Adventist Pioneer
Library
aplib.orgLibrary
Table of Contents
10 / 31
10 / 31

Mataupu 7 — Le Vave Ona Aga'i i Luma o le Fe'au

John Norton Loughborough

GSAM 126.1“Ona ou iloa lea o le tasi agelu malosi ua alu ifo mai le lagi, ua ofu i le ao; ua i lona ao le nuanua, o ona fofoga fo'i e pei o le la, o ona vae fo'i e pei o poutū afi; ua i lona lima le tusi itiiti ua tatala. Ua tu'u lona vae taumatau i luga o le sami, ma lona vae tauagavale i luga o le fanua; ua 'alaga fo'i o ia ma le leo tele, e pei ona tagi le leona. Ua 'alaga o ia, ona tautala mai lea o faititili e fitu i o latou leo.... O le agelu fo'i na ou iloa o tū i luga o le sami ma luga o le fanua, ua si'i lona lima i le lagi, ma tautō i lē soifua e fa'avavau fa'avavau lava, o lē na faia le lagi ma mea o i ai, ma le lalolagi ma mea o i ai, ma le sami ma mea o i ai, e le toe i ai se taimi; a o aso o le leo o le agelu lona fitu, pe a amata ona ili e ia lana pu, ona fa'auma ai lea o le mea lilo a le Atua, e pei ona ia folafola mai i ana auauna o perofeta.”1

GSAM 126O le Agelu o se Fa'ailoga o Avefe'au o Tagata

GSAM 126.2E pei ona uma ona fa'aalia, ua tu'uina atu i tagata le galuega o le tala'iina o le tala lelei, ma ua folafola mai e le Ali'i lona fa'amanuiaga i lea galuega e faia e tagata se'ia o'o i le “gataaga o le lalolagi.”2 O lea, o le agelu o lo'o tauaveina lenei fe'au e ao ona avea o se fa'ailoga o se fe'au e uiga i le taimi, e tala'iina atu i ē o nonofo i le lalolagi. Ua folafola le fe'au mai se tusi ua “tatala,” ua manino ai sa tapunia muamua. E pele nei avefe'au i le Atua; auā o le “nuanua,” o le fa'ailoga o le feagaiga a le Atua, o lo'o i luga o i latou, ma ua latou tutū ua oofu i le malamalama o le mamalu o le Atua, ma folafola atu le fe'au i le pule a lē na Foafoaina mea uma. O le mea ua folafolaina i inei o se fe'au e uiga i le taimi, sa “fa'amaufa'ailogaina” muamua, a o lenei ua folafolaina mai se tusi ua “tatala.”

GSAM 127.1Ua fa'amaonia i mataupu ua mavae sa fa'ailoa e le Ali'i le taimi e tu'uina mai ai le malamalama e uiga i le fa'ai'uga o le vaitaimi tele o le valoaga—aso e 2300—e ta'ita'i atu i le fa'amasinoga su'esu'e; na fa'ataunu'uina tonu le valoaga e fa'ateleina le malamalama, i le fa'atula'iina o le to'atele na ia fa'aalia i ai lea malamalama; ma sa ia fa'ailoa fo'i le taimi e a'oa'oina ai le “fa'ata'oto i le mati,” i lona fa'atula'iina o ana faia'oga i lea lava taimi ma lea lava nofoaga, ina ia latou ō atu e folafola lea fa'ata'oto i le lalolagi. E fa'apea fo'i le tonu o lona fa'ailoaina o le taimi e fa'ateleina ai le fe'au e uiga i le taimi se'ia o'o i lona alaga tele, ma e fa'apea fo'i le tonu o lona fa'ataunu'uina.

GSAM 127Le Alaga Tele o le Fe'au Muamua

GSAM 127.2O le taimi tonu e faia ai le alaga tele o lenei folafolaga o se fesili e tāua ona iloa. Ua tu'uina i inei i le vā o le iliina o le pu lona ono ma le pu lona fitu. E iloa lenei mea i lona tulaga i le fa'amaumauga o le Tusi Paia, atoa ma le fe'au lava ia, o lo'o fa'apea mai: “A o aso o le leo o le agelu lona fitu, pe a amata ona ili e ia lana pu, ona fa'auma ai lea o le mea lilo a le Atua, e pei ona ia folafola mai i ana auauna o perofeta.” O le fa'amaoniga maumaututū lenei o le taimi ua folafolaina i lenei fe'au e oo atu i le iliina o le pu lona fitu.

GSAM 127Le Taimi o le Alaga Tele

GSAM 127.3Pe a ili e le agelu lona fitu lana pu, tatou te faitau ai e fa'apea, “ua tatalaina le malumalu o le Atua i le lagi, ma ua va'aia i lona malumalu le atolaau o lana feagaiga.”3 I le sauniga o le malumalu i le lalolagi, o le potu sa i ai le atolaau—o le mea e sili ona pa'ia—sa tatalaina na o le tasi le taimi i le tausaga; o le aso lea o le togiola, ina ia soloiesea ai agasala—o le fa'amamāina o le malumalu. O le taimi na tautala ai perofeta e faia ai lenei galuega o le fa'amamāina e Keriso, o le fa'ai'uga lea o aso e 2300.4 Ua ta'ua fo'i, pe a ili e le agelu lona fitu lana pu, e fai mai leo i le lagi ua o'o mai le taimi e fa'amasinoina ai ē ua oti.5

GSAM 128.1O lenei fa'ailoga fa'avaloaga i le Fa'aaliga 10 ua fa'aalia ai le taimi e alu atu ai lenei fe'au “ma le leo tele,” ma mulimuli ane, “e pei ona tagi le leona.” E tusa ma lenei valoaga, o le taimi e fa'ateleina ai le fe'au se'ia o'o i lona “alaga tele,” e amata i le fa'ai'uga o le pu lona ono se'ia o'o i le fa'ai'uga o lena vaitaimi fa'avaloaga e ta'ita'i atu i le fa'amamāina o le malumalu; o lona uiga, se'ia o'o i le fa'ai'uga o aso e 2300. Na fa'ataunu'uina pu muamua e fa i taua a tagata Goth, Vandal, Hun, ma isi, na vaevaeina ai Roma i Sisifo i vaega po o malo e sefulu.

GSAM 128Le Pu Lona Lima

GSAM 128.2Ua fa'aalia e le pu lona lima le tula'i mai o le lotu Isalama ma lona ao o a'oa'oga sesē, aemaise lava le vaitaimi o “masina e lima,” po o tausaga moni e 150 mai le taimi na “i ai se tupu e pule ia i latou.” I le aso 27 o Iulai, 1299, na osofa'ia ai e Othman, o lē na fa'avaeina le emepaea o Ottoman, le laueleele o Nicomedia. Mai lena taimi na fa'asoesā ma “fa'atigāina” ai e tagata Ottoman le emepaea o Roma i Sasa'e se'ia o'o i le aso 27 o Iulai, 1449, o tausaga ia e 150 o le iliina o le pu lona lima. I lena taimi na ō mai ai tagata Take ma a latou 'autau e osofa'i le aai lava o Constantinople, ma fa'aaogā le pauta fana i a latou taua; ma na latou tafana maa tetele i pā o Constantinople mai se fanafanua mamafa tele, lea na fai mai le tusitala o talafa'asolopito o Gibbon sa mana'omia povi po'a e 60 e toso ai.

GSAM 128Le Fa'ai'uga o le Pu Lona Ono

GSAM 128.3Pe tusa o lea taimi na maliu ai John Palleologus, lea ua tusia e tusitala o talafa'asolopito o le emeperoa mulimuli o tagata Eleni. O Constantine Decozes o le suli tonu lea o le nofoāli'i, ae ua fai mai, ona o lona mata'u ia Amurath, o le sulutāna o Take, o lē sa tau lenei taua ma ia, na ia talosaga ai ia Amurath mo se fa'atagaga e nofo ai i le nofoāli'i. O lea gaoioiga e toeitiiti lava pei o le tu'uina atu o le nofoāli'i i tagata Take. O le mea moni, e le'i umi lava ae maua e tagata Ottoman le pule i le aai o Constantinople ma le emepaea o Roma i Sasa'e. O lea na latou “fasiotia” ai, i le itu tau pulega, le emepaea sa latou “fa'atigāina” muamua. Sa tatau ona latou “fasiotia” lea malo mo le “itula, ma le aso, ma le masina, ma le tausaga.”

GSAM 129.1Afai e manatu i lenei taimi o se taimi fa'avaloaga, o le aso e tasi mo le tausaga e tasi, o le ā le umi o lea taimi? E faigofie le faitauga: o le tausaga e tasi, o aso ia e 360, po o tausaga; o le masina e tasi, o aso ia e 30, po o tausaga; ma le aso e tasi, o le tausaga e tasi lea,—o le aofa'iga, o aso e 391, po o tausaga moni e 391. Ona o le itula o le tasi o vaega e luasefulu ma le fā o le aso, pe a avea ma fa'ailoga, e tusa lea ma le 'afa masina, po o aso e sefululima. O le taimi atoa la o le pule tuto'atasi a tagata Isalama i le laueleele o Roma i Sasa'e e 391 tausaga ma aso e 15. Pe a fa'aopoopo lenei taimi i le aso 27 o Iulai, 1449, e oo atu ai i le aso 11 o Aukuso, 1840, o le fa'ai'uga lea o le vaitaimi o le tuto'atasi o Take, e pei ona fa'aalia i lalo o le pu lona ono.

GSAM 129Ua Valoia e le Foma'i Josiah Litch le Pa'ū o le Emepaea o Ottoman

GSAM 129.2I le 1838, na talia ai e le Foma'i Josiah Litch, o Filatelefia, Pa., le upu moni na fa'ailoa atu e William Miller, ma auai ai i le galuega o le fa'ailoa lautele atili o le fe'au. Na ia saunia tusitusiga mo lomiga lautele e uiga i pu e fitu o le Fa'aaliga. Sa ia taofi ma le maumaututū, e aunoa ma se masalosalo, o le a muta le iliina o le pu lona ono ma pa'ū le pule o Ottoman i le aso 11 o Aukuso, 1840, ma o le a fa'amaonia ai i le lalolagi o le aso e tasi i valoaga fa'afa'ailoga e fa'atusa i le tausaga moni e tasi.

GSAM 129.3O nisi o le 'au uso, e oo lava ia i latou sa talitonu fa'atasi ma ia i lenei mataupu, sa gatete i le fefe i le i'uga “pe afai e lē taunuu” e pei ona ia fai mai ai. Peita'i, e le'i fa'avaivaia ai o ia; na ia aga'i atu pea e faia mea uma na te mafaia e fa'ailoa lautele ai ona manatu i le mataupu e uiga ia Take. Na fa'asalalau atu e nusipepa le mea na ia folafola mai e uiga i lea mataupu. Sa talanoaina e fa'apotopotoga o ē lē talitonu i le Atua lea fesili i a latou fonotaga, ma fai mai, “O le tagata lenei ua lototele e folafola mai se mea, ma afai e taunuu lenei mataupu e pei ona ia fai mai ai, o le a fa'amaonia ai e aunoa ma se masalosalo lana ta'utinoga, o le aso e tasi i le valoaga e fa'atusa i le tausaga e tasi, ma o aso e 2300 o tausaga fo'i ia e tutusa lo latou aofa'i, ma o le a fa'ai'u i le 1844.”

GSAM 130.1O le lomia o le lauga a le Foma'i Litch na fa'aoso ai se vevesi tele i tagata lautele, ma o lea na tosina atu ai le faitau afe e to'atele e mata'itu le fa'ai'uga o fe'ese'esea'iga na tula'i mai i le vā o Mehemet Ali, le pasa o Aikupito, ma le sulutāna o Take. Na fai mai le faitau selau, “Afai e fa'ai'u lenei mataupu e pei ona folafola mai e le foma'i, o le a fa'amaonia ai le mataupu fa'avae o le ‘tausaga mo le aso’ i le fa'amatalaina o taimi fa'afa'ailoga, ona avea ai lea o i matou ma Adventist.”

GSAM 130Ua Tau le Sulutāna o Take ma le Pasa o Aikupito

GSAM 130.2Mo ni tausaga a o lumana'i le 1840, sa a'afia le sulutāna i se taua ma Mehemet Ali, le pasa o Aikupito. I le 1838, na taofia ai mo sina taimi le fe'ese'esea'iga i le vā o le sulutāna ma lona ali'i i Aikupito sa i lalo o lana pule, ona o le a'afiaga o amepasa mai nu'u ese. Peita'i, i le 1839, na toe amata ai le taua, ma na fa'aauau pea se'ia o'o ina nutililii ma fa'aumatia atoa le 'autau a le sulutāna i se taua tele i le vā o 'autau a le sulutāna ma Mehemet; na faoa fo'i e Mehemet ana fuāva'a ma ave i Aikupito. Na matuā fa'avaivaia le sulutāna, ma ina ua toe amata le taua ia Aukuso, sa na o ni va'a tau e lua o le vasega muamua ma va'a tau mama e tolu na totoe mai i fuāva'a a Take sa malolosi muamua. Sa matuā te'ena e Mehemet le tu'uina atu ma le toe fa'afo'iina o nei fuāva'a i le sulutāna, ma na ia ta'utino atu afai e taumafai malo malolosi e ave'esea mai ia te ia, o le a ia susunuina. O le tulaga lea sa i ai mataupu ina ua fa'auilavea Egelani, Rusia, Austria, ma Prussia i le 1840, ma filifili ai e fo'ia le fe'ese'esea'iga; auā sa manino, afai e tu'u ai pea, e le pine ae maua e Mehemet le pule i le nofoāli'i o le sulutāna.

GSAM 131Le Fa'auilavea o Malo Malolosi ua So'ofa'atasi

GSAM 131.1“Na talia e le sulutāna lenei fa'auilavea a malo malolosi ua so'ofa'atasi, ma o lea na ia tu'uina atu ai ma lona loto malie le mataupu i o latou lima. Sa faia se fonotaga a nei malo i Lonetona, ma sa i ai le seiki o Effendi Bey Likgis, o le sui o Ottoman ua tu'uina atu i ai le pule atoatoa. Na tusia se poloa'iga fa'ai'u e tu'uina atu i le pasa o Aikupito. E tusa ma lea poloa'iga, sa tatau i le sulutāna ona ofo atu ia te ia le pulega o Aikupito e tu'ufa'asolo i ona suli, ma le pule i lona olaga atoa i le vaega uma o Suria e amata mai le Fagaloa o Suez e oo atu i le Vaituloto o Tiperia, fa'atasi ma le itumalo o Acre; a o ia, e tatau ona alu 'ese mai isi vaega uma o le malo o le sulutāna sa ia nofoia i lea taimi, ma toe fa'afo'i atu fuāva'a a Ottoman. Afai na te te'ena lenei ofo a le sulutāna, ona ave lea e malo malolosi e fā le mataupu i o latou lava lima, ma fa'aaogā isi auala e latou te manatu e tatau ai e fa'amalosia o ia e talia tu'utu'uga.

GSAM 131.2“Sa manino, o le taimi lava e tu'uina atu ai lenei poloa'iga fa'ai'u i lima o Mehemet Ali, o le a lē toe i ai lava le mataupu i lalo o le pule a lē na muamua ta'ua [le sulutāna], ma mai lena taimi, o le faia o fa'ai'uga i ana mataupu o le a i lima o malo malolosi mai nu'u ese.

GSAM 131Ua Fa'ataunu'uina le Valoaga—Ua I'u le Tuto'atasi o Take

GSAM 131.3“Na auina atu e le sulutāna Rifat Bey i se va'a ausa a le malo i Alexandria, e fa'ailoa atu le poloa'iga fa'ai'u i le pasa. Na tu'uina atu i ona lima, ma na ia talia e nafa ma lea mea, i le aso sefulutasi o Aukuso, 1840! I lea lava aso na auina atu ai e le sulutāna se tusi i amepasa o malo malolosi e fā, e fesili atu po o le ā le fuafuaga o le a fa'aaogā pe afai e musu le pasa e usita'i i tu'utu'uga o le poloa'iga fa'ai'u. Na latou tali mai ua uma ona faia sauniuniga, ma e leai se mea e tatau ai ona popole o ia i so o se mea e ono tula'i mai. I lea aso na i'u ai le vaitaimi o tausaga e 391 ma aso e sefululima sa tu'uina atu e tumau ai le pule o Ottoman; a o fea sa i ai le tuto'atasi o le sulutāna?—Ua mou atu!”6

GSAM 132.1Mai lena aso e oo mai i le aso nei, ua tatau ai i le sulutāna ona gaoioi i lalo o fa'atonuga a malo malolosi, ma va'ava'ai i le vaevaeina o lona malo, a o latou ave vaega ta'itasi mo lo latou lava fa'aogāina.

GSAM 132Ua Fa'aosofia le Naunau o Tagata Lautele i Valoaga

GSAM 132.2O lenei fa'ataunu'uga mata'ina o le valoaga sa i ai sona a'afiaga tele i mafaufau o tagata lautele. Na fa'ateleina ai le naunau o tagata e fa'alogo i le mataupu e uiga i valoaga ua fa'ataunu'uina ma valoaga o lo'o fa'ataunu'uina. Na fai mai le Foma'i Litch, i ni nai masina talu ona mavae le aso 11 o Aukuso, 1840, na ia maua ai tusi mai le sili atu i le afe o tagata ta'uta'ua sa lē talitonu i le Atua, o nisi o i latou o ta'ita'i o fa'apotopotoga o ē lē talitonu i le Atua. Na latou ta'ua i ia tusi ua latou tu'ua le taua fa'asaga i le Tusi Paia, ma ua latou talia o le fa'aaliga lea a le Atua i tagata. O nisi o i latou nei na matuā liliu atu i le Atua, ma o nisi na avea ma failauga atamamai i le gaoioiga tele o le toe afio mai lona lua. Na fa'aali atu e nisi o latou manatu i le Foma'i Litch fa'apenei: “Sa matou fai mai e sii mai e ē e fa'amatalaina valoaga ni upu mai itulau tuai ua manogi pala o talafa'asolopito, e fa'amaonia ai a latou ta'utinoga e uiga i le fa'ataunu'uina o valoaga; a o lenei mea, ua i o matou luma lava mea moni o lo'o tutupu, ua iloa e o matou lava mata.”

GSAM 132.3Ina ia fa'aalia pe na fa'apefea ona amata alu atu le fe'au o le toe afio mai “ma le leo tele,” i le fa'ai'uga tonu o le pu lona ono, o le a ou ta'ua se mea na tupu, e pei ona fa'amatala mai ia te a'u e se tasi o ē na auai i le galuega o lenei fe'au.

GSAM 132.4I le tausaga e 1840, na talia ai le fe'au e E. C. Williams, o se tagata e tele lana galuega o le faia o fale'ie ma lā o va'a, i Rochester, New York. Na ia vala'aulia Toeaina Miller ma Himes e ō mai i Rochester e lauga atu i le faitau afe o tagata o lea aai. Na la tali mai e lē o lava a la'ua tupe e maua ai se maota e lava lona telē e ofi ai tagata. Na ia tali atu, “E i ai lo'u fale'ie lapotopoto e 120 futu lona lautele e ui atu i le ogatotonu. O le a ou fa'atūina, tu'u i ai nofoa, ma tausia, e aunoa ma se totogi. Ō mai ma folafola atu le fe'au.” Na ia fai mai ia te a'u, “Na la ō mai, ae e le'i ofi i le fale'ie le 'afa o ē na ō mai e fa'alogo, o lea na ou fa'aopoopo ai i le ogatotonu se vaega e fā sefulu futu, ma avea ai le telē o le fale'ie ma le 160 x 120 futu. Sa tumu lenei fale'ie i tagata i aso ta'itasi, ma sa lolofi mai le faitau selau e latalata ane i fafo, ua naunau uma e fa'alogo i le upu.”

GSAM 133Ua Folafola Atu e le Faitau Selau le Fe'au

GSAM 133.1Ina ia tali atu i le naunau ua fa'ateleina, na fa'aaogā fale'ie tetele, ma sa faia fonotaga i togavao i le tau mafanafana. Sa fa'aaogā nisi o fale lotu ma maota mo tagata lautele e sili ona tetele i le tau mālūlū, ma sa matuā tutumu uma i tagata fa'alogologo naunau. Sa lē toe tū le Toeaina Miller, e pei ona sa faia a o lumana'i le 1840, “e toetoe lava na o ia” e folafola atu le fe'au; ua tusa ma le tolu selau na auai fa'atasi ma ia e folafola fa'alaua'itele le fa'ai'uga o le vaitaimi o aso e 2300, ma alaga atu, “E le toe i ai se taimi,” ma, “Ua o'o mai le itula o lana fa'amasinoga.” O lea tatou te iloa ai, ina ua o'o mai le taimi a le Ali'i e aga'i ai i luma le fe'au i le lalolagi atoa, na fa'ataunu'uina lana upu, ma sa fa'aosofia le faitau miliona i le naunau e fa'alogo i le vala'au.

GSAM 133.2O le tulaga sa i ai le gaoioiga i Amerika, sa fa'apea fo'i ona i ai i isi atunuu. Mai le tausaga e 1840, sa lē na o ni nai tagata na fa'asalalauina a latou lomiga; ae o le to'atele, e faitau sefulu, na tula'i mai, e peisea'ī ua latou ō atu i luma e folafola le alaga. I Egelani, sa i ai faife'au e fitu selau o le Ekalesia a Egelani lava ia na folafola atu le fe'au, e le'i faitauina ai le to'atele o isi sa galulue i lea lava galuega. I atunuu ta'ita'i eseese o le lalolagi e sili atu i le lua sefulu, sa alu atu ai se fe'au ma le maelega na ta'ita'iina ai lē na matamata ane e fai mai, “Ua matuā naunau lava nei tagata.”

Notes

  1. Fa'aaliga 10:1-7. ↩
  2. Mataio 28:19, 20. ↩
  3. Fa'aaliga 11:19. ↩
  4. Tanielu 8:14. ↩
  5. Fa'aaliga 11:18. ↩
  6. Taga'i i le Manatu e uiga ia Tanielu ma le Fa'aaliga, itulau 497, 498. ↩

Note

Back