Chitsauko 24 — Zvimwe Zviporofita Zvakazadziswa
GSAM 376.1“Fungai zvino kubva pazuva ranhasi zvichikwira, kubva pazuva rechimakumi maviri nemana romwedzi wepfumbamwe, kunyange kubva pazuva rakaiswa hwaro hwetemberi yaShe, fungai izvozvo. Mbeu ichiri mudura here? Hongu, kusvikira zvino muzambiringa, nomuonde, nedamba, nomuorivhi, hazvina kubereka; kubva pazuva ranhasi ndichakuropafadzai.”1
GSAM 376.2Kufambira mberi kwakasimba nokusingazununguki kweshoko romutumwa wechitatu kubva parakatanga kunogona kuenzaniswa zvakanaka nokubudirira kwakatevera Zerubhabheri kubva pazuva raakaisa ibwe renheyo yetemberi.
GSAM 376Tarisiro Inotyisa
GSAM 376.3VaJudha, vaine zvikwama nematura zvisina chinhu, pavakadanwa kuti vavake temberi yaShe, maererano nekuonekwa kwevanhu zvose zvaioneka setarisiro inotyisa. Pavakateerera kudanwa nokutenda, vakabata basa vachida, ruoko rwaMwari runobudirira rwakazviratidza kwavari. Patinotevera zvakaitika mukusimuka kweshoko romutumwa wechitatu, tinoona ruoko runotungamirira rwaMwari ruri pamwe chete nevaya vanosarudza nzira yake. Kunyange kutambudzika kuri mugove wavo, kutarisira kwaMwari vanhu vake nebasa rake kunogara kuchijekeswa kune vanovimba naye.
GSAM 376Uchapupu Hunotsanangura Hunhu
GSAM 376.4Musi wa24 waMbudzi, 1862, misangano miviri yakaitwa panguva imwe chete mumba maWilliam Wilson, weGreenville, Mich., nechinangwa chokuronga machechi maviri evakanga vagamuchira chokwadi cheSabata munharaunda iyoyo. Musangano wechechi yeGreenville wakatungamirirwa naMukuru White nomudzimai wake mune rimwe kamuri, ukuwo Mukuru Byington neni tichitungamirira musangano mune rimwe kamuri wechechi yeWest Plains. Patakanga tichiita basa rokutanga mune rimwe kamuri, taigona kunzwa inzwi raMai White sezvaipa uchapupu hwavo mune rimwe kamuri. Takanga tichisangana nezvimwe zvinetso mubasa redu, apo panguva yakakodzera Mai White vakazarura mukova vakati, “Hama Loughborough, ndinoona nokutarisa boka iri kuti ndine uchapupu hwevamwe varipo. Kana magadzirira, ndichapinda ndotaura.” Sezvo nguva iyoyo ndiyo chaiyo yataida rubatsiro, vakapinda. Kunze kwaMukuru Byington neni, vaiziva mazita evanhu vatatu chete vaiva mukamuri. Vamwe vakanga vari vatorwa kwavari, vakanga vasina kumbovaona, kunze kwokunge vanga varatidzwa kwavari muchiratidzo.
GSAM 377Upenyu hwaVaPratt Hunotsanangurwa
GSAM 377.1Paakasimuka kuti ataure, akati: “Muchafanira kundiregerera pakurondedzera zvandichataura, kana ndikatsanangura zvimiro zvenyu, nokuti handizivi mazita enyu. Pandinoona zviso zvenyu, zvinouya pamberi pangu izvo Ishe akafara kundiratidza pamusoro penyu. Murume uya ari pakona ane ziso rimwe [mumwe munhu akataura achiti, ‘Zita rake ndiPratt’] anozviti anonamata zvikuru uye anozvirumbidza zvikuru muchitendero, asi haasati ambotendeuka. Musamugamuchire muChechi ari mumamiriro ake zvino, nokuti haasi muKristu. Anopedza nguva yakawanda achidzungaira pazvitoro nemashopu, achikakavadzana pamusoro pedzidziso yechokwadi, ukuwo mudzimai wake kumba achifanira kutema huni, kutarisira bindu, nezvimwe zvakadaro. Anoita zvipikirwa mukutengeserana kwake zvaasingazadzisi. Vavakidzani vake havavimbi nokutaura kwake kwechitendero. Zvingava zviri nani kubasa rechitendero kuti iye, ari mumamiriro ake zvino, asataure chinhu pamusoro pazvo.”
GSAM 378Hama Barr Vakafadzwa
GSAM 378.1Akaenderera mberi achiti, “Hama iyi yakwegura [achinongedzera kwaari, mumwe munhu akati, ‘Hama Barr’] ndakaratidzwa iye ari mukusiyana kukuru nomumwe murume uya. Upenyu hwayo muenzaniso wakanaka kwazvo, inongwarira kuchengeta zvipikirwa zvayo zvose, uye inopa mhuri yayo zvakanaka. Hainyanyi kutsunga kutaura chokwadi kuvavakidzani vayo, ichitya kuti ingakanganisa basa nokukuvadza. Haioni kuti Ishe angava netsitsi sei zvokuregerera zvivi zvayo, uye inozvifunga isina kukodzera kunyange kuva muChechi.” Ipapo akati kwaari, “Hama Barr, Ishe vandirayira kuti ndikuudzei kuti makareurura zvivi zvose zvamaiziva, uye kuti akaregerera zvivi zvenyu kare kare, kana muchingozvitenda.” Chiso chokusuruvara pahama iyi chakabva chapera nokukurumidza. Yakasimudza musoro ichinyemwerera, ikati nokusava nemanomano kwayo, “Akaregerera here?” “Hongu,” vakapindura Mai White, “uye ndakaudzwa kuti ndikuudzei, ‘Uyai, mubatane neChechi; uye kana mawana mukana, taurai shoko muchitsigira chokwadi; richava nemigumisiro yakanaka, nokuti vavakidzani venyu vanovimba nemi.’” Yakapindura ichiti, “Ndichadaro.”
GSAM 378.2Ipapo vakati, “Dai VaPratt vaigona kwechinguva kutora chinzvimbo chakafanana nechanga chichibatwa naHama Barr, zvaizovabatsira.”
GSAM 378.3Nokudaro chimwe chikonzero chedambudziko redu pakuronga chakabviswa. Uchapupu hwavo husati hwapiwa, hatina kukwanisa kuita kuti VaBarr vabvume kubatana neChechi; ukuwo kune rumwe rutivi takaona kuti anenge munhu wose aipikisa kugamuchira VaPratt; asi hapana aiva akasununguka kutaura chikonzero chaakapikisira.
GSAM 378Godo reMhuri Raporeswa
GSAM 378.4Vakazotaura nomurume aiva neganda rakaita ruvara rwejecha, akanga akagara kune rimwe divi rekamuri; vakazongonongedzera kune rimwe divi rakanyanyisa kumukadzi ane chiso chakatetepa, vachitaura navo savarume nomukadzi. Vakatsanangura zvimwe zvinhu zvakaitika muupenyu hwavo hwekare, vasati vamboti vanotenda chokwadi. Vakati zvinhu izvozvo zvakanga zvawedzeredzwa naSatani mupfungwa dzomukadzi kusvikira asundwa kupenga. “Ndakaona,” vakadaro Mai White, “kuti mukadzi uyu akanga apedza gore rimwe ari munzvimbo yevanhu vakapenga; asi kubva paakadzorerwa pfungwa dzake, akabvumira manzwiro mamwe chete egodo kuti atambudze pfungwa dzake, zvikuru kusvikira murume wake ashungurudzika. Murume uyu akaita zvose zvaaigona kuratidza mudzimai wake kuti akanga akatendeka kwaari, uye kuti akanga asina chikonzero chokumuramba sezvaanoita.”
GSAM 379.1Pakarepo mudzimai akamhanya kuyambuka kamuri, akapfugama ndokukumbira murume wake kuti amuregerere. Vanhu ava vakanga vari vatorwa kunenge zvachose munharaunda iyoyo yenyika, uye nhoroondo yavo yekare yakanga isingazivikanwi. Zvisinei, vaya vaivaziva zvikuru vaiziva kuti paiva nokusawirirana pakati pavo, asi vakanga vasingazivi chikonzero chacho.
GSAM 379Zvakafanana naErisha naHazaeri
GSAM 379.2Mushure mokunge Mai White vapa uchapupu hwavo, basa rokuronga Chechi rakakurumidza kupedzwa. VaBarr vakabatana nesangano reChechi nomwoyo wose, ukuwo VaPratt vakasiiwa kunze. Musangano pawakangopera, wokupedzisira akati nokutsamwa kukuru, “Ndinokuudzai kuti, hapana zvazvinobatsira kuenda nevanhu ava nokuita munyengeri; hamugoni kuzviita.”
GSAM 379.3Tsananguro yehunhu, sezvakaitika munyaya iri pamusoro, inotirangaridza zvakasimba imwe nyaya yakanyorwa mumazuva aErisha muporofita:2 Bhenihadhadhi, mambo weSiriya, akanga atuma muranda wake Hazaeri kuna Erisha kuti abvunze kana aizopora pakurwara kwake. Erisha akanga aratidzwa nyaya yaHazaeri, uye murume wacho paakauya pamberi pake, paakatarisa chiso chake, zvose zvakauya pachena mupfungwa dzake.
GSAM 379Mukuru White Akarohwa Nechirwere Chekuoma Mitezo
GSAM 379.4Musi weChitatu, Nyamavhuvhu 16, 1865, Mukuru White, nemhaka yokushanda zvakawandisa nokushayiwa hope, akarohwa nechirwere chekuoma mitezo. Sezvo nzvimbo dzoutano pakati pevanhu vedu dzakanga dzisati dzavambwa, akaendeswa kuDansville, N.Y., kunzvimbo youtano yainzi “Musha Wedu Pagomo.” Mudzimai wake nomunyori vakanga vari naye ikoko kubva paGunyana 14 kusvikira paZvita 7. Sezvo akawana zororo shoma pamarapirwo aakaitwa panzvimbo iyoyo, takaenda kumusha waBradley Lamson une mutsa, kuLake View, Rochester, N.Y., kwatakagara kweanenge mavhiki matatu. Ikoko takafara kusangana naMukuru J. N. Andrews, uyo akanga achangodzoka kuguta iroro mushure mokupedza mwedzi yakati muMaine.
GSAM 380Kunyengeterera Mukuru White
GSAM 380.1Mhuri dzaMukuru Andrews naVaOrton dzakabatana nesu masikati oga oga panguva yokunyengetera pamwe chete uye nokuda kwaMukuru White. Izvi zvakaenderera kusvikira Zvita 25. Kunyange nyika iri kunze yakanga izere nomufaro nemabiko pazuva iroro reKisimusi, chechi yeRochester yakarichengeta sezuva rokutsanya nokunyengeterera Mukuru White. Takava nemisangano mangwanani nemasikati, mumba maMukuru Andrews, paNew Main St.; manheru vaya vakanga vambonamata pamwe chete naMukuru White vakaungana naye zvakare mumba maVaLamson.
GSAM 380Chiratidzo Chakapiwa Usiku hweKisimusi
GSAM 380.2Musangano wemanheru iwayo wakanga une simba. Mukuru White akaropafadzwa zvikuru, uye Mai White vakapiwa chiratidzo chinoshamisa, umo vakaratidzwa zvinhu zvakawanda. Pakati pazvo paiva nemirayiridzo kuna Mukuru White pamusoro pezvaaifanira kuita kuti aite maererano nokutenda kwake kuna Mwari, uyo akanga atambanudza ruoko rwake pachena kuti amubatsire kuti adzore utano hwake.
GSAM 380Kurwisa kwaSatani Kwakafanotaurwa
GSAM 380.3Kuna avo vakanga vachinyengeterera Mukuru White, Mai White vakati:
GSAM 380.3“Chinangwa chaSatani chakanga chiri kuparadza murume wangu nokumudzikisa kuguva. Neminyengetero iyi yemwoyo wose simba rake raputswa. Ndakaratidzwa kuti Satani akatsamwira boka iri rakaramba richinyengetera nemwoyo wose kwemavhiki matatu nokuda kwomushumiri uyu waMwari, uye zvino akatsunga kurirwisa zvakasimba. Ndakaudzwa kuti ndikuudzei, ‘Raramai muri pedyo zvikuru naMwari, kuti mugadzirire zvinogona kukuwirai.’”
GSAM 381Kufanofungidzira kwaJ. T. Orton
GSAM 381.1Pazuva rokutanga raNdira, 1866, Mukuru White nemhuri yake vakatanga rwendo nechitima kuenda kuBattle Creek, Mich. Ini ndakaramba ndiri kumadokero kweNew York kwasara nguva yechando. Kubva manheru chaiwo akapiwa chiratidzo, VaJ. T. Orton vakanzwa zvakasimba kuti upenyu hwavo hwakanga huri mungozi, asi vakanga vasingazivi kwaiuya ngozi yacho. Vakataura manzwiro aya kuvanhu vakawanda. Manheru eSvondo, Kurume 4, vakadzokera kuRochester kubva kuParma, kwavakanga vapinda musangano wemazuva maviri, vaine VaE. B. Sanders (ava, muna 1905, vachigara kuSan Jose, Cal.). Vakakumbira kuti vafambe mumugwagwa une chiedza chakanyanya sezvavaipfuura nomuguta, “nokuti,” vakadaro, “nguva yose ndinonzwa sokunge mumwe munhu achaedza kundiuraya.” Asi vakanga vasina kana pfungwa yokuti aida kuvatora upenyu aiva ani.
GSAM 381.2Ndakadzokera kuRochester kubva kuParma musi waKurume 7, ndikagara naVaLamson, vaiva mukuwasha waVaOrton. Musi wa8 iye naMai Orton vakatishanyira, uye takaronga kuenda mangwana nechitima kuLancaster, Erie Co., kwandaifanira kuitira muchato womwanakomana wake oga. Takapedza zuva racho tichifara, asi rakanga riri zuva rakakomba.
GSAM 381Kupondwa kwaJ. T. Orton
GSAM 381.3Vakabva kumba kwaVaLamson na5 P.M., uye na7:30 P.M. nhume yakasvika ichitizivisa nezvokurwiswa kwoutsinye kwakanga kwaitwa panaVaOrton nomumwe munhu asingazivikanwi, mudura rake, paakanga achichengeta mabhiza ake. Takakurumidza kuenda ikoko, tikawana kuti akanga arohwa zvakaipisisa mumusoro nedanda rengoro rakasungwa nesimbi, uye akanga asisazivi chinhu. Akafa na12:35 usiku ihwohwo. Kusvikira nhasi hazvizivikanwi kuti ndiani akaita chiito choutsinye ichi. Zvechokwadi chakanga chisina kuitirwa mari, nokuti wachi yake yaiva muhomwe yakanga isina kubatwa, uye nechikwama chakewo, chaiva nemadhora 45. Izvi zvakava kuvhunduka kukuru kuna Mai Orton, uye haana kuzombopora pamarwadzo acho. Utano hwemuviri wake hwakakurumidza kuderera, uye haana kurarama kwenguva refu pashure pomurume wake.
GSAM 382Chiporofita Chakaitwa Kisimusi Iyoyo Chakazadziswa
GSAM 382.1Mumwedzi mishomanana kubva manheru iwayo eKisimusi aishamisa, vatanhatu pavanhu vapfumbamwe vakabatanidzwa mumavhiki matatu iwayo okunyengetera vakanga vari mumakuva. Nokudaro chimwe chiporofita chakazadziswa nenzira inoshamisa zvikuru.
GSAM 382Rubatsiro Kumunhu Akarasa Tariro
GSAM 382.2Mangwanani-ngwanani aZvita 12, 1866, Elias Stiles, weNorth Liberty, Ind., akauya kumba kwangu, achindikumbira kuti ndiende naye kunzvimbo iyoyo kundopa rubatsiro, kana zvaibvira, kuna James Harvey, akanga apererwa uye achinzwa kuti nyaya yake yakanga isina tariro. Ndichiziva kuti Mai White vakanga vaona zvinhu zvakawanda zvikuru muchiratidzo chokupedzisira chavakapiwa, uye kuti nyaya dzakawanda dzakanga dzaratidzwa kwavari nenzira youporofita, ndakati kwaari, “Zvingava kuti Hanzvadzi White vakaona chimwe chinhu pamusoro penyaya yake, uye kana zvakadaro, uye kana vakachinyora, zvichava nesimba kupfuura chinhu chipi nechipi chandaigona kumuudza.”
GSAM 382.3Takabva taenda kwavari, uye pasina munhu kutaura kwavari nezvemamiriro aVaHarvey, ndakabvunza kuti, “Hanzvadzi White, mune chiedza here mune chimwe chezviratidzo zvamakapiwa pamusoro penyaya yaHama James Harvey?” “Hongu,” vakadaro, “ndinacho, uye kwemazuva mashomanana ndanzwa sokunge ndinofanira kuchinyora ndichimutumira.” Ipapo vakatanga kutiudza zvavakanga vaona. Ndakati, “Ndiri kuenda kunomuona mangwanani, uye kana mukanyora zvamakuratidzwa, ndichazvienda nazvo kwaari.” Tichibvumirana saizvozvo, takabva kwavari, uye manheru takadzokazve. Vakanga vapedza kunyora, uye vakatifadza nokutiverengera zvinonzwika.
GSAM 383Uchapupu hwakanyorerwa James Harvey paakanga ari mukuora mwoyo
GSAM 383.1Uchapupu hwacho hwakataura pachena kuti VaHarvey vaizounzwa mukushaya simba pautano, uye kuti Satani aizotsvaka kumusundira mukuora mwoyo, achiedza kumuita kuti afunge kuti pakanga pasina tsitsi kwaari uye pasina tariro panyaya yake; asi Mai White vakaona kuti akanga aita zvose zvaaigona kugadzirisa zvikanganiso zvoupenyu hwake hwekare, uye kuti Mwari akanga amuregerera. Uyezve, paaizoedzwa kuti azviuraye, Mai White vakaratidzwa kuti ngirozi dzaMwari dzaizenge dzichitenderera pamusoro pake, dzichimutungamirira kutariro muna Mwari nokudenga. Muuchapupu hwacho makanga mune mamwe mashoko mazhinji akafanana okunyaradza nokukurudzira.
GSAM 383.2Ndava negwaro iri mumaoko angu, takaenda mangwanani akatevera kuNorth Liberty. Tiri munzira, VaStiles vakandiudza kuti VaHarvey vaida kundiona, asi vakati handizovi neshoko retariro kwavari; kuti pandichasangana naye, ndichabvumirana naye kuti nyaya yake yakanga isina tariro, kuti akanga ari munhu akarasika; uye ipapo, saEri wekare paakaudzwa kuti areka yaMwari yakanga yatorwa, aizowira shure otofa.
GSAM 383.3Takasvika kumba kwaVaHarvey nenguva dza3 P.M. Pandakasangana naye, ndakati, “Hama Harvey, makadii?” Akapindura nenzwi rinosiririsa zvikuru, “Ndarasika! Ndarasika!! NDARASIKA!!!” Ndakati, “Kwete! Hamuna kurasika. Pane tariro panyaya yenyu!” Paakaona kuti ndamupindura saizvozvo, akati nenzwi rakadzikama, “Kwemavhiki matatu ndanga ndichifunga kuti handina tariro uye kuti ndakarasika; uye nhasi, pandanga ndichiuya muguta ndichibva kupurazi, ndichiyambuka zambuko riri pamusoro pedziva rechigayo, chimwe chinhu chakaita sokutaura kwandiri chichiti, ‘Warasika! Hauna tariro! Svetukira mudziva rechigayo unyure!’ Ndakafunga kuti kuita chinhu chakadaro kwaizounza kuzvidzwa pabasa raKristu, saka ndakadziviswa kuzviuraya.”
GSAM 384Kununurwa Kwakakurumidza Kuuya
GSAM 384.1“Zvakanaka, Hama Harvey, hamuna kurasika!” ndakadaro. “Ndine uchapupu hwakananga kubva kudenga hunoti hamuna kurasika!” Akapindura achiti, “Saka ndichahuteerera.” Ndakabva ndamuravira uchapupu hwacho, ndatanga kutsanangura kuti hapana kana shoko rimwe rakanga raiswa mumaoko angu. Pandakapedza kuverenga, chiso chake chakapenya nokunyemwerera, akati, “Saka pane tariro panyaya yangu. Ndinotenda munaShe.”
GSAM 384.2Pashure pokuverenga, takava nenguva yokunamata, uye akasimuka ari munhu akachinjwa uye anofara. Akatiudza kuti mashoko iwayo akarondedzera kushanda kwendangariro dzake mumavhiki matatu akanga apfuura nenzira yakarurama kupfuura yaaigona kuzviita iye pachake. Nokudaro rudo rwaMwari rwakaratidzwa pakusimudza hama iyi kubva mukuora mwoyo nenzira iyi.
GSAM 384Munda Webasa Wakawedzerwa
GSAM 384.3Kusvika mugore ra1868, munda webasa wemaAdventist ezuva rechinomwe wakanga wakaganhurirwa kuUnited States, uye kuchikamu chayo chaiva kuchamhembe kwemuganhu wezasi weMissouri uye kumabvazuva kweRwizi rweMissouri. Pamusangano wokukurukura minda nokuparadzirwa kwebasa, panguva yemusangano weMusangano Mukuru wakaitirwa muBattle Creek, Mich., musi wa28 Chivabvu, zvakasarudzwa kutumira vashandi vaviri netende remafiti makumi matanhatu kuCalifornia. Mukuru D. T. Bourdeau nemunyori uyu vakasvika muSan Francisco musi wa18 Chikunguru wegore iroro.
GSAM 384Kuvhurwa kweMisheni yeCalifornia
GSAM 384.4Pane chinhu chimwe chandinoda kutaura chine chokuita nokuvhurwa kwemisheni yeCalifornia, chinonyatsoratidza kushanda kunobatsira kwechipo chechiporofita. Pauro, pakutaura pamusoro pezvipo zvomweya, kusanganisira chipo chechiporofita, anoti zvakapiwa kuti vatsvene vakwaniswe, kuti basa rokushumira riitwe, kuti muviri waKristu uvakwe.3 Chokwadi nzira inonyatsobatika yokukwanisa vatsvene ndeyokuvaratidza zvikanganiso zvavo, kuti vazvibvise uye vashambidzwe pazvivi zvavo neropa rinokosha raShe wedu Jesu Kristu. Nokuda kweizvi, rubatsiro rwakapiwa nechipo chechiporofita mubasa rokushumira rwakaramba ruchiratidzwa kubva pakutanga maererano nebasa rechokwadi chiripo, ruchiratidza vashumiri vaShe zvikanganiso mumaitiro avo ebasa, uye kuti, nenzira yakasiyana, vangava vanobudirira zvikuru mukushandura mweya.
GSAM 385Uchapupu Hwokushanda muCalifornia
GSAM 385.1Nguva pfupi tasvika muCalifornia takagamuchira tsamba kubva kuna Mai White, umo akarondedzera chiratidzo chaakapiwa muBattle Creek manheru eChishanu musi wa12 Chikumi—zuva ratakanga tapedza kuLancaster, N. Y., tisati tatanga kuenda kuCalifornia. Akanga asati ambova muCalifornia, uye akanga asingazivi pachake maitiro evanhu veko. Chokwadi, panguva iyoyo akanga asati ambopfuura kumadokero kweRwizi rweMissouri. Ruzivo rwose rwaaiva narwo pamusoro pezvinhu zvaivako rwakabva pane zvakanga zvafadza Ishe kumuratidza.
GSAM 385.2Mumirayiridzo yaiva mutsamba yake, akarondedzera maitiro orupo evanhu veCalifornia, uye zvaizova mugumisiro webasa raiitwa pakati pavo nechirongwa chakasimba chokushandisa mari zvishoma, chichiverenga peni imwe neimwe. Pakuparidza kuvanhu veCalifornia, vaifanira kusvikwa nomweya werupo wakafanana newavaishandira nawo, asi kwete nenzira yokupambadza mari.
GSAM 385Kubudirira Kwakaporofitwa Kwakasvika
GSAM 385.3Zvino pandinotarira shure kumakore makumi matatu nemanomwe akapfuura kubva pakatanga basa muCalifornia, ndichifunga mamiriro aivepo panguva iyoyo, mamiriro evanhu, uye maitiro atingainge takaita basa redu dai tisina kugamuchira uchapupu, uye pandinoona zvibereko zvokutevera murayiridzo wakapiwa, ndinogona kutaura kuti basa redu rakafambira mberi mumwedzi mitatu kupfuura zvaraizoita mugore rimwe dai tisina kubatsirwa mubasa rokushumira nomurayiridzo wakagamuchirwa nechipo chechiporofita. Kusvika muchirimo cha1871, somugumisiro webasa rakaitwa mudunhu reSonoma, makereke mashanu evachengeti veSabata akanga atangwa.
GSAM 386Musangano Wokutanga Wetende muSan Francisco
GSAM 386.1Muna Chikumi wegore rimwe chetero takamisa tende redu kokutanga muSan Francisco. Sezvo Mukuru Bourdeau akanga adzokera kuMabvazuva, mumwe mushandi aibva kuMichigan akatumirwa kutora nzvimbo yake. Akasvika musi wa17 Chikumi, uye pakarepo akabatana neni mubasa muguta. Pashure pemavhiki mashomanana ebasa mutende, takaenderera mberi nemisangano yedu kusvika musi wa1 Zvita 1871 mudzimba dzakahaiwa. Somugumisiro webasa iri, vanopfuura makumi mashanu vakagamuchira shoko muSan Francisco.
GSAM 386Miedzo Yomukati muCalifornia
GSAM 386.2Kusvikira panguva iyi miedzo yedu muCalifornia yakanga ichinyanya kubva mukupikiswa kwokunze, asi zvino pakamuka muedzo wokutenda usingatarisirwi wevanhu vedu, uri werumwe rudzi. Mumwe mushandi wandaishanda naye akaramba achiita zvinhu zvandaiva nechokwadi kuti zvaizomuunzira iye nebasa kuzvidzwa. Takanga tine vavengi vanovava muguta, vaicherechedza kufamba kwedu kwose uye vakagadzirira kushandisa chiito chipi nechipi chisina kuchenjera kutikuvadza. Saka zvakava zvakakosha zvikuru kuteerera kurayira kwomuapostora kwokuti “tidzivise kuonekwa kwose kwezvakaipa.”
GSAM 386Kuzvimiririra Kune Ngozi
GSAM 386.3Handina kutaura kuti hama iyi yakanga yaita chivi chaicho mumaitiro ayo, asi ndakafunga kuti vavengi vedu vaizoshandisa sechinhu chokumupomera chaaiti chakanga chisina mhosva. Akatora pfungwa yokuti aiva nekodzero yokuita “zvaaida” panyaya yacho, kunyanya sezvo zvaibvumirwa kuti pakanga pasina chivi mune zvaaichiita. Zvinhu zvakaramba zvakadaro kusvikira musi wa23 Ndira 1872, pandakabva mudunhu reSonoma ndikaenda kuSan Francisco kunoona zvaigona kuitwa kuti zvinhu zvigadziriswe ikoko.
GSAM 387.1Panguva iyi vavengi vedu vakanga vava kushandisa maitiro ake sezvandakanga ndatya, uye iye akanga achiti zvakanga “zvisina basa navo,” kuti aizovaratidza kuti aiva nepfungwa dzake uye aigona kufamba mumigwagwa sezvaaida, uye nemunhu waaida, asingatsoropodzwi navo. Ndakaedza, ndichishanda naye ndoga, kumuratidza kuti maitiro akadaro aisazobatsira, uye kuti mweya wokuzvimiririra wakadaro waizoguma nezvakaipa. Aiva neshamwari dzainzwirana naye zvikuru, dzimwe dzadzo dzakatanga kutora chimiro chaizomuunzira kutsoropodzwa kukuru. Chikamu chikuru chechechi chakaona kuipa kwokusateerera kwake, uye chakanga chagadzirira kutsigira kuedza kwandaiita kuti ndiponese basa pakunyadziswa.
GSAM 387Musangano Wokuongorora Wakasarudzwa
GSAM 387.2Nokudaro zvinhu zvakanga zvakadaro paSabata, musi wa27 Ndira, apo zvakasarudzwa kuti nyaya yacho inofanira kuongororwa uye kuti chechi itore danho rakasimba, kuti izviponese pachinyadzo chaigona kubudiswa nomweya uyu wokuzvidza. Musangano wakarongwa kuti utange Svondo, musi wa28 Ndira, nenguva dza9 A.M., kuti kuongororwe mamiriro acho uye basa redu sechechi maererano nawo. Zvaioneka sokunge kupatsanuka kwechechi iyoyo kwakanga kusingadzivisiki. Ndakapedza chikamu chikuru chousiku ihwohwo ndichinyengetera kuna Mwari kuti ashande nokuda kwedu.
GSAM 387Kureurura Kwakanyorwa
GSAM 387.3Mangwanani emusi wa28, pandakanga ndichienda kumusangano, ndakasangana nemushandi wandaishanda naye munzira yevanofamba netsoka, pedyo neimba yandairara, achichema. Akati, “Hama Loughborough, handisi kuenda kumusangano nhasi.”
GSAM 387.4“Hamusi kuenda kumusangano here?” ndakadaro; “musangano wacho une chokuita nenyaya yenyu.”
GSAM 388.1“Ndinozviziva,” akadaro, “asi ndakanganisa chose. Makarurama pachimiro chamatora pamusoro pangu. Heino tsamba yokureurura yandakanyorera chechi; endai nayo mundoverengera. Zvichava zviri nani kwamuri, uye zviri nani kune vangada kunzwirana neni, kana ndisipo.”
GSAM 388.2“Chii chaita kuti muchinje zvikuru kudaro kubva nezuro?” ndakabvunza.
GSAM 388Chiratidzo Chinoshamisa Chakagamuchirwa
GSAM 388.3Akapindura achiti, “Ndakaenda kuposvo nezuro usiku, pashure peSabata, ndikagamuchira tsamba kubva kuna Hanzvadzi White, kuBattle Creek, Mich. Uchapupu hwaakandinyorera.” Akandipa tsamba yacho achiti, “Verenga izvozvo, uye muchaona kuti Ishe anoona sei nyaya yangu.”
GSAM 388.4Akandikumbira kuti ndiudze chechi kuti akanga agamuchira uchapupu kubva kuna Hanzvadzi White, hwaimutsiura pamusoro pemaitiro ake, uye kuti akanga ahugamuchira nokuti hwaiva chokwadi.
GSAM 388Chiratidzo Chine Simba Rokugutsa
GSAM 388.5Ichi chaiva chikamu chechiratidzo chakapiwa Mai White paBordoville, Vt., musi wa10 Zvita 1871. Akatanga kunyora chikamu chine chokuita nenyaya yehama iyi musi wa27 Zvita 1871, asi nokuda kwechimwe chikonzero kupedzwa kwegwaro kwakanonoka kusvikira musi wa18 Ndira 1872, panguva iyo rakapedzwa ndokutumirwa kubva kuBattle Creek. Zvakatora mazuva angaita mapfumbamwe kuti tsamba dziyambuke nenyika kubva kuMichigan kuenda kuCalifornia.
GSAM 388.6Muchiratidzo zvinhu zvizhinji zvinoratidzwa kwaari nenzira youporofita. Ndizvo zvakaitikawo pachiitiko ichi. Panguva yechiratidzo paingova nemumvuri muduku wezvakazonyatsoitika apo uchapupu hwakasvika muSan Francisco. Zvichaonekwa kana mazuva acho aenzaniswa kuti kupera kwenyaya muSan Francisco kwakaitika pashure pokunge uchapupu hwakanyorwa hwasimuka panzvimbo yokutanga. Hama dzedu muSan Francisco dzakabva dzaona kuti hapana munhu aigona kunge akanyorera kuBattle Creek ndokutaurira Mai White mashoko acho nenguva yakakwana yokuti vanyore tsamba iyi, nokuti mamiriro acho akanga asati avapo panguva iyoyo.
GSAM 389.1Chokwadi ichi chakava nesimba guru pahama dzaivako, chikavagonesa kuti simba raMwari rakanga riri muchiratidzo ichocho. Ndakanga ndisina kunyora kana mutsara kuna Mukuru White kana kumudzimai wavo pamusoro pemamiriro aiva muSan Francisco, uye mushandi wandaishanda naye akati akanga asina kunyora chinhu; hama dzikati, “Dai akanga anyora, angadai asina kutaura zvinhu zvakabudiswa pamusoro pake.”
GSAM 389Manyorerwo eChiratidzo
GSAM 389.2Patakazoziva gare gare, kubva kune vaiva kuBattle Creek, nezvokunyorwa nokutumirwa kweuchapupu, zvakava pachena zvikuru kuti Ishe akanga apa chiratidzo aichengetedza nguva yokunyora nokutumira kwacho kunzvimbo yachaienda, kuti chisvike ipapo panguva chaiyo.
GSAM 389.3Mangwanani-ngwanani emusi wa18 Ndira 1872, Mai White vakamutswa uchapupu hwataurwa pamusoro apa hwakanyatsosimbiswa mundangariro dzavo. Mufungo wacho wakanga wakajeka kwavari sokunge wataurwa nenzwi rinonzwika uchiti, “Nyora pakarepo uchapupu ihwohwo hweCalifornia, uye huise muposvo inotevera chaiyo; hunodiwa.” Mashoko aya paakadzokororwa kechipiri, vakasimuka, vakapfeka nokukurumidza, vakapedza kunyora. Vachangoda kudya mangwanani vakapa tsamba yacho kumwanakomana wavo Willie, vachiti, “Enda netsamba iyi kuposvo, asi usaikande mubhokisi. Ipe mukuru weposvo, uye ita kuti ave nechokwadi chokuti anoiisa mubhegi retsamba rinobuda mangwanani ano.” Gare gare akati mirayiridzo yavo yakanga ichiita seisingawanzoitiki, asi haana kubvunza mibvunzo, akaita zvaakanga arairwa, uye “akaona tsamba ichipinda mubhegi retsamba.”
GSAM 389Uchapupu Hwokutungamirirwa naMwari
GSAM 389.4Nokuziva mamiriro edu muSan Francisco panguva iyoyo, muchakurumidza kuona kukosha kwokuti tsamba iyoyo ipinde muposvo iyoyo chaiyo. Mumazuva iwayo tsamba dzaitumirwa nenyika kamwe chete pazuva. Kudai tsamba yacho yakanga yasvika Svondo manheru, musi wa28, panzvimbo poMugovera manheru, musi wa27, pasina mubvunzo paizova nokupesana kunorwadza muchechi. Kudai yakanga yasvika mavhiki akati kuti apfuura, kunyange pakarepo pashure pokupihwa kwechiratidzo, chechi ingadai isina kukurumidza kuona simba rayo.
GSAM 390.1Pano paiva neuchapupu hwaiva nezviratidzo zviri pachena zvoruoko rwaIshe, kwete chete nokuti hwakasvika panguva yakakodzera kuti hugadzirise zvakasimba zvikanganiso zvaivapo, asiwo nokuti, hwakagamuchirwa nokuzvininipisa uye huchiitwa nehama iyi, hwakashandisa simba guru kuunza kubatana nokusimba muchechi iyi yakanga ichangotangwa.
GSAM 390Maitirwo Okunyora Zviratidzo
GSAM 390.2Chiitiko ichi chinoshandawo semufananidzo wechirevo chake pamusoro pemaitiro okunyorwa kwezvaakaona. Pamusoro pazvo anoti: “Ndakamutswa kubva kuhope dzangu ndichinzwa zvakajeka zvinhu zvakanga zvamboratidzwa mundangariro dzangu; uye ndakanyora pakati pousiku tsamba dzakayambuka kondinendi, uye dzichisvika panguva yedambudziko, dzakanunura basa kubva padambudziko guru.”4