари аԥҟара убасҵәҟьа ҳхы иаҳархәозар, Сатанагьы иҵабыргыҵәҟьоу аԥааимбар иоуп ҳәа ҳҳәалар акәхоит. Аҵыхәтәи быжь-рыцҳара рахьтә афбатәи аан иҷыдоу аус нарыгӡаша адоуҳақәа абас рыхцәажәоуп: «Аџьашьахәқәа ҟазҵогьы аџьнышцәа рдоуҳақәа, урҭ адгьыл аҳцәа, адунеиа зегьы аҳцәа рахь ицоит, Зегьзымчу Анцәа имш ду аидысларахь урҭ еизыҩцаларц азы.»20
GSAM 306.4Иҵабыргыҵәҟьоу аԥааимбар дшакәу азы шьақәнарӷәӷәара, абара имбауа раан аџьашьахәқәа ианыҟаҵогьы иаҳԥшаар акәызар, Абиблиа аԥааимбарцәа рахьтә имаҷҩуп ари аԥышәара иахысуа, еиҳараӡак рыусқәа рызкны иану аҿы ҳзыԥшу аҭак ҳамацаразар. Иҵабыргыҵәҟьоуп, Иԥшьоу Аҩыраҿы аԥааимбарцәа шьоукы аџьашьахәқәа шыҟарҵаз ануп, Илиа, Елисеи, Павел реиԥш. Аха Исаиа, Иеремиа, Даниил, Осиа, Иоиль, Амос, насгьы даҽаӡәцәа аџьашьахәқәа Абиблиаҿы иануп ҳәа дарбану иԥшааз? Ишырзаалакгьы арҭ Иҳақәиҭу иҵабыргыҵәҟьоу аԥааимбарцәа ракәын, насгьы Иҳақәиҭу иҵабыргыҵәҟьоу аԥааимбар иԥышәаразы ириҭаз аԥҟарақәа рыла дара убасҵәҟьа ишракәу еилкаауп.
GSAM 307.1Аџьашьахәқәа рыҟаҵара иҵабыргыҵәҟьоу аԥааимбар идыргас шракәым еилыкка иубоит, Иоанн Аӡаахҩы изкны Иԥшьоу Аҩыраҿы иану уанаԥхьо. Иара аԥааимбар дшакәыз иҳнарбоит иаб Захариа игәҭа заа иҳәаз ажәа, изыҟалараны иҟоу аԥа изкны Анцәа ииҭаз абара данахцәажәоз: «Уара, асаби, Зегьреиҳау Иԥааимбар ҳәа ухьыӡхоит: избанзар Иҳақәиҭу Иҿаԥхьа уцалоит, Имҩақәа урхиаларц азы.»21 Ҳаиқәырхаҩ Ихаҭа Иоанн Иҿаԥхьа амҩа зырхиаша аԥааимбар дшакәыз азықәиршаҳаҭуан, избанзар Иоанн изы Иара абас иҳәеит: «Аха закәу шәбарц шәҭыҵыз? Аԥааимбарма? Ааи, ишәасҳәоит: аԥааимбаргьы деиҳауп. Уи иоуп абри зызку: „Уахәаԥшы, Сацҳараҳәаҩ уҿаԥхьа даасышьҭуеит, иара уҿаԥхьа умҩа узирхиоит“. Избанзар ишәасҳәоит: аԥҳәсацәа ирхылҵыз рахьтә Иоанн Аӡаахҩы иеиҳаны иҟоу аԥааимбар дыҟаӡам.»22
GSAM 307.2Абра Аиқәырхаҩ Иоанн аԥааимбар дшакәыз еилыкка Ииҳәаз ҳбоит. Шәааи аџьашьахәқәа рыҟаҵара аԥҟара ҳхы иаҳархәаны алҵшәа ҳахәаԥшы. Аевангелие аларҵәҩ Иоанн ииҩыз Аевангелиеҿы абас иану ҳԥшаауеит: «Аӡәырҩы Иара [Христос] Иахь инеины ирҳәон: „Иоанн аџьашьахә акы ҟаимҵаӡеит; аха Иоанн ари ауаҩ изы ииҳәаз зегьы ҵабыргын.“»23 Ари аҳәамҭа мацара инагӡаны мап ацанакуеит иҵабыргыҵәҟьоу аԥааимбар идыргас аџьашьахәқәа рыҟаҵара ауп ҳәа зҳәоу рҳәаамҭа.
GSAM 307.3Ҩынтәзакон 13:1-3 аҿы иану, ҳахьӡыриашараҿы афбатәи аԥҟара ҳәа иҳашьҭаз ари аԥҟара иҳацхраауа, Анцәа Иҳақәиҭу иахь еиҳаны ҳнанагоу, ма Иара ҳицәыннахгоу, наӡаҭҵааны еилҳамгаанӡа, аџьашьахә ма еилымкаауа акы ҳашьҭамларц азы ауп. Ари ацыԥҵәаха ҵакыс иамоуз, аԥҟарақәа зегьы ҳхы иаҳархәарц, еиҳараӡак Анцәеи Изакони ирықәныҟәо акы акәу ҳахәаԥшразы ауп.
GSAM 308.1Афбатәи аԥҟара иҳнарҳәоит: амцҳәаҩ аџьашьахә ҟаиҵазар, наӡаҭҵааны иԥшәоу, Анцәа Ижәа иԥшьоу аҵабыргқәа рахьтә ахҟьареи, ахы мап ацәакра амҩа аҟынтә ахьаҵра зҭаху агәы иақәшәарц азы аҭахрақәа рларҟәрагьы ирыцны иубоит. Иҳақәиҭу абас иҟоу амцҳәаҩ дцәырҵырц алшара ииҭоит; ииго амҩа Анцәа аҵабыргыҵәҟьоу ихәыҷы изы аԥышәарахоит, аџьашьахә ҟазҵогьы ихықәкы ма изгогьы еилыкка еилыркааразы алшара иоуеит. Анцәа Ижәа зҽадызҳәало, аџьашьахәқәа цәгьақәа ҟазҵогьы зжьара иахамло, абасеиԥш аԥышәа иабзоураны Анцәа рҿы иӷәӷәахоит.
GSAM 308.2Арҭ амш цәгьақәа раан, аӡәырҩы «ахаҵарала ахәшәтәҩцәоуп», «Анцәа имчала ахәшәтәҩцәоуп», «Ақьырсиантә наука ахәшәтәҩцәоуп», насгьы убас еиԥш, ҳәа анрҳәогьы, Иԥшьоу Аҩыра аԥҟарақәа наӡаҭҵааны рхархәара ҳахәҭоуп. Шьоукы арҭ «ахәшәтәҩцәа» рыгәҭакықәеи рхықәкқәеи еилыкка еилҳаргарц азы, Анцәа иԥҟарақәеи Иԥшьоу Адоуҳа алашареи ҳҭаххоит, урҭ рыус шыҵәаху азы. Даҽакала, шьоукы иаартны Анцәа изакони иахьатәи аҵабырги рхдырҵәоит. Шьоукы арҭ зҽызшьо «ахәшәтәҩцәа», Анцәа изакон иазку жәак анрҳәозгьы, зхшыҩ цәгьахаз ауаа реиԥш ргәы ԥжәон. Иҳақәиҭу Иԥшьоу Изакон зыларҵәо аацҳара шиааигаҵәҟьа еиԥш, иара убас изакон мчыла иҿагылагоу, уи зыҩбахәы зҳәауа ауаа идәылызго, Иԥшьоу Адоуҳа рымҵысуа ауаа шракәу еилкаауп.
GSAM 308Абыжьбатәи аԥҟара — ршәырқәа
GSAM 308.3«Амцԥааимбарцәа шәҽырцәышәхьчала; дара ауасақәа рымаҭәақәа рышәны шәара шәхь иауеит, аха рыҩныҵҟа ирцәгьоу абгақәа роуп. Ршәырқәа рыла дара еилышәкаалоит. Аҳәҳәқәа рахьтә ажь рҽалырхуама, ма амаӷқәа рахьтә алаҳа? Убасҵәҟьа аҵла бзиа зегьы ашәыр бзиа аанагалоит, аха аҵла цәгьа ашәыр цәгьа аанагалоит. Аҵла бзиа ашәыр цәгьа азаанагауам, насгьы аҵла цәгьа ашәыр бзиа азаанагауам. Ашәыр бзиа аамзырго аҵлацы ԥхьаӡа ахәҵәаны амца иҭадыршәоит. Азоурагьы ршәырқәа рыла дара еилышәкаалоит.»24
GSAM 309.1Ҳаиқәырхаҩ арҭ Ижәақәа рыбзоурала иҳдыруеит, аԥааимбаражәа аҳәаразы аҳамҭа Аевангелиеамҭа раан ишыҟалаша. Иҵабыргыҵәҟьоу аԥааимбарцәа ари аус ирыдҳәаламзар, насгьы аԥааимбаратә аарԥшрақәа зегьы аҟынтә цәгьара мацара аауазар, «Аԥааимбарцәа шәҽырцәышәхьча» ҳәа Иимҳәарызма? Дара хкыцы ԥхьаӡа шырилкаатәу еилыкка иҳаиҳәаз, ари зегьы рыҵкыс иӷәӷәоу шьақәнарӷәӷәарауп: Агәырӷьагаҩ, Иԥшьоу Адоуҳа, «иҟалараны иҟоу» ҳаирбо аус аҿы (Иоанн 16:13), иҵабыргыҵәҟьоу аԥааимбаражәа аҳәаразы аҳамҭагьы шыҟалаша. Ҳахьӡыриашараҿы абыжьбатәи аԥҟара ҳәа иҳашьҭаз ари аԥҟара ахаангьы ҳажьар алшом. Христос Иимҳәеит: ршәырқәа рыла дара еилышәкаар шәылшап ҳәа; аха Иара еилыкка Иҳәеит: «Ршәырқәа рыла дара еилышәкаалоит.»
GSAM 309.2Ҳара ҳҵаауеит: иҵабыргыҵәҟьоу Анцәа Идоуҳа аҳамҭақәа рус аҿы иаҳбар акәхо ашәыр закәу? Аҭак Павел иҳәаамҭаҿы иуԥылоит, Иҳақәиҭу ауахәамаҿы аҳамҭақәа анҭаҵоз хықәкыс Имоуз атәы ҳзеиҭаиҳәон: «Азоурагьы Иара Иҳәоит: Хыхь Даныԥхала, атҟәра ҭҟәра игеит, ауаа аҳамҭақәа риҭеит.... Иара иҳаиҭеит џьоукы апостолцәас, џьоукы аԥааимбарцәас, џьоукы Аевангелие аларҵәҩцәас, џьоукы ахьчацәас, арҵаҩцәас; иԥшьоу рынаӡара азы, амаҵура аус азы, Христос ицәеижь аргылара азы; ҳара зегьы ахаҵараҿы акзаара ҳаианӡа [„акзаарахь“, адаҟьақәа рхәараҿы], Анцәа Иԥа иахь ҳдырраҿыгьы, инаӡоу уаҩны ҳҟалаанӡа, Христос инаӡара азҳара аҟара ҳаианӡа».25
GSAM 309.3Ари аԥҟара ахԥатәи амаалықь иаацҳара алагамҭанатә иадҳәалаз аԥааимбаражәа аҳәаразы аҳамҭа ҳадҳкылозар, закәытә лҵшәа ҳоуеи? — Иаҳбоит: миссис Уаит лыла еиԥмырҟьо иаҳҭоз арҵарақәа акзаареи аиқәшаҳаҭреи амҩа иануп, «абжьқәа еибырҳәаларц», «еидгылазарц» ҳгәазҭазҵогьы, Христос Иацу акзаареи, насгьы ҳабжьара иҵабыргыҵәҟьоу аицареи аидгылареи ҳзаазгоу шракәу.
GSAM 310.1Ари аус иаҿагыло рахьтә шьоукы иҿахәы цәгьала ирҳәахьеит: «Миссис Уаит лбарақәа шәара шәҿы иҟамызҭгьы, шәтәус акыраамҭа ибгалахьазаарын». Аҭак абас ирҭоит: «Уи ҵабыргуп; избанзар уи лыла Иҳақәиҭу абжьгара, агәҽанҵара, алашара ҳаиҭахьеит, убас аимакқәа ықәгахо, аусгьы ҿиоит». Ус, дара аҳамҭа иаҿагыланы ирҳәаз, иҵабыргыҵәҟьаны, уи ашәыр иҵабыргыҵәҟьоу аԥааимбаражәа аҳәаразы аҳамҭа ашәыр шракәу азы шаҳаҭрахоит.
GSAM 310.2Миссис Уаит лыла иаарԥшу аԥааимбаражәа аҳәаразы аҳамҭа арҭ быжь-ԥҟарак рыла 60 шықәса инареиҳаны иԥышәахахьеит, насгьы зегьы рҿы иҵабыргыҵәҟьоу аԥааимбаражәа аҟазшьақәа азы аԥҟарақәа инарықәны иҟалеит.
Notes
- Ефесаа рахь 4:11-13. ↩
- Иоиль 2:28, 29, ↩
- 1 Фессалоникаа рахь 5:20, 21. ↩
- Аатра 16:14. ↩
- Исаиа 8:16-20. ↩
- Екклесиаст 9:6, 5. ↩
- Ауахәама азы ашаҳаҭрақәа, атом 5, ад. 663-667. ↩
- 1 Иоанн 4:1-3. ↩
- Ефесаа рахь 3:17; Колоссаа рахь 1:27. ↩
- 1 Иоанн 4:5. ↩
- Исаиа 30:10, 11. ↩
- Иакоб 5:10. ↩
- Иеремиа 23:16. ↩
- Ажәеинраала 17. ↩
- Џь. Н. Ендриус, «Ахҳәааи ацҳараҳәаҩи», 1867 шықәса ԥхынҷкәын. ↩
- Ҩынтәзакон 18:21, 22. ↩
- Аҵәуара 3:37. ↩
- 1 Самуил 9:6. ↩
- Иеремиа 28:9. ↩
- Аатра 16:14. ↩
- Лука 1:76. ↩
- Лука 7:26-28. ↩
- Иоанн 10:41. ↩
- Матфеи 7:15-20. ↩
- Ефесаа рахь 4:8-13. ↩