19 වන පරිච්ඡේදය — “ඔවුන්ගේ ඵලවලින් ඔවුන් හඳුනාගන්නහුය”
GSAM 299.1“උන්වහන්සේ සමහරුන් ප්රේරිතයන් ලෙසද, සමහරුන් අනාගතවක්තෘවරුන් ලෙසද, සමහරුන් ශුභාරංචිය ප්රකාශ කරන්නන් ලෙසද, සමහරුන් සභාපාලකයන් හා ගුරුවරුන් ලෙසද දුන්සේක. ඒ, ශුද්ධවන්තයන් සම්පූර්ණ කිරීම පිණිසද, සේවයේ කාර්යය පිණිසද, ක්රිස්තුස්වහන්සේගේ ශරීරය ගොඩනැඟීම පිණිසද ය. අප සියල්ලන් ඇදහිල්ලේද දෙවියන්වහන්සේගේ පුත්රයාණන් පිළිබඳ දැනගැන්මේද එකමුතුකමටත්, සම්පූර්ණ මනුෂ්යභාවයටත්, ක්රිස්තුස්වහන්සේගේ පූර්ණත්වයේ උසස්කමේ ප්රමාණයටත් පැමිණෙන තුරු එසේ ය.”1
GSAM 299.2පරිපූර්ණ දවස පැමිණෙන තුරු ස්වාමීන්වහන්සේගේ කාර්යය “උන්වහන්සේ කැමති වූ ලෙස” ඉටු කරන පිණිස ගැලවුම්කරුවාණන් තම ආත්මයාණන්ගේ දීමනා සභාව තුළ තැබූ විට, යම් ප්රකාශවීමක් ස්වර්ගයෙන්ද නැතහොත් නපුරු ආත්මයන්ගෙන්ද යන්න අනුමාන කිරීමට තම සෙනඟ අත්හැරියේ නැත. එම ආත්මය දෙවියන්වහන්සේගෙන්ද නැද්ද යන්න අපට දැනගත හැකි වන පිණිස උන්වහන්සේ නියමයන් දෙනසේක. අනාගතවක්තෘ යෝවෙල් පුරෝකථනය කළ පරිදි, ස්වාමීන්වහන්සේ සියලු මාංසය පිට තම ආත්මයාණන් වගුරුවන, පුත්රයන්ද දූවරුන්ද අනාවැකි පවසන මේ අන්තිම දවස්වල පවා,2 සෙනඟ අනාවැකි කීම හෙළා නොදැකිය යුතු බවත්, “සියල්ල සෝදිසි කර” “යහපත් දේ තදින් අල්ලාගත යුතු” බවත් පාවුල් කියයි.3
GSAM 299.3දෙවියන්වහන්සේගේ ආත්මයාණන්ගේ ක්රියාව හඳුනාගැනීමට ශුද්ධ ලියවිල්ලෙහි දී ඇති නියමයන් සමඟ සැසඳීමෙන් මිස, එවැනි ප්රකාශවීම් පරීක්ෂා කළ හැක්කේ වෙන කෙසේද? සීමිත මනසකට වටහාගත නොහැකි සියල්ල අනිවාර්යයෙන්ම දෙවියන්වහන්සේගෙන් පැමිණෙන්නේ නැත. මක්නිසාද අන්තිම දවස්වල සාතන් ලෝකය රවටන පිණිස හා සර්වපරාක්රම දෙවියන්වහන්සේගේ ඒ මහත් දවසේ යුද්ධයට ඔවුන් රැස් කරන පිණිස හාස්කම් කරන බව බයිබලය ප්රකාශ කරයි.4 එබැවින් සැබෑ ආත්මික දීමනාවක් හඳුනාගත හැක්කේ එම ප්රකාශවීම බයිබලයේ නියමයන් සමඟ ප්රවේශමෙන් සැසඳීමෙනි. ව්යාජ මුදල් හඳුනාගැනීමේදී ලෝකයේ මනුෂ්යයන් දක්වන සැලකිල්ලම මෙහිදීත් අවශ්ය ය.
GSAM 300ව්යාජ මුදල් හඳුනාගැනීම
GSAM 300.11863 අප්රේල් මාසයේ ඩිට්රොයිට් බැංකු නෝට්ටු වාර්තාකරු පුවත්පතෙහි ප්රෙස්ටන් මහතා ව්යාජ නෝට්ටු හඳුනාගැනීම සඳහා නියමයන් පහක් ඉදිරිපත් කළේය. තමා සතු වන සෑම නෝට්ටුවක්ම එම නියමයන් අනුව දැඩි ලෙස පරීක්ෂා කරන කිසිවකු රැවටීමට බිය විය යුතු නැති බව ඔහු ප්රකාශ කළේය.
GSAM 300.2අනාවැකියේ දීමනාවක් පරීක්ෂා කිරීමට, ශුද්ධ ලියවිල්ලේ සඳහන් කාලවල ප්රකාශ වූ එවැනි දීමනා පිළිබඳ විස්තරය සමඟ එය සැසඳීමත්, එහි දී ඇති නියමයන් අනුව එය පරීක්ෂා කිරීමත් තරම් ස්ථිර මඟක් නැත. ශුද්ධ ලියවිලි සියලු යහපත් ක්රියාවලට අප සම්පූර්ණයෙන් සූදානම් කරයි (2 තිමෝති 3:16, 17). ඒවා අනාවැකියේ දීමනාව ප්රකාශ වූ ආකාරය ගැනත්, දෙවියන්වහන්සේගේ ආත්මයාණන්ගේ සැබෑ ක්රියාව සාතන්ගේ ව්යාජ දීමනා සහිත ක්රියාවලින් වෙන් කර හඳුනාගත හැකි ආකාරය ගැනත් නිවැරදි වාර්තාවක් සපයයි.
GSAM 300සැබෑ දීමනා හඳුනාගැනීම සඳහා නියමයන්
GSAM 300.3දෙවියන්වහන්සේගේ ආත්මයාණන්ගේ සැබෑ ප්රකාශවීම් සාතන්ගේ ක්රියාවලින් වෙන් කර හඳුනාගත හැකි වන පිණිස ස්වාමීන්වහන්සේ තම වචනයෙහි අවම වශයෙන් පැහැදිලි නියමයන් හතක් දී තිබේ.
GSAM 300පළමු නියමය—විශේෂ උපදෙස්
GSAM 300.4අනාගතවක්තෘ යෙසායා අන්තිම දවස්වල පවතින තත්ත්වයන් ගැන කතා කරමින් මෙසේ කියයි: “සාක්ෂිය බැඳ තබන්න; මාගේ ගෝලයන් අතර ව්යවස්ථාව මුද්රා කරන්න. යාකොබ්ගේ වංශයෙන් තම මුහුණ සඟවාගන්නා ස්වාමීන්වහන්සේ කෙරෙහි මම බලා සිටින්නෙමි; උන්වහන්සේ එන තුරු බලාපොරොත්තු වන්නෙමි.... තවද ඔවුන් නුඹලාට, මළවුන්ගේ ආත්මයන් විමසන්නන් වෙතටත්, සිහින් හඬ නඟන හා මුමුණන මායාකාරයන් වෙතටත් ගොස් විමසන්නැයි කියන විට, සෙනඟක් තමන්ගේ දෙවියන්වහන්සේගෙන් විමසිය යුතු නොවේද? ජීවත්වන්නන් වෙනුවෙන් මළවුන්ගෙන් විමසිය යුතුද? ව්යවස්ථාව හා සාක්ෂිය වෙත යන්න; ඔවුන් මේ වචනයට එකඟව කතා නොකරන්නේ නම්, ඒ ඔවුන් තුළ ආලෝකයක් නැති බැවිනි.”5
GSAM 301.1මෙම ශුද්ධ ලියවිලි පාඨය, දෙවියන්වහන්සේගේ ව්යවස්ථාවට මුද්රාව නැවත පිහිටුවීමට වෙහෙසෙන සෙනඟක් වෙත අවධානය යොමු කරයි. ඔවුහු ස්වාමීන්වහන්සේ කෙරෙහි බලා සිටිමින් උන්වහන්සේගේ සේවයෙහි යෙදෙන සෙනඟකි. ඔවුහු උන්වහන්සේ එනතුරු බලාපොරොත්තුවෙන් සිටිති; එනම්, ඔවුහු උන්වහන්සේගේ පැමිණීම බලාපොරොත්තුවෙන් සිටිති. එයද, තමන් මළවුන්ගේ ආත්මයන් යයි කියාගන්නා ආත්මයන් තමන්ගෙන් විමසන ලෙස සෙනඟගෙන් ඉල්ලා සිටින කාලයකදී ය. සමහරු ඔවුන්ගේ කැඳවීමට සවන් දී දැනුම ලබාගැනීම සඳහා මළවුන්ගෙන් විමසති; එහෙත් ස්වාමීන්වහන්සේ තමන්ව සොයන ලෙස තම සෙනඟට ආරාධනා කරනසේක. එයින් සැබවින්ම කියැවෙන්නේ ඔවුන් උන්වහන්සේව සොයන්නේ නම් උන්වහන්සේ ඔවුන්ට විශේෂ උපදෙස් දෙන බව ය. කිසිදු තොරතුරක් දිය නොහැකි මළවුන්ගෙන් විමසීමට ඔවුන්ට අවශ්ය නැත. මක්නිසාද “ඉර යට සිදු වන කිසිවක් සම්බන්ධයෙන් ඔවුන්ට නැවත කිසිදා කොටසක් නැත”; තවද “මළාහු කිසිවක් නොදනිති.”6
GSAM 301.2ඉහත ශුද්ධ ලියවිලි පාඨයෙහි සියලු පණිවුඩ පරීක්ෂා කළ යුතු නියමයක් දී තිබේ: “ඔවුන් මේ වචනයට එකඟව කතා නොකරන්නේ නම්, ඒ ඔවුන් තුළ ආලෝකයක් නැති බැවිනි.” ස්වාමීන්වහන්සේගෙන් පැමිණෙන සියලු පණිවුඩ උන්වහන්සේගේ වචනයටත් ව්යවස්ථාවටත් එකඟව කතා කරනු ඇත.
GSAM 301.3මෙම නියමය වයිට් මහත්මියගේ ලියවිලිවලට යොදමින්, පසුගිය අවුරුදු පනස්දෙක පුරා මම ඇගේ සාක්ෂි ප්රවේශමෙන් කියවා, දෙවියන්වහන්සේගේ ව්යවස්ථාව හා බයිබලයේ සාක්ෂිය සමඟ ඒවා සැසඳූ බව කියමි. මේ දෙක අතර ඉතාමත් පරිපූර්ණ එකඟතාවක් මට පෙනේ. ඇගේ උපදෙස් ශුද්ධ ලියවිල්ල වෙනුවට තැබිය හැකි අලුත් එළිදරව්වක් දීමට නොව, මේ කාලයේ මිනිසුන් කොතැනදී හා කෙසේ මුළා වී වචනයෙන් ඈත් වීමට ඉඩ තිබේද යන්න අපට පෙන්වා දීමට ය. වයිට් මහත්මියගේ සාක්ෂිවලට හිමි ස්ථානය වඩාත් හොඳින් පැහැදිලි කළ හැක්කේ ඒවා ගැන ඇයම ලියා ඇති දෙයිනි:—
GSAM 301.4“ඉතාමත් අඳුරු වූ මනස පවා ආලෝකවත් කිරීමට දෙවියන්වහන්සේගේ වචනය ප්රමාණවත් ය. එය තේරුම්ගැනීමට යම් ආශාවක් ඇති අයට එය තේරුම්ගත හැකිය. එහෙත් මේ සියල්ල තිබියදීත්, දෙවියන්වහන්සේගේ වචනය අධ්යයනය කරන බව කියාගන්නා සමහරු එහි ඉතාමත් පැහැදිලි ඉගැන්වීම්වලට සෘජුවම විරුද්ධව ජීවත් වන බව පෙනේ. එබැවින් ස්ත්රී පුරුෂයන්ට නිදහසට කරුණක් නැති වන පිණිස, ඔවුන් අනුගමනය කිරීමට නොසැලකිලිමත් වූ වචනය වෙත නැවත ගෙන ඒමට දෙවියන්වහන්සේ පැහැදිලි හා සෘජු සාක්ෂි දෙනසේක.
GSAM 302.1“නිවැරදි ජීවන පුරුදු ගොඩනැඟීම සඳහා පොදු ප්රතිපත්ති දෙවියන්වහන්සේගේ වචනයෙහි බහුලව තිබේ. පොදු හා පුද්ගලික සාක්ෂිවල අරමුණ වී ඇත්තේ විශේෂයෙන්ම මේ ප්රතිපත්ති වෙත ඔවුන්ගේ අවධානය යොමු කිරීම ය.... නුඹලා ශුද්ධ ලියවිලි හොඳින් නොදන්නහු ය. බයිබලයේ ප්රමිතියට ළඟා වීමටත් ක්රිස්තියානි සම්පූර්ණත්වය අත් කරගැනීමටත් ආශාවෙන් දෙවියන්වහන්සේගේ වචනය අධ්යයනය කළේ නම්, නුඹලාට සාක්ෂි අවශ්ය නොවන්නට තිබිණි....
GSAM 302.2“දෙන ලද සාක්ෂි මඟින් නුඹලාට අනතුරු ඇඟවීමටත්, තරවටු කිරීමටත්, උපදෙස් දීමටත්, තම වචනයේ සත්යයේ වැදගත්කම නුඹලාගේ සිත්වල තදින් සටහන් කිරීමටත් ස්වාමීන්වහන්සේ අදහස් කරනසේක. ලියන ලද සාක්ෂිවල අරමුණ අලුත් ආලෝකයක් දීම නොව, දැනටමත් එළිදරව් කරන ලද දේවානුභාවයෙන් ලැබුණු සත්යයන් හදවතෙහි පැහැදිලිව සටහන් කිරීම ය.... අමතර සත්යයක් හෙළි කරනු නොලැබේ. එහෙත් දෙවියන්වහන්සේ සාක්ෂි මඟින් දැනටමත් දී ඇති මහත් සත්යයන් සරල කොට, තමන්ම තෝරාගත් ආකාරයෙන් සෙනඟ ඉදිරියට ගෙනැවිත් තිබේ. ඒවා මඟින් සිත අවදි කර එහි ඒවා තදින් සටහන් කරවන්නේ සියල්ලන්ටම නිදහසට කරුණක් නැති වන පිණිස ය....
GSAM 302.3“සාක්ෂිවල අරමුණ දෙවියන්වහන්සේගේ වචනය සුළු කොට සැලකීම නොව, එය උසස් කිරීමත්, සත්යයේ අලංකාර සරලකම සියල්ලන්ගේ සිත්වල සටහන් වන පිණිස ඒ වෙත සිත් ඇදගැනීමත් ය.... තමන් දෙවියන්වහන්සේගේ විශේෂ වස්තුව යයි දැන් කියාගන්නා සෙනඟ උන්වහන්සේගේ වචනයෙහි නියම කර ඇති උන්වහන්සේගේ ඉල්ලීම්වලට කීකරු වන්නේ නම්, ඔවුන් තම යුතුකමට අවදි කරවීමටත්, ඔවුන්ගේ පව්කාරකම හා දෙවියන්වහන්සේගේ වචනයට කීකරු වීම නොසලකා හැරීමෙන් ඇති වන භයානක අනතුර ඔවුන්ගේ සිත්වල සටහන් කිරීමටත් විශේෂ සාක්ෂි දෙනු නොලැබේ.”7
GSAM 302දෙවන නියමය—සැබෑ අනාගතවක්තෘවරු
GSAM 302.4සියලු සැබෑ අනාගතවක්තෘවරුන් දෙවියන්වහන්සේගේ ව්යවස්ථාවට හා උන්වහන්සේගේ වචනයේ සාක්ෂියට එකඟව කතා කරන බව අපි දැනටමත් ඉගෙනගෙන ඇත්තෙමු. සැබෑ අනාගතවක්තෘවරුන්ගේ ඉගැන්වීම විස්තර කරන තවත් නියමයක් ප්රේරිත යොහන් දෙයි. ඔහු මෙසේ කියයි: “ප්රේමවන්තයෙනි, සෑම ආත්මයක්ම විශ්වාස නොකරන්න; ආත්මයන් දෙවියන්වහන්සේගෙන්දැයි පරීක්ෂා කරන්න. මක්නිසාද බොරු අනාගතවක්තෘවරු බොහෝ දෙනෙක් ලෝකයට නික්ම ගොස් සිටිති. නුඹලා දෙවියන්වහන්සේගේ ආත්මයාණන් හඳුනාගන්නේ මෙයිනි: යේසුස් ක්රිස්තුස්වහන්සේ මාංසයෙන් පැමිණ සිටින බව පිළිගන්නා සෑම ආත්මයක්ම දෙවියන්වහන්සේගෙන් ය. යේසුස් ක්රිස්තුස්වහන්සේ මාංසයෙන් පැමිණ සිටින බව පිළි නොගන්නා සෑම ආත්මයක්ම දෙවියන්වහන්සේගෙන් නොවේ. ඒ වනාහි පැමිණෙන්නේයයි නුඹලා ඇසූ ක්රිස්තු විරෝධියාගේ ආත්මය ය; එය දැනුත් ලෝකයෙහි තිබේ.”8
GSAM 303.1ඉහත ශුද්ධ ලියවිලි පාඨය ප්රවේශමෙන් සලකා බලන්න. යේසුස් ක්රිස්තුස්වහන්සේ “මාංසයෙන් පැමිණි බව” යමෙකු පිළිගැනීම ගැන නොව, “මාංසයෙන් පැමිණ සිටින බව” පිළිගැනීම ගැන එය කියයි. එනම්, අපගේ ඇදහිල්ලට ප්රතිචාර වශයෙන් උන්වහන්සේ තම ආත්මයාණන් මඟින් පැමිණ අප තුළ වාසය කරන බව ය. සැබවින්ම මෙය ශුභාරංචියේ කේන්ද්රීය සත්යය ය: “නුඹලා තුළ සිටින ක්රිස්තුස්වහන්සේ, එනම් මහිමයේ බලාපොරොත්තුව ය.”9
GSAM 303.2ස්වර්ගීය මාර්ගයෙහි යම් දියුණුවක් ලැබීමට නම්, අප තුළ වාසය කරන ගැලවුම්කරුවාණන් ලෙස ක්රිස්තුස්වහන්සේ අපට අවශ්ය බව වයිට් මහත්මියගේ සියලු ලියවිලිවල දක්නට ලැබෙන ප්රායෝගික තේමාව ය. මුලදීත්, අගදීත්, සෑම විටමත් ක්රිස්තුස්වහන්සේ අවශ්ය බව ඇගේ ලියවිලි උගන්වයි. මෙයට නිදසුනක් ලෙස ඇගේ ක්රිස්තුස්වහන්සේ වෙත පියවර නමැති පොත කෙරෙහි අවධානය යොමු කෙරේ. දැන් එය මුද්රණය කරන විදේශ භාෂා දහඅටේ පිටපත් දහස් ගණන හැරුණු විට, ඉංග්රීසි භාෂාවෙන් පමණක් පිටපත් ලක්ෂයකට වඩා අලෙවි වී තිබේ. එම පොත කියවූ ප්රෙස්බිටේරියානු දේවගැතිවරයෙක් තම සභාවේ සාමාජිකයන්ට හා මිතුරන්ට දීම සඳහා පිටපත් තුන්සියයකට වඩා ඇණවුම් කර, “මේ පොත ලියා ඇත්තේ ස්වාමීන් වන යේසුස් ක්රිස්තුස්වහන්සේ ඉතා හොඳින් හඳුනන කෙනෙකු විසිනි” යයි කීවේය.
GSAM 303තුන්වන නියමය—බොරු අනාගතවක්තෘවරු
GSAM 303.3බොරු අනාගතවක්තෘවරුන් හඳුනාගැනීමට යොහන් නියමයක් දෙයි: “ඔවුහු ලෝකයෙන් ය. එබැවින් ලෝකයට අයත් දේ කතා කරති; ලෝකයද ඔවුන්ට සවන් දෙයි.”10 බොරු අනාගතවක්තෘවරුන්ගේ ඉගැන්වීම තමන්වම ප්රතික්ෂේප කර කුරුසිය උසුලන මාර්ගය උසස් කරනවා වෙනුවට මාංසික සිතේ ආශාවන් සනසනු ඇත. බොරු අනාගතවක්තෘවරු “ඉශ්රායෙල්ගේ ශුද්ධ තැනන්වහන්සේ” උසස් කරනවා වෙනුවට “සිතට ප්රිය දේ” උගන්වනු ඇත.11 වයිට් මහත්මියගේ ලියවිලිවල පිටු කීපයක් පමණක් කියවන කෙනෙකුට පවා ඒවා තමන්වම ප්රතික්ෂේප කර කුරුසිය උසුලන මාර්ගයට අනුව ඇති බවත්, ලෞකික, මාංසික සිතක් සතුටු කරන ස්වභාවයෙන් යුක්ත නොවන බවත් පෙනේ.
GSAM 304හතරවන නියමය—දුක් විඳීම හා ඉවසීම
GSAM 304.1මේ විෂය තවදුරටත් සොයා බලන විට, හතරවන නියමය ලෙස අපි ප්රේරිත යාකොබ්ගේ වචන ගනිමු: “මාගේ සහෝදරයෙනි, ස්වාමීන්වහන්සේගේ නාමයෙන් කතා කළ අනාගතවක්තෘවරුන්, පීඩා විඳීමේද ඉවසීමේද ආදර්ශයක් කොට ගන්න.”12 ඒ පුරාණ අනාගතවක්තෘවරුන්ගේ අත්දැකීම් කියවන විට, ඔවුන්ට පැමිණි මහත්ම පරීක්ෂාවලින් එකක් වූයේ ඉශ්රායෙල් ඔවුන්ට දෙන ලද පැහැදිලි සාක්ෂි ප්රතික්ෂේප කිරීම හෝ ඒවාට විරුද්ධව යෑම දැකීම බව අපට ඉගෙනගත හැකිය. ඒ කාලය පිළිබඳ කෙටි අධ්යයනයකින් සැබෑ අනාගතවක්තෘවරුන්ගේත් බොරු අනාගතවක්තෘවරුන්ගේත් ස්වභාවය වහාම පැහැදිලි වේ. “සේනාවල ස්වාමීන්වහන්සේ මෙසේ වදාරනසේක: නුඹලාට අනාවැකි කියන අනාගතවක්තෘවරුන්ගේ වචනවලට සවන් නොදෙන්න. ඔවුහු නුඹලා නිෂ්ඵලකමට පමුණුවති. ඔවුන් කතා කරන්නේ තමන්ගේම සිතේ දර්ශනයක් මිස ස්වාමීන්වහන්සේගේ මුඛයෙන් නික්මෙන දෙයක් නොවේ.”13
GSAM 304.2පාඨකයා නිෂ්ඵලකමට පමුණුවන කිසිවක් වයිට් මහත්මියගේ ලියවිලිවල නැත. ඒ වෙනුවට තවත් අයකු පැවසූ පරිදි, “ගණන් කළ නොහැකි වාර ගණනකදී මම සාක්ෂිවලින් මහත් ආත්මික ප්රයෝජනයක් ලබා ඇත්තෙමි. සැබවින්ම, දෙවියන්වහන්සේ කෙරෙහි මාගේ ඇදහිල්ලේ අඩුව, භක්තියේ අඩුව හා ආත්මයන් ගලවාගැනීමට ඇති උනන්දුවේ අඩුව ගැන මට තරවටු ලැබෙන බවක් නොහැඟී මම කිසිවිටෙක ඒවා නොකියවමි.” එසේ නම් වයිට් මහත්මියගේ සාක්ෂිවල ප්රතිඵලය, යෙරෙමියා විස්තර කරන බොරු අනාගතවක්තෘවරුන්ගේ ඉගැන්වීම්වල ප්රතිඵලයට වඩා අතිශයින් වෙනස් බව නිසැක ය.
GSAM 304.3බොරු අනාගතවක්තෘවරුන් කෙසේ උගන්වනු ඇද්දැයිද අනාගතවක්තෘවරයා අපට කියයි: “මා හෙළාදකින්නන්ට ඔවුහු නිතරම, නුඹලාට සමාදානය ලැබෙන්නේයයි ස්වාමීන්වහන්සේ වදාළසේකැයි කියති. තවද තමාගේම සිතේ සිතිවිලි අනුව හැසිරෙන සෑම කෙනෙකුටම, නුඹලාට කිසි විපතක් නොපැමිණෙන්නේයයි කියති.”14
GSAM 304.4වයිට් මහත්මිය තම සාක්ෂිවලින් දෙන ඉගැන්වීමේ ස්වභාවය ගැන, ප්රවේශමෙන් කියවන පාඨකයකුගේ පහත වචන උපුටා දක්වමි:
GSAM 304.4“ඇගේ සියලු සාක්ෂි මම මුල සිට අග දක්වා කියවා ඇත්තෙමි; ඒවායින් වැඩි හරියක් බොහෝ වාරයක් කියවා ඇත්තෙමි. එහෙත් ඒ සියල්ලෙහි එකම එක අසදාචාරාත්මක වාක්යයක්වත්, මුළුමනින්ම පවිත්ර හා ක්රිස්තියානි නොවන කිසිවක්වත් සොයාගැනීමට මට කිසිදා නොහැකි විය. බයිබලයෙන් හෝ ක්රිස්තුස්වහන්සේගෙන් කිසිවකු ඈත් කරන කිසිවක් එහි නැත. එහෙත් දෙවියන්වහන්සේට කීකරු වීමටත්, යේසුස්වහන්සේට ප්රේම කිරීමටත්, ශුද්ධ ලියවිලි විශ්වාස කිරීමටත්, නිරතුරුවම ඒවා සොයා බැලීමටත් ඉතාමත් ඕනෑකමින් කරන ආයාචනා එහි මට හමු වේ. දෙවියන්වහන්සේට මෙතරම් සමීපකමක්ද, මෙතරම් ගැඹුරු භක්තියක්ද, ශුද්ධ ජීවිතයක් ගත කිරීමට මෙතරම් බැරෑරුම් ආයාචනාද ඇති කළ හැක්කේ දෙවියන්වහන්සේගේ ආත්මයාණන්ට පමණි.”
GSAM 305.1මුල සිටම ඇගේ සාක්ෂි ප්රවේශමෙන් සලකා බැලූ අයෙක් මෙසේ ලියයි:
GSAM 305.1“බියෙන් හෝ පක්ෂපාතයෙන් තොරව, පැහැදිලිව හා විශ්වාසවන්තව කටයුතු කිරීම සම්බන්ධයෙන් කිසිදු අඩුවක් නොතිබූ බවට සාක්ෂි දීමට මම කැමැත්තෙමි. මේ කාර්යය පාලනය කරන බලය පහත් හා නපුරු චේතනා වූයේ නම්, සිත විමසා බලන සාක්ෂි හා විශ්වාසවන්ත තරවටු වෙනුවට චාටු වචන පවතිනු ඇත. කතාවේ පැහැදිලිකම, වැරදි සඳහා විශ්වාසවන්ත තරවටු, ගැලවුම්කරුවාණන්ගේ අවශ්යතාව දැනෙන බියෙන් වෙවුලන ආත්මයන්ටත්, යටහත්කමින් තම වැරදි ඉවත් කිරීමට උත්සාහ කරන වරදට වැටුණු අයටත් දයානුකම්පාවේ හා දිරිගැන්වීමේ වචන—මේවා ඇගේ මෙහෙයෙහි විශාල කොටසක් වී තිබේ. දර්ශනයෙන් ඇය දුටු බොහෝ පුද්ගලයන්ගේ වැරදි තරවටු කරමින් වයිට් මහත්මිය දුන් සාක්ෂිය මහත් විශ්වාසවන්තකමින් ඉදිරිපත් කරනු ලැබ ඇති අතර, එයින් ඉතාමත් යහපත් ප්රතිඵල ඇති වී තිබේ.”15
GSAM 305පස්වන නියමය—සැබෑ අනාවැකි ඉටු වේ
GSAM 305.2සැබෑ හා බොරු අනාගතවක්තෘවරුන් ගැන මෝසෙස් කළ ප්රකාශයක් ද්විතීය කථාවේ දහඅටවන පරිච්ඡේදයෙහි හමු වේ. ඔහු මෙසේ කියයි: “ස්වාමීන්වහන්සේ නොවදාළ වචනය අප හඳුනාගන්නේ කෙසේද? අනාගතවක්තෘවරයෙකු ස්වාමීන්වහන්සේගේ නාමයෙන් කතා කළ විට, ඒ කාරණය සිදු නොවන්නේ නම් හෝ ඉෂ්ට නොවන්නේ නම්, එය ස්වාමීන්වහන්සේ නොවදාළ කාරණය ය. අනාගතවක්තෘවරයා එය කතා කර ඇත්තේ අහංකාරයෙන් ය. නුඹ ඔහුට බිය නොවන්න.”16
GSAM 305.3මෙම කාරණයම පහත ශුද්ධ ලියවිලි පාඨවලද හමු වේ: “ස්වාමීන්වහන්සේ අණ නොකළ කල්හි, යමක් කියා එය සිදු කරවන්නා කවරෙක්ද?”17 අනාගතවක්තෘ සාමුවෙල් ගැන, “ඔහු කියන සියල්ල නිසැකවම ඉෂ්ට වන්නේය” යයි කියන ලදි.18 “අනාගතවක්තෘවරයාගේ වචනය ඉෂ්ට වූ විට, ස්වාමීන්වහන්සේ සැබවින්ම ඔහු එවූ බව ඒ අනාගතවක්තෘවරයා ගැන දැනගනු ලැබේ.”19
GSAM 306.1ලේඛකයා ඊ. ජී. වයිට් මහත්මිය අනාවැකිමය දර්ශනයක සිටිනු මුල් වරට දැක දැන් අවුරුදු පනස්තුනකට වඩා ගත වී තිබේ. මේ අවුරුදු තුළ ඇය ඉදිරියේදී සිදු වන දේ ගැන අනාවැකිමය ප්රකාශ බොහොමයක් කර තිබේ. මේ පුරෝකථනවලින් සමහරක් දැනටමත් ඉටු වූ සිදුවීම් ගැන ය; සමහරක් ඉටු වෙමින් පවතී; තවත් සමහරක් තවමත් අනාගතයට අයත් ය. අතීත හෝ වර්තමාන සිදුවීම්වලට අදාළ ඒවා අතරින් එකක්වත් අසාර්ථක වූ අවස්ථාවක් මම නොදනිමි. ඇගේ පුරෝකථනවලින් සමහරක් දැනටමත් සඳහන් කර තිබේ. අපගේ විස්තරය ඉදිරියට ගෙන යන විට තවත් ඒවා ඊළඟ පරිච්ඡේදවල දැක්වෙනු ඇත.
GSAM 306හයවන නියමය—හාස්කම් සැබෑ අනාගතවක්තෘවරයෙකු හඳුනාගැනීමේ පරීක්ෂණයක් නොවේ
GSAM 306.2සැබෑ අනාගතවක්තෘවරයෙකුගේ ලකුණ හාස්කම් කිරීම බව බොහෝ දේවධර්ම ලේඛකයන් අවධාරණය කර ඇති අතර, ශුද්ධ ලියවිලි පිළිබඳ අටුවාවලද එසේ සඳහන් කර තිබේ. එවැනි නියමයක් ශුද්ධ ලියවිලිවලින් අපට තවමත් දැනගන්නට ලැබී නැත.
GSAM 306.3හාස්කම් කිරීම සැබෑ අනාගතවක්තෘවරයෙකු පිළිබඳ සාක්ෂිය නම්, එළිදරව් 19:20 හි සඳහන් “බොරු අනාගතවක්තෘවරයා” අවසානයේ සැබෑ අනාගතවක්තෘවරයෙකු ලෙස ප්රකාශ කරනු ලැබේ. මක්නිසාද එහි මෙසේ කියා තිබේ: “මෘගයා අල්ලාගනු ලැබීය. ඔහු ඉදිරියෙහි හාස්කම් කර, ඒවායින් මෘගයාගේ ලකුණ ලැබූවන් රැවටූ බොරු අනාගතවක්තෘවරයාද ඔහු සමඟ අල්ලාගනු ලැබීය.” එම බලය ගැනම එළිදරව් 13:14 හි නැවතත් සඳහන් කරන්නේ, එය “ඔහුට මෘගයා ඉදිරියෙහි කිරීමට බලය ලැබුණු හාස්කම් මඟින් පොළොවෙහි වසන්නන්” රවටන බව ය. මේ නියමය ඒ ආකාරයෙන්ම යෙදුවහොත්, සාතන් පවා සැබෑ අනාගතවක්තෘවරයෙකු යයි නිගමනය කිරීමට අපට සිදු වේ. අන්තිම පීඩා හතෙන් හයවන පීඩාව යටතේ විශේෂ කාර්යයක් කරන ඇතැම් ආත්මයන් හඳුන්වනු ලබන්නේ “හාස්කම් කරන යක්ෂයන්ගේ ආත්මයන් ය. ඔවුහු සර්වපරාක්රම දෙවියන්වහන්සේගේ ඒ මහත් දවසේ යුද්ධයට රැස් කරන පිණිස පොළොවේද මුළු ලෝකයේද රජවරුන් වෙත නික්ම යති” යනුවෙනි.20
GSAM 306.4සැබෑ අනාගතවක්තෘවරයෙකු පිළිබඳ සාක්ෂිය සොයාගත යුත්තේ ඔහු දර්ශනයක නොසිටින විට කරන හාස්කම් තුළ නම්, එම පරීක්ෂණයට සමත් වන බයිබලයේ අනාගතවක්තෘවරුන් හමු වන්නේ ඉතා ස්වල්ප දෙනෙකු පමණි. විශේෂයෙන්ම තීරණය ඔවුන්ගේ ක්රියා ගැන වාර්තා වී ඇති දේ මත රඳා පවතින්නේ නම් එය එසේ ය. එලියා, එලිෂා හා පාවුල් වැනි ඇතැම් අනාගතවක්තෘවරුන් හාස්කම් කළ බව වාර්තා වී තිබීම සැබෑ ය. එහෙත් යෙසායා, යෙරෙමියා, දානියෙල්, හොෂෙයා, යෝවෙල්, ආමොස් ආදීන්ගේ හාස්කම් පිළිබඳ වාර්තාවක් බයිබලයෙහි සොයාගෙන ඇත්තේ කවරෙක්ද? එසේ වුවත් ඔවුහු ස්වාමීන්වහන්සේගේ සැබෑ අනාගතවක්තෘවරු වූහ. සැබෑ අනාගතවක්තෘවරයෙකු හඳුනාගැනීමේ පරීක්ෂණය ලෙස ස්වාමීන්වහන්සේ දී ඇති නියමයන් මඟින් ඔවුන් එවැන්නන් බව පෙන්වනු ලැබේ.
GSAM 307.1හාස්කම් කිරීම සැබෑ අනාගතවක්තෘවරයෙකු හඳුනාගැනීමේ පරීක්ෂණය නොවන බව, යොහන් බව්තීස්ත ගැන ශුද්ධ ලියවිලි වාර්තාව කියවීමෙන් පැහැදිලිව පෙනේ. තමාට උපදින්නට සිටි පුත්රයා ගැන දෙවියන්වහන්සේ තමාට දුන් දර්ශනය විස්තර කරමින් ඔහුගේ පියා වූ සෙකරියා පැවසූ පුරෝකථනයෙන් ඔහු අනාගතවක්තෘවරයෙකු වූ බව පෙන්වනු ලැබේ: “නුඹද, දරුව, මහෝත්තමයාණන්ගේ අනාගතවක්තෘවරයා යයි කියනු ලබන්නෙහිය. මක්නිසාද නුඹ ස්වාමීන්වහන්සේගේ මාර්ග සූදානම් කිරීමට උන්වහන්සේට පෙරටුව යන්නෙහිය.”21 තමන් ඉදිරියෙහි මාර්ගය සූදානම් කළ යුතු ඒ අනාගතවක්තෘවරයා යොහන් බව අපගේ ගැලවුම්කරුවාණෝම පිළිගත්සේක. මක්නිසාද උන්වහන්සේ යොහන් ගැන මෙසේ වදාළසේක: “එහෙත් නුඹලා පිටත්ව ගියේ කුමක් බලන්නටද? අනාගතවක්තෘවරයෙකුද? එසේය, මම නුඹලාට කියමි, අනාගතවක්තෘවරයෙකුටත් වඩා උතුම් කෙනෙකු ය. බලව, නුඹට පෙරටුව මාගේ පණිවුඩකරුවා යවමි; ඔහු නුඹ ඉදිරියෙහි නුඹගේ මාර්ගය සූදානම් කරන්නේයයි ලියා ඇත්තේ මොහු ගැන ය. මක්නිසාද මම නුඹලාට කියමි, ස්ත්රීන්ගෙන් උපන් අය අතර යොහන් බව්තීස්තට වඩා උතුම් අනාගතවක්තෘවරයෙක් නැත නොවේද?”22
GSAM 307.2එසේ නම් යොහන් අනාගතවක්තෘවරයෙකු වූ බවට ගැලවුම්කරුවාණන්ගේ පැහැදිලි ප්රකාශයක් මෙහි තිබේ. හාස්කම් කිරීමේ පරීක්ෂණය යොදා ප්රතිඵලය බලමු. ශුභාරංචිකාර යොහන් ලියූ ශුභාරංචියෙහි මේ වචන අපට හමු වේ: “බොහෝ දෙනෙක් උන්වහන්සේ [ක්රිස්තුස්වහන්සේ] වෙතට පැමිණ, යොහන් කිසි හාස්කමක් නොකළේය; එහෙත් මේ තැනන්වහන්සේ ගැන යොහන් කී සියල්ල සැබෑ වූයේය යයි කීවෝය.”23 සැබෑ අනාගතවක්තෘවරයෙකුගේ ලකුණ හාස්කම් කිරීම යන ප්රකාශය සම්පූර්ණයෙන්ම බිඳ හෙළීමට මෙම ප්රකාශය පමණක් ප්රමාණවත් ය.
GSAM 307.3ද්විතීය කථාව 13:1-3 හි දී ඇති මෙම නියමය අපගේ වර්තමාන ලැයිස්තුවෙහි හයවන නියමය ලෙස නම් කරමු. එහි අරමුණ නම්, යම් පුදුමාකාර හෝ හාස්කම් සහිත දෙයක නැඹුරුව ස්වාමීන්වහන්සේට වඩාත් සමීප කරවීමද, නැතහොත් උන්වහන්සේගෙන් ඈත් කරවීමද යන්න මුලින්ම ප්රවේශමෙන් සොයා බලන තුරු එය පසුපස දිව යෑමෙන් අප ආරක්ෂා කිරීම ය. මේ පාඨයෙන් සැබවින්ම අපට කියන්නේ සියලු නියමයන් යොදන ලෙසත්, විශේෂයෙන්ම එය දෙවියන්වහන්සේට හා උන්වහන්සේගේ ව්යවස්ථාවට එකඟදැයි බලන ලෙසත් ය.
GSAM 308.1ව්යාජ ලෙස පෙනී සිටින්නෙකු හාස්කමක් කරන්නේ නම්, එය ප්රවේශමෙන් පරීක්ෂා කළ විට, ඒ සමඟ දෙවියන්වහන්සේගේ වචනයේ පරිශුද්ධ සත්යයන්ගෙන් බැහැර වීමක්ද, තමන්වම ප්රතික්ෂේප කිරීමේ මාර්ගය මඟහැරීමට නැඹුරු වූ සිතකට ගැළපෙන සේ ප්රමිතිය පහත් කිරීමක්ද දක්නට ලැබෙන බව මේ හයවන නියමය උගන්වයි. ස්වාමීන්වහන්සේ එවැනි ව්යාජ පුද්ගලයෙකු නැඟී සිටීමට ඉඩ දෙනසේක. ඔහුගේ ක්රියාමාර්ගය දෙවියන්වහන්සේගේ සැබෑ දරුවාට පරීක්ෂණයක් වේ; එම හාස්කම් කරන්නාගේ නැඹුරුව හෝ චේතනාව ප්රවේශමෙන් කිරා බැලීමට එය ඔහුට අවස්ථාවක් දෙයි. බොරු හාස්කම් කරන්නාට වසඟ නොවී දෙවියන්වහන්සේගේ වචනය තදින් අල්ලාගන්නා අය එවැනි අත්දැකීමක ප්රතිඵලයක් ලෙස දෙවියන්වහන්සේ තුළ ශක්තිමත් වී ඉදිරියට පැමිණෙති.
GSAM 308.2බොහෝ දෙනා තමන් “ඇදහිල්ලෙන් සුවකරන්නන්,” “දිව්ය සුවකරන්නන්,” “ක්රිස්තියානි විද්යාවේ සුවකරන්නන්” ආදීන් යයි කියාගන්නා මේ නපුරු දවස්වල, ශුද්ධ ලියවිල්ලේ නියමයන් ඉතා සැලකිල්ලෙන් යෙදීම යහපත් ය. මක්නිසාද මේ “සුවකරන්නන්ගෙන්” ඇතැමෙකුගේ අභිප්රාය හා අරමුණ පැහැදිලිව හඳුනාගැනීමට දිව්ය නියමයන් හා ශුද්ධාත්මයාණන්ගේ ආලෝකය අවශ්ය වනු ඇත; ඔවුන්ගේ ක්රියා එතරම්ම සියුම් ය. අනෙක් අතට, දෙවියන්වහන්සේගේ ව්යවස්ථාව හා මේ කාලය සඳහා උන්වහන්සේගේ සත්යය ප්රසිද්ධියේම නොසලකා හරින අයද සිටිති. සමහර අවස්ථාවල මේ ව්යාජ “සුවකරන්නෝ” දෙවියන්වහන්සේගේ ව්යවස්ථාව ගැන සඳහන් කළ පමණින් පවා වියරුවෙන් පිරුණු මිනිසුන් මෙන් කෝපයෙන් හැසිරී තිබේ. ස්වාමීන්වහන්සේට තම ශුද්ධ ව්යවස්ථාව ප්රකාශ කරන පණිවුඩයක් ඇති බව යම් සේ නිසැකද, එසේම උන්වහන්සේගේ ව්යවස්ථාවට බැණවදින, ඒ ගැන සඳහන් කරන අය පවා තමන් ඉදිරියෙන් නෙරපා හරින මිනිසුන් තුළ ශුද්ධාත්මයාණන්ගේ පෙලඹවීම් නැති බවද නිසැක ය.
GSAM 308හත්වන නියමය—ඔවුන්ගේ ඵල
GSAM 308.3“බොරු අනාගතවක්තෘවරුන්ගෙන් ප්රවේශම් වන්න. ඔවුහු බැටළු වෙස් ගෙන නුඹලා වෙතට පැමිණෙති; එහෙත් ඇතුළතින් ගොදුරු ගිලදමන වෘකයෝ ය. ඔවුන්ගේ ඵලවලින් නුඹලා ඔවුන් හඳුනාගන්නහුය. මනුෂ්යයෝ කටු පඳුරුවලින් මිදිවත්, කටු පැළෑටිවලින් අත්තික්කාවත් නෙළාගනිත්ද? එසේම සෑම යහපත් ගසක්ම යහපත් ඵල දරයි; එහෙත් නරක ගස නරක ඵල දරයි. යහපත් ගසකට නරක ඵල දැරිය නොහැකිය; නරක ගසකටද යහපත් ඵල දැරිය නොහැකිය. යහපත් ඵල නොදරන සෑම ගසක්ම කපා ගින්නට හෙළනු ලැබේ. එබැවින් ඔවුන්ගේ ඵලවලින් නුඹලා ඔවුන් හඳුනාගන්නහුය.”24
GSAM 309.1අපගේ ගැලවුම්කරුවාණන්ගේ මේ වචන, ශුභාරංචි යුගයෙහි අනාවැකියේ දීමනාව පවතින බව පිළිගනියි. මේ කාර්යයට සැබෑ අනාගතවක්තෘවරුන් කිසිවෙකු සම්බන්ධ නොවන්නේ නම්, සෑම අනාවැකිමය ප්රකාශවීමක්ම නපුරු මූලාශ්රයකින් පැමිණෙන්නේ නම්, “අනාගතවක්තෘවරුන්ගෙන් ප්රවේශම් වන්න” යයි උන්වහන්සේ නොවදාරනු ඇද්ද? එක් එක් වර්ගය හඳුනාගත හැකි ආකාරය උන්වහන්සේ එතරම් නිශ්චිතව අපට පැවසීම, සැනසිලිකාරයාණන් වන ශුද්ධාත්මයාණන් “මතු පැමිණෙන දේ” පෙන්වන කාර්යයෙහි (යොහන් 16:13) සැබෑ අනාවැකියේ දීමනාව පවතින බවට ඉතාමත් හොඳ සාක්ෂියකි. අපගේ ලැයිස්තුවෙහි හත්වන නියමය යයි නම් කළ මෙම නියමය කිසිසේත් වැරදෙන්නේ නැත. ඔවුන්ගේ ඵලවලින් නුඹලාට ඔවුන් හඳුනාගත හැකියයි ක්රිස්තුස්වහන්සේ නොවදාළසේක; ඒ වෙනුවට නිශ්චිතවම, “ඔවුන්ගේ ඵලවලින් නුඹලා ඔවුන් හඳුනාගන්නහුය” යයි වදාළසේක.
GSAM 309.2දෙවියන්වහන්සේගේ ආත්මයාණන්ගේ සැබෑ දීමනාවල ක්රියාව තුළ දැකිය යුතු ඵලය කුමක්දැයි අපි අසමු. ස්වාමීන්වහන්සේ සභාව තුළ දීමනා තැබීමේ අරමුණ ගැන පාවුල් කළ ප්රකාශයෙහි පිළිතුර හමු වේ: “එබැවින් උන්වහන්සේ මෙසේ වදාරනසේක: උන්වහන්සේ ඉහළට නැඟුණු කල, වහලුන් වහල්කොට ගෙන ගියසේක; මනුෂ්යයන්ට දීමනා දුන්සේක.... තවද උන්වහන්සේ සමහරුන් ප්රේරිතයන් ලෙසද, සමහරුන් අනාගතවක්තෘවරුන් ලෙසද, සමහරුන් ශුභාරංචිය ප්රකාශ කරන්නන් ලෙසද, සමහරුන් සභාපාලකයන් හා ගුරුවරුන් ලෙසද දුන්සේක. ඒ, ශුද්ධවන්තයන් සම්පූර්ණ කිරීම පිණිසද, සේවයේ කාර්යය පිණිසද, ක්රිස්තුස්වහන්සේගේ ශරීරය ගොඩනැඟීම පිණිසද ය. අප සියල්ලන් ඇදහිල්ලේද දෙවියන්වහන්සේගේ පුත්රයාණන් පිළිබඳ දැනගැන්මේද එකමුතුකමෙහි [“එකමුතුකමට,” පිටු දාරයේ], සම්පූර්ණ මනුෂ්යභාවයටත්, ක්රිස්තුස්වහන්සේගේ පූර්ණත්වයේ උසස්කමේ ප්රමාණයටත් පැමිණෙන තුරු එසේ ය.”25
GSAM 309.3තුන්වන දේවදූතයාගේ පණිවුඩයේ ආරම්භයේ සිටම එයට සම්බන්ධ වී ඇති අනාවැකියේ දීමනාවට මෙම නියමය යොදන්න. එවිට ප්රතිඵලය කුමක්ද?—වයිට් මහත්මිය මඟින් නිරතුරුව දෙන ලද උපදෙස්, එක්සත්කම හා සමඟිය කරා යොමු වී ඇති බව අපට පෙනේ. “එක්ව සාකච්ඡා කරන්න,” “එකිනෙකාට තව සමීප වන්න,” ක්රිස්තුස්වහන්සේ සමඟ එකඟව සිටින්න යයි ඒවා අවවාද කරයි. මෙසේ එකිනෙකා අතර සැබෑ සහභාගිකම හා එකමුතුකම ස්ථිර කරයි.
GSAM 310.1මේ කාර්යයට විරුද්ධ වන සමහරු සරදම් කරමින්, “නුඹලා අතර ඇති වයිට් මහත්මියගේ දර්ශන නොතිබුණේ නම්, නුඹලාගේ ව්යාපාරය බොහෝ කලකට පෙර බිඳ වැටෙනු ඇත” යයි කියා තිබේ. ඊට මෙසේ පිළිතුරු දෙනු ලැබේ: “එය සැබෑ ය; මක්නිසාද ඒ මාර්ගයෙන් ස්වාමීන්වහන්සේ උපදෙස්, අනතුරු ඇඟවීම් හා ආලෝකය දී තිබේ. එමඟින් මතභේද ඉවත් වී කාර්යය දියුණු වී තිබේ.” එබැවින් දීමනාවට පහරක් ලෙස ඔවුන් අදහස් කළ දේ, සැබවින්ම එහි ඵලය සැබෑ අනාවැකියේ දීමනාවේ ඵලය බවට සාක්ෂියකි.
GSAM 310.2අවුරුදු හැටක් හා ඊට වැඩි කාලයක් පුරා, වයිට් මහත්මිය මඟින් අනාවැකියේ දීමනාව ප්රකාශ වූ ආකාර මේ නියමයන් හතෙන් පරීක්ෂා කර තිබේ. සෑම කරුණකදීම ඒවා සැබෑ අනාවැකියකින් අපේක්ෂා කරන අවශ්යතා සපුරා තිබේ.
Notes
- එපීස 4:11-13. ↩
- යෝවෙල් 2:28, 29, ↩
- 1 තෙසලෝනික 5:20, 21. ↩
- එළිදරව් 16:14. ↩
- යෙසායා 8:16-20. ↩
- දේශනාකාරයා 9:6, 5. ↩
- සභාව සඳහා සාක්ෂි, 5 වන වෙළුම, පිටු 663-667. ↩
- 1 යොහන් 4:1-3. ↩
- එපීස 3:17; කොලොස්සි 1:27. ↩
- 1 යොහන් 4:5. ↩
- යෙසායා 30:10, 11. ↩
- යාකොබ් 5:10. ↩
- යෙරෙමියා 23:16. ↩
- 17 වන පදය. ↩
- ජේ. එන්. ඇන්ඩෲස්, 1867 දෙසැම්බර් මාසයේ සමාලෝචනය පත්රයෙහි. ↩
- ද්විතීය කථාව 18:21, 22. ↩
- විලාප ගී 3:37. ↩
- 1 සාමුවෙල් 9:6. ↩
- යෙරෙමියා 28:9. ↩
- එළිදරව් 16:14. ↩
- ලූක් 1:76. ↩
- ලූක් 7:26-28. ↩
- යොහන් 10:41. ↩
- මතෙව් 7:15-20. ↩
- එපීස 4:8-13. ↩