Adventist Pioneer
Library
aplib.orgLibrary
Table of Contents
10 / 29
10 / 29

Kapitulo 9 — Ang Panahon sa Paglangan

John Norton Loughborough

GSAM 148.1“Nianang adlawa mahisama ang gingharian sa Langit sa napulo ka mga dalaga nga nagdala sa ilang mga suga aron mosugat sa pamanhonon. Ang lima kanila danghag ug ang laing lima maalamon. Ang lima nga danghag nagdala sa ilang mga suga, apan wala sila magdala ug reserba nga lana. Ang mga dalaga nga maalamon nagdala usab sa ilang mga suga ug nagdala pa gayod ug dugang nga lana. Ug tungod kay nadugay ang pamanhonon nagduka ug nakatulog silang tanan.”1

GSAM 148.2Si Cristo mao ang nobyo sa parabula.2 Ang paggawas aron masugat ang nobyo kinahanglan magrepresentar sa lihok sa katawhan sa Ginoo aron masugat si Cristo sa iyang pag-abot, kay ang hilisgutan sa pakigpulong sa Mateo 24 ug 25 mao ang pag-abot sa Ginoo. Ang pulong sa Ginoo mao ang suga.3 Gikuha sa tanang birhen ang ilang mga suga. Ang kabuang sa pipila ka mga birhen naglangkob sa pagkuha lang sa teorya sa kamatuoran, nga walay tinuoray nga paghalad sa Ginoo nga makapauswag sa mga grasya sa Espiritu sa kasingkasing sa magtutuo. Kini nga buhat gipakita sa parabula pinaagi sa “lana sa ilang mga sudlanan.” Ang paglangan sa nobyo kinahanglan magrepresentar sa pipila ka kapakyasan sa bahin sa mga miadto nga nagpaabut nga makigkita sa ilang Ginoo.

GSAM 148Ang Panahon sa Pag-aplikar sa Parabula

GSAM 148.3Ang pulong nga “unya,” diin nagsugod ang parabula, naghatag kanato og timailhan sa panahon sa pag-aplikar niini. Kini mosunod dayon sa gisulti sa miaging kapitulo, dili human sa ikaduhang pag-abot sa Ginoo, kondili human ipahayag ang parabula sa igos, nga nagpahibalo nga ang pag-abot ni Cristo “duol na,” ug nga miabot na ang henerasyon nga dili molabay hangtod nga si Cristo mismo magpakita sa mga panganod sa langit. Nag-aplikar usab kini sa panahon nga ang pipila sa mga sulugoon nga naghatag sa mensahe moingon sa ilang kasingkasing, “dugay pa kining mobalik, busa magsugod siya sa pagdagmal sa iyang kauban nga mga sulugoon ug mouban ug kaon ug inom sa mga palahubog.”

GSAM 149Pagpanamastamas sa ilang kauban nga mga alagad

GSAM 149.1Kaniadto sila mga “kauban nga alagad,” nagkahiusa sa pagpahayag sa samang mensahe; apan karon ang pipila kanila misalikway sa ilang gitudlo, ug “ginapanamastamasan” ang ilang mga kauban nga alagad nga nagahatag sa “pagkaon sa takdang panahon”—nga nagpahayag sa gikinahanglan nga pag-andam aron masugat ang Ginoo nga hapit na moabot. “Nagapanamastamas” sila sa parehas nga paagi nga gisugyot nga panamastamasan si Jeremias. Miingon ang mga tawo, “Dali, mag-imbento kitag istorya batok kaniya ug dili na kita maminaw sa iyang gipanulti.”4 Busa misugod kining mga sulugoon sa pagtudlo sa paagi nga makababag sa buhat sa mga “matinud-anon” nga sulugoon. Kining maong klase gitumong sa dihang giingon, “Busa hinumdomi ninyo ang pagtulon-an nga inyong gidawat. Tumana ninyo kini ug hinulsoli ang inyong mga sala. Kon magpasagad pa kamo, moanha ako sa takna nga wala ninyo damha. Ang akong pag-abot sama sa pag-abot sa kawatan, nga walay masayod kon kanus-a.”5

GSAM 149.2Ang parabula sa mga birhen angay sa panahon nga ang “kauban nga mga sulugoon” nagatalikod sa mensahe sa hapit na pag-abot sa Ginoo, ug “nagsugod sa pagpanamastamas.” Nagsugod usab sila og lain nga buhat—nga “mokaon ug moinom uban sa mga hubog.” Niapil sila sa kombira uban sa mga gustong matuman ang ilang mga gana. Miingon si Solomon bahin sa ingon ani, “Ayaw sunda ang mga palahubog ug ang mga hangol ug kaon, kay kanang klasiha sa mga tawo daling mapobre.”6

GSAM 149Ang Unang Kapakyasan

GSAM 149.3Motungha karon ang pangutana, “Unsa man ang naa sa kasinatian sa adbent nga motubag niining mga pahayag?” Aduna'y mga lihok nga hingpit nga nagtugma sa propesiya. Ang mga naghatag sa mensahe hangtod Abril, 1844, naningkamot sa taliwala sa mga simbahan, ug ang mga ministro sa nagkalain-laing simbahan misuporta sa ilang mga paningkamot. Busa sila mga “kauban nga alagad.”

GSAM 150.1Ang mga naghatag sa mensahe nagtudlo nga ang duha ka libo tulo ka gatus ka adlaw sa Daniel 8:14 matapos sa Hudiyong tuig 1843, nga mao ang atong tuig 1844. Gipahayag nila nga ang oras sa paghukom sa Dios moabot sa katapusan niining maong panahona. Ang matag denominasyon sa nasud niadtong panahona nagtuo nga ang adlaw sa paghukom sugdan sa ikaduhang pag-abot sa atong Ginoo. Busa dali ra makita nga nagtuo ang mga Adventista nga moabot ang Ginoo sa katapusan niining propetikanhong yugto. Miingon sila, “Kini nga yugto mahimong matapos sa bulan sa Marso 21, 1844, ang katapusan sa natural nga tuig sa mga Hudiyo nga 1843.” Busa ilang gitan-aw ang katapusan sa Marso o sa unang bahin sa Abril, 1844, ingon nga panahon nga posibleng pag-abot sa Manluluwas.

GSAM 150Nitubo ang Daotang mga Alagad

GSAM 150.2Pag-abot sa katapusan sa Marso, ug nilabay na, ug wala moabot ang Ginoo, ang mga kaniadto nag-alagad uban sa mga mensahero sa Ginoo, apan wala kinasingkasing nga hingpit nga gihalad ang ilang kinabuhi alang sa mensahe, misupak niini, nagsugod sa pagbatok sa buhat, ug sa pagbuhat sa tanan nilang makaya aron pugngan ang dalan sa mga nagpadayon gihapon sa pagtudlo sa doktrina sa duol nga pag-abot sa Ginoo ug sa mensahe sa oras sa paghukom. “Sa ilang kasingkasing,” ingon nila, “Naglangan ang akong Ginoo sa Iyang pag-abot.” Pinaagi sa ilang mga ngabil, nagtudlo na sila karon nga kinahanglan nga makabig ang tibuok kalibutan sa wala pa moabot ang Ginoo; nga ang mga Hudiyo kinahanglan mobalik tanan sa Palestina, ug itukod pag-usab ang ilang pag-alagad sa templo sa Jerusalem, sa wala pa moabot ang Mesiyas. Ang uban pa gani nagtudlo nga ang pag-abot ni Cristo usa ka “espirituhanong pag-abot,” nga kini mahitabo sa pagbag-o sa kasingkasing, ug usab sa kamatayon sa Iyang katawhan.

GSAM 151Paghatag og “Pagkaon sa Husto nga Panahon”

GSAM 151.1Samtang ang uban misupak sa ilang kauban nga mga sulugoon, ang mga nagpabilin nga matinud-anon sa pagtuo nagtawag sa mga magtutuo sa mga bulwagan ug sa mga kakahoyan, gihatagan sila sa “pagkaon sa takdang panahon”—nga nagpakita kanila nga ang mga timailhan sa panahon ug natuman nga propesiya nagpahayag, sama sa kaniadto sa wala pa ang ilang kapakyasan, nga ang pag-abot ni Cristo “duol na, hapit na sa pultahan.”

GSAM 151Pista sa Simbahan

GSAM 151.2Samtang gibuhat nila kini, nagsugod ang usa ka butang nga kaniadto wala mailhi sa mga Protestante nga simbahan—ang pagtawag sa katawhan sa simbahan alang sa pagkombira ug “paglingaw-lingaw.” Ang tanan nga gustong moanhi giimbitar nga makig-ambit sa ilang mga lamian.

GSAM 151.3Ang unang nadungog namo bahin sa ingon ani nga butang sa Amerika mao ang niadtong bulan sa Mayo, 1844, wala madugay pagkahuman sa kapakyasan. Mao kini ang nahitabo: Samtang si William Miller, sa usa ka bulwagan sa Rochester, N.Y., nagatudlo ug nagadasig sa pipila ka gatus ka mga Adventista, nga nag-ingon kanila, “Anaa kita sa panahon sa paghulat sa Mateo baynte singko; pabilina ang inyong pagtuo; makadawat kita ug dugang kahayag bahin niini sa dili madugay,” gitakda sa silong sa usa sa pinakadako nga mga balay-panagtigum sa Rochester ang usa ka “pista.” Nagkatigom ang daghang mga tawo, mga miyembro sa simbahan ug mga dili motuo, ug samtang ang presidente sa usa ka teolohikal nga kolehiyo nagpalingaw sa katawhan pinaagi sa pagbiaybiay kang William Miller, namaligya sila kanila og mga talaba, ice-cream, tam-is nga pagkaon, ug sa bayad nga baynte singko sentimo, usa ka gamay nga pamplito nga giandam niining tawoha. Ang libro ginganlan og “An Exposé of Millerism.”

GSAM 151.4Sa dili pa moabot ang duha ka semana gikan niadtong panahona, ang lain nga denominasyon sa maong siyudad nagtudlo og “pista” sa usa ka pampublikong bulwagan, nga nagpangayo og bayad nga baynte singko sentimos alang sa pagsulod, ug nagdapit sa tanan nga gustong moanhi aron makig-ambit kanila sa ilang mga talaba, sorbetes, keyk, ug mga tam-is. Didto nagsugod kining modernong pagkombira sa mga simbahan, nga mitubo ngadto sa “bininuang mga panagtigom sa kalingawan,” “mga bag nga bunotan og mga gasa,” “mga dulang pagpangisda og mga ganti,” “mga panagtigom sa paghalok,” ug uban pa. Kining bahin sa pagkombira sa mga simbahan mitubo na kaayo nga karon ang usa ka modernong bilding sa simbahan dili na matarong sa pamantayan kon wala kini'y kusina, pantri, ug kwarto sa panyapon. Kini nga kahimtang mao ang nagsugod sa “panahon sa paghulat,” sama sa gitakda sa parabula.

GSAM 152.1Si Wm. Miller mismo misulti sa maong hitabo nga nahitabo sa Rochester sa mosunod nga mga pulong:

GSAM 152.1“Usa sa mga D.D. sa Rochester, si Mr. _____, sa simbahan nga _____, misulat og usa ka pamplito batok sa Millerismo, gitawag ang iyang mga ginoo ug mga ginang ngadto sa balay sa Ginoo, naghimo og dakong kombira sa mga talaba ug uban pang ‘piknik,’ Sama ni Belsasar, nag-inom sila og kape ug tsa, nagkaon sa ilang mahalong mga pagkaon, ug namaligya sa ilang sorbetes ug minatamis, ug sa iyang pamplito batok sa ikaduhang pag-abot sa minahal nga Manluluwas.
GSAM 152.2“Sa gabii sa wala pa ko molakaw, usa pa sa mga reverendo nga hamtong naghimo og piknik nga salo-salo sa usa ka pampublikong balay, o bulwagan, ug namaligya sama sa giingon sa ibabaw, sa iyang mga tiket, ice-cream, ug mga tam-is. Nalipay ko nga madungog nga ang pipila ka mga simbahan sa lain-laing sekta wala mouyon sa ingon nga mga Babilonyanong kombira; ug naglaum ko sa akong kalag nga dili tanan niining mga sektaryong simbahan makita nga ‘nagakaon ug nagainom uban sa mga hubog’ sa dihang moabot si Cristo. Natingala ko nga kining mga reverendong ginoo wala magtan-aw sa ilang kaugalingon sa salamin sa pulong sa Dios; ug akong irekomenda kanila nga basahon ang Lucas 14:12-14; Mateo 24:48-51; Lucas 13:25-28; 2 Pedro 2:13; Juda 10-21. Kini gayud ang katapusang mga panahon.”

GSAM 152.3Kung nakakita unta si Pastor Miller sa kahimtang nga misulod na ang mga simbahan sa ilang mga panagtigom alang sa mga donasyon, uban sa “mga keyk nga tag-anon kon hain ang adunay singsing, mga panagtigom sa paghalok nga tag-napulo ka sentimos, mga pasundayag sa asno, bininuang mga panagtigom sa kalingawan, balaang mga loterya,” ug uban pang mga dula sa tsansa, ug uban pa, mosibog siya uban sa balaan nga kahadlok.

GSAM 152Ang Panahon sa Paglangan

GSAM 152.4Ang mga Adventista nakakaplag og kahupayan sa biblikal nga kamatuoran nga sa dihang ipahibalo ang duol nga pag-abot sa Ginoo, adunay kalambigit niini ang usa ka “panahon sa paghulat.” Kini ilang nakita sa mga pulong sa atong Manluluwas sa Mateo 25:5, 6, ug sa Habakuk 2:1-3.

GSAM 153.1Mahitungod sa ilang baruganan sa tingpamulak sa 1844, among gikuha ang gisulti gikan sa Midnight Cry sa Mayo 9, 1844:—

GSAM 153.2“Pagkahuman nato sa punto sa daw nga pagtapos sa mga propetikanhong panahon, gibutang kita sa usa ka kahimtang nga nakita nang daan sa Dios nga maabot sa Iyang mga anak sa katapusan sa panan-awon; ug alang niini, naghimo Siya og probisyon pinaagi sa propeta Habakuk, sa dihang miingon siya, ‘Mobarog ako sa akong bantayanan ug magpahimutang ako diha sa mga tore; motan-aw ako aron pagsuta kon unsay iyang isulti kanako, ug unsa nga tubag ang akong ihatag niining mga reklamo,’ o ingon sa nakasulat sa margin, ‘gikwestiyon.’ ‘Ug ang Ginoo mitubag kanako, ug miingon, Isulat kining gipadayag nga klaro sa papan nga bato aron dali kining masabtan sa mensahero. Kay ang gipadayag magpaabot sa gitakda nga panahon; nagsulti kini mahitungod sa katapusan [sa mga panahon sa propesiya] ug dili kini mapamatud-an nga bakak. Bisan tuod madugay kini [labaw pa sa ilang daw nga pagtapos], paabota kini; moabot gayod kini, [sa kahingpitan sa mga panahon sa propesiya, nga human niini] ug dili na malangay.’7
GSAM 153.3“Ang kamatuoran nga kini nga pahimangno nagtumong sa karon nga panahon, klaro gikan sa pag-quote ni Pablo niini sa Hebreohanon 10:36-39: ‘Kinahanglan nga magmainantuson kamo aron matuman ninyo ang kabubut-on sa Dios ug madawat ninyo ang iyang gisaad. Ang inyong gipaabot hapit na gayod moabot, dili siya maglangan. Ug ang tawo nga matarong magkinabuhi tungod sa iyang pagtuo. Apan kon motalikod siya kanako dili ako malipay kaniya. Kita dili sama sa mga tawo nga motalikod sa Dios ug unya mangalaglag; hinuon hugot ang atong pagtuo kaniya, busa maluwas kita.’
GSAM 153.4“Nagtuo kami nga kita ang nag-okupar niining panahona nga gihisgutan sa Manluluwas, sa dihang maglangan ang pangkasalan (Mateo 25:5)—nga niini angay itandi ang gingharian sa langit,—sa dihang ‘ang dautang sulugoon [tungod sa usa ka daw nga kapakyasan sa panahon] mag-ingon sa iyang kasingkasing, Ang akong Ginoo naglangan sa Iyang pag-abot, ug magsugod sa paghampak sa Iyang kauban nga mga sulugoon, ug sa pagkaon ug pag-inom uban sa mga hubog,’ ug ang Ginoo ‘moabot sa usa ka adlaw nga wala niya damha.’
GSAM 154.1“Nagtuo kami nga karon kita nag-okupar sa maong panahon nga gihisgutan ni Pedro, diin ‘dugay na sila nga hinukman sa Dios, ug hapit na silang malaglag;’ diin ‘Magdala sila sa pagtulon-an nga maoy makaguba sa inyong pagtuo sa Dios.’8 Kini, ingon ni Pedro, mahitabo, sama sa pagkaanaa sa mga bakak nga propeta sa dihang gisulat pa ang mga Kasulatan. Sama sa giingon sa mga tawo sa balay sa Israel, ‘Daghan nang nanglabay nga mga panahon, apan wala man lagi matuman ang mga panagna,’9 kinahanglan adunay panahon nga daw molabay na gayud ang takna, aron ang mga tigbiaybiay sa 2 Pedro 3:4 makapangutana, ‘Asa na ang saad sa iyang pag-abot?’ ug mapasigarbohon sa ilang kaugalingon nga ‘mao lang gihapon ang kahimtang sa tanan sukad pa sa pagmugna sa kalibotan.’
GSAM 154.2“Nagtuo kami nga tungod sa ingon nga paglangan sa panan-awon mao nga miingon ang apostol Santiago, ‘Busa magpailub kamo, mga igsoon, hangtod sa pag-abot sa Ginoo;’ ‘Busa pagmapailubon usab kamo. Ayaw kamo pagpakawala sa paglaom, kay hapit na gayod moabot ang Ginoo.’ Ug, ‘Ang maghukom kanato hapit na gayod moabot.’
GSAM 154.3“Ug nagtuo kami nga sa pagpaabut sa paglabay sa gipaabot nga panahon, gipahimangnoan kita sa atong Manluluwas, sa ika-napulo'g duha nga kapitulo sa Lucas, ‘Pangandam kamo sa tanang panahon aron dili kamo makalitan sa pagbalik sa inyong Ginoo. Sunda ninyo ang mga sulugoon nga naghulat sa pagbalik sa ilang agalon nga mitambong sa kombira. Nagbantay sila ug wala nila palunga ang ilang mga suga. Busa bisan unsang orasa moabot ang ilang agalon, ug manuktok sa pultahan, maablihan nila kini dayon.’10 Ang paghulat nagpasabot sa paglabay sa panahon, kay hangtod moabot kana nga panahon, wala pa kita maghulat. Busa gidugang sa atong Ginoo, ‘Bulahan ang mga sulugoon nga sa pag-abot sa Ginoo makita Niya nga nagbantay.’
GSAM 154.4“Magpadayon kami, kon buot sa Ginoo, sa pagpahayag, ‘Ania na ang pamanhonon! Dali kamo, sugata ninyo siya;’ ug, ‘Miabot na ang takna sa iyang paghukom.’ Ug naglaum kami nga dili kami mapakyas sa padayon nga pagtawag sa makusog nga tingog sa kalibutan ug simbahan, aron sila magmata gikan sa ilang mga kanta sa ‘kalinaw,’ ug maminaw sa mga tanyag sa kaluoy sa Dios. Nagplano kami nga magpadayon sa paghulat ug pagbantay sa pag-abot sa Ginoo, nga nagtuo nga hapit na kini moabot.”

GSAM 155Pagpanalipod sa Ilang Buhat

GSAM 155.1Usa ka maayong ideya kung giunsa sa mga Adventista pagtan-aw sa ilang buhat sa wala pa ang Marso 21, 1844, ug pagkahuman niadtong petsaha, makuha pinaagi sa pagbasa sa mosunod nga sipi, nga gikuha gikan sa usa ka artikulo ubos sa ulohan nga “Pagpanalipod,” sa Advent Herald sa Nobyembre 13, 1844, nga gipatik ni J. V. Himes, S. Bliss, ug A. Hale:—

GSAM 155.2“Dili kami paspas sa pagdawat sa among mga opinyon. Nagtuo kami nga matinud-anon ug sinsero kami nga nangita sa kamatuoran. Gisunod namo ang sugo sa among Manluluwas nga susihon ang mga Kasulatan. Wala kami nagsalig sa among kaugalingong kinaadman; hinunoa nagtan-aw kami kang Dios alang sa giya ug panudlo, ug naningkamot nga itugyan ang among kaugalingon sa iyang halaran, nga nagtuo nga siya magtultol sa among mga lakang sa husto. Gitan-aw namo ang tanang argumento nga gipakita batok kanamo uban sa matinud-anong tinguha nga masayran ang kamatuoran ug malikayan ang sayop; apan kinahanglan namo nga iangkon nga ang nagkalain-lain ug daghang porma nga mga posisyon sa among mga kaatbang nagpamatood lamang sa among mga panan-aw. Nakita namo nga bisan pa husto kami o sayop, dili gayud husto ang among mga kaatbang; ug wala silay pagkasinabtanay sa ilang kaugalingon. Ang mga argumento sa matag-usa kay hinay kaayo ug bata-bata nga napugos sila sa kanunay nga pagbawi sa ilang kaugalingong gibuhat; ug pinaagi sa ilang supak ug nagkasumpaki nga mga panan-aw gipakita nila nga bisan unsa pa ang ilang pagtan-aw sa among mga opinyon, wala silay pagsalig sa opinyon sa usag-usa. Ug labaw pa, wala'y bisan usa ka pangunang punto sa among tibuok baruganan nga wala gisuportahan sa usa o labaw pa sa mga naningkamot sa pagsupak sa dayon nga pag-abot sa Ginoo. Samtang naa mi literal nga hubad sa Kasulatan nga nagsuporta kanamo, naningkamot sa walay pulos ang among mga kaatbang sa pagpamatuod nga ang Kasulatan dili angay sabton sa literal nga paagi, bisan pa man nga ang matag propesiya nga natuman natuman gayud sa labing literal nga pinakagamay nga detalye.

GSAM 156Ang Pagpatin-aw sa Kaguol

GSAM 156.1“Apan ang panahon—ang tuig 1843, ang tuig sa mga Hudiyo—miagi, ug nadismaya kami nga wala namatikdi ang Hari sa Iyang kaanyag. Ug ang tanan nga misupak kanamo tinuoray nga nagtuo nga ang matag talagsaong kinaiya sa among pagtuo napamatud-an nga bakak; ug nga kami, isip matinud-anong mga tawo, kinahanglan biyaan ang among tibuok baruganan. Busa, nabigla sila sa pagtan-aw kanamo nga nagkugi gihapon sa among paglaum, ug nagpaabut gihapon sa among Hari.
GSAM 156.2“Apan kami, sa among pagkadismaya, wala makakita og rason sa pag-undang sa paglaum. Nakita namo nga ang Kasulatan nagpaila nga kinahanglan adunay panahon sa paglangan, ug samtang naglangan ang panan-awon, kinahanglan kita maghulat niini. Nakita usab namo nga sa kataposan sa tuig, dili pa hingpit nga matapos ang maong panahon, bisan pa sa pagtuo nga husto ang among kronolohiya; ug nga kini matuman lamang sa umaabot nga panahon karong tuiga; ug bisan pa niana, among prangka ug hingpit nga giangkon sa tibuok kalibutan nga kami nasayop sa tukmang punto nga among gitan-aw uban sa dakong kumpiyansa; apan samtang nasayop kami, makita namo ang kamot sa Dios sa maong butang. Makita nato nga gigamit niya kana nga pahibalo isip usa ka pahimangno sa kalibutan ug usa ka pagsulay sa simbahan. Gibutang niini ang iyang katawhan sa usa ka baruganan sa pagpaabot. Gitawag niini ang mga andam mag-antos alang sa iyang ngalan. Gipakita niini kinsa ang nakakita sa pag-abot sa Ginoo ingon balita sa dakong kalipay, ug kinsa ang nakakita niini ingon dili gustong tunog sa ilang mga dalunggan. Gipakita niini sa uniberso kinsa ang modawat sa pagbalik sa Ginoo, ug kinsa ang mosalikway kaniya sa iyang ikaduhang pag-abot, sama sa gibuhat sa mga Hudiyo sa iyang unang pag-abot. Ug giisip namo kini nga usa ka lakang sa pagtuman sa tuyo sa Dios, niining ‘adlaw sa iyang pag-andam,’ aron siya magpangulo sa usa ka katawhan nga magapangita lamang sa kabubut-on sa Ginoo, aron sila maandam alang sa iyang pag-abot.”

GSAM 157KASAYSAYAN SA KALIHUKAN HUMAN SA MARSO, 1844

GSAM 157.1Usa ka mubo nga kasaysayan sa kalihukan sa adbent pagkahuman sa Marso 21, 1844, gipakita sa mosunod, nga gikuha gikan sa Signs of the Times, Oktubre 31, 1844:—

GSAM 157.2“Pagkahuman sa paglabay sa 1843,—ang Hudiyo nga Tuig,—ang kadaghanan sa mga Adventista mituhop sa pagtuo nga dili na nato ikalkula ang piho nga mga panahon uban sa bisan unsang kasiguruhan. Nagtuo sila nga naa na kita sa dapit nga gipakita sa atong kronolohiya, sa katapusan sa tanang propetikanhong panahon, diin gilauman ang pag-abot; ug bisan pa nga maghulat kita sa gamayng panahon nga mahimong magkalahi ang atong kronolohiya ug ang takna sa Dios, nagtuo sila nga wala na kitay laing timailhan sa tukmang takna. Gikuha na nilang tanan ang ilang mga lampara ug nilakaw aron sugaton ang Nobyo; apan ang Nobyo naulahi lampas sa takdang panahon (1843) nga gipaabot siya. Sa panahon niining paglangan sa panan-awon, daw determinasyon sa tanan nga maghulat niini, nga nagtuo nga dili kini malangan, ug nga mahimo kining maabot sa bisan unsang takna. Apan, dali ra kaayo nahimong klaro nga daghan ang naghimo og mga plano para sa umaabot, nga dili unta nila buhaton kung nagtuo sila nga moabot ang Ginoo karong tuiga; ug nga sila natulog na sa pagtagad sa tinuod nga pagpakita sa Ginoo nga hapit na. Sa laing pagkasulti, nagtuo sila nga mahimo siyang moabot bisan unsang adlawa, o nga mahimo kini mapalangan sa pipila ka panahon, diin sila makatagamtam og makapahupay nga pahulay. Aw, mao kini ang giingon sa atong Manluluwas nga mahitabo, ‘Ug tungod kay nadugay ang pamanhonon nagduka ug nakatulog silang tanan.’

GSAM 157Gitawag ang Atensyon sa Tingdagdag sa 1844

GSAM 157.3“Sa sayo pa sa Mayo, 1843, gipukaw ni Igsoon Miller ang among pagtagad sa ikapitong bulan sa balaan nga tuig sa mga Hudiyo, ingon nga panahon sa pagsaulog niadtong mga tipo nga nagtumong sa ikaduhang pag-abot; ug sa miaging tingdagdag gitan-aw namo kana nga takna uban sa dakong interes. Pagkahuman niini, hingpit nga gidawat ni Igsoon S. S. Snow ang opinyon nga, sumala sa mga tipo, ang pag-abot sa Ginoo, sa dihang mahitabo kini, kinahanglan mahitabo sa ika-napulo ka adlaw sa ikapitong bulan; apan wala siya'y kasiguroan kung unsang tuiga. Sa ulahi, nakita niya nga ang mga propetikanhong panahon dili gayud matapos hangtod sa kasamtangang tuig, 1844; Nipahimutang siya sa baruganan nga sa palibot sa ika-22 sa Oktubre—ang ika-napulo ka adlaw sa ikapitong bulan ning kasamtangang tuiga—makasaksi kita sa pag-anhi sa Ginoo sa himaya. Gipangwali niya kini sa New York, Philadelphia, ug sa ubang mga lugar atol sa miaging tingpamulak ug ting-init; ug bisan daghan ang misugot sa iyang mga panan-aw, wala'y partikular nga pagpadayag sa mga epekto niini nga nakita hangtod sa palibot sa Hulyo.

GSAM 158Gibilin nga mga Ani sa Uma

GSAM 158.1“Sa sayong bahin sa panahon, ang pipila sa atong mga igsoon sa amihanan sa New Hampshire naimpluwensyahan kaayo sa pagtuo nga moabot ang Ginoo sa dili pa moabot ang lain nga tingtugnaw, nga wala nila gitamnan ang ilang mga uma. Sa tunga-tunga sa Hulyo—nga mao ang gabii sa tungang gabii sa adlaw-tuig sa mga Hudiyo (gabii-kabuntagon, nga gikalkula gikan sa bag-ong bulan sa Abril, ang pagsugod niining tuig sa Hudiyo), ang uban nga nagtanum sa ilang mga uma naimpluwensyahan pag-ayo sa pagtuo sa dayon-dayon nga pagpadayag sa Ginoo, nga dili nila mahimo, subay sa ilang pagtuo, nga anihon ang ilang mga tanom. Ang uban, sa pagsulod nila sa ilang uma aron putlon ang ilang sagbot, nabatyagan nilang hingpit nga dili na sila makalihok, ug, subay sa ilang pagbati sa katungdanan, gibyaan nila ang ilang mga tanom nga nagtindog sa uma, aron ipakita ang ilang pagtuo pinaagi sa ilang mga buhat, ug busa aron hukman ang kalibutan. Kini nga panghitabo dali nga mikaylap sa amihanang bahin sa New England.

GSAM 158Ang Hukom nga Munauna sa Pag-abot

GSAM 158.2“Niadtong samang panahona, ang atong mga igsoon sa Maine nakahupot sa pagsabot nga ang paghukom kinahanglan mouna sa pag-abot; nga kini magkasinabay sa pag-ani, ug dili lamang sa katapusan sa kalibutan, kondili nag-okupar kini og usa ka yugto nga hapit na gayud sa katapusan. Sumala niining panan-aw, ilang gihunahuna nga anaa na kita sa paghukom, nga ang linya sa pagbulag gihimo na, ug nga ang mga sulugoon sa Dios giselyohan sa ilang mga noo, nga ang pagtuman niini mao ang timailhan para sa upat ka anghel nga nagkupot sa upat ka hangin sa yuta (Pahayag 7:1), nga buhian ang ilang pagkupot.

GSAM 159Pagmata sa Tungang Gabii

GSAM 159.1“Sa tunga-tunga sa Hulyo ang panalangin sa Dios sa pag-uli sa mga mitalikod sa ilang pagtuo misugod sa pag-uban sa pagpahayag sa panahon, ug kadtong midawat sa bisan asa sa mga panan-aw nga gihisgutan, nagpakita og klarong kausaban sa ilang pamatasan, ug kalit nga pagmata gikan sa tulog, sama sa gitagna. ‘Sa tungang gabii adunay usa ka pagtawag nga gihimo, Tan-awa, ang Nobyo moabot na; paggawas kamo aron masugat siya. Unya mitindog ang tanang mga birhen ug giandam nila ang ilang mga lampara.’ Sukad sa Hulyo, kining mga lihok nahitabo sa lain-laing bahin sa New England, ug nagkalahi-lahi; apan kini tanan gipanalanginan sa Dios sa pagpahiuli sa daghan nga hapit na mapalong ang ilang mga lampara, ug sa pagbalaan sa Iyang mga balaan. Sa tigum-kampo sa Exeter, nagtagbo kining tanan nga mga impluwensya, nagsagol ngadto sa usa ka dakong lihok, ug dali nga mikaylap sa tanang grupo sa adbent sa nasud.”

Notes

  1. Mateo 25:1-5. ↩
  2. Marcos 2:18-20. ↩
  3. Salmo 119:105. ↩
  4. Jeremias 18:18. ↩
  5. Pahayag 3:3. ↩
  6. Mga Panultihon 23:20, 21. ↩
  7. Habakuk 2:1-3. ↩
  8. 2 Pedro 2:1, 3. ↩
  9. Ezequiel 12:22. ↩
  10. Lucas 12:35, 36. ↩

Note

Back