Babi na 19 — "Ta Wurin ’Ya’yansu Za Ku Gane Su"

GSAM 299.1"KIRISTI kansa ya ba wa waɗansu baiwa su zama manzanni, waɗansu su zama annabawa, waɗansu su zama masu wa’azi, waɗansu kuma su zama fastoci, da kuma malamai. Ya yi haka don yă shirya mutanensa saboda ayyukan hidima, don a gina jikin Kiristi. Wannan zai ci gaba har sai mun zama ɗaya a cikin bangaskiya da kuma ta wurin fahimtarmu na Ɗan Allah. Sa’an nan za mu zama balagaggu, kamar yadda Kiristi yake, mu kuma zama gaba ɗaya cikakku kamar sa."¹

GSAM 299.2Lokacin da Mai Cetonmu ya sanya baiwun Ruhu ɗinsa a cikin coci, domin cika, "kamar yadda ya so," aikin Ubangiji har sai ranar cikakkiya ta zo, bai bar mutanensa su yi hasashe ko wata alama ta samo asali ne daga sama ko daga ruhohi masu mugunta ba, sai dai ya ba da ƙa’idoji da za mu gane ko ruhun na Allah ne ko a’a. Ko a cikin waɗannan kwanaki na ƙarshe, lokacin da, kamar yadda annabi Yowel ya annabta, Ubangiji zai zuba Ruhunsa a kan dukkan jiki, kuma ’ya’ya maza da mata za su yi annabci,² Bulus ya ce mutane kada su raina annabci, amma su "gwada kome," kuma su "riƙe abin da yake mai kyau."³

GSAM 299.3Ta yaya za a iya gwada irin waɗannan bayyanar sai dai ta hanyar kwatanta su da ƙa’idodin Littafi Mai Tsarki na gano aikin Ruhun Allah? Komai abin da ya wuce fahimtar hankali mai iyaka ba lallai ya fito daga Allah ba ne, domin Littafi Mai Tsarki ya bayyana cewa a kwanakin ƙarshe Iblis zai yi mu’ujizai don ya yaudari duniya, domin ya tattara su don yaƙi a babbar ranar Allah Maɗaukaki.⁴ Saboda haka, ta hanyar kwatanta bayyanar da ƙa’idodin Littafi Mai Tsarki ne za a gane gaskiyar baiwar ruhaniya. Haka nan ake bukatar irin wannan kulawa a wannan lamari kamar yadda mutanen duniya ke yi wajen gano kuɗi na ƙarya.

GSAM 300Gano Kuɗi Na Ƙarya

GSAM 300.1A cikin mujallar Detroit Bank Note Reporter ta Afrilu, 1863, Mista Preston ya bayar da ƙa’idoji biyar don gano kuɗaɗen ƙarya, kuma ya bayyana cewa duk wanda zai yi cikakken bincike kan kowace takardar kuɗi da ta shiga hannunsa, bisa ga waɗannan ƙa’idojin, ba zai taɓa jin tsoron a yaudare shi ba.

GSAM 300.2Babu wata hanya mafi tabbas don tabbatar da baiwar annabci fiye da kwatanta ta da bayanin irin baiwun da aka bayyana a zamanin Littafi Mai Tsarki, da kuma gwada ta da ƙa’idodin da aka bayar a ciki. Littafi Mai Tsarki ya tanadar mana komai don kowane aiki nagari (2 Timoti 3:16, 17), kuma ya ba da cikakken bayani game da bayyanar baiwar annabci, da yadda ainihin aikin Ruhun Allah za a iya gane shi daga ayyukan Iblis, da baiwunsa na ƙarya.

GSAM 300ƘA’IDODIN GANE BAIWAR GASKIYA

GSAM 300.3Ubangiji ya ba da a cikin kalmarsa aƙalla ƙa’idoji bakwai daban-daban da za a bambance ainihin bayyanar Ruhun Allah daga ayyukan Iblis.

GSAM 300Ƙa’ida ta Farko—Umarnin Musamman

GSAM 300.4Annabi Ishaya, a lokacin da yake magana game da abubuwan da za su kasance a kwanakin ƙarshe, ya ce: "Ɗaura shaidar nan ta gargadi ka kuma yimƙe umarnin Allah a cikin almajiraina. Zan saurari Ubangiji, wanda ya ɓoye fuskarsa daga gidan Yaƙub. Zan sa ido gare shi (fassarar zahiri daga KJV).... Sa’ad da mutane suka ce muku ku nemi shawarar ’yan bori da masu sihiri, waɗanda suke shaƙe murya har ba a jin abin da suke faɗi, bai kamata mutane su nemi shawara daga Allahnsu ba? Me zai sa ku nemi shawara daga matattu a madadin masu rai? Nemi umarnin Allah da kuma shaidar jan kunne. Duk wanda bai yi magana bisa ga wannan kalma ba, ba su da amfani."⁵

GSAM 301.1A cikin wannan aya, an jawo hankali ga wani al’umma da ke farfaɗo da hatimin dokar Allah—al’umma wadda ke jiran Ubangiji, tana cikin hidimarsa. Suna sa ido gare shi; wato, suna jiran zuwansa—wannan ma a lokacin da ruhu da ke ikirarin cewa ruhun matattu ne ke roƙon mutane su nemi su. Wasu suna sauraron kiran su, suna neman ilimi daga matattu; amma Ubangiji yana gayyatar mutanensa su nemi shi. Wannan a zahiri yana nufin cewa idan suka nemi shi, zai ba su koyarwa ta musamman. Ba su bukatar neman matattu, waɗanda ba za su iya ba su wani bayani ba; domin "ba za su taɓa zama sashen wani abin da yake faruwa a duniya ba;" kuma "matattu ba su san kome ba."⁶

GSAM 301.2A cikin wannan aya da ke sama an bayar da ƙa’ida da za a gwada dukkan sadarwa da ita,—"duk wanda bai yi magana bisa ga wannan kalma ba, ba su da amfani." Dukkan sadarwa daga Ubangiji za su yi daidai da kalmarsa da dokarsa.

GSAM 301.3Idan muka danganta wannan ƙa’ida ga rubuce-rubucen Misis White, zan ce cewa a cikin shekaru hamsin da biyu da suka gabata na karanta shaidu nata da kulawa, ina kwatanta su da dokar Allah da shaidar Littafi Mai Tsarki, kuma na sami cikakken daidaito tsakanin su biyun. Umarninta ba su zo ne don su ba da wata sabuwar wahayi da za ta maye gurbin Littafi Mai Tsarki ba, sai dai don nuna mana a ina da yaya, a cikin waɗannan lokuta, mutane za su iya karkata, su kauce daga kalmar. Matsayin da shaidu na Misis White ke da shi za a iya bayyana shi mafi kyau a cikin abin da ita kanta ta rubuta game da su:—

GSAM 301.4"Kalmar Allah ta wadatar wajen haskaka tunani mafi duhu, kuma za a iya fahimtarta ga duk wanda ke da sha’awar fahimtar ta. Amma duk da haka, wasu da ke ikirarin cewa nazarin Kalmar Allah ne suke yi ana samun su suna rayuwa a saɓanin mafi bayyanannun koyarwarta. Don kada maza da mata su sami uzuri, Allah yana ba da shaidu masu bayyananne da takamaimai, yana mayar da su ga kalmar da suka yi watsi da bin ta.

GSAM 302.1"Kalmar Allah cike take da ƙa’idoji na gaba ɗaya don gina halaye masu kyau na rayuwa, kuma shaidu, na gaba ɗaya da na kashin kai, an tsara su ne don jawo hankalinsu musamman ga waɗannan ƙa’idoji.... Ba ku saba da Littafi Mai Tsarki ba. Da kun ɗauki kalmar Allah a matsayin nazarinku, da muradin kai matsayin Littafi Mai Tsarki da cimma cikakkiyar Kiristanci, ba za ku bukaci shaidu ba....

GSAM 302.2"Ubangiji yana nufin ya gargaɗe ku, ya yi gyara, ya ba da shawara, ta wurin shaidu da aka ba, kuma ya sa a zukatanku muhimmancin gaskiyar kalmarsa. Shaidu da aka rubuta ba don su ba da sabon haske ba ne, amma don su yi tasiri sosai a zuciya game da gaskiyoyin wahayi da aka riga aka bayyana.... Ba a fito da sabon gaskiya ba, amma Allah, ta wurin shaidu, ya sauƙaƙa manyan gaskiyoyin da aka riga aka bayar, kuma a hanyar da Ya zaɓa da kansa Ya gabatar da su ga mutane, don tayar da hankali da kuma yin tasiri a zukata da su, domin kowa kaɗai ya kasance ba shi da uzuri....

GSAM 302.3"Shaidu ba don ƙasƙantar da kalmar Allah ba ne, sai don ɗaukaka ta, da ja hankalin zukata gare ta, domin kyakkyawar sauƙin gaskiya ta yi tasiri a kowa.... Idan mutanen da yanzu ke ikirarin kasancewa musammam dukiyar Allah sun bi umarninsa, kamar yadda aka bayyana a cikin kalmarsa, ba za a ba da shaidu na musamman ba don farkar da su game da aikin da ya rataya a wuyansu, da kuma nuna musu laifinsu da mummunan haɗarinsu na yin watsi da bin kalmar Allah."⁷

GSAM 302Ƙa’ida ta Biyu—Annabawa Masu Gaskiya

GSAM 302.4Mun riga mun koyi cewa duk annabawa na gaskiya za su yi magana daidai da dokar Allah da shaida ta kalmarSa. Manzo Yohanna ya bayar da wata ƙa’ida wadda ke bayyana koyarwar annabawan gaskiya. Ya ce: "Abokaina ƙaunatattu, ba kowane ruhu za ku gaskata ba, sai dai ku gwada ruhohi don ku ga ko daga Allah ne, domin annabawan ƙarya da yawa sun fito duniya. Ga yadda za ku gane Ruhun Allah, duk ruhun da ya yarda cewa Yesu Kiristi yana zuwa cikin jiki (fassarar zahiri daga KJV), to, daga Allah yake. Amma duk ruhun da bai yarda da Yesu ba, ba daga Allah ba ne, ruhun magabcin Kiristi ne, wanda kuka ji yana zuwa, har ma ya riga ya shigo duniya."⁸

GSAM 303.1Ku yi hankali da rubutun da ke sama. Bai ce duk wanda ya yarda cewa Yesu Kristi "ya zo cikin jiki," ba, amma "yana zuwa cikin jiki" (fassarar zahiri daga KJV); wato, yana zuwa, ta wurin Ruhunsa, kuma yana zaune a cikinmu, a matsayin amsa ga bangaskiyarmu. A gaskiya, wannan shi ne babban gaskiyar bishara, "Kiristi a cikinku, begen ɗaukakar da za a bayyana."⁹

GSAM 303.2Babban jigon da ake samu a dukkan rubuce-rubucen Misis White shi ne bukatar Kristi a matsayin Mai Ceto mai zama a cikinmu idan za mu yi wani ci gaba a hanyar sama. Rubuce-rubucenta suna koyar da bukatar Kristi a farko, a ƙarshe, da a kowane lokaci. A matsayin misali na wannan gaskiya, ana jawo hankali ga littafinta, Matakai Zuwa Wurin Kristi, wanda aka sayar da fiye da kwafi dubu ɗari ɗaya na harshen Ingilishi, ba tare da la’akari da dubban kwafi a cikin harsuna goma sha takwas na ƙasashen waje da ake buga shi a yanzu ba. Wani mai wa’azi na Presbyterian, bayan ya karanta littafin, ya yi odar kwafi sama da ɗari uku ga mambobin coci da abokansa, ya ce, "An rubuta wannan littafi ne da wani wanda ya san Ubangiji Yesu Kristi sosai."

GSAM 303Ƙa’ida ta Uku—Annabawan Ƙarya

GSAM 303.3Yohanna ya bayar da ƙa’ida don gano ƙaryayyun annabawa: "Su daga duniya ne saboda haka suke magana yadda duniya take ganin abubuwa, duniya kuwa tana sauraronsu."¹⁰ Koyarwar ƙaryayyun annabawa za ta yi farin jini ga zuciyar nama, maimakon ɗaukaka hanyar ƙin kai da ɗaukar giciye. Ƙaryayyun annabawa za su koyar da "abubuwa masu laushi," maimakon ɗaukaka "Mai Tsarkin nan na Isra’ila."¹¹ Duk wanda ya karanta ko da ’yan shafuka kaɗan na rubuce-rubucen Misis White zai ga cewa suna cikin layin ƙin kai da ɗaukar giciye, ba na irin da zai faranta wa zuciya ta duniya, ta nama ba.

GSAM 304Ƙa’ida ta Huɗu—Wahalhalu da Haƙuri

GSAM 304.1A ci gaba da nazarin wannan batu, za mu ɗauki, a matsayin ƙa’ida ta huɗu, kalaman manzo Yaƙub: "’Yan’uwa, ku ɗauki annabawa da suka yi magana a cikin sunan Ubangiji, a matsayin gurbi na haƙuri a cikin shan wahala."¹² Lokacin da muka karanta abubuwan da waɗancan tsofaffin annabawa suka fuskanta, mun koyi cewa ɗaya daga cikin manyan jarabawarsu shi ne ganin Isra’ila ta ƙi yarda, ko ta saba wa, shaidu bayyanannu da aka gabatar mata. Ƙaramin nazari kan waɗancan lokuta zai nuna nan take halayen annabawa na gaskiya da na ƙarya. "Ga abin da Ubangiji Maɗaukaki yana cewa, 'Kada ku saurari abin da annabawan suke muku annabci; suna cika ku da sa zuciyar ƙarya. Suna maganar wahayi daga tunaninsu, ba daga bakin Ubangiji ba."¹³

GSAM 304.2Babu wani abu a cikin rubuce-rubucen Misis White da zai cika mai karatu da sa zuciyar ƙarya; amma, kamar yadda wani ya furta, "Na sami babban riba ta ruhaniya sau da yawa ba tare da ƙidaya ba daga cikin shaidu. Gaskiya, ban taɓa karanta su ba sai na ji an yi min gargaɗi saboda rashin bangaskiyata ga Allah, rashin sadaukarwa, da rashin ƙwazo wajen ceto rai." Tabbas, sakamakon shaidu na Misis White ya sha bamban ƙwarai da koyarwar ƙaryayyun annabawa, kamar yadda Irmiya ya bayyana.

GSAM 304.3Annabi ya kuma gaya mana yadda ƙaryayyun annabawa za su koyar: "Suna cin gaba da ce wa waɗanda suka rena ni, 'Ubangiji ya ce za ku zauna lafiya.' Ga duka waɗanda suke bin taurin zukatansu kuwa sukan ce, 'Babu lahanin da zai same ku.'"¹⁴

GSAM 304.4Game da yanayin koyarwar Misis White a cikin shaidu nata, zan ambaci waɗannan kalmomi daga wani mai karatu mai kulawa:

GSAM 304.4"Na karanta dukkan shaidu nata gaba ɗaya, mafi yawansu sau da yawa, kuma ban taɓa samun jimla ɗaya marar ɗabi’a a cikinsu ba, ko wani abu da ba shi da tsarki da Kiristanci; babu wani abu da ke karkatar da kowa daga Littafi Mai Tsarki ko daga Kristi; amma a can na sami ƙarfafawa mafi ƙarfi na biyayya ga Allah, na ƙaunar Yesu, na imani da Rubuce-rubucen Tsarki, da kuma na bincikensu a koda yaushe. Wannan kusanci da Allah, wannan sadaukarwa mai ƙarfi, waɗannan kira masu tsanani na rayuwa cikin tsarki, ba za su iya kasancewa sai dai ta Ruhun Allah."

GSAM 305.1Wani mai lura sosai da shaidu nata tun farko ya rubuta:

GSAM 305.1"A kan batun mu’amala ta gaskiya da aminci, ba tare da tsoro ko nuna son rai ba, ina so in shaida cewa ba a taɓa samun ƙaranci ba. Da manufofi marasa kyau da mugunta ne ke sarrafa wannan aiki, kalaman yaudara za su cika gurbin shaidu masu bincike da gargaɗi na aminci. Bayyanar magana, gargaɗi na aminci kan kuskure, kalaman tausayi da ƙarfafawa ga rayukan da ke rawar jiki waɗanda ke jin bukatar Mai Ceton, da kuma ga masu kuskure waɗanda ke neman kawar da kurakuransu cikin tawali’u,—waɗannan ne abubuwan da suka mamaye ayyukanta. Shaidar Misis White, wadda ke yi wa laifuffuka gyara ga mutane da dama da ta gani a wahayi, an gabatar da ita cikin aminci sosai, kuma da sakamako mafi kyau."¹⁵

GSAM 305Ƙa’ida ta Biyar—Annabci na Gaskiya Yana Cika

GSAM 305.2Akwai wata magana da Musa ya yi game da annabawa na gaskiya da na ƙarya, wadda ake samu a babi na goma sha takwas na Maimaitawar Shari’a. Ya ce: "'yaya za mu san cewa wannan saƙo ba Ubangiji ne ya faɗa ba?' In abin da annabin ya furta da sunan Ubangiji bai faru ba, ko bai zama gaskiya ba, saƙo ne da Ubangiji bai faɗa ba ke nan. Wannan annabi ya yi rashin hankali ne kawai. Kada ku ji tsoronsa."¹⁶

GSAM 305.3Haka nan kuma ana samun wannan magana a cikin ayoyin da ke tafe: "Wane ne ya isa yă yi magana kuma ta cika in ba Ubangiji ne ya umarta ba?"¹⁷ Game da annabi Sama’ila an ce, "duk abin da ya faɗa yakan zama gaskiya."¹⁸ "annabin da ya yi annabcin salama shi za a ɗauka a matsayin wanda Ubangiji ya aika in har abin da ya furta ya zama gaskiya."¹⁹

GSAM 306.1Yanzu shekaru sama da hamsin da uku suka wuce tun lokacin da marubucin ya fara ganin Misis E. G. White a wahayin annabci. A cikin waɗannan shekarun, ta yi da dama daga cikin bayanai na annabi game da abubuwan da za su faru. Wasu daga cikin waɗannan hasashen sun shafi abubuwan da aka riga aka cika, wasu kuma suna cikin aiwatarwa, yayin da wasu ke nan gaba. Game da waɗanda suka shafi abubuwan da suka faru a baya ko na yanzu, ban san wani misali guda ɗaya na gazawa ba. An riga an ambaci wasu daga cikin annabcinta. Wasu kuma za su bayyana a cikin babi-babi masu zuwa yayin da muke ci gaba da ba da labarinmu.

GSAM 306Ƙa’ida ta Shida—Al’ajabi Ba Gwaji Ba Ne Ga Annabi Mai Gaskiya

GSAM 306.2An tabbatar da haka daga bakin marubutan ilimin addini da dama, kuma an bayyana shi a cikin sharhin Littafi Mai Tsarki, cewa alamar annabi na gaskiya ita ce yin mu’ujizai. Har yanzu ba mu koyi wata ƙa’ida mai irin wannan yanayi daga Littafi Mai Tsarki ba.

GSAM 306.3Idan yin mu’ujizai hujja ce ta annabi na gaskiya, to "annabin ƙarya" da aka ambata a Ru’uya ta Yohanna 19:20 za a ayyana shi a ƙarshe a matsayin annabi na gaskiya; domin an ce, "aka kama dabbar tare da annabin ƙaryan nan wanda ya aikata alamu masu banmamaki a madadinta. Da waɗannan alamun ne ya ruɗe waɗanda suka sami alamar dabbar." An sake magana game da wannan iko a cikin Ru’uya ta Yohanna 13:14, inda aka ce, "Saboda alamun nan da aka ba ta iko tă yi a madadin dabban nan ta fari, sai ta ruɗi mazaunan duniya." Ta amfani da wannan ƙa’ida, za mu tilasta mu kai ga ƙarshe cewa har ma Iblis annabi ne na gaskiya. Wasu ruhohi da za su yi wani aiki na musamman ƙarƙashin na shida daga cikin bala’o’in ƙarshe guda bakwai an ce game da su, "Su ruhohin aljanu ne da suke aikata abubuwan banmamaki, sukan je wurin sarakunan dukan duniya, don su tattara su don yaƙi a babbar ranar Allah Maɗaukaki."²⁰

GSAM 306.4Idan hujjar annabi na gaskiya za a same ta ne a cikin mu’ujizun da yake yi a lokacin da ba ya cikin wahayi, to za mu sami kaɗan ne kawai daga cikin annabawan Littafi Mai Tsarki da za su iya jure gwajin, musamman idan hukunci zai dogara ne akan abin da aka rubuta game da ayyukansu. Gaskiya ne cewa an rubuta an yi mu’ujizai ta hannun wasu daga cikin annabawa, kamar yadda yake a misalin Iliya, Elisha, da Bulus. Amma wa ya samu wani rikodi a cikin Littafi Mai Tsarki na mu’ujizoyin Ishaya, Irmiya, Daniyel, Hosiya, Yowel, Amos, da sauransu? Duk da haka, su ne annabawan gaskiya na Ubangiji, kuma an nuna hakan ne ta bin ƙa’idodin da Ubangiji ya bayar a matsayin gwajin annabi na gaskiya.

GSAM 307.1Cewa yin mu’ujizai ba shi ne gwajin annabi na gaskiya ba, ana ganin hakan a fili idan aka karanta tarihin Littafi Mai Tsarki game da Yohanna Mai Baftisma. An nuna cewa shi annabi ne ta hanyar annabcin mahaifinsa, Zakariya, a lokacin da yake ba da labarin wahayi da Allah ya ba shi game da ɗa da za a haifa masa: "Kai kuma, ɗana, za a ce da kai annabin Maɗaukaki; gama za ka sha gaban Ubangiji don ka shirya masa hanya."²¹ Mai Cetonmu kansa ya gane Yohanna a matsayin wannan annabi da zai shirya hanya a gabansa; domin game da Yohanna ya ce: "Amma me kuka je kallo? Annabi? I, ina kuma faɗa muku, ya ma fi annabi. Wannan shi ne wanda aka rubuta game da shi cewa, ' "Zan aiko da ɗan saƙona yă sha gabanka, wanda zai shirya hanya, a gabanka." Ina faɗa muku, a cikin duk waɗanda mata suka haifa, ba wanda ya fi Yohanna girma."²²

GSAM 307.2Ga shi nan, wata magana a fili daga Mai Ceto cewa Yohanna annabi ne. Mu yi amfani da gwajin yin mu’ujizai mu ga sakamakon. A cikin Bishara kamar yadda Yohanna mai bishara ya rubuta, muna da waɗannan kalmomi: "mutane da yawa suka zo wurinsa [Kristi]. Suka ce, 'Ko da yake Yohanna bai yi wani abin banmamaki ba, duk abubuwan da Yohanna ya faɗa game da mutumin nan gaskiya ne.'"²³ Wannan furuci shi kaɗai cikakken ƙaryatawa ne ga ikirarin cewa alamar annabi na gaskiya ita ce yin mu’ujizai.

GSAM 307.3Wannan ƙa’ida da aka bayar a Maimaitawar Shari’a 13:1-3, wadda muka kira ƙa’ida ta shida a cikin jerinmu na yanzu, an kafa ta ne don mu guji bin duk abin mamaki ko al’ajabi har sai mun fara lura da kyau ko yanayinsa yana ƙara kusantar Ubangiji ko yana ja mu nesa da shi. Wannan aya a zahiri tana gaya mana mu aiwatar da duk ƙa’idodin, musamman don mu ga ko suna daidaita da Allah da dokarsa.

GSAM 308.1Wannan ƙa’ida ta shida tana koyar da cewa idan wani mai ikirarin mu’ujiza ya yi mu’ujiza, za a ga tare da ita, idan an gwada ta da kyau, karkata daga gaskiyoyin tsarki na kalmar Allah, da rage ƙa’ida don biyan zuciya mai son kauce wa hanyar ƙin kai. Ubangiji yana barin irin wannan mai kwaikwayo ya taso, kuma aikinsa gwaji ne ga ɗan Allah na gaskiya, yana ba shi damar yin nazari sosai kan yanayin ko manufar mai yin mu’ujiza. Waɗanda suka riƙe da kalmar Allah, maimakon su faɗa ƙarƙashin ƙayatarwar mai mu’ujiza na ƙarya, suna fitowa da ƙarfi a Allah sakamakon irin wannan kwarewa.

GSAM 308.2A cikin waɗannan kwanaki masu muni, lokacin da da yawa ke ikirarin kasancewa "masu warkarwa ta bangaskiya," "masu warkarwa ta ikon Allah," "masu warkar da cututtuka na Christian Science," da sauransu, zai dace a yi amfani da ƙa’idodin Littafi Mai Tsarki sosai; domin za a bukaci ƙa’idodin Allah, da hasken Ruhu Mai Tsarki, don ba mu damar gane nufi da manufar wasu daga cikin waɗannan "masu warkarwa" a sarari, saboda aikinsu yana da matuƙar wayo; a gefe guda kuma akwai waɗanda a fili suke watsi da dokar Allah da gaskiyarsa a wannan lokaci. A wasu lokuta, waɗannan masu ikirarin "ma’aikatan warkarwa" sun yi fushi kamar mutanen da suka cika da hauka idan aka ambaci dokar Allah. Kamar yadda Ubangiji ke da saƙo da ke ayyana tsarkakkiyar dokarsa, haka nan waɗannan mutanen ba su da motsin Ruhu Mai Tsarki, suna zargin dokarsa, suna kuma kore duk wanda ya ambaci ta daga gabansu.

GSAM 308Ƙa’ida ta Bakwai—’Ya’yansu

GSAM 308.3"Ku yi hankali da annabawan ƙarya. Sukan zo muku da kamannin tumaki, amma daga ciki mugayen kyarketai ne. Ta wurin ’ya’yansu za ku gane su (fassarar zahiri daga KJV). Mutane suna iya tsinkan inabi a jikin ƙaya, ko kuwa ɓaure a jikin sarƙaƙƙiya? Haka ma kowane itace mai kyau yakan ba da ’ya’ya masu kyau, kuma mummunan itace ba ya ba da ’ya’ya masu kyau. Itace mai kyau ba ya ba da munanan ’ya’ya, haka kuma mummunan itace ba ya ba da ’ya’ya masu kyau. Duk itacen da ba ya ba da ’ya’ya masu kyau sai a sare shi a jefa cikin wuta. Ta haka, ta wurin ’ya’yansu za ku gane su" (fassarar zahiri daga KJV).²⁴

GSAM 309.1Waɗannan kalaman Mai Cetonmu sun tabbatar da cewa baiwar annabci za ta wanzu a zamanin bishara. Da dai babu annabawa na gaskiya da za su kasance cikin aikin, kuma duk wani bayyanar annabci ya fito ne daga mummunan tushe, shin ba zai ce, "Ku yi hattara da annabawa" ba? Gaskiyar cewa ya gaya mana a fili yadda za a gane kowanne iri ita ce mafi kyawun hujja cewa a cikin aikin Mai Ta’aziyya, Ruhu Mai Tsarki, wajen nuna "abin da bai faru ba tukuna" (Yohanna 16:13), zai kasance hakikanin baiwar annabci. Wannan ƙa’ida, wadda a cikin jerinmu muka kira ƙa’ida ta bakwai, ba ta da kuskure. Kristi bai ce za ku iya gane su ta ’ya’yansu ba, amma a fili ya ce, "ta wurin ’ya’yansu za ku gane su" (fassarar zahiri daga KJV).

GSAM 309.2Muna tambaya, Menene ’ya’yan da za a gani a cikin aikin baiwun gaskiya na Ruhun Allah? Amsar tana cikin bayanin Bulus game da manufar Ubangiji wajen sanya baiwun a cikin coci: "Shi ya sa aka ce, 'Sa’ad da ya hau sama, ya bi da kamammu kamar tawagarsa ya kuma ba da baye-baye ga mutane.' ... Saboda haka Kiristi kansa ya ba wa waɗansu baiwa su zama manzanni, waɗansu su zama annabawa, waɗansu su zama masu wa’azi, waɗansu kuma su zama fastoci, da kuma malamai. Ya yi haka don yă shirya mutanensa saboda ayyukan hidima, don a gina jikin Kiristi. Wannan zai ci gaba har sai mun zama ɗaya ['cikin haɗin kai,' a gefen shafi] a cikin bangaskiya da kuma ta wurin fahimtarmu na Ɗan Allah. Sa’an nan za mu zama balagaggu, kamar yadda Kiristi yake, mu kuma zama gaba ɗaya cikakku kamar sa."²⁵

GSAM 309.3Ku danganta wannan ƙa’ida ga baiwar annabci da aka haɗa da saƙon mala’ika na uku tun farkon bayyanarsa, kuma menene sakamakon?—Mun gano cewa koyarwar da ake ci gaba da bayarwa ta hanyar Misis White ta kasance a kan layin haɗin kai da lumana, tana yi wa gargaɗi na "mu yi shawara tare," da "mu yi ƙoƙari tare," mu kasance cikin daidaito da Kristi, ta haka tana tabbatar da sahihin zumunci da haɗin kai da juna.

GSAM 310.1Wasu daga cikin masu adawa da wannan aiki sun ce da tsokana, "Da ba don wahayi na Misis White da kuke da shi a cikinku ba, al’amarinku daɗe da rushewa." An mayar da martani, "Hakan gaskiya ne; domin daga wannan tushe Ubangiji ya ba da shawara, gargaɗi, da haske, kuma haka aka kawar da saɓani, kuma aikin ya samu ci gaba." Don haka abin da suka tsara a matsayin hari kan baiwar, a zahiri shaida ce cewa ’ya’yanta na gaskiya ne na baiwar annabci.

GSAM 310.2Tsawon shekaru sittin da sama, an gwada bayyanar baiwar annabci ta Misis White ta waɗannan ƙa’idoji bakwai, kuma a kowane fanni sun cika ƙayyadaddun abubuwan da ake bukata ga annabci na gaskiya.