Mataupu 11 — Le Fe'au a le Agelu Lona Lua
GSAM 171.1“Ona mulimuli atu lea o le isi agelu, ua faapea atu, Ua pa'ū, ua pa'ū Papelonia, le aai tele, auā ua ia faainuina atunuu uma i le uaina o le to'asā o lana faita'aga.”1
GSAM 171.2“Ona fetalai atu lea o le matai o le fale, ua ita, i lana auauna, Alu vave ia i ala ma magaala o le aai, ma aumai iinei ē matitiva, ma ē mumutu, ma ē pipili, ma ē tauaso.”2
GSAM 171.3E ala i ana auauna, na faaosofia ai e le Alii le lalolagi i le fe'au, “Ua oo mai le itula o lana faamasinoga,”—o se fe'au semanu e mafai ai ona aufaatasi ona tagata ta'utino uma, pe ana latou loto i ai. O le valaau muamua lea i le “tausamiga” o le faaipoipoga. Na folafolaina atu “i ē na valaaulia.”3 Ina ua teena lenei valaau i 'alofaga eseese, ona tuuina atu lea o le valaau lona lua, e tusa ma le fe'au a le agelu lona lua.4 E ala i lenei valaau, na vavaeeseina ai e le Alii se nuu e alu atu seia oo i le gataaga o taimi faatasi ma le malamalama o loo aga'i pea i luma o lana upu moni.
GSAM 171Le Valaau Lona Lua i le Tausamiga o le Faaipoipoga
GSAM 171.4O le fe'au lona lua—le fe'au e mulimuli mai i le alaga o le itula o le faamasinoga—ua faapea mai, “Ua pa'ū Papelonia, ua pa'ū, o le aai tele, auā ua ia faainuina atunuu uma i le uaina o le to'asā o lana faita'aga.” Ma o le valaau lona lua i le tausamiga ua faapea mai, “Alu outou ia i fafo vave i ala ma magaala o le aai, ma aumai iinei ē matitiva, ma ē mumutu, ma ē pipili, ma ē tauaso.” I nei mau taʻitasi, ua taʻua tagata ta'utino a le Alii o se “aai.” Ona o a latou talitonuga fete'ena'i ma fenumia'i, ua taʻua ai i latou o “Papelonia.” E ala i se isi mau e faatatau i aso e gata ai, ua tatou iloa ai, a o le'i oo mai le Alii, e valaauina ona tagata ia o ese mai “Papelonia:” “Ua pa'ū Papelonia le aai tele, ua pa'ū, ua avea fo'i ma mea e nonofo ai temoni, ma le mea e taofia ai agaga leaga uma, ma le fale manu o manu leaga ma inosia uma.... O mai ia outou i fafo mai iā te ia, lo'u nuu e, ina ne'i tofusia outou i ana agasala, ma ia outou lē maua fo'i ona mala.”5
GSAM 172“Manatua Le Auala na E Faalogo Ai”
GSAM 172.1I le lauga i le ekalesia i Sardis ua tatou faitau ai, “O le mea lea, ia e manatua pe na faapefea ona e maua ma faalogo ai, ia e taofi mau, ma ia e salamō. Afai e te lē mataala, ou te sau iā te oe e pei o se gaoi, e te lē iloa fo'i le itula ou te sau ai iā te oe.”6 E foliga mai na aumaia le ekalesia i Sardis e le Toefuata'iga, ina ua mavae le vaitaimi pogisa o le galuega a “Iesepela”—le ekalesia ua liliuese. Na taʻu atu i le ekalesia i Sardis sa avea muamua o ia ma ekalesia ola; a o lona faalogo ma teena o le aoaoga e uiga i le afio mai o le Alii, na tuu ai e ia o ia lava i se tulaga e ono faafuase'i ona oo mai lea mea iā te ia e pei o se “gaoi i le pō.” O le tulaga fo'i lea, e pei ona ta'ua e le aposetolo o Paulo i le 1 Tesalonia 5:1-5, o i latou e alalaga, “Filemu ma le saogalemu,” pe a latalata mai le afio mai o le Alii. O i latou e mulimuli i le malamalama o le upu moni ua ta'ua o “fanau a le ao,” ma e lē afio mai le Alii iā i latou e pei o se gaoi.
GSAM 172.2I lenei faamatalaga faavaloaga o ekalesia e fitu, ua tatou iloa ai o le pa'ū o le ekalesia i Sardis e mulimuli loa mai ai le ekalesia i Filatelefaia, po o le ekalesia o le alofa faaleuso, e pei ona uiga i ai le upu. O i latou moni lava ia o tagata talitonu e 50,000, o ē na aumaia e le fe'au a le agelu lona lua mai ekalesia eseese uma, ma aufaatasi i se noataga e tasi o le alofa faaleuso i luga o le upu moni autū tele e uiga i le toe afio mai o Keriso ua lata mai.
GSAM 173Le Auala na Folafolaina ai le Fe'au Lona Lua
GSAM 173.1O le nusipepa The Midnight Cry o Setema 12, 1844, o loo iai se faamatalaga na faia e Toeaina J. V. Himes e uiga i le fe'au a le agelu lona lua ma mea na oo atu ai i lona folafolaina. Na tusia lana tusi i McConnelsville, Ohio, iā Aokuso 29, 1844, ma faapea mai:—
GSAM 173.2“Ina ua matou amata le galuega ma Uso Miller i le 1840, ua iva tausaga talu ona ia faia lauga. I lenā taimi, sa toetoe lava na o ia. Ae sa lē muta ma sa aogā ana galuega i le fafaguina o tagata ua ta'utino i le lotu i le faamoemoe moni o tagata o le Atua ma le sauniuniga e tatau ai mo le toe afio mai o le Alii; faapea fo'i ma le fafaguina o vasega uma o ē e le'i liua, ina ia latou iloa lo latou tulaga leiloloa ma le tiute o le salamō vave ma le liliu atu i le Atua, e fai ma sauniuniga e fetaia'i ma le Tane Faaipoipo i le filemu i lona afio mai. O mea autū na ia galue ai. Na te le'i taumafai e faaliliu tagata i se lotu po o se vaega faalelotu.”
GSAM 173.3“Ina ua matou talitonu i le moni o le toe afio mai ua latalata mai, ma folafola atu faalauaitele lenā aoaoga, sa tutusa o matou manatu ma la matou ala na galue ai i totonu o lotu eseese na valaauina ai i matou, e tusa ma le tausiga a le Atua, e galulue ai. Sa matou ta'u atu i faife'au ma ekalesia, e lē o se vaega o la matou galuega le talepeina o i latou pe vaevae ma faalavelave iā i latou: E tasi lava la matou sini manino, o le tuuina atu lea o le ‘alaga,’ o le lapata'iga ua ‘i le faitoto'a’ le faamasinoga, ma faatalitonuina o matou uso a tagata ina ia sauniuni mo lenā mea.... O faife'au ma tagata o ekalesia na faaaogā a matou galuega ae le'i taliaina ma le faamaoni le aoaoga, na latou iloa e tatau ona latou mulimuli i le aoaoga, folafola atu ma lagolagoina, a lē o lea, i le faigatā ua latalata mai, o le a latou feagai ma tagata talitonu ua mausali ma maumaututū. O lea na latou filifili ai e tetee i le aoaoga, ma filifili ai nisi i se tasi faiga ma nisi i se isi faiga, e taofia le mataupu. O lea na tuu ai o matou uso ma tuafafine i totonu o i latou i se tulaga sili ona faigata. O le toatele o i latou sa alolofa i a latou ekalesia ma sa lē mafai ona mafaufau e tuua. Ae ina ua tauemuina, sauāina, ma faateaeseina i latou i auala eseese mai o latou faamanuiaga ma fiafiaga sa masani ai, ma ua taofia mai iā i latou le ‘mea'ai i ona taimi tatau,’ ma ua pepese mai pea i o latou taliga mai le Sapati i le Sapati le pese faatosina o le ‘filemu ma le saogalemu,’ e le'i umi ae vavae ese i latou mai o latou faanaunauga faalotu i vaega, ma latou tutulai aʻe ma le mamalu o lo latou malosi, lulu ese le amo, ma alalaga, ‘O mai ia outou i fafo mai iā te ia, lo'u nuu e.’”
GSAM 174I se Tulaga Faigata
GSAM 174.1“O lenei tulaga o mea na tuu ai i matou i se tulaga faigata, (1) auā ua matou iai tonu i le i'uga o lo matou taimi faavaloaga, lea na matou fa'amoemoe e faapotopoto ai e le Alii ona tagata uma i le lotogatasi; ma (2) sa matou folafola atu pea se aoaoga ese; a o lea ua suia tulaga, semanu e manatu i ai o le lē faamaoni pe a matou aufaatasi i le alaga o le vavaeeseina ma le talepeina o ekalesia na talia i matou ma la matou fe'au. O le mea lea na matou faalotolotolua ai ma faaauau pea ona galue e tusa ma lo matou tulaga muamua, se'ia oo ina ave e le ekalesia ma le au faife'au le mataupu i se tulaga ua faamalosia ai i matou, i le mata'u i le Atua, e faia se tulaga e puipuia ai le upu moni ma fanau a le Atua ua sauāina.”
GSAM 174Fa'ata'ita'iga Fa'aaposetolo mo lo Tatou Ala
GSAM 174.2“‘Ua ulu atu o ia i le sunako, ma tautala ma le loto tele mo masina e tolu, ua finau ma faatalitonu i mea e uiga i le malo o le Atua. Ae ina ua faamaaa nisi ma lē talitonu, ma tautala leaga i luma o le motu o tagata e uiga i lenā ala, ona alu ese lea o ia mai iā i latou, ma vavae ese le au soo, ua finau i aso uma i le aʻoga a le tagata e igoa iā Turano.’7 E le'i oo ina ‘faamaaa nisi’ ma ‘tautala leaga i lenā ala [le afio mai o le Alii] i luma o le motu o tagata,’ ona faagaeetia lea o o matou uso e o ese ma vavae ese mai ekalesia. Sa lē mafai ona latou onosa'ia lenei ‘tautala leaga’ a ‘auauna leaga,’ ma o ekalesia na mafai ona faaauau le ala o le sauāina ma le ‘tautala leaga’ i ē sa vaavaai atu mo le ‘faamoemoe manuia,’ sa manatu i ai i latou o afafine lava ia o Papelonia faalilolilo. O lea na latou ta'ua faalauaitele ai i latou faapea, ma oo atu ai i le sa'olotoga o le talalelei. E ui lava atonu e lē o tatou uma e malilie i le mea e fausia ai Papelonia, ae ua tatou malilie i le vave ma le vavaeeseina mulimuli mai iā i latou uma e tetee i le aoaoga o le afio mai ma le malo o le Atua ua lata mai. Ua matou talitonu o se mataupu o le ola ma le oti. O le oti le tumau pea ona fesoota'i ma na tino e ta'ufaatauvaaina pe tetee i le afio mai o le Alii. O le ola le o ese mai tu ma aga uma a tagata, ma tutū i luga o le afioga a le Atua, ma vaavaai i aso uma mo le faaali mai o le Alii. O le mea lea, ua matou fai atu nei i ē ua saisaitia i so o se auala i le amo o le nofo pologa, ‘O mai ia outou i fafo mai iā i latou, ma ia vavae ese outou, ua fetalai mai ai le Alii, aua fo'i tou te papa'i atu i le mea leaga; ou te talia fo'i outou, ma avea a'u ma Tamā mo outou, e fai fo'i outou ma o'u atalii ma o'u afafine, ua fetalai mai ai le Alii Pule Aoao.’”8
GSAM 175Tetee e Lē Mafai ona Faamatalaina
GSAM 175.1O loo faapea ona tautala Wm. Miller e uiga i le fete'ena'iga sa iai i lenā taimi i le va o ekalesia ma le au talitonu i le toe afio mai:—
GSAM 175.2“E matuā lē masani ma e lē mafai ona faamatalaina le vavaeeseina e ekalesia Kerisiano o lenei aoaoga ma o latou tagata ona o lenei faamoemoe manuia. Ou te iloa ua faapea mai nisi o ekalesia Papatiso, e lē o le faatuatua ua mafua ai ona latou vavaeeseina i latou, ae o lo latou auai faatasi i le Talisuaga a le Alii ma tagata talitonu i le toe afio mai. Afai la e lē o lo latou faatuatua i le Faaola o loo afio mai, aiseā ua vavaeeseina ai a'u mai o latou pulelaa, o a'u e le'i auai lava i le Talisuaga a le Alii i se isi ekalesia nai lo le ekalesia Papatiso? O se 'alofaga pepelo lea. Ae e lē mafai ona avea lea ma 'alofaga a le Metotisi ma le Perepereane; auā ua latou talitonu e mafai ona auai faatasi tagata mai ekalesia eseese i le Talisuaga a le Alii. O le ā la le mea ua latou vavaeeseina ai? Ua ou faalogo ua vavaeeseina nisi ona o le ‘usuina’ o pese o le toe afio mai lona lua; o isi ona o le valea, a o le mea valea atoa na faamaonia e faasaga iā i latou, o lo latou mataala lea mo Keriso. Le Atua e, ‘ia e faamagalo iā i latou, auā latou te lē iloa le mea ua latou faia.’”
GSAM 176Storrs e Uiga i Uiga o Ekalesia
GSAM 176.1Na faapea ona tautala George Storrs e uiga i uiga o ekalesia i le au talitonu i le toe afio mai:—
GSAM 176.2“O ai o i latou i le taimi nei e lē o faapea mai, ‘Ou te nofo e pei o se masiofo’? O ai fo'i o i latou e lē faamalieina i latou lava i le manatu e iai se aso latou te faato'ilaloina ai le lalolagi, ma tuuina atu ai i lalo o lo latou faatuatua? O ai o i latou o le a faatagaina se agaga e nofo filemu iā i latou, o lē e ta'utino atu ma le lē fefe lona faatuatua ua latalata mai le toe afio mai? Pe lē o tuutuuga ea o le nofo pea ma i latou e aunoa ma se faalavelave, ia e ‘taofia atoatoa’ mai le faaalia faalauaitele o lou faatuatua i le afio mai o le Alii i lenei tausaga, e tusa lava po o ā ou talitonuga i le mataupu, ma e tusa lava po o le ā lou lagona e tāua ai ona e alaga, ‘Ia outou matata'u i le Atua, ma avatu le viiga iā te ia, auā ua oo mai le itula o lana faamasinoga’?”
GSAM 176Le Molimau a Mansfield
GSAM 176.3Na tusia e L. D. Mansfield mai Oneida, N.Y., iā Mati 21, 1844, ma faapea ona molimau:—
GSAM 176.4“O loo gaoioi le Atua i mafaufau o lana fanau pele o loo faatalitali i le Alii mai le lagi, ma taitaiina i latou e lē gata ina utagia le agelu ‘ua i ai le talalelei e faavavau e folafola atu, ua faapea atu, ‘Ua oo mai le itula o lana faamasinoga,’ ae ia usiusita'i fo'i i le poloa'iga mulimuli ane, ‘O mai ia outou i fafo mai iā te ia, lo'u nuu e!’ Ua sili atu lo'u talitonu nai lo se isi lava taimi muamua, o faalapotopotoga faalotu o aso nei o se vaega tele lava lea o Papelonia o le a lafo i lalo ma le malosi ma lē toe maua lava.... Peita'i, e foliga mai iā te a'u, i nisi o faalapotopotoga, e matuā mata'ina le foliga tutusa ma le nifo itiiti. O nisi o faata'ita'iga o le a faamalamalama ai le mataupu.
GSAM 176Ua Faaalia le Agaga o le Faapotopotoga Faasauā
GSAM 176.5“Sa iai se Uso sa galue ma le matuā manuia i lenei itulagi i le folafolaina o le afio mai o le Alii, ma sa ia faatulaga se lauga i se nofoaga ma se taimi atofaina. Na faatonuina e le Alii le mea na tupu, ma sa sefuluono maila lona mamao mai le nofoaga o le lauga, ae sa iai se faife'au _____ i inā, i le ulu o se faapotopotoga faasauā, ma ta ma fulu, ina ia faaaogā iā te ia, o le auauna a le Atua Silisili Ese. E le'i umi ae amata e lenā lava faife'au se fonotaga umi, ae sa mālū ma aisa mea uma e pei o le aisa tele o le itu i Matu—e leai ni agaga na fafaguina pe liua. Mulimuli ane, na fai mai le faife'au, ua ia talitonu e tatau ona ‘nofo o ia i le nofoa o ē popole.’”
GSAM 177.1“Na fai atu se taʻitaʻi o se vasega i lenei nuu i lana vasega, talu ona matou faia fonotaga i inei, afai e sau se tagata i lona fale ma faapea mai, e talitonu o ia o le a afio mai Keriso i lenei tausaga, o le a ia tuli ese o ia i fafo.”
GSAM 177Tiute i Ekalesia
GSAM 177.2O le a matou tu'uina atu nei se molimau mai se saunoaga i le fono o tagata talitonu i le toe afio mai, na potopoto i Boston, Mass., na tusia i le aso 31 o Me, 1844, ma sainia e William Miller, Elon Galusha, N. N. Whiting, Apollos Hale, ma J. V. Himes. Ua latou fa'apea mai:—
GSAM 177.3“E mafai fo'i ona matou fai atu sina upu e uiga i lo tatou tiute i ekalesia. I lenei mataupu, e pei o le tele o isi mataupu, ua matou manatu o le mata'utia o lo'o i le so'ona alu i itu e lua. O le mata'utia muamua, o le tu'u atu lea o le pule a le ekalesia tatou te auai ai e fa'amalosia i tatou ia fifilemu i se mataupu fa'apenei o lo tatou tiute. Matou te lē masalosalo ua faitau afe i latou ua aumaia le fa'asalaga a le Atua i o latou luga ona ua usiusita'i i mana'oga o a latou ekalesia e lē tusa ma le Tusi Paia i lenei mataupu. Ana latou tutumau ma fa'amaoni, semanū ua sili atu lo latou saogalemu i le taimi nei, ma sili atu fo'i lo latou aogā, e ui lava atonu e vala'auina fo'i i latou e puapuagatia.
GSAM 177.4“O le mata'utia lona lua, o le lolo atu lea i le agaga fia taui ma sui i ekalesia ona o a latou amio lē tonu ia i tatou, ma tau fa'asaga i fa'alapotopotoga uma fa'apena e aunoa ma se tu'ueseesega. A o le tiute o Adventist e tusa ma ekalesia latou te auai ai, pe ana talosagaina i matou e tu'u atu se ta'ita'iga, e lē mafai ona matou tu'u atu ni fa'atonuga e talafeagai mo tagata uma. E ao ona latou amio ma le mata'u i le Atua, e tusa ma tulaga o mataupu ta'itasi.
GSAM 178.1“Peita'i, e tatau ona tatou maumaua'i e fai lo tatou tiute, ma molimau atu mo le upu moni i avanoa uma e tatau ma talafeagai ai. Afai o le faia o lea mea e tigā ai loto o ekalesia, ma latou fa'amata'u mai o le a tutuli i tatou pe a tatou lē fifilemu (e ui ina atonu e sili ona lelei pe a tatou manatu e talafeagai ona motusia ma le filemu la tatou mafutaga ma le ekalesia), ia tatou faia lo tatou tiute. Pe a tutuli i tatou, ia tatou onosa'i i le amio lē tonu ua faia ia i tatou, ma loto e ō fa'atasi ma lo tatou Matai e ‘ō atu i tua o le faitoto'a, ma tauave lona fa'alumaina.’”
GSAM 178.2Mai nei upu ua sii mai e uiga i mea na faia e ekalesia i ē na folafola atu le fe'au a le agelu lona lua, e faigofie ona iloa le māfuaaga ua ta'ua ai ē na fa'apotopoto i le lafu e tasi fa'aleagaga, o le ulua'i fua o lenei vala'au lona lua i le “talisuaga,” o ē “ua lē atoatoa tino,” “o ē pipili,” ma “o ē tauaso.” O nei igoa ua matuā fa'amanatu mai ai le agaleaga na latou maua i le “sasaina” e o latou “uso a auauna,” o ē na latou vavae ese mai ai.
GSAM 178Se Nuu ua Vavae Ese ma Filifilia e Maua Upu Moni Fou
GSAM 178.3E mafai ona iloa manino le finagalo o le Ali'i i lona aumaia o se nuu e tutū ese, e ala i le folafolaina o le fe'au a le agelu lona lua—le vala'au lona lua i le “talisuaga”—ma le “alaga i le vaeluaga o le po.” Sa tatau ona su'esu'eina ma folafolaina upu moni tāua mo aso e gata ai. Sa lē mafai ona faia lenei galuega i ekalesia ua “noatia i ta'utinoga o talitonuga,” e pei fo'i ona lē mafai e le ekalesia a le 'au aposetolo ona folafola atu le tala lelei i le lalolagi a o tumau pea lona sootaga ma vaega lotu a Iutaia. Sa vala'au le Atua ia latou vavae ese i inā,9 Sa ia vala'au fo'i ia vavae ese tagata talitonu i le toe afio mai mai ē na taumafai e taofia i latou i totonu o tuaoi o a latou ta'utinoga o talitonuga.
GSAM 179Le “Lauga e Ono” a Storrs
GSAM 179.1E le'i leva talu ona latou ō ese fa'apenei, ae tatou iloa ua oo mai le malamalama i vaega o tagata talitonu i le toe afio mai e uiga i le fa'asalaga i le lumana'i. Sa fa'amatalaina lenei mea i le tama'itusi “Lauga e Ono,” na tusia e George Storrs. Sa a'oa'o mai ai o le tagata, i lona lava natura, e mafai ona oti; e lē iloa e ē ua oti se mea i le va o le oti ma le toetū; o le fa'asalaga mulimuli o ē fa'alēmata'u o le fa'aumatia atoatoa lea; ma o le ola pea e lē oti o le meaalofa a le Atua, e na o le fa'atuatua i lo tatou Ali'i o Iesu Keriso e maua ai.
GSAM 179.2E faitau afe Adventist na talia lenei a'oa'oga e uiga i le natura o le tagata, ae sa lē talia e i latou uma. O le lē talia o lenei a'oa'oga e le'i tupu ai se fenumia'i i totonu o i latou, auā sa manatu i ai o se mataupu tau talitonuga, ae lē o se fua e iloa ai le amio lelei o se tagata. O lea sa lē motusia ai la latou taumafaiga fa'atasi e lapata'i le lalolagi i le lata mai o Keriso. Peita'i, na atili ai ona tutupu le ita o ekalesia ia i latou.
GSAM 179Ua Lē Mafai ona Fa'amaonia le Sesē o le “Lauga e Ono”
GSAM 179.3O le faife'au Metotisi i le taulaga sa ou nofo ai, o lē na auai muamua i le folafolaina o le a'oa'oga o le toe afio mai i le 1843, na maua le “Lauga e Ono,” ma faitau i ai. Na ia ta'utino atu i tagata o lana ekalesia ua lē mafai ona ia fa'amaonia le sesē o lea a'oa'oga. Ae ina ua ia iloa ua to'atele tagata o lana ekalesia ua talia, na ia fautua i isi ia aua ne'i faitau i le tusi, auā “o le a latou talitonu i le a'oa'oga pe a latou faitau i ai.” I le masina o Setema, 1844, ina ua toe fo'i mai lenei faife'au mai le fono fa'aletausaga, sa ia tula'i i lana pulela'a ma te'ena fa'alaua'itele le a'oa'oga o le toe afio mai. Sa ia talosaga atu fo'i ma le loto maulalo i le ekalesia ia fa'amagalo o ia ona o lona vala'aulia muamua o ē na faia lauga e tautatala i le fale.
GSAM 179Ua Fa'amasinoina ona o A'oa'oga Sesē
GSAM 179.4E le'i leva talu lenei gaoioiga a le faife'au, ae faia loa se taumafaiga e fa'amasino tagata talitonu i le toe afio mai ona o a'oa'oga sesē. Peita'i, talu ai na fa'atagaina i latou e puipui a latou mataupu mai le Tusi Paia, sa lē manumalo ai le ekalesia. Na tutuli ese nisi mai lenei ekalesia ona sa lē tusa a latou gaoioiga ma tulafono a le ekalesia, ma sa ō ese fo'i le to'atele o isi ona o le tutuli o tagata sa lē mafai ona fa'amaonia le fete'ena'i o lo latou fa'atuatua ma le Tusi Paia. O lea na tapunia ai e fa'avavau le faitoto'a i le a'oa'oga o le toe afio mai i le ekalesia lea na maua ai e le faitau selau le Faaola ma maua ai le fiafia i le Atua.
GSAM 180.1O mea na faia i lo'u lava taulaga na tupu ai a'u, na faia fo'i i le faitau selau o isi ekalesia i le atunuu atoa. O ē na fa'apea ona faia i ai e o latou uso muamua, sa maua le fa'amāfanafanaga tele i upu a le perofeta o Isaia: “Ia outou fa'alogo i le afioga a le Ali'i, outou o ē gatete i lana afioga: O outou uso o ē na 'ino'ino ia te outou, ma tutuli ia te outou ona o lo'u igoa, na latou fai mai, Ia vi'ia le Ali'i; a e fa'aali mai o ia e fai ma o outou olioli, a e mā i latou.”10
GSAM 180Ua Fa'aalia le Ita o Ē Amioleaga
GSAM 180.2A o latalata mai le aso sa fa'atalitali i ai mo le Ali'i, sa atili ai ona finafinau tagata talitonu i a latou galuega, ma sa atili ai fo'i ona feita ma tauemu ē amioleaga. E iloa lea i le fa'amatalaga lenei a le fa'atonu o le Alaga i le Vaeluaga o le Po, o le aso 31 o Oketopa, 1844:—
GSAM 180.3“O le aafiaga fo'i o lenei gaoioiga i ē amioleaga sa matuā fa'amalosia ai lo matou talitonuga sa i ai le Atua i lenei galuega. Ina ua potopoto le fanau a le Atua e ifo ma fa'amaulalo i latou i ona luma, ma sauni mo lona fa'aali mai, e pei ona tatau i se vaega o tagata agasala e na o le alofa tunoa e mafai ona faaolaina ai, sa fa'aalia e ē amioleaga le loto leaga silisili. E ui ina sa na o la matou lava nusipepa na fa'asilasila ai a matou sauniga, ma sa matou lē vala'aulia tagata lautele i ai, ae sa lolofi mai atalii o Pelialo ma fa'atupu le vevesi tele. I le afiafi o le Aso Toona'i, le aso 12 o lenei masina [12 o Oketopa, 1844], sa lē faia se matou sauniga i le fale fetafa'i, ina ia maua ai e le tausi fale [tagata fa'amamā fale] se avanoa e fa'amamā ai le fale mo le aso Sapati [Aso Sa]. Ae sa osofa'i e le motu o tagata vevesi le fale, ma lē tu'uina atu fo'i lena avanoa. Peita'i, e aunoa ma se talosaga atu i ai, sa vave ona fa'alavelave mai le pulenuu ma tutuli ese i latou.
GSAM 181.1“I a matou sauniga i le aso Sapati na sosoo ai, ina ua tumu le fale fetafa'i, sa tumu fo'i le auala i luma o le fale i le motu o tagata. E to'atele i latou na feita ona sa i ai nisi ua talitonu i le afio mai o le Ali'i. I le afiafi, ona o le vevesi o tagata, sa lē faia ai se sauniga; peita'i, na vave lava ona tumu le auala i le motu o tagata vevesi. Ae o le vave ona fa'alavelave mai o le pulenuu ma ana leoleo mataalia na toe avanoa ai le auala, ina ua uma ona ave nisi i le fale leoleo. Sa na o le amio a le motu o tagata na si'omia le faitoto'a o Lota i le afiafi a o lumana'i le fa'aumatiaga o Sotoma na mafai ona matou fa'atusa i ai le amio a lenei motu o tagata.... O lenei gaoioiga a i latou sa matuā fa'afuase'i, sa tupu i le taimi e tasi, ma sa matuā salalau, o lea o lona fa'aali mai i le aso muamua o le masina lona fitu a Iutaia na fa'amalosia ai lo matou manatu, e tatau lava o le masina lenei.”
GSAM 181Ua Oofu Ē Tauemu i Ofu Talaloa mo le Alu A'e i le Lagi
GSAM 181.2I le aso 22 o Oketopa, 1844, le aso na fa'ai'u ai aso e 2300, i Paris, Maine, a o potopoto tagata talitonu i le fale tapua'i ma tatalo ma le fa'aaloalo tele i le Atua, ma fa'atalitali o le a afio mai le Ali'i i lena aso, na potopoto ane ē faifai ma tauemu i tafatafa o le fale, ma pepese i pese fa'alumaluma. E to'alua o nei tagata ulavavale na oofu i ofu talaloa papa'e uumi ma fe'a'ei i luga o le taualuga o le fale. Sa la pepese ma tauemu i ē sa i totonu o le fale, o ē sa tatalo ma fa'atalitali i le afio mai o le Ali'i.
GSAM 181.3Atonu o lenei mea na tupuga mai ai tala pepelo na salalau e uiga i le oofu o Adventist i ofu talaloa mo le alu a'e i le lagi. Auā e ui lava sa ofoina e nusipepa o le toe afio mai ni taui e oo atu i le $500 mo se fa'ata'ita'iga moni e tasi o se Adventist na ofu i se ofu talaloa mo le alu a'e i le lagi i le 1844, ma fa'atalitali fa'apea i le afio mai o le Ali'i, e le'i tu'uina mai lava se fa'ata'ita'iga e tasi.
GSAM 182Le Fa'aaliga a Hazen Foss, 1844
GSAM 182.1Pe tusa o lea taimi sa nofo ai i Poland, Maine, se taule'ale'a e igoa ia Hazen Foss, o lē na talitonu mausalī o le a afio mai le Ali'i i le aso lona sefulu o le masina lona fitu. O ia o se tagata e aulelei ona foliga, e mālie lana tautala, ma sa lelei fo'i ana a'oa'oga. I ni nai vaiaso a o le'i uma le “alaga i le vaeluaga o le po,” sa fa'alatalata mai le Ali'i ma tu'uina atu iā te ia se fa'aaliga. Na fa'aali iā te ia i lea fa'aaliga le malaga a tagata talitonu i le toe afio mai i le aai o le Atua, fa'atasi ma lamatiaga o le a latou fetaia'i ai. Sa tu'uina atu iā te ia nisi fe'au o lapata'iga e ao ona ia momoli atu. Sa ia va'aia fo'i tofotofoga ma sauāga o le a mulimuli mai pe a ia fa'amaoni e ta'u atu mea na fa'aali iā te ia. E pei o le susuga iā Foy, sa fa'aali iā te ia la'asaga e tolu e oo atoatoa atu ai le nuu o le Atua i le ala aga'i i le aai paia. Talu ai sa talitonu mausalī o le a afio mai le Ali'i “i ni nai aso o totoe” (e pei ona latou pepese ai i lena taimi), sa lē mafai ona ia malamalama i le vaega o le fa'aaliga e uiga i la'asaga e tolu e oo atu ai i le ala. Ma talu ai sa fa'amaualuga lona loto, sa solomuli o ia mai le satauro ma musu e ta'u atu le fa'aaliga. Sa toe tu'uina mai le fa'aaliga i le taimi lona lua, ma sa ta'u atu fo'i iā te ia, afai e tumau pea lona musu e ta'u atu mea na fa'aali iā te ia, o le a aveesea le avega mai iā te ia ma tu'u atu i se tasi o le fanau aupito vaivai a le Ali'i, o lē o le a fa'amaoni e ta'u atu mea o le a fa'aalia e le Atua. Sa toe musu fo'i o ia. Ona tu'uina mai lea o le fa'aaliga lona tolu, ma sa ta'u atu iā te ia ua tatala o ia mai le tiute, ma ua tu'uina le avega i se tasi o ē aupito vaivai i ē vaivai, o lē o le a faia le mea ua poloa'i mai ai le Ali'i.
GSAM 182Ua Lē Mafai e Foss ona Ta'u Atu Lana Fa'aaliga
GSAM 182.2Na fa'ate'ia le taule'ale'a i lenei mea, ma sa ia tonu ai e ta'u atu mea na fa'aali iā te ia, ma fa'asilasila loa le taimi o lana sauniga. Sa lolofi mai tagata e va'ai ma fa'alogo. Sa ia fa'amatala ma le fa'aeteete mea na tutupu iā te ia, lona musu e ta'u atu mea na fa'aali iā te ia e le Ali'i, ma le mea o le a i'u i ai lona musu. Ona fai mai lea o ia, “O lenei, o le a ou ta'u atu le fa'aaliga.” Ae talofa! Ua tuai tele: sa tu o ia i luma o tagata ua gūgū e pei o se fa'atagata, ma mulimuli ane fai mai ma le tigā silisili, “Ou te lē manatua se upu e tasi o le fa'aaliga.” Sa ia mimilo ona lima i le puapuagā ma fai mai, “Ua fa'ataunu'uina e le Atua lana afioga. Ua ia aveesea le fa'aaliga mai iā te a'u,” ma sa fai mai ma le loto matuā mafatia, “O a'u o se tagata ua leiloa.” Talu mai lena taimi sa mou atu lona fa'amoemoe ia Keriso, ma ua oo o ia i le fa'anoanoa e aunoa ma se fa'amoemoe. E le'i toe auai lava o ia i se sauniga a Adventist, ma sa leai sona naunau i mea tau lotu. I le tele o itu, e mafai lava ona fa'apea atu o ana amio sa pei o se tasi ua lē toe maua le aafiaga agamalu o le Agaga o le Matai, o se tasi ua “tu'u atu e mulimuli i ona lava ala, ma fa'atumuina i fua o ana lava mea na fai.” O le tulaga fa'apea o lona mafaufau na maliu ai o ia i le 1893.
GSAM 183Ua Ta'u Atu e Se Isi le Fa'aaliga a Foss
GSAM 183.1Pe tusa o le tolu masina talu ona lē mafai ona ia manatua lana fa'aaliga, sa ia fa'alogo mai i le potu e sosoo ai i se fa'aaliga na ta'u atu e se isi tagata. Sa faia le sauniga i se fale sa nofo ai fo'i o ia i lena taimi. Sa fa'amalosi atu iā te ia e sau i le sauniga, ae sa musu o ia. Sa ia fai mai o le fa'aaliga sa matuā tutusa ma le mea na fa'aali iā te ia, e pei ona mafai e ni tagata se to'alua ona fa'amatala le mea e tasi. O lea na iloa ai le mea na ia va'aia ae sa lē mafai ona manatua ina ua taumafai e ta'u atu. Ina ua ia va'ai mulimuli ane i le tagata lea, sa ia fai mai, “O le tagata lea ua filifilia e le Ali'i e tauave le avega.”
GSAM 183Ua Matuā Fa'anoanoa i le Lē Taunu'u o le Fa'amoemoe
GSAM 183.2Na oo mai lava le aso lona sefulu o le masina lona fitu, e tusa ma le faitauga a Iutaia (22 o Oketopa, 1844). I lena aso sa faitau afe ma afe i latou na fa'atalitali i ai mo le fa'ataunu'uina o o latou fa'amoemoega. E le'i faia ni a latou sauniuniga mo se mea o le olaga i le lalolagi pe a mavae lena aso. E le'i teuina fo'i i o latou loto le manatu, “pe afai e lē oo mai,” ae sa latou fa'atulaga a latou mataupu fa'alelalolagi e pei ona latou faia pe ana latou manatu o lena aso o le a fa'ai'u ai o latou olaga. Sa latou lapata'i ma apoapoa'i atu i ē amioleaga ia sosola ese mai le toasa o le a oo mai, ma sa fefefe le to'atele o ia tagata ne'i moni le fe'au. Sa latou fautua ma tatalo fa'atasi ma o latou aiga, ma fa'atofa atu i ē o latou aiga sa le'i tu'uina atu o latou loto i le Atua. I se fa'apu'upu'uga, sa latou fa'atofa atu i mea uma o le lalolagi, ma le fa'aaloalo tele o se tasi ua manatu o le a tū fa'afesaga'i ma le Fa'amasino o le lalolagi atoa. O lea, ma le fa'atalitali popole na toetoe a lē mānava ai, sa latou potopoto i o latou fale tapua'i, ma manatu i taimi ta'itasi o le a latou fa'alogo i “le siufofoga o le agelu sili ma le pu a le Atua,” ma va'ai i le lagi ua mū i le mamalu o lo latou Tupu o loo afio mai.
GSAM 184.1Sa mavae lemū atu itulā, ma ina ua goto ifo mulimuli ane le lā i tua o le tafailagi i sisifo, ua uma le aso lona sefulu o le masina lona fitu a Iutaia. Ua toe fofola mai e ata o le po lo latou ufiufi pogisā i luga o le lalolagi. Ae fa'atasi ma lena pogisā na oo mai ai se tigā o le fa'anoanoa i loto o tagata talitonu i le toe afio mai, o se fa'anoanoa e na o le fa'anoanoa o soo o lo tatou Ali'i e mafai ona fa'atusa i ai. Sa fa'apena fo'i i latou a o savavali atu ma le loto mafatia i o latou fale i le po ina ua mavae le fa'asatauroina ma le tanuga o lē sa latou fa'ato'ā ta'ita'i atu ma le manumalo i Ierusalema o lo latou Tupu.