Roh Nubuet. – No. 1

TAM1897 D 2.2Khutbah geubri bak uroe Seulasa beungoh, 9 Februari 1897 Geucetak lam General Conference Daily Bulletin, 12 Feb. 1897, Jil. 1, No. 1, hlm. 2-6.

TAM1897 D 2.3Lôn kira hana sidroë pih lam ruweuëng nyoë nyang hana jipiké meunyo jih nyan beutôi-beutôi jipatéh bak Roh Nubuat; nyan makna jih, Roh Nubuat nyan nakeuh atra geurija, — atra peusan nyoë lagèë nyang ka geupeuleumah rot Syèdara White, dan bahwa hai-hai nyan geupeucaya, paléng kureuëng geupeunyata bahwa geupeucaya, meunyo meunurôt pikéran ngon Kitab Suci nyang peubukti bahwa hai-hai nyan nakeuh saboh bagiën nibak buët nyoë. Teuma nyan kon disinan teumpat masalahjih, sabab tanyoe jinoe teungoh lam masalah. Meunyo tanyoe hana tateupeue, keuadaan tanyoe leubeh brok nibak meunyo tanyoe teungoh lam masalah dan tateupeue. Dan leubeh nibak nyan, peukara Tuhan, meunan cit droeneueh ngon lôn, teungoh lam masalah nyang that parah sampoe tanyoe tiep uroe lam bahaya keunong beungeh Tuhan kareuna tanyoe na bak teumpat nyang lageè nyoe. Tuhan geupeugah nyan bak geutanyoe leubèh dari sigoe, dan Gobnyan geupeugah cit pakri cara geutanyoe tamong u dalam nyan, dan pakri cara teubiet dari nyan. Dan saboh-saboh jih nyang lôn teupeue keu lôn peugah bak droeneueh di sinoe, nakeuh beu neupelajari Roh Nubuat, dan neucok dari nyan peu nyang droeneueh peureulèe.

TAM1897 D 2.4Nyan nakeuh salah saboh mantong nibak peunyata nyang ka geupeugah. Deungon tateupeue peunyata-peunyata nyan, dan ka trép lôn turi nyan, seubeutôijih lôn leubèh galak tinggai di rumoh dan lôn sambông buet di sinan, sabab le that buet nyang harôh geupeubuet dan le that ureueng nyang teulibat. Tuhan geulakèe le that peuubah lam kawan ureuëng-ureuëng nyang ka geupeudong komite, dewan, majelis, dan la’én-la’én, dan ureuëng-ureuëng nyang jitamong lam komite, dewan, ngon majelis nyan nakeuh ureuëng-ureuëng nyang meusapat disinoe nyang akan geutugaih keu geupeugöt peuubah nyan. Jinoe, pakri cara ureuëng-ureuëng nyan jeuët jipeugöt peu-ubah nyang awaknyan keudroë teulibat di dalamjih, meunyoë awaknyan keudroë hana geuubah leubèh dilee? Saboh-sabohjih cara mangat jeuët na peu-ubah nyan nakeuh ureuëng-ureuëng nyan harôh geuubah. Bandum ureuëng nyang tém geupeubuët nyan, Po Teu Allah akan geukeurija meulaluë awaknyan, dan bandum nyang hana tém geupeubuët nyan — peuë keuh nyang akan teujadi ateuëh awaknyan? Nyan keuh sababjih lôn peugah geutanyoe teungoh lam bala uroë nyoë. Watèe Tuhan geupeugah bak geutanyoe masalah peu nyang teungoh geutanyoe hadapi, Gobnyan geupeugah cit pakri cara geutanyoe tamong u dalam nyan ngon pakri cara teubiet dari nyan. Banmandum nyan teujadi kareuna hana ta-peuduli keu Kesaksian-kesaksian. Lheueh nyan, watèe geutanyoe tamong lam masalah kareuna hana ta-peuduli keu Kesaksian-kesaksian, dan Kesaksian-kesaksian nyan geupeugah pakri cara teubiet dari masalah nyan, dan geutanyoe ta-ikôt kesaksian nyang jiba geutanyoe u luwa, barô keuh geutanyoe akan teupat bak Kesaksian-kesaksian nyan.

TAM1897 D 2.5Lôn hana meusalah bak droeneueh, sabab lôn pih na lam nyan sajan droeneueh mandum. Tuhan geupeugah bahwa urôsan nyan lam bala, dan lôn nakeuh saboh bagi nibak urôsan nyan; lôn meusajan ngon jih, udép lôn ka meusapat ngon jih, meunan cit deungon droeneueh; nyan nakeuh mandum keu geutanyoe. Teuma, meunyo urusan nyan lam bala, droeneueh ngon lôn pih lam bala cit. Mungken droeneueh keudroe hana hubôngan nyang pasti ngon langkah-langkah nyang peuteuka bala keu urusan nyan; tapi geutanyoe, seubagoe beunagi nibak urusan nyan, dan urusan nyan keudroe nakeuh udép geutanyoe, geutanyoe teutap lam bala saban cit kareuna urusan nyan pih lam bala. Tapi Allah geupeugah bak geutanyoe peu nyang harôh tapeubuet mangat jeuet teupeulheueh droe nibak nyan.

TAM1897 D 2.6Lôn hana lôn keuneuk bri nasihat manusia keu gata, tapi nasihat Tuhan. Mungkén tanyoe akan takalon nan-nan ureueng, dan meunyoe meunan lôn hana lôn peulheuh droe. Meunyoe na nan nyang teutinggai dan hana teubaca, dan tanyoe tateupeue soe ureueng nyan, nyan kon meuma’na bahwa ureueng syedara nyan ka jiseurang. Contoh jih, meunyoe lôn ka lôn pubuet salah, dan Tuhan geupeugah bak lôn bhah nyan lam saboh keusaksian. Watee keusaksian nyan trok bak lôn, lôn peulheuh droe nibak salah nyan, dan gata jeuet neungui nyan seumah-mah gata keuneuk, dan nyan hana jeuet keu dalèh ateueh lôn; sabab lôn hana le lam masalah nyan meunyoe lôn ka lôn peulheuh droe deungon lôn akui salah nyan, dan lôn pubuet lagee nyang patot.

TAM1897 D 3.1Sibeuna jih, nyan nakeuh saboh teunanyöng peu na ureuëng nyang meuteumèe lam haté droe jih keuyakinan ateuëh Testimonies nyan sampoe ureuëng nyan meuteumèe saboh, duwa, atawa lhèe, dan ka jiteurimong mandum, barô keuh ureuëng nyan akan cukôp yakin bahwa jih nyan ka jipatéh keu Testimonies nyan, dan hana seugolom jih meuteumèe peungalaman lagèe nyan. Lôn kupeuphôn ngon kupeuakhé ngon Firman. Nyoe na saboh hai nyang peugah bak geutanyoe peu nyang harôh tapeubuet watee tateuka u teumpat-teumpat lagèe nyoe: “Meunyo Tuhan na di teungoh-teungoh musyawarah gata, geukalon atôran, gaséh sayang, ngon takôt gata, meunan cit deungon meuget-get gata ateueh firman Gobnyan, maka gata ka siab keu tapeubuet buet Gobnyan deungon hana meukeunong keu droe.”

TAM1897 D 3.2Jinoe geutanyoe na lam musyawarah. Bah pih geutanyoe meubida-bida sifeuet, meunyo geutanyoe geubentuk lé roh Almaseh nyang saban, geutanyoe nyan saboh. Watee nyan geurèja jeuet jibeudoh trang lagèe mata uroe teungoh uroe, dan jijak maju lagèe teuntra nyang peuteuka takôt ngon panji-panji.

TAM1897 D 3.3Tuhan ka geupeujioh nibak buet Gobnyan, nibak urôsan buet Gobnyan secara umum, lam urôsan nanggroe, majelis, lam dewan, lam geurija, dan la’én-la’én. Tanyoe ka na tuhan-tuhan palsu, saweueb ureueng ramè ka geupeuduek manusia, dan manusia nyan pih geupeubiyeu droe geupeuduek, antara Tuhan ngon buet Gobnyan. Tuhan teutap akan geukeurija keu urusan Gobnyan, dan meunyo gata hana neupiyôh nibak jalan Gobnyan dan hana neubri Gobnyan geukeurija meunurot cara Gobnyan keudroe, murka Tuhan akan jiteuka ateueh ureueng-ureueng nyang na di jalan nyan. Ureueng-ureueng nyan jipeuteun droe, dan jibri droe jipeuteun, bak teumpat-teumpat nyang seuharôhjih ka trép jitinggai. Meunyo tanyoe tapeusibak jalan, dan tapeubiyeu Gobnyan geukeurija, Gobnyan akan geukeurija deungon cara nyang leumbôt. Geutanyoe hana meuh’eut cambuk taloe. Leubeh get teukeujot bacut jinoe, nibak teukeujot that ‘oh lheueh nyan; dan teugurôh lam gaséh sayang, nibak teutap hana tateupeue hai-hai nyoe, dan geupeuplueng dari meunareueh lagèe nyang teujadi bak uroe nyan, atawa teukeujot that watee hana daya geutanyoe le.

TAM1897 D 3.4Jadi, meunyo Tuhan na di teungoh-teungoh musyawarah gata, geukalon gaséh sayang ngon takôt gata, meunan cit deungon meuget-get gata ateueh firman Gobnyan, maka gata ka siab keu tapeubuet buet Gobnyan; dan Gobnyan hana geujadi rakan lam beurangkapeu urusan nyang hana adé.

TAM1897 D 3.5Lom lôn baca: “Cara manusia nakeuh meurancang ngon meuintrik. Po teu Allah geupula saboh prinsip.” Dan pat Po teu Allah ka geupula saboh prinsip, udép ngon buet geutanyoe meusapat nakeuh saboh wujud nibak prinsip nyan. Dan meunyoe prinsip Po teu Allah hana disinan, maka prinsip iblih nyang na disinan. “Keuadaan hana jeuet jipeugöt reformasi. Agama Kristen jipeusulôh reformasi lam haté. Peue nyang geupeugöt lé Almaseh lam haté akan teupeugöt meunurôt peurintah akai nyang ka meu-ubah. Rencana geupeuphôn dari luwa dan geucuba peugöt u dalam, ka sabe gagal dan akan sabe gagal.”

TAM1897 D 3.6Lôn hana jeuët lôn terapkan saboh keusaksian keu ureuëng la’én seula’én nibak droë lôn, sabab keusaksian nyan harôih geupeulaku bak haté, dan meukeureuja dari dalam. Po teu Allah teuma geupeulaku nyan ho mantong lôn jak. Dan meunan cit deungon geutanyoe mandum lam keusaksian nyang teuka keu soë mantong, bak rapat peuë mantong atawa dewan atawa rapat Konferensi Umum. Presiden hana jeuët geupeulaku keu ban saboh wilayah saboh keusaksian nyang geubri keu gobnyan. Gobnyan harôh geuteurimong nyan lam jiwa gobnyan, dan geuseurah tubôh, jiwa, ngon roh gobnyan keu nyan; dan óh lheueh nyan Isa Almasih akan geupeulaku keusaksian nyan dipat mantong gobnyan, presiden nyan, geujak. Nyan nakeuh saboh hai nyang udép lam droë gobnyan, dan meunyoe gobnyan geujak u keue, keusaksian nyan geupeulaku lé Tuhan dipat mantong gobnyan na. Teuma manusia ka geucuba peulaku Keusaksian nyan keu ureuëng la’én, padahai keusaksian nyan hana jeuët keu saboh hai nyang udép lam droë awaknyan keudroë. Ka meupadum go nyan ka dicuba, dan disinan keuh teuka masalahjih. Meunyoe keusaksian nyan hana geuteurimong lé gobnyan deungon tubôh, jiwa, ngon roh, sampoe prinsip nyang na lam nyan jeuet keu saboh hai nyang udep lam droe gobnyan, hana meuguna padum le gobnyan geubeuet keusaksian nyan ngon geupeuguna keu ureueng laen, peungaroh droe gobnyan keudroe akan meulawan deungon keusaksian nyang teungoh geupeuguna nyan. Sabab meunyoe nyan hana geupeujadi lam udép gobnyan, dan banmandum nyang geupeugah ngon geupeubuet, nyan ka hancô lé buet-buet gobnyan. Dan nyan keuh nyang ka jipeuteuka keuadaan nyang na jinoe. “Cara Allah nakeuh geubri keu manusia sapeue nyang hana bak jih.” Tanyoe harôh tacok peue nyang hana bak tanyoe, nyang geubri lé Allah keu tanyoe, dan nyan akan geupeujeuet tanyoe jeuet keu saboh kuwasa lam Tuhan. 2 Korintus 2:14: “Teurimong gaséh keu Allah, nyang sabe geupeumeunang kamoe lam Almaseh, dan geupeusipreuek keu’eumasan peungeutahuan Gobnyan meulalu kamoe di sigala teumpat.” Meunyo prinsip nyan ka na, ho mantong geutanyoe tajak, Tuhan teungoh geupeugah haba; Gobnyan teungoh geumeututô. Gobnyan geupeunyata peungeutahuan keuhai droegeuh meulalu geutanyoe di sigala teumpat. Nyan jeuet keuh lam urôsan bisnis; nyan hana meubida. Peue mantong nyang geutanyoe pubuet akan geupeuingat awaknyan keu Tuhan ‘oh lheueh geutanyoe hana lé, ngon sabab nyan Gobnyan geupeuleumah keumaharan peungeutahuan Gobnyan meulalu geutanyoe di sigala teumpat.

TAM1897 D 3.7“Cara Allah nakeuh geupeujeuet manusia jeuet keu sapeue nyang kon droe jih;” geupeujeuet lôn jeuet keu sapeue nyang kon droe lôn. Teuma, meunyo saboh keusaksian teuka bak lôn nyang peugah lôn hana beutôi, keusaksian nyan nakeuh keu geupeujeuet lôn jeuet keu sapeue nyang kon lôn, — geupeujeuet lôn beutôi. Lôn hana jeuet teudong bak teumpat lôn jinoe dan lôn terapkan nyan; tapi meunyo lôn terapkan nyan, lôn akan jeuet keu sapeue nyang kon lôn sigohlom nyan, dan bak tiep-tiep teumpat lôn jak, Allah jeuet geupeuleumah droe.

TAM1897 D 3.8“Cara manusia nakeuh mita teumpat nyang mudah, ngon peunuhi hawa nafsu ngon ambisi keudroe. Cara Tuhan nakeuh meukeureuja deungon kuasa. Gobnyan geubri rahmat meunyo ureueng saket nyan sadar bahwa jih peureulee nyan. Manusia kayem that puas ngon cara peulara droe meunurot cara-cara ureueng peungubat palsu, lheueh nyan jipeubeuna cara keureuja jih nyan beutôi.” Cara Tuhan la’en. Geutanyoe mandum ureueng sakét, dan meunyoe geutanyoe sadar, Tuhan akan geubri ubat nyang peureulèe. Manusia leubèh galak ubat palsu, dan jipiké cara keureuja jih nyan beutôi; teuma Tuhan meukeusud geupeusucô jiwa. Yohanes 7:38: “Barangsoe nyang meuiman bak Lôn, lagèe nyang ka teutuléh lam Kitab Suci, dari dalam pruet jih akan ilé krueng-krueng ië udép.” Nyan keuh keurajeuen Allah lam droe jih. “Uroe ke uroe manusia jipeuleumah peu kheueh keurajeuen Allah na lam droe jih. Meunyo Kristus nyang mat kuasa lam haté jih, awaknyan jiteumèe teunaga nibak prinsip, kuasa, ngon keumampuan keu jeuet keu peunjaga nyang seutia, peubaharui nyang beutôi; sabab hana jeuet na peubaharui meunyo hana keureujasama nyang sipeunoh jih ngon Isa Kristus. Meulalu , rahmat Kristus, manusia harôih jipeuguna keumampuan nyang ka geubri lé Allah keu jipeubaharui droe jih. Deungon buet meureungga droe nyoe, nyang geukalon deungon galak lé Tuhan syeuruga, awaknyan meuteumèe keumeunangan ateueh keucenderungan meuturônan ngon nyang ka geupupuduek lam droe jih; lheueh nyan, lagèe Daniel, awaknyan geutinggai jeujak bak ureueng la’én nyang hana sagai jeuet gadoh. Peungarôh nyan akan meuhampa u sigom donya.”

TAM1897 D 4.1Nyoe keuh saksi nyang ka lôn seubôt siat nyang ka leupah. Watèe gata teurimong saboh keusaksian dan gata teurimong nyan lam haté ngon udép gata, nyan jipeujeuet gata jeuet keu sidroe ureueng nyang kön gata sigohlom nyan, dan nyan keuh keurajeuen Allah lam droe gata, dan keusaksian nyan akan jiba u mandum sagoe bumoe. Mungkén gata hana sagai-sagai tom teubiet dari Nanggroe Bagian gata. Jadi, pakri jeuet meunan? Pat mantong gata jak ngon pat mantong Lôn jak, Allah teungoh geupeuna kesan bak haté nyang hana sagai jeuet gadoh, dan deungon nyan geupeuna lom kesan-kesan la’én, dan meunan keuh sabe. Mungkin sidroe ureueng jipeukareh haté jih keu nyan, tapi nyan teutap akan trok keunan cit; dan watee kesan nyan ka gata peujeuet, jih nyan akan jiteupeue bahwa nyan teuka dari Tuhan. Ureueng-ureueng Saduki hana jipatéh keu keubeunghèe, tapi awaknyan pih jipeugah bahwa awaknyan jiteupeue murid-murid nyan ka na sajan Isa dan meurunoe nibak gobnyan lheueh gobnyan meuninggai. Lam haté awaknyan ka jiteupeue bahwa Gobnyan ka bangkét. Fakta nyan na, tapi awaknyan hana meu-ubah lé sabab nyan. Nyan keuh prinsip nyang na lam Alkitab. Dari saboh keusaksian nyang geutuléh bak thôn 1896 lôn baca: “Le that ureuëng agam nyang ka jeuët keu peunasihat lam rapat dewan ngön rapat majelis peureulèe geusaréng.” Perhatékan, geukheun le that. Jumlah awaknyan hana that le, jadi meunyoe le nyang ka geusaréng, hana le nyang jeuët geupeubiyeu. “Ureuëng la’én harôih geucok teumpat awaknyan, sabab su awaknyan kon su Tuhan. Rencana ngon siasat awaknyan hana meunurôt atôran Tuhan. Ureuëng nyang saban nyan ka geupeuteutap lam jabatan seubagoe direktur dewan, sampoe di yup peungurôsan ngon cara droe jih, apui biasa ka geunguy keu gantoe apui suci nyang Tuhan keudroe peuudép. Ureuëng-ureuëng nyan hana lé geukheun Israel, tapi peungusé.” Peungusé gantoe Israel! Lam masalah nyang leubèh brok pakri lom kheueh tanyoe jeuët teungoh?

TAM1897 D 4.2Lom, dari saboh keusaksian nyang geutuléh bak thôn 1894: “Perubahan ka trép harôih geupeugèt. Tuhan geuyue keu geurija beugeupeusampôh aib droe jih.” Nyoekeuh naritjih: “Ureuëng-ureuëng nyang saban nyan hana jeuët jitamong lam dewan droeneuh thôn keu thôn; perubahan ka trép harôih geupeugèt. Po teu Allah geuyue keu geurija beu jipeusampôh aib droe jih; teuma seula’én ureuëng-ureuëng nyang yakin that ka cukôp mampu keurija hana jiteurimöng nasehat Po teu Allah teutap jipeuduek lam jabatan tiep thôn, hai nyan hana jeuët teujadi. Keuadaan nyoe ka jipeurusak tiep-tiep cabeuëng buët, saweueb ureuëng-ureuëng nyan hana jipeurasa peureulèe bimbéngan Roh Kudus.”

TAM1897 D 4.3Peue nyang harôh geupeubuet? Peu keuh Tuhan geubri keuseumpatan keu geukeurija jinoe? Peu keuh Gobnyan geupeubiyeu geupeuna peu-ubah nyang geupeureulèe? Kesaksian nyoe kon keu geupeulaku deungon cara geutanyoe cok aléeh buet nyoe dan langsong geupeuna peu-ubah. Até lôn harôh beutôi sigohlom lôn jeuet ikôt serta lam peu-ubah peu mantong. Nyang harôh geupeubuet nakeuh geupeuserah droe geutanyoe ubak Tuhan, lheueh nyan bah Gobnyan geukeurija meulalu geutanyoe. Geutanyoe hana padôli soe ureueng-ureueng nyan meunyo Tuhan na disinan.

TAM1897 D 4.4Geutanyoe hana jeuet tapeuphôn dari sinoe keu tamita-mita soe calon nyang jeuet tapeudong, nyang jeuet tapeukong ngon tapeu-ék u jabatan nyang jinoe jimat lé ureueng la’én; sabab meunyoe meunan, bah pih awaknyan ka jiteubiet dari jabatan nyan, geutanyoe ka tamong u dalam, dan Tuhan teutap ji-peujioh lagèe nyang ka-ka. Masalahjih jinoe nakeuh Tuhan ka geupeutinggai. Jinoe, meunyo geutanyoe meuhajat tamong u teumpat awaknyan, Tuhan teutap teupeutinggai, dan urusan nyan akan leubeh brok nibak seugohlomjih. Teuma nyan kon nyang geuhajat. Di sinoe bek na politik; teuma meunyo politik na lam droe geutanyoe, nyan akan na di sinoe, dan akan deuh teukalon di sinoe. Meunyoe keubit sidroe ureueng na politik lam droe jih, teumpat nyang paleng get keu jih peuhabeh nyan nakeuh di donya luwa, di teungoh-teungoh ureueng nyang keubit-keubit politisi, sabab nyan keuh mandum nyang na bak jih; dan meunyoe jih hana peuhabeh nyan disinan, jih akan peuhabeh nyan lam geurija, dan cit jipeuluwah keurusakan ngon buet-buet syetan disinan. Dan ka teuntee leubeh get buet-buet lagee nyan teubuka di donya luwa daripada lam geurija. Jadi, nyan kon tujuan geutanyoe disinoe. Tanyoe na disinoe keu tamita Tuhan, dan tapeuhah haté tanyoe mangat Gobnyan jeuet geuduek bak teumpat nyang hak Gobnyan, dari teungoh sampoe u binèh, lam tiep-tiep pikeran, narit, ngon buet; dan Tuhan nyan kon sidroe politisi; Gobnyan nakeuh Tuhan. Nyang harôh tanyoe pubuet nakeuh tamita Tuhan ngon banmandum haté, mangat Tuhan nyang pubuet banmandum nyang harôh geupeubuet; dan Gobnyan akan geupeubuet nyan meunyo tanyoe tapeubiyeu Gobnyan. Brèe keuseumpatan keu Po Teuh Allah. Ureuëng nyang na lam rot nyan harôh jipeusibak droe, dan geutanyoe nyang la’én beu tajaga droe bek jitamong lam rot nyan. Nyan barô Po Teuh Allah jeuët geucok teumpat nyang nakeuh atra Gobnyan.

TAM1897 D 5.1Lheueh nyan na geucalitra keu geutanyoe di sinoe kisah Nikodemus ngon Almaseh. Nikodemus nakeuh sidroe peumimpin di Israel, dan na geupeugah bahwa “Nikodemus geujak meurumpok ngon Isa bak malam uroe, sira geupeugah, ‘Rabbi, kamoe meuteupeue droeneueh nakeuh sidroe guru nyang teuka dari Allah: sabab hana sidroe manusia pih nyang jeuet jipeubuet mukjizat-mukjizat nyang droeneueh peubuet nyan, meunyoe kon Allah na sajan gobnyan.’ Banmandum nyan beutôi meunyoë sampoë disinan, tapi peuë nyang geupeugah lé Isa? Gobnyan ‘geujaweueb dan geupeugah bak jih, Keubit, keubit, Lôn peugah bak gata, Meunyoë sidroë ureuëng hana lahé barô, jih hana jeuët jikalon keurajeuën Allah.’ Nyoë nakeuh sidroë ureuëng nyang na bak jabatan teupeucaya nyang manyang, sidroë ureuëng nyang geuhoreumat seubagoë ureuëng nyang meupendidikan lam adat Yahudi, sidroë ureuëng nyang pikeran jih ka peunoh deungon hikmah. Gobnyan keubit na bakat nyang luwa biasa. Gobnyan hana geujak bak Isa watee uroe, sabab nyan akan jeuet keu bahan peugah-peugah ureueng; nyan akan that meumalèe keu sidroe peumimpin Yahudi geupeungaku droe seutuju ngon ureueng Nazaret nyang geu-anggap hina nyan. Nikodemus geupike, “Lôn keudroe akan lôn pastikan misi ngon klaim guru nyoe, peu kheueh gobnyan keubit cahaya keu geupeucahya bansa-bansa la’én, ngon keumuliaan Israel.

TAM1897 D 5.2“Isa lagee nyan geupeugah bak Nikodemus, Kon perdebatan nyang jeuet bantu droeneueh. Kon deungon hujah nyang jeuet peutrang haté. Gata harôh na haté nyang barô, meunyoe hana, gata hana jeuet teupeue keurajeuen langèt. Kon bukti nyang leubeh rayek nyang akan jiba gata u posisi nyang beutôi, tapi meukeusud nyang barô, sumber tindakan nyang barô: gata harôh lahé barô. Sigohlom na perubahan nyoe, nyang peugot mandum jeuet keu barô, bukti-bukti nyang paleng kong nyang jeuet geupeuleumah hana meuguna. Keukurangan nyan na lam haté gata keudroe; mandum harôh meu-ubah, meunyoe hana, gata hana jeuet takalon keurajeuen Allah.

TAM1897 D 5.3“Nyan nakeuh saboh peunyata nyang that meumalèe keu Nikodemus, dan deungon rasa keucewa gobnyan geusambông narit Almaseh, geupeugah, ‘Pakri cara sidroe ureueng jeuet lahé lom meunyo ka tuha?’ Gobnyan hana cukôp meupikiran rohani keu geupaham makna narit Almaseh. Teuma, Peuseulamat nyan hana geubalah hujah deungon hujah. Sira geu’angkat jaroe deungon teuga, deungon hormat, dan teunang, Gobnyan geupeuteugaih keubeunaran nyan deungon leubeh yakin: ‘Keubit, keubit, ulôn peugah bak gata, meunyoe sidroe ureueng hana lahé dari ié dan Roh, jih hana jeuet jitamong lam keurajeuen Allah. Nyang lahé dari tubôh nakeuh tubôh; dan nyang lahé dari Roh nakeuh Roh. Bèk hireuen meunyoe ulôn peugah bak gata, gata mandum harôh lahé barô. Angèn jipôt ho mantong nyang jitem, dan gata tadeungo su jih, teuma hana jeuët takheun pat teuka jih, dan pat jijak; meunan keuh keu tiep-tiep ureuëng nyang lahé dari Roh.’ Nikodemus geupeugah bak gobnyan, ‘Pakri jeuët nyan teujadi?’

TAM1897 D 5.4“Na padum-padum boh cahaya keubeunaran nyang ka jitamong lam pikéran peumimpin nyan. Feureuman Almaseh nyan geupeujeuet jih hireuen, dan geupeuteuka teunanyong, ‘Pakri jeuet hai nyan?’ Ngön seurius that Isa geujaweueb, ‘Gata nyan sidroe guru Israel, kön? Pakri hana tateupeue hai-hai nyan?’ Feureuman Gobnyan geupeusampoe bak Nikodemus peulajaran bahwa kon geubeungeh ateueh feureuman keubeunaran nyang trang, dan geupeuguna sindiran, tapi jih harôh leubeh rendah haté keu droe jih, saweueb keubodohan rohani jih. Teuma, narit Almaseh geupeugah deungon that khidmat ngon meuhoreumat, dan pandangan ngon su geuh geupeuleumah gaséh sayang nyang that rayeuk keu ureueng nyan, sampoe jih nyan hana meungön-ngön watèe sadar keu keuadaan jih nyang peumalèe. Keubit that, sidroe ureueng nyang geupeucaya keu urôsan agama bansa geuh, bèk sampoe hana jiteupeue keubeunaran nyang that peunténg keu awaknyan keu jipham, seubagoe syarat tamöng u dalam keurajeuen langèt. ‘Keubit, keubit, ulôn peugah bak gata,’ geusambông lé Isa, ‘Kamoe meututô bhaih peue nyang ka kamoe teupeue, dan kamoe meubri keusaksian ateueh peue nyang ka kamoe kalon; teuma gata hana neuteurimong keusaksian kamoe. Meunyoe ka ulôn peugah bak gata hai-hai donya, dan gata hana neupatéh, pakri teuma gata neupatéh, meunyoe ulôn peugah bak gata hai-hai langèt?’

TAM1897 D 5.5“Peulajaran keu Nikodemus nyoe lôn peutunyok seubagoe nyang that meukeupat keu ureuëng-ureuëng nyang uroë nyoë na bak posisi meutanggông jaweueb seubagoe peumimpin di Israel, dan nyang su awaknyan kayém tadeungo lam majelis geubri bukeuti na roh nyang saban lagèe nyang na bak Nikodemus.” Soë nyang tém deungo dan jipeubiyeuë narit nyang saban nyan na peungarôh nyang saban ateueh haté ngon udép awaknyan uroë nyoë? Nikodemus ka meutobat seubagoe haséjih.

TAM1897 D 5.6Kata-kata nyoe geupeugah keu para presiden konferensi, tuha-tuha geurija, ngon ureuëng-ureuëng nyang mat jabatan resmi lam lembaga-lembaga geutanyoe. Gata tateupeue peu kheueh gata nyan sidroe presiden konferensi. Nyan geupeugah keu gata; geukheun, Gata harôh lahé barô. Gata tateupeue peu kheueh gata nyan sidroe tuha geurija. Nyan geupeugah keu gata; geukheun, Gata harôh lahé barô. Gata tateupeue peu kheueh gata mat jabatan resmi lam salah saboh lembaga geutanyoe. Nyan geupeugah bak gata; geupeugah, Gata harôh lahé barô. Geupeugah, Gata harôh meutobat. Nyan hana geupeugah bahwa gata hana tom meutobat; bah pih tanyoe ka lheueh meutobat, jinoe ka watee jih Tuhan geulakèe saboh tobat nyang leubeh seureuséh, saboh peuseumahan nyang leubeh lhôk nibak nyang ka tom gata atawa lôn turi sigohlom nyoe. Hana meumakna keu gata atawa lôn bah pih tanyoe ka lheueh meutobat limong, siplôh, atawa limong blah thôn nyang ka leupah, meunyoe tanyoe hana meutobat jinoe, uroenyoe. Dan uroe nyoe Gobnyan geupeugah, meunyo gata deungo su Gobnyan, bek tapeukareh haté gata. Uroe nyoe, seumentara mantong geukheun uroe nyoe, Gobnyan geupeugah bak gata ngon lôn, Gata harôh lahé barô; gata harôh meutobat; dan meunyo sidroe ureueng hana lahé barô, jih hana jeuet jikalon keurajeuen Allah. Dan na janji nyang meubri beureukat, Saboh haté nyang barô akan Lôn bri keu gata. Syukô keu Tuhan! Jak tanyoe mita Tuhan ngon haté lagèe nyan, ngon sunggôh-sunggôh nyang gohlom na sagai, mangat Gobnyan geungui tanyoe lagèe nyang gohlom na sagai; dan óh lheueh nyan Gobnyan geupeusampôh aib nibak geurèja Gobnyan, dan jih nyan akan jibeudôh jak u luwa hana meukang, ceudah lagèe buleuen, trang lagèe mata uroe, dan peuteuka takôt lagèe teuntra nyang meubendera. Nyan keuh nyang Tuhan keuneuk nibak droeneueh ngon lôn uroenyoe. Peu keuh Gobnyan meuteumèe nyan?