Sapit 23 — Bann institision lasante
GSAM 358.1“Mo bieneme, mo swete avan tou ki ou prospere ek ki ou an bonn sante, parey kouma ou nam prospere.”1
GSAM 358.2Zour Saba, le 6 zin 1863, Ansien White ek so madam ti asiste enn renion relizie anba latant ki bann Ansien Cornell ek Lawrence ti pe fer dan Otsego, Mich. Laba, Madam White ti resevwar enn vizion ki ti devwal devan li size reform lasante. Apartir sa letan-la, bann lartik lor lasante ek enn lavi ki bon pou lasante ti pibliye dan Revi ek Mesaze, ek li ti koumans ekrir seki ti finn revele ar li lor lasante. Enn parti sa bann keksoz-la ti paret dan Temwagnaz nimero 11, ek dan enn liv ki ti apel Kouma pou viv.
GSAM 358.3Ti met bien an avan devan bann dimounn size enn lavi ki bon pou lasante, ek so vre rapor avek devlopman lekor, lespri ek lavi spiritiel. Dan Revi ek Mesaze le 25 oktob 1864, Ansien J. N. Andrews ti fer bann sigzesion inportan ki swiv lor sa size-la:—
GSAM 358J. N. Andrews lor enn lavi ki bon pou lasante
GSAM 358.4“Abandonn tou manze ki fer ditor, ek viv dan moderasion anba linflians enn bon lansegnman ek enn konsians ki respekte Bondie, se parmi bann keksoz ki pli neseser pou enn bonn sante. Nou lekor se bann tanp Lespri Sin. Pou ki nou kapav vremem glorifie li dan nou lekor kouma dan nou lespri, kouma li neseser ki tou bann lafors nou lekor ena zot plen viger! Remersie Bondie ki pe met sa size-la devan nou pep dan enn fason spesial aster-la. Lasante ek lafors parmi bann keksoz ki ena plis valer pou nou, ek ki pli inportan pou bann ki pou temwin bann gran levennman dan letan ladetres.”
GSAM 359.1Ti defann size bann reg lasante dapre Labib ek moderasion kretien, atraver bann kolonn Revi ek Mesaze ek osi par nou bann paster.
GSAM 359.2Dan Konferans Zeneral, le 20 me 1866, ti donn linstriksion ki swiv atraver Madam White (nou trouv mem linstriksion dan Temwagnaz nimero 11):—
GSAM 359Bizin met an plas enn institision lasante
GSAM 359.3“Ti montre mwa ki nou bizin met an plas enn lakaz pou bann ki pe soufer, ek pou bann ki anvi aprann kouma pou pran swen zot lekor pou anpes maladi....
GSAM 359.4“Kan bann ki pa krwar pou vinn dan enn institision ki konsakre ar tretman efikas bann maladi, ek ki bann dokter ki gard Saba pe dirize, zot pou trouv zot direkteman anba linflians laverite. Kan zot pou aprann konn nou pep ek nou vre lafwa, zot bann prezize pou disparet, ek zot pou gagn enn bon linpresion. Kan zot pou trouv zot koumsa anba linflians laverite, sertin pa pou zis gagn enn soulazman pou bann febles zot lekor, me zot pou trouv osi enn bom ki geri zot nam ki malad akoz pese.
GSAM 359Prediksion bann rezilta
GSAM 359.5“Kan lasante bann malad amelyore gras a enn tretman bien swazir, ek zot koumans apresie lavi, zot ena konfians dan bann ki finn ede pou redonn zot lasante. Zot leker ranpli ar rekonesans, ek bon lagrin laverite pou trouv enn plas ladan pli fasilman; dan sertin ka, li pou gagn nouri, li pou zerme ek li pou raport frwi pou laglwar Bondie. Enn sel nam presie koumsa ki sove pou vo plis ki tou bann mwayen neseser pou etablir enn tel institision....
GSAM 359.6“Sertin ki pou ale apre ki zot finn geri, ouswa ki zot finn gagn enn gran amelyorasion, pou permet ki nou lafwa rant dan bann nouvo landrwa, ek ki nou lev standar laverite kot li ti pou inposib rantre si bann prezize pa ti finn sorti dan lespri bann dimounn avan, gras a enn sezour parmi nou pep pou regagn lasante.”
GSAM 360.1Nou bann dimounn ki ti rasanble ti deside, par enn vot kot tou ti dakor, ki bizin ouver enn institision lasante dan Battle Creek ouswa dan so lantouraz osito ki sa posib, ek ki Dokter H. S. Lay bizin ena responsabilite so direksion medikal. Anplis so formasion medikal avan, li ti finn pas plis ki enn lane dan enn sant tretman par delo dan Les pou aprann bann metod tretman maladi par delo.
GSAM 360Aste enn terin pou enn sant swen ek repo
GSAM 360.2Etablir enn tel institision dan sa lepok-la ti paret enn gran lantrepriz; ek si pa ti ena sa temwagnaz ankourazan konsernan rezilta-la, ti pou ena enn sertin retar avan koumans travay-la. Me pa ti ena retar: zis de-trwa zour apre lafin konferans-la, ti aste gran lakaz Ziz Graves avek wit aker later, ki ti form so zoli rezidans dan lwes Battle Creek. Deswit ti konstrir enn lagrandisman lor de nivo kole ar sa batiman-la, pou servi kouma bann lasal ben. Se dan sa bann batiman-la ki ti ouver Linstiti Reform Lasante.
GSAM 360.3Dan Revi ek Mesaze le 19 zin 1866, ti fer premie lapel zeneral pou souskrir bann aksion dan institision-la. Dan mem nimero sa peryodik-la, ti anonse ki bann legliz dan Battle Creek, Mich., ek Olcott, N.Y., ti deza souskrir bann aksion pou enn montan $2,625, setadir 105 aksion $25 sakenn. Kouma dan Leta Michigan pa ti ena okenn lalwa ki ti permet form enn sosiete pou diriz bann institision lasante, ti konfie bann dibien ar bann administrater pou enn sertin letan, ziska ki ti kapav form enn sosiete rekonet par lalwa.
GSAM 360Lans enn peryodik lor lasante
GSAM 360.4Le 1 out, bann responsab ti osi koumans pibliye enn peryodik mansiel lor lasante, sou form enn magazinn sez paz avek enn kouvertir. Ti apel li Reformater lasante. Sa peryodik-la ankor pe kontinie, anba nom Bonn lasante, ek aster-la li premie magazinn lasante dan lemonn. Sa peryodik-la pa ti zis koz lor bann prinsip lasante ek moderasion, me li ti osi enn mwayen pou fer konn institision lasante-la, ki ti ofisielman ouver pou bann malad ek bann pansioner le 5 septam 1866. Alor, mwins ki kat mwa apre ki ti koz lor sa size-la pou premie fwa ar nou pep, institision-la ti deza aste, ekipe ek an fonksion; ek ti finn souskrir enn som $11,000 dan bann aksion, ek enn gran parti sa som-la ti deza peye.
GSAM 361Form enn sosiete medikal
GSAM 361.1Pandan liver 1866-67, Lasanble lezislativ Michigan ti vot enn lalwa ki ti permet form enn sosiete pou diriz institision lasante-la. Le 17 me 1867, ti pran sa mezir-la, ti adopte bann regleman, ek ti transfer bann terin, batiman ek lezot dibien ar bann administrater ki ti eli kouma bizin. Montan total bann aksion ki ti souskrir ziska sa dat-la ti $26,100; ladan, $18,264.87 ti peye. Institision-la ti ena enn lekip dokter ek asistan konpetan, ek bann batiman ti preske ranpli ar bann malad. Plizir parmi zot ti deza aksepte nou lafwa, apre ki zot ti aprann konn nou antan ki enn pep ek konn laverite apre zot larive dan institision-la.
GSAM 361Enn labiman ki bon pou lasante
GSAM 361.2Dan tou bann lepok ek dan tou bann pei, leker natirel dimounn fasilman les li inflianse par lemonn, avek so lorgey dan lavi, so bann foli ek so bann lamod. Lane 1863, dan nou prop pei, kan ti montre Madam White size lasante ek labiman, pa ti enn leksepsion. Nou trouv sa dan lantetman bann madam pou swiv lamod sa lepok-la, kan zot ti met bann serk anba zot zip; bann serk-la ti telman gran ki boukou parmi zot ti paret pe marse dan enn balon ranverse. Apepre dan mem letan, ti introdwir de lezot lexse dan labiman ki ti provok boukou diskision. Enn ti deskripsion sa bann-la pou kitfwa prepar lekter pou pli bien konpran enn temwagnaz Madam White lor size labiman, ki trouv dan Temwagnaz pou Legliz, nimero 10.
GSAM 362Kondann bann lexse dan labiman
GSAM 362.1Premie lexse, se ti port bann rob avek enn lake ki ti mezir depi dis pous ziska enn demi-yar ouswa plis, dapre dezir sa madam ki ti met li la. Souvan ti les sa bann lake-la trenn lor later, ek bann misie ti apel zot “bann baleyer lari”. Deziem lexse-la ti exakteman lekontrer, ek so stil ti resanble otan ki posib labiman bann zom. Bann ki ti swiv Mamzel Bloomer ti adopte sa lamod-la, ek akoz sa ti apel li “rob Bloomer”. Finalman ti sanz so nom pou “Kostim Amerikin”. Bann ki ti defann sa kostim-la ti fer bann lasanble dan diferan landrwa, ek boukou nou bann ser ti anfaver adopte li. Sertin ti met li.
GSAM 362Enn temwagnaz lor kestyon labiman
GSAM 362.2Konsernan seki ti montre Madam White lor kestyon labiman, mo pou sit de-trwa paragraf dan Temwagnaz nimero 11:—
GSAM 362.3“Pep fidel Bondie se lalimier lemonn ek disel later, ek li bizin touletan rapel ki so linflians ena valer. Si zot ti sanz bann rob exzesivman long pou bann rob exzesivman kourt, zot ti pou detrir enn gran parti zot linflians. Bann ki pa krwar, ki zot ena devwar ede ek esey amenn ver Annyo Bondie, ti pou gagn degou. Kapav fer boukou amelyorasion dan labiman bann fam pou zot lasante san fer enn sanzman telman gran ki bann ki get zot gagn degou.
GSAM 362Labiman reforme
GSAM 362.4“Pa bizin konpres lekor ditou avek korse ek bann lam balenn. Rob-la bizin les enn liberte total pou ki poumon ek leker kapav fonksionn bien. Rob-la bizin desann enn tigit pli ba ki bout lao bot-la, me li bizin ase kourt pou pa tous salte trotwar ek lari san ki bizin lev li avek lame. Enn rob ankor pli kourt ki sa ti pou apropriye, pratik ek bon pou lasante bann fam kan zot pe fer zot travay lakaz, ek sirtou pou bann ki oblize fer plis ouswa mwins travay deor.
GSAM 363Bizin kouver lekor dan enn fason egal
GSAM 363.1“Ki rob-la long ouswa kourt, zot bann manb bizin osi bien kouver ki bann manb bann zom. Kapav fer sa kan met bann pantalon avek enn doubli, ki ramase dan enn bann latwal ek atase otour sevi, ouswa ki larz ek ki vinn pli etrwa anba; sa bann pantalon-la bizin ase long pou zwenn soulie. Bann manb ek bann sevi ki kouver koumsa proteze kont kouran ler. Si gard bann lipie ek bann manb dan enn leta konfortab avek bann linz so, sirkilasion disan pou egal dan tou lekor, ek disan pou res pir ek an bonn sante, parski li pa pe refwadi ouswa gagn okenn lobstak dan so pasaz natirel atraver lekor.”
GSAM 363.2Ti prezant longer sa rob-la kouma enn bon zis milie ant rob avek enn lake ek Kostim Amerikin. Pa ti dir ki li obligatwar pou met li, me ki zot pa bizin pran enn direksion ki pou detrir zot linflians ek fer bann ki zot bizin ede gagn degou. Pa ti dir ki zot bizin kouver zot bann sevi dan fason ki dekrir isi, me ki zot ti kapav fer li dan sa fason-la. Si ariv mem rezilta dan enn lot fason, kouma avek bann souvetman long ek bann linz trikote ki kouver bann zam, sa ti pou an lakor parfe avek sa temwagnaz-la.
GSAM 363Sink pwin neseser pou enn labiman ki bon pou lasante
GSAM 363.3Nou pou remarke ki dan stil labiman ki rekomande, ena sink pwin neseser pou bann linz ki bon pou lasante, setadir:—
GSAM 363.41. Abandonn bann korse ek tou seki konpres latay.
GSAM 363.52. Retir tou bann lanier latwal lor bann lebra ouswa bann manb ki ti pou anpes disan sirkile libreman.
GSAM 364.13. Kouver tou bann parti lekor dan enn fason egal, sirtou bann lipie ek bann sevi.
GSAM 364.24. Fer bann zepol soutenir bann zip, ek zame les zot pez lor bann kote anba latay avek bann lanier latwal otour.
GSAM 364.35. Longer rob-la.
GSAM 364.4Aster-la, tou dokter eklere defann sa kat premie pwin-la; ek konsernan sinkiem-la, finn abandonn toulede: rob avek enn lake ek rob exzesivman kourt.
GSAM 364Madam Jenness-Miller lor labiman
GSAM 364.5Pandan lane 1890, Madam Jenness-Miller, dan New York, ti rekomande dan peryodik lor labiman ek lasante ki ti pli siantifik dan so lepok, ki bann fam rakoursi zot rob tigit par tigit pou pa fer enn sanzman tro sibit, ziska ki zot ariv apepre kot bout lao bot enn madam,—exakteman longer ki Temwagnaz nimero 11 ti rekomande.
GSAM 364Lakor Dokter Trall
GSAM 364.6An 1868, ti pran bann dispozision pou ki Dokter R. T. Trall, dan Kolez Tretman par bann Metod Lasante dan Florence Heights, N.J., donn nou bann paster dan Battle Creek, Mich., enn seri konferans pandan enn semenn, ver lafin mwa me. Pandan sa seri-la, dokter-la ti enn invite kot Ansien White. Madam White pa ti asiste bann konferans-la, me kouma dokter-la ti pou al fer enn ti letour toulezour dan kales avek Ansien White, so madam ek Ansien J. N. Andrews, ti konpran ki dokter-la ti pou ekout bann lide Madam White lor bann reg lasante, maladi ek so bann lakoz, bann lefe bann medsinn, ek lezot size ankor. Li ti zis rakont seki ti finn montre li dan vizion, san dir kot li ti gagn so konesans. Dokter-la ti deklare ki lasians medikal ti an lakor avek bann lide ki li ti exprime. Ansien Andrews ti dir mwa ki, kan zot ti fini zot konversasion deziem zour, dokter-la ti demann Madam White kot li ti gagn so diplom dan lasians medikal. Li ti etone kan li ti aprann ki zame li ti etidie sa bann keksoz-la, me ki li ti pe donn li rezilta seki ti finn montre li dan Otsego, Mich., le 6 zin 1863. Li ti asir li ki tou so bann lide ti dan enn lakor total avek fizyolozi ek bann reg lasante, ek ki lor boukou size li ti al pli an profonder ki li-mem ti deza ale. Apre apepre sink zour sa bann letour ek konversasion-la, dokter-la ti anvi kone ar Ansien White kifer ti finn invit li kit so kolez pou vinn donn bann konferans devan bann paster dan Battle Creek. Li ti dir: “Madam White osi bien prepare ki mwa pou donn zot linstriksion ki zot bizin lor bann reg lasante.”
GSAM 365Lasians medikal aprouve
GSAM 365.1Depi plizir lane, piblik ena akse ar boukou lekritir ki li finn fer lor bann diferan laspe pratik bann reg lasante, ek aster-la finn rasanble boukou ladan dan enn liv ki apel Moderasion kretien ek bann reg lasante dapre Labib. Sertin parmi bann dokter ki ena meyer formasion finn deklare, apre enn lexaminasion atantif sa bann lekritir-la, ki lasians medikal dan enn lakor parfe avek zot. Pou li, sa bann lekritir-la pa rezilta letid, me zis enn transkripsion seki Lesegner finn revel li dan vizion.
GSAM 365Temwagnaz Dokter Kellogg
GSAM 365.2Pou temwagne kouma bann resers dan lasians medikal an lakor avek seki ti devwale devan Madam White dan vizion an 1863, mo pou sit bann parol ki J. H. Kellogg, dokter an medsinn, finn ekrir dan prefas Moderasion kretien. Li alatet sant swen ek repo Battle Creek, Mich., ki renome dan lemonn antie. Li dir:—
GSAM 365.3“1. Dan lepok kot sa bann lekritir-la ti paret pou premie fwa, ti preske ignor size lasante net, pa zis parmi bann dimounn ki ti pe resevwar zot, me dan lemonn an zeneral.
GSAM 365.4“2. Sa de-trwa dimounn ki ti defann nesesite enn reform dan bann labitid lekor ti propaze, ansam avek bann vre prinsip reform ki zot ti defann, bann erer ki ti pli evidan, ek dan sertin ka, ki ti donn degou.
GSAM 366.1“3. Dan okenn landrwa ek par personn pa ti prezant enn lansanb laverite lor bann reg lasante, dan enn fason ordone ek an armoni, san bann erer evidan ek an lakor avek Labib ek bann prinsip larelizion kretien.
GSAM 366.2“Se dan sa bann sirkonstans-la ki sa bann lekritir-la ti paret. Pa ti servi lotorite siantifik pou fer bann dimounn aksepte bann prinsip ki ti ansegne, me enn dimounn ki pa pretann ena konesans siantifik ti prezant zot dan enn fason sinp ek direk; li afirme ki li ekrir avek led ek lotorite lalimier ki sorti kot Bondie.
GSAM 366Bann prinsip finn tini devan leprev
GSAM 366.3“Kouma bann prinsip ki ti prezante dan bann sirkonstans telman partikilie ek avek bann deklarasion telman remarkab finn tini devan leprev letan ek lexperyans? Se enn kestyon ki nou ena tou rezon pou poze. Nou trouv so repons dan bann fe ki kapav verifye dan enn fason bien konplet.... Bann prinsip ki, enn kar-siek avan, swa ti totalman ignore swa ti servi kouma enn size mokri, finn tigit par tigit gagn konfians ek lestim piblik, ziska ki lemonn finn bliye net ki pa finn touletan aksepte zot koumsa. Bann nouvo dekouvert dan lasians ek bann nouvo interpretasion bann ansien fe finn kontign azout bann prev ki konfirme zot, ziska ki aster-la sakenn sa bann prinsip ki ti defann plis ki enn kar-siek avan la finn ranforsi dan fason pli for ki posib par bann prev siantifik.
GSAM 366Prev ki bann vizion sorti kot Bondie
GSAM 366.4“Sirman, bizin konsider sa kouma enn kitsoz remarkab, ki donn enn prev san okenn dout ki Bondie ti pe donn enn bon konpran ek pe gide. Parmi bann lansegnman konfize ek kontradiktwar, ki ti pretann ena lotorite lasians ek lexperyans, me ki ti deforme par bann lide extrem ek ki pa ti kapav fer dibien akoz zot ti melanze avek enn gran kantite erer, enn dimounn ki pa ti pretann ena bann konesans siantifik ouswa enn gran linstriksion ti reisi met lord dan sa bann lide-la. Bizin rekonet ki sa ti enn kitsoz extraordiner. Parmi sa kantite lide konfize ek ranpli ar erer ki de-trwa ekrivin ek panser ti finn propoze lor bann size lasante, li ti reisi rasanble enn ansam prinsip pou prezerv lasante ki ti telman an armoni, telman koeran ek telman veritab ki bann diskision, bann resers, bann dekouvert ek lexperyans enn kar siek pa finn renvers enn sel prinsip, me finn zis servi pou konfirm bann doktrinn ki ti ansegne.” Dat: “Battle Creek, Michigan, 1890.”
GSAM 367Linstitision lasante agrandi
GSAM 367.1Anba direksion J. H. Kellogg, M.D., ki ti vinn medsin an sef linstitision an 1876, ti trouve ki demann pou bann tretman ti telman gran ki, dan printan 1877, ti bizin donn plis lespas. An 1876, nom linstitision ti sanze depi Linstiti reform lasante pou vinn Sanatori medikal ek sirirzikal, ek an 1878 ti konstrir enn nouvo batiman prinsipal.
GSAM 367.2Sa batiman-la ti mezir 136 x 46 pie, avek kat letaz lao sousol. Vaper ti servi pou sof batiman-la an antie, ek gaz ti servi pou ekler li. Enn tigit letan apre so louvertir, li ti preske ranpli avek bann malad ek bann lezot dimounn ki ti pe reste laba.
GSAM 367.3Ziska sa lepok-la, seki temwagnaz Madam White ti finn predir an 1866 lor linstitision ti finn realize dan enn fason bien remarkab. Bann dizenn dimounn ti deza aksepte lalimier laverite pou nou lepok; se kan zot ti vini dan linstitision pou rod lasante ki zot ti koumans interes zot ar sa pep-la.
GSAM 367Sant repo pou lasante dan lakanpagn
GSAM 367.4Dan Bann sign bann letan, le 22 Novam 1877, M. G. Kellogg, M.D., demi-frer J. H. Kellogg, ti anonse ki li ti finn gagn enn teren lor flan montagn Howell, de mil edmi dan nor-es St. Helena, dan konte Napa, Kaliforni, ek ki li ti pre pou konstrir enn batiman ki ti pou apel “Sant repo pou lasante dan lakanpagn”, akote Crystal Springs. Pandan liver 1877-78, ti konstrir enn batiman, ek li ti ouver pou tret bann malad dan koumansman 1878. Parey kouma so institision-mer, Sanatori Battle Creek, sa sant repo pou lasante-la pa finn zis agrandi, me li finn osi enn plas kot enn gran kantite dimounn finn amenn pou konn ek aksepte mesaz.
GSAM 368Zournal lasante Pasifik
GSAM 368.1Lete 1885 ti enn peryod ranpli ar bann levennman ki ti fer travay mesaz trwaziem anz avanse. Le 1 Me, Sant repo pou lasante dan lakanpagn, dan St. Helena, ti plase anba direksion medikal enn medsin ki ti finn gagn so diplom dapre bann regleman. Dan mwa Zin, ti koumans pibliye Zournal lasante Pasifik ek Defanser temperans enn fwa tou le de mwa, enn magazinn 24 paz anba sipervizion redaksion Ansien J. H. Waggoner. Gras-a sa bann mwayen-la, linstitision lasante ti gagn enn nouvo lavi. Olie ki li ti fer bann pert kouma dan bann lane avan, lane apre lane li ti koumans fer enn benefis net ant $2,000 ek $4,000 par an, ziska ki, pou lane ki ti fini an Avril 1891, li ti fer enn benefis net plis ki $12,000.
GSAM 368.2Dan renion Lasosiasion Sant repo pou lasante dan lakanpagn, dan St. Helena, an 1887, ti fer sa deklarasion-la lor finans linstitision: le 1 Me 1885, valer net linstitision ti zis $5,322.76, setadir $2,547.24 mwins ki valer tou bann aksion ki ti finn emet ziska sa dat-la. Setadir, linstitision ti finn depans tou so bann reveni ek $2,547.24 dan so kapital an aksion. Le 1 Avril 1887, apre dediksion tou so bann det, valer linstitision ti $21,372.64, setadir enn ogmantasion $16,049.88 dan venntrwa mwa. Dan sa som-la, ti finn aste bann aksion pou enn valer $5,280, ek ti finn fer bann don linstitision pou enn valer $2,497.60; alor, linstitision ti finn fer enn benefis net $8,272.28 dan so travay. Ver sa lepok-la, Zournal lasante Pasifik ti vinn enn piblikasion 32 paz ki ti sorti sak mwa avek enn kouvertir, ek ti trouve ki li ti ankor pli itil pou fer bann lintere ek bann prinsip linstitision avanse.
GSAM 369Travay bienfezans
GSAM 369.1Dan Misioner medikal pou Zanvie 1891, kan li ti pe koz lor Sanatori Battle Creek, Dokter J. H. Kellogg ti dir:—
GSAM 369.2“Bann tretman ki finn done par sarite pandan sa kar siek depi ki linstitision existe-la reprezant enn som bien plis ki $100,000, plizir fwa plis ki kapital an aksion ki ti investi o-koumansman.
GSAM 369.3“Anplis travay bienfezans ki nou finn mansione, linstitision finn avoy bann dimounn pou donn bann konferans, bann infirmie ek infirmier, bann ansegnan dan bann lekol lakwizinn, ek lezot dimounn ki finn forme pou diferan kalite travay misioner.”
GSAM 369Enn lapel pou bann orfelin
GSAM 369.4Dan Konferans Zeneral, le 8 Mars 1891, Dokter Kellogg ti fer enn lapel bien serye an faver bann orfelin. Li ti dir: “Mo trouv mwa nome kouma ‘enn delege san enn group presi pou reprezante’, ek mo pou reprezant bann ki pena reprezantan — bann orfelin, ki pena personn pou okip zot.”
GSAM 369Don $30,000 Madam Haskell
GSAM 369.5Dan Misioner dan nou pei pou Zanvie 1892, ti fer enn lapel bien for pou gagn bann fon pou donn bann zanfan orfelin enn fwaye. Dan sa zournal-la ti ena nom bann dimounn ki ti finn promet bann don pou fwaye-la, pou enn total $17,716. Bann ki ti pe organiz sa travay-la ti trouv sa som-la tro tipti pou enn proze osi gran, ek zot ti per ki travay-la pran retar. Me Sa ki trouv lafin depi koumansman, ek ki posed “bann bef lor mil kolinn,” ti fer bann levennman deroul dan enn tel fason ki enn madam ris ki pa ti dan nou lafwa, Madam Caroline E. Haskell, dan Chicago, vev Misie Frederick Haskell, kouma li ti tann koz lor sa travay bienfezans ki ti pe anvizaze-la, ti deswit met $30,000 a dispozision komite konstriksion. So bann kondisyon ti sinp: servi sa som-la an antie pou konstrir enn orfelina dapre bann plan ki ti finn deza trase, diriz li dan enn lespri ouver ek zenere, ek apel linstitision Fwaye komemoratif Haskell, an memwar so mari ki ti finn mor.
GSAM 370.1Avek bann mwayen ki ti finn fourni koumsa, Lasosiasion mision medikal ek bienfezans ti kapav, pandan lane-la, konstrir ek ouver batiman-la kouma enn fwaye pou bann orfelin. Ti fer so seremoni dedikasion le 25 Zanvie 1894. Pandan enn gran parti letan depi sa dat-la, sa fami ki ti forme ar bann orfelin, bann ed ek bann ansegnan-la ti ena an mwayenn san dimounn.
GSAM 370Fwaye komemoratif James White
GSAM 370.2Anplis okip ek soutenir sa bann orfelin-la, sa lasosiasion-la diriz enn lot institision bienfezans, ki apel Fwaye komemoratif James White, kot pran swin plis ki ven dimounn aze ki pena lakaz, ek fer zot viv dan konfor.
GSAM 370Bann misioner medikal
GSAM 370.3Dan sa domenn travay-la, ti fer enn lot pa determinen kan ti koumans form bann misioner medikal. Pou felisit sa zefor-la pou elev limanite, Madam White, dan enn let ki li ti ekrir depi Preston, Lostrali, le 16 Septam 1892, ti dir:—
GSAM 370.4“Mo ti a swete ki ena san dimounn an formasion kot asterla ena enn sel. Se koumsa ki sa ti bizin ete. Bann zom ek bann fam kapav pli itil kouma bann misioner medikal ki kouma bann misioner ki pena formasion medikal.”
GSAM 370.5Depi ki ti ekrir sa bann parol-la, kantite dimounn ki pe swiv enn kou pou prepar zot pou enn lavi dan sa kalite servis-la finn bien ogmante.
GSAM 370Travay lasante agrandi
GSAM 370.6Dan Misioner medikal pou Zanvie 1894, ena enn ti deklarasion ki prezant bann fe interesan lor fason travay lasante finn agrandi. Li dir koumsa:
GSAM 371.1“Ti organiz Linstiti reform lasante an 1866.... Ti aste enn ti lakaz an bwa, enn lakaz prive dan enn landrwa agreab ek bon pou lasante, lor bann oter Battle Creek, enn parmi bann lavil Michigan ki ti pe devlope. De dokter, de dimounn pou okip bann bengn, enn infirmier ki pa ti forme, trwa ouswa kat ed, enn malad, bann difikilte san konte, ek enn gran lafwa dan lavenir linstitision ek dan bann prinsip lor lekel li ti fonde — ala kouma sa travay ki existe zordi-la ti koumanse. Li ti apel Linstiti reform lasante.
GSAM 371.2“Lor plas kot premie ti lakaz-la ti ete, asterla ena enn batiman 312 pie longer ek 100 pie profonder, avek sis letaz, ki kapav akeyir trwa san dimounn. Li ekipe avek tou bann laparey ki lasians modern kapav propoze pou pran swin bann malad ek retabli zot lasante. Dis medsin, ki laplipar bann spesialis dan zot domenn, form lekip medikal. Bann infirmie ek infirmier ek bann lezot ed form enn fami plis ki trwa san dimounn, ek bann dimounn ki frekant linstitision sorti dan tou bann Leta Linyon, osi bien ki boukou lezot ki sorti dan bann pei etranze. So bann laport touletan ouver pou bann misioner ki travay dan nou pei ouswa aletranze, dan ninport ki denominasion, ek li rar ki sa fami-la pa ena enn ouswa plizir sa bann envite-la parmi li.
GSAM 371Lopital sanatori
GSAM 371.3“Ti konstrir lopital-la an 1888, enn batiman 100 x 60 pie, avek sink letaz. Trwa bann letaz lao servi pou servis sirirzi sanatori, bann lasam ek bann sal pou bann malad. Bann biro pou travay bienfezans linstitision trouv laba osi. Venn ti lakaz rasanble otour li; plizir ladan sofe avek vaper ek, parey kouma batiman prinsipal, zot eklere avek elektrisite. Se bann malad ouswa bann etidian ki res ladan. Le 1 Ziliet 1884, ti organiz enn lekol pou form bann infirmie ek infirmier pou mision medikal. Pandan bann premie sis mwa, ti ena trannsink etidian ki ti inskrir.”
GSAM 372Prediksion ki bann travayer pou ale
GSAM 372.1Kan li ti pe koz lor linstitision lasante ki trouv dan St. Helena, Kaliforni, Madam White, dan enn mesaz ki li ti ekrir depi Tramelan, Laswis, le 6 Fevriye 1887, ti dir:—
GSAM 372.2“Bondie finn dir ki si bann zom ki ena enn lien avek sa linstitision-la mars avek limilite ek lobeisans, an fezan lavolonte Bondie, li pou viv ek prospere; ek depi laba pou avoy bann misioner pou beni lezot avek lalimier ki Bondie finn donn zot. Dan lespri Zezi, zot pou kraz bann zidol dan bann plas elve; zot pou devwal bann siperstision ek plant laverite, pirte ek sintete kot asterla dimounn atase zis ar bann erer, ar satisfaksion zot prop dezir, ar mank temperans ek ar lemal.”
GSAM 372.3Nou sit sa bann parol-la parski zot aplik avek mem lafors ar bann lezot institision parey.
GSAM 372Sikse promet dan travay lasante
GSAM 372.4Dan enn temwagnaz spesial ki ti donn legliz an 1891, nou lir: “Benediksion Bondie pou repoz lor sak zefor ki fer pou lev enn lintere dan reform lasante; parski bizin sa partou. Bizin enn reveil konsernan sa zafer-la; parski Bondie ena lintansion akonpli boukou atraver sa mwayen-la.”
GSAM 372Kolez amerikin pou bann misioner medikal
GSAM 372.5Tigit par tigit, lalimier lor enn fason rezonnab pou tret bann maladi ti pe ogmante, ziska ki, an Zin 1895, ti ena enn demann pou organiz enn institision ledikasion medikal. Pou reponn sa demann-la, ti organiz Kolez amerikin pou bann misioner medikal avek lobzektif spesial form bann medsin pou travay anba Lasosiasion mision medikal ek bienfezans bann Advantis setiem zour, dan nou pei ek dan bann pei etranze. Ti fer bann seremoni linogirasion dan Battle Creek, le 30 Septam 1895, ek kolez-la ti ouver so bann laport so landemin, le 1 Oktob, avek enn klas karant etidian.
GSAM 372.6Dan lanons kolez-la, nou lir:
GSAM 372.6“Kolez-la anrezistre kouma enn lantite legal dan Chicago, dapre bann lalwa Leta Illinois. So program letid pou osi aprofondi ki program bann meyer lekol lamedsinn dan Letazini. Enn parti lansegnman pou done dan Chicago, ek enn parti dan Battle Creek, Michigan.”
GSAM 373.1Konsernan bann dimounn ki pe prepar zot pou travay misioner medikal, nou lir sa dan Misioner medikal pou Out 1895:
GSAM 373.1“Klas bann infirmie ek infirmier ki asterla an formasion dan Lekol formasion pou bann infirmie ek infirmier Sanatori Battle Creek ena plis ki 250 etidian; sakenn parmi zot ki deza ena konpetans pou fer travay misioner medikal finn gagn enn pos atribie. Bizin bann infirmie ek infirmier pou bann zil Lamer Sid, Lenn, bann Antiy, Lamerik Sid, vennsink ouswa trant pou bann Leta Sid Letazini, ek pou nou bann gran lavil.”
GSAM 373Travay misioner medikal agrandi
GSAM 373.2Dan seremoni remiz diplom pou klas bann infirmie ek infirmier misioner sanatori, ki ti fer dan Tabernak le 5 Novam 1895, Dokter Kellogg ti dir:—
GSAM 373.3“Ena enn douzenn lane, dan enn seremoni koumsa, de infirmier ti gagn zot diplom. Asterla ena enn lekip ant trwa san ek kat san infirmie ek infirmier. Ena diznef medsin dan sanatori, ek vennde dan bann institision parey, ki ena plis ouswa mwins enn lien avek sanatori, ek ki anba sipervizion Lasosiasion mision medikal ek bienfezans. Sinkanntrwa nou bann infirmie ek infirmier dan diferan pei etranze — Laswed, Mexik, Lakot Lor dan Lafrik, Lostrali, Lafrik Sid, Dannmark, Lenn, Nouvel Zeland, Samoa ek Lagwiyann Britanik. Ena swasanntrwa etidian lamedsinn ki asterla an formasion. Karanteenn parmi zot isi, ek vennde dan Liniversite Michigan ek bann lezot lekol. Aswar, vennde infirmie ek infirmier pe gagn zot diplom isi, ek zot bien prepare pou al travay kouma bann infirmie ek infirmier kalifie.”
GSAM 373.4Kan nou swiv fason nou bann institision lasante finn agrandi ziska 1902, nou trouv ki Sanatori Battle Creek, avek so kolez lamedsinn ek so lekol formasion pou bann infirmie ek infirmier, pli gran institision sa kalite-la dan lemonn ki pou bann Advantis setiem zour.
GSAM 374Bann batiman prinsipal brile
GSAM 374.1Dan lanwit le 18 Fevriye 1902, enn dife ti detrir gran batiman prinsipal, avek so bann bon lekipman, ek gran lopital-la. Sa ler-la, ti ena kat san malad ek lezot dimounn ki ti pe reste dan bann batiman-la. Me gras-a bann zefor eroik bann dokter, bann infirmie ek infirmier ek bann ed, ek avek proteksion spesial Lesegner, ti reisi fer zot tou sorti dan bann batiman-la san okenn blesir grav.
GSAM 374Nouvo sanatori
GSAM 374.2Enn lot batiman, pli gran ek pli solid ki premie-la, finn konstrir lor plas bann ansien batiman. Ti poz premie ros batiman ki ena asterla le 12 Me 1902, ek ti fer so seremoni dedikasion le 31 Me 1903. Bann dirizan linstitision dir lor sa nouvo batiman-la ki “li osi solid ek dirab ki enn batiman kapav ete kan konstrir li avek feray, ros, brik ek siman.
GSAM 374.3“Dan tou sans, lekipman linstitision se seki pli modern, pli konple, pli bon pou lizien, pli pratik ek pli solid ki kapav gagne; ek nou krwar ki, asterla ki li fini konstrir, Sanatori Battle Creek ofer bann fasilite ek bann konfor pou bann malad ki sirman pena siperyer.
GSAM 374.4“Bann dirizan linstitision finn ena kouma lobzektif rasanble dan enn sel landrwa, dan bann bon kondisyon, tou bann nouvo metod ek laparey pou tret bann malad ki rekonet dan lamedsinn ki baze lor rezonnman, ek servi sa bann metod-la avek konsians ek lintelizans.”
GSAM 374Boukou sanatori pou etabli
GSAM 374.5Lalimier ki finn kominike ar sa pep-la se ki Lesegner anvi ena boukou sanatori enn grander modere, reparti atraver lemonn, olie ki zis de-trwa institision enorm. Nou kontan trouv ki finn koumans ouver bann ti sanatori dan diferan parti lemonn, sirtou pandan sa dernie dis lane-la. Dan Liv aniel Konferans Zeneral pou 1904, ena enn lalis plis ki sinkant sa bann ti institision-la.
GSAM 375Lalis bann sanatori
GSAM 375.1Mem si li ti kapav interesan pou rakont bann sirkonstans ki finn amenn zot etablisman, avek lespas limite ki nou ena, nou bizin kontant nou ar enn lalis bann pei kot zot trouve, ek zot kantite dan sak pei. Nou trouv dan Letazini, 35; Gran Bretagn, 3; Lalmagn, 1; Laswis, 1; Dannmark, 1; Norvez, 1; Laswed, 1; Lafrik Sid, 1; Lostrali, 2; Nouvel Zeland, 1; zil Samoa, 1; Mexik, 1; Lenn, 1; Zapon, 1.
GSAM 375Lalis bann sal tretman
GSAM 375.2Anplis sa bann sanatori-la, ena vennde sal tretman, diset parmi zot dan Letazini; enn dan Jaffa, enn dan Zerizalem, Palestinn; enn dan Guadalajara, Mexik; enn dan Kimberley, Lafrik Sid; ek enn dan Rockhampton, Lostrali. Anplis sa, ena vennsis restoran vezetarien kot dimounn kapav gagn bann manze pir ek bon pou lasante, ek osi resevwar plis ouswa mwins lansegnman lor fason ki bizin viv.
GSAM 375.3Sa bann sif lor progre bann prinsip reform lasante-la montre kouma Lesegner kapav “akonpli enn gran travay atraver sa mwayen-la”, parey kouma Bondie ti finn predir an 1866; ek zot osi montre, kouma ti anonse an 1863, kouma “bann prinsip reform lasante” kapav zwe enn rol pou “prepar enn pep pou ki li anleve kan Lesegner vini”. Alor, ki sa bann institision lasante-la miltipliye san fwa, ek ki zot akonpli biento seki ti etabli ek konsevwar zot pou fer.
Notes
- 3 Zan 2. ↩