Kapitulo 12 — Say Pakadismaya—Say Ampaet a Libro

GSAM 185.1“Inala ko so melag a libro ed lima na anghel, tan kinan ko; tan diad sangik et masamit a singa diro: tan sanen asumpal kon kinan, say eges ko et ampaet. Tan inkuan to ed siak, Kailangan mon manpropesiya lamet ed arapan na dakel a totoo, tan bansa, tan lenguahe, tan ari. Tan inter ed siak so sakey a tanobong a singa baston: tan say anghel et tinmalindeg, a kuan to, Talindeg ka, tan sukat mo so templo na Dios, tan say altar, tan saramay mandadayew ed loob to.”¹

GSAM 185.2Diad salitan makasulat, say “pankakan” na sakey a libro et irerepresenta to so panangawat na katuaan pian ipasabi ed arum, singa nanenengneng ed Ezequiel, no iner impanengneng ed propeta so “sakey a rolyo na libro,” tan imbaga ed sikato, “Kanaen mo iyan rolyo, tan onla ka'y mansalita ed abung na Israel.” Kayari ton kinan so rolyo, inkuanto, “Insan kinan ko; tan diad sangik et masamit a singa diro.”²

GSAM 185.3Say propeta Jeremias et inusar to met iyan parabol: “Nalmo so saray salita mo, tan kinan ko ra; tan say salita mo et nagmaliw a liket tan panliliket na pusok.”³ Manlapud sayan lenguahe, naaralan tayo ya say “samit” na libro legan ya kakanen itan et irerepresenta to so liket tan inkakontento ya nararanasan na saramay ontan so panagpakan da ed salita na Katawan.

GSAM 185Say Libro ya Masamit, Insan Ampaet

GSAM 185.4Say libro ya abitla ed Apocalipsis 10, ya inkuan ya parad mangakan et masamit a singa diro, balet no akakan la et “amargá” (odino, unong ed arum ya panag-salita, “sanen atunaw ko la, diad eges ko et picra”⁴), et samay libro ya nanlapuan na impaamta na anghel, diad autoridad na samay nanggawa na tawen, dalin, tan dayat, “Anggapo lay panaon.” Say panangan ed sayan libro, sirin, et nepeg ya irerepresenta to so maliket ya panangawat ed proklamasyon na panaon. Say biglan inkapait na subo para ed saramay nangan ed satan et nepeg ya irerepresenta to so makapaermen ya pandumaan ed eksperiensya ra kayari na impanlabas na panaon na libro, tan naamtaan dan baleg so pakadismaya ra ed saray iilaloan da.

GSAM 186Say Proklamasyon na Oras, sakey a Masamit a Subo

GSAM 186.1Say proklamasyon na panaon nen 1844 et talagan maliket a balita ed saramay anisia, tan, ya anggapoy duwa-duwa, et man-aasahan da so magano lan andi-anggaan a kaligtasan manlapud amin a kaugsan, kairapan, tan ermen na sayan makasalanan a mundo. Say kanonotan ya diad pigaran antikey a simba et magmaliw iran gloripikado, andi-anggaan so bilay da, tan wala la ed balitok a syudad na Dios, a kaiba so Ari da, et talagan makapainspirasyon ed kaluluwa. Unong ed imbalikas na sakey ya akaeksperiensya ed satan, “Saray totoon mangaaro ed si Jesus et natatalosan da so liknaan na saramay maseet ya nambantay ed isabi na Manangiliktar da.... Inarap mi iyan oras a walaan na kalmadon kaseryosuan. Saray tuan mananisia et nampainawa ed masamit a pikakikadua ed Dios, sakey a paneknek na kareenan ya magmaliw a kien da ed masinag a panaon ya onsabi. Saray akaeksperiensya ed sayan ilalo tan talek et agda balot nalingwanan iramay mablin oras na pananatalaran.”

GSAM 186.2Say nikaduman mairap a kipapasen na saramay, nen kaarawan labin-sakey na ikapiton bulan, et naromog da so sarili da ya wadia ni ed sayan madilim a mundo na subok tan tukso, no iner et kaukolan dan arapen so panag-insulto, panag-elek-elek, tan panag-uyaw na saramay pigaran oras labat so apalabas et pinaseseg da ya manparaan ya onarap ed Katawan da, et makalmo na manepeg ya alimbawa ed kipapasen nen Maria legan ton “akaalagey ed paway na panteon ya onaakis;” tan sanen inasinggeran na saray anghel ya akitepet, “Bii, akin et man-akis ka?” inkuan to ed sikara, “Lapud inala da so Katawan ko, tan agko amta no iner so panagkikargaan da ed sikato.”⁵

GSAM 187Nadismaya, Balet Ag-aderal so Linawa

GSAM 187.1Saray linmasat ed sayan makapansubok ya agawa et inkuan da nipaakar ed saya:

GSAM 187.1“Nalilito kami tan nadismaya, balet agmi tinaynan so pananisia mi. Nalikna mi ya agawaan mi so katungkulan mi; tinumbok mi so mablin pananisia mi; nadismaya kami, balet ag-aderal so linawa mi. Kailangan mi so andi-anggaan a pasensya, ta dakel so man-uuyaw. Mabetbet kamin sasalubongen na mapanguyaw ya panagsalita nipaakar ed datin nadismayaan mi. ‘Agka ni inmangat; kapigan mo iilaloan ya onangat?’ tan saray kaparehas ya panag-uyaw so mabetbet ya ibabalikas da ed sikami manlapud saray kabat mi ed mundo, tan anggan ed arum ya mangibabaga ya Kristiano, ya aawaten da so Biblia, balet agda naaralan iray baleg tan importantin katuaan to. Say inkamortal mi so akapegket ni ed sikami; saray epekto na sumpa so walad kaliber-liber mi. Mairap ya awiten lamet iray makapagonigon ya problema na bilay ya inisip min inyan la ya anggad angga.”

GSAM 187Ikompara ed Saray Adismayan Disipulo

GSAM 187.2Saray liknaan da, no ikumpara ed liket tan panliliket da nen pigaran oras labat so apalabas, et seguradon singa ed sikara so maanghang a kapait na picra. Say mundo ed kaliber-liber et inisip, a singa met ed ag-duaruwa ya inisip na karaklan kayari na impamako ed krus nen Kristo, ya saray mananisia et natan et itaynan da la so pananisia da, tan mila ra ed panag-uyaw ed say inisip dan sarili dan kaalangan. Ag-abayag et naamtaan da ed pankelaw da ya say panangaro ed isabi na Katawan et aliwan mainomay ya ekalen manlapud puso na saramay tuan naniyukol ed sarili da ed Dios.

GSAM 187“Ag Akibansag ed Saray Man-uyaw”

GSAM 187.3Say dalan ya tinumbok na sarayan maseseg, tan say liknaan da, et malinew ya impaliwawa na saray salita na propeta Jeremias, no iner inkuan to,

GSAM 187.3“Nalmo so saray salita mo, tan kinan ko ra; tan say salita mo et nagmaliw a liket tan panliliket na pusok: ta tinawag ak ed ngaran mo, O Katawan a Dios na saray armada. Agak nanyurong ed panlilimog na saray man-uuyaw, nitan ag-ak nanggayaga: Nanyurong ak a bukor lapud lima mo; ta pinano mo ak na pasnok. Akin et say sakit ko et andi-anggaan, tan say sugat ko et ag natambalan, ya ag manpapagaling? Nagmaliw ka kasi a singa sigpot a managtila ed siak, tan singa danum ya nauupot?”⁶

GSAM 188Si James White nipaakar ed Pakadismaya

GSAM 188.1Pigaran antikey ya insalaysay manlapud arum ed sarayan adismaya, balet wala ni ilalo da, so mangiter na maong ya ideya nipaakar ed situasyon. Say una et nanlapud si Pastor James White, ya matagumpay a maong so impanlingkor to nen 1843 tan 1844. Inkuan to:—

GSAM 188.2“Say pakadismaya ed impanlabas na panaon et mapait a maong. Saray tuan mananisia et inter da lay amin para ed si Kristo, tan alikna da so presensya to ya agda nin balot alikna nensaman. Unong ed inisip da, inter da la so kaunoran a pasakbay da ed mundo, tan sikara et nanseparado la, mas o menos, manlapud saray agmanisia tan man-aalimukor a karaklan. Tan lapud bendisyon na Dios ed sikara, mas labay da so mikasakey ed say Maginoo dan asingsingger lan onsabi tan saray sagradon anghel, nen say saramay pinan-arawi da. Say panangaro nen Jesus so nampano ed kamarerwa, tan nan-silew ed balang lupa, tan diad agnibalikas a pilalek et nampikasi ra, ‘Onsabi ka, Katawan a Jesus, tan onsabi ka a tampol,’ balet ag-iya sinmabi.

GSAM 188.3“Balet ag tinaynan na Dios so saray totoo to.... Tan walaan na espisyal a biskeg tan ligliwa, saray onian a bersikulo a singa say onsublay ed Hebreos et linmoob ed kanonotan tan puso na saray sinubok tan manaalagar: ‘Kanian agyo ibantak so pananisia yo, a walaan na baleg a gunggona. Ta kaukolan yo so pasensya, pian, kayari yon gawaen so linawa na Dios, et naawat yo so sipan. Ta agano ni, tan say onsabi et onsabi, tan ag manbayag. Natan, say matunong et mabilay ed pananisia; balet no walay siopaman a man-atras, say kamarerwak et anggapoy liket to ed sikato. Balet aliwa kami ed saray man-atras paonlad inkaderal; noag ingen ed saray manisia paonlad kilalaban na kamarerwa.’⁷ Saray punto ya makapainteres ed sayan parte na Kasulatan et saraya:—

GSAM 188.4“1. Saray tutukoyen et walad peligro ya ibantak da so talek da ed saray ginawa dan duga.

GSAM 189.1“2. Ginawa da so linawa na Dios, tan inyakar ira ed satan a kipapasen na subok no iner so kaukolan so pasensya.

GSAM 189.2“3. Saray matunong ed sayan panaon et nepeg ya manbilay ed pananisia, aliwan ed panduaruwa no kasin ginawa da so linawa na Dios, noag ingen ed pananisia, ed samay ginawa dan linawa na Dios.

GSAM 189.3“4. Saray ag makapansungdo ed subok na pananisia, noagta ibantak da so talek da ed gawa ya ginawa ra unong ed linawa na Dios, tan onatras ira, et direktan dalan da so paonlad kadederal.”⁸

GSAM 189Manlapud si N. Southard, Editor na Midnight Cry

GSAM 189.4Diad Midnight Cry na Oktubre 31, 1844, manga samploran agew kayari na pansumpal na duaran libo tan talon lasus ya agew, say onsublay so impalapag manlapud panulat na editor:—

GSAM 189.5“Lapud amin ya sirkumstansya ya akapaliber ed sayan galaw, say bendisyon ya epekto to ed kanonotan na saray ananak na Dios, tan say pasnok tan kaugsan ya impanengneng na saray kalaban to, nepeg tayon ituring ya sikato so tuan ‘eyag na pegley na labi.’ Tan no walay pigaran agew tayo ya pangsubok ed pananisia tayo, satan et unong ni ed alimbawa na samploran birhen; ta sanen inmabangon iran amin tan inayos da ray lamparaan da, walay ni nin siansia panaon ya naandip la ray lamparaan na saray makulangkulang a birhen. Ag iya nayarin nagawa anggad ag la linmabas so koma-samplon agew; ta anggad satan a panaon et mansisilew ni ray lamparaan da. Kanian, nepeg a lumabas itan ya agew, pian saray makulaw et itaynan da so pananisia ra, singa say nepeg a linmabas nen 1843, para ed panaon na panag-alagar. Kanian, say daiset ya pakaatras et aliwan rason na pakadismaya, noag ingen ipapanengneng to no panon so inkamatalungdor na Dios ed panumpal na Salita to. Kanian, igangganat tayo ya maong so panangipahayag na pananisia tayo ya anggapoy panduaruwa; ta sikatoy matoor ya angisipan.”

GSAM 189Manlapud si Joseph Marsh, Editor na Voice of Truth

GSAM 189.6Diad Voice of Truth na Nobyembre 7, 1844, nabasa tayo:—

GSAM 189.7“Maliket min aaminin ya nankamali kami nipaakar ed klase na agawa ya iilaloan min nagawa ed koma-samplon agew na koma-piton bulan; balet agmi ni nayarin aaminin ya say baleg ya Manunan Pari mi et agto tinumpal ed satan ya agew so amin ya unong ed tipo ya nayarin iilaloan mi. Natan et manisia kami ya tinumpal to.”

GSAM 190.1Iilaloan na saray Adbentista ya diad koma-samplon agew na koma-piton bulan, 1844, so pansumpal na duaran libo tan talon lasus ya agew, tan diad satan ya agew et sumpalen nen Kristo so kimey to bilang pari tan onsabi ed dalin pian bendisyonan so saray totoo to. Say sinmublay ya pan-usisa et impanengneng to ya satan et gapoan na kimey to na panlinis ed santuaryo ed tawen ya agawa diad satan ya agew, tan aliwan say pansumpal na kimey to bilang pari.⁹ Imbes ya ituring so trabaho na panlinis na santuaryo bilang kabiangan na trabaho nen Kristo bilang pari, inkuan da ya say panlinis na santuaryo et say panlinis na dalin panamegley na apoy diad isabi nen Kristo. No aliwan amin, anggan say dalin na Canaan et nalinisan ed saman a panaon.

GSAM 190Say Santuaryo ya Pinanisiaan ya Dalin

GSAM 190.2Linmaway iyan ideya ed sakey ya artikulo nen Geo. Storrs, diad Midnight Cry nen Abril 25, 1844. Tinepet to, “Anto so santuaryo ya nepeg ya linisan? Say datin pananisia ko et say interon dalin. Ya kabiangan na dalin, manisia ak ni. Balet antoy kabiangan? atan so tepet ya piliten kon ebatan.”

GSAM 190.3In-quote to so sipan ed si Abraham, say impangipaalagey na satan ed si Isaac, tan say impan-renew to ed si Jacob, insan to in-quote so kansion nen Moises, ya ginawa nen Miriam kayari na impanlusot da ed Dayat ya Ambalanga, ya akansionan da: “Ipasen mo ra, tan itanem mo ra ed palandey na tawir mo, ed lugar, O Katawan, ya ginawam para ed panayaman mo, ed santuaryo, O Katawan, ya impaalagey na saray limam.”¹⁰

GSAM 190.4No maingat ya ikumpara na managbasa so teksto ed tagey ed rekord na inkakumpleto to ya ginawa na salmista, nanengneng to ya agto ibabaga ya anggan say dalin na Palestina so santuaryo. Kuan nen David, sanen ibabaga to so panangidaulo na Katawan ed saray ananak na Israel: “Inyakar to ra ed beddeng na santuaryo to, anggan ed sayan palandey, ya sinaliw na nikawanan a lima to.”¹¹ Diad kansion ed Dayat a Balanga, nibaga nipaakar ed dalin na Canaan, ya sikato so lugar ya ginawa to ya “panayaman, diad santuaryo.” Kanian ed sayan insalita manlapud saray salmo, say Palandey Moriah, no iner so santuaryo et impaalagey, et tatawagen labat ya “say beddeng na santuaryo to.” Balet ed sayan parehon salmo et nibaga, “Pinili to so tribu na Juda, say Palandey Sion ya inaro to. Tan impaalagey to so santuaryo to a singa saray atagey ya palasyo, a singa say dalin ya impatalindeg to ya anggad angga.”¹²

GSAM 191Panlinis ed Santuaryo ya Inisip ya Panlinis ed Dalin

GSAM 191.1Diad artikulon abitla ed tagey, kayari ton in-quote so ibabagan ebidensya ya say dalin, odino anggan say dalin na Palestina, so santuaryo, so tinmuloy ya intepet na pastor, “Panon ya nalinisan so santuaryo?” Diad salita na propetan Micah, inmebat, “Ta, nia, say Katawan et ompaway manlapud pasen to, tan onleksab, tan itapakan to ray atatagey a pasen na dalin. Tan saray palandey et natunaw ed silong to, tan saray lawak et nabuag, a singa pabil ed arap na apoy, tan singa saray danum ya ibubuhos ed matarik a pasen.”¹³

GSAM 191.2Lapud say ideya ya karaniwan ya aawaten ed saman a panaon, ya say dalin so santuaryo, mainomay ya natalosan na managbasa no akin ya inisip da, ya anggapoy duwa-duwa, ya diad kasumpalan na duaran libo tan talon lasus ya agew et onsabi so Katawan tan linisan to so dalin unong ed impangideskribe nen Micah. Diad amin ya isusumpa ya imbatik kontra ed saray Adbentista, anggapo ni ingen sakey ya kalaban so angibaga ya say panlinis na dalin panamegley na apoy et aliwan say nagawa bilang panlinis na santuaryo, diad kasumpalan na duaran libo tan talon lasus ya agew.

GSAM 191Saray Apostol ya Adismaya, Balet Asumpal so Kasulatan

GSAM 191.3Aliwa labat ya saya so alimbawa ya ginawa na saray totoo so linawa na Katawan, tinumbok da so kasulatan, balet adismaya ra ed saray iilaloan da lapud agda natalusan so klase na agawa ya nagawa. Ontan met so agawa ed saray apostol nen Kristo. Nen sikatoy akalukbo ed okas, ya onloloob ed Jerusalem, nansigaw ira legan dan nanonotan iray salita na propeta:¹⁴ “Mansigaw ka, anak a bii na Jerusalem: nian, say Ari mo so onsasabi ed sika; sikatoy matunong, tan walaan na kilalaban; mapakumbaba, tan akalukbo ed asno, tan ed okas ya anak na asno.”¹⁵ Talagan kaukolan so panagsigaw ed saman ya okasyon, ta no nankalmon ira, anggan saray bato et mansigaw la komon.¹⁶ Inisip na saray disipulo ya si Kristo, ed saman tan diman, et onyurong la ed trono nen David bilang sakey ya ari ed mundo (“nanisia kami ya sikatoy samay manangiliktar ed Israel”¹⁷), kanian nansigaw ira, “Pinabpabli so panarian nen amakamin si David, ya onsasabi ed ngaran na Katawan.”¹⁸ Panon la komon karakel so panagsigaw da ed satan ya pankanawnawa no natalosan da ya diad loob na sakey simba et inatey la si Kristo ed panteponan nen Jose, ya aliberan na saray guwardyan Roman? Panon la komon karakel so panangiter na “gloria” ed Dios tan say konsagrasyon na saray Adbentista nen 1844 no natalosan da ya say panlinis na santuaryo ed sampot na amin ya propetikon panaon et manbayag na pigaran taon antis ya onsabi so Katawan?

GSAM 192Anggapoy Lingo ed Panagbilang na 2300 ya Agew

GSAM 192.1Legan ya maingat ya inusisa na sarayan totoo so panagbilang da ed satan a panaon, anggapoy aromog dan depekto; balet ag sinmabi so Katawan, tan ag met nalinisan so dalin ed apoy. Antoy kabaliksan to? Segurado ran amta ya kaiba da so Katawan ed satan a baleg a galaw; balet natan et agda ni amta no antoy onsublay. Say panagmatalek da ed Katawan et ag nian-og. Amta da ya ag to ra taynanan. Say liwawa et manlapud sakey a nanlapuan. Say makapagonigon a tepet ed arapan da et nibalikas ed saray salita nen Jeremias ya abitla la, “Magmaliw ka ta ed siak a singa sakey a sigpot a managtila, tan singa danum ya nauupot?” Say pananisia et ag-inmalima ed sayan panduaruwa, ta linma ed isip da so salita na Katawan diad panamegley na propeta Habakkuk nipaakar ed say pakanengneng, “Diad sampot et mansalita itan, tan ag-mantila.”¹⁹ Say balikas ya inusar la manlapud editor na Voice of Truth so maong ya mangipapaliwawa ed posisyon da: “Agmi ni nayarin awaten ya say baleg ya Manunan Pari mi et agto ginawa ed satan ya mismon agew so amin ya ipapaliwawa na tipo ya nepeg min ilaloan.”

GSAM 193Liwawa Nipaakar ed Santuaryo ya Adiskubre

GSAM 193.1Imbaga nen Hiram Edson, a taga Port Gibson, N.Y., ed siak ya diad sinmublay ya agew kayari na impanlabas na panaon nen 1844, legan ton manpipikasi ed beneg na saray binungkos a mais ed uma, biglan sinmabi ed sikato so Espiritu na Dios ed ontan a makapanyarin paraan ya ngalngali sikatoy atumba ed dalin, tan kaiba to so sinmabi ya impresyon, “Say santuaryo ya nepeg a linisan et walad tawen.” Impasabi to iyan kanonotan ed si O. R. L. Crosier, tan sikaran duara et maingat ya inimbestigaan da so pamaakaran. Diad kagapo na 1846, sakey ya malaknab ya paliwawa nipaakar ed kuestyon na santuaryo manlapud pananaw na Biblia, ya insulat nen Mr. Crosier, so impalimag diad Day Star, sakey ya dyaryo ya ipapalimag ed saman ed Cincinnati, Ohio. Diad satan a andukey a sanaysay, impanengneng a say kimey na panlinis ed santuaryo et say unor a kimey nen Kristo bilang Manunan Pari tayo, a ginmapo nen 1844 tan mansumpal sakbay a sikatoy talagan onsabi lamet ed saray lurem na tawen bilang Ari na saray ari tan Katawan na saray katawan.

GSAM 193Saray Iglesian Mananap ed Saray Abalang a Miyembro

GSAM 193.2Linmabas la so koma-samplon agew na koma-piton bulan, tan inisip na saray iglesia ya magmaliw ya mainomay so panagpawil ed saray abalang ya miyembro, ya naisiyan ed sikara diad silong na “eyag na pegley na labi” tan say mensahe na komaduan anghel; balet diad saya et baleg so adismaya ra, unong ya ipanengneng na onsublay ya ebat ed saray paulit-ulit ya panagkerew ya ompawil ed saray datin organisasyon da, unong ya inter ed Midnight Cry na Disyembre 26, 1844:—

GSAM 193.3“Balet anto so katuaan? Amta dan maong ya diad karaklan na sarayan iglesia, saray manunaan ya tema et, ‘Say panagmanisia na mundo,’ ‘say sanlibon taon a milenyo,’ tan ‘say panagpawil na saray Judio ed Palestina,’ antis na personal a isabi na Manangiliktar. Saray ompawil ya onyurong ed silong na makapaugip a kansion na saray ontan ya doktrina ya aliwan unong ed Biblia tan andi-katunongan, et gagawaen da itan ya akabukas iray mata ra; tan say ontan ya gawa ra et talagan ‘panagpawil.’

GSAM 194.1“Lapud nagmaliw ya ‘malaya’ ed kabaliksan na Kasulatan, mas maligen ya ‘manpursigi ya onarap’ nen say ‘ompawil’ odino ‘ontikyab,’ lalo la ed sayan panaon, no kapigan say korona na gloria et magano lan iter ed saray matoor ed si Kristo Jesus.”

GSAM 194.2Say ginawa na saray iglesia ed pan-ipapaatras na isabi na Katawan diad panamegley na panangitandoro na saray abitlan doktrina ya aliwan unong ed Kasulatan, so angipanonot ed saray Adbentista na sarayan salita na propeta Ezequiel: “Anak na too, nengneng mo, ibabaga na saray taga-abong na Israel, Say pakanengneng ya nanenengneng to et para ed dakel nin agew ya onsabi, tan manpopropesiya nipaakar ed saray panaon ya arawi.” Diad parehon koneksyon et naromog so ebat ya inusar na saray Adbentista, “Kanian ibagam ed sikara, Onia so kuan na Katawan a Dios: Anggapo la so nayarin naatraso ni ed saray salita ko, noag ingen say salitan imbaga ko et nagawa, kuan na Katawan a Dios.”²⁰

GSAM 194“Nepeg Mon Man-propesiya Lamet”

GSAM 194.3Saray “akan” ed libro, tan angiter na proklamasyon na “oras,” et inisip da ya asumpal la so trabaho da para ed mundo; kanyan say deklarasyon ya kaukolan da lamet ya mangibangat ed saray nasyon, tan dila, tan ari. Say sananey a parte na kimey, ya anggad natan et agni anengneng, so nepeg lan gawaen natan,—say pangipresenta ed saray totoo na tuan karakter na templo na Dios ed tawen tan say serbisyo ed altar to. Say ganggan ya sukaten so templo²¹ et kaukolan pian makaala na pikakabat nipaakar ed klase na agawa ya nagawa ed kasumpalan na propetikon panaon, tan sirin et naikdan na paliwawa iray salita, “Ed saman et napalinis so santuaryo.”

GSAM 194.4Nengnengen ya say anghel na sayan proklamasyon na panaon et nanlapud tawen, tan antis ya nasumpal so kimey to et angiter na komisyon ya manbangat lamet ed saray totoo. Say mensahe, sirin, ya mangipaliwawa ed tepet nipaakar ed santuaryo, mangiter na kompiyansa ed saray adismaya, tan diad parehon panaon et mangitarya ed sikara na sakey a “tanobong,” odino “baston,” odino totontonen, ya paka-usaran na saray totoo na Dios a suboken so moral a kipapasen da ed arapan to, et nepeg a mangipresenta na malinew a tanda ya nanlapud tawen, tan aliwan nanlapud too.

GSAM 195Impasaran na Panangibiig so Dalan ed Saray Totoo

GSAM 195.1Say dati lan panangibiig kontra ed doktrina na isabi et singa agnalampasan ya balabag ed saray totoo; tan say pansubok ya ibangat lamet ed sikara ya anggapoy malinew tan positibon liwawa nipaakar ed sengegan na pakadismaya, et anggapoy silbi. Saray mismon mananisia ya Adbentista et kaukolan ya napano lamet so kamarerwa ra na ispirasyon manlapud tawen ya komisyon, antis ya saray totoo et duga ya nibangat; tan panon ya nagawa iya? Nagawaan kasi iya diad panamegley labat na kakabatan na too? odino saray akasagmak na aralem a kimey na Espiritu na Dios diad leksab na apalabas a kimot, makontento la kasi ra ed simplin panagnonot na too? Anggapo noag say sakey a kimey a singa say “mensahe na komatlon anghel”²² so makapangibangon ed sikara manlapud saray kaliruan da; tan saya, unong-unong ed pakarengel da, et duga ya inumpisaan, a mangawit na saray sankakombinsean a paneknek a manlapud tawen so nanlapuan to.

GSAM 195Singa Karnero ya Anggapoy Pastol

GSAM 195.2Nia so baleg a grupo na saray adbentista, diad sakey a paraan, a singa karnero ya anggapoy pastol, a say libo-libo ed sikara et pigaran simba labat so apalabas et sinian da so sarili da manlapud amin a iglesia tan pananisia, ya anggapoy antokaman a organisasyon na too a responsable ed espiritual a pankaabigan da. Anggapoy terrenal a managtambay a napagtiwalaan da; diad Dios labat so talek da.

GSAM 195.3Balet, kombinsido ira ed sakey a bengatla, tan saya et singa angkla para ed sikara—duga so impangipasiag na panaon.²³ Balet bilang sakey a grupo, walara ed posisyon ya no ag ira giyaen tan bantayan na Dios, posiblin mangawat ira na saray palson paliwawa, odino naandi so “pasensya” ra tan isuko so pananisia ra ed apalabas ya eksperiensya ra. Ginawa iya na arum; legan a say arum, a say mata na pananisia da et akatutok ed sikatoy inaro na kamarerwa ra, et masimoon ya nitepet, “Bantay, antoy balita ed labi? Bantay, antoy balita ed labi? Inkuan na bantay, Onsabi so kabuasan, tan say labi met: no labay yon mantepet, mantepet kayo: ompawil kayo, la kayo.”²⁴

GSAM 196Si J. N. Andrews nipaakar ed Pakadismaya

GSAM 196.1Si Pastor J. N. Andrews, sakey ya linmasat ed sayan eksperiensya nen 1844, et onia so imbaga to nipaakar ed say pakadismaya:—

GSAM 196.2“Saray adismaya et saramay nanalagar ed Katawan nen 1843 tan 1844. Sayan katuaan et para ed dakel so magenap lan rason pian ibaliwala so amin a testimonya ed sayan kaso. Aaminin mi so adismayan agawa, balet agmi nayarin aminon a saya et mangiiter na duga a rason pian itanggi so lima na Dios ed sayan kimey. Say iglesian Hudyo et adismaya sanen, diad kasumpalan na kimey nen Juan a Managbinyag, impresenta nen Jesus so inkasikato bilang say insipan a Mesias. Tan saray manmatalek a disipulo et mas masakit so pakadismaya ra nen samay iilaloan dan mangiliktar ed Israel et adakep tan pinatey na mauges a lima. Tan kayari na inkioli to, nen iilaloan da ya ipawil to lamet so panarian ed Israel, agda napaliisan so pakadismaya nen naamtaan da ya ompanaw la ed Ama to, tan sikara et itilak ed andukey a panaon ed kairapan tan pasakit. Balet say pakadismaya et agto papatunayan ya anggapoy gawa na Dios ed panangigiya ed saray totoo to. Nepeg ya mangitonton ed sikara ya itama so saray lingo da, balet ag nepeg ya mangitonton ed sikara ya ibantak so talek da ed Dios. Lapud saray anak na Israel et nadismaya ed kalawakan, maminpiga dan tinanggian so giya na Dios. Sikara so impanengneng bilang panamaseseg ed sikatayo, ya agtayo nepeg ya onatap ed parehon alimbawa na agpanisia.”²⁵

GSAM 196Say Katuaan et Walay Binyag na Ag-pankagustoan

GSAM 196.3Singa plano na Katawan ya iyarum iray importantin katuaan ed sakey ya ag-popular a dalan ya magmaliw ya krus²⁶ ya awaten tan unoren iratan. Lalo la itan ya tua ed sarayan unor ya agew. Si Pedro, legan ton ibabaga so nipaakar ed satan ya panaon ya say anggaan na amin a bengatla et “asingger la,” tan no kapigan say “panangukom” et “mangigapo la ed abung na Dios,” inkuan to, “Inar-aro, agyo pagkelawan so mapetang ya subok ya mansubok ed sikayo, a singa walay nikaduman agawa ed sikayo: noag ingen, manliket kayo, lapud sikayo et kabiangan ed saray irap nen Kristo; pian, no say gloria to et nipanengneng la, sikayo met et manliket na alay abig a liket. No sikayo et pasibayangan lapud ngaran nen Kristo, maswerte kayo; ta say espiritu na gloria tan na Dios et manaayam ed sikayo: ed dapag da et babalawen de, balet ed dapag yo et idadayew de.”²⁷

GSAM 197.1No say katuaan et naawat to la so panagbunyok na ag-pankagustoan, say pan-awat ed satan et mankaukolan na mas baleg a grasya nen say basta labat a panumbok ed pananisia na karaklan. Saray mapagkunwari et anggapoy nanenengneng dan baleg a rason pian awaten so katuaan a mankaukolan na gawa, singa say panag-gaor ya “onlaban ed dagem tan agus na danum.” Kanian say katuaan et nagmaliw a subok ed saray matoor, matua so puso, sinsero, tan makonsensia.

GSAM 197.2Impanengneng tayo la nensaman ya say propesiya na kilusan na isabi et mangibabaga na sakey a pakadismaya. Sinmabi itan; tan sirin, diad panangasikaso na Dios, say panangawat ed satan a mensahe et walay krus to.