Kgaolo 15 — Lesedi le le Oketsegang le Dikgakgamatso tse Dikgolo

GSAM 235.1“Lo seka lwa ba lwa lebala malatsi ale a a molemo a lo neng lwa simolola go ithuta kaga Keresete mo go one. Gakologelwang ka fa lo neng lwa itshegeletsa ka teng mo Moreneng le fa go ne go raya pogiso e e boitshegang. Ka dinako tse dingwe lo ne lo tshegwa lo bo lo itewe, mme ka dinako tse dingwe lo ne lo tle lo lebelele lo bo lo utlwele ba bangwe botlhoko ba boga jaaka lona.”¹

GSAM 235.2Nako go tloga ka kgobegelo-maikutlo ya 1844 go fitlha lesedi le le phepafetseng mabapi le lefelo le le boitshepo le molaetsa wa moengele wa boraro le ne le tlhagelela, e ne e le nako ya teko e e kgethegileng. Baadventista ba ba neng ba santse ba gagamaletse gore ba ne ba nepile mo motsamaong wa nako e e fetileng, ruri e ne e le “selo se se sotliwang” mo go ba ba neng ba akanya gore molaetsa e ne e le go palelwa gotlhelele; mme ka lebaka le, ba ne ba kgobiwa thata. Seno ba ne ba ka se itshokela ka boitumelo fa ba ntse ba itshwareletse mo Morena ka tumelo, e bile ba na le go nna teng ga Moya wa gagwe o o Boitshepo.

GSAM 235Dintlha di le Pedi tse di Kgethegileng tsa Tlhaselo

GSAM 235.3Satane o ne a na le dintlha di le pedi tse di kgethegileng tsa go leka batho ba Baadventista. Ya ntlha e ne e le go dira gore ba ba neng ba tiile mo tumelong ya gore nako ya boporofeti e fedile, ba dumele gore go tla ga bobedi ga ga Keresete e ne e le go tla ga semoya, le gore ka tsela nngwe o dirile go tla gono kwa bokhutlong jwa malatsi a le dikete di le pedi le makgolo a mararo. Ya bobedi e ne e le go tlhotlheletsa ba ba neng ba okaoka mabapi le maitemogelo a bone a nako e e fetileng, gore ba a tlogele gotlhelele. Ka jalo, fa boammaaruri mabapi le lefelo le le boitshepo le molaetsa wa moengele wa boraro bo ne bo senolwa ka bonya go tswa mo Dikwalong, melaetsa ya Mowa wa Modimo, ka neo ya boporofeti, e ne ya tiisa motsamao wa nako e e fetileng, e o bitsa “lesedi le le phatsimang” le Modimo a le tlhomileng kwa tshimologong ya tsela, go bonesa tsela yotlhe go fitlha kwa motseng, mme ya supa bosupi jwa dikwalo jwa gore go tla ga bobedi ga ga Keresete go tla nna ka sebele le ka namana, mme ka jalo go ne go sa kgone go nna tiragalo ya kwa bokhutlong jwa “malatsi.”

GSAM 236Diponagatso tse di gakgamatsang

GSAM 236.1Fa Morena a bua le batho ba gagwe ka diponatshego mo malatsing a bofelo a, a re ne re se kitla re solofela gore mo ponatshegong ka boyone go nne le matshwao a a bonalang a bomodimo? Matshwao a a bonala mo diponatshegong tsa ga Mohumagadi E. G. White. Tiragalo ya diponatshegelo ka bo tsone, jaaka go bontshitswe mo Kgaolong 13, ke kgakgamatso fela; mme go na le dintlha di le dintsi tse di gakgamatsang tse di amanang le dipono tsa gagwe tsa pele, tse o tla di lemogang fa o tswelela go bala tiro eno; mme a re ka solofela gore go nne ka tsela e sele mo neong ya mofuta o, e e diretsweng ke Modimo go gapa tlhokomelo ya batho, le go ba dira gore ba re, jaaka Moshe, “Ke tla fapoga, ke bone pono e e kgatlhisang e”? Polelo e e motlhofo ya mosetsana yo o humanegileng, yo o lwalang, yo o bokoa, yo go neng go lebega a le gaufi le loso, ya gore Morena o mo neile pono, e ka bo e sa lekana go dira seno. Diponagalo tse di gakgamatsang tse di amanang le dipono di ne tsa tsosa kgatlhego mo go tsone, mme ga kopiwa gore mosetsana a tsamaye go tswa go lefelo le lengwe go ya go le lengwe a anele se Morena a mo laetseng go se itsise ba bangwe.

GSAM 236Dipontsho tse di Tlhomologileng mo Ponong ya Boraro

GSAM 236.2Fano ke tla bega dintlha dingwe mabapi le ponatshegelo ya gagwe ya boraro, e e neng ya mo neelwa kwa ntlong ya ga rraagwe, e e umakilweng mo Kgaolong ya 13, jaaka ke boleletswe ke rraagwe le mmaagwe Mohumagadi White, ke kgaitsadie, Mohumagadi Sarah Belden, le ba bangwe.

GSAM 236.3Mo phaposing e ponatshego e neng e le mo go yone, go ne go rapaletse mo godimo ga tafole ya diaparo Baebele e kgolo thata ya lelapa. E ne e le nngwe ya kgatiso e e gatisitsweng kwa Boston ke Joseph Teale, ka ngwaga wa 1822. Buka e na le di-intšhe di le lesome le borobabobedi ka di le lesome le motso o le mongwe, bokima jwa di-intšhe di le nne, mme e bokete jwa diponto di feta di le lesome le borobabobedi go sekae. Fa a le mo ponong, o ne a tsoga, mme a tsaya Baebele e e bokete e mo letsogong la gagwe la molema, e butswe, mme a e tsholeletsa kwa ntle ka sekhutlo sa dikerii di le masome a robongwe le mmele wa gagwe; mme go tswa foo, ka lobaka lo lo fetang sephatlo sa ura, ka letsogo la gagwe la moja, a ne a phetla ditemana go tswa mo lefelong le lengwe go ya go le lengwe, a supa ditemana tse di farologaneng tsa Dikwalo, tse a neng a di phetaganya fa matlho a gagwe a lebile kwa godimo, le go leba ntlha e e fapaneng le ya buka. Kgaitsadie Sarah (yo moragonyana a neng a nna mosadi wa ga Stephen Belden), kgotsa, ka dinako tse dingwe, mongwe o sele yo o neng a le teng, o ne a leba temana nngwe le nngwe e monwana wa gagwe o neng o supa yone, mme a bona sentle gore mo kgannyeng nngwe le nngwe o ne a boeletsa temana e monwana wa gagwe o neng o ikhuditse mo go yone. Mma Harmon o ne a bolela gore morwadie Ellen mo seemong sa gagwe sa tlholego “o ne a sa kgone, ka ntlha ya go tlhoka nonofo, go tsholeletsa Baebele e e bokete eo go tswa mo tafoleng ya diaparo; mme mo ponong o ne a e tshwere motlhofo fela, go lebega jaaka e kete e ne e le fela Tesetamente ya kgwatlha.”

GSAM 237.1Ruri, se e ne e le kgakgamatso!—mosetsana yo o bokoa, yo o neng a le boima jwa diponto di le masome a supa fela, a tshwere Baebele e e bokete ka lobaka lo lo fetang sephatlo sa ura mo seemong se monna yo o nonofileng a neng a ka se ka a kgona go se tshwara metsotso e le mebedi; gape, a ntse a fapogela kwa dipolelong tse dingwe tsa Dikwalo tse di neng di supa nako le nako e le yone polelo e a neng a e boaboeletsa, fa matlho a gagwe a ne a lebeletse kwa godimo mme a leba ntlheng e sele go tswa mo bukeng; mme la bofelo, lentswe le le tswang mo mothong yo o se nang motsamao wa makgwafo kgotsa phefo mo mmeleng, le le neng le boaboeletsa sentle dipolelo tsa Dikwalo tse di neng di supilwe,—seo ruri se kwa godimo ga tatofatso ya gore se dirilwe ke maatla a motho, kgotsa gore ke ditlamorago tsa bolwetse. Ba ba neng ba se bona ba ne ba go tsaya e le pontsho e e phepafetseng ya Mowa wa Yo o neng a bua go tswa mo setlhatshaneng se se shang. Dipontsho tse di ntseng jaana mo ponong ya boraro ya ga Mohumagatsana Harmon, fa di ne di itsege, di ne di na le bosupi jo bo kgodisang gore maatla a a fetang a botho a ne a le mo diponong tseo.

GSAM 237Pono ya kwa Topsham

GSAM 237.2Ka bonako fela morago ga tiragalo eno, phuthego ya Baadventista kwa Topsham, e e leng dimaele di ka nna masome a mararo kwa bokone-botlhaba jwa Portland, Maine, e sena go utlwa ka ga ditiro tsa Morena mo go Mohumagatsana Ellen G. Harmon, ya mo laletsa go ya kwa lefelong leo. Taletso e ne ya amogelwa, mme ka jalo a etela Topsham lekgetlho la ntlha. Dikopano tsa Baadventista ka nako eo di ne di tshwarelwa kwa ntlong ya ga Rre Curtiss. Mohumagadi Frances Lunt (yo pele e neng e le Mohumagatsana Frances Howland), wa kwa Oakland, Cal., o mphile polelo e e latelang, ya letlha la Ferikgong 19, 1890:—

GSAM 238.1“Nna, le ba lelwapa la ga rre, re ne re tsena dipitso tsa ga Kgaitsadi Harmon kwa Topsham, ka 1845, mme ka nako ya dipitso tseo o ne a nna le pono. E ne e le la ntlha re mmona a na le pono. Nngwe ya Baebele tseo tsa bogologolo [Baebele ya Lelapa la ga Teale, e e bokete jwa diponto di le lesome le borobabobedi] e ne e le ya ga Mokaulengwe Curtiss. Baebele e kgolo e, e ne ya tsewa mo tafoleng ya diaparo ke Kgaitsadi Harmon a le mo ponong, mme a supa ditemana tsa Dikwalo a ntse a pitikolola ditsebe, fa matlho a gagwe a lebeletse kwa godimo, a le kgakala le buka. Ditemana tse a neng a di boeletsa e ne e le mafoko a thuto, kgothatso, kgotsa kgalemo. Selo se sengwe se se sa tlwaelegang ka ponagalo eo ka nako eo e ne e le maemo a buka. E ne e tshwerwe mo seatleng sa gagwe se se bulegileng ka sekhutlo sa dikerii di le masome a mane le botlhano, mme go ne go se ope yo mongwe yo o neng a ka kgona go tshwara buka epe ka sekhutlo se se tshwanang kwantle ga gore e relele ka bonako mo diatleng; mme Kgaitsadi Harmon o ne a tshwara Baebele eno ka sekhutlo seo ka metsotso e le mmalwa, ka go tiisa jaaka e kete e kgomareditswe mo seatleng sa gagwe, a ntse a tsamaya go tswa go yo mongwe go ya go yo mongwe mo phaposing.”

GSAM 238Bosupi jwa ga Mohumagadi Truesdail

GSAM 238.2Polelo e nngwe mabapi le ponatshegelo e yone e, e tswa go Mohumagadi M. C. Truesdail, wa kwa Trenton, Mo., ya letlha la 27 Ferikgong, 1891. O bua jaana:—

GSAM 238.3“Ke ne ke na le dingwaga di le lesome le botlhano ka 1845, mme ke ne ke le teng ka nako ya ketelo ya ntlha ya ga Kgaitsadi Harmon kwa Topsham, fa a ne a na le pono kwa ntlong ya ga Mokaulengwe Curtiss, kwa a neng a tsaya Baebele e kgolo ya lelwapa mme a e tsholeletsa kwa godimo ka mokgwa o ope wa ba bangwe a neng a ka se kgone go tshwara buka ka seatla kwantle ga gore e relele ka bonako.

GSAM 238.4“Kgaitsadi Harmon o ne a le mo ponong go feta diura di le pedi. E ne e le pontsho e e gakgamatsang go gaisa ya maatla a Modimo e ke kileng ka e bona, mme ke mmonye a le mo ponong go feta makgetlho a le lesome le bobedi. Dinako tseo ka gale e ne e le tsa boineelo jo bo tseneletseng le boitlhatlhobo, mme eno e ne ya di feta tsotlhe. Ao! re ne re roroma jang fa Kgosi ya legodimo e ne e re ruta ka sedirisiwa sa gagwe se se bokoa; fa a ne a re bala ditemana tse di kgothatsang le tse di maleba mo seemong sa rona se se thata; jaaka Bahebera 2:2, 3; Jakobe 5:7, 8; Bahebera 10:35, 39; 1 Petere 1:7; Luke 12:32-37, le tse dingwe tse dintsi, a tshwere Baebele e kgolo ya lelapa kwa godimo thata mo ke neng ka patelesega go ema mo setulong gore ke bale kwa a neng a supa teng. Ga ke dumele gore Kgaitsadi Harmon o ne a nkgaisa ka boleele ka di-intšhe di feta pedi.”

GSAM 239.1Diponagatso tse di ntseng jalo di ne tsa tlhomamisetsa ba ba pelotshweu gore maatla a a fetang a botho a ne a laola sedirisiwa se se boikokobetso, mme go ne ga tla dikopo go tswa kwa dikarolong tse di farologaneng tsa New England gore a tle go neela bosupi jwa gagwe.

GSAM 239Go Bereka ka Diatla e le Boleo

GSAM 239.2Go ise go ye kae morago ga se, Mohumagatsana Harmon o ne a laelwa, mo ponong, go etela Paris, kwa Maine, kwa go neng go na le batho ba ba neng ba dumela gore ke boleo go dira ditiro tsa diatla. Moruti Stephens, wa kwa Woodstock, Maine, e ne e le moeteledipele mo phoshong eno, mme o ne a na le tlhotlheletso e kgolo mo go ba bangwe. Pele ga foo e ne e le moreri wa Methodist, mme a tsewa e le Mokeresete yo o boikokobetso, yo o ikanyegang. O ne a gapile tshepo ya ba le bantsi ka ntlha ya tlhwaafalo ya gagwe mo boammaaruring, le ka botshelo jwa gagwe jo bo neng bo lebega bo le boitshepo, se se neng sa dira gore bangwe ba dumele gore o laolwa ka go kgethega ke Modimo. Morena o ne a naya Mohumagatsana Harmon kgalemo ka ga ene. O ne a bolela gore o ne a tsamaya kgatlhanong le lefoko la Modimo ka go tlogela tiro, ka go rotloetsa diphoso tsa gagwe mo go ba bangwe, le ka go kgalemela botlhe ba ba neng ba sa di amogele. O ne a gana bosupi jotlhe jo Morena a bo mo neileng go mo tlhatswa pelo gore o ne a le mo phosong, mme a gana go dumela diphoso tsa gagwe. O ne a latela maikutlo fela, a tsaya mesepele e e lapisang, a tsamaya dikgala tse ditelele, kwa a neng a tla amogela fela kgokgontsho, mme a tsaya gore mo go seno sotlhe o ne a bogela Keresete. Mogopolo le katlholo ya gagwe di ne di beilwe kwa thoko.

GSAM 239.3Mabapi le bosupi jwa ga Mohumagatsana Harmon le dipholo tsa kgang, ke tla nopola go tswa mo lekwalong le le amogetsweng go tswa go Mohumagadi M. C. Truesdail, yo ka nako eo a neng a nna kwa Paris, Maine. Morago ga go neela dintlha dingwe tse di tsamaelanang le tse di fa godimo, o bua jaana:—

GSAM 240.1“Go ne ga nna le boipolelo go tswa go botlhe kwantle ga moeteledipele wa bone, Jesse Stephens. Kgaitsadi Harmon o ne a mo tlhagisa gore fa a sa ikokobetse ka go ipolela diphoso tsa gagwe, o tla bo a fetsa botshelo jwa gagwe go ise go ye kae. Botlhe ba ne ba tlhaloganya seno e le boporofeti jwa gore o tla ipolaya ka tsela nngwe.”

GSAM 240.2Se se latelang ke ditiragalo tse di latetseng mo kgannyeng ya gagwe:—

GSAM 240.3“Fa setlhotswana sa gagwe se sena go mo tlogela, o ne a hutsafala, mme go ise go ye kae a latlhegelwa ke tlhaloganyo, a gana go ja sepe se se apeilweng ke ba ba bosula. O ne a ise a utlwe ka go boa ga me go tswa kwa Massachusetts fa ke ne ke mo tlisetsa dijo tsa motshegare. O ne a botsa, fa a ne a ntsha letsogo la gagwe le le sesane mo phatlhatshatsheneng ya fensetere, ‘A Modimo o go rometse ka seno, Kgaitsadi Marian?’ Fa a bona karabo ya me e e neng e okaoka, o ne a gana go se leka. Maemo a gagwe a a utlwisang botlhoko, a tswaletswe mo phaposing e nnye kwa ga morwarraagwe (yo o neng a sa dumele), a nkgopotsa ka tlhagiso e e neng e rometswe kwa go ene ka bopelonomi go tswa kwa legodimong, e a neng a e gana ka manganga. O ne a isiwa kwa go ba ga bone malatsi a le mabedi morago ga ketelo eno e e hutsafatsang, kwa a neng a feleletsa botshelo jwa gagwe ka go ipolaya ka bonako, a dirisa diaparo tsa gagwe tsa bolao go itirela mogala.”²

GSAM 240Polelelopele e e Diragetseng

GSAM 240.4Ka selemo sa 1845, ka taletso ya ga Otis Nichols, Mohumagatsana Harmon o ne a etela Massachusetts, a patilwe ke kgaitsadie Sarah. Ba ne ba nna le lelwapa la ga Rre Nichols. Ene le mosadi wa gagwe ba ne ba tsamaya ka koloi ya bone, ba ba isa kwa mafelong a a farologaneng go tshwara dipitso, kwa Mohumagatsana Harmon a neng a neela bosupi jwa gagwe teng. Ka jalo o ne a kgona go etela Boston, Roxbury, le Carver. Ka nako ya ketelo ya bone ya bobedi kwa Boston, Mass., go ne ga diragala tiragalo e e kgatlhisang thata.

GSAM 240.5Kwa Boston le mo tikologong ya teng go ne go na le setlhopha sa batho ba ba feteletsang tumelo ba le bone ba neng ba dumela gore go dira ke boleo, molaetsa wa bone o mogolo e le gore, “Rekisang tse lo nang natso lo di neye ba ba tlhokang.” Ba ne ba re ba mo ngwageng wa boipelo, gore lefatshe le tshwanetse go ikhutsa, le gore bahumanegi ba tshwanetse go tshegediwa ba sa bereke. Sargent, Robbins, le ba bangwe ba ne e le baeteledipele. Ba ne ba nyatsa diponatshegelo e le tsa diabolosi, ka gonne diphoso tsa bone di ne di supilwe. Ba ne ba le bogale mo go botlhe ba ba neng ba sa dumele jaaka bone.

GSAM 241.1Fa Mohumagatsana Harmon le kgaitsadie ba ne ba etetse kwa ntlong ya ga Rre Nichols, Sargent le Robbins ba ne ba goroga go tswa kwa Boston go kopa thuso mo go ene, mme ba re ba tlile go mo etela, le go lala le ene bosigo joo. Rre Nichols o ne a araba a re o itumeletse go goroga ga bone, ka gonne Bomohumagatsana Sarah le Ellen Harmon ba ne ba le mo ntlong, mme o ne a eletsa gore ba itsane le bone. Ba fetola megopolo ya bone ka ponyo ya leitlho, mme ba se ka ba kgona go kgothadiwa go tsena mo ntlong. Rre Nichols o ne a botsa gore a Ellen a ka bolela molaetsa wa gagwe kwa Boston, mme ba ka reetsa, ba bo ba atlhola. “Ee,” ba ne ba re, “tla kwa Boston ka Sabatha e e tlang [go raya Sontaga, ka jaana ba ne ba ise ba amogele Sabatha]; re ka itumelela go nna le tshono ya go mo reetsa.”

GSAM 241.2Rre Nichols o mpoleletse kgang e kwa gae ga gagwe, kwa Dorchester, ka 1858. O ne a bolela gore o ne a setse a rulagantse gotlhe go ya kwa Boston ka Sontaga mo mosong ka koloi ya gagwe go isa Mohumagatsana Harmon kwa phuthegong e e neng e rulagantswe. Mo maitseboeng ao, ka nako ya dithapelo tsa lelapa, o ne a tsewa mo ponong. Fa a sena go tswa mo go yone, o ne a re, “Mokaulengwe Nichols, ga ke ye kwa Boston kamoso; Morena o mpontshitse gore ke tshwanetse go ya kwa Randolph. O na le tiro e ke tshwanetseng go e dira koo.” Rre Nichols o ne a tlotla lefoko la gagwe thata. O ne a solofeditse go mo isa kwa Boston ka letsatsi le le latelang, mme a botsa a tlhobaela, “Ke tla dira eng ka lefoko la me le ke le fileng Sargent le Robbins?” “O se ka wa tshwenyega ka seo,” ga bua Mohumagatsana Harmon, “Morena o mpoleletse gore ke ye ka tsela e sele.” “Ee,” ga bua Rre Nichols, “ga ke tlhaloganye.” “Morena o mpontshitse gore re tlaa e tlhaloganya fa re goroga koo,” ga bua Mohumagatsana Harmon. “Ee,” ga bua Rre Nichols, “ga go na tsela epe ya gore o goroge koo fa e se fela fa re ka ya go go isa, mme ga ke itse gore ke tlaa tlhalosetsa bakaulengwe kwa Boston jang.”

GSAM 241.2Rre Nichols o ne a tswelela ka go mpolelela gore “Kgaitsadi Harmon o bone boitimokanyi jwa bone mo ponong, gore ga go na go nna le phuthego kwa Boston ka Sontaga, gore Sargent, Robbins, le ba bangwe ba ba ganetsang ba tla kopana le phuthego e kgolo kwa Randolph (dimaele di le lesome le boraro go tswa kwa Boston) ka Sontaga; le gore re tshwanetse go kopana le baganetsi kwa Randolph, kwa phuthegong ya bone ka Sontaga, mme koo o ne a tla fiwa molaetsa o o ba lebisitsweng, o o neng o tla tlhotlheletsa ba ba ikanyegang, ba ba se nang tlhaolele, gore a dipono tsa gagwe di ne di le tsa Morena kgotsa di le tsa ga Satane.” Mo boemong jwa go ya kwa Boston mme morago ba ye kwa Randolph, sekgala sa dimaele di le masome a mabedi le bobedi, ba ne ba ya kwa Randolph ka tlhamalalo, ba goroga koo nako ya phuthego e le gaufi. Koo ba fitlhetse bone batho ba ba neng ba dumetse go kopana le bone kwa Boston. Rre Nichols a re, “Jaanong ke a tlhaloganya.”

GSAM 242.1Maiteko a ga Sargent le Robbins a go tila bosupi jwa ga Mohumagatsana Harmon, le mokgwa o a neng a kaelwa ka one gore a kopane le bone, di nnile le tlhotlheletso e kgolo mo megopolong ya bangwe ba ba neng ba le teng. Ka ga phuthego ka boyone, ke tla nopola pego jaaka e filwe ke Rre Nichols:—

GSAM 242Dipontsho tse di Tlhomologileng

GSAM 242.2“Kgaitsadi Ellen o ne a tseelwa mo ponong ka ditiro tse di sa tlwaelegang, mme a tswelela a bua mo ponong ka lentswe le le phepafetseng, le le neng le ka utlwiwa sentle ke botlhe ba ba neng ba le teng, go fitlha e ka nna ka nako ya phirimo. Sargent, Robbins, le French ba ne ba galefile thata, e bile ba tshogile, fa ba utlwa Kgaitsadi Ellen a bua mo ponong, e leng selo se ba neng ba bolela gore ke sa diabolosi; ba ne ba dirisa tlhotlheletso yotlhe ya bone le maatla a bone a mmele go senya maatla a pono eo. Ba ne ba kopana go opela ka lentswe le le kwa godimo, mme morago ba ne ba fapaanela go bua le go bala mo Baebeleng ka lentswe le le kwa godimo, gore Ellen a se ka a utlwala, go fitlhelela maatla a bone a fela, le diatla tsa bone di roroma mo ba neng ba sa tlhole ba kgona go bala mo Baebeleng, mme mo gare ga tlhakatlhakano le leratla leno lotlhe, lentswe le le phepa le le kwa godimo la ga Ellen, fa a ne a bua mo ponong, le ne le utlwalwa sentle ke botlhe ba ba neng ba le teng. Kganetso ya banna ba e ne ya tswelela fela fa ba ne ba sa ntse ba kgona go bua le go opela, le fa bangwe ba ditsala tsa bone ba ne ba ba kgalela, mme ba ba kopa gore ba eme. Mme Robbins a re, ‘Lo obamela modingwana: lo obamela namane ya gauta.’

GSAM 243.1“Rre Thayer, mong wa ntlo, o ne a sa kgotsofala ka botlalo gore ponatshego ya gagwe e ne e le ya diabolo, jaaka Robbins a ne a bolela. O ne a batla gore go lekelediwe ka tsela nngwe. O ne a utlwile gore diponatshego tsa maatla a ga Satane di ne di emisiwa ka go bula Baebele le go e baya mo mothong yo o leng mo ponatshegong, mme a kopa Sargent gore a e lekeletse ka tsela eo, mme a gana go dira jalo. Go tswa foo Rre Thayer a tsaya Baebele e kgolo e e bokete ya lelapa ya bogolo jwa quarto e e neng e beilwe mo tafoleng, e e neng e sa dirisiwe gantsi, a e bula, mme a e baya e butswe mo sehubeng sa ga Ellen fa a ne a le mo ponong, jaaka a ne a sekametse morago a itshegeditse ka lebota mo sekhutlong sa phaposi. Ka bonako fela jaaka Baebele e bewa mo go ene, o ne a ema ka dinao, mme a tsamaya go ya fa gare ga phaposi, a tshwere Baebele e butswe ka letsogo le le lengwe, e tsholeditswe kwa godimo ka bojotlhe jwa gagwe, mme a lebile kwa godimo ka tlhomamo, a bolela ka mokgwa o o masisi, ‘Bosupi jo bo tlhotlheleditsweng ke Modimo,’ kgotsa mafoko a a kayang se se tshwanang. Mme ka nako eo, fa Baebele e ne e tsholeditswe ka seatla se le sengwe, mme matlho a gagwe a lebeletse kwa godimo, e seng mo Baebeleng, o ne a tswelela lobaka lo loleele a pitikolola ditsebe ka seatla sa gagwe se sengwe, a baya monwana wa gagwe mo ditemaneng dingwe, mme a bua mafoko a tsone ka nepagalo ka lentswe le le masisi. Ba le bantsi ba ba neng ba le teng ba ne ba leba mo ditemaneng tse monwana wa gagwe o neng o supile kwa go tsone, go bona gore a o di bua sentle, ka gonne ka nako yone eo matlho a gagwe a ne a lebeletse kwa godimo. Dingwe tsa ditemana tse di neng di umakiwa e ne e le dikatlholo kgatlhanong le baikepi le batlhapatsi; mme tse dingwe e ne e le ditlhagiso le ditaelo tse di amanang le seemo sa rona sa jaanong.

GSAM 243Pono ya gagwe e Telele go Gaisa, e e Fetang Diura di le Thataro

GSAM 243.2“Mo seemong se, o ne a tswelela thapama yotlhe go fitlha fa letsatsi le batla go phirima, fa a tswa mo ponong. Fa Ellen a ema mo ponong ka dinao, a tshwere Baebele e e bokete e e bulegileng mo letsogong la gagwe, a bo a tsamaya mo phaposing, a bua ditemana tsa Dikwalo, Sargent, Robbins, le French ba ne ba didimala. Mo nakong e e neng e setse, ba ne ba tlhakatlhakane, mmogo le ba bangwe ba le bantsi; mme ba ne ba tswala matlho a bone, mme ba itshokela fela ba sa supe maikutlo a bone.”³

GSAM 244Lenyalo la ga Mohumagatsana Harmon

GSAM 244.1Ka Phatwe 30, 1846, Mohumagatsana E. G. Harmon le Moruti James White ba ne ba nyalana, mme mmogo ba ne ba direla go tsweledisa molaetsa. Mo ngwageng wa 1847, tiro ya bone e ne e lebagane thata le Maine le Massachusetts.

GSAM 244.2Ka Sabatha ya ntlha ya Moranang, Mohumagadi White o ne a fiwa pono e e kgatlhisang thata, kwa lelapeng la ga Stockbridge Howland, kwa Topsham, kwa dipitso di neng di tle di tshwarelwe teng ka gale ka nako eo. Pono eno ke e e umakilweng mo go Early Writings, kwa a neng a bona pono ya lefelo le le boitshepo le didirisiwa tsa lone, nako ya mathata, baitshepi ba tshaba go tswa mo ditoropong, baikepi ba ba dikologile, go gololwa ga bone ka lentswe la Modimo, jubile, go tla ga Morena ka kariki ya maru, jalo jalo. Go ka nna molemo go ela tlhoko dingwe tsa ditiro tsa gagwe fa a ne a le mo ponong eno.

GSAM 244Dibibela di le dintsi tse di Dirisitsweng mo Ponong

GSAM 244.3Mohumagadi Frances Lunt (morwadia S. Howland), ka di 19 tsa Ferikgong, 1890, o ne a mpolelela jaana:

GSAM 244.3“Go ne go na le tafole ka fa letlhakoreng la phaposi kwa go neng go tshwarelwa dipokano teng, e e neng e na le dibuka di le mmalwa tsa mefuta e e farologaneng, mo gare ga tsone go ne go na le Dibibela di le mmalwa tsa bogolo jo bo tlwaelegileng. Fa a le mo ponong, Mohumagadi White o ne a ema, a ya kwa tafoleng, a tsaya Baebele a sa ame buka epe e nngwe, mme a e tshwara e butswe fa godimo ga tlhogo ka letsogo la molema, monwana wa go supa wa letsogo la moja o lebeletse mo go se a neng a se pheta mo Dikwalong jaaka a eme fa pele ga motho yo temana e neng e le ya gagwe, mme morago a baya buka e e butsweng mo sehubeng sa motho yo a neng a phetela dikwalo fa pele ga gagwe. Fa a boela kwa tafoleng, o ne a tsaya Baebele e nngwe, mme ka mokgwa o o tshwanang a boeletsa temana e nngwe ya Dikwalo mme a baya Baebele e e bulegileng mo sehubeng sa motho yo a neng a bua le ene. Tiro eno e ne ya boeletswa mo bathong ba ka nna batlhano kgotsa ba le barataro; morago ga moo ka mokgwa o o manontlhotlho, a nna mo setulong, fa matlho a gagwe a ntse a lebeletse kwa godimo nako yotlhe, a sa lebe buka.”

GSAM 245.1Ka ga seno Mohumagadi Truesdail a re:

GSAM 245.1“Ke ne ke le teng [Moranang, 1847] fa Kgaitsadi White a ya kwa tafoleng mme a tsaya Baebele e nngwe morago ga e nngwe go tswa mo dibukeng tse di neng di le mo tafoleng, a baya Baebele mo sehubeng sa motho yo a neng a mo buiseditse temana ya Dikwalo. Seno se ne sa dirwa fa matlho a gagwe a ne a lebeletse kwa legodimong. Mo tiragalong eno o ne a tshwere Baebele kwa godimo ga tlhogo ya gagwe fa a ntse a bua le nna; mme a bo a e baya mo sehubeng sa me. Temana e ke e filweng e ne e le 2 Bakorintha 6:17.”⁴

GSAM 245.2Mo lekwalong le le tswang kwa go Mohumagadi Frances Lunt, o bolela maina a batho ba le bararo ba ba neng ba le teng ka nako eo, le ba Dibaebele di neng di bewa mo go bone fa Mohumagadi White a ne a bua le bone ka temana ya mongwe le mongwe, mme mo maineng ao go ne go na le la ga Mohumagadi Truesdail.

GSAM 245Tiro ya ntlha e ne e le mo gare ga Badumedi ba go Tla ga Morena

GSAM 245.3Tiro ya ga Mohumagatsana Harmon, ka fa tlase ga kaelo ya neo ya boporofeti, go tloga ka Ferikgong, 1845, go fitlha ka dikgakologo tsa 1846, mo e ka nnang dikgwedi di le lesome le borobabobedi, e ne e le le “badumedi” ba go atamela ga ga Keresete, ba a neng a tsamaya le bone pele. Morago ga go fela ga malatsi a le dikete di le pedi le makgolo a mararo (Oct. 22, 1844), go fitlha lebaka la go swaba ga bone le mofuta wa tiragalo e e neng ya diragala ka nako eo di tlhaloganngwa, go ne go tla nna le kotsi ya gore badumedi ba kobeye mo megopolong e e phoso, kgotsa ba tlogele gotlhelele maitemogelo a bone a nako e e fetileng. Molaetsa wa gagwe o ne o le go ba ba ntseng jalo: “Motsamao o o fetileng e ne e le wa Modimo. Ngaparelang tumelo ya lona. Morena o santse a na le tiro ya batho ba gagwe. Ithute Baebele. Batlisisa lefoko, mme o tla bona lesedi.”

GSAM 245.4Taelo e e tsamaelana le leano la Morena. Maikemisetso a gagwe e ntse e le gore melaetsa ya gagwe e e kgethegileng go batho ba gagwe e tseege, ka nako ya yone, go tswa mo lefokong la gagwe, mme foo mpho ya boporofeti e tla “sa bobedi,” go tiisa le go aga badumedi.

GSAM 246.1Sekao se se gakgamatsang sa ntlha eno se bonwa mo kgannyeng ya ga Korneleo jaaka go kwadilwe mo go Ditiro tsa Baaposetoloi. Moengele wa Modimo o ne a mo tlhagelela mme a mo naya ponatshegelo a le mo ntlong ya gagwe. Moengele yoo o ne a itse sentle boammaaruri jwa efangele, mme a ka bo a e rutile Korneleo, mme o ne a rometswe go direla yo e neng e le mojalefa wa poloko ka go naya Korneleo ponatshegelo. O ne a mo tlhomamisetsa gore dithapelo tsa gagwe le boineelo jwa gagwe di ne di amogetswe ke Morena. Ga a ka a rera efangele mo go ene, mme o ne a mmolelela fela gore a bitse Petere, yo o neng a nna le Simon mosuga matlalo, kwa Jopa. Petere a tla, mme a bolelela Korneleo efangele ya ga Keresete go tswa mo Dikwalong tsa Bibele.

GSAM 246Maemo a Neo ya Boporofeti

GSAM 246.2Mo ntlheng eno go ka nna molemo go ela tlhoko tatelano ya kgolo ya dimpho, jaaka Morena a e tlhalositse mo Lefokong la gagwe. Paulo o bua ka seno mo lokwalong lwa gagwe lo lo yang kwa Bakorintha, kwa a reng, “Modimo o beile bangwe mo phuthegong, sa ntlha baaposetoloi, sa bobedi baporofiti.”⁵

GSAM 246.3Fa re leba polelo ya moaposetoloi mabapi le kamano ya dimpho tse mo tirong ya efangele, re bona ka bonako gore ke eng fa tatelano e e obamelwa. Fa a bapisa dimpho tse, Paulo a re: “Jalo a o a bona gore go kgona go ‘bua ka diteme’ ga se sesupo sa bana ba Modimo kaga nonofo ya one, mme ke sesupo mo go ba ba sa bolokwang. Mme le fa go ntse jalo, seporofeso (go rera boammaaruri jo bo tibileng jwa Modimo) ke se Bakeresete ba se tlhokang, mme ba ba sa dumeleng ga ba ise ba go ipaakanyetse.”⁶ Taelo ya Morena ke gore melaetsa ya gagwe e e kgethegileng go lefatshe e tle e tswe mo lefokong la gagwe; mme go ya ka seo o tlhotlheletsa batho go batlisisa Dikwalo, le go tswa jaaka baaposetoloi, ba rwele morwalo wa melaetsa ya Morena, ba e bolela go tswa mo Bibeleng, e e fetileng diteko tsa makgolo a dingwaga. Fa badumedi ba tsholetswa, neo ya boporofeti e tla ka go “bobedi,” e diragatsa karolo ya yone “Ke ka ntlha ya gore batho ba Modimo ba tlaa nonotshiwa go mo direla tiro ka botswerere, ba aga phuthego, ebong mmele wa ga Keresete.”⁷