Mataupu 8 — Le Tausamiga o le Faaipoipoga a le Tamai Mamoe
GSAM 134.1“Na faia e le tasi tagata le tausamiga tele, ma vala'aulia ai tagata e to'atele; ona ia auina atu lea o lana auauna i le itu aso o le tausamiga e fai atu ia i latou na vala'aulia, Inā o mai ia; auā ua uma nei ona saunia mea uma.”1
GSAM 134.2“Amuia i latou ua vala'aulia i le tausamiga o le faaipoipoga a le Tamai Mamoe.”2
GSAM 134.3O le taumafataga o le afiafi o le taumafataga mulimuli lea o le aso. I lenei fa'ata'oto e tolu vala'au i le taumafataga o le afiafi. E lē tatau ona fenumia'i lenei fa'ata'oto ma vala'au i le “taumafataga o le aoauli” o loo ta'ua i le Mataio 22:1-7. O le “taumafataga o le aoauli” o le taumafataga lea i le tutonu o le aso. I le fa'ata'oto e uiga i vala'au i le taumafataga o le aoauli, tatou te iloa ai sa “faileagaina” ma fasiotia i latou na avatu le vala'au, ma sa fasiotia fo'i le atali'i o le tupu. O le tupu na auina atu le vala'au na “faaumatia ia tagata fasioti tagata, ma susunuina lo latou 'a'ai.”
GSAM 134.4O lenei fa'ata'oto i vala'au i le “taumafataga o le aoauli,” o loo fa'aalia ai le i'uga o i latou na muamua teena le vala'au, na fetaui lelei e fa'atusa ai le mea na o'o moni lava ia i latou na teena le tala lelei a Keriso, ma fasiotia o ia ma ana aposetolo. Na auina atu e le Ali'i 'autau e fa'asaga i lea nu'u, ma na latou “faaumatia ia tagata fasioti tagata, ma susunuina lo latou 'a'ai”—o Ierusalema lea.
GSAM 134Le Vala'au i le Taumafataga o le Afiafi
GSAM 134.5E lē masalomia o lenei vala'au i le taumafataga o le afiafi i le fa'ata'oto e fa'asino i le “tausamiga o le faaipoipoga a le Tamai Mamoe.” Ua ta'ua le manuia o i latou ua vala'aulia i lea “tausamiga o le faaipoipoga.” E mulimuli le tausamiga o le faaipoipoga i le faaipoipoga. E tupu le faaipoipoga a le Tamai Mamoe a o le'i afio mai o ia; auā, e pei ona ua uma ona tatou va'ai i ai, pe a afio mai Keriso i le i'uga, o le a ia “fo'i mai le faaipoipoga.”3
GSAM 135.1O lenei vala'au i le tausamiga o le faaipoipoga, o lea la, e tatau ona tutusa ma le fe'au a le agelu muamua o le Fa'aaliga 14, ma le folafolaga o le taimi o loo i le mataupu e sefulu, lea ua uma ona ta'ua. E pei ona tusia e Luka, o lenei ulua'i vala'au i le taumafataga o le afiafi e alu atu “i ē na vala'aulia.” O ai i latou sa vala'aulia?—O i latou na fa'alogo ma talia le tala lelei a Keriso. Ua latou ta'utino mai latou te alolofa ia Keriso, ma naunau i lona toe afio mai lona lua o le fa'ataunu'uga atoatoa o lo latou fa'amoemoe. Aiseā e lē muamua alu atu ai le vala'au ia i latou? E pei ona tatau ona mua'i ta'uina atu le tala lelei i tagata Iutaia o ē sa i ai Tusitusiga Paia, ma sa fai mai o loo latou fa'atalitali i le afio mai o le Mesia,4 sa fa'apea fo'i ona muamua avatu le fe'au o le toe afio mai lona lua o Keriso ia i latou na fai mai o ona so'o i latou, ma o loo latou naunau i lona fa'aali mai.
GSAM 135Le Vala'au ia i Latou na Mua'i Vala'aulia
GSAM 135.2O le ulua'i vala'au i le taumafataga o le afiafi, talu ai e mo i latou na mua'i vala'aulia, e tatau ona alu atu i ekalesia. O le mea moni lava, na faia le folafolaga o le lata mai o le afio mai o Keriso i ekalesia, mai le tausaga e 1833 e o'o i le tautotogo o le 1844, ma sa lagolagoina tele e faife'au o na ekalesia. O le ulua'i lomiga a William Miller o ona manatu i le lata mai o le afio mai o Keriso sa i se nusipepa Papatiso i Brandon, Vt. O ana galuega ma galuega a ana uō faigaluega se'ia o'o ia Aperila, 1844, sa tele lava ina faia i fale o ekalesia po o maota na maua e ala i ekalesia o na aso.
GSAM 135.3O le saunoaga lenei a Toeaina Himes e uiga i galuega a Toeaina Miller se'ia o'o i le tautotogo o le 1844:
GSAM 135.3“Sa galue o ia i vaega uma ma lotu eseese, e aunoa ma le fa'alavelave i a latou fa'alapotopotoga po o a latou tulafono fa'ale-ekalesia, auā sa talitonu o ia e mafai e tagata o ekalesia eseese ona tumau i o latou tulaga, ma sauniuni ai fo'i i le taimi e tasi mo le afio mai o lo latou Tupu.”
GSAM 135.4A o tautala Toeaina Himes i a la'ua galuega fa'atasi ma Toeaina Miller, na ia toe fa'apea mai: “O le to'atele o faife'au ma ekalesia na tatalaina o latou faitoto'a ia i matou ma o matou uso sa folafola atu le a'oa'oga o le toe afio mai, sa galulue fa'atasi ma i matou se'ia o'o i le tausaga mulimuli”—o le tausaga lea e 1844.
GSAM 136Faitoto'a ua Matala mo le Fe'au
GSAM 136.1E uiga i lana galuega ma lona uiga, na fai mai Wm. Miller:
GSAM 136.1“Ua tatalaina faitoto'a mo a'u e folafola atu ai lenei a'oa'oga o le toe afio mai lona lua o Keriso i le toetoe o lotu uma, ma ua na o sina vaega itiiti lava o vala'aulia ua mafai ona ou talia.... I nofoaga uma sa ou alu i ai, o tagata o ekalesia e sili ona amioatua, tuuto ma ola i le fa'atuatua, e vave lava ona latou talia manatu ua fa'apea ona folafolaina; a o lē ua na ona ta'utino i le fa'atuatua ae ua fa'alelalolagi, o le Faresaio, o lē ua loto ma'a'a i ona talitonuga, o lē fa'amaualuga, fa'asausili ma manatu fa'apito, e tauemu ma faifai i le a'oa'oga o le toe afio mai lona lua o Keriso.”
GSAM 136.2E uiga i le uiga o le fe'au o le toe afio mai, e mafai fo'i ona ta'ua ai le mea na fai mai ai D’Aubigné e uiga i le Toe Fuata'iga,—Sa “fa'ataunu'uina i le igoa o se mataupu faavae fa'aleagaga. Sa folafola atu o lana faia'oga o le afioga a le Atua; o le ala o le faaolataga o le fa'atuatua; o ana auupega o le Agaga Paia: ma o ia lava mea na ia teena ai mea uma fa'alelalolagi.”
GSAM 136Se Galu Malosi o Fa'afouga Fa'aleagaga
GSAM 136.3O le uiga o fa'afouga fa'aleagaga na mulimuli i le folafolaina o le fe'au o le toe afio mai ua fa'amatalaina fa'apenei e L. D. Fleming, le faife'au o le ekalesia Kerisiano i le auala o Casco, i Portland, Maine:—
GSAM 136.4“O le naunau na fafaguina e ana lauga [a Wm. Miller] e matuā mafaufau lelei ma to'afilemu, ma e ui lava o le fa'afouga fa'aleagaga aupito sili lea ua ou va'ai i ai, ae e aupito itiiti ai le oso fa'afuase'i o lagona. E foliga mai e sili ona a'afia ai tamāloloa o le nu'u. O le mea lenei ua tupu ai lea a'afiaga: e na o le ave lava e Uso Miller o le pelu a le Agaga, ua se'i ese mai lona faamoega ma ua lē ufitia, ma fa'ae'e lona mata ma'ai i le loto ua lē ufitia, ona tipi ai lea! E na o le pau lava lena. I luma o le mata o lenei auupega malosi, e pa'ū ai le lē talitonu, ma magumagu ai le a'oa'oga e faaolaina tagata uma. E mou atu fa'avae pepelo, ma ofo ai le 'au fa'atau'oa o Papelu. I lo'u manatu, atonu o le mea lenei ua sili ona latalata i fa'afouga fa'aleagaga i ona po o le 'au aposetolo, i mea uma ua va'aia i ona po nei.”
GSAM 137Se Mea na Tupu i Richmond, Me.
GSAM 137.1Ina ia fa'aalia le galuega o le fa'afouga fa'aleagaga na ō fa'atasi ma le tala'iga o le a'oa'oga o le toe afio mai, o le a tatou sii mai le lipoti a se tasi na auai ma le filigā i lea gaoioiga. A o tautala i se fonotaga fa'alekuata na faia i Richmond, Me., sa fai ma sui o ekalesia Papatiso o le Filifiliga Sa'oloto e tolusefulu, ua ia fai mai:—
GSAM 137.2“Ina ua ou ulu atu i le fale tapua'i, na tula'i Toeaina Rollins, o lē sa nofo i tafatafa o le pulela'a i le isi pito o le fale, ma fai mai, ‘Uso White, o loo i ai lou nofoa iinei i o'u tafatafa.’ Ina ua uma le lauga, na tu'uina atu le avanoa e fai ai ni upu, ona ou tautala lea ma le sa'oloto e uiga i le olaga Kerisiano, ma le manumalo o ē amiotonu i le toe afio mai lona lua o Keriso. E tele leo na alalaga mai, ‘Amene! amene!’ ma sa fetagisi le to'atele i lea fa'apotopotoga tele.... Ina ua lata ina uma lea fonotaga, ina ua maua la'u maliega, na tula'i Toeaina Rollins ma fai mai: ‘O Uso White, o lē o nofo i lo'u itu taumatau, o le a lauga i le fale tapua'i o Reed i lenei afiafi, e uiga i le toe afio mai lona lua o lo tatou Ali'i o Iesu Keriso. Inā o mai ia, uso e, e fa'alogo ai outou lava. E lava le avanoa e matou te talimālō ai ia te outou uma. Inā o mai ia, uso e, e lē afāina se tasi o outou i le fa'alogo i lenei mataupu....’ Sa ia iloa lelei lava o le to'atele o ona uso o le a tu'ua la latou fonotaga i le nu'u, ae malaga atu i maila e tolu e fa'alogo ia te a'u, ma o le a lē mafai ai ona fa'aauau le latou fono fa'atulagaina mo mataupu tau galuega. Ma sa fa'apea lava ona tupu. Na tu'ua le fonotaga e le tolu kuata o faife'au ma toetoe o sui uma, ma sa tumu le fale tapua'i o Reed a o le'i tuai le afiafi. O la'u mataupu o le Mataio 24. Na foa'i mai e le Agaga o le Atua le sa'olotoga tele ia te a'u. Sa matuā ofoofogia le naunau o tagata.
GSAM 137.3“A o ou fa'ai'u i se apoapoa'iga i Kerisiano ia tuuina atoatoa atu i latou lava i le Atua ma ia saunia, ma i tagata agasala ia sa'ili ia Keriso ma sauni mo le afio mai o le Atali'i o le tagata, na o'o mai le mana o le Atua ia te a'u i se tulaga na tatau ai ona ou u'u le pulela'a i o'u lima uma e lua e lagolago ai lo'u tino. O se itu aso e matuā pa'ia. A o ou va'ai i le tulaga o tagata agasala, ua leiloloa e aunoa ma Keriso, na ou vala'au atu ia i latou ma loimata, ma toe fai atu i ni taimi se tele, ‘Inā sau ia Keriso, le tagata agasala e, ina ia faaolaina oe pe a fa'aali mai o ia i lona mamalu. Inā sau ia, le tagata agasala malaia e, a o le'i tuai. Sau ia, le tagata agasala e, le tagata agasala malaia e, sau ia.’”
GSAM 138.1“Sa matuā pa'ia ma mata'utia le si'osi'omaga o lea nofoaga. Sa fetagisi faife'au ma tagata, o nisi na fetagisi leotetele. I le i'uga o vala'au ta'itasi i le tagata agasala, sa fa'alogoina ai le mapuitigā i le fa'apotopotoga atoa. Ua silia ma le lua itula o o'u tū e fa'amatalaina le mataupu ma apoapoa'i atu, ma ua amata ona vaivai lo'u leo. Na ou taofi la'u tautala, ma ou tagi leotele ona o na tagata pele, ma se lagona loloto e na o lē ua vala'auina e le Atua e tala'i lana upu moni i tagata agasala e iloa. Ua tā le iva, ma a tu'uina atu le avanoa i isi e tautala ai, o le a fa'aauau ai le fonotaga se'ia o'o i le vaeluaga o le po. Sa sili ona fa'ai'u a o loloto pea lagona o lena taimi, ae fa'ato'ā faia pe a maua e tagata uma le avanoa e filifili ai e tū i le itu a le Ali'i. Ona ou vala'au lea ia tutū i luga i latou uma i le fa'apotopotoga o ē fia auai ma a'u i le tatalo, ma i latou o ē manana'o e avatu i luma o le nofoāli'i o le alofa mutimutivale, ina ia latou sauni e feiloa'i ma le Faaola ma le olioli i lona toe afio mai lona lua. Sa tutū tagata ta'ito'atasi uma i lena fale tele, e pei ona fa'ailoa mai ia te a'u mulimuli ane e tagata sa i vaega eseese o le fale. Ina ua uma se taimi puupuu o le tatalo, ona fa'ai'u lea o le fonotaga.
GSAM 138.2“O le taeao na sosoo ai na ou toe fo'i ai i le nu'u, fa'atasi ma tagata e lē itiiti ifo i le fitu vae valu o tagata o lena fonotaga fa'alekuata a le ekalesia Papatiso o le Filifiliga Sa'oloto. Sa ta'u atu e tagata uma le mamalu o le fonotaga na latou auai ai i le afiafi na muamua atu.
GSAM 138Vala'aulia mo le Fe'au i Isi Nofoaga
GSAM 138.3“I le taimi o le mālōlōga, na vala'aulia a'u e sui ma faife'au e fai fa'atasi ma i latou ni fuafuaga mo le taimi e mafai ai ona ou lauga i fa'apotopotoga eseese o lena fonotaga fa'alekuata, o ē sa i ai ni fale tapua'i vateatea. O le ogatotonu lea o Fepuari, ma sa manatu e lē sili atu i le ono vaiaso o totoe e mausalī ai le kiona e feoa'i ai i ta'avale fa'ase'e, ma maua ai e tagata se avanoa lelei e auai ai i fonotaga. Na filifilia nofoaga e sefululua e sili ona tāua mo la'u galuega i vaiaso e ono. Sa tatau ona ou tuuina atu lauga e sefulu, ma o lea sa mana'omia ai ona ou tautala fa'alua sefulu i le vaiaso. O lea sa na o le 'afa aso i vaiaso ta'itasi na totoe mo a'u, ma e masani lava ona ou iloa e mana'omia tele lea taimi e malaga ai i maila e sefululima po o le lua sefulu i le isi nofoaga o fonotaga.”5
GSAM 139Ua Liua Tagata e Faitau Selau
GSAM 139.1Sa mulimuli atu fa'afouga fa'aleagaga ma le liua o tagata e faitau selau i nofoaga uma na tala'iina ai le a'oa'oga o le toe afio mai, aemaise lava ina ua latou latalata atu i le i'uga o le tausaga Iutaia e 1843 (Mati 21, 1844). O le taumalulu lea na muamua fa'alogo ai le tusitala i lea mataupu i lona lava nu'u—o Victor, N.Y.—ma e ui lava sa na o le sefululua ona tausaga, na ia talia le fa'atuatua i le toe afio mai lona lua, e tusa ma mea na ia malamalama ai. Sa matuā loloto ma pa'ia le a'afiaga i tagata, e lē gata i fonotaga, ae i so o se nofoaga. I lena taimi o Victor ua na o se nu'u e tusa ma le lua selau tagata, ae sa to'atele tagata na nonofo i nu'u i tua sa si'omia ai. O le fua o lena fa'asologa o fonotaga sa faia i lena nu'u itiiti, sa lipotia mai ai le liua o tagata e lima selau.
GSAM 139Le Molimau a le Tusi Fa'aletausaga a le Lotu Metotisi
GSAM 139.2E uiga i le galu malosi o fa'afouga fa'aleagaga na mulimuli i le folafolaga o le toe afio mai, tatou te maua i le Tusi Fa'aletausaga a le Lotu Metotisi e fa'apea, “i tausaga e fa mai le 1840 i le 1844, sa liua tagata e 256,000 i Amerika.” O le mea sa tupu i Amerika sa fa'apea fo'i ona tupu i isi atunuu sa avatu i ai le vala'au. “Sa ō fa'atasi le mana malosi ma le tala'iga, ma sa liua agaga i so o se mea.” A o alu atu le ulua'i vala'au i le tausamiga o le faaipoipoga i ekalesia,—“o ē na vala'aulia,”—sa fa'asalalau atu e ala ia i latou i tagata uma o ē fia o mai ma tofusia i le faaolataga o loo fa'atali mo tagata o le Atua. Pe sa tala'iina le fe'au, pe sa tuuina atu i tatalo, pe sa usuina i “pese o le toe afio mai,” sa ō fa'atasi le galuega ma le gaoioiga malosi a le Agaga o le Atua.
GSAM 140Tamaiti o loo Tala'i i Suetena
GSAM 140.1I lenei mataupu o le a tatou va'ai ai i le auala na galue ai le Ali'i e fa'aofi atu le folafolaga i na atunuu sa fa'asāina ai e le tulafono le tala'iina o so o se mea e fete'ena'i ma le “ekalesia aloa'ia a le malo.” O Suetena o se tasi o na atunuu. O i inā na fa'aaogā ai e le Ali'i tamaiti laiti e amatalia le galuega. O le ulua'i fa'aaliga o lenei mea sa i le taumafanafana o le 1843, i Eksjö, i le itu i saute o Suetena. O se teineitiiti, e na o le lima ona tausaga, e le'i a'oa'oina lava e faitau pe pese, na ia usuina sa'o i se tasi aso, ma le matuā fa'aaloalo, se pese umi a le lotu Luteru, ona ia folafola atu lea ma le mana tele, “ua o'o mai le itu aso o lana fa'amasinoga,” ma apoapoa'i atu i le aiga ina ia sauni e feiloa'i ma le Ali'i; auā ua toeitiiti ona afio mai lea o ia. Na vala'au atu i le Atua tagata o le aiga e le'i liua, ia alofa mutimutivale mai, ma sa latou maua le fa'amagaloga. Sa sosolo lenei gaoioiga mai lea 'a'ai i lea 'a'ai, a o folafola atu fo'i e isi tamaiti le fe'au. Sa va'aia fo'i lenei lava gaoioiga i tamaiti i nisi vaega o Nouei ma Siamani.
GSAM 140“Ioe! Sa Tatau Ona Ou Tala'i”
GSAM 140.2I le 1896, a o ou faia ni sauniga i nofoaga eseese e sefulu ma le fitu i Suetena, sa ou ui atu i ni nofoaga na tala'i ai tamaiti i le 1843. Sa ou maua ai le avanoa e talanoa ai ma ē na fa'alogo i na tala'iga, fa'apea fo'i ma ni tamāloloa na tala'i a o tamaiti i latou. Sa ou fai atu i se tasi o i latou, “Sa e tala'i le fe'au o le toe afio mai a o e tamaitiiti?” Na tali mai o ia, “Tala'i! Ioe, sa tatau ona ou tala'i. E lē o a'u na fuafuaina lea mea. Na oo mai se mana i o'u luga, ma sa ou tautala atu i mea na fa'amalosia a'u e lea mana e tautala atu ai.”
GSAM 140O Boquist ma Walbom i Örebro, Suetena
GSAM 140.3I le itumalo o Örebro na salalau atu ai lenei galuega se'ia oo ina uuna'ia fo'i tagata matutua e folafola atu le fe'au. Ona pu'eina lea e ta'ita'i o le malo, i le fa'aoso a ositaulaga o le “ekalesia aloa'ia a le malo,” o ni taulele'a se to'alua: o Walbom, e sefulu ma le valu ona tausaga, ma Ole Boquist, e sefulu ma le lima ona tausaga. Sa latou fai mai o le a fa'asalaina i la'ua e fai ma lapata'iga i luma o tagata uma. Sa latou sasaina o la tua e aunoa ma ni ofu i lala o le la'au Betula, ona tu'uina lea o i la'ua i le falepuipui i Örebro, ma o la manu'a o loo tafe ai le toto. Ina ua pē ia manu'a, sa latou ave i la'ua i fafo o le falepuipui ma fesili atu, “Pe lua te tu'u ea le tala'iina o lenei a'oa'oga?” E ui lava ina latou toe sasaina i la'ua i la'au, ma toe matala ai o la manu'a, ae na pau lava le tali na latou maua, “O le a ma tala'i atu le tala'iga ua poloai mai ai le Alii ia te i ma'ua.” Ona o le talosaga a se tama'ita'i iloga o le aulotu i Örebro, na fai atu ai le Tupu o Oscar I i ta'ita'i o le malo ia tatala i tua ia taulele'a mai le falepuipui, ma ia tu'u pea na tagata. O lea na maua ai le manumalo mo le upu moni i Suetena.
GSAM 141O le Molimau a Boquist
GSAM 141.1I le Review and Herald o le aso 7 o Oketopa, 1890, o loo iai se tala e matuā mata'ina e uiga i le tala'iga a tamaiti, na tusia e O. Boquist lava ia. Ua ia fa'apea mai:—
GSAM 141.2“I le tausaga e 1843 na tupu ai se gaoioiga fa'alelotu i tagata o le aulotu o Karlskoga, i le itumalo o Örebro. O ta'ita'i o lenei gaoioiga o ni tamaiti ma ni taulele'a, o ē na ta'ua o ‘rapare.’ Na latou tala'i ma le mana mai le Atua, ma folafola atu i luma o tagata ma le matuā maumaua'i ua oo mai le itu aso o le fa'amasinoga a le Atua.
GSAM 141.3“I le tau e to'ulu ai lau o la'au o lea lava tausaga, o a'u, O. Boquist, e sefulu ma le lima o'u tausaga i lena taimi, fa'atasi ma se isi taule'ale'a, o Erik Walbom, e sefulu ma le valu ona tausaga, na matuā uuna'ia i ma'ua e lenei mana e lē vaaia, ma sa lē mafai lava ona ma teena. O le taimi lava na maua ai i ma'ua e lenei mana mai le lagi, na amata ai ona ma tautala atu i tagata ma folafola atu ma le leo tele ua oo mai le itu aso o le fa'amasinoga, ma fa'asino i latou i le Ioelu 2:28-32 ma le Fa'aaliga 14:6, 7.”
GSAM 141O Tamaiti i le Fa'aaliga
GSAM 141.4Na ta'u mai e tagata ia te a'u, o ē na fa'apea ona uuna'ia e lenei mana mai le lagi, sa lē toe iloa se mea i o latou tafatafa. Sa latou iai moni lava i se fa'aaliga mai le Atua, ma sa latou tautala atu ma se mana na matuā fa'atalitonuina ai loto o tagata. Sa latou fai mai o nei tamaiti laiti, a o i lalo o lena uuna'iga, sa tautala atu ma le malosi ma le mamalu o tamāloloa ma fafine matutua. O lea na manatu ai ē na vaaia nei mea, o le Alii lava lea na fa'aaogāina i latou e pei o perofeta e tautala atu i nei upu moni mamalu. Ua faaauau mai le tusitala:—
GSAM 142.1“Sa potopoto mai tagata e to'atele e fa'alogo mai ia i ma'ua, ma sa faaauau a matou sauniga i le ao atoa ma le po. O le i'uga, na tupu ai se fafaguina tele fa'alelotu. Na ootia loto o talavou ma tagata matutua e le Agaga o le Atua, ma latou alalaga atu i le Alii mo le alofa mutimutivale, ma ta'utino a latou agasala i luma o le Atua ma tagata.
GSAM 142.2“Ae ina ua logoina le ositaulaga o le ekalesia i lenei mea, sa faia taumafaiga e tele e fa'afilemu ai i ma'ua, ina ia taofia ai le faagaeetia fa'alelotu na salalau atu. Peita'i, sa lē aogā taumafaiga uma. Ona talosagaina lea o le leoleo sili ia pu'eina i ma'ua, ma i vaiaso e ono sa sa'ilia ai i ma'ua i le togavao na ma sosola atu i ai e sulufa'i ai, ae lē maua.
GSAM 142.3“Peita'i, mulimuli ane sa poloa'iina i matou ia tutū i luma o le faife'au o le ekalesia. Ua fa'ateleina lo matou faitau aofa'i, o lea na tutū atu ai taulele'a ma teine talavou e to'afasefulu i le fale o le faife'au, lea na faia ai se fa'amasinoga umi o i matou. Sa fa'ataga tagata uma e toe fo'i i o latou aiga, se'i vaganā a'u ma Walbom; ae na pu'eina i ma'ua, ma o le aso na sosoo ai sa tu'uina ai i ma'ua i le falepuipui i Örebro. O iina sa tu'u fa'atasi ai i ma'ua ma tagata gaoi i le potu 14, e peisea'ī ua ma faia se solitulafono matuiā.”
GSAM 142O le Molimau a le Tuafafine o Boquist
GSAM 142.4I le aso 22 o Setema, 1896, sa auai ai le tuafafine o Boquist, e fitugafulu ma le lua ona tausaga, i la matou sauniga i Örebro, ma ta'u mai ia i matou mea na oo i lona tuagane; auā sa ia molimauina lona sasaina, lona fa'afalepuipuiina, ma lona fa'asa'olotoina. Sa ia usuina mo i matou le pese na usuina e Boquist ma Walbom a o la savavali mai i fafo o le falepuipui ma aga'i atu i le alalaupapa i luga o le utu vai na si'omia ai lena 'olo o le senituri lona sefulu ma le ono, lea sa fa'aaogāina e fai ma falepuipui i le 1843. Sa iai fa'atasi ma le molimau ma le usuina o le pese le mana o le gaoioiga o le 1843. O le pese lenei, e pei ona fa'aliliuina i le gagana Peretania:—
GSAM 143O le Pese na Usuina e Boquist ma Walbom
GSAM 144O le Tama Tala'i i Karlskoga
GSAM 144.4Sa fa'amatala mai e se tamāloa i Örebro ia te a'u se mea na tupu i Karlskoga, lea sa nofo ai o ia i le 1843. Na ia fa'apea mai:—
GSAM 144.5“O se tamaitiiti e valu ona tausaga, e le'i a'oa'oina lava e iloa ona faitau mata'itusi, na amata ona tala'i atu le fe'au, ma ta'ua le tele o mau o le Tusi Paia. Sa fai mai tagata, ‘Ua matuā tumu lena tama i le Tusi Paia.’ Na tupu lenei mea ina ua uma ona saunoa le Tupu o Oscar e lagolago i ē sa sauāina, o lea sa lē mafai ai e le ositaulaga o lea nofoaga ona ave le tama i luma o le fa'amasinoga e taofi ai le galuega. Ae na ia fai atu i tagata ia aumai le tama i ona luma, ma o le a ia fa'aalia lona tulaga moni, ma fa'ailoa atu ia i latou lona lē iloa o le Tusi Paia.
GSAM 144.6“I luma o le motu o tagata, na tatala ai e le ositaulaga lana tusi pese, ma fai atu i le tama e faitau atu mo ia. Na tali mai le tama, ‘Ou te lē iloa faitau.’ Ae na ia liliu atu lona tua i le ositaulaga ma usu sa'o le pese mai le amataga se'ia oo i le i'uga, a o tilotilo le ositaulaga i le tusi ma le ofo tele. Na fai atu le ositaulaga i le tama, ‘E foliga mai ua e iloa mea uma.’ Na tali le tama, ‘E leai. E lē o taimi uma e fa'atagaina ai i matou e ta'u atu mea uma ua matou iloa.’
GSAM 145.1“Ona tatala lea e le ositaulaga le Feagaiga Fou ma fai atu i le tama, ‘Faitau mai mo a'u i lenei tusi.’ Na tali mai le tama, ‘Ou te lē iloa faitau.’ Na fesili atu le ositaulaga, ‘O le ā la se mea e te iloa e uiga i le Tusi Paia?’ O lana tali, ‘Ou te iloa le mea o iai se mau o loo iai le upu ma e sefulu ma le fa ona ta'ua.’ Na fai atu le ositaulaga, ‘Leai! E leai se mau fa'apea i le Tusi Paia.’ Na fai mai le tama, ‘Fa'amolemole, pe e te faitauina mai mo a'u le Fa'aaliga 18:13?’ Na tali atu le ositaulaga, ‘Ioe.’ A o ia faitauina, sa faitau e tagata le aofa'i o ia upu, ma e moni lava, e sefulu ma le fa taimi na iai le upu ma. Sa aofia fo'i i na taimi e sefulu ma le fa le ‘fusifusia o agaga o tagata.’ Na alalaga tagata, ‘Ia! Ia! Ua sili atu le iloa e le tama o le Tusi Paia nai lo le ositaulaga!’ Ona o lona matuā māsiasi, na tu'u ai e le ositaulaga lea mataupu, ma e le'i toe fa'alavelave i tagata talu mai lena taimi.”
GSAM 145.2O lea, e fa'amaonia e le Alii lana afioga i fofoga o tamaiti, ma o lenei auala ofoofogia na ia aumaia ai lana upu moni i taliga o tagata o ē na fa'asā e a latou tulafono le tala'iina o se isi a'oa'oga, se'i vaganā le a'oa'oga a le “lotu aloa'ia a le malo.”
GSAM 145O Meaalofa a le Agaga e Fesoota'i ma le Fe'au
GSAM 145.3E lē na o Suetena na fetalai atu ai le Alii i lona nuu e ala i meaalofa a lona Agaga, i le fesoota'iga ma le gaoioiga o le toe afio mai. I Sikotilani, i Egelani, fa'apea fo'i ma Amerika, ua a'oa'oina e le Alii lona nuu e ala i fa'aaliga fa'apitoa.
GSAM 145O Fa'aaliga a William Foy
GSAM 145.4I le tausaga e 1842 sa nofo ai i Boston, Mass., se tamāloa sa lelei lona a'oa'oina, e igoa ia William Foy, o lē sa poto i le tautala. O ia o se tagata o le Lotu Papatiso, ae sa sauni e fa'au'uina e avea ma faife'au o le Ekalesia Epikopale. Ona o lona alofa tunoa, na tu'uina atu ai e le Alii ia te ia ni fa'aaliga se lua i le tausaga e 1842, o le tasi i le aso 18 o Ianuari, a o le isi i le aso 4 o Fepuari. Sa manino fa'amaoniga o nei fa'aaliga o ni fa'aaliga moni lava a le Agaga o le Atua. Sa valaauina o ia mai lea nofoaga i lea nofoaga e tautala i pulela'a, e lē gata e tagata o le Ekalesia Epikopale, ae fa'apea fo'i e tagata o le Lotu Papatiso ma isi lotu. Pe a tautala o ia, sa ofu pea o ia i le 'ofu talaloa o le faife'au, e pei ona ofuina e faife'au o lena ekalesia i a latou sauniga.
GSAM 146.1Sa fa'atatau fa'aaliga a Foy i le lata mai o le afio mai o Keriso, o le malaga a le nuu o le Atua i le aai fa'alelagi, o le lalolagi fou, ma le mamalu o le tulaga o ē ua togiolaina. Ona sa lelei lona fa'aaogāina o le gagana ma lelei lona tomai e fa'amatala manino ai mea, sa ia fa'agaeetia ai tagata i so'o se mea na alu i ai. Ona o vala'aulia, sa alu ai o ia mai lea aai i lea aai e ta'u atu mea ofoofogia na ia vaaia. Ina ia maua se avanoa mo le motu o tagata e to'atele na potopoto e fa'alogo ia te ia, sa maua ai ni maota tetele, ma o iina sa ia fa'amatala atu ai i le faitau afe o tagata mea na faaalia ia te ia e uiga i le lalolagi fa'alelagi, o le matagofie o Ierusalema Fou, ma 'au o agelu. Pe a ia tautala umi e uiga i le alofa agamalu ma le mutimutivale o Keriso i tagata agasala pagatia, sa ia apoapoa'i atu i ē e le'i liua ia sa'ili i le Atua, ma e faitau sefulu i latou na tali atu i ana aioiga mālū.
GSAM 146O le Fa'aaliga o Fa'asitepu e Tolu
GSAM 146.2Sa faaauau lana galuega se'ia oo i le tausaga e 1844, ina ua latalata i le i'uga o aso e 2300. Ona toe foa'iina mai lea ia te ia o se isi fa'aaliga a le Agaga Paia,—o lona fa'aaliga lona tolu, o se fa'aaliga sa lē malamalama i ai o ia. I lenei fa'aaliga na faaalia atu ai ia te ia le ala o le nuu o le Atua e oo atu i le aai fa'alelagi. Na ia vaaia se tulaga tele, po o se fa'asitepu, na potopoto ai le anoanoa'i o tagata. Mai lea taimi i lea taimi e pa'ū ifo ai se tasi ma ui atu i lenei tulaga ma lē toe vaaia, ma e uiga i sea tagata sa fa'apea mai ai ia te ia, “Ua liliu ese mai le fa'atuatua.” Ona ia vaaia lea o tagata o aga'i a'e i se fa'asitepu lona lua, po o se tulaga, ma o iina fo'i na pa'ū ifo ai nisi ma ui atu i le tulaga ma lē toe vaaia. Mulimuli ane na aliali mai ai se tulaga lona tolu, e oo atu i faitoto'a o le aai paia. Na potopoto fa'atasi se motu tele ma ē na aga'i atu i lenei tulaga. Ona sa ia fa'amoemoe o le a afio mai le Alii o Iesu i se taimi lata tele, sa ia lē iloa ai e tatau ona sosoo mai se fe'au lona tolu pe a uma le fe'au muamua ma le fe'au lona lua o le Fa'aaliga 14. O lea sa lē mafai ai e ia ona fa'amatalaina le fa'aaliga, ma sa ia tu'u ai le tautala i luma o tagata. Ina ua mavae le i'uga o le vaitaimi fa'avaloaga, i le tausaga e 1845, sa ia fa'alogo ai i se isi o fa'amatala le fa'aaliga lava lea, fa'atasi ma le fa'amatalaga e fa'apea, “ua uma ona tu'uina atu le fe'au muamua ma le fe'au lona lua, ma o le a sosoo mai se fe'au lona tolu.” E le'i umi talu mai lenei mea, ae ma'i Foy ma maliu ai.
GSAM 147.1O ia fa'aaliga o le mana o le Atua, fa'atasi ma le tala'iina o lona afio mai ua “i faitoto'a,” ma le olioli o le faitau afe o tagata o ē na liliu ese mai le agasala e auauna i le Alii ma fa'atalitali i lona afio mai, na atili fa'alua ai le mautinoa o tagata o le fe'au moni lava lenei a le Alii i le lalolagi.
GSAM 147.2Ae na oo mai le aso 21 o Mati, 1844, ma mavae atu, ae le'i afio mai le Alii. Peita'i, o le talitonuga o ē na tuuto atu ma mafaufau loloto, sa latou gaoioi e tusa ma le finagalo o le Alii, ma o le taimi tatau o le a fa'amalamalamaina ai mea uma.