Adventist Pioneer
Library
aplib.orgLibrary
02 / 31

Kô 1992 Papuapa châta Biehmiapa

John Norton Loughborough

GSAM -[CD-ROM pachhuahpanotuhpa châchhinapa: Kô 1992 papuapa liata Loughborough ropa, a hlâta papua beih leipa hmozy cha Pasaopa A ta pasaopa a châpa vâta, he a hnoh viapa thâtih nata a pazaopa chithâtihzy, hmôna nata pachânazy chhao pasaopa he â tlah awpa ta pachâpa a châ.]

GSAM 5Hrona Thâtih Chyupa

GSAM 5.1John Norton Loughborough cha Noh sarina Adventist awnanopa paduana a mo ta a hmôtuhpa a châ. A hrona nata a chakaona kyh, ano bie cheingei ta ropa chyupa, Pasaopa A tawhta lâpa chata, a châbu papuapa thiehpa he pahno thaina hnawh a pie aw.

GSAM 5.2Kei cha kô 1832, thla 1, noh 26 liata Victor, Ontario Bia, N.Y. liata ei pihpa a châ. He khih, chyhsa 200 tlyma cha hlâta a hluh viapa tlyma a pahrâna cha, mail hluhpi taihta a pahrâ thlâh hapa raiphiatuhpa chhôhkha hluhpi ta avaihpa a châ. Albany tawhta Buffalo lâta châpaphaotuapa ratha a sie tyhna lâpi parohpa chô liata a y. Kô 1848 thlasie taihta he khih liata Hâta noh hmiatuapa siku nata zawpi achhyna ei ki tyh. Cha daihti tawhta Rochester, N.Y. khihpi cha ei y tyhna su a vaw châ haw. Ei paw nata ei pu cha Methodist awnanopa liata a râh chakaotuhpazy châ ei ta, châhrasala ama hrona châta ama raihria cheingei ta ama aoh....

GSAM 5.3... Kô 1843, thla 12 hâta hnôh chaipa liata Zisu vy heihna kyh biechhona ei hmiatua chaipa ta ei thei. Cha cha Unawhpa James Barry ta “Ano Pachiana Daihti a Vaw Tlô Haw” tahpa biepi hmâpa ta a chhopa a châ. Ano ta a phuahpa biehmeiseihpa cha Khazohpa hmotaotheina rôhnahpa ta eima palôh liata a pasia. Khazohpa pachiana hmia liata eima dopa hawhta eima pahno. Cha hnôh ta awnanopa mohôhtuhpa ta a pasyuna bie vâta, kei nata mo hropa hluhpi cha eima châta thlah ama chhâ thei nawpa ta hmialâ lâta eima pua. Cha tawhta thlahchhâ awpa nata Khazohpa tlua awpa ei teina hmiatuapa cha â thao haw....

GSAM 5.4Kô 1852 thlatlah liata Vâlyuhchâpa pathôhna bietapa ei chho pathao hlâta, bietapa chho aw ma, ei ku ta raihria eihrâhpa ta kei nata ei lahpinô hrona aoh aw ma tahpa ei pachâ hai nota, Rochester liata Pahânoh pakha eima pakhyna liata Sietanô White hnohta Aluahna piepa a châ. Kei châta cha Pahnokheina bie pasiapa piepa châ ta, a hâ khao leipa ta pua awpa, bietapa chho awpa nata ei hrona aohna châta Abeipa ta lâpi a pahy aw tahpa a châ....

GSAM 6.1Cha âthaona daihtizy liata raihria ei vaw hria hmeiseih haw nahta, cha daihti liata kei châta biehâ châpa hmo a vaw palâ haw. Cha cha he he a châ—bia hropazy liata Unawhpa White nata Sietanô White ama siena apakhyna peimawhpa to liata, ama nata sie awpa ta eina hrua tyh ei. Kei tlai ta, “Khâpa vâta ma he chakaotuhpa hropazy he hrua leipa ta kei deita eina hrua ngâ thlâhpa ei?” tahpa ta ei pachâ tyh.

GSAM 6.2Cha hleikhôpa ta, kô 1853 tawhta 1865 taihta â dyuhna pathôh a vaw chhuah nahta, â dyuhna chi to châta thâtihbu miakha chyupa, miathôh ama pathao nahta, khâpa vâta ma kei cha cha liata y na ta, â dyuhna to â thaona kha ei hmô? Cha hleikhôpa ta, khâpa vâta ma Sietanô White ta Mo padeih thlâhpa ta hmôpa aluahna a to nota ei 40 hlâta a hluh viapa ei hmô? Ano cha thohna sâhzy ta ama pasia nota ei hmô; a vaw y awpa hmozy a reihpasopa kha ei thei—cha bie atheipazy châta cha ngiapâ ru kawpa a châ hrasala, a reipa hawhna ta a tlô hmeiseih haw. Biehmeiseihpa ta ei reih, he tovyuhzy he ei parônahna a châ leipa ta, kei châta biehâ tlao ama châ. Kei tlai ta, “Khâpa vâta ma he zydua he a vaw y?” tahpa ta ei pachâ tyh.

GSAM 6.3... Kô 1890 liata Khizaw Awnanopa Pakhypi ta Rocky Tlângzy nochhi lâta raihria awpa ta eina châ. Chatawhcha Pastor O. A. Olsen hnohta ropa, kei hnohta a châpasai miakha tuapapa chhao a châpa he Pahnokheina bie he a vaw tlô: “Awnanopazy liata a hria awpa a ngiah kawpa rai cha Pastor Loughborough hriasa teh u tahpa ta ei reih. Vâlyuhchâpa pathôhna bietapa âthaona nata hmâhsiena liata ano tlai ta a pahnopasiapazy a chhopa ta, Zawhâna ao hawhta a ao theipa ta y awpa Abeipa ta a khoh. Pastor Loughborough cha ano yna su dopa liata do sala, Kaleba hawhta hmialâ pua sala, a ngiapâ leina, a pathliena nata a ngâ leina hmiakô liata, ‘Cha râh pha ngaitapa cha a chôlâ eima sie thei aw ta, eima lâ thei hmeiseih aw,’ tahpa ta Pahnokheina bie a pasia kawpa ta pie sala. Pastor Loughborough cha a hry y leina hao rai liata apakhihsa khuh vy. Ano cha Bia Awnanopa Pakhypi miakha rai nata a phih khuh vy. He lâ, cha lâ nata su to liata sie sala, Vâlyuhchâpa pathôhna bietapa âthaona liata a hmôpa, a pahnopa nata a ku ta a tonopazy cha chho sala.

GSAM 6.4(Loughborough hrona liata noh nata kô peimawhpazy châta Pasaopa B mo teh.)

GSAM 7Loughborough Châbu Hliezâh Awpa ta Awnapy eihhrâhpa

GSAM 7.1Kô za thiehpa a vaw tlô daihti liata, Unawhpa Loughborough ta Zisu Vy Heihna Hmâhlana Rônahpa a phaotuapa châbu, Vâlyuhchâpa pathôhna bietapa Âthaona nata Hmâhsiena a roh tawh ta, Ellen White ta he biezy he a roh:

GSAM 7.2Tahmâ eima duahmo he ei palôh ta ei pachâ rili kaw. Hlâno ta tao khai haw awpa a châpa rai cha tahmâ eima hria awpa a châ. Izarel sawzy cha thlalôbo sie khai ei ta, Jordan râhri liata ama riehmo a tao nota, Abeipa ta Mawsi tao awpa ta a chhopasia hawhna ta eima tao awpa a châ. Thlalôbo liata ama sie chhôh zydua ta, Abeipa ta ama chô liata hmo a taopazy kha ama hnohta a reih chanei awpa ta Mawsi cha bie piepa a châ. Cha reih chaneina rona cha Ryhpachaneina châbu liata hmô theipa a châ.

GSAM 7.3Eima raihria chithâtih âthaona liata Khazohpa chyhsazy ama pahnopasianazy rona cha chhuh chanei awpa a châ. Cha hnôh tawhta biehmeiseihpa liata a vaw ngiapâpazy hluhpi chata, Abeipa ta rai a hria dâh cha pahno veih ei. William Miller nata a hriaraopazy, Lawng hyutuhpa Joseph Bates nata Zisu vy heihna bietapa liata hmiatuhpa hropazy pahnopasianazy cha eima chyhsazy hmiakô liata so lymâ awpa a châ. Pastor Loughborough châbu he pachâ peimawh awpa a châ. Eima chhihthatuhpazy ta he châbu hliezâhna châta khâpa tao theipa a châ tahpa ama mo awpa a châ.

GSAM 7.4Eima raihria âthaona, awnanopazy tawhta eimâ pananopa tawhta, Khazohpa ta khaihna a maniah piepa hawhna ta a hlei kha chyu ta eima vaw siepazy pahnopasiana he, a mo chanei nawpa dâh pha chaipa eima tlua awpa, eimâ chu awpa a châ. Cha daihti liata Biehrai, Biehrai deita cha eima chhihthatuhpa a châ aw tahpa eima pyh; he pyhna tawhta he eima pavia beih awpa châ vei. Khazohpa hmotaotheina palâsana rônah ngaitapazy maniah piepa a châ. Hmohâh hmôpapuapa a châ. A hri kawpa suzy liata eima y nota, eima châta Khazohpa hmotaotheina cha ei hluhpi palâsapa a châ.—Châpaphaopa 105, 1903 (CWE145) (bie thapatlôna pasaopa a châ).

GSAM 7Khâpa Vâta ma Chhuh Chanei Awpa a Châ?

GSAM 7.5A chô liata Pahnokheina biezy khaihna liata, Unawhpa Loughborough cha eima chithâtih a chho chanei awpa ta biepiepa a châna chhâpa nata, ano rona he hliezâh heih awpa ta keimo chhao chhihthapa ta eima pahno chhâpazy cha pachâ suh u.

GSAM 8—Theih Chanei Awpa ta Awnapy

GSAM 8.1Hmo zydua hlâta, chithâtih liata hmo a vaw y hawpazy mo chaneina heta raihria liata Khazohpa ku eima hmô thei nawpa nata a kyhpachâna ta a mohôhna pahnokheipazy eima hmô thei nawpa tovyuh maniah a pie. He heta ngiapâna padua ta, a vaw y hawpa hmo phapazy nata a pha leipazy tawhta maniah a pachu. Eima awnanopa Biehrai liata a pachuna hnawhzy cha mo chanei ta, eima hmiatuhpazy amâ hlâna palôh chhao a palâsa. Eima thlahpa lâ zungzy cha maniah a theihsa chanei. Unawhpa Loughborough ta châhmia 33 liata a tahpa hawhta, “Izarel châta Abeipa ama nata a chhihthana dâh theih chaneina he a pha khiah, eima châta chhao a pha hra awpa châ vei ma? Aly kawpa ta hlarohtuhpa chata he hawhta a reih heih, ‘Ei thlahpa u, Abeipa cha reihthai teh; ano ta na châta a taopa hmo phapa zydua kha pahni khuh.’”

GSAM 8—Chithâtih Liata Daihti eihhrâhpa

GSAM 8.2Noh sarina Adventist raihria paduana kôzy cha chithâtih liata daihti eihhrâhpazy hry ta miakha a châ. Cha hawhpa daihti a châna ngiana achyh chai ta pathôh eima pachâna liata a vaw ngia.

GSAM 8.3(1) Hrohsona bie rôhnahpa a tlô hai nota. Cha hawhpa hmo cha a vaw y daihti liata chyhsa hluhpi ta pahno khao veih ei, tlokhuh ta pahno pasia hra veih ei. Chavâta, a hnoh tawhta mo heihpa ta, hrohsona bie a kawhzie—khizaw chithâtih liata cha daihti châta Abeipa ta Tahmâ biehmeiseihpa a châ awpa ta a pachhuahpanohpa bietapazy—pahno thai awpa he a peimawh kawpa nata a phahnai kawpa a châ.

GSAM 8.4(2) Abeipa ta hria awpa ta a pachhuahpanohpa raihria eihhrâhpa châta a pachuna hnawhzy paduapa a châ hai nota. Cha hawhpa daihtizy pahno thai awpa ta, a pachuna chahraozy a padua dâh, Biehrai tawhta pahnokheipazy nata, cha daihti hawhpa châta awpa a châpa paduatuhpazy, “hmiatuhpazy” cha, Khazohpa ta ama ku liata a piepa bietapa nata raihria kyh, a yzie hneipa nata a chhâpa a hnawh a dopa ngiapâna ama hnei thei nawpa ta, a hlei kha chyu ta a chhihthatuhpa Khazohpa mohôhna liata hmo a vaw ypazy cha hmô awpa a peimawh kaw.

GSAM 8.5(3) A hmiatuapa limipa a tlô hmeiseihna, Su pathaihpa hmeiseihpa chakaona liata ananona rôhnahpazy a vaw y nota. Khazohpa lâthlôh cha “Su pathaihpa liata a y” (Hlazy 77:13) tahpa vâta, moleina rairuna tao phapa awpa ta Khazohpa hmo a tao haipa cha pahno thai awpa nata ngiapâna ta zi awpa a peimawh kaw. He liata cha, a hlâta ananona rôhnahpa nata Zisu vy heihna hrahna daihti liata ananona cha a thliena heta a bao kaw. Abeipa ta eima pachâ awpa ta a khohpa cha, chôkâ tawhta Su pathaihpa lâta a sie nahta (Kalvari tawhta vâ lâta chôna taihta) hmo a vaw ypa nata, cha daihti liata Khazohpa a za ngaitapa chyhsazy ta âthaona liata hmo a vaw ypa ama pahno thai leina vâta, a pasiapa hnabeiseihna a tlô leina ama tonopa, châhrasala a hnoh chaipa liata Khazohpa achhuahpa a vaw palâ lymâna liata ama tovyuh ama vaw hmô dâh cha a châ. Ama pahnopasiana chata Su pathaihpa tawhta su pathaih chaipa lâta a sie daihti liata (châta thlahchhâpana tawhta châta thlahchhâpana pachiana lâta), kô 1844 nata cha hnôh liata a ngiapâpazy pahnopasiana kyh khaihna a pie.

GSAM 9.1Unawhpa Loughborough rona liata a chhopa âthaona daihti liata, a chô liata ngiana pathôh zydua he eima hmô. “Sôh phopa a tlua hawhta” biehmeiseihpa tlua ei ta, hmô ei ta, a phuahna liata hmo zydua a hlâpazy palôh hawhpa cha pahno thai awpa nata lâ awpa eima khoh.

GSAM 9—Hrohsona Thlahpa Pahnokhei Heihna

GSAM 9.2Loughborough pahnokheina chhuh chanei awpa chhâpa hropa miakha cha, a biehmiapa liata a chhopa hawhta, Ellen White cha châ rohtuhpa, bie reituhpa nata Thlahpa hmopiepa eihhrâhpa a daotuhpa a châna chakaona he, chithâtih nata Biehrai liata a tovyuh a hneipa cha eima daihti liata pahnokhei heih awpa he a châ.

GSAM 9—Âthaona Biehmeiseihpazy a Mo ta a Hmôtuhpa Rona

GSAM 9.3Kô 90 tlai a vaw liam haw nota, Ellen White ta he châbu he su to liata hmô theipa ta tao awpa nata, raihria pachuna hnawhzy a paduatuhpazy bie nata rona cha mo chanei awpa, chhuh chanei awpa ta bie a piepa chhâpa, achyh chai ta pathôh a y tahpa pahnokheipazy ta a palâsa. (1) He a mo ta a hmôpazy he ama thi laih hawpa vâta, ama hro nata ama ka cheingei ta ama pahnokheinazy cha ama dai laih haw. (2) Awnanopa paduana liata hmo a vaw ypazy chhao, a paduatuhpa chyhsazy chhao ama pahno cheingei leipa, awnanopa liata a vaw hlaopazy, sâng hluh via lymâpazy vâta, Khazohpa ta a raopa a zungzy pahno leipa awnanopa a vaw châ awpa a châ. (3) Biehmeiseihpa nata a do leipa pachuna chakaonazy ta awnanopa cha a pasia aw; a peimawh via ta, Minneapolis pahnopasiana liata a palâpa nata cha tawhta a vaw puapa, ama mo a paotheina duahmo liata cha a pasia aw. Chavâta, Abeipa ta he hmâhlana liata a chhihtha hmeiseih haw tahpa, chyhsa hluhpi ama ngâna cha, a nâh kawpa, a chi hluhpa nata a rusôhpa dâh hluhpi ta pasiapa a châ aw. A ku ta rai a hria haw tahpa pahnokheipazy cha a sia kawpa nata tha patlôpa ta chho chanei awpa a peimawh kaw awpa a châ.

GSAM 9Pasaopa A Kyh Châchhinapazy

GSAM 9.4Ama mo ta a hmô leipazy, a pahno lei vâta bie a pathliepa nata a ngâ leina cha, Unawhpa Loughborough a hro chhôh tlai chhaota hmôpa a châ. Cha hawhpa miakha chata, he liata Pasaopa ta piepa a châpa cha a roh nawpa ta a palôh a pahra. A chhyhna cha he papuapa liata pasaopa a châ theipa he, eima châta tovyuh pha ngaitapa nata eima tao awpa ta eima pahno; he he a papuana hmiatua chaipa a châ. L. E. Froom châbu chyhpa, Alei Diapa Hrohsona Pahnokheituhpazy Hmô Heihna, liata a reipa tawhta, he châbie a y tahpa eima pahno. Pasaopa A a châpa châbie chithâtih kyh Froom ta a chhopa cha he hawhta eima lâ:

GSAM 10.1A manei kawpa hmo hropa eima hmôpa miakha cha J. N. Loughborough ta Blick bie tuapana chârona chhaichhi parohpa hmâpa ta, châhnawh luhpipa ta zydua a ropa châbie pipa a châ. He he kô 1918 liata, a thihna hlâta a rei tu khao lei nota, a pachhuahpanohpa chhyhna a châ. Zisu vy heihna hmâhlana âthaona kyh a châbu hmiatuapazy cha, ama parih, ama panano, ama do lei tahpa ta, a hlâ chyhpa liata reiseituhpa thokhazy ta a reiseipa ama chhyhna a châ. Eima Châbu papuana o miakha hnohta papua awpa ta piepa a châ nahta, papua awpa taih a tlôpa ta zawpi palôh a hriena a y lei tahpa a palâ. Chavâta, a rohtuhpa hnohta tuapachhopa a châ.

GSAM 10.2A kô a vaw pitloh via haw nota, Pastor Loughborough ta cha cha H. A. Washburn hnohta a pie. Ano cha cha daihti liata Pacific Union College liata chithâtih pachutuhpa châ ta, châbie cha manei kawpa ta pachâ ta, a pasao thlâh. Nohkha pachutuhpa o chyhpa cha meih ta a hâ khai haw, a châbu khâna o pha ngaitapa chhao cha nata a hâ khai haw. A châbu a laibâhpa chyhpa cha, achuna o liata a chârona cabi chô liata a y. Chazy hry liata “Pahnopasiana Thokhazy” tahpa moh hneipa he châbie he a y hra. Cha kô liata Pacific Union College liata taopa Biehrai achuna sâh viapa siku pahy daihti châta chho awpa ta eina châpa, Miller zituhpazy hmâhlana kyh biechhonazy hmiatuapa ei patlô tawhta, Pachutuhpa Washburn ta châbie cha vaw tlôkhei ta, ei ku liata a piepa ta, “Ei châbu khâna o zydua tawhta, achuna o liata ei chârona cabi chô liata a ypa vâta, a laibâhpa hmo chyhpazy hry ta he châbie a châna chhâpa cha tahmâ ei pahno thai haw. Khazohpa ta he hawhta hmâh awpa ta pasao thlâh awpa a khohpa a châ. Zisu Vy Heihna Hnawhzy Pakhyna liata so teh,” tahpa ta a reih.—châhmia 48, 49

GSAM 10Abeipa ta Chyhsazy nata Rai a Hriaraona

GSAM 10.3Eima palôh cheingei liata a palâpa chyhsapa ydâh kyh achyhpa eima pahno thaipa vâta, Abeipa ta rai a hriekheipa chyhsazy cha leido beihkoh hawhta a chiehleipa ama châ tahpa, a sia kawpa ta eima pahno. He châbu he Abeipa ta rai a vaw hria dâh liata ngiapâna patlô awpa ta eima pie; a khozie a patlô nawpa ta a hmâpa chyhsa chiehleipazy liata ngâna dopa châ leipa padua awpa ta a châ vei. Eima daihti liata biehmeiseihpa tlua ngaitatuhpa chata he châbu tlyma, cha daihti rôhnahpazy kyh rona hropa tlyma a reih nota, he Khazohpa a za ngaitapa chapawzy nata chanôzy liata chyhsapa châna a palâ dâh châta, keimo ta chhâpa hropazy reipa ta cha hmozy cha adopa hawhta eima palâsa vei. Khazohpa cha chyhsazy nata rai hria raopa ta, chyhsapa châna nata Khazohpa châna apazaona liata rai a hria ngâ thlâh (Ephesi 2:20). Mohropazy bie a chalâpa tawhta chhao, Ano ao cha nahthlie ngâ thlâh suh u. “Hrohsona biezy cha mohnao khuh vy; hmo zydua pasia teh u; a phapa kha pypa ta chaba teh u.” (1 Thysalawnika 5:20, 21). (Bietapa Atlyhpazy 3:342-347 mo teh.)

GSAM 11Paduana Daihti Pachâ Peimawhpa

GSAM 11.1He châbu phahnaina rôhnah chaipa cha, eima paduana daihti nata âthaona kôzy kyh, bie a hiahna hluhpi, a hiah lei chhâpazy chhao, a chhyhna liata a y tahpa eima hmô. Kô za 19 a chhâna nata cha hnôh liata awnanopa pahnopasiana kyh a hiahna hropazy cha su hropa liata a sia via ta chhopa a châ. Abeipa bietapa phuahtuhpa chata Pahnokheina biezy liata, cha daihti liata awnanopa duahmo, kô 1888 liata Abeipa ta pie awpa ta a teipa khaihna nata, cha bietapa awnanopa ta a pahleipa vâta, cha daihti châta chhao, eima daihti taihta kôzy châta chhao a theilâ a vaw châpazy cha a chho haw.

GSAM 11.2Chyhsazy hnabeiseihna a vaw mâna nata Abeipa achhuahpa a vaw mâna a nanona cha hmô awpa a peimawh. Abeipa a vy nawpa a hnai haw tahpa ta hnabeiseih ei ta, châhrasala ama daihti châta a châ lei tahpa pahnokheina a hmôpazy, chhâ hluhpi liata Khazohpa chyhsazy ta a tonopa cha chyhsazy hnabeiseihna a mâna a châ. A hropa deikua cha, Izarel parohpa hnohta a tao hawhna ta, keimo chhao chyhsa sahlao ta Kena râhri taihta maniah a chhihtha ta, “Ngia teh u,” maniah tah hrasala, eima ngiapâ leipa vâta eima ngia lei nota, Abeipa achhuahpa a vaw mâna cha a châ. A heizy liata eima y nata khâpa vâta he liata eima y tahpa mo suh u. Eima thlahtuhpazy tawhta achuna la suh u la, Abeipa byhnâ nata a daohtheina thâtih chho chanei suh u; kô 100 a vaw liam haw nota a tao thei leipa cha, keimo liata nata keimo zawhzi ta a tao thei nawpa ta pasai suh u.

GSAM 11.3(Pasaopa C mo teh.)

GSAM 11Tahmâ Awnanopa châta Awnapy

GSAM 11.4Unawhpa Loughborough biehmiapa liata, cha daihti liata awnanopa a châpa Noh sarina Adventist zy 100,000 ta, 2,000,000 ama châpa hawhta tha nata hmahlana ama palâsa tahpa a reih. Cha hawhpa thliena tlai hmâpa ta, tahmâ keimo 6,000,000 he 120,000,000 eima châpa hawhta eima palâsa tahpa ta rei thei aw ma pi? Âthaona kôzy kyh ano chho chaneina chata tanoh awnanopa châta khâ hawhpa awnapy ma a pie?

GSAM 12.1He papuapa thiehpa ta a pahra awpa ta thlah eima chhâpa, a chhyhna hnei chhâ leipa bie a hiahna thokha cha nama hnohta eima chhieh:

GSAM 12.2(1) “Hmâhlana” cha a heizy lâ e a sie haw?

GSAM 12.3(2) Âthaona pachuna hnawhzy liata a ngâchhih thlâh ma?

GSAM 12.4(3) Loughborough daihti tawhta awnanopa liata eima hmôpa ananonazy he, chyhsazy pahrâ dâh ananona vâta tlyma, eima hry liata Abeipa ta rai a hriepa vâta tlyma, khâzia taihta chhopasia theipa a châ?

GSAM 12.5(4) Hmâhlana ta Krista a vy heih nawpa a hnai haw tahpa a phuah pathaona tawhta kô 150 tlai a vaw liam haw hrasala, khâpa vâta ma tahmâ taihta he liata eima y thlâh?

GSAM 12.6Eima chithâtih a vaw liam hawpa he ei mo chanei ta, tahmâ eima duahmo taihta hmâhsiena a hlei to ei vaw sie khai hawpa vâta, Khazohpa cha reihthai teh u! tahpa ta ei rei thei. Abeipa ta hmo a tao hawpa ei hmô nahta, ei palôh cha hmo hâhna nata Krista cha chhihthatuhpa a châ tahpa ngâna ta a bie. Abeipa ta maniah a chhihthana dâh nata eima chithâtih a vaw liam hawpa liata a pachuna eima pahni awpa deita hleikhôpa cha, hmialâ daihti châta chih awpa hmo eima hnei vei.—Ellen G. White Hrona Thâtih Chyupazy, 196

GSAM 12.7Na thlahtuhpazy ta ama sopa râhri ngiana parohpa kha pasie khuh.—Biesozy 22:28 Adventist Hmiatuhpazy Châbu Khâna O Mohôhtuhpa Py Loma Linda, California, kô 1992, thla 3, noh 1

Note

Back