Kapitulo 25 — Saray Institusyon na Edukasyon

GSAM 391.1“MANALA kayoy kakabatan, manala kayoy pakatalos; agyo lilingwanan; agkayo met onarawi ed saray salita na sangik. Agmo sikatoy taynanan, tan ipasalbar to ka; aroen mo sikato, tan ingatan to ka. Say kakabatan so manunaan a bengatla; sirin, manala kayoy kakabatan: tan ed amin a pananalam, manala kayoy pakatalos.”¹

GSAM 391Eskuelaan nen Prof. G. H. Bell

GSAM 391.2Say kimey ed edukasyon na denominasyon et diad natan et akasabi la ed medyo baleg a sukat. Singa saray arum a sanga na sayan gawa ya abitla la, melag labat so gapoan to. Nen 1868, si Prof. G. H. Bell et angilukas na eskwelaan diad daan ya bilding na opisina, diad norteng-bokig ya suyok na Kalamazoo tan Washington Streets, diad Battle Creek. Niarum ni ed saya, nen tagsibol na 1871, diad kasumpal na Heneral a Komperensya, et ginawa so apat-simba ya kurso na lektura para ed saray ministro, ya ginawa pian ontulong ed saramay manlilingkor ed ministeryo tan kimey na iglesia.

GSAM 391Panawagan para ed sakey a Denominasyonal ya Eskwelaan

GSAM 391.3Wala'y linma ed Review nen Abril 16, 1872, sakey ya artikulo ya apanulowan na, “Wala ta'y Eskuelaan na Denominasyon?” ya ditan et malinew ya impaliwawa iray pankaukolan para ed ontan ya eskwelaan. Diad Review nen Hulyo 16, impaamta ya say eskwelaan et ginmapo ya walaan na labinduan estudyante, ya say bilang da, kayari duaran simba, et dinmakel ya nagmaliw ya duamplo'y lima, tan ginmapo met so sakey ya klase na grammar ed labi ya walaan na limamplo. Say komaduan termino na eskwelaan et ginmapo nen Setyembre 16, 1872, a walaan na apataplon estudyante. Nen Disyembre 16, say eskwelaan et dinmakel la a maong kanian inyalis ed baley-pantitiponan, no iner saray natitiklop a lamesaan et inikabit ed beneg na saray bangko ed iglesia. Sakey met a primaryan departamento na anemaplo tan taloran iskolar so ginawa ed galeriya na iglesia.

GSAM 392Pondo ya Atipon Para ed Kolehiyo

GSAM 392.1Say Heneral a Komperensya nen Marso, 1873, et nanggastos na dakel a panaon ed pan-isip no kasin duga so pan-ipon na pondo para ed panagpaalagey na saray angayan a bilding para ed panagpatakbo na eskwelaan na denominasyon, no iner so saray trabahador et nepeg ya iparaan para ed pan-loob ed nanduruman pasen. Lapud paborablen desisyon, nampili na komite pian mangasikaso ed pangalap na kaukolan a pondo. Legan na satan a panaon, walay saray makakayari tan importantin artikulo ya pinmaway no maminsan ed Review nipaakar ed sayan tema, ya nanlapud saray Pastor Butler, White, tan arum ni, tan lapud saray sagpot nen Pastor Butler tan Haskell ed nanduruman kampo-panagtipon, baleg a kantidad na kuarta so atipon para ed say iplaplanon eskwelaan.

GSAM 392.2Say sakey nin sesyon na Komperensya et ginawa nen Nobyembre 16, 1873, san impaamta ya say $52,000 et insipan la para ed pundo na edukasyon na Adbentista na Komapito ya Agew, ya usaren ed pan-seguro na lote tan pangipaalagey na saray angayan ya bilding ed ontumbok ya panaon. Diad panamegley na boto, ed satan met ya sesyon, sakey ya komite na pitoran totoo so apili pian manggawa na sakey ya sosyedad na edukasyon tan man-anap na lote para ed saray bilding.

GSAM 392.3Diad samay komperensya ya abitla, si Geo. I. Butler so apili bilang Presidente na Heneral a Komperensya, tan si Sidney Brownsberger, bilang Sekretaryo. Saray komite ya apili na Heneral a Komperensya et si Geo. I. Butler, S. N. Haskell, tan Harmon Lindsay. Inyarum so ngaran di James White, Ira Abbey, J. N. Andrews, tan Uriah Smith, pian mibiang ed Komite na Heneral a Komperensya bilang Komite na Pitoran, ya angiparehistro bilang “The Educational Society of the Seventh-day Adventists.” Manlapud satan ya panaon, si Propesor Brownsberger et akasuldong ed Kolehiyo na Battle Creek anggad sikatoy tinawag pian man-asikaso na sakey a kolehiyo ya ilukas ed Healdsburg, Cal.

GSAM 393Labinduan Akre ya Sinaliw para ed Kolehiyo

GSAM 393.1Nen Disyembre 31, 1873, sayan komite et sinmaliw na labinduan akre na dalin diad sagur a parte na Battle Creek, a say pitoran akre ed satan so namporma ed campus na Kolehiyo na Battle Creek.

GSAM 393.2Say eskwelaan na denominasyon ed Battle Creek so nanlukas na termino to ed panaon na ambetel diad saray kuarto na komatlon bilding na opisina nen Disyembre 15, 1873, a walaan na sakey lasus tan samploran estudyante ya akalista.

GSAM 393Kailangan na Saray Eskuelaan na Denominasyon

GSAM 393.3Nipaakar ed pankaukolan tayo, bilang sakey a denominasyon, na saray manepeg ya eskwelaan na edukasyon, si Mrs. White et insulat nen 1873 unong ed onggendan:—

GSAM 393.4“Amin a pakayari na kanonotan et nepeg ya usaren tan paaligwasen, pian saray lalaki tan bibii et magmaliw a balanse so kanonotan da. Say mundo et napno na saray totoon saksakey so direksyon na panagnonot da, ya ontan so nagmaliw da lapud sakey a grupo na saray abilidad da so pinaligwas da legan a say arum et nanpuyot lapud ag-in-usar. Say edukasyon na karaklan ya kalangweran et sakey a pakapaltot. Sobra so panagaral da legan a papabayaan da may nipaakar ed praktikal a bilay ed trabaho....

GSAM 393Kinaukolan so Balansin Edukasyon

GSAM 393.5“Say tuloy-tuloy ya panag-aral, unong ed panag-patuloy na saray eskwelaan natan, et agto iprepara so kalangweran para ed praktikal a bilay. Say isip na too et kaukolan ton onkiwas. No ag-iya onkiwas ed dugan direksyon, onkiwas iya ed aliwan duga. Pian napansiansia so balanse na isip, say trabaho tan panag-aral et nepeg ya pagkabkabeyen ed saray eskwelaan.

GSAM 393.6“Nepeg komon ya inparaan la nen saray apalabas a henerasyon so edukasyon ed mas malaknab a paraan. Kaiba na saray eskwelaan, nepeg komon ya walay saray pasilidad para ed agrikultura tan panag-gawa. Nepeg komon ya walay saray managbangat na gawaen ed abung, tan say sakey a parte na oras kada agew et nepeg ya inusar ed panagtrabaho, pian say pisikal tan mental a pakayari et parehon na-ehersisyo. No saray eskwelaan et impaalagey la komon unong ed plano ya abitla mi, ag komon natan dakel so saray ag-balansin isip.”²

GSAM 394Kolehiyo na Battle Creek

GSAM 394.1Legan na tiagew tan kalgasan na 1874, impaalagey so bilding na Kolehiyo na Battle Creek. Sikato so sakey a bilding a gawa ed ladrilyo, a taloy-palapag ed tapew na basement, 75 x 75 a piye, a singa itsura na Griegon krus. Asumpal tan in-dedika kaiba iray manepeg ya seremonya nen Enero 4, 1875. Nankalukas so eskwelaan ed sayan bilding a walaan na masulok a sanlasus ya estudyante tan pitoran marunong a managbangat para ed nanduruman departamento. Nen nankalukas so kolehiyo ed school year na 1877, nireport a duanlasus ya estudyante so maneeskwela. Say report na Educational Society, a ginawa ed Heneral a Komperensya nen Oktubre, 1880, so angipatnag a walaan na 1400 ya estudyante so nampalista ed Kolehiyo na Battle Creek manlapud 1873 anggad Disyembre, 1880.

GSAM 394Duaran Lalo nin Eskuelaan so Inlukas

GSAM 394.2Diad Heneral a Komperensya, Disyembre, 1882, nireport ya duaran eskwelaan na denominasyon so nilukasan diad silong na panangasikaso na komperensya diad loob na taon, say sakey et say Kolehiyo na Healdsburg, ya walad Healdsburg, Cal., ya nilukasan nen Abril 11; say sakey balet, say Akademya na South Lancaster, ya walad South Lancaster, Mass., ya nilukasan nen Abril 19.

GSAM 394Kolehiyo na Healdsburg

GSAM 394.3Diad Review nen Enero 15, 1884, nipaway so onggendan ya makapainteres ya balita nipaakar ed eskwelaan na denominasyon ed Pacific Coast:—

GSAM 394.4“Nen Setyembre, 1881, nandesisyon so Komperensya na California ya manglukas na sakey ya eskwelaan na denominasyon, tan nampili na komite pian ituloy so sayan gawa. Nen Abril, 1882, asaliw la so malaknab a dalin, a kaiba so manepeg a bilding a walaan na samploran kuarto, duwaran managbangat so naempleyo la, tan inumpisaan la so eskwelaan a walaan na talumplo tan taloran estudyante. Legan na taon na kolehiyo (ya ginmapo nen Hulyo 29, 1882), say eskwelaan et regular ya in-charter bilang kolehiyo, sinaliw so kaaruman ya lote ya limaran akre, impaalagey so maawang ya bulwagan [para ed panayaman na saray estudyante], akakua na faculty na anemiran maestro, tan 152 ya estudyante so nampalista. Manlapu nen nilukasan itan, ngalngali $27,000 so nansubscribi para ed sayan proyekto, ya say dakel ed satan et binayaran na saray totoo na California.”

GSAM 395Akademya na South Lancaster

GSAM 395.1Inumpisaan na saray totoo na New England so eskwelaan da diad abung na panagdayew ed South Lancaster, Mass. Lapud agnapakesawan ya sagpot nen Pastor S. N. Haskell tan saray sakripisyo na saray totoo tayo ed New England, sakey a grupo na saray bilding na eskwelaan so akaparaan la parad dedikasyon diad panaon na panag-ani nen 1884. Saray bilding ya kayarian na South Lancaster Academy Association et limara so bilang da, a say duara et balon-balo. Say bilding na akademya et 60 x 65 a piye, tan say sakey nin balon ginawan bilding, say panayaman na saray estudyante, et 36 x 88 a piye. Saraya et inyalay nen Oktubre 19, 1884.

GSAM 395.2Sayan institusyon, kayari na duamplo tan sakey taon na epektibon serbisyo, et tuloy-tuloy nin onaaliguas, tan anagpaway la na saray maseseg a manag-obra para ed gawa na Katawan diad nanduruman parte na mundo. Say prinsipal na akademya natan et si Frederick Griggs, ya manseserbi met bilang sekretaryo para ed Departamento na Edukasyon na Heneral a Komperensya.

GSAM 395London (Inglatera) a Eskwelahan na Panagsanay

GSAM 395.3Legan ya say kimey ed London, Inglatera, et tuloy-tuloy ya onaaligwas tan onkikibang, nisipen ya maong nen panaon na tiagew nen 1887 ya manglukas na sakey ya eskwelaan na panagsanay para ed saray managkimey na Biblia, ya ditan et isuldong so aktibon kimey na Biblia. Manlapud sayan eskwelaan, saray trabahador so imbaon pian manlingkor ed arum a pasen na United Kingdom tan saray Kolonya. Walan natan so sakey a mausbong ya eskwelaan ya itatakbo ed Duncombe Hall, North London, ya si Prof. H. R. Salisbury so manimaton, ya sikatoy akaawat na inmunan edukasyon to ed kolehiyo ed Battle Creek, Mich.

GSAM 396Pinalaknab so Kolehiyo na Battle Creek

GSAM 396.1Lapud baleg so pankaukolan na lugar ed Kolehiyo na Battle Creek, nen panaon na tiagew na 1886 et nagmaliw ya kaukolan so man-arum na baleg ed bilding na kolehiyo, tan diad tinmumbok ya taon (1887), et manpaalagey na dormitoryo (ya tatawagen ya West Hall) para ed saray bibiin estudyante. Say West Hall et walay kuarto to para ed 150 ya estudyante, tan 225 so nayarin makalugan ed bulwagan a pananganan; legan a say South Hall, ya impaalagey nen 1884, ed abagatan na campus na kolehiyo et nansilbi bilang dormitoryo na saray lalakin estudyante. Nen nilukasan so kolehiyo para ed termino ed panaon na ambetel na 1886-87, walay 568 ya estudyante so maneeskwela.

GSAM 396.2Nen 1885, si Prof. W. W. Prescott so niyan ed pangulo na Kolehiyo na Battle Creek, tan ag-abayag kayari to et aturo ed posisyon na Sekretaryo na Edukasyon para ed denominasyon. Pinatunayan ya sakey ya makabat a desisyon iya. Aliwa labat ya say Kolehiyo na Battle Creek so nagunggonaan, noag ingen diad panamegley na saray sagpot na ontan a sekretaryo, diad bendisyon na Dios, so nansengegan na mas maapit a pankakasakey tan mas baleg ya inkamabunga ed kimey na amin ya eskwelaan na denominasyon tayo.

GSAM 396Misyonaryon Kolehiyo na Emmanuel

GSAM 396.3Say Kolehiyo na Battle Creek et nanserbi na maong anggad taon 1901, sanen say dalin tan saray bilding et nilako ed American Medical Missionary College Association, tan say sosyedad na edukasyon et inekal la. Tampol ya niletneg so balon korporasyon na kolehiyo, a tinawag ya Misyonaryon Kolehiyo na Emmanuel. Nala so sakey a uma diad asingger ed Berrien Springs, diad abagatan-sagur na Michigan, no iner saray bilding et impaalagey na saray estudyante, tan sakey a mauswag a eskwelaan so itatakbo. Say pirmin gagala na sayan eskwelaan et say pangiter na “kompleton edukasyon,” a mitunosan ed instruksyon ya insipi ed unaan a parte na sayan kapitulo. Say panparaan na saray manag-obra ya sigpot a akaparaan parad trabaho ed anggan dinan a parte na mundo no iner so panawagan na Dios ed sikara, et say saksakey a baleg a pilalek tan gagala na saray managbangat na Misyonaryon Kolehiyo na Emmanuel.

GSAM 397Sentral a Eskuelaan na Biblia, Chicago, Ill.

GSAM 397.1Diad sakey a Review nen Marso, 1887, walay suhestiyon ya ginawa nen Pastor Geo. I. Butler ya nepeg ya ipaalagey so sakey a bilding na misyon diad Chicago, Ill., ya magmaliw a sentral a Eskuelaan na Biblia para ed panagbangat ed saray manangasikaso na Biblia, tan diad parehon panaon et nayarin usaren bilang kapilya tan abung na misyon para ed saray totoo tayo diad syudad. Diad panaon na panag-ani tan panaon na ambetel nen 1888-89, impaalagey so bilding. Say gastos, kaiba la ray lote, bilding, gamit, tan arum ni, et manga $28,000. Pormal ya inlukasan nen Abril 4, 1889, diad panamegley na instituto para ed saray managlako na libro. Diad panaon na dedikasyon, imbalita ya saray totoo tayo et kabat da so ag onkulang ed sanlibon totoo ya inawat da la so katuaan natan diad nanduruman parte na bansa lapud saray sagpot na saray manag-ebanghelyo.

GSAM 397.2Sayan eskwelaan et maong ya impangasiwa nen Pastor Geo. B. Starr anggad tagsibol na 1891. Insan, kaiba iray managbangat ya inturo na Komite na Heneral a Komperensya, intuloy to so kimey to anggad taon na 1893, sanen naamtaan ya ag la makasapat so bilding parad ondadakel ya pankaukolan na panagbangat na Biblia. Legan ya gagawaen iray areglo pian isuldong so eskwelaan na Biblia ed Kolehiyo na Battle Creek, say bilding ed Chicago et inlako ed Medical Missionary and Benevolent Association. Say bilding et pinalaknab tan in-ekip para magmaliw ya melag a sanitarium, tan natan et tatawagen ya Sanga na Sanitarium na Battle Creek ed Chicago.

GSAM 397Kolehiyo na Union, Nebraska

GSAM 397.3Say Heneral a Komperensya nen 1889 et iikonsidera to so suhestiyon ya mangipaalagey na kolehiyo ed sakey a lugar ya kombenyente para ed saray onsublay a siam a Komperensya na Estado, a sikara so, Iowa, Minnesota, Kansas, Missouri, Nebraska, Dakota, Texas, Colorado, tan Arkansas. Kanian, nampili so komperensya na sakey a komite a say trabaho to et manpili na maabig a lokasyon para ed eskwelaan. Nen naamtaan na saray sibilian na saray lugar a singa say Des Moines, Ia., Fremont tan Lincoln, Neb., tan arum niran lugar no antoy gagawaen mi, nankikumpetensiaan ira ed panangitarya na kontribusyon para ed sayan proyekto, lapud baleg so pilalek na balang lugar ya ditan ipaalagey so bilding. Lapud say Lincoln, Neb., so angiter na sankamabulosan ya alok, tan lapud sikatoy nibilang a sankaposiblean a lokasyon, ditan impaalagey so eskwelaan.

GSAM 398.1Say manunan bilding, say mismon Kolehiyo na Union, et sakey ya istraktura ya 141 x 84 a piye. Say katagey manlapud dalin anggad toktok na kupola et 100 a piye. Maliban ed sayan bilding, walay duaran dormitoryo, balang sakey et 104 x 104 a piye, tan taloy-andana so katagey da. Inilaloan ya say nalakop ed saray donasyon a dalin et makabayad ed ag onkulang ed kapaldua na gastos parad pangipaalagey na sayan sentral a kolehiyo na denominasyon, no iner saray trabahador et manaral ed saray separadon departamento na English, Scandinavian, tan German diad panamegley na saray managbangat ya mansasalita na mismon lenguahe da.

GSAM 398.2Saray bilding et indedika nen Setyembre 24, 1891, tan say eskwelaan et nilukasan nen Setyembre 30. Say bilang na saray nampalista ed unonan taon et 301. Nen 1892, say eskwelaan et nilukasan a walaan na 222 ya dumaralo, tan say bilang na saray nampalista ed satan a taon et 553. Diad saraya, pitomplo tan sakey so walad departamento na Aleman, tan walomplo tan lima so walad departamento na Scandinavian.

GSAM 398.3Walay sakey a uma ya akasuldong ed kolehiyo, ya mangiiter na trabaho parad saray estudyante ya labay day man-trabaho ed saray gawaing-uma. Say kolehiyo et walay panaderia to met, no iner et medyo mangagawa ra na saray makapabiskeg a panangan. Nen taon 1903, sakey ya asosasyon so inorganisa parad gagala ya mangipaway na saray papel tan libro ed saray salitan Aleman, Suweko, tan Danes-Norwegian. Sayan asosasyon so akankayarian na sarili ton imprentaan tan say interon negosyo na pan-iimprenta ed Amerika na sayan denominasyon parad sarayan nasyonalidad. Say trabaho et manunaan ya gagawaen na saray estudyante. Aliwa labat ya ibabangat ira ed negosyo na panag-imprenta, noag ingen diad saya et makakagamor ira na eksperiensya diad mismon panggagawa na trabahon misyonaryo.

GSAM 398.4Say medikal ya trabaho et narerepresenta met ed sayan kolehyo. Lapud impan-tipid na espasyo, adiskubre ya say eskwelaan et nayarin ekalen so sakey ed saray angkakabaleg ya dormitoryo to, tan sirin, diad daiset labat ya gastos, sakey ya sanitarium so in-operate, tan maong so gagawaen ton trabaho.

GSAM 399Kolehiyo na Walla Walla

GSAM 399.1Sayan eskwelaan et walad asingger ed Walla Walla, Estado na Washington, tan inyalay ed Disyembre 8, 1892. Nankalukas so eskwelaan nen sakey agew antis na satan a walaan na 101 ya estudyante. Dinmakel iyan bilang legan na taon anggad 185. Wala met so melag a uma tan arum niran industriyal ya interes ya akasuldong ed sayan eskwelaan. Maaligwas so kipapasen to, tan maong so gagawaen ton kimey. Si Prof. J. L. Kay so manunaan natan ed saray managbangat.

GSAM 399Eskuelaan na Australia

GSAM 399.2Nen Agosto 24, 1892, nilukasan so sakey ya eskwelaan diad Melbourne, Australia, diad sakey ya abang ya bilding, a walaan na limaran managbangat. Si L. J. Rousseau, a nanlapud Kolehiyo na Battle Creek, Mich., so unonan prinsipal na eskwelaan. Nen taon 1894, say bilang na saray estudyante na sayan eskwelaan et 89.

GSAM 399Pan-akar ed Avondale

GSAM 399.3Lapud labay na saray managpalaknab na eskwelaan ya isuldong so trabaho ed panag-aral, napanonotan ya maong so pananguman na lokasyon, kanyan inmalis ira manlapud baleg a syudad na Melbourne paonlad Avondale, Cooranbong, New South Wales, sakey a rural a distrito, no iner et akaala na uma tan nampaalagey na saray angayan a bilding. Say eskwelaan ed natan et mataletalek ya itatakbo unong ed industriyal a plano.

GSAM 399Asumpal so Hula Nipaakar ed Avondale

GSAM 399.4Diad impangiletneg tan panangimaton ed satan, say gagala na komite et say panag-gagalaw na eskwelaan et unong ed nayarian a pakayari ed saray instruksyon ya inter nipaakar ed saray industrial a eskwelaan. Saya et magmaliw a “modelo ya eskwelaan,” tan aminpiga ya insipan ya no duga so panangimaton ed satan et magmaliw a matalona, aliwa labat bilang eskwelaan, noagta pati say dalin a mismo, ya inisip ya anggapoy kana, et magmaliw a mabunga. Say panaon, diad bendisyon na Katawan, so angipatunayan ed katuaan na satan a prediksyon. Anggano walay maksil a kaleleng ed pigaran taon ya nansusublay, ya angiter na kalamidad ed saray gawaing-uma tan kaugsan na anien ed kaliber-liber da, say uma na Avondale et maberdi tan mabunga. Saya et sakey a makapakelaw a nagawa, kanian saray opisyal na gobyerno et linma pian ontepet nipaakar ed saray paraan ya inusar ed panag-uma pian nagawa iyan makapakelaw a tagumpay.

GSAM 400.1Say report nipaakar ed panag-andar na eskwelaan para ed taon 1903, et impanengneng to so indakel na limamplo porsyento ed bilang na saray estudyante. Maong met so kipapasen na pinansyal—abayaran so amin ya gastos, tan walay balanse ya $1,500 ed kaban na eskwelaan ya usaren para ed pankaabigan na eskwelaan. Si Prof. C. W. Irwin so manangasikaso tan prinsipal na eskwelaan ed loob na ngalngali apat a taon.

GSAM 400Akademya na Mt. Vernon

GSAM 400.2Say Heneral a Komperensya, nen 1893, et angipasa na resolusyon ya pabor ed panglukas na sakey ya akademya diad Mt. Vernon, Ohio. Sayan eskwelaan et wala ray industrial ya interes ya akasuldong ed sikato, tan nireport ya maong so gagawaen ton trabaho. Say bilang na saray akalista to nen 1894 et 140. Si Prof. J. W. Loughhead so nanserbi bilang prinsipal na sayan eskwelaan ed loob na pigaran taon, anggad tinawag ed sikato ya onla ed Washington, D.C. Say address na eskwelaan et Academia, Ohio.

GSAM 400Industrial a Eskwelaan na Keene

GSAM 400.3Inaprobaan na Heneral a Komperensya nen 1893 so panglukas na sakey ya industrial a eskwelaan diad Keene, Texas. Akaala na masulok ya 130 akre a uma, impaalagey iray bilding, tan nilukasan so eskwelaan diad silong nen Prof. C. B. Hughes tan saray katulongan to. Itan et ipepeleng unong ed plano ya pankasakey na trabaho tan panagaral. Say bilang na saray estudyante nen 1894 et 160. Sayan eskwelaan et nagmaliw met ya talagan mataletalek so tagumpay to.

GSAM 400Kolehiyo na Claremont Union

GSAM 400.4Sayan eskwelaan et walad Kenilworth, asingger ed Cape Town, South Africa. Saray managbangat to et maslak ya pinili manlapud Kolehiyo na Battle Creek. Nilukasan itan nen 1894, a walaan na siamaplon estudyante. Diad kasumpal na unonan taon na panag-aral, dinmakel so bilang na saray estudyante kanian kinaukolan ya mangiter na mas malaknab a pasen diad panagpalaknab na bilding na eskwelaan. Say kolehiyo ed sayan petsa et walad panangasikaso nen Prof. C. H. Hayton.

GSAM 401.1Saray Adbentista na Komapito ya Agew et nampataker met na eskwelaan ed baryo (primary) diad Claremont a walaan na pitomplo ya estudyante, tan sakey ya eskwelaan na iglesia diad Beaconsfield, a nen 1894 et walaan na talomplo ya akalista ya estudyante.

GSAM 401Kabuuran na Gawa ed Edukasyon, 1895

GSAM 401.2Say onggendan a report et ginawa na sekretaryo na edukasyon ed Heneral a Komperensya nen Pebrero, 1895:—

GSAM 401.3“Saray pasilidad na edukasyon na denominasyon et nayarin isumaryo unong ed onggendan: Walan limaran kolehiyo ya walad sarayan lugar: diad Battle Creek, Mich.; College View, Neb.; Healdsburg, Cal.; College Place, Wash.; tan Kenilworth, South Africa. Wala met so apatiran akademya, odino eskwelaan ya manggagaway trabaho na saray grado na akademya diad sayan bansa, diad South Lancaster, Mass.; Mt. Vernon, Ohio; Keene, Texas; tan Graysville, Tenn.... Likud ed saraya et wala ni say Eskuelaan na Biblia na Australia; sakey ya eskwelaan ed Mexico a kaiba na medical mission; eskwelaan para ed saray katutubon ugugaw ed Isla na Pitcairn; ed Raiatea, na grupo na Society; ed South Pacific Ocean; ed Bonacca na Bay Islands ed Dayat na Caribbean; manga labinliman eskwelaan na iglesia diad sayan bansa tan diad arum a bansa; duaran eskwelaan na Biblia na Heneral a Komperensya; tan dakel met so eskwelaan na saray managlako na libro tan lokal a komperensya ya aliwan regular ya organisado.”

GSAM 401.4Diad pangiter na kabuklan na bilang na saray manaaral ed saray regular ya kolehiyo tan eskwelaan na denominasyon, kuan na sekretaryo: “Base ed seguradon tantsia, walay masulok ya 3,000 ya estudyante na amin ya edad ya akalista ed saray eskwelaan na Adbentista na Komapito ya Agew ed natan.”

GSAM 402Kabuuran na Saray Institusyon na Edukasyon, 1903

GSAM 402.1Say kimey tan saray institusyon na edukasyon ed limog na saray Adbentista na Komapito ya Agew et dinmakel a kapareho na idarakel na arum a sanga na mensahe. Unong ed impanengneng na General Conference Year Book para ed 1904, diad sayan petsa et walay siam a kolehiyo tan akademya ed Amerika, tan lima ed arum a bansa. Saray walad arum a bansa et narumog ed sarayan pasen: Diad Avondale, New South Wales; Kenilworth, Claremont, asingger ed Cape Town, South Africa; Holloway, London, North, Inglatera; Nyhyttan, Järnboås, Sweden; Friedensau, asingger ed Magdeburg, Alemanya.

GSAM 402.2Wala ed Amerika, saray intermediate school, labin-apat; ed arum a bansa, lima. Saraya et walad Copenhagen, Denmark; Honolulu, Hawaiian Territory; Diamante, Entre Rios, Argentine Republic, South America; Curityba, Brazil, South America; Brusque, Brazil, South America.

GSAM 402.3Likud ed saray abitlan institusyon na edukasyon, walay 357 a lokal ya eskwelaan na iglesia ya ipepeleng na denominasyon. Ed saraya, 317 so walad Estados Unidos, tan apataplo ed arum a bansa. No walay sikatayon eksakton datos anggad natan, sarayan bilang et mas onaligwas ni. Dakerakel ya eskwelaan so nilukasan manlapud sampot na 1902. Alimbawa, im-report na Komperensya na Nebraska ya walay samploran eskwelaan na iglesia da. Nen Pebrero 1, 1904, ipapanengneng na report da so “duamplo tan apatiran eskwelaan na iglesia,” sakey ya indakel na labin-apat ed saksakey ya komperensya.

GSAM 402.4Tua ya say manangigiya ya lima na Katawan et makapakelaw ya angigiya tan angilukas na dalan para ed kimey na edukasyon ed limog na sarayan totoo. Komon ta mangiter na kakabatan ed saramay atawag ya manasikaso ed sayan sanga na gawa to, pian saray nanduruman eskwelaan et naitonton unong ed plano ya impaliwawa to. Sirin et wala so amayamay ya epektibo tan maong ya impan-develop ya managkimey para ed Katawan, tan aliwan lalaki tan bibii ya “saksakey so direksyon” ed edukasyon tan ugali. “Say Katawan so angiter na salita,” kuan na salmista, tan “baleg so grupo [hukbo, ed gilig] ya angipabalita ed satan.”