Mataupu 23 — Fa'alapotopotoga o le Soifua Maloloina
GSAM 358.1“Le pele e, e sili i mea uma ona ou mana'o ia manuia oe ma ia e soifua maloloina, e pei ona manuia o lou agaga.”1
GSAM 358.2I le aso Sapati, Iuni 6, 1863, na auai ai le Toeaina White ma lona faletua i se fonotaga i fale'ie na faia e Toeaina Cornell ma Lawrence i Otsego, Michigan. O i inā na tuuina atu ai iā Mrs. White se fa'aaliga na faailoa atu ai iā te ia le mataupu o le toe fuata'iga o le soifua maloloina. Na amata mai i lenā taimi ona lomia i le Iloiloga ma le Avefe'au ni tusitusiga e uiga i le soifua maloloina ma le ola e tausia ai le soifua maloloina, ma na amata fo'i ona ia tusia mea na faaalia atu iā te ia e uiga i le soifua maloloina. Na iai nisi o ia mea i le Molimau Nu. 11, ma se tusi ua faaulutalaina, Le Ala e Ola Ai.
GSAM 358.3Na matuā faailoa atu i tagata le mataupu o le ola e tausia ai le soifua maloloina, ma lona sootaga tatau ma le atina'eina o le tino, le mafaufau, ma le agaga. I le Iloiloga ma le Avefe'au o Oketopa 25, 1864, na tuuina mai ai e le Toeaina J. N. Andrews fautuaga tāua nei e uiga i lea mataupu:—
GSAM 358O J. N. Andrews e Uiga i le Ola e Tausia ai le Soifua Maloloina
GSAM 358.4“O le lafoa'i o mea'ai uma e afaina ai, ma le ola faautauta i lalo o le ta'ita'iga a a'oa'oga lelei ma se loto fuatiaifo e amana'ia le Atua, o nisi ia o mea e sili ona tāua mo le soifua maloloina lelei. O o tatou tino o malumalu ia o le Agaga Paia. Ina ia tatou vivii moni atu iā te ia i o tatou tino e pei fo'i o o tatou agaga, e matuā mana'omia lava ona malosi atoatoa tomai uma o o tatou tino! Faafetai i le Atua ona ua faapitoa ona tuuina atu nei lenei mataupu i o tatou tagata. O le soifua maloloina ma le malosi o nisi ia o mea e sili ona tāua iā i tatou, ma e silisili lo la tāua mo i latou o le a molimauina mea tetele e tutupu i le taimi o le puapuaga.”
GSAM 359.1Na lagolagoina le mataupu o le tausiga o le soifua maloloina e tusa ma le Tusi Paia ma le ola faautauta faa-Kerisiano, e lē gata i tusitusiga o le Iloiloga ma le Avefe'au, ae faapea fo'i e a tatou faife'au.
GSAM 359.2I le Fonotaga Aoao, Me 20, 1866, na tuuina mai ai e ala iā Mrs. White le faatonuga lenei (o loo maua fo'i i le Molimau Nu. 11):—
GSAM 359Ia Saunia se Faalapotopotoga o le Soifua Maloloina
GSAM 359.3“Na faaalia mai iā te a'u e tatau ona tatou saunia se nofoaga e nonofo ai ē mafatia, ma i latou e fia a'oa'o i le tausiga o o latou tino ina ia puipuia ai i latou mai ma'i....
GSAM 359.4“Pe a ō mai tagata lē talitonu i se faalapotopotoga ua tuuto atu i le togafitia ma le manuia o faama'i, ma o loo pulea e foma'i e tausi le Sapati, o le a tuuina sa'o atu i latou i lalo o le aafiaga o le upu moni. O le faamasani i o tatou tagata ma lo tatou faatuatuaga moni o le a aveesea ai o latou manatu faaitu'au, ma o le a lelei ai o latou manatu iā i tatou. O le tuuina faapenei o i latou i lalo o le aafiaga o le upu moni, o le a lē gata ina maua ai e nisi le mapusaga mai ma'i o le tino, ae o le a latou maua fo'i se pulu pasama e faamālōlō ai o latou agaga ua mama'i i le agasala.
GSAM 359Valo'aga o I'uga
GSAM 359.5“A o faaleleia le soifua maloloina o ē mama'i i lalo o togafitiga faautauta, ma ua amata ona latou olioli i le ola, e latou te faatuatuaina i latou na fesoasoani e toe maua lo latou soifua maloloina. E tumu o latou loto i le loto faafetai, ma o le a faigofie atili ai ona maua e le fatu lelei o le upu moni se mea e nofo ai i inā, ma i nisi o le a fafagaina, tutupu a'e, ma fua mai ai e viia ai le Atua. E sili atu le tāua o le faaolaina o se agaga faapelepele e to'atasi faapena nai lo tupe uma e mana'omia e faatuina ai se faalapotopotoga faapena....
GSAM 359.6“O nisi e ō ese ua toe malolosi, po ua matuā maua se manuia, o le a avea ma auala e faailoa atu ai lo tatou faatuatuaga i nofoaga fou, ma faatū ai le tagāvai o le upu moni i mea semanū e lē mafai ona ulu atu i ai, pe ana lē mua'i aveesea manatu faaitu'au mai o latou mafaufau e ala i le nonofo mo sina taimi faatasi ma o tatou tagata ina ia maua le soifua maloloina.”
GSAM 360.1Na autasi le palota a o tatou tagata na potopoto, e tatau ona tatalaina se faalapotopotoga o le soifua maloloina i Battle Creek po o se mea lata ane i le vave e mafai ai, ma ia i lalo o le pulega faafoma'i a le Foma'i H. S. Lay. E faaopoopo i ana a'oa'oga faafoma'i muamua, sa ia faaaluina le silia ma le tausaga i se nofoaga o togafitiga i vai i Sasa'e e a'oa'o ai i auala e togafitia ai faama'i i le vai.
GSAM 360Ua Faatauina se Fanua mo se Nofoaga o Togafitiga
GSAM 360.2O le faatuina o se faalapotopotoga faapena i lenā taimi sa foliga mai o se galuega tele; ma ana lē seanoa lenei molimau faamalosiau e uiga i lona i'uga, semanū e faatuai ona amata le galuega. Peita'i, na o ni nai aso talu ona tapunia le fonotaga, ae faatau loa le fale telē o le Faamasino Graves, faatasi ma le fanua e valu eka, o lona nofoaga matagofie lea sa nofo ai i le itu i sisifo o Battle Creek. Na vave ona fausia se vaega faaopoopo e lua fogafale e sosoo ma lenei fale e avea ma potu ta'ele. O fale nei na tatalaina ai le Faalapotopotoga o le Toe Fuata'iga o le Soifua Maloloina.
GSAM 360.3I le Iloiloga ma le Avefe'au o Iuni 19, 1866, na faia ai le ulua'i valaau faalaua'itele e faatau sea i le faalapotopotoga. I le lomiga lava lea o le nusipepa na ta'ua ai ua uma ona folafola mai e ekalesia i Battle Creek, Michigan, ma Olcott, N.Y., le faatauina o sea e $2,625 lona aofa'i, po o sea e 105 e ta'i $25. Talu ai e le'i iai se tulafono i le Setete o Michigan e mafai ai ona faavaeina se faalapotopotoga faaletulafono mo le puleaina o faalapotopotoga o le soifua maloloina, na taofia ai meatotino i lalo o le vaaiga a ē na tofia e tausia mo sina taimi, se'ia mafai ona faavaeina faaletulafono.
GSAM 360Ua Amata se Mekasini o le Soifua Maloloina
GSAM 360.4I le aso muamua o Aokuso na amata ai fo'i e le pulega le lomia o se mekasini faalemasina o le soifua maloloina, e sefulu ono ona itulau ma lona faavaa. Na faaigoaina lenei mekasini o le Health Reformer. O loo faaauau pea lenei mekasini i lalo o le igoa Soifua Maloloina Lelei, ma ua avea nei ma mekasini ta'imua o le soifua maloloina i le lalolagi. E lē gata sa talanoaina i lenei mekasini mataupu faavae o le soifua maloloina ma le ola faautauta, ae sa avea fo'i ma auala e faasalalau atu ai le faalapotopotoga o le soifua maloloina, lea na tatalaina aloa'ia mo tagata mama'i ma ē nonofo ma aai ai i le aso 5 o Setema, 1866. O lea la, na faatauina le faalapotopotoga, faaauupegaina, ma faagaoioia i lalo ifo o le fa masina talu ona mua'i ta'ua lea mataupu i o tatou tagata; ma sa folafola mai le $11,000 e faatau ai sea, o se vaega tele o lea aofa'i ua uma ona totogi.
GSAM 361Ua Faavaeina se Faalapotopotoga Faafoma'i Faaletulafono
GSAM 361.1I le tau mālūlū o le 1866-67 na pasia ai e le Fono Faitulafono o Michigan se tulafono e mafai ai ona faavaeina se faalapotopotoga faaletulafono e pulea le faalapotopotoga o le soifua maloloina. I le Me 17, 1867, na faia ai lea laasaga, na talia tulafono faatonutonu, ma na tuuina atu fanua, fale, ma isi meatotino i tausi mavaega na filifilia tatau. O le aofa'i atoa o tupe na folafola mai e faatau ai sea e oo mai i lenā aso e $26,100; o lea aofa'i ua uma ona totogi ai le $18,264.87. Sa iai i le faalapotopotoga se 'au agavaa o foma'i ma tagata fesoasoani, ma na toeitiiti tumu fale i tagata mama'i. O nisi o i latou ua uma ona talia lo tatou faatuatuaga, ina ua latou iloa i tatou o se nuu ma iloa fo'i le upu moni ina ua ō mai i le faalapotopotoga.
GSAM 361Laei e Tausia ai le Soifua Maloloina
GSAM 361.2I augātupulaga uma ma atunuu uma, e faigofie ona aafia le loto faalenatura o le tagata i le lalolagi, i lona faamaualuga i le olaga, o ana amio valea ma ana tifiga. Sa faapena fo'i le tausaga 1863 i lo tatou lava atunuu, ina ua faaalia atu iā Mrs. White le mataupu o le soifua maloloina ma laei, e pei ona iloa i le matuā naunau o fafine e mulimuli i le tifiga taatele o le ofuina o sakete e faalautele e mama. O le tetele o ia sakete na foliga ai le to'atele o i latou o loo savavali i totonu o se paluni ua faafao i lalo. Pe tusa o le taimi lava lea na alia'e mai ai nisi tifiga e lua ua matuā sopo ai tuaoi i laei, ma na tupu ai le tele o felafolafoa'iga. Atonu o se faamatalaga puupuu e uiga i nei mea o le a saunia ai le tagata faitau e malamalama atili i se molimau na tuuina mai e Mrs. White e uiga i laei, o loo maua i le Molimau mo le Ekalesia, Nu. 10.
GSAM 362Ua Ta'usalaina Laei ua Matuā Sopo ai Tuaoi
GSAM 362.1O le tifiga muamua na sopo ai tuaoi o le ofuina lea o ofu sa faia ma ni si'usi'u e toso i tua, e amata i le sefulu inisi e oo atu i le 'afa iata pe sili atu le umi, e tusa ma le mana'o o lē e ofuina. Sa masani ona tuu e toso i le palapala, ma sa faaigoa e tamāloloa o ‘salu auala.’ O le tifiga lona lua na matuā faafeagai lava, ma sa faia ia latalata i le mea e mafai ai i laei o tamāloloa. Na faaaogā lenei tifiga e i latou na mulimuli atu iā Tama'ita'i Bloomer, o le mea lea na ta'ua ai o le ‘ofu Bloomer.’ Na mulimuli ane suia le igoa i le ‘Laei Amerika.’ Na faia e ē na lagolagoina lenei laei ni tauaofiaga mai lea nofoaga i lea nofoaga, ma na lagolagoina e le to'atele o o tatou Tuafafine lona faaaogāina. Sa ofuina fo'i e nisi.
GSAM 362Se Molimau e Uiga i le Mataupu o Laei
GSAM 362.2E uiga i mea na faaalia atu iā Mrs. White i le mataupu o laei, o le a ou sii maia ni nai parakalafa mai le Molimau Nu. 11:—
GSAM 362.3“O tagata faamaoni o le Atua o le malamalama o le lalolagi ma le masima o le lalolagi, ma e tatau ona latou manatua pea le tāua o lo latou aafiaga i isi. Afai latou te suia le ofu ua matuā umi i le ofu ua matuā puupuu, o le a matuā faaleagaina ai lo latou aafiaga. O le a 'ino'ino ai tagata lē talitonu, o ē ua avea ma o latou tiute le fesoasoani i ai ma taumafai e taitai atu i le Tamai Mamoe a le Atua. E tele faaleleiga e mafai ona faia i laei o fafine mo le soifua maloloina e aunoa ma se suiga tele faapea e tupu ai le 'ino'ino o lē e vaai mai.
GSAM 362Le Laei o le Toe Fuata'iga
GSAM 362.4“E lē tatau lava ona oomi le tino i ofu faamau sulugatiti ma ivi o tafolā e faamau ai ofu. E tatau ona matuā sa'oloto le ofu ina ia mafai ai e māmā ma le fatu ona galulue lelei. E tatau ona oo le ofu i lalo teisi o le pito i luga o le seevae umi, ae ia lava lona puupuu e lē pa'i ai i le palapala o le ala savali ma le auala, e aunoa ma le si'i i le lima. O se ofu e sili atu ona puupuu nai lo lenei e tatau, faigofie, ma lelei mo le soifua maloloina o fafine pe a faia a latou galuega i le fale, aemaise lava i latou e tatau ona faia ni galuega i fafo, pe tele pe itiiti.
GSAM 363Ia Ufiufi Tutusa Vaega o le Tino i Laei
GSAM 363.1“Po o le ā lava le umi o le ofu, e tatau ona ufiufi atoatoa o latou vae e pei o vae o tamāloloa. E mafai ona faia lenei mea i le ofuina o ofuvae e iai ie i totonu, e faapotopoto i se fusi ma faamau faataamilo i tapuvae, po o le faia ia lautele ma faasolosolo ina vaiti i pito i lalo; ma e tatau ona lava lo latou uumi e oo atu i seevae. O vae ma tapuvae ua faapea ona faaofuina e puipuia mai le agi o le matagi. Afai e tausia lelei vaega uma o vae i laei māfanafana, o le a tutusa lelei le tafe o le toto, ma o le a mamā ma maloloina pea le toto, auā e lē faamālūlūina pe taofia i lona tafe masani i le tino.”
GSAM 363.2O le umi o lenei ofu na tuuina mai o se fua talafeagai e tatau ona viia i le va o le ofu e iai lona si'usi'u toso ma le laei Amerika. E le'i faapea mai e tatau i se tasi ona ofuina, ae ia latou lē faia se mea e motusia ai lo latou aafiaga i isi, ma tupu ai le 'ino'ino o i latou e tatau ona latou fesoasoani i ai. E le'i faapea mai e tatau ona latou ufiufi o latou tapuvae i le auala ua faamatalaina i inei, ae e mafai ona faia i lenā auala. Afai e ausia le faamoemoe lava lea i se isi auala, e pei o ofu i totonu e uumi ma ni ufi vae ua lalaga, o le a matuā ōgatasi lava ma lenā molimau.
GSAM 363Manatu e Lima e Mana'omia mo Laei e Tausia ai le Soifua Maloloina
GSAM 363.3O le a mātauina, i le faiga o laei ua fautuaina, e lima manatu e mana'omia mo laei e tausia ai le soifua maloloina, o nei:—
GSAM 363.41. Ia lafoa'i ofu faamau sulugatiti ma mea uma e oomi ai le sulugatiti.
GSAM 363.52. Ia aveese fusi uma i lima po o vae e ono taofia ai le tafe sa'oloto o le toto.
GSAM 364.13. Ia ufiufi tutusa vaega uma o le tino i laei, aemaise lava vae ma tapuvae.
GSAM 364.24. Ia tautau sakete mai tau'au, ma ia aua lava ne'i tuu e tautau mai puimanava i ni fusi.
GSAM 364.35. Le umi o le ofu.
GSAM 364.4O manatu muamua e fa ua lagolagoina nei e foma'i uma e malamalama lelei, ae o le lona lima, ua lafoa'i nei le ofu e iai lona si'usi'u toso faapea ma le ofu ua matuā puupuu.
GSAM 364O le Faletua Jenness-Miller e Uiga i Laei
GSAM 364.5I le tausaga 1890 na fautua mai ai le Faletua Jenness-Miller, mai New York, i le mekasini o laei mo le soifua maloloina sa sili ona faavae i le poto faasaienisi i lenā vaitaimi, ina ia faapuupuu e fafine o latou ofu i sina mea itiiti i lea taimi ma lea taimi, ina ia lē faafuase'i tele le suiga, se'ia oo atu pe tusa ma le pito i luga o le seevae umi o se tama'ita'i,—o le umi tonu lava lea sa fautuaina e le Molimau Nu. 11.
GSAM 364Le Lagolago a le Foma'i Trall
GSAM 364.6I le 1868 na fuafuaina ai le Foma'i R. T. Trall, mai le Kolisi o Togafitiga e Tausia ai le Soifua Maloloina i Florence Heights, N.J., e tuuina atu ni lauga mo le vaiaso e tasi i a tatou faife'au i Battle Creek, Michigan, i le faai'uga o Me. I le taimi o nei lauga sa avea le foma'i ma mālō a le Toeaina White. E le'i auai Mrs. White i lauga, ae talu ai sa alu le foma'i i aso ta'itasi i le taavale solofanua ma le Toeaina White ma lona faletua ma le Toeaina J. N. Andrews, sa malamalama uma i latou e tatau ona ia faalogo i ona manatu e uiga i le tausiga o le soifua maloloina, faama'i ma mea e mafua ai, aafiaga o vailaau, ma isi mea. Sa na ona ia talanoa atu i mea na faaalia iā te ia i le fa'aaliga, ae e le'i ta'uina atu le mea na maua mai ai lona malamalama. Na ta'ua e le foma'i e ōgatasi le poto faafoma'i ma manatu sa ia faailoa atu. Na ta'u mai e le Toeaina Andrews iā te a'u, ina ua faai'u le talanoaga i le aso lona lua, na fesili atu le foma'i iā Mrs. White po o fea na ia faauu mai ai i le poto faafoma'i. Sa ofo o ia ina ua iloa e le'i a'oa'oina lava e ia nei mea, ae sa ia faailoa atu iā te ia mea na faaalia iā te ia i Otsego, Michigan, Iuni 6, 1863. Na ia faamautinoa atu iā te ia e matuā ōgatasi uma ona manatu ma le poto i galuega a le tino ma le tausiga o le soifua maloloina, ma i le tele o mataupu sa loloto atu lona malamalama nai lo le mea na oo i ai lona lava malamalama. Ina ua mavae pe tusa ma le lima aso o ia malaga ma talanoaga, na fia iloa e le foma'i mai le Toeaina White pe aiseā na valaaulia ai o ia e tuua lona kolisi e lauga i faife'au i Battle Creek. Na ia faapea mai, ‘Ua saunia lelei lava Mrs. White e tuuina atu iā i latou faatonuga e mana'omia i le tausiga o le soifua maloloina, e pei fo'i o a'u.’
GSAM 365Ua Faamaonia e le Poto Faafoma'i
GSAM 365.1O ana tusitusiga e tele e uiga i vaega eseese o le tausiga o le soifua maloloina i le olaga i aso faisoo ua tele tausaga o maua e tagata lautele, ma o le tele o na tusitusiga ua tuufaatasia nei i se tusi ua faaulutalaina Le Ola Faautauta Faa-Kerisiano ma le Tausiga o le Soifua Maloloina e Tusa ma le Tusi Paia. O nisi o foma'i e sili ona a'oa'oina ua latou tautino mai, ina ua uma ona su'esu'e ma le faaeteete nei tusitusiga, e matuā ōgatasi lelei le poto faafoma'i ma ia tusitusiga. Mo ia lava, e lē o ni fua o ana su'esu'ega, ae ua na o le tusia o mea na faaalia mai e le Alii iā te ia i le fa'aaliga.
GSAM 365Le Molimau a le Foma'i Kellogg
GSAM 365.2Ina ia molimauina le ōgatasi o su'esu'ega o le poto faafoma'i ma mea na faaalia iā Mrs. White i le fa'aaliga i le 1863, o le a ou sii maia mai le upu tomua o Le Ola Faautauta Faa-Kerisiano ni upu na tusia e J. H. Kellogg, M.D., o lē e faauluulu i ai le nofoaga o togafitiga i Battle Creek, Michigan, ua lauiloa i le lalolagi. Ua ia faapea mai:—
GSAM 365.3“1. I le taimi na ulua'i aliali mai ai tusitusiga ua ta'ua, sa toetoe lava a lē amana'ia le mataupu o le soifua maloloina, e lē gata e tagata na tusia atu i ai, ae faapea fo'i le lalolagi atoa.
GSAM 365.4“2. O nai tagata na lagolagoina le mana'omia o se toe fuata'iga i masaniga o le tino, sa latou faasalalauina, faatasi ma le lagolagoina o mataupu faavae moni o le toe fuata'iga, ni mea sese e matuā manino lava, ma i nisi taimi, e 'ino'ino ai.
GSAM 366.1“3. Sa leai se mea ma leai se tagata na tuuina mai se faaputuga faatulagaina ma le ōgatasi o upu moni o le tausiga o le soifua maloloina, e aunoa ma ni mea sese manino ma e ōgatasi ma le Tusi Paia ma mataupu faavae o le tapua'iga faa-Kerisiano.
GSAM 366.2“O tulaga ia sa iai ina ua aliali mai tusitusiga ua ta'ua. O mataupu faavae na a'oa'oina ai e le'i faamalosia e le pule a le poto faasaienisi, ae na tuuina mai i se auala faigofie ma le tuusa'o e se tasi e lē faafoliga mai o ia e iai se poto faasaienisi, ae o loo ia ta'utino mai e tusitusi o ia i le fesoasoani ma le pule o le malamalama mai le Atua.
GSAM 366Ua Tumau Mataupu Faavae i Tofotofoga
GSAM 366.3“Ua faapefea ona tumau i tofotofoga o le taimi ma mea ua tutupu nei mataupu faavae, na tuuina mai i tulaga uiga ese faapena ma faamatalaga ofoofogia faapena e uiga i lo latou amataga? O se fesili lea e matuā talafeagai ona fesiligia. E maua lona tali i mea moni e mafai ona matuā faamaonia atoatoa.... O mataupu faavae na matuā lē amana'ia pe na avea ma mea e tauemu i ai i le kuata o le senituri ua mavae, ua aga'i filemu atu ma maua ai le faatuatuaina ma le faaaloalogia e tagata lautele, se'ia oo ina matuā galo i le lalolagi e le'i taliaina faapena i taimi uma. O mea fou ua maua e le poto faasaienisi ma faamatalaga fou o mea moni ua leva ona iloa ua faaopoopo pea i faamaoniga, se'ia oo mai i le taimi nei ua matuā lagolagoina mataupu faavae uma ta'itasi na fautuaina i le silia ma le kuata o le senituri ua mavae, i le auala aupito malosi e mafai ai e faamaoniga faasaienisi.
GSAM 366Faamaoniga o le Amataga Faalelagi o Faaaliga
GSAM 366.4“E tatau lava ona manatu i ai o se mea ofoofogia, ma o se faamaoniga manino o le malamalama ma le taitaiga faalelagi, ona o le ogatotonu o aoaoga fenumiai ma feteenai, o loo fai mai e iai le pule a le saienisi ma le poto masani, ae ua faaseseina e manatu soona fai ma ua lē aogā mo le lelei ona ua tele le sese—e tatau ona ioeina o se mea uiga ese, ua mafai ai e se tagata e lē fai mai e iai sona poto faasaienisi po o se aoaoga maualuga ona faatulaga, mai le anoano o manatu fenumiai ma pisia i le sese na tuuina mai e nai tusitala ma tagata mafaufau i mataupu o le soifua maloloina, se tino o mataupu faavae o le tumama e matua fetaui, tumau, ma moni, ua lē mafai e felafolafoaiga, suesuega, mea ua maua, ma le poto masani o le kuata o le senituri ona soloia se mataupu faavae e tasi, ae ua na o le fesoasoani e faamausali ai aoaoga ua aoaoina.” Faamauina le aso, “Battle Creek, Mich., 1890.”
GSAM 367Ua Faalauteleina le Faalapotopotoga o le Soifua Maloloina
GSAM 367.1I lalo o le pulega a J. H. Kellogg, M.D., o lē na fesootai atu i le faalapotopotoga o se fomai sili i le 1876, na iloa ai ua matua tele le manaoga mo togafitiga, o lea i le tautotogo o le 1877 sa tatau ona saunia se isi avanoa. I le 1876 na suia ai le igoa o le faalapotopotoga mai le Inisitituti o le Toe Fuata'iga o le Soifua Maloloina i le Falemai Faafomai ma Taotoga, ma i le 1878 na fausia ai se fale autu fou.
GSAM 367.2O lenei fale e 136 x 46 futu lona telē, e fa fola i luga aʻe o le fogafale i lalo. Sa faamafanafanaina atoa i le ausa ma faamalamalamaina i le kesi. E lei leva talu ona tatala ae toetoe lava a tumu i gasegase ma malo.
GSAM 367.3E oo mai i lena taimi, ua matuā manino le faataunuuina o le mea na valoia i le 1866 i le molimau a Mrs. White e uiga i le faalapotopotoga. Ua toatele ua talia le malamalama o le upu moni o le taimi nei, o ē na muamua tosina atu i lenei nuu ona o lo latou o mai i le faalapotopotoga e saili le soifua maloloina.
GSAM 367Nofoaga o le Soifua Maloloina i Nuu i Tua
GSAM 367.4I le Fa'ailoga o Taimi o Novema 22, 1877, na faailoa mai ai e M. G. Kellogg, M.D., o le uso afa o J. H. Kellogg, ua ia maua se fanua i le itu o Howell Mountain, lua ma le afa maila i matu sasae mai St. Helena, Napa County, Cal., ma ua lata ona ia fausia se fale e faaigoaina o le “Nofoaga o le Soifua Maloloina i Nuu i Tua,” i tafatafa o Crystal Springs. I le taumalulu o le 1877-78 na fausia ai le fale ma tatala mo togafitiga o gasegase i le amataga o le 1878. O lenei nofoaga, e pei o le faalapotopotoga autu, o le falemai i Battle Creek, ua lē gata ina tupu tele, ae ua avea foi ma nofoaga ua aumaia ai le toatele i le iloa ma le taliaina o le feau.
GSAM 368Le Tusi Tausiga o le Soifua Maloloina a le Pasefika
GSAM 368.1O le taumafanafana o le 1885 o se vaitaimi matuā iloga o le alualu i luma i le galuega o le fe'au a le agelu lona tolu. I le aso muamua o Me na tuuina atu ai le Nofoaga o le Soifua Maloloina i Nuu i Tua i St. Helena i le pulega faafomai a se fomai ua faauu aloaia. I Iuni na amata ai le lomiga taʻi lua masina o le Tusi Tausiga Soifua Maloloina Pasefika ma le Fautua o le Faautauta, o se mekasini e 24 itulau i lalo o le vaavaaiga faatonu a Toeaina J. H. Waggoner. O nei auala na aumaia ai le ola fou i le faalapotopotoga o le soifua maloloina; nai lo le gau e pei o tausaga ua mavae, na amata ona faaalia i lea tausaga ma lea tausaga se tupe maua totoe e $2,000 i le $4,000 i le tausaga, seia oo i le tausaga na faaiuina ia Aperila 1891, lea na faaalia ai se tupe maua totoe e sili atu i le $12,000.
GSAM 368.2I le fonotaga a le Nofoaga o le Soifua Maloloina i Nuu i Tua Sosaiete i St. Helena i le 1887, na tuuina mai ai le faamatalaga lenei e uiga i tupe a le faalapotopotoga: I le aso 1 o Me, 1885, e na o le $5,322.76 le tau aogā totoe o le faalapotopotoga, pe $2,547.24 e itiiti ifo nai lo sea uma na tuuina atu e oo mai i lena aso. O lona uiga, ua faaumatia e le faalapotopotoga ana tupe maua uma ma le $2,547.24 o lana tupe faavae. I le aso 1 o Aperila, 1887, o le tau o le faalapotopotoga i luga aʻe o ana aitalafu e $21,372.64, o se siitaga e $16,049.88 i le luasefulu tolu masina. O lenei aofaiga, na ave ai sea e $5,280, ma foai atu i le faalapotopotoga e $2,497.60; o lea, i galuega a le faalapotopotoga, na maua ai se tupe totoe e $8,272.28. I lena taimi na lomia ai le Tusi Tausiga Soifua Maloloina Pasefika o se mekasini faalemasina e 32 itulau ma se faavaa, ma na iloa ai ua sili atu lona aogā i le faalauteleina o mea e fiafia i ai ma mataupu faavae o le faalapotopotoga.
GSAM 369Galuega Alofa
GSAM 369.1I le Misionare Fomai mo Ianuari 1891, a o talanoa e uiga i le Falemai o Battle Creek, na faapea mai ai Dr. J. H. Kellogg:—
GSAM 369.2“O togafitiga alofa na faia i le kuata o le senituri talu ona iai le faalapotopotoga, ua sili atu i le $100,000, e tele taimi e sili atu nai lo le tupe faavae na teuina i le amataga.
GSAM 369.3“E faaopoopo atu i le galuega alofa ua taua, ua auina atu e le faalapotopotoga ni failauga, tausimai, faiaoga i aoga kuka, ma isi tagata ua aoaoina mo ituaiga eseese o galuega faamisionare.”
GSAM 369O se Talosaga mo Fanau Matuaoti
GSAM 369.4I le Fonotaga Aoao, i le aso 8 o Mati 1891, na faia ai e Dr. Kellogg se talosaga matuā faamaoni mo fanau matuaoti. Na ia faapea mai: “Ua ou tofia e avea ma ‘sui usufono mo tagata uma,' ma o le a ou fai ma sui o ē e leai ni sui—o fanau matuaoti, e leai se tasi e tausia i latou.”
GSAM 369Le Meaalofa e $30,000 a Mrs. Haskell
GSAM 369.5I le Misionare o le Aiga mo Ianuari 1892, na faia ai se talosaga malosi mo tupe e fausia ai se fale mo fanau matuaoti. I lena tusi sa iai igoa o i latou na folafola a latou foai mo le fale e $17,716—na manatu i latou na amataina le galuega e laiti tele lea aofaiga mo se galuega tele faapea, o lea na fefefe ai neʻi tuai le faatinoina. Ae o Ia o lē e silafia le iuga mai le amataga, ma e ana le povi i luga o mauga e afe, na faatonutonuina mea ina ia faalogo ai se tamaitai mauoa e lē o lo matou faatuatuaga, o Mrs. Caroline E. Haskell o Chicago, le fafine ua oti lana tane o Mr. Frederick Haskell, i lenei galuega alofa ua fuafuaina, ona ia tuuina loa lea i le komiti faufale le $30,000, ma na o le tasi le tuutuuga: ia faaaogā atoa mo le fausia o se fale mo matuaoti e tusa ma fuafuaga ua uma ona tusia, ia pulea ma le agaga lautele ma le limafoai, ma ia faaigoaina le faalapotopotoga o le Fale Faamanatu o Haskell e faamanatu ai lana tane ua maliu.
GSAM 370.1O tupe ua faapea ona saunia na mafai ai e le Sosaiete Misionare Fomai ma le Agalelei, i lena tausaga, ona fausia ma tatala le fale o fanau matuaoti. Na faapaiaina lenei fale i le aso 25 o Ianuari 1894. Mo le tele o taimi talu mai lena aso, e tusa ma le selau le aofaiga o le aiga, e aofia ai fanau matuaoti, fesoasoani, ma faiaoga.
GSAM 370Le Fale Faamanatu o James White
GSAM 370.2E ese mai i le tausiga ma le lagolagoina o nei fanau matuaoti, o loo pulea foi e lenei faalapotopotoga se isi nofoaga alofa, e faaigoaina o le Fale Faamanatu o James White, lea e tausia ma faamafanafana ai le silia ma le luasefulu tagata matutua ma leai ni fale.
GSAM 370Misionare Fomai
GSAM 370.3I lenei laina o galuega, na faia ai se laasaga malosi atili ina ua amata le aoaoina o misionare fomai. I le viia o lenei taumafaiga mo le siitia o tagata, na faapea mai ai Mrs. White, ina ua ia tusi mai Preston, Ausetalia, i le aso 16 o Setema 1892:—
GSAM 370.4“Maimau pe ana iai le selau o loo aoaoina i le mea ua na o le toatasi nei. E tatau lava ona faapea. E mafai ona sili atu ona aogā alii ma tamaitai o ni misionare fomai nai lo ni misionare e leai se aoaoga faafomai.”
GSAM 370.5Ua matuā faateleina le aofaiga o i latou o loo faia se kosi o aoaoga e sauniuni ai mo le auaunaga i le olaga atoa i lenei ituaiga galuega talu ona tusia le faamatalaga ua taua i luga.
GSAM 370Le Tuputupu Aʻe o le Galuega o le Soifua Maloloina
GSAM 370.6I le Misionare Fomai mo Ianuari 1894, o loo iai se faamatalaga puupuu e faailoa mai ai mea moni tāua e uiga i le tuputupu aʻe o le galuega o le soifua maloloina. O loo faapea mai:
GSAM 371.1“Na faatulagaina le Inisitituti o le Toe Fuata'iga o le Soifua Maloloina i le 1866.... Na faatauina se fale laupapa faigofie, o se fale nofo tumaoti i se nofoaga matagofie ma maloloina i eleele maualuluga o Battle Creek, o se tasi o aai o Michigan o loo tupu. E toalua fomai, toalua tagata tausi taele, tasi le tausimai (e lei aoaoina), tolu pe toafa fesoasoani, tasi le gasegase, ma le anoano o faigata, faatasi ai ma le tele o le faatuatua i le lumanai o le faalapotopotoga ma mataupu faavae na faavae ai—o le amataga lenei o le galuega o loo iai nei. Sa faaigoaina o le Inisitituti o le Toe Fuata'iga o le Soifua Maloloina.
GSAM 371.2“I le nofoaga sa iai le fale laitiiti muamua, ua tu nei se fale e 312 futu le umi ma 100 futu le loloto, e ono fola le maualuga, ma e mafai ona ofi ai malo e tolu selau; ua saunia i meafaigaluega uma e mafai ona fautuaina e le saienisi faaonaponei mo le tausiga ma le toe faafoisia o ē mamaʻi. E toasefulu fomai, o le toatele o i latou o tagata tomai faapitoa i a latou matata, ua avea ma aufaigaluega faafomai. O tausimai ma isi fesoasoani ua avea ma se aiga e silia ma le tolu selau, ma o ē e faaaogāina le faalapotopotoga e mai setete uma o le Iuni, faapea ma malo e toatele mai isi atunuu. E tatala pea ona faitotoa mo le misionare, i le atunuu po o atunuu ese, po o le ā lava lona igoa, ma e seāseā leai se tasi pe sili atu o nei malo i totonu o le aiga.”
GSAM 371Le Falemai o le Fale Faamalolo
GSAM 371.3“Na fausia le falemai i le 1888, o se fale e 100 x 60 futu, e lima fola le maualuga. O fola pito i luga e tolu o le fale e faaaogā mo le matagaluega o taotoga a le falemai, potu o gasegase, ma potu tausi lautele. O ofisa mo galuega alofa a le faalapotopotoga o loo iai foi i inei. E luasefulu fale laiti, o nisi e faamafanafanaina i le ausa ma faamalamalamaina, e pei o le fale autu, i le eletise, ua faapotopoto faataamilo i ai, ma ua tumu i gasegase po o tamaiti aoga. Na faatulagaina se aoga mo le aoaoina o tausimai misionare fomai i le aso 1 o Iulai 1884. I le ono masina muamua, e tolu sefulu lima tamaiti aoga na lesitala.”
GSAM 372Valoaga i le O Atu o Tagata Faigaluega
GSAM 372.1A o talanoa e uiga i le faalapotopotoga o le soifua maloloina i St. Helena, Cal., na faapea mai Mrs. White i se tusi na tusia mai Tramelan, Suitiselani, i le aso 6 o Fepuari 1887:—
GSAM 372.2“Ua fetalai mai le Atua, afai e savavali ma le lotomaulalo ma le usiusitai alii o loo fesootai ma lenei faalapotopotoga, ma faia le finagalo o le Atua, o le a ola ma manuia; ma o le a auina atu ai misionare e faamanuia i isi i le malamalama ua tuuina atu e le Atua ia i latou. O i latou nei, i le agaga o Iesu, o le a latou soloia tupua i mea maualuluga; o le a latou faailoa le talitonuga sese, ma totoina le upu moni, le mamā, ma le paia i nofoaga o loo tausia nei ai na o le sese, le faamalieina o le tagata ia te ia, le lē pulea, ma le amioleaga.”
GSAM 372.3Matou te sii mai nei upu, auā e tutusa lava lo latou malosi pe a faatatau i isi faalapotopotoga faapena.
GSAM 372Ua Folafolaina le Manuia i le Galuega o le Soifua Maloloina
GSAM 372.4I se molimau faapitoa na tuuina atu i le ekalesia i le 1891, ua tatou faitau ai: “O le a malolo le faamanuiaga a le Atua i taumafaiga uma e faia e fafagu ai le fiafia i le toe fuata'iga o le soifua maloloina; auā e manaomia i soo se mea. E tatau ona iai se toe faaolaolaina e uiga i lenei mataupu; auā ua finagalo le Atua e faataunuu mea e tele e ala i lenei auala.”
GSAM 372Le Kolisi Misionare Fomai a Amerika
GSAM 372.5Laasaga ma lea laasaga na alualu ai i luma le malamalama i le auala tonu e togafitia ai ma'i, seia oo ia Iuni 1895, na tupu ai se manaoga mo le faatulagaina o se faalapotopotoga mo aoaoga faafomai. I le tali atu i lenei manaoga, na faatulagaina ai le Kolisi Misionare Fomai a Amerika mo le faamoemoe faapitoa o le aoaoina o fomai e galulue i lalo o le Adventist Aso Fitu Sosaiete Misionare Fomai ma le Agalelei, i galuega i le atunuu ma atunuu ese. Na faia sauniga o le tatalaina i Battle Creek i le aso 30 o Setema 1895, ma na tatala le kolisi i le aso na sosoo ai, Oketopa 1, ma le vasega e fasefulu tamaiti aoga.
GSAM 372.6I le faasilasilaga a le kolisi, ua tatou faitau ai:
GSAM 372.6“Ua resitalaina le kolisi i Chicago i lalo o tulafono a le Setete o Illinois. O le kosi o suesuega o le a matuā atoatoa e pei o kosi a aoga faafomai sili ona lelei i le Iunaite Setete. O aoaoga o le a faia se vaega i Chicago ma se vaega i Battle Creek, Mich.”
GSAM 373.1E uiga i i latou o loo sauniuni mo galuega misionare fomai, ua tatou faitau i le Misionare Fomai o Aokuso 1895 e faapea:
GSAM 373.1“O le vasega o tausimai o loo aoaoina nei i le Aoga Toleniga Tausimai a le Falemai o Battle Creek e sili atu i le 250; o i latou uma ua agavaa nei e galulue i galuega misionare fomai ua tofia i ai se tulaga. E manaomia tausimai mo Atumotu o le Sami i Saute, Initia, West Indies, Amerika i Saute, e luasefulu lima pe tolusefulu mo Setete i Saute o le Iunaite Setete, ma mo o tatou aai tetele.”
GSAM 373Le Tuputupu Aʻe o le Galuega Misionare Fomai
GSAM 373.2I sauniga o le faauuga a le vasega o Tausimai Misionare a le Falemai, na faia i le Tapeneko i le aso 5 o Novema 1895, na faapea mai ai Dr. Kellogg:—
GSAM 373.3“I le sefululua tausaga ua mavae, i se sauniga faapenei, e toalua tausimai na faauu. I le taimi nei, e iai se aufaigaluega e i le va o le tolu ma le fa selau tausimai. E sefuluiva fomai i le falemai, ma le luasefulu lua i faalapotopotoga faapena, e fesootai i se vaega ma le falemai ma i lalo o le vaavaaiga a le Sosaiete Misionare Fomai ma le Agalelei. E limasefulu tolu o tatou tausimai i atunuu eseese—i Suetena, Mekisiko Tuai, Talafatai Auro o Aferika, Ausetalia, Aferika i Saute, Tenimaka, Initia, Niu Sila, Samoa, ma Guiana Peretania. E onosefulu tolu tamaiti aoga faafomai o loo aoaoina nei. E fasefulu tasi o i latou i inei, e luasefulu lua i le Iunivesite o Michigan ma isi aoga. E luasefulu lua tausimai ua faauu i inei i le po nei, ua matuā saunia e o atu o ni tausimai ua faamaonia.”
GSAM 373.4I le sailia o le tuputupu aʻe o a tatou faalapotopotoga o le soifua maloloina e oo atu i le 1902, ua tatou iloa ai o le Falemai o Battle Creek, faatasi ma lana kolisi faafomai ma le aoga mo le aoaoina o tausimai, o le faalapotopotoga e sili ona telē lea o lona ituaiga i le lalolagi e umia e Adventist Aso Fitu.
GSAM 374Ua Susunuina Fale Autu
GSAM 374.1I le po o Fepuari 18, 1902, na susunuina ai le fale autu tele, faatasi ma ana meafaigaluega matagofie, ma le falemai telē. E fa selau gasegase ma malo sa iai i fale i lena taimi, ae e ala i taumafaiga lototoa a fomai, tausimai, ma fesoasoani, ma le puipuiga faapitoa a le Alii, na aveesea uma ai i latou mai fale e aunoa ma ni manuaga matuia.
GSAM 374Le Falemai Fou
GSAM 374.2Ua fausia se isi fale, e sili atu lona telē ma lona malosi nai lo le fale tuai, i le nofoaga sa iai fale tuai. Na faataatia le maa tulimanu o le fale o loo iai nei i le aso 12 o Me 1902, ma na faapaiaina le fale i le aso 31 o Me 1903. Ua faapea mai pule o le faalapotopotoga e uiga i le fale fou, “e mausali ma tumau e pei ona mafai ona faia o se fale i uamea, maa, piliki, ma sima.”
GSAM 374.3“O meafaigaluega o le faalapotopotoga e sili ona faaonaponei, atoatoa, mamā, talafeagai, ma malosi i itu uma, e mafai ona maua; ma ua talitonuina, i lona tulaga ua maeʻa nei, o le Falemai o Battle Creek ua ofoina atu nofoaga ma mea faigofie mo ē mamaʻi e mautinoa e lē sili atu se isi.”
GSAM 374.4“O le sini a pule o le faalapotopotoga o le faapotopotoina lea i se nofoaga e tasi ma i tulaga lelei, o auala fou uma ma meafaigaluega mo le togafitia o ē mamaʻi ua aloaia i vailaau faafomai tonu, ma ia faaaogā na auala i se uiga faamaoni ma le atamai.”
GSAM 374E Tele Falemai e Faavaeina
GSAM 374.5O le malamalama ua tuuina atu i lenei nuu, e finagalo le Alii ia tele falemai e feololo lo latou telē, e salalau i le lalolagi, nai lo le iai o ni nai faalapotopotoga tetele tele. Ua matou fiafia e matauina ua amata le tatalaina o falemai laiti i vaega eseese o le lalolagi, aemaise lava i le sefulu tausaga talu ai. I le Tusi Tausaga o le Fonotaga Aoao mo le 1904, o loo iai se lisi e sili atu i le limasefulu o nei faalapotopotoga laiti.
GSAM 375Lisi o Falemai
GSAM 375.1E ui atonu e manaia le faamatala atu o tulaga na taitai atu ai i le faavaeina o nei nofoaga, ae ona o le utiuti o lo tatou avanoa, e tatau ona tatou faamalieina i tatou i se lisi o atunuu o loo iai ma le aofaiga i atunuu taitasi. I le Iunaite Setete, e 35; Peretania Tele, 3; Siamani, 1; Suitiselani, 1; Tenimaka, 1; Nouei, 1; Suetena, 1; Aferika i Saute, 1; Ausetalia, 2; Niu Sila, 1; Motu o Samoa, 1; Mekisiko Tuai, 1; Initia, 1; Iapani, 1.
GSAM 375Lisi o Potu Togafitiga
GSAM 375.2E ese mai i nei falemai, e luasefulu lua potu togafitiga, e sefulu fitu o i latou i le Iunaite Setete; tasi i Jaffa, tasi i Ierusalema, Palestine; tasi i Guadalajara, Mekisiko Tuai; tasi i Kimberley, Aferika i Saute; ma tasi i Rockhampton, Ausetalia. E faaopoopo atu i nei, e luasefulu ono faleaiga meaʻai fualaau faisua, lea e mafai ai e tagata ona maua meaai tumama, ma maua foi ni aoaoga e tusa ma le auala tatau e ola ai.
GSAM 375.3O nei fuainumera e uiga i le alualu i luma o mataupu faavae o le toe fuata'iga o le soifua maloloina ua faaalia ai le auala e mafai ai e le Alii ona “faataunuu se galuega tele e ala i lenei auala,” e pei ona valoia faalelagi i le 1866; ua faaalia foi, e pei ona valoia i le 1863, le auala e mafai ai e “mataupu faavae o le toe fuata'iga o le soifua maloloina” ona faia sona sao i le “saunia o se nuu mo le liua i le afio mai o le Alii.” Ia faateleina la nei faalapotopotoga o le soifua maloloina e faaselau, ma ia vave ona faataunuu le galuega na tofia ma fuafuaina ai.
Notes
- 3 Ioane 2. ↩