Adventist Pioneer
Library
aplib.orgLibrary
Table of Contents
12 / 29
12 / 29

Kapitulo 11 — Ang Mensahe sa Ikaduhang Anghel

John Norton Loughborough

GSAM 171.1“Adunay ikaduhang anghel nga misunod ug miingon, Nagun-ob! Nagun-ob na ang inila nga siyudad sa Babilonia. Kay ang iyang mga lumulupyo mao ang nagtintal sa mga tawo sa tibuok kalibotan nga mosunod sa ilang mga daotang binuhatan nga gikayugtan sa Dios.”1

GSAM 171.2“Unya ang agalon sa balay, nga nasuko, miingon sa iyang sulugoon, Pag-adto dayon sa kadalanan ug sa mga ale-ale sa siyudad, ug dad-a dinhi ang mga kabus, ug ang mga pilay, ug ang mga bakol, ug ang mga bulag.”2

GSAM 171.3Ang Ginoo pinaagi sa iyang mga ministro nagpukaw sa kalibutan uban sa mensahe, “Miabot na ang takna sa iyang paghukom,”—usa ka mensahe nga ang tanan nga nag-angkon nga sila iyang katawhan mahimo untang nagkahiusa kon gusto nila. Mao kini ang unang tawag sa “panihapon” sa kasal. Gipahibalo kini “sa mga dinapit.”3 Tungod kay gisalikway kini nga tawag uban sa nagkalain-laing pasangil, gihatag ang ikaduhang tawag nga katugbang sa mensahe sa ikaduhang anghel.4 Pinaagi niini nga tawag, gilain sa Ginoo ang usa ka katawhan aron molakaw hangtod sa katapusan sa panahon uban sa nagpadayon nga kahayag sa iyang kamatuoran.

GSAM 171Ikaduhang Panawag ngadto sa Salo-salo sa Kasal

GSAM 171.4Ang ikaduhang mensahe—ang mosunod sa pagtawag sa oras sa paghukom—nagaingon, “Nagun-ob! Nagun-ob na ang inila nga siyudad sa Babilonia. Kay ang iyang mga lumulupyo mao ang nagtintal sa mga tawo sa tibuok kalibotan nga mosunod sa ilang mga daotang binuhatan nga gikayugtan sa Dios.” Ug ang ikaduhang pagtawag sa panihapon nagaingon, “Pagawas kamo dayon sa kadalanan ug sa mga agianan sa siyudad, ug dad-a dinhi ang mga kabus, ang mga pilay, ang mga bakol, ug ang mga buta.” Sa matag usa niini nga mga kasulatan, ang mga nag-angkon nga sila katawhan sa Ginoo gitawag nga “siyudad.” Tungod sa ilang nagkasumpaki ug naglibog nga mga doktrina, gitawag sila nga “Babilonia.” Pinaagi sa lain nga kasulatan nga nagtumong sa katapusang mga panahon, makita nato nga sa dili pa moabot ang Ginoo, ang Iyang katawhan gitawag nga mogawas gikan sa “Babilonia:” “Nagun-ob na! Ang inila nga Babilonia nagun-ob na! Karon nahimo na kining puloy-anan sa mga demonyo ug mga daotang espiritu, ug sa tanang matang sa langgam nga daotan.... Kamo nga akong katawhan, gawas kamo gikan nianang siyudad, aron dili kamo makasunod sa iyang daotang buhat, ug aron dili kamo malakip sa silot nga alang kaniya.”5

GSAM 172“Hinumdumi Kung Giunsa Nimong Nadungog”

GSAM 172.1Sa mensahe ngadto sa simbahan sa Sardis nabasa nato, “Busa hinumdomi ninyo ang pagtulon-an nga inyong gidawat. Tumana ninyo kini ug hinulsoli ang inyong mga sala. Kon magpasagad pa kamo, moanha ako sa takna nga wala ninyo damha. Ang akong pag-abot sama sa pag-abot sa kawatan, nga walay masayod kon kanus-a.”6 Ang simbahan sa Sardis daw gipagawas pinaagi sa Reporma, human sa ngitngit nga panahon sa buhat ni “Jezebel”—ang apostata nga simbahan. Gisultihan ang simbahan sa Sardis nga kaniadto kini buhing simbahan; apan sa dihang nakadungog kini ug gisalikway ang doktrina sa pag-abot sa Ginoo, gibutang niini ang kaugalingon sa kahimtang nga dali kini masakpan niining maong hitabo sama sa usa ka “kawatan sa gabii.” Busa, gipahayag ni apostol Pablo sa 1 Tesalonica 5:1-5, mao kini ang kahimtang sa mga nagasinggit, “Kalinaw ug kaluwasan,” sa dihang hapit na ang pag-abot sa Ginoo. Ang mga nagsunod sa kahayag sa kamatuoran gitawag nga “mga anak sa adlaw,” ug ang Ginoo dili moabot kanila sama sa usa ka kawatan.

GSAM 172.2Niining propetikanhong paghulagway sa pito ka simbahan, makita nato nga ang pagkahugno sa simbahan sa Sardis gisundan dayon sa simbahan sa Philadelphia, o (sumala sa kahulugan sa pulong) simbahan sa pag-igsuonan nga gugma. Tinuod gayud, mao kana ang 50,000 ka mga magtutuo nga, pinaagi sa mensahe sa ikaduhang anghel, gipagawas gikan sa tanang lain-laing simbahan, ug naghiusa sa usa ka panumpay sa pag-igsuonan nga gugma sa dakong sentral nga kamatuoran sa hapit na nga pag-abot ni Cristo.

GSAM 173Giunsa Pagpahibalo sa Ikaduhang Mensahe

GSAM 173.1Ang Midnight Cry sa Septyembre 12, 1844, naglangkob sa usa ka pahayag nga gihimo ni Pastor J. V. Himes mahitungod sa mensahe sa ikaduhang anghel, ug sa mga kahimtang nga misangpot sa pagpahayag niini. Ang iyang sulat gipetsahan sa McConnelsville, Ohio, Agosto 29, 1844, ug nagbasa:—

GSAM 173.2“Sa dihang gisugdan namo ang buhat uban kang Igsoon Miller niadtong 1840, siyay siyam ka tuig nang maglaktur. Niadtong panahona hapit siya nag-inusara. Apan ang iyang mga paningkamot walay hunong ug epektibo sa pagpukaw sa mga nag-angkon og pagtuo ngadto sa tinuod nga paglaum sa katawhan sa Dios, ug sa gikinahanglan nga pag-andam alang sa pag-abot sa Ginoo; ingon man usab sa pagpukaw sa tanang klase sa wala pa makatuo aron masabtan nila ang ilang nawala nga kahimtang, ug ang katungdanan sa dayon nga paghinulsol ug pagbalik-loob ngadto sa Dios, ingon nga pag-andam aron masugat ang Nobyo sa kalinaw sa iyang pag-abot. Mao kana ang dagkong tumong sa iyang mga paningkamot. Wala siya naningkamot nga mabalhin ang mga tawo ngadto sa usa ka sekta o partido sa relihiyon.
GSAM 173.3“Sa dihang nakombinsir kami sa kamatuoran sa hapit na nga pag-anhi, ug among gidawat ang maong doktrina sa publiko, among gisagop ang parehas nga panan-aw, ug gisunod ang parehas nga agi taliwala sa nagkalain-laing sekta, diin kami gitawag, sa probidensya sa Dios, aron mag-alagad. Gisultihan namo ang mga ministro ug mga simbahan nga dili kabahin sa among buluhaton ang pagbungkag kanila, o ang pagbahin-bahin ug paglibog kanila: Aduna kami'y usa ka klarong tumong, ug kana mao ang paghatag sa ‘singgit,’ ang pahimangno sa paghukom nga ‘naa na sa pultahan,’ ug pagdani sa among mga kaubang tawo nga mag-andam alang sa maong hitabo.... Ang mga ministro ug mga miyembro nga nakapahimulos sa among paningkamot, apan wala tinuoray nga midawat sa doktrina, nakakita nga kinahanglan silang mosunod sa doktrina, ug ipangwali ug ipadayon kini, o sa krisis nga hapit na kaayo kanila, makasinati sila og kalisud uban sa mga tinuoray ug determinado nga magtutuo. Busa, mipili sila batok sa doktrina, ug nagpasiya, ang uban pinaagi sa usa ka pamaagi ug ang uban pinaagi sa lain, nga pugngan ang maong hilisgutan. Kini nagbutang sa among mga igsoon nga lalaki ug babaye sa taliwala nila sa usa ka labing lisud nga kahimtang. Kadaghanan kanila gihigugma ang ilang mga simbahan, ug dili nila hunahunaon nga mobiya. Apan sa dihang gibiaybiay, giopres, ug sa nagkalain-laing paagi giputol gikan sa ilang kanhing mga pribilehiyo ug kalipay, ug sa dihang gipugngan kanila ang ‘pagkaon sa takdang panahon’, ug ang makapahubog nga awit sa ‘kalinaw ug kaluwasan’ gipapaminaw sa ilang mga dalunggan matag Sabado, dali ra silang nabulag sa ilang mga paboritong partido, ug mitindog sa kadungganan sa ilang kusog, gikuha ang yugo, ug gipataas ang pagtuaw, ‘Gumawas kamo kaniya, akong katawhan.’

GSAM 174Sa Usa ka Lisud nga Posisyon

GSAM 174.1“Kini nga kahimtang nagbutang kanamo sa usa ka lisud nga posisyon, (1) tungod kay naa na kami sa katapusan sa among propetikanhong panahon, diin among gilauman nga tipuon sa Ginoo ang tanan Niyang katawhan sa usa; ug (2) kanunay namo gipangwali ang lain nga doktrina; ug karon nga nabag-o na ang mga kahimtang, ituring nga dili matinud-anon kami kon mouyon kami sa pag-awhag sa pagbulag ug pagbungkag sa mga simbahan nga midawat kanamo ug sa among mensahe. Busa nagduha-duha kami, ug nagpadayon sa among unang baruganan, hangtod nga gidala sa simbahan ug ministeryo ang maong butang sa ingon ka layo nga napugos kami, sa kahadlok sa Dios, sa pagbarug aron ipanagang ang kamatuoran ug ang gipangpitpit nga mga anak sa Dios.

GSAM 174Pananglitan sa mga Apostol alang sa Atong Gagalaon

GSAM 174.2“‘Sulod sa tulo ka bulan, padayon ang pag-adto ni Pablo didto sa sinagoga sa mga Judio. Wala siya mahadlok nga mosulti sa mga tawo. Nakiglantugi siya ug gipasabot kanila ang mahitungod sa paghari sa Dios. Apan ang uban kanila nagmagahi gayod ug dili motuo, ug taliwala sa daghang mga tawo gipakadaotan nila ang Dalan. Busa mipahawa si Pablo sa ilang simbahan, ug gidala ang mga magtutuo, ug adlaw-adlaw didto siya sa eskwelahan ni Tirano nga nagpadayon sa pagpakiglantugi sa mga tawo.’7 Wala pa gyud nahitabo hangtod nga ‘nagmatig-a ang uban’ ug ‘nagsulti sila og dautan batok sa maong dalan [ang pag-abot sa Ginoo] sa atubangan sa kadaghanan,’ nga ang atong mga igsoon napukaw sa pagbiya ug pagbulag gikan sa mga simbahan. Dili nila mapailub-an kining ‘dautang pagpanulti’ sa ‘dautang mga sulugoon,’ ug ang mga simbahan nga nagpadayon sa pagpanlupig ug ‘dautang pagpanulti’ batok sa mga nagpaabot sa ‘bulahan nga paglaum,’ alang kanila wala'y lain kondili mga anak nga babaye sa misteryosong Babilonia. Ingon nila kini gipahayag, ug nakasulod sila sa kagawasan sa Maayong Balita. Ug bisan pa man nga dili kita tanan magkauyon unsa ang naglangkob sa Babilonia, nagkauyon kita sa dayon ug hingpit nga pagbulag gikan sa tanan nga supak sa doktrina sa pag-abot ug gingharian sa Dios nga duol na. Gituohan namo nga kini usa ka kaso sa kinabuhi ug kamatayon. Kamatayon ang pagpabilin nga nakig-uban sa mga lawas nga nagpasagad o supak sa pag-abot sa Ginoo. Kinabuhi ang paggawas gikan sa tanang tradisyon sa tawo, ug pagtindog sa pulong sa Dios, ug pagpaabot adlaw-adlaw sa pagpadayag sa Ginoo. Busa karon among gisulti sa tanan nga sa bisan unsang paagi naipit sa yugo sa pagkaulipon, ‘Gumawas kamo taliwala kanila, ug magbulag kamo, ingon sa Ginoo, ug ayaw paghikap sa mahugaw; ug ako madawat kamo, ug ako mahimong Amahan kaninyo, ug kamo mahimong akong mga anak nga lalaki ug babaye, ingon sa Ginoo nga Makagagahum sa tanan.’”8

GSAM 175Dili Masabtan nga Pagkontra

GSAM 175.1Mao kini ang gisulti ni Wm. Miller bahin sa panagbangi nga naglungtad niadtong panahona tali sa mga simbahan ug sa mga Adventista:—

GSAM 175.2“Labaw pa nga dili natural ug dili masabtan nga ang mga Kristohanong simbahan magpahawa niini nga doktrina ug sa ilang mga miyembro tungod niini nga bulahan nga paglaum. Nasayud ko nga ang uban sa mga Baptistang simbahan nagaingon nga dili nila sila gipahawa tungod sa ilang pagtuo, kondili tungod sa ilang pakig-ambit sa Balaang Panihapon uban sa mga magtutuo sa pag-abot sa Ginoo. Kung dili man kini tungod sa ilang pagtuo sa umaabot nga Manluluwas, ngano man nga gipahawa ko sa ilang mga pulpito, nga wala gayud makaambit sa Balaang Panihapon gawas sa usa ka Baptistang simbahan? Bakak kini nga pasangil. Apan dili kini ang pasangil sa mga Metodista ug Presbiteriano; kay nagtuo man sila sa sagol nga komunyon. Unsa man ang hinungdan sa ilang pagpang-ekskluhir? Nadungog ko nga aduna'y uban nga gi-ekskluhir tungod sa ‘pag-awit’ sa mga kanta para sa ikaduhang pag-abot; ang uban tungod sa pagkabuang, samtang ang bugtong ebidensya sa ilang pagkabuang mao nga nagbantay sila alang kang Cristo. O Dios, ‘pasayloa sila tungod kay wala sila masayod sa ilang gibuhat.’”

GSAM 176Si Storrs bahin sa Baruganan sa mga Simbahan

GSAM 176.1Si George Storrs misulti sa pagtan-aw sa mga simbahan batok sa mga Adventista, sa ingon ani:—

GSAM 176.2“Asa sa kanila, karon, ang dili nag-ingon, ‘Nalingkod ako sama sa usa ka reyna’? Ug asa sa kanila ang dili nagpalipay sa ilang kaugalingon sa hunahuna nga sa usa ka adlaw ilang madaug ang kalibutan, ug kini ipailalom sa ilang pagtuo? Asa sa kanila ang motugot nga usa ka kalag magpabilin uban kanila sa kalinaw, nga hayag ug walay kahadlok nga nag-angkon sa iyang pagtuo sa pag-abot nga hapit na? Dili ba mao ang mga kondisyon aron magpabilin ka nga dili samokan taliwala nila, nga ikaw ‘hingpit nga maglikay’ sa publikong pagpadayag sa pagtuo sa pag-abot sa Ginoo karong tuiga, bisan unsa pa ang imong pagtuo bahin niini, ug bisan unsa pa ka importante ang imong pagbati nga mosinggit, ‘Kahadloki ninyo ang Dios ug dayega siya, tungod kay miabot na ang panahon nga hukman niya ang tanang mga tawo’?”

GSAM 176Ang Pamatuod ni Mansfield

GSAM 176.3Si L. D. Mansfield, nga nagsulat gikan sa Oneida, N.Y., Marso 21, 1844, nagpamatuod ingon niini:—

GSAM 176.4“Ang Dios naglihok sa hunahuna sa Iyang mga minahal nga anak nga nagpaabot sa Ginoo gikan sa langit, ug nagamando kanila dili lamang sa pagtagad sa anghel ‘Dala niya ang walay katapusan nga Maayong Balita. Gisangyaw niya kini, nga nagaingon, miabot na ang panahon nga hukman niya ang tanang mga tawo,’ kondili sa pagtuman usab sa mosunod nga sugo, ‘Gumawas kamo kaniya, akong katawhan!’ Mas napuno pa karon ang akong pagtuo kaysa kaniadto nga ang mga relihiyosong organisasyon sa kasamtangang panahon naglangkob sa dakong bahin sa Babilonia nga pagabungkagon sa kusog, ug dili na gayud makita pag-usab.... Sa akong pagtan-aw, bisan pa man, sa pipila ka mga organisasyon labi ka hayag ang pagkapareho sa gamay nga sungay. Pipila ka mga pananglitan ang magpatin-aw niini.

GSAM 176Ang Espiritu sa Gubot Nagpadayag

GSAM 176.5“Usa ka igsoon nga malampuson kaayo sa iyang pag-alagad niining maong dapita sa pagpahibalo sa pag-abot sa Ginoo, naghimo og usa ka pakigsaad sa paghatag og lektyur sa usa ka piho nga lugar sa takdang oras. Giplano sa Ginoo nga siya nahibilin og napulo ug unom ka milya gikan sa maong pakigsaad, apan usa ka _____ nga ministro anaa didto, nga nangulo sa usa ka manggugubot nga panon, dala og alkitran ug balhibo, aron kini gamiton batok sa maong alagad sa Labing Halangdong Dios. Kining maong ministro nagsugod og usa ka gipadayong tigum pagkahuman niini, apan ang tanan bugnaw ug nagyelo sama sa glacier sa Amihanan—walay kalag nga napukaw o nabag-o. Sa katapusan miingon ang ministro nga nagtuo siya nga ‘kinahanglan na niyang molingkod sa lingkuranan sa mga nabalaka.’
GSAM 177.1“Usa ka lider sa klase dinhi sa baryo miingon sa iyang klase sukad nagsugod kami og tigum dinhi, nga kon adunay tawo mosulod sa iyang balay ug moingon nga nagtuo siya nga moabot si Cristo karong tuiga, papagawas niya siya sa gawas.”

GSAM 177Katungdanan sa mga Simbahan

GSAM 177.2Sa niining punto, among ipakilala ang usa ka testimonya gikan sa usa ka talumpati ngadto sa komperensya sa mga magtutuo sa pag-abot nga nagtigum sa Boston, Mass., nga gipetsahan Mayo 31, 1844, ug gipirmahan nila Wm. Miller, Elon Galusha, N. N. Whiting, Apollos Hale, ug J. V. Himes. Ingon sila:—

GSAM 177.3“Mahitungod sa among katungdanan ngadto sa mga simbahan, makasulti usab kami og usa ka pulong. Ang katalagman dinhi, sama sa kadaghanan sa ubang mga kaso, nagpakita kanamo nga naa sa mga ekstremidad. Ang unang porma sa katalagman mao ang pagtugot sa awtoridad sa simbahan nga among kauban nga ipahilom kami sa ingon nga pangutana sa katungdanan. Walay duhaduha nga daghang libo ang nagdala sa ilang kaugalingon sa pagkahukman sa atubangan sa Dios pinaagi sa pag-uyon sa dili-biblikal nga mga pag-angkon sa ilang mga simbahan bahin niini nga butang, nga kon sila unta determinado ug matinud-anon, karon unta mas luwas ang ilang kahimtang, ug mas mapuslanon, bisan pa unta nga sila gitawag usab sa pag-antos.
GSAM 177.4“Ang ikaduhang porma sa katalagman mao ang pag-uyon sa espiritu sa pagpanimalos batok sa mga simbahan tungod sa ilang kawalay-hustisya kanato, ug sa pagpakig-away nga walay pagpili batok sa tanang ingon nga mga organisasyon. Mahitungod sa katungdanan sa mga Adventista, sa pagtumong sa mga simbahan nga ilang kauban, kon kita tawgon sa pagbuhat niini, dili kami makahatag og mga panudlo nga magamit sa tanan. Kinahanglan sila molihok sa kahadlok sa Dios, sumala sa gikinahanglan sa kahimtang sa maong kaso.
GSAM 178.1“Apan, kinahanglan nga determinado kita sa pagbuhat sa atong katungdanan, sa pagpamatuod sa kamatuoran sa tanang angay ug angayan nga mga kahigayunan. Ug kon pinaagi sa pagbuhat niini makapasuko kita sa mga simbahan, ug sila mohulga nga ipahawa kita gawas kon maghilom kita (bisan pa kon among makita nga mas maayo nga buwagon ang among relasyon sa simbahan sa malinawon nga paagi), buhata nato ang atong katungdanan, ug kon ipahawa kita, magpailub sa pag-antos sa sayop, ug andam uban sa atong Ginoo nga ‘maguwa sa ganghaan, nga nagpas-an sa kaulawan nga iyang giantos.’”

GSAM 178.2Gikan niining mga panultihon nga may kalabotan sa lihok sa mga simbahan batok sa mga nagahatag sa mensahe sa ikaduhang anghel, dali ra makita kung giunsa, isip unang resulta sa paghatag niining ikaduhang tawag ngadto sa “panihapon,” kadtong natigom sa usa ka espirituhanong panon gitawag nga “ang mga pilay,” “ang mga bakol,” ug “ang mga bulag,” nga kusgan nga nagpasabot sa dautang pagtratar nga ilang nadawat gikan sa “pagpigo” sa ilang “mga kaulipon,” nga ilang gibulagan.

GSAM 178Usa ka Bulag nga Katawhan nga Gipili aron Madawat ang Bag-ong mga Kamatuoran

GSAM 178.3Ang tuyo sa Ginoo klaro kaayo nga masabtan sa pagpagawas og usa ka lahi nga katawhan ilawom sa pagpahayag sa mensahe sa ikaduhang anghel—ang ikaduhang tawag sa “panihapon”—ug ang “pagtuaw sa tungang gabii.” Ang bililhon nga mga kamatuoran para sa katapusang mga adlaw kinahanglan pangitaon ug ipahayag—usa ka buhat nga dili mahimo sa mga simbahan nga “napugngan sa kredo” sama sa dili usab mahimo ang pagpahibalo sa Maayong Balita sa kalibutan sa apostolikong simbahan samtang nagpabilin ang koneksyon sa mga Hudiyong sekta. Gitawag sa Dios ang pagbulag didto,9 ug gitawag usab niya ang pagbulag sa mga mananampalataya sa adbent gikan sa mga naningkamot nga pugson sila sa lingin sa ilang mga kredo.

GSAM 179Ang “Six Sermons” ni Storrs

GSAM 179.1Wala madugay human niining pagbulag, atong mapansin nga miabot ang kahayag sa mga grupo sa adbent bahin sa silot sa umaabot, ingon sa gipadayag sa pamplit, “Six Sermons,” ni George Storrs, nga nagbarug sa posisyon nga ang tawo sa kinaiyahan mortal; nga ang mga patay walay kahibalo tali sa kamatayon ug pagkabanhaw; nga ang katapusang silot sa mga dili matulid mao ang hingpit nga pagkawala; ug nga ang pagkawalay kamatayon usa ka gasa sa Dios, nga madawat lamang pinaagi sa pagtuo sa atong Ginoong Jesu-Cristo.

GSAM 179.2Gidawat sa liboan ka mga Adventista kini nga doktrina sa kinaiya sa tawo, apan dili tanan kanila. Ang pagdumili niini wala magdala og kalibog taliwala kanila, tungod kay kini giisip nga usa lang ka butang sa pagtuo, ug dili pagsulay sa moral nga kahimtang; busa ang nagkahiusang paningkamot sa pagpasidaan sa kalibutan sa duol nga pag-abot ni Cristo wala maputol. Bisan pa niana, nakaapekto kini sa pagpukaw sa kasuko sa mga simbahan batok kanila.

GSAM 179Dili Matubag ang “Six Sermons”

GSAM 179.3Ang ministro nga Metodista sa lungsod diin ako nagpuyo, nga kaniadto miapil sa pagpangwali sa doktrina sa pag-abot niadtong 1843, nadawat niya ang “Six Sermons,” gibasa kini, ug giangkon sa iyang mga miyembro sa simbahan nga dili niya kini mapamatud-an nga sayop; apan sa dihang nakita niya nga daghan sa iyang mga miyembro ang midawat niini, gisugyot niya sa uban nga ayaw pagbasa sa libro, kay “motuo sila sa doktrina kung basahon nila kini.” Niadtong Septyembre 1844, pagkahuman mibalik kining ministro gikan sa tinuig nga komperensya, mitindog siya sa iyang pulpito ug publiko nga gisalikway ang doktrina sa adbent, ug mapainubsanon nga nangayo og pasaylo sa simbahan tungod kay gidapit niya kaniadto ang mga magtutudlo aron mosulti sa balay.

GSAM 179Gihusay Tungod sa Heresiya

GSAM 179.4Kining lihok sa ministro gisundan dayon sa paningkamot nga kasuhan og erehiya ang mga nagtuo sa adbent; apan tungod kay gitugotan sila nga ipanindigan ang ilang mga kaso gikan sa Bibliya, wala'y kadaugan nga nakuha sa simbahan. Pipila ka tawo ang gipahawa sa maong simbahan tungod kay ang ilang pamatasan wala mouyon sa disiplina, ug daghan pa ang mihawa tungod sa pagpahawa sa mga miyembro nga ang pagtuo dili mapamatud-an nga supak sa Kasulatan. Busa, ang doktrina sa adbent gidili na gayud sa simbahan diin gatusan ang nakakaplag sa Manluluwas ug nahimong malipayon sa Dios.

GSAM 180.1Ang gibuhat sa akong natawhan gihimo usab sa gatusan ka ubang simbahan sa tibuok nasud. Ang mga gitratara sa ingon niini sa ilang kanhing mga igsoon nakakaplag og dakong paglipay sa mga pulong sa propeta Isaias: “Kamong mga mahinadlokon sa pulong sa Ginoo, pamatia ninyo ang iyang pulong, Tungod kay matinumanon kamo kanako, ang uban ninyong mga katagilungsod modumot ug mosalikway kaninyo. Biay-biayon nila kamo nga nag-ingon, Pasidunggi ang Ginoo aron makita namo ang inyong kalipay! Apan maulawan sila.”10

GSAM 180Gipakita ang Kasuko sa mga Daotan

GSAM 180.2Samtang nagkadool ang adlaw nga gipaabot ang Ginoo, ang mga magtutuo mas naningkamot pa sa ilang mga buhat, ug ang mga daotan mas naglagot ug nagpanaway sa mas mabangis pa, sama sa makita sa mosunod nga pahayag nga gihimo sa editor sa Midnight Cry sa Oktubre 31, 1844:—

GSAM 180.3“Ang epekto nga gidala niining lihok sa mga daotan dako usab kaayo'g natabang sa pagpabakod sa among pagtuo nga ang Dios anaa niini. Sa dihang ang mga anak sa Dios nagtigom aron mosimba ug magpaubos sa atubangan Niya, ug mag-andam sa Iyang pagpadayag, ingon nga angay buhaton sa usa ka grupo sa mga makasasala nga maluwas lamang pinaagi sa grasya, ang mga daotan nagpakita sa labing dakong malisya. Sa dihang wala kami maghatag og pahibalo sa among mga tigum gawas sa among kaugalingong papel, ug wala usab kami magdapit sa publiko didto, ang mga anak ni Belial nagsiksik sa sulod niini, ug naghimo og dakong kagubot. Sa gabii sa Sabado, ika-12 ning buwana [Oktubre 12, 1844], wala kami magtigom sa tabernakulo aron ang tag-atiman sa simbahan [janitor] makapanlimpyo sa balay alang sa Adlaw nga Igpapahulay [Domingo]. Apan pugsanong misulod ang grupo sa mga tawo sa balay, ug gisalikway bisan pa kana nga pribilehiyo. Ang mayor, bisan wala gipangayo, dali nga nangilabot ug gipahawa sila.
GSAM 181.1“Sa among tigum sa sunod nga Domingo, pagkahuman napuno ang tabernakulo, usa ka dakong grupo ang nagpunong-punong sa kadalanan sa atubangan sa bilding, daghan kanila nasuko nga adunay mosalig sa pag-abot sa Ginoo. Sa gabii, tungod sa kasamok sa katawhan, wala'y tigum nga gihimo; apan sayo pa lang napuno na ang kadalanan sa mga tawo; apan ang dali nga pag-apil sa mayor ug sa iyang epektibong pulis nakapahawa sa kadalanan, human nila gipadala ang pipila sa kulungan. Atong ikapareho ra ang pamatasan sa mga tawo sa gibuhat sa mga tawo nga naglibot sa pultahan ni Lot, sa gabii sa wala pa ang paglaglag sa Sodom.... Kining lihok nila kalit kaayo, sabay, ug lapad kaayo, nga ang pagpakita niini sa unang adlaw sa ikapitong bulan sa mga Hudiyo nagpalig-on sa among pagtuo nga kini na gayud ang bulan.”

GSAM 181Ang mga Managbinuang Nagsul-ob sa Bisti sa Pagsaka sa Langit

GSAM 181.2Niadtong ika-22 sa Oktubre, 1844, ang adlaw nga natapos ang duha ka libo tulo ka gatus ka adlaw, sa Paris, Maine, samtang ang mga magtutuo nagtigum sa balay sa pagsimba, maligdong nga nag-ampo sa Dios, sa pagpaabot nga moabot ang Ginoo niadtong adlawa, ang mga mapang-uyaw nga manan-aw nagkatigum sa palibot sa balay, nag-awit og mga kanta nga pang-uyaw. Duha sa mga samokon nagsul-ob og taas nga puti nga bado ug misaka sa atop sa balay, nag-awit og mga kanta, ug nagbinuang sa mga naa sa sulod nga nag-ampo ug nagpaabot sa pag-abot sa Ginoo.

GSAM 181.3Lagmit nga gikan niining panghitaboa ang mga bakak nga gipakatag bahin sa pagsul-ob sa mga Adventista og bado sa pagsaka sa langit; kay bisan pa nga ang mga pahayagan sa Adventista nagtanyag og ganti nga kutob sa $500 alang sa usa ka tinuod nga kaso diin ang usa ka Adventista misul-ob og bado sa pagsaka sa langit niadtong 1844, ug nagpaabot sa pag-abot sa Ginoo, wala gayud usa ka kaso ang napakita.

GSAM 182Ang Panan-awon ni Hazen Foss, 1844

GSAM 182.1Niining panahona, adunay usa ka batan-ong lalaki nga nagpuyo sa Poland, Maine, nga ginganlan og Hazen Foss, nga hugot nga nagtuo nga moabot ang Ginoo sa ika-napulo ka adlaw sa ikapitong bulan. Siya usa ka gwapo nga lalaki, mahigalaon ang pakig-istorya, ug medyo maayo ang edukasyon. Pipila ka semana sa wala pa matapos ang “pagtuaw sa tungang gabii,” miduol ang Ginoo kaniya ug naghatag kaniya og panan-awon, diin gipakita kaniya ang pagbiyahe sa mga Adventista paingon sa siyudad sa Dios, uban sa ilang mga katalagman. Gihatagan siya og pipila ka mga mensahe sa pahimangno nga iyang ipahibalo, ug nakita usab niya ang mga pagsulay ug paglutos nga mosunod kon matinud-anon siya sa pagsaysay sa gipakita kaniya. Siya, sama ni Mr. Foy, gipakita ang tulo ka lakang diin ang katawhan sa Dios hingpit nga mosulod sa dalan paingon sa balaan nga siyudad. Tungod kay hugot siyang nagtuo sa pag-abot sa Ginoo nga “pipila na lang ka adlaw” (sama sa ilang pagkanta niadto), ang bahin sa panan-awon nga may kalabotan sa tulo ka lakang paingon sa dalan dili niya masabtan; ug tungod kay mapasigarboon siya sa kinaiyahan, mihilayo siya sa krus, ug misalikway sa pagsaysay niini. Gisubli ang panan-awon sa ikaduhang higayon, ug gisultihan siya nga kung magdumili gihapon siya sa pagsaysay sa gipakita kaniya, kuhaon ang karga gikan kaniya ug ihatag kini sa usa sa labing huyang sa mga anak sa Ginoo, usa nga matinud-anon nga mosaysay sa ipadayag sa Dios. Midumili siya pag-usab. Unya gihatag ang ikatulong panan-awon, ug gisultihan siya nga siya gibuhian na, ug ang karga gibutang sa usa sa labing huyang sa mga huyang, nga motuman sa sugo sa Ginoo.

GSAM 182Napakyas si Foss sa Pag-istorya sa Iyang Panan-awon

GSAM 182.2Nakahadlok kini sa batan-on, ug nagpasiya siya nga isaysay ang gipakita kaniya, ug busa gipahibalo niya ang iyang takdang oras. Nagdagsang ang mga tawo aron makakita ug makadungog. Maampingon niyang gisaysay ang iyang kasinatian, kung giunsa niya pagdumili sa pagsaysay sa gipakita kaniya sa Ginoo, ug unsa ang mahitabo tungod sa iyang pagdumili. “Karon,” matod niya, “isaysay ko ang panan-awon.” Apan sayang! ulahi na kaayo: mitindog siya sa atubangan sa mga tawo nga hilom sama sa estatwa, ug sa katapusan miingon sa labing lawom nga kasakit, “Dili nako mahinumduman bisan usa ka pulong sa panan-awon.” Gikumot niya ang iyang mga kamot sa kasakit, nga nag-ingon, “Gituman sa Dios ang Iyang pulong. Gikuha Niya ang panan-awon gikan kanako,” ug sa dakong kasubo sa hunahuna miingon, “Usa na kong nawala nga tawo.” Sukad niadto nawala ang iyang paglaum kang Cristo, ug nahulog siya sa kawad-on sa paglaum. Wala na siya miapil pag-usab sa miting sa mga Adventista, ug wala nay personal nga interes sa relihiyon. Ang iyang pamatasan sa daghang aspeto, aron lang isulti sa yano, sama sa usa ka tawo nga gihikawan sa malumo nga impluwensya sa Espiritu sa Magtutudlo, sa usa ka tawo nga “gibyaan sa iyang kaugalingong mga agi, aron mapuno sa iyang kaugalingong mga binuhatan.” Niining kahimtang sa hunahuna namatay siya niadtong 1893.

GSAM 183Ang Panan-awon ni Foss nga Gisaysay sa Uban

GSAM 183.1Mga tulo ka bulan gikan sa panahon nga napakyas siya sa paghinumdom sa iyang panan-awon, nakadungog siya gikan sa silingang kwarto og usa ka panan-awon nga gisaysay sa lain. Ang tigum gihimo sa usa ka puloy-anan diin siya naa. Gipangumbira siya nga mosulod sa tigum, apan misalikway siya. Miingon siya nga ang panan-awon hapit kaayo susama sa gipakita kaniya, sama sa duha ka tawo nga nagsaysay sa parehas nga butang. Ug ingon niini nahibal-an ang iyang nakita apan wala niya mahinumdumi sa dihang gisulayan niya kining isaysay. Sa pagkakita niya sa tawo pagkahuman, miingon siya, “Mao kana ang instrumento nga gibutangan sa Ginoo sa karga.”

GSAM 183Masubo nga Nadismaya

GSAM 183.2Sa katapusan, miabot ang ika-napulo ka adlaw sa ikapitong bulan, sumala sa panahon sa mga Hudiyo (Oktubre 22, 1844). Nakita niini ang liboan-libo nga mga tawo nga nagpaabut niining takna aron matuman ang ilang mga paglaum. Wala na sila mag-andam pa og bisan unsang butang sa kalibutan nga molapas pa niining maong petsa. Wala gani nila gihandom ang hunahuna nga, “kung dili kini moabot,” apan ilang giplano ang ilang mga butang sa kalibutan sama sa pagbuhat unta nila kon ilang gilauman nga kana nga adlaw magtapos sa panahon sa ilang natural nga kinabuhi. Gipasidaan ug gihangyo nila ang mga daotan nga molayas sa umaabot nga kasuko, ug daghan kanila ang nahadlok nga basin matinuod ang mensahe. Naghatag sila og tambag ug nag-ampo uban sa ilang mga paryente, ug nagpaalam sa mga wala pa maghatag sa ilang kasingkasing sa Dios. Sa mubo nga pagkasulti, gipanamilitan na nila ang tanang butang sa kalibutan uban sa bug-os nga pagkamaligdong sa usa ka tawo nga nagtuo nga hapit na siyang motindog atubangan sa Huwes sa tibuok kalibutan. Busa, sa hapit nga walay gininhawa nga kabalaka, nagtigom sila sa ilang mga lugar sa pagsimba, nagpaabut, sa matag higayon, nga madungog “ang pagtawag sa pangulong anghel ug ang tingog sa trumpeta sa Dios,” ug makita ang langit nga nagdilaab sa himaya sa umaabot nilang Hari.

GSAM 184.1Hinay-hinay nga nilabay ang mga oras, ug sa dihang sa katapusan nilubog ang adlaw sa kasadpan, natapos na ang ika-napulo nga adlaw sa ikapitong bulan sa mga Hudiyo. Ang kangitngit sa gabii mibalik pagtabon sa kalibutan sa ngitngit; apan uban niining kangitngit miabut ang kasakit sa kasingkasing sa mga magtutuo sa pag-abot, nga susama ra sa kasubo sa mga disipulo sa atong Ginoo, samtang sila matinahuron nga mibalik sa ilang mga panimalay sa gabii pagkahuman sa pagkrusipisyon ug paglubong sa Iya nga pipila lang ka gutlo ang milabay ilang malampusong gidala sa Jerusalem isip ilang Hari.

Notes

  1. Pahayag 14:8. ↩
  2. Lucas 14:21. ↩
  3. Lucas 14:17. ↩
  4. Lucas 14:21; Pahayag 14:8. ↩
  5. Pahayag 18:2-4. ↩
  6. Pahayag 3:3. Alang sa hingpit nga pagpatin-aw sa pito ka simbahan, tan-awa ang Thoughts on Daniel and the Revelation. ↩
  7. Mga Buhat 19:8, 9. ↩
  8. 2 Corinto 6:17, 18. ↩
  9. Mga Buhat 13:46. ↩
  10. Isaias 66:5. ↩

Note

Back