Mataupu 19 — “O O Latou Fua Tou te Iloa ai i Latou”
GSAM 299.1“Na ia foa'iina atu fo'i nisi e fai ma aposetolo, o nisi e fai ma perofeta, o nisi e fai ma folafola o le tala lelei, o nisi e fai ma leoleo ma faia'oga; ina ia fa'aatoatoaina le au paia, mo le galuega o le auaunaga, e ati a'e ai le tino o Keriso; se'ia tatou o'o uma lava i le lotogatasi i le fa'atuatua ma le iloa lelei o le Alo o le Atua, ia avea ma tagata matua atoatoa, ia o'o i le fua o le tino e tusa ma le tumu o Keriso.”1
GSAM 299.2Ina ua tu'uina e le Faaola meaalofa a lona Agaga i le ekalesia, e fa'ataunu'u ai le galuega a le Ali'i, “e pei ona finagalo i ai o ia,” se'ia o'o mai le aso atoatoa, na te le'i tu'ua ona tagata e taumate pe mai le lagi se fa'aaliga o le mana, pe mai agaga leaga. Ae ua ia foa'i mai ta'iala e mafai ai ona tatou iloa pe mai le Atua le agaga pe leai. E o'o lava i nei aso e gata ai, e pei ona valoia e le perofeta o Ioelu, o le a liligi ifo e le Ali'i lona Agaga i luga o tagata uma, ma o le a perofeta mai atalii ma afafine,2 Ua fai mai Paulo, e lē tatau i tagata ona 'ino'ino i valoaga, a ia “tofotofo i mea uma,” ma “taofi mau i le mea lelei.”3
GSAM 299.3E fa'apefea ea ona tofotofoina ia fa'aaliga o le mana, se'i vaganā ua fa'atusatusa i ta'iala a le Tusi Paia e iloa ai le galuega a le Agaga o le Atua? E lē o mea uma e sili atu i le malamalama o mafaufau fa'atapula'aina e mai le Atua, auā ua ta'u mai e le Tusi Paia, i aso e gata ai o le a faia ai e Satani vavega e fa'asesē ai le lalolagi, ina ia fa'apotopotoina i latou i le taua o lena aso tele o le Atua e ona le malosi uma lava.4 O lea, o le fa'atusatusa ma le fa'aeteete o lea fa'aaliga o le mana i ta'iala a le Tusi Paia e mafai ai ona iloa se meaalofa moni fa'aleagaga. E mana'omia i lenei mea le fa'aeteete e pei ona faia e tagata o le lalolagi ina ia iloa ai tupe pepelo.
GSAM 300Le Iloa o Tupe Pepelo
GSAM 300.1I le Lipoti o Tupe Pepa a Faletupe i Detroit o Aperila, 1863, na tu'uina mai ai e le susuga ia Preston ni ta'iala e lima e iloa ai tupe pepelo. Na ia ta'utino mai fo'i, o so'o se tagata e su'esu'e matuā mae'ae'a tupe pepa ta'itasi e maua e ia, e tusa ma ia ta'iala, e lē toe mana'omia lava ona fefe ne'i fa'asesēina.
GSAM 300.2E leai se auala e sili atu ona mautinoa e tofotofo ai se meaalofa fa'aperofeta nai lo le fa'atusatusa i le fa'amatalaga o ia meaalofa na fa'aalia i ona po o le Tusi Paia, ma tofotofo i ta'iala ua tu'uina mai i inā. Ua saunia atoatoa i tatou e le Tusi Paia mo galuega lelei uma lava (2 Timoteo 3:16, 17). Ua tu'uina mai ai fo'i se tala sa'o o fa'aaliga o le meaalofa o valoaga, ma le auala e iloa ese ai le galuega moni a le Agaga o le Atua mai galuega a Satani ma ana meaalofa pepelo.
GSAM 300TA'IALA E ILOA AI MEAALOFA MONI
GSAM 300.3Ua tu'uina mai e le Ali'i i lana afioga ni ta'iala eseese e lē itiiti ifo i le fitu, e mafai ai ona iloa ese fa'aaliga moni o le Agaga o le Atua mai galuega a Satani.
GSAM 300Ta'iala Muamua—A'oa'oga Fa'apitoa
GSAM 300.4Ua fai mai le perofeta o Isaia, a o tautala i mea e tutupu i aso e gata ai: “Ia fusia le molimau, ia fa'amaufa'ailogaina le tulafono i o'u so'o. Ou te fa'atali fo'i i le Ali'i, o lē ua natia ona fofoga mai le aiga o Iakopo, ou te fa'amoemoe fo'i ia te ia.... Pe a latou fai mai iā te outou, Ia sa'ili atu i ē e fesoota'i ma agaga, ma ē fa'ataulāitu, o ē e pisapisaō ma muimui; pe lē tatau ea i se nu'u ona sa'ili atu i lo latou Atua? Pe sa'ili ea i ē ua oti mo ē o ola? Ia o'o i le tulafono ma le molimau; afai latou te lē tautala e tusa ma lenei upu, ona ua leai lava se malamalama iā te i latou.”5
GSAM 301.1Ua tata'i atu o tatou manatu i lenei mau i se nu'u o loo galulue e toe fa'afo'i le fa'amaufa'ailoga i le tulafono a le Atua—o se nu'u o loo fa'atali i le Ali'i ma galulue i lana auaunaga. O loo latou fa'atalitali iā te ia; o lona uiga, o loo latou fa'atalitali i lona afio mai. Ua faia fo'i lenei mea i se taimi o loo vala'au atu ai i tagata ni agaga ua fai mai o i latou o agaga o ē ua oti, ina ia sa'ili atu iā te i latou. Ua usita'i nisi i la latou vala'au, ma sa'ili atu i ē ua oti mo le malamalama; a ua vala'au le Ali'i i ona tagata ina ia sa'ili iā te ia. O lona uiga lava, afai latou te sa'ili iā te ia, o le a ia foa'i atu iā te i latou ni a'oa'oga fa'apitoa. E lē mana'omia ona latou sa'ili atu i ē ua oti, o ē e lē mafai ona avatua iā te i latou se malamalama; auā “e lē toe i ai lava so latou vaega e fa'avavau i mea uma ua faia i lalo o le lā;” ma “o ē ua oti, latou te lē iloa se mea.”6
GSAM 301.2Ua tu'uina mai i le mau o loo i luga se ta'iala e tofotofoina ai fe'au uma,—“afai latou te lē tautala e tusa ma lenei upu, ona ua leai lava se malamalama iā te i latou.” O fe'au uma mai le Ali'i o le a tautala e ōgatasi ma lana afioga ma lana tulafono.
GSAM 301.3Pe a ou fa'aaogā lenei ta'iala i tusitusiga a Mrs. White, ou te fai atu, i le limasefulu lua tausaga ua mavae, sa ou faitau ma le fa'aeteete i ana molimau, ma fa'atusatusa i le tulafono a le Atua ma le molimau a le Tusi Paia, ma ua ou maua ai le ōgatasi atoatoa o ia mea e lua. E lē o aumaia e ana a'oa'oga se fa'aaliga fou e suitulaga i le Tusi Paia, ae ua fa'ailoa mai ai iā i tatou po o fea ma pe fa'apefea ona ono fa'asesēina tagata i nei ona po, ma ta'ita'i ese mai le afioga. E sili ona fa'amatala le tulaga o molimau a Mrs. White i mea ua tusia e ia lava e uiga i ai:—
GSAM 301.4“Ua lava le afioga a le Atua e fa'amalamalama ai le mafaufau ua sili ona pogisa, ma e mafai ona malamalama i ai ē uma o loo i ai se naunau e malamalama i ai. Ae ui i nei mea uma, ua maua nisi o ē fai mai o loo latou su'esu'e i le afioga a le Atua, o loo ola e matuā feteena'i ma ana a'oa'oga e sili ona manino. O lea, ina ia leai se 'alofaga o tane ma fafine, ua foa'i mai ai e le Atua molimau manino ma tu'usa'o, e toe fa'afo'i ai i latou i le afioga ua latou lē amana'ia ona mulimuli ai.
GSAM 302.1“Ua tumu le afioga a le Atua i mataupu fa'avae lautele e fa'atupu ai ni amio sa'o o le olaga. O molimau, e mo tagata uma atoa ma tagata ta'ito'atasi, ua fuafuaina e tata'i atili ai o latou manatu i nei mataupu fa'avae.... E tou te lē masani i le Tusi Paia. Ana fa'apea sa outou su'esu'e i le afioga a le Atua, ma le naunau e ausia le tulaga ua fa'atonuina e le Tusi Paia ma o'o i le atoatoa fa'a-Kerisiano, semanū e tou te lē mana'omia molimau....
GSAM 302.2“Ua finagalo le Ali'i e lapata'i, a'oa'i, ma fautua iā te outou e ala i molimau ua tu'uina mai, ma ia matuā fa'atāua i o outou mafaufau le upu moni o lana afioga. E lē o tu'uina mai molimau tusitusia e aumai ai se malamalama fou, ae ia matuā fa'amauina i le loto upu moni na musuia ma ua uma ona fa'aalia.... E lē o aumaia se isi upu moni fa'aopoopo, ae ua fa'afaigofieina e le Atua, e ala i molimau, upu moni tetele ua uma ona tu'uina mai. I lana lava auala ua ia filifilia, ua ia tu'uina atu ai i luma o tagata, ina ia fafagu ma matuā fa'amauina ai i o latou mafaufau, ina ia leai se tasi e i ai sona 'alofaga....
GSAM 302.3“E lē o tu'uina mai molimau e fa'atauva'a ai le afioga a le Atua, ae ia fa'aeaina ai, ma tata'i atu ai mafaufau i ai, ina ia pā'ia tagata uma i le matagofie ma le faigofie o le upu moni.... Afai e usiusita'i tagata ua fai mai nei o i latou o le 'oa fa'apitoa a le Atua i mea ua ia mana'o ai, e pei ona fa'amatalaina i lana afioga, semanū e lē tu'uina mai ni molimau fa'apitoa e fafagu ai i latou i lo latou tiute, ma ia latou iloa ai lo latou agasala ma le mata'utia o le lamatiaga ua latou i ai ona o le lē usita'i i le afioga a le Atua.”7
GSAM 302Ta'iala Lona Lua—Perofeta Moni
GSAM 302.4Ua uma ona tatou a'oa'oina, o perofeta moni uma lava o le a tautala e ōgatasi ma le tulafono a le Atua ma le molimau a lana afioga. Ua tu'uina mai e le aposetolo o Ioane se isi ta'iala e fa'amatala ai le a'oa'oga a perofeta moni. Ua ia fai mai: “Le au pele e, aua tou te talitonu i agaga uma lava, a ia tofotofo i agaga pe mai le Atua i latou; auā ua ō atu i le lalolagi perofeta pepelo e to'atele. O le mea lenei tou te iloa ai le Agaga o le Atua: o agaga uma e ta'utino mai ua afio mai Iesu Keriso i le tino, e mai le Atua ia; o agaga uma fo'i e lē ta'utino mai ua afio mai Iesu Keriso i le tino, e lē mai le Atua ia; o le agaga lea o le anetikeriso, na outou fa'alogo ai e sau; o lenei fo'i, ua i ai nei lava o ia i le lalolagi.”8
GSAM 303.1Ia mātau ma le fa'aeteete le mau o loo i luga. E lē o fai mai, o lē e ta'utino na “afio mai i le tino” Iesu Keriso, ae “ua afio mai i le tino;” o lona uiga, e afio mai o ia e ala i lona Agaga, ma afio i totonu o i tatou, e tali mai i lo tatou fa'atuatua. O lenei lava le upu moni autū o le tala lelei, “o Keriso o loo i totonu o outou, o le fa'amoemoe o le mamalu.”9
GSAM 303.2O le mataupu e fa'atatau i le olaga o loo maua i tusitusiga uma a Mrs. White, o le mana'omia lea o Keriso e fai ma Faaola e afio i totonu o i tatou, pe afai tatou te fia aga'i i luma i le ala i le lagi. Ua a'oa'o mai ana tusitusiga e mana'omia Keriso i le amataga, i le i'uga, ma taimi uma lava. E fai ma fa'ata'ita'iga o lenei mea, ua tata'i atu manatu i lana tusi, La'asaga iā Keriso, lea ua silia i le selau afe kopi ua fa'atauina atu i le gagana Peretania, e ese mai i le faitau afe o kopi i gagana ese e sefulu valu ua lomia ai nei. O se faife'au o le ekalesia Perepereane, ina ua uma ona faitau i le tusi, na ia oka ai ni kopi e sili atu i le tolu selau mo tagata o lana ekalesia ma ana uō, ma fa'apea mai, “O lenei tusi na tusia e se tasi ua masani lelei ma le Ali'i o Iesu Keriso.”
GSAM 303Ta'iala Lona Tolu—Perofeta Pepelo
GSAM 303.3Ua tu'uina mai e Ioane se ta'iala e iloa ai perofeta pepelo: “E o le lalolagi i latou; o le mea lea latou te tautala ai i mea a le lalolagi, ma e fa'alogo le lalolagi iā te i latou.”10 O a'oa'oga a perofeta pepelo o le a fa'amalieina le loto fa'aletino, nai lo le fa'aeaina o le ala o le fa'afitia o le tagata lava ia ma le amoina o le satauro. O le a a'oa'o atu e perofeta pepelo “mea e malie ai,” nai lo le fa'aeaina o le “Paia o Isaraelu.”11 So'o se tasi e faitau, e tusa lava po o ni nai itulau o tusitusiga a Mrs. White, e mafai ona ia iloa o loo tata'i atu i le fa'afitia o le tagata lava ia ma le amoina o le satauro, ma e lē o ni mea e fa'amalie ai se loto fa'alelalolagi ma fa'aletino.
GSAM 304Ta'iala Lona Fa—Puapuaga ma le Onosa'i
GSAM 304.1A o tatou su'esu'e atili i lenei mataupu, o le a tatou avea ma ta'iala lona fa upu a le aposetolo o Iakopo: “O'u uso e, ia outou avea perofeta na tautatala i le suafa o le Ali'i ma fa'aa'oa'o i le onosa'i i puapuaga, ma le fa'apalepale.”12 Pe a tatou faitau i mea na tutupu i na perofeta anamua, tatou te iloa ai o se tasi o o latou tofotofoga e sili ona mamafa, o le va'ai atu lea ua teena e Isaraelu molimau manino ua tu'uina atu iā te i latou, pe ua latou faia mea e feteena'i ma na molimau. O se su'esu'ega pu'upu'u i na ona po o le a vave ona fa'aalia ai le amio a perofeta moni atoa ma perofeta pepelo. “O loo fa'apea ona fetalai mai o le Ali'i o 'au, Aua tou te fa'alogo i upu a perofeta o loo perofeta mai iā te outou; ua latou fa'avalea outou; ua latou tautala mai i fa'aaliga o o latou lava loto, ae lē mai le fofoga o le Ali'i.”13
GSAM 304.2E leai se mea i tusitusiga a Mrs. White e fa'amatagofie ai le manatu o le tagata faitau iā te ia lava; ae peita'i, e pei ona ta'ua e se tasi, “Ua lē mafaitaulia taimi na ou maua ai le manuia tele fa'aleagaga mai molimau. E moni, ou te lē faitau lava i ai e aunoa ma lo'u lagona ua a'oa'ia a'u ona o le itiiti o lo'u fa'atuatua i le Atua, le itiiti o lo'u tu'uina atu o a'u iā te ia, ma le itiiti o lo'u naunau e fa'aola agaga.” O lea, e mautinoa lava e matuā ese le aogā o molimau a Mrs. White mai le aogā o a'oa'oga a perofeta pepelo, e pei ona fa'amatalaina e Ieremia.
GSAM 304.3Ua ta'u mai fo'i e le perofeta le ala o le a a'oa'o atu ai perofeta pepelo: “Ua latou fai soo atu i ē e 'ino'ino mai iā te a'u, Ua fetalai mai le Ali'i, E outou maua le filemu; ua latou fai atu fo'i i tagata uma e savavali i mafaufauga o o latou lava loto, E lē o'o se leaga iā te outou.”14
GSAM 304.4O le a ou si'i mai upu nei a se tagata e faitau ma le fa'aeteete, e fa'amatala ai le a'oa'oga a Mrs. White i ana molimau:
GSAM 304.4“Ua ou faitau mae'ae'a i ana molimau uma, ma o le tele o ia molimau ua ou faitau i ai i le tele o taimi. Ou te le'i maua lava se fuaiupu e tasi e lē mamā i totonu o na mea uma, po o se mea e lē mamā atoatoa ma fa'a-Kerisiano; e leai se mea e ta'ita'i ese ai se tasi mai le Tusi Paia pe mai iā Keriso. Ae ua ou maua ai ni vala'au e sili ona naunau ina ia usiusita'i i le Atua, ia alolofa iā Iesu, ia talitonu i le Tusi Paia, ma su'esu'e pea lava i ai. O le latalata fa'apenei i le Atua, o le naunau fa'apenei i le tu'uina atu o le tagata iā te ia, ma ni vala'au tāua fa'apenei e ola i se olaga paia, e na o le Agaga o le Atua lava e mafai ona fa'aosofia ai.”
GSAM 305.1Ua tusi mai se tasi ua mata'ituina ma le fa'aeteete ana molimau talu mai le amataga:
GSAM 305.1“E uiga i le faiga manino ma le fa'amaoni, e aunoa ma le mata'u po o le fa'aitu'au, ou te fia molimau atu e leai lava se fa'aletonu i lea mea. Pe ana fa'apea o fa'amoemoega matagā ma leaga na pulea lenei galuega, semanū e suitulaga upu fa'avi'ivi'i i molimau e su'esu'e ai loto ma a'oa'iga fa'amaoni. O le tautala manino, o a'oa'iga fa'amaoni i mea sese, o upu o le alofa mutimutivale ma le fa'amalosi'au i agaga gatete ua iloa lo latou mana'omia o le Faaola, ma ē ua sesē o loo sa'ili ma le lotomaulalo e lafoa'i o latou sese,—o mea ia ua faia ai se vaega tele o ana galuega. Ua tu'uina mai ma le fa'amaoni tele le molimau a Mrs. White, e a'oa'i ai mea sese a le to'atele o tagata sa ia va'aia i se fa'aaliga, ma ua matuā lelei lava lona aogā.”15
GSAM 305Ta'iala Lona Lima—E Fa'ataunu'uina Valoaga Moni
GSAM 305.2Ua i ai se fa'amatalaga a Mose e uiga i perofeta moni ma perofeta pepelo, o loo maua i le mataupu e sefulu valu o Teuteronome. Ua ia fai mai: “Pe fa'apefea ona matou iloa le upu e le'i fetalai mai ai le Ali'i? Pe a tautala se perofeta i le suafa o le Ali'i, a e lē mulimuli mai lea mea, e lē taunuu fo'i, o le upu lena e le'i fetalai mai ai le Ali'i, a ua tautala fa'amaualuga i ai le perofeta; aua e te mata'u iā te ia.”16
GSAM 305.3O lea lava mea o loo maua fo'i i mau nei: “O ai ea na te fai mai se upu, ona taunuu lea, pe a lē poloa'iina e le Ali'i?”17 Na fa'apea mai e uiga i le perofeta o Samuelu, “O mea uma e fai mai ai o ia e taunuu lava.”18 “Pe a taunuu le upu a le perofeta, ona iloa ai lea o le perofeta, ua auina moni mai lava o ia e le Ali'i.”19
GSAM 306.1Ua silia nei i le limasefulu tolu tausaga talu ona va'ai muamua le tusitala iā Mrs. E. G. White i se fa'aaliga fa'aperofeta. I nei tausaga sa ia tu'uina mai ai le tele o fa'amatalaga fa'aperofeta e uiga i mea o le a tutupu. O nisi o nei valoaga e fa'atatau i mea ua uma ona fa'ataunu'uina, o nisi o loo fa'agasolo ona fa'ataunu'uina, a o isi o le a fa'ataunu'uina i le lumana'i. E uiga i valoaga e fa'atatau i mea ua mavae po o mea o loo tutupu nei, ou te lē iloa se mea e tasi ua lē taunuu. Ua uma ona ta'ua nisi o ana valoaga. O isi o le a maua i mataupu o loo mulimuli mai, a o fa'aauau la tatou tala.
GSAM 306Ta'iala Lona Ono—E Lē o Vavega le Tofotofoga o se Perofeta Moni
GSAM 306.2Ua ta'utino mai e le to'atele o tusitala i mataupu fa'alelotu, ma ua ta'ua i tusi e fa'amatala ai le Tusi Paia, o le fa'ailoga o se perofeta moni o le faia lea o vavega. E le'i maua lava e i tatou i le Tusi Paia se ta'iala fa'apenei.
GSAM 306.3Afai o le faia o vavega o le fa'amaoniga lea o se perofeta moni, ona ta'utinoina ai lea o le “perofeta pepelo” ua ta'ua i le Fa'aaliga 19:20 o se perofeta moni lava; auā ua fai mai, “Na pu'eina le manu fe'ai, fa'atasi ma ia le perofeta pepelo na faia vavega i ona luma, na ia fa'asesēina ai ē na maua le fa'ailoga a le manu fe'ai.” Ua toe ta'ua lea lava mana i le Fa'aaliga 13:14, o loo fa'asesēina “ē nonofo i le lalolagi i vavega na tu'uina atu iā te ia le mana e fai i luma o le manu fe'ai.” Pe a fa'aaogā fa'apea lenei ta'iala, o le a tatau fo'i ona tatou fa'ai'u atu, e o'o lava iā Satani o se perofeta moni. O nisi agaga o le a faia se galuega fa'apitoa i le mala lona ono o mala mulimuli e fitu, ua ta'ua o “agaga o temoni, o loo faia vavega, e ō atu i tupu o le lalolagi ma le lalolagi uma, e fa'apotopoto iā te i latou i le taua o lena aso tele o le Atua e ona le malosi uma lava.”20
GSAM 306.4Afai e maua le fa'amaoniga o se perofeta moni i vavega na te faia a o lē i ai o ia i se fa'aaliga, e to'aitiiti lava perofeta o le Tusi Paia tatou te maua e sao i lea tofotofoga, aemaise pe a fa'avae le fa'ai'uga i mea ua tusia e uiga i a latou galuega. E moni ua tusia vavega na faia e nisi o perofeta, e pei o Elia, Elisaia, ma Paulo. Ae o ai ua maua i le Tusi Paia se tala i vavega a Isaia, Ieremia, Tanielu, Hosea, Ioelu, Amosa, ma isi? Ae o perofeta moni lava i latou a le Ali'i, ma ua fa'aalia lo latou moni i ta'iala ua tu'uina mai e le Ali'i e tofotofo ai se perofeta moni.
GSAM 307.1O le faia o vavega e lē o le tofotofoga lea o se perofeta moni, ua manino ona iloa pe a faitau i le tala a le Tusi Paia e uiga iā Ioane le Papatiso. O ia o se perofeta, ua fa'aalia i le valoaga a lona tamā o Sakaria, a o ia fa'amatala le fa'aaliga na foa'iina mai e le Atua iā te ia e uiga i le atalii o le a fanau mai iā te ia: “O oe fo'i, le tama e, e ta'ua oe o le perofeta a le Silisili Ese; auā e te muamua atu i luma o le Ali'i e sauni ona ala.”21 Na silafia e lo tatou Faaola lava ia o Ioane o le perofeta tonu lea e saunia le ala i ona luma; auā na ia fetalai e uiga iā Ioane: “A o le ā ea na outou ō atu e va'ai i ai? O se perofeta ea? Ioe, ou te fai atu iā te outou, e sili lava o ia i le perofeta. O ia lenei ua tusia ai, Fa'auta, ou te auina atu la'u avefe'au i ou luma, o lē e saunia lou ala i ou luma. Auā ou te fai atu iā te outou, I ē ua fananau mai i fafine, e leai se perofeta e sili atu iā Ioane le Papatiso?”22
GSAM 307.2O lenei la, o se fetalaiga manino a le Faaola, o Ioane o se perofeta. Se'i o tatou fa'aaogā le tofotofoga o le faia o vavega ma va'ai i le i'uga. I le Tala Lelei na tusia e Ioane le folafola o le tala lelei, ua tatou maua ai upu nei: “E to'atele fo'i na ō ane iā te ia [Keriso], ma fai mai, E le'i faia e Ioane se vavega; a o mea uma na fai mai ai Ioane e uiga i lenei tagata e moni lava.”23 Ua lava lava lenei fa'amatalaga e tasi e matuā fa'aleaogāina ai le manatu, o le fa'ailoga o se perofeta moni o le faia lea o vavega.
GSAM 307.3O lenei ta'iala ua tu'uina mai i le Teuteronome 13:1-3, lea ua tatou ta'ua o le ta'iala lona ono i la tatou faitauga nei, ua tu'uina mai e puipui ai i tatou mai le tuliloa o so'o se mea ofoofogia po o se vavega, se'i vaganā ua tatou mua'i mātauina ma le fa'aeteete pe tata'i atu e atili latalata i le Ali'i, pe tata'i ese mai iā te ia. Ua ta'u mai lava e lenei mau iā i tatou ina ia fa'aaogā ta'iala uma, aemaise ia va'ai pe ōgatasi ma le Atua ma lana tulafono.
GSAM 308.1Ua a'oa'o mai lenei ta'iala lona ono, afai e faia se vavega e se tagata fa'afoliga, pe a tofotofoina ma le fa'aeteete o le a iloa fa'atasi ma lea mea le liliu ese mai upu moni paia o le afioga a le Atua, ma le tu'u ifo o le tulaga e tatau ona ausia ina ia fa'amalie ai se loto ua naunau e 'alo i le ala o le fa'afitia o le tagata lava ia. Ua fa'ataga e le Ali'i se tagata fa'afoliga fa'apena e tula'i mai, ma o lona ala e fai ma tofotofoga i le atalii moni o le Atua, ua tu'uina atu ai iā te ia le avanoa e fuafua ma le fa'aeteete le mea e aga'i i ai po o le fa'amoemoe o lea tagata fai vavega. O ē pipi'i mau i le afioga a le Atua, nai lo le tosina atu i le tagata fai vavega pepelo, e tula'i mai ma le malosi i le Atua ona o lea mea na tupu iā te i latou.
GSAM 308.2I nei aso leaga, ua to'atele o loo fai mai o i latou o “ē fa'amalolo i le fa'atuatua,” “ē fa'amalolo i le mana o le Atua,” “ē fa'amalolo o le Saienisi Kerisiano,” ma isi. E lelei ona fa'aaogā ma le toto'a ta'iala a le Tusi Paia; auā e mana'omia ta'iala mai le Atua, ma le fa'amalamalamaga a le Agaga Paia, ina ia mafai ona tatou iloa manino le manatu ma le fa'amoemoe o nisi o nei “tagata fa'amalolo,” ona o le matuā fa'a'ole'ole o a latou galuega. A o isi ua latou matuā lē amana'ia fa'aaliali le tulafono a le Atua ma lana upu moni mo lenei taimi. I nisi taimi ua feita ai nei “tagata fa'amalolo” fa'afoliga e pei o ni tagata ua tumu i le valea, pe a tau lava ina ta'ua le tulafono a le Atua. E pei lava ona mautinoa ua i ai i le Ali'i se fe'au e folafola ai lana tulafono paia, e fa'apenā fo'i ona mautinoa ua leai ni uuna'iga a le Agaga Paia i tagata o ē fai upu leaga i lana tulafono, ma tutuli ese mai o latou luma ē tau lava ina ta'ua lea tulafono.
GSAM 308Ta'iala Lona Fitu—O Latou Fua
GSAM 308.3“Ia outou fa'aeteete i perofeta pepelo, o ē ō mai iā te outou i ofu mamoe, a o totonu o luko fe'ai lava i latou. Tou te iloa i latou i o latou fua. Pe tau mai ea e tagata ni vine mai la'au tuitui, po o mati mai la'au talatala? E fa'apenā fo'i la'au lelei uma e fua mai i fua lelei; a o le la'au leaga e fua mai i fua leaga. E lē mafai e le la'au lelei ona fua mai i fua leaga, e lē mafai fo'i e le la'au leaga ona fua mai i fua lelei. O la'au uma e lē fua mai i fua lelei, e taia i lalo ma lafo i le afi. O lenei, o o latou fua tou te iloa ai i latou.”24
GSAM 309.1Ua fa'ailoa mai e nei fetalaiga a lo tatou Faaola le mea moni, o le a i ai le meaalofa o valoaga i le vaitaimi o le tala lelei. Ana fa'apea e leai ni perofeta moni e fesoota'i ma le galuega, ma o fa'aaliga fa'aperofeta uma e mai se puna leaga, pe lē semanū ea na ia fetalai mai, “Ia outou fa'aeteete i perofeta”? O lona ta'u manino mai iā i tatou le ala e iloa ai ituaiga ta'itasi, o le fa'amaoniga sili lea, o le a i ai le meaalofa moni o valoaga i le galuega a le Fa'amafanafana, o le Agaga Paia, e fa'aali mai ai “mea o le a oo mai” (Ioane 16:13). O lenei ta'iala, lea ua tatou ta'ua o le ta'iala lona fitu i la tatou faitauga, e lē mafai ona sesē. E le'i fetalai Keriso, atonu tou te iloa i latou i o latou fua, ae na ia fetalai ma le mautinoa, “o o latou fua tou te iloa ai i latou.”
GSAM 309.2Tatou te fesili, O ā fua e tatau ona va'aia i le galuega a meaalofa moni a le Agaga o le Atua? E maua le tali i le fa'amatalaga a Paulo e uiga i le finagalo o le Ali'i i le tu'uina o meaalofa i le ekalesia: “O le mea lea ua ia fetalai mai ai, Ina ua afio a'e o ia i lugā, na ia ta'ita'i fa'atagataotauaina le tafeaga, ma foa'i atu meaalofa i tagata.... Na ia foa'iina atu fo'i nisi e fai ma aposetolo, o nisi e fai ma perofeta, o nisi e fai ma folafola o le tala lelei, o nisi e fai ma leoleo ma faia'oga; ina ia fa'aatoatoaina le au paia, mo le galuega o le auaunaga, e ati a'e ai le tino o Keriso; se'ia tatou o'o uma lava i le lotogatasi [“i totonu o le lotogatasi,” i le itu o le itulau] i le fa'atuatua ma le iloa lelei o le Alo o le Atua, ia avea ma tagata matua atoatoa, ia o'o i le fua o le tino e tusa ma le tumu o Keriso.”25
GSAM 309.3Ia fa'aaogā lenei ta'iala i le meaalofa fa'aperofeta ua fesoota'i ma le fe'au a le agelu lona tolu talu mai lona amataga, ona fa'apefea lea o le i'uga?—Ua tatou iloa, o a'oa'oga faifai pea ua tu'uina mai e ala iā Mrs. White, ua tata'i atu i le lotogatasi ma le ōgatasi, ua apoapoa'i mai ia “fefautua'ai fa'atasi,” ma ia “pipii fa'atasi,” ia tasi ma Keriso, ma fa'apea ona fa'amautinoa ai le mafutaga moni ma le lotogatasi o le tasi ma le isi.
GSAM 310.1Ua fai mai ma le tauemu nisi o ē tetee i lenei galuega, “Ana leai fa'aaliga a Mrs. White o loo outou maua, semanū ua leva ona malepe la outou galuega.” Ua tali atu i ai, “E moni lena mea; auā o lena auala ua tu'uina mai ai e le Ali'i fautuaga, lapata'iga, ma le malamalama, ma ua aveesea ai fevaevaea'iga, ma ua manuia ai le galuega.” O lea, o le mea na latou fuafuaina e fai ma tu'ua'iga e tetee atu i le meaalofa, o le mea moni o se molimau lea o ona fua o fua lava ia o le meaalofa moni o valoaga.
GSAM 310.2Ua onosefulu tausaga ma sili atu ona tofotofoina fa'aaliga o le meaalofa o valoaga e ala iā Mrs. White i nei ta'iala e fitu, ma i mea ta'itasi uma lava ua latou ausia ai mea e mana'omia mo se valoaga moni.
Notes
- Efeso 4:11-13. ↩
- Ioelu 2:28, 29. ↩
- 1 Tesalonia 5:20, 21. ↩
- Fa'aaliga 16:14. ↩
- Isaia 8:16-20. ↩
- Failauga 9:6, 5. ↩
- Molimau mo le Ekalesia, Tusi 5, itulau 663-667. ↩
- 1 Ioane 4:1-3. ↩
- Efeso 3:17; Kolose 1:27. ↩
- 1 Ioane 4:5. ↩
- Isaia 30:10, 11. ↩
- Iakopo 5:10. ↩
- Ieremia 23:16. ↩
- Fuaiupu 17. ↩
- J. N. Andrews, i le Iloiloga ma le Avefe'au o Tesema, 1867. ↩
- Teuteronome 18:21, 22. ↩
- Auega 3:37. ↩
- 1 Samuelu 9:6. ↩
- Ieremia 28:9. ↩
- Fa'aaliga 16:14. ↩
- Luka 1:76. ↩
- Luka 7:26-28. ↩
- Ioane 10:41. ↩
- Mataio 7:15-20. ↩
- Efeso 4:8-13. ↩