Mataupu 3 — Le Afio Mai o le Fanau Folafolaina
GSAM 57.1“INA ua oo i le atoaga o le taimi, ona auina mai lea e le Atua o lona Alo, ... na tuuina i lalo o le tulafono, ina ia togiola ai i latou o i lalo o le tulafono, ina ia tatou maua le avea ma atalii.”1
GSAM 57.2“Ia te ia o lē mafaia ona faatumauina outou e tusa ma la'u tala lelei, ma le tala'iga ia Iesu Keriso, e tusa ma le faaalia o le mea lilo, na natia talu mai le amataga o le lalolagi, a ua faaalia nei, ma ua faailoa atu i nuu uma i tusitusiga a le au perofeta, e tusa ma le poloa'iga a le Atua e faavavau, ina ia latou usiusitai i le faatuatua: ia i le Atua e toatasi, o lē poto, le viiga e ala ia Iesu Keriso e faavavau.”2
GSAM 57.3“Na ia faailoa mai ia te a'u le mea lilo i se fa'aaliga; e pei ona ou tusia muamua i ni nai upu, ... e le'i faailoaina i fanau a tagata i isi tupulaga, e pei ona faaalia nei e le Agaga i ana aposetolo paia ma perofeta.... Ua foaiina mai lenei alofa tunoa ia te a'u, o lē e itiiti ifo i le tagata aupito i faatauvaa o le au paia uma, ina ia ou folafola atu i nuu ese le tamaoaiga e le masuesueina o Keriso; ma ia faamalamalama atu i tagata uma le mafuta faatasi i le mea lilo, sa natia talu mai le amataga o le lalolagi i le Atua, o lē na faia mea uma e ala ia Iesu Keriso.”3
GSAM 57.4Ua fai mai nisi, o loo natia le tala lelei i le Feagaiga Tuai; a ua faaalia i le Feagaiga Fou. E pei ona faamatalaina e se tasi, “A o latou o ese mai le Atua, na matuā galo i tagata Iutaia aoaoga o sauniga o le tapua'iga. O Keriso lava na faavaeina na sauniga. O ona vaega uma sa fai ma faatusa o ia; ma sa tumu i le ola ma le matagofie faaleagaga. A ua leiloa i tagata Iutaia le ola faaleagaga o a latou sauniga, ma ua latou pipii atu i faiga ua leai se ola. Sa latou faalagolago i taulaga ma sauniga lava ia, nai lo le faalagolago i lē na faasino i ai na mea.
GSAM 58Faatalitali mo se Pulega Faalelalolagi
GSAM 58.1“E ui ina naunau tagata Iutaia i le afio mai o le Mesia, latou te le'i iloa le uiga o lana misiona. Latou te le'i saili le togiolaina mai le agasala, a o le laveaiina mai tagata Roma. Sa latou faatalitali mo le Mesia e afio mai o se manumalo, e lepetia le malosi o le pule sauā, ma siitia Isaraelu e pule i le lalolagi atoa. O lea na saunia ai le ala mo lo latou teena o le Faaola.
GSAM 58.2“O le nuu, i lo latou pogisa ma le sauāina, ma taitai, i lo latou galala mo le pule, sa moomoo i le afio mai o se tasi na te faatoilaloina o latou fili ma toe faafoi le malo ia Isaraelu. Sa latou su'esu'e i valoaga, ae leai se malamalama faaleagaga. O lea sa latou le amanaia ai mau e faasino i le faamaulaloina o Keriso i lona uluai afio mai, ma faauiga sesē mau e tautala i le mamalu o lona toe afio mai lona lua. Na faapogisaina lo latou vaai e le faamaualuga; sa latou faamatalaina valoaga e tusa ma o latou lava manaoga faapito.
GSAM 58.3“Ua silia ma le afe tausaga o faatalitali tagata Iutaia mo le afio mai o le Faaola. O lenei mea na tupu na faalagolago i ai o latou faamoemoega sili ona pupula. I pesega ma valoaga, i sauniga o le malumalu ma tatalo a aiga, sa latou faapelepele i lona suafa. A e ui i lea, ina ua afio mai o ia, latou te le'i iloa o ia. O lē ua Alofagia e le lagi sa pei ia te i latou o ‘se aa i le eleele matūtū;’ sa ‘leai sona tino lelei po o se matagofie;’ ma sa latou le'i vaaia se lalelei ia te ia e naunau ai ia te ia. ‘Na afio mai o ia i lona lava nuu, a o ona lava tagata e le'i talia o ia.’”4
GSAM 58Mai le Gafa o Tavita
GSAM 58.4A o latalata mai le taimi na valoia e Tanielu, e faaali mai ai le “Mesia le Alii”—o Lē ua faauuina—atonu sa mafai e tagata Iutaia ona mafaufau faapea, ma e lē taumatea sa latou faia faapea: O le Mesia, i le itu faaletino, e tatau ona sau mai le aiga ma le gafa o Tavita, o lea e tatau ai ona fanau mai o ia i lena gafa; ma e tusa ma tulafono ma tu a tagata Iutaia, e tatau ona faauuina o ia mo le auaunaga i le lautele pe a tolusefulu ona tausaga; ma afai e faaali mai o ia o lē ua faauuina i lena matua, e tatau la ona fanau mai o ia i le tolusefulu tausaga a o le'i uma vaiaso e onogafulu ma le iva o tausaga, ia e oo atu i le afio mai o le Mesia.
GSAM 59Valoaga a Simeona ma Ana
GSAM 59.1I lenei vaitaimi sa faatalitali ai Isaraelu uma. O tagata su'esu'e ma le filigā ma le faamaoni i le Tusi Paia sa faatalitali i le fanau mai o lē o le a avea ma o latou Pule ma Taitai. Na faaalia ia Simeona, le toeaina amioatua, “e le Agaga Paia e lē oo ia te ia le oti se'ia vaai o ia i le Keriso a le Alii.”5
GSAM 59.2Ina ua aumai le Faaola a o pepe i le malumalu, na iloa e Simeona o lenei tamaitiiti o lē na faasino i ai—o le Keriso. “Ona ia sii lea ia te ia i ona lima, ma faamanū atu i le Atua, ma faapea atu, Le Alii e, ua e tuu atu nei lau auauna e alu ma le filemu, e tusa ma lau afioga; auā ua iloa e o'u mata lau faaolataga, ua e saunia i luma o tagata uma: o le malamalama e faamalamalama ai nuu ese, ma le mamalu o lou nuu o Isaraelu....
GSAM 59.3“Ona faamanuia atu lea o Simeona ia te i laua [Iosefa ma Maria], ma fai atu ia Maria lona tinā, Faauta, ua tuuina lenei tamaitiiti e pa'ū ai ma toe tutū ai le toatele i Isaraelu; e fai foi ma faailoga e tetee i ai tagata (ioe, e tuia foi lou lava agaga i se pelu), ina ia faaalia ai manatu o loto o le toatele.
GSAM 59.4“Sa i ai foi Ana, o le perofeta fafine, o le afafine o Fanuelu, mai le ituaiga o Asera.... Ua sau o ia i lea lava itu aso, ona faafetai atu foi lea o ia i le Alii, ma tautala e uiga ia te ia i ē uma sa faatalitali i le togiolaina i Ierusalema.”6
GSAM 59Ua Asiasi Agelu i Leoleo Mamoe
GSAM 59.5A o le'i oo i lenei mea, ua uma ona folafola atu e agelu le tala fiafia i le fanau mai o le Faaola i leoleo mamoe i laufanua laugatasi o Peteleema. A o faalogologo leoleo mamoe, sa pepese agelu i nei upu mālie:—
GSAM 60Ua Asiasi Tagata Popoto i Peteleema
GSAM 60.2Ona taunuu mai lea o tagata popoto mai Sasa'e, o ē na vaaia “le oso a'e o le fetu,” e pei ona valoia e Palaamo. I lo latou mulimuli i lana ta'ita'iga na latou taunuu ai i Ierusalema, ma sa tatau ai ona fesili atu po o fea le Tupu ua faato'ā fanau mai. Ina ua faailoa atu ia te i latou o Peteleema e fanau mai ai Lē ua Naunau i ai, ona faaauau lea o la latou malaga; ma o le fetu na toe faaali mai na ta'ita'iina i latou i le mea faatauvaa na taoto ai le Faaola. O i inā na latou tapua'i ai i le Tamaitiiti paia, ma tuuina atu ia te ia meaalofa o auro, lipano, ma le muro, ona toe foi ai lea i lo latou aiga i la latou malaga umi.
GSAM 60Le Faaola i le Sefululua o Ona Tausaga
GSAM 60.3Mai lona tamaitiiti se'ia oo i le sefululua o ona tausaga, e itiiti mea ua tusia e uiga ia Keriso le Faaola, vagana ai lona tupu i le poto ma le tino, ma lona usiusitai ma le faamaoni i ona matua. A ua sefululua ona tausaga, ina ua latou o a'e ma Iosefa ma Maria i Ierusalema e auai i le tausamiga faaletausaga, sa ia faaofo ai i faitaulaga i le poto na faaalia i ana fesili, ma tali na ia tuuina atu i a latou fesili faigata. Mai lena taimi se'ia amata lana galuega i le lautele, sa ia faamamaluina le galuega faatauvaa a le tufuga kamuta, a o la galulue ma Iosefa, le tane a Maria.
GSAM 60Le Misiona a Ioane le Papatiso
GSAM 60.4Mo masina e ono a o le'i amata lana auaunaga i le lautele, sa folafola atu e Ioane le Papatiso le misiona a Keriso. Sa lolofi mai tagata e toatele e faalogologo ia Ioane ma papatisoina e ia. A o latou “faatalitali [i le afio mai o le Mesia], ma sa mafaufau tagata uma [“fefulifulisa'i pe felafolafoa'i,” i le pito o le itulau] i o latou loto e uiga ia Ioane, pe o ia o le Keriso pe leai; ona tali atu lea o Ioane ia te i latou uma, Ua ou papatisoina outou i le vai; a e afio mai lē e sili lona malosi ia te a'u, e lē aogā a'u ona tatala le nonoa o ona seevae: o ia na te papatisoina outou i le Agaga Paia ma le afi: o loo i lona aao lana asu e asu ai saito, ma na te matuā faamamā lana mea e soli ai saito, ma faaputu le saito i lona fale teu saito; a o aputi na te susunuina i le afi e lē matineia.”7
GSAM 61Ua Papatisoina Iesu
GSAM 61.1A o faia e Ioane le sauniga o le papatisoga, sa ia vaai atu ia Iesu o afio mai ia te ia ina ia papatisoina, ma ia faapea atu, “Faauta i le Tamai Mamoe a le Atua, na te aveesea le agasala a le lalolagi.... Ua molimau foi Ioane, ua faapea atu, Na ou vaai i le Agaga ua afio ifo mai le lagi e pei o se lupe, ma sa tumau i ona luga. Ou te le'i iloa foi o ia; a o lē na auina mai a'u e papatiso i le vai, na fetalai mai o ia ia te a'u, O lē e te vaai i ai ua afio ifo le Agaga ma tumau i ona luga, o ia lava lea na te papatiso i le Agaga Paia. Ua ou vaai foi, ma ua ou molimau, o ia lenei o le Alo o le Atua.”8
GSAM 61Le Siufofoga mai le Lagi
GSAM 61.2Sa molimauina le avea o Keriso ma Mesia i le afio ifo vaaia o le Agaga Paia i se tino e pei o se lupe, faapea foi ma se siufofoga mai le lagi. Tatou te faitau i le Tala Lelei a Mataio, “Ua papatisoina Iesu, ona afio a'e loa lea o ia nai le vai: faauta foi, ua faaavanoaina le lagi ia te ia, ma ua ia silasila atu i le Agaga o le Atua ua afio ifo e pei o se lupe, ua oo i ona luga: faauta foi, o le siufofoga mai le lagi, ua faapea mai, O lo'u Atalii pele lena, ua ou fiafia lava ia te ia.”9
GSAM 61.3E ui ina “e le'i faia e Ioane se vavega,” a o tagata, ina ua latou vaai i le mana tele sa faatasi ma le auaunaga a Keriso, sa uunaia i latou e faapea atu, “O mea uma na fai mai ai Ioane e uiga i lenei tagata e moni lava.”10
GSAM 61Ua Faauuina Keriso e Tusa ma le Tulafono
GSAM 61.4I le faamatalaga a Luka i le papatisoga ma lea lava faauuina e le Agaga Paia i le tino o se lupe, tatou te faitau ai, “Ua amata foi e Iesu lana galuega ina ua tusa ma le tolusefulu ona tausaga.”11
GSAM 62.1Ina ua mavae le anapogi umi a lo tatou Alii mo aso e fagafulu, ma faaosoosoga matautia a le tiapolo i le vao, ia na sosoo loa ma lona papatisoga, ona ia “afio mai lea i Nasareta, le mea na tausia a'e ai o ia; ona ulufale lea o ia i le sunako i le aso Sapati, e tusa ma lana tu, ma tu i luga e faitau.... Ua i o'u luga le Agaga o le Alii, auā ua ia faauuina a'u e folafola le tala lelei i ē matitiva.... Ona amata lea ona fetalai atu o ia ia te i latou, O le aso nei ua faataunuuina ai lenei mau a o outou faalogologo i ai.”12
GSAM 62Ua Faataunuuina le Taimi
GSAM 62.2A o tusia e Mareko lenei lava mea na tupu, ua ia fai mai, “Ua faataunuuina le taimi, ma ua latalata mai le malo o le Atua: ina salamo ia outou, ma talitonu i le tala lelei.”13 Ua oo mai le taimi na valoia e faaali mai ai Lē ua Faauuina. Ua faia le faauuina e le Agaga Paia i lona papatisoga, ma o lea ua amata lana auaunaga, i le taimi tonu ma le ala na valoia e perofeta paia anamua.
GSAM 62Faamaoniga Vaaia o le Avea o Keriso ma Mesia
GSAM 62.3Sa faaauau pea ona faia vavega faatasi ma le auaunaga a Keriso, o mea ia sa fai ma faamaoniga vaaia i tagata, e tusa lava pe latou te le'i malamalama atoatoa i ana faataoto ma ana afioga, o ia o Emanuelu, pe faapea “sa ia te ia le Atua.”14 I nei vavega sa tuuina atu ai e Keriso i le lalolagi le faamaoniga o le mana o le Atua i totonu ia te ia, atoa ma le faaalia i galuega o le amio a le Atua ma lona alofa agalelei. Ina ua mavae tausaga e tolu o mafuta pea Filipo ma Keriso, ma molimauina ana vavega tetele, ona ia faapea atu lea, “Le Alii e, ia e faailoa mai le Tamā ia te i matou, ona lava lea mo i matou,” ona fetalai atu lea o Iesu ia te ia, “Ua leva ona ou i ai ma outou, a e te le'i iloa lava a'u, Filipo? O lē ua vaai mai ia te a'u, ua vaai o ia i le Tamā: pe faapefea foi ona e fai mai, Ia e faailoa mai le Tamā ia te i matou? ... Ia outou talitonu mai ia te a'u, o a'u o i totonu o le Tamā, o le Tamā foi o i totonu ia te a'u; a leai, ia outou talitonu mai ona o galuega lava ia.”15
GSAM 63Ua Le Mautonu Ioane
GSAM 63.1E ui ina na molimauina e Ioane i le papatisoga o Keriso le afio ifo vaaia o le Agaga Paia, ma faalogo i le siufofoga mai le lagi ua folafola mai o ia o le Alo o le Atua, ma na ia lava folafola atu o ia o “le Tamai Mamoe a le Atua na te aveesea le agasala a le lalolagi,” a ua matuā ese le faagasologa o mea na tutupu mai mea sa ia faatalitalia, o lea sa atuatuvale ai ma fenuminumiai o ia i lona falepuipui pogisa.
GSAM 63.2“E pei o soo o le Faaola, sa le'i malamalama Ioane le Papatiso i le uiga o le malo o Keriso. Sa ia faatalitali e nofo Iesu i le nofoalii o Tavita; ma a o alu le taimi, ma e le'i faailoa e le Faaola sona pule tautupu, sa oo ina le mautonu ma atuatuvale Ioane.”16 “Ua ia valaau atu i ona soo e toalua, ona auina atu lea e ia o i laua ia Iesu, e fai atu, O oe ea lē o le a afio mai? pe matou te faatalitali i se isi?” “O lea lava itu aso na ia [Iesu] faamalolo ai tagata e toatele i o latou ma'i ma mala, ma agaga leaga; ma na ia foai atu le pupula i tauaso e toatele. Ona tali atu lea o Iesu, ua fetalai atu ia te i laua, Ina o ia, ma ta'u atu ia Ioane mea ua oulua vaai ma faalogo i ai.”17
GSAM 63.3Sa faigata i tagata Iutaia, atoa ma soo, ona iloa manino le tele o upu moni na fetalai mai ai le Faaola, auā sa matuā mausali lo latou talitonuga e faapea, pe a afio mai le Mesia, o le a ia motusia le amo a Roma, lea sa matuā mafatia ai i latou, ma toe faatuina loa le malo o Tavita, ma pule o se tupu faalelalolagi.
GSAM 63.4Na amata le tala'iga a Iesu i lona fetalai mai, “Ina salamo ia outou, auā ua latalata mai le malo o le lagi.”18 Ina ua auina atu ona aposetolo e toasefululua, sa latou tauaveina lea lava fe'au, “Ua latalata mai le malo o le lagi.”19 Mulimuli ane foi i lana auaunaga, ina ua auina atu le toafitugafulu, sa tuuina atu nei upu, “Ua latalata mai ia te outou le malo o le Atua.”20
GSAM 64Ua Maofa Tagata i le Galuega a Keriso
GSAM 64.1O afioga ofoofogia ma aoaoga a Keriso na taitaiina ai tagata e faapea atu, “E leai lava se tagata na tautala e pei o lenei tagata.”21 Ma ina ua ia faamaloloina le tagata tauaso ma le gūgū, “Ua maofa tagata uma, ua faapea ane, E lē o le atalii ea lenei o Tavita?”22 Po o lona uiga, E lē o le fanau ea lenei a Tavita, le Faaola na folafolaina? “Ua oo o ia i lona lava nuu, ona ia aoao atu lea ia te i latou i lo latou sunako, ua latou matuā ofo ai, ma faapea ane, Mai fea ea i lenei tagata lenei poto, ma nei vavega? E lē o le atalii ea lenei o le tufuga kamuta? E lē igoa ea lona tinā o Maria? ma ona uso, o Iakopo, ma Iose, ma Simona, ma Iuta?”23
GSAM 64.2Pe tusa ma le tausaga lona tolu o le auaunaga a Keriso, a o i ai o ia i le malumalu e auai i le tausamiga o le faapaiaga, sa siosiomia o ia e tagata Iutaia, ma fai atu ia te ia, “Se'ia afea ea ona e faalotolotolua ai pea i matou? Afai o oe o le Keriso, ia e ta'u manino mai ia te i matou.”24 I le tausaga na muamua atu, ina ua ia faia le vavega tele o le fafagaina o le lima afe i “areto karite e lima ma nai i'a laiti e lua,” sa ia “silafia o le a latou o mai ma ave faamalosi o ia e fai ma tupu, [o lea] na ia toe maliu ese ai i le mauga.”25
GSAM 64Ua Aoao e Keriso Ona Soo e Uiga i Lona Maliu
GSAM 64.3I le aoaoina o ona soo, sa avea ma mataupu tāua ia Keriso le aveesea o le manatu o le a amata loa se pulega faalelalolagi, ma ia faaali atu ia te i latou e tatau ona maliu o ia ma toe tu, ona alu ese ai lea ma toe afio mai. O lea na ia fesili atu ai ia te i latou, “Pe faapefea foi pe a outou vaai i le Atalii o le tagata o alu a'e i le mea sa i ai muamua?”26 Ina ua uma ona ia poloai atu ia te i latou “ia aua ne'i latou ta'u atu i se tasi o ia o Iesu le Keriso,” tatou te faitau ai: “Talu mai lea taimi na amata ai e Iesu ona faailoa atu i ona soo e tatau ona alu o ia i Ierusalema, ma puapuagatia i mea e tele mai toeaina ma faitaulaga sili ma tusiupu, ma fasiotia, ma toe faatuina i le aso tolu. Ona ave ese lea o ia e Peteru, ma amata ona vavao ia te ia, ua fai atu, Le Alii e, ia mamao lena mea ia te oe; e lē oo lena mea ia te oe.”27
GSAM 65.1I lea lava taimi na ia fetalai atu ai ia te i latou, e i ai nisi o loo tutu ai e lē oo i ai le oti se'ia latou vaai i le Atalii o le tagata o afio mai i lona malo.28 Pe tusa ma le valu aso mulimuli ane, na faataunuuina ai lenei valoaga; ma ua faasino le aposetolo o Peteru i lena “fa'aaliga” o Keriso o afio mai i lona malo o se faamaoniga o le toe afio mai lona lua moni o Keriso o loo lumanai pea.29
GSAM 65.2I se tasi taimi a o i ai Keriso ma ona soo i Kalilaia, na fetalai atu Iesu ia te i latou, “O le a faalataina le Atalii o le tagata i lima o tagata; ma latou te fasioti ia te ia, a o le aso tolu e toe faatuina ai o ia. Ona matuā faanoanoa ai lea o i latou.”30 A ua latou le'i iloa lava, pe malamalama i lona uiga, auā e oo lava i le taimi sa ia taumafai ai e faatumauina i o latou mafaufau le upu moni mamalu i lona maliu ma lona toetū, sa latou fefinaua'i pea po o ai e sili i le malo o le lagi.31
GSAM 65.3I se isi taimi na fai atu ai Peteru ia Iesu, “Ua matou tuua mea uma, ma mulimuli atu ia te oe; se a la se mea matou te maua? Ona fetalai atu lea o Iesu ia te i latou, E moni, ou te fai atu ia te outou, o outou ua mulimuli mai ia te a'u, i le toe faafouina o mea uma, pe a nofo le Atalii o le tagata i le nofoalii o lona mamalu, o le a nonofo foi outou i nofoalii e sefululua, e faamasino ai ituaiga e sefululua o Isaraelu.”32 Sa sili pea i o latou mafaufau le manatu i se malo ua toeitiiti faatuina, ma e tusa ma uiga faaletagata, na amata ai ona latou saili i le tulaga silisili i le malo.
GSAM 65.4Ona sau lea o le tinā o Iakopo ma Ioane, o atalii o Sepetaio, ma lona naunau i le mamalu, ma aioi atu ia Keriso ina ia tuuina atu i lana fanau ni tulaga maualuluga—o le tasi i le itu taumatau ma le isi i le itu tauagavale o lona nofoalii; pe, atonu, o le tasi e avea ma Palemia o le malo, ma le isi ma Failautusi o le Malo. A ua fetalai manino atu Keriso, “Tou te lē iloa le mea ua outou ole mai ai.”33
GSAM 66Le Ulufale Manumalo i Ierusalema
GSAM 66.1E le'i mamao ese mai lenei taimi na tupu ai se mea tele ma le ofoofogia. O le faatuina lea o Lasalo mai le tuugamau, o lē ua oti mo aso e fa. O lea vavega malosi na matuā faaosofia ma faaofo ai tagata, ma na atuatuvale ai le au Faresaio, o ē na vave ona valaau faatasi ma faitaulaga se fono; ma i a latou felafolafoa'iga sa latou fesili ai, “Se a se mea tatou te faia? auā ua faia e lenei tagata vavega e tele. Afai tatou te tuu pea o ia faapea, e talitonu tagata uma ia te ia; ona o mai ai lea o tagata Roma ma aveese lo tatou nofoaga ma lo tatou nuu.”34 A o faapea ona pulea e le mana faasatani mai lalo i latou sa saili e faaumatia Keriso, sa uunaia e se mana mai luga le motu o tagata e vivii atu ia te ia, ma faataunuu mea na valoia e uiga ia te ia.
GSAM 66.2I le mea na tupu ua ta'ua i luga, sa lolofi mai le motu o tagata, e vaai ia Iesu, faapea foi ma Lasalo, o lē na ia faatuina mai le oti. O lea ua foliga mautinoa ia te i latou o Iesu o lo latou tupu ua leva ona latou faatalitalia, ma ina ua latou fetaiai ma ia o afio atu i Ierusalema, o loo ti'eti'e i se tamai asini, na matuā oo mai ai i o latou mafaufau upu o le Tusi Paia, “Le tama fafine a Siona e, aua e te fefe: faauta, ua afio mai lou tupu, o loo ti'eti'e i se tamai asini.”35 Na alu a'e le alaga tele o le manumalo mai lena motu o tagata e toatele, ma na matuā faalavelave ai i le au Faresaio loto maaa, o ē sa fuafua ma le faaeteete a latou togafiti. Sa latou faapea ane i lo latou va, “Tou te le'i iloa ea ua leai se mea ua outou mafaia? Faauta, ua mulimuli atu le lalolagi ia te ia.”36 Ina ua latou ole atu ia Keriso e taofi le alaga, na ia tali atu, “Ou te fai atu ia te outou, afai e fifilemu i latou nei, e alalaga loa maa.”37 Na fetalai mai le Alii e uiga i lenei mea o le a tupu, “Ia alalaga,” ma afai e le'i faataunuuina e tagata lana afioga, na te tuuina atu se leo i maa o le ala, ona latou alalaga ai lea; auā e tatau ona faataunuuina lana afioga.
GSAM 66Keriso e Alu Ese ma Toe Foʻi Mai
GSAM 66.3E le gata ina taumafai lo tatou Faaola e faasino atu mafaufau o le au soo i le mea moni e tatau ona maliu o ia ma toe tu mai, ae sa finagalo foi o ia e aoao i latou e le oo mai le malo seia alu ese o ia ma toe foi mai. E faatatau i lona faasatauroga, na ia fetalai ai, “Afai ou te siitia aʻe mai le lalolagi, ou te tosina mai tagata uma ia te aʻu. Na fetalai o ia i lenei mea e faailoa ai le ituaiga o oti e oti ai o ia. Ona tali mai lea o tagata ia te ia, Ua matou faalogo i le tulafono, e tumau Keriso e faavavau; a e faapefea ona e faapea mai, E tatau ona siitia aʻe le Atalii o le tagata? O ai lenei Atalii o le tagata?”38
GSAM 67.1Ina ia atili faamauina i mafaufau o le au soo le mea moni e alu ese o ia ma toe foi mai, a o lei faatumauina lona malo i le lalolagi, na ia fetalai ai, “Le fanau iti, e toe itiiti lava ona ou faatasi ai lea ma outou. E outou saili mai ia te aʻu; e pei ona ou fai atu i Iutaia, O le mea ou te alu i ai, e le mafai ona outou o i ai; o lea foi ou te fai atu ai nei ia te outou.... Ona fai atu lea o Simona Peteru ia te ia, Le Alii e, o fea e te alu i ai? Ua tali atu Iesu ia te ia, O le mea ou te alu i ai, e le mafai ona e mulimuli mai nei; a e te mulimuli mai mulimuli ane.”39 Ona ia faamalosiau lea i o latou loto popole ma faanoanoa i upu nei: “Aua le atuatuvale o outou loto: tou te talitonu i le Atua, ia outou talitonu foi ia te aʻu. E tele mea e nonofo ai i le fale o loʻu Tamā; ana leai, po ua ou taʻuina atu ia te outou. Ou te alu e saunia se mea e nonofo ai outou. Afai foi ou te alu ma saunia se mea e nonofo ai outou, ou te toe sau, ma ou talia outou ia te aʻu lava; ina ia i ai outou i le mea ou te i ai.”40
GSAM 67Le Faataoto i le Alii Mamalu
GSAM 67.2Na toe taumafai le Faaola e faasaʻo le manatu sese o le a faaali vave mai le malo, e ala i le faataoto lenei a o latou o aʻe ma le au soo i Ierusalema: “Na alu atu se alii mamalu i se nuu mamao, ina ia maua ai e ia le malo mo ia lava, ona toe foi mai ai lea. Ua valaau atu o ia i ana auauna e toasefulu, ma tuuina atu ia i latou mina e sefulu, ua faapea atu ia te i latou, Ia outou fai pisinisi seia ou sau.... Ua oo ina toe foi mai o ia, ua maua le malo, ona ia poloai atu lea ia valaauina mai ia te ia na auauna na ia tuuina atu i ai le tupe, ina ia iloa e ia le aofaʻi o mea ua maua e tagata taitoatasi i lana fefaatauaiga.”41 I lenei faataoto, ua faaataina e le Alii o ia lava i le alii mamalu. Sa tatau ona alu o ia i se nuu mamao—i lona Tamā—ma maua ai le malo, ona toe foi mai lea e pule.
GSAM 68.1I le tali atu i le fesili a le au soo, “O le ā le faailoga o lou toe afio mai, ma le gataaga o le lalolagi?”42 na tuuina atu e le Faaola ia i latou se lisi o mea e tutupu i le vaitaimi atoa o le puapuaga tele o le a oo mai i le ekalesia, faapea ma faailoga manino o le a tutupu. A faaalia ia mea, ona latou iloa lea ua latalata lona afio mai, ua oo lava i faitotoa, ma o le tupulaga na vaai i ia mea e lē mavae ese mai le lalolagi seia oo mai o ia.43
GSAM 68Ua Tuua o Ia e Soo Uma
GSAM 68.2E ui i aoaoga uma na tuuina atu e Keriso i aposetolo e uiga i lona maliu ma lona faamaasiasiina, ae sa matuā lē mafai ona latou malamalama i le upu moni na ia aoaoina ai i latou e uiga i lona tofotofoga ma lona faasatauroga. Sa matuā vaivai lo latou malamalama i le upu moni, o lea ina ua oo mai le tofotofoga, na oti ai lo latou faamoemoe, ma latou “tuua o ia ma sosola.”44 E oo lava ia Peteru, o Peteru e matuā maelega pea, o lē na tautino ma le mautinoa, afai e tuua o ia e tagata uma, e lē tuua lava e ia, na ia faafitia lona Alii i ni nai itula mulimuli ane, ma tautō e faapea e lē iloa e ia le tagata. Sa faanenefu lo latou malamalama i le fetalaiga a le Alii, e toe tu mai o ia mai le oti i le aso lona tolu talu lona faasatauroga, ma latou fesili ma felafolafoai, “o le ā le uiga o le toe tu mai i ē ua oti.”45 Ioe, sa leai so latou faatuatua, o lea ina ua maliu o ia ma tuu lona tino i le tuugamau fou o Iosefa, sa latou saunia mea e atualala ai lona tino. Ua mou atu le faamoemoe—ua tanumia faatasi ma Keriso i le tuugamau—o se aso Sapati faapefea lea mo le au soo! Ua mamafa o latou loto i le faanoanoa ma le lē fiafia, ma ua leai se Faaola alofa mutimutivale ma agalelei, o lona soifuaga sa tumu i galuega o le agalelei ma le alofa mutimutivale, e latalata mai e faamafanafana ma faamalosia i latou; pagā le tuufua o lo latou tulaga!
GSAM 69Mea Ofoofogia i le Taeao o le Toetū
GSAM 69.1Ua tafa mai le taeao o le aso muamua o le vaiaso! Pagā se vevesi i le lagi ma le lalolagi! Ua alu ifo se agelu malosi mai le mamalu i le tuugamau o Iosefa, ma le feau e poloai ai le Atalii o le Atua ina ia tulai. “Faauta foi, sa tupu le mafuie tele; auā na alu ifo le agelu a le Alii mai le lagi, ua sau ma fuli ese le maa mai le faitotoa, ona nofo ai lea i luga. Sa pei o le uila ona foliga, ma sa sinasina ona ofu e pei o le kiona; ona o le matataʻu ia te ia, sa gatete ai leoleo, ma ua pei ai o tagata ua oti.”46 “E toatele tino o le au paia na momoe na toe tutū mai, ma ua o mai i fafo mai tuugamau ina ua mavae lona toetū, ua ulu atu i le aai paia, ma ua faaali atu i le toatele.”47 Mafaufau i nei tagata asiasi i Ierusalema, ua tutu i faitotoa o a latou uō, ma le feau ua toe tu mai Keriso na faasatauroina mai le oti, ma ua toe faaolaina foi i latou e lona mana, ina ia molimau i lona toetū. Pagā le gaoioi o le au soo ma fafine paia—ua taufetuli solo e taʻu le tala fiafia, “Ua toe tu mai o ia mai le oti, auā ua matou vaai ma talanoa ma ia!”
GSAM 69Ua Savali Iesu i le Nuu i Tua
GSAM 69.2“Faauta foi, na o atu i lea lava aso ni tagata se toalua o i latou i le nuu itiiti ua igoa ia Emau, e tusa ma le onosefulu o le fua mamao mai Ierusalema [maila e fitu ma le afa]. Ua la talanoa foi i nei mea uma ua oo mai. Ua oo ina talanoa ma fefinauaʻi i laua, ona faalatalata mai lea o Iesu lava ia, ma la savavali faatasi. A ua pupuni o la mata, ina ia la lē iloa o ia. Ona fetalai atu lea o ia ia te i laua, O ā ia talanoaga o loo outou faia i le tasi ma le isi a o outou savavali ma faanoanoa? O le tasi o i laua, o Kaleopa le igoa, ua tali atu ma faapea mai ia te ia, O oe ea na o se tagata ese i Ierusalema, ua e lē iloa mea ua tutupu ai i ona po nei? Ona ia fetalai atu lea ia te i laua, O ā mea? Ua la fai atu ia te ia, O mea e uiga ia Iesu le Nasareta, o le perofeta o lē ua malosi i galuega ma upu i luma o le Atua ma tagata uma; ma ua tuuina atu o ia e le au ositaulaga sili ma o tatou alii ia faasalaina i le oti, ma ua latou faasatauroina o ia. A o i matou, sa matou faamoemoe o ia lea e faaolaina ai Isaraelu; ae faaopoopo i nei mea uma, o le aso lona tolu lenei talu ona faia ia mea. Ioe, o nisi fafine o la matou vaega ua faateʻia i matou, o ē na vave oo i le tuugamau; ina ua latou lē maua lona tino, ona o mai lea ma faapea mai, ua latou vaai foi i se faaaliga o agelu, ua faapea mai o loo soifua o ia. Ua o atu foi nisi o i matou i le tuugamau, ua iloa ai e pei lava ona fai mai fafine; a o ia, ua latou lē iloa.”
GSAM 70.1“Ona fetalai atu lea o ia ia te i laua, O tagata valea e tuai o outou loto ona talitonu i mea uma ua fai mai ai le au perofeta! E lē tatau ea ona tigaina Keriso i ia mea, ma ulu atu i lona mamalu? Ua amata ia Mose ma perofeta uma, ona faamatala atu lea e ia ia te i laua i Tusitusiga Paia uma o mea e uiga ia te ia lava.”48 A o sauni o ia e taumamafa faatasi ma i laua, na ia tofitofi le areto ma faafetai, “ona pupula ai lea o o la mata, ma la iloa ai o ia.... Ona la fai ane lea o le tasi i le isi, E leʻi mū ea o tatou loto i totonu ia i tatou, a o fetalai mai o ia ia i tatou i le ala, ma faamalamalama mai ia i tatou Tusitusiga Paia?”49
GSAM 70.2O lea la, ua mafai nei e le au soo ona iloa, ina ua atoatoa ona faamaonia atu ia i latou le mataupu, sa i ai le maliu ma le toetū e fesootaʻi ma le galuega a le Faaola. Ae faapefea ona latou manatu i le mataupu o lona malo?
GSAM 70.2“Na ia faaalia o ia lava o loo soifua ina ua mavae ona puapuaga, i faamaoniga e tele e lē mafai ona sese; sa vaaia o ia e i latou i aso e fasefulu, ma fetalai atu i mea e uiga i le malo o le Atua; ina ua faapotopoto faatasi ma i latou, ona ia poloai atu lea ia aua neʻi o ese mai Ierusalema, a ia faatali i le folafolaga a le Tamā, ua ia fetalai mai, Ua outou faalogo i ai ia te aʻu. Auā na papatiso Ioane i le vai, a e papatisoina outou i le Agaga Paia i ni nai aso e lē umi.”
GSAM 71Pe E te Toe Faafoisia Nei le Malo?
GSAM 71.1“Ina ua faapotopoto faatasi i latou, ona latou fesili atu lea ia te ia, ua faapea, Le Alii e, pe e te toe faafoisia nei le malo ia Isaraelu? [o lona uiga, Ua matou iloa ua tatau ona e faasatauroina ma toe tu mai i le oti, e tusa ma Tusitusiga Paia; ae e te lē toe faafoisia ea le malo i le taimi nei?] Ona fetalai atu lea o ia ia te i latou, E lē tatau ona outou iloa taimi po o tau, ua tuuina e le Tamā i lana lava pule. A e maua e outou le mana, pe a oo mai le Agaga Paia i luga ia te outou; e fai foi outou ma molimau ia te aʻu i Ierusalema, ma Iutaia uma, ma Samaria, e oo lava i le tuluʻiga o le lalolagi. Ina ua fetalai atu o ia i ia mea, a o latou vaavaai, ona siitia aʻe lea o ia, ma ua ufitia o ia e le ao mai o latou mata. A o latou pulatoa atu i le lagi a o alu aʻe o ia, faauta foi, ua tutū mai ni tagata se toalua ua oofu i ofu sisina; ua la fai atu foi, Tagata o Kalilaia e, se ā le mea ua outou tutū ai ma pulatoa i le lagi? O Iesu lava lenei ua aveeseina mai ia te outou i le lagi, e faapea foi ona toe afio mai o ia, i le uiga lava e tasi ua outou iloa ai o alu aʻe o ia i le lagi.”50
GSAM 71E Tumau Iesu i le Lagi Seia Oo i le Toe Faafoisia
GSAM 71.2O lenei ua tuua e le Faaola i latou, ma ua latou iloa moni o ia “ua alu aʻe i le mea sa i ai muamua,” ua latou maua ai le faamautinoaga o le a aoaoina i latou e le Agaga Paia e uiga i le taimi e oo mai ai le malo. O lea, i ana aoaoga i tagata, na fetalai ai Peteru ina ua maua le Agaga, “E auina mai e ia Iesu Keriso, o lē na muai folafolaina atu ia te outou; o lē e tatau ona talia e le lagi seia oo i taimi o le toe faafoisia o mea uma, ia na fetalai mai ai le Atua e ala i fofoga o ana perofeta paia uma talu ona faavaeina le lalolagi.”51
GSAM 71.3Na tuuina atu foi i le aposetolo o Peteru e le Agaga Paia mea moni e uiga i lalolagi e tolu: Muamua, o le lalolagi sa i ai a o lei oo mai le lolo, na faaumatia i le vai; lona lua, o le lalolagi o loo i ai nei, ua teuina mo le afi—o le afi lea ua teu ai le lalolagi, e pei ona faitauina i le Lomiga Toe Iloiloina—o le afi lea o le a aumaia ai le malaia, le faatafunaga, ma le faaumatia o tagata amioleaga; lona tolu, o le lalolagi fou, “e mau ai le amiotonu”; po o le faaliliuga a nisi, “e nonofo ai ē amiotonu.”52
GSAM 72.1Na faailoa mai e le aposetolo o Paulo le toetū o tagata o le Atua, ma le suiga o ona tagata paia uma mai le tino e oti i le tino e lē oti, “i le emo o le mata, i le pū mulimuli.” Na ia taʻu atu i Korinito o loo i luga nei Keriso o le nofoalii o lona Tamā, ma o le a tumau ai o ia seia tuuina atu ona fili uma i lalo o ona vae. O lona uiga, seia tuuina atu e le Tamā le malo—lona malo—i ona aao, e pei ona valoia i le Tanielu 7:13-14; Salamo 2:8-9. I le ekalesia i Tesalonia, na ia tuuina atu ai le afio mai o Keriso ma le toetū o ni o latou faamoemoe e tasi, ma o le faamafanafanaga moni lea pe a vavaeeseina ē pele ia i latou e le lima o le oti.53
GSAM 72E Lē Manino le Taimi e Toe Foi Mai ai le Alii
GSAM 72.2E oo mai i lea taimi, e leʻi maua e le ekalesia se iloa manino i le taimi e toe foi mai ai le Alii. Ina ua fetalai le aposetolo i lana tusi muamua i Tesalonia, “O i tatou o ē o loo ola ma totoe, o le a aveina aʻe,” sa malamalama uso o lona uiga o le a afio mai Keriso a o ola pea nisi o i latou. I lana tusi lona lua, na ia faasaʻoina ai lo latou manatu sese i lana tusi, ma taʻu atu ia i latou e “lē oo mai lena aso, seia muamua ona oo mai le liliuese, ma faaalia mai le tagata o le agasala, o le atalii o le malaia; o lē e tetee ma faamaualuga o ia lava i luga aʻe o mea uma ua taʻua o le Atua, po o mea ua tapuaʻi i ai.”54
GSAM 72Le Liliuese
GSAM 72.3O loo tuua pea le ekalesia e saili lona ala i le pogisa e uiga i le taimi o le toe afio mai lona lua o Keriso. Ua iloa e uso e tatau ona oo mai le liliuese; peitaʻi, o le ā le umi e tumau ai, o le fesili lea. Mulimuli ane na tuuina atu le tali ia Ioane a o i ai i le faaaliga i le motu o Patamo, i faailoga o loo i mataupu e sefululua ma le sefulutolu o le Faaaliga—“taimi, taimi, ma le afa,” “masina e fasefulu ma le lua,” ma “aso e afe lua selau ma le onosefulu” (tausaga); a o lea, e leʻi tupu le mea e faailogaina ai le amataga o lea vaitaimi umi. O lea sa faamoemoe ma faatali pea le ekalesia mo le afio mai o Keriso, e aunoa ma le iloa mautinoa o le taimi tonu o lona faaali mai; auā a mavae lea taimi o le puapuaga, o le a totoe pea sina vaitaimi o tauiviga ma le manumalo mo le ekalesia o ē na totoe.55
GSAM 73.1Ina ua faaiʻu faamaumauga o le Feagaiga Fou, ua manino ona tuuina mai i o tatou luma le mataupu o le toe afio mai lona lua o Keriso. E tusa ma le fuaiupu e tasi mai fuaiupu e tolusefulu e taʻua ai i se isi auala le toe afio mai lona lua o lo tatou Alii o Iesu Keriso. E uiga i lenei mea, ma le tulaga o le ekalesia e faatatau i lea faamoemoe i augātupulaga seia oo mai i ona po nei, na tusia ai e Robert Patterson, D.D., i se nusipepa ua taʻua o le Interior, i lalo o le ulutala “Le Faamoemoe Amuia,” e faapea:—
GSAM 73Le Afe Tausaga Faalelalolagi—Patterson
GSAM 73.2“Ina ua tuua e lo tatou Alii lana ekalesia i le lalolagi e alu i le Tamā, sa ia tuua o ia i se tulaga faanoanoa. Sa siʻomia ona soo e lima selau e le lalolagi atoa o ona fili, ua faatulagaina i lotu ma malo e tetee ia Keriso e se tasi o atamai silisili, ua faaosofia i le loto leaga sili ona oona, ma ua aʻoaʻoina e le poto masani o augātupulaga i auala sili ona aogā e faaumatia ai. E leʻi valea le Alii i lo tatou tulaga lamatia; e leʻi faaitiitia foi e ia i ana lauga mulimuli le feitagaʻi o le lalolagi ma le puapuaga o le ekalesia, pe folafola mai se faaitiitia o ia mea. Ae na ia folafola mai o le a toe foi mai o ia lava e faatoilalo ona fili, ma o le a ia lagolagoina i tatou seia oo i lea aso manuia. ‘E ʻinoʻino le lalolagi ia te outou. E oo mai le puapuaga ia te outou i le lalolagi. Tou te tagi ma auē, a e olioli le lalolagi. Tou te faanoanoa, a e liua lo outou faanoanoa i le olioli.... O lenei ua outou faanoanoa, a e toe vaai atu aʻu ia te outou, ona olioli ai lea o outou loto, e lē mafai foi e se tasi ona aveesea lo outou olioli. Afai ou te alu ese, ou te toe sau, ma talia outou ia te aʻu lava, ina ia i ai outou i le mea ou te i ai.’”
GSAM 74.1“O le faamoemoe amuia lena o lona toe afio mai o ia lava na ia faamafanafanaina ai lana ekalesia ina ua alu ese o ia lava. I le vaitaimi atoa o lona toesea, na ia fetalai ai e tatau ona tatou onosaʻi i puapuaga; ma ua faapea lava ona oo mai. Afai tatou te maua se vaitaimi o le filemu i fafo i lona toesea, afai e laveaʻiina lana ekalesia mai osofaʻiga a le lalolagi, afai e i ai se vaitaimi o le mamā e lē tutupu ai vao leaga i totonu o saito, pe afai foi i lona afio mai e talia o ia e tagata o se lalolagi ua tumu i le mamalu o le Alii, pe mafai foi ona ia maua le faatuatua i le lalolagi, o le a avea lena ma mea e matuā faateʻia ai o ia. E leʻi iloa e Iesu lenei afe tausaga. Matou te faapea atu e leʻi iloa e ia, auā na te leʻi taʻuina mai ia i matou; ma ua ia fetalai, ‘Ua ou taʻua outou o uō, auā o mea uma na ou faalogo ai i loʻu Tamā, ua ou faailoa atu ia te outou.’ Ae i ana lauga ma ana faataoto uma, e leai se faailoga itiiti e tatau ona tatou faamoemoe ai i se vaitaimi o le filemu po o le mamalu a o lei oo mai o ia. E faapea foi ona lē iloa e aposetolo se afe tausaga e aunoa ma Keriso. Mo le tolu selau tausaga talu ona tuua e lo tatou Alii, o le faamoemoe amuia o le ekalesia o le faamoemoe i lona toe foi mai.”
GSAM 74.2“Ae ina ua agaʻi atu lana liliuese na valoia, na amata ai e le tamaitai faaipoipo a Keriso ona faamāfanafanaina o ia lava i lona toesea e ala i le faauō ma tupu o le lalolagi; o le mea lea, na ia liliu ese ai ona mata mai le lagi i sasaʻe ma le toe foi mai o lona Alii, lea e faaiʻuina ai lona mamalu faalelalolagi. Ina ua tuu e le ʻAu Toefuataʻi le pu o le tala lelei i o latou gutu ... na tafiesea loa miti o se afe tausaga e aunoa ma Keriso, ... ma toe amata ai ona vaavaai le ekalesia mo le afio mai o le Alii e faaumatia le aneti-Keriso.... I a latou tusi, lauga, ma tautinoga o le faatuatua, na folafola ai e le ʻAu Toefuataʻi lo latou faamoemoe i le afio mai a o lei oo i le afe tausaga.”
GSAM 74.3“Ua faaiʻuina e le Fono a Westminster la latou tautinoga i se faailoaga o lo latou faatuatua i le toe afio mai o le Alii, i upu e matuā faailoa ai le faatuatua o ē e talitonu i le afio mai a o lei oo i le afe tausaga. Ua latou folafola i upu mamafa nei: ‘E finagalo Keriso ia tatou talitonu ma le mautinoa e i ai le aso o le faamasinoga, ina ia taofia ai tagata uma mai le agasala, ma ia atili faamafanafanaina ai ē amio Atua i o latou puapuaga; o lea foi ua ia finagalo ai ia lē iloa e tagata lea aso, ina ia latou lafoai le mautinoa faaletino ma mataala pea, auā latou te lē iloa le itula e sau ai le Alii; ma ia saunia pea e faapea atu, Sau ia, le Alii e Iesu; ia vave sau!’56
GSAM 75.1“Na faamalosia loto o o tatou augātamā o le Toefuataʻiga i lo latou vaavaai mo le afio mai o le Alii, ma faamalosiau le tasi i le isi i le alaga, ‘Ia outou taofi le fanua! auā o loo afio mai o ia ma ʻau e toatele e fesoasoani,’ o se manatu ua aofia talu ai nei i se pese lauiloa o le toe faaolaolaina, ae sa masani ai le au tagata Tausi Feagaiga tuai o Sikotilani.”
GSAM 75.2“E leʻi umi ae oo mai le liliuese lona lua mai le faatuatua i totonu o ekalesia na toe fuataʻiina. Sa taʻua i Sikotilani o le Moderatism; i Egelani o le Arianism, ma mulimuli ane o le Broad Churchism; i Amerika sa faaigoaina o le Unitarianism; ma i Siamani o le Rationalism. Ua faatūina le mafaufau faaletagata e fai ma faamasino, ma lo tatou matauina faatapulaaina o ona po nei e fai ma molimau, ma ua teena ai e mafai ona tupu se mea seʻi vaganā e tusa ma le gasologa o tulafono o le natura ua matauina; o lea na faaitiitia ai Iesu i le tulaga o se rapi Iutaia, sa muamua teisi atu i lona taimi, ae e matuā lē masani i le saienisi faaonapo nei. O le mea moni, o le manatu e toe foi mai se tagata faapea mai le lalolagi e lē vaaia e pule i le lalolagi, na toe tuuina atu lea i tala faafagogo a Eperu.”
GSAM 75Daniel Whitby e Uiga i le Afe Tausaga
GSAM 75.3“Sa faamatalaina folafolaga o lona toe afio mai ma lana pule i le lalolagi e faapea, ua na o le salalau atu o lana tala lelei, ma le gauaʻi atu o se vaega tele o le lalolagi i le Faa-Kerisiano mo se vaitaimi e afe, po o le manatu o nisi, e 360,000 tausaga; i lena vaitaimi e agaʻi ai tagata i luma i tomai o le aganuu, ma olioli i le filemu ma le manuia e leʻi faatusalia. I le faaiʻuga o lea taamilosaga umi, ua telē tele e lē mafai e le mafaufau masani ona vaai atu i lona isi itu, atonu e tupu ai se lūlū tele o le natura, ona faapea mai lea ua sau le Alii e faaumatia le lalolagi ma valaau le fanau a tagata i le faamasinoga. O lenei manatu na atiaʻe ma faalauiloaina e se tagata faamatalaupu Egelani e igoa ia Whitby [na maliu Daniel Whitby i le 1726], o lē ua faamaonia i ana tusi na lomia o se Arian, ae o ana faamatalaga sa lauiloa i lana lava vaega, ma o lana afe tausaga faafagogo sa talia ma le fiafia e le toatele o tagata sa maua penisione ma sa taofi i le talitonuga masani, ma uō o ekalesia a malo i Europa, o ē na folafolaina i ai se vaitaimi umi o sefuluaʻi ma mamalu. O lo latou aafiaga na aumaia ai lea manatu i Amerika, lea na vave faaaogā ai e fai ma mataupu mo faaupuga ma faaiʻuga lauga i luga o tulaga.”
GSAM 76.1O manatu faapena sa i vaega eseese o le lalolagi a o tatou latalata atu i le taimi na auina mai ai e le Alii le lapataiga mamalu o lona afio mai, e oo lava “i faitotoa.”
Notes
- Kalatia 4:4, 5. ↩
- Roma 16:25-27. ↩
- Efeso 3:3-9. ↩
- O Lē ua Naunau i ai Tupulaga, itulau 29, 30-34. ↩
- Luka 2:26. ↩
- Luka 2:28-38. ↩
- Luka 3:15-17. ↩
- Ioane 1:29-34. ↩
- Mataio 3:16, 17. ↩
- Ioane 10:41. ↩
- Luka 3:23. ↩
- Luka 4:16-21. ↩
- Mareko 1:15. ↩
- Galuega 10:38; Ioane 3:2. ↩
- Ioane 14:8-11. ↩
- O Lē ua Naunau i ai Tupulaga, itulau 215. ↩
- Luka 7:19-22; Mataio 11:4. ↩
- Mataio 4:17. ↩
- Mataio 10:7. ↩
- Luka 10:9. ↩
- Ioane 7:46. ↩
- Mataio 12:23. ↩
- Mataio 13:54, 55. ↩
- Ioane 10:24. ↩
- Ioane 6:15. ↩
- Ioane 6:62. ↩
- Mataio 16:20-22; Mareko 9:31. ↩
- Mataio 16:28; Luka 9:27. ↩
- 2 Peteru 1:16-19. ↩
- Mataio 17:22, 23. ↩
- Mataio 18:1; Mareko 9:33, 34. ↩
- Mataio 19:27, 28; Luka 22:28-30. ↩
- Mataio 20:20-24. ↩
- Ioane 11:47, 48. ↩
- Ioane 12:15. ↩
- Ioane 12:19. ↩
- Luka 19:40. ↩
- Ioane 12:32-34. ↩
- Ioane 13:33-36. ↩
- Ioane 14:1-3. ↩
- Luka 19:11-15. ↩
- Mataio 24:3, ↩
- Mataio 24; Luka 21; Mareko 13. ↩
- Mareko 14:50. ↩
- Mareko 9:10. ↩
- Mataio 28:2-4. ↩
- Mataio 27:52-53. ↩
- Luka 24:13-27. ↩
- Luka 24:31-32. ↩
- Galuega 1:6-11. ↩
- Galuega 3:20-21. ↩
- 2 Peteru 3:5-13. ↩
- 1 Tesalonia 4:13-18. ↩
- 2 Tesalonia 2:3-4. ↩
- Faaaliga 12:17. ↩
- Tautinoga o le Faatuatua, Mataupu 33, vaega 3. ↩