Kgaolo 20 — Boitelo mo Tirong ya Pele

GSAM 311.1“Kokoanyang baitshepi ba me kwa go nna; ba ba dirileng kgolagano le nna ka setlhabelo. Mme magodimo a tla bolela tshiamo ya gagwe: gonne Modimo ke moatlhodi ka boene.”¹

GSAM 311.2Mo go Review and Herald, Seetebosigo 3, 1902, re bala jaana:

GSAM 311.2“Ba ba tsenang mo tirong mo nakong eno ga ba itse go le kalo ka boitelo le boitelo-seabe jwa ba ba neng ba rwesitswe morwalo wa tiro ya Morena kwa tshimologong ya yone. Maitemogelo a maloba a tshwanetse go ba bolelelwa kgapetsakgapetsa; gonne ba tshwanetse go tsweletsa tiro ka boikokobetso le boitelo-seabe jo bo tshwanang le jo bo neng bo supa badiri ba nnete ba maloba.”

GSAM 311.3Gape, mo go Testimonies for the Church, Bolumo 7, mafoko a a fitlhelwa:

GSAM 311.3“Re atamela bokhutlo jwa hisitori ya lefatshe leno, mme dikarolo tse di farologaneng tsa tiro ya Modimo di tshwanetse go tsweledisiwa pele ka boitelo jo bogolo thata go feta jo bo setseng bo bontshitswe.”²

GSAM 311.4Maemo a Moruti Bates a neng a tlhotlhelediwa mo go one go kwala le go gatisa buka ya gagwe ya ntlha ka ga potso ya Sabatha ka 1846, a setse a umakilwe. Gape go umakilwe seemo se se neng se le thata sa ga Moruti James White, fa ka 1849 a simolola go gatisa pampiri e e bidiwang The Present Truth.

GSAM 311Pamfulete ka ga Magodimo a a Bulwang

GSAM 311.5Morago ga ponatshegelo e e filweng Mohumagadi White kwa Topsham, Maine, ka letlhafula la 1846, fa a ne a bontshiwa dingwe tsa dipolanete, Moruti Bates o ne a baakanya mokwalo wa pampitshana ka ga The Opening Heavens. Mme go ne go tlhokega thata gore go nne le madi a a lekaneng go e gatisa. Go kgotsofatsa tlhokego eno, kgaitsadi mongwe yo o neng a nna kwa Massachusetts, yo o neng a sa tswa go fetsa go dira le go ala khapete e ntšha ya masela a a kgapogileng, o ne a e kgobokanya a bo a e rekisa, mme a neela Moruti Bates madi a a tswang mo go yone, se se neng sa mo kgonisa go gatisa buka ya gagwe ya bobedi.

GSAM 312Pamfulete ka Tiro ya go Tshwaya

GSAM 312.1Morago ga ponatshegelo ya tiro ya go tshwaya e e neng ya neelwa kwa Dorchester, Mass., ka di 18 Ngwanatsele 1848, Moruti Bates o ne a kwala pampitlana ya boraro, e e nang le setlhogo se se reng, A Seal of the Living God. Fano gape o ne a lebagana le bothata jwa go tlhoka madi a go gatisa. Motlholagadi yo mmotlana, fa a utlwa ka seemo se, o ne a rekisa ntlo e nnye e a neng a na le yone kwa magaeng, mme a fa Moruti Bates sephatlo sa madi a a a amogetseng. Ka jalo o ne a kgona gape go duelela kgatiso ya buka.

GSAM 312Ditlhokego tsa Tiro ya Kgatiso

GSAM 312.2Ka 1851-52, Advent Review and Sabbath Herald e ne e gatisiwa kwa Saratoga Springs, N.Y. Fano Rre Thompson o ne a naya Moruti White le mosadi wa gagwe bonno mo ntlong mahala; mme ka thepa e e adimilweng ba ne ba nna gape le tshono ya go aga legae.

GSAM 312.3Ka nako eno badumedi mo boammaaruring jwa nako eno ba ne ba oketsega, mme ka koketsego eno go ne ga nna le tlhokego ya ditiro tsa botho tsa ga Moruti le Mohumagadi White. Seno, mmogo le tiro ya go rulaganya, se ne sa baka tlhokego ya thuso ya ofisi. Ka nako yone eo ba bangwe ba ne ba tlhotlheletsega go thusa mo tirong ya bokwadi. Jaaka sekao sa kafa Morena a dirang ka teng go arabela tumelo ya batho ba gagwe, le go tsholetsa badiri ka nako ya tlhokego, re fa maitemogelo a ga kgaitsadi yo o ineetseng, Mohumagadi Rebecca Smith, wa West Wilton, N.H.:—

GSAM 312.4Fa nako e sena go feta, morwawe Uriah le morwadie Annie R. ba ne ba eletsa thata go tsena sekolo, gore ba itlwaeletse go ruta. Mmaagwe o ne a boifa gore bana ba ne ba sekamela mo lefatsheng, mme, tota, poifo ya gagwe e ne e se ya lefela gotlhelele. Lorato lwa bommaagwe lo ne lwa arabelwa ke bana.

GSAM 313Uriah Smith kwa Akademi ya Phillips

GSAM 313.1Go tloga ka 1848 go fitlha ka 1851 morwa o ne a tsena sekolo kwa Akademi ya Phillips kwa Exeter, N. H., kwa baithuti ba neng ba rutiwa ngwaga wa ntlha wa dithuto tsa kholetšhe, gore fa ba tsena kholetšheng ba nne ba le kwa pele ka ngwaga o le mongwe. O ne a fetsa dithuto tseo. Ka 1851 o ne a dira ka natla go ipatlela madi a go tsena kholetšheng, mme ka jaana mothapi wa gagwe a ne a palelwa mo kgwebong, o ne a latlhegelwa ke madi a gagwe, mme ka ntlha ya seo, leano le a neng a le nnile lobaka lo loleele la go tsena kholetšheng le ne la tlogelwa.

GSAM 313Mohumagatsana Smith kwa Seminaring ya Basetsana

GSAM 313.2Fa Uriah a ne a le kwa sekolong se segolwane, kgaitsadie o ne a tsena sekolo sa seminary sa basetsana kwa Charlestown, Mass. Dithuto tsa gagwe koo di ne di setse di le gaufi le go fela, mme ka a ne a le gaufi le go tlogela sekolo, o ne a fiwa tshono, mmogo le morwarraagwe, ya go ruta kwa sekolong se segolwane kwa Mt. Vernon, N.H., ka dingwaga di le tharo, ka madi a a kana ka $1,000 ka ngwaga, go akarediwa dijo le bonno.

GSAM 313.3Mo e ka nnang ka nako eno, mmaagwe o ne a amogela “boammaaruri jwa jaanong.” Dithapelo tsa gagwe jaanong, fa go ka kgonega, di ne di le tlhaga e bile di le bogale go feta le fa e le leng pele mo boemong jwa bana ba gagwe. Moruti Bates o ne a etela kwa West Wilton, mme fa pele ga gagwe Mohumagadi Smith a ne a baya kgang ya bana ba gagwe, mme go sokologa ga bone ga nna kgang e e neng ya rapelelwa. Moruti Bates o ne a lebeletse go tshwara dipitso mo malatsing a sekae kwa Somerville, Mass., kwa ntlong ya ga Paul Folsom, mme Mohumagadi Smith o ne a tshwanetse go kwalela morwadie, a mo laletsa go ya kwa phuthegong. Mo nakong eo, Moruti Bates le mmaagwe ba ne ba tshwanetse go rapela gore Modimo a ame pelo ya gagwe gore a ye kwa phuthegong.

GSAM 313Ditoro di le Pedi di Tlhomamisitswe

GSAM 313.4Moruti Bates o ne a ise a ko a tsene mo phaposing e kopano e neng e tla tshwarelwa mo go yone, mme ka jalo o ne a sa itse sepe ka fa e leng ka teng. Mo bosigong jwa pele ga phuthego, o ne a lora a le mo phaposing, mme setulo sengwe le sengwe se ne se tletse kwantle ga se se fa thoko ga mojako. Gape o ne a lora gore o fetotse setlhogo go tswa mo go se a neng a ikaeletse go bua ka sone, mme a bua ka kgang ya lefelo le le boitshepo; gore ba ne ba opetse pina ya ntlha, ba rapile, mme ba opela pina ya bobedi, mme ene o ne a sa tswa go bula Baebele ya gagwe mme a ne a bala, “Go fitlha malatsi a le dikete di le pedi le makgolo a le mararo, ke gone lefelo le le boitshepo le tla phepafadiwang,” a supa setshwantsho sa lefelo le le boitshepo mo tšhateng, fa lebati le bulega, mme mosetsana mongwe a tsena a nna mo setulong se se neng se se na ope. Gape o ne a lora gore motho yoo e ne e le Annie R. Smith, le gore ka yone nako eo o ne a kgatlhegela, mme a amogela boammaaruri.

GSAM 314.1Kopano ya ga Moruti Bates e ne e le ka Sabatha (Matlhatso), mme ka jaana go ne go se na sekolo ka letsatsi leo, Annie a re, “Go itumedisa mme fela, ke tla ya.” Bosigo jwa pele ga Sabatha eo o ne a lora gore o ile, mme a diega; gore fa a goroga kwa kgorong, pina ya ntlha e ne e setse e opetswe, thapelo e neetswe, mme ba ne ba le gaufi le go fetsa pina ya bobedi; gore fa a tsena, o ne a lemoga gore setulo sengwe le sengwe se ne se tshotse motho kwantle ga se se fa thoko ga kgoro; gore sebui se se telele, se se tlotlegang, se se monate se ne se supa tšhate e a neng a ise a ko a e bone pele, mme se ntse se boaboeletsa, “Go fitlha malatsi a le dikete di le pedi le makgolo a le mararo, ke gone lefelo le le boitshepo le tlaa phepafadiwang.” O ne a lora gore se a se buang se ne se mo kgatlha thata, le gore e ne e le boammaaruri.

GSAM 314.2O ne a tsamaile go ya kwa phuthegong ka nako e e lekaneng, mme a fapoga tsela, ka jalo a se ka a goroga go fitlha fa go opelwa karolo ya bofelo ya pina ya bobedi. Fa a tsena, sengwe le sengwe se ne se le fela jaaka a ne a se bone mo torong, mme monna yole wa toro ya gagwe o ne a boeletsa, ka mokgwa o o tshwanang, temana go tswa go Daniele 8:14. Pelo ya gagwe ya tlhaloganya boammaaruri jwa seo ka bonako.

GSAM 314.3Moruti Bates o ne a ise a akanye ka toro ya gagwe go fitlhelela Annie a tsena ka kgoro a bo a nna fa fatshe. O ne a ipaakantse go bua ka kgang e sele, mme mogopolo wa gagwe o ne o nna o le mo kgannyeng ya lefelo le le boitshepo. Fa a ntse a boeletsa temana, toro ya gagwe ya tla mo mogopolong wa gagwe ka bonako, mme a rapela ka tidimalo a kopa thuso go bua le dipelo tsa bareetsi ba gagwe. O ne a nna le kgololesego e kgolo mo go tlhaloseng go feta ga nako, selo se Annie a neng a se tlwaetse. Go tswa foo a tlhalosa boammaaruri jwa molaetsa wa moengele wa boraro le Sabatha.

GSAM 315Annie Smith o Amogela Boammaaruri

GSAM 315.1Fa a sena go konosetsa phuthego, o ne a atamela ga Annie, mme a re, “Ke dumela gore ke morwadia ga Kgaitsadi Smith wa kwa West Wilton. Ga ke ise ke go bone pele, mme sefatlhego sa gago se lebega se tlwaelegile. Ke loretse ke go bona maabane bosigo.” Foo Annie a ba a bolela toro ya gagwe. O ne a tswa mo phuthegong maikutlo le dikeletso tsa gagwe di fetogile gotlhelele, ka a ne a amogetse boammaaruri jwa Sabatha gone foo.

GSAM 315.2O ne a boela kwa seminaring, a phutha lekase la gagwe, mme a ya gae. Fa a utlwa ka matshwenyego a ga Moruti White mo go gatiseng, le ka ditiro tsa gagwe tsa go rera, o ne a ikutlwa gore Modimo o mo biditse go ya go mo thusa mo tirong ya ofisi. Ka Phatwe, 1851, fa pampiri e ne e fudusediwa go tswa Paris go ya Saratoga Springs, N.Y., Mohumagatsana Smith o ne a ya teng e le mongwe wa badiri.

GSAM 315Boitelo le Boineelo

GSAM 315.3Mo go Review, Bolumo 2, Nomoro 7, go na le mela e sekae e e tswang mo pene ya gagwe e e bontshang maikutlo a gagwe morago ga go tlogela dithulaganyo tsa gagwe tsa pele go dira tiro ya gagwe e e boingotlo, e e sa ikgantsheng. O bua jaana:

GSAM 315.3“Ke dumela gore ke tlogetse tsotlhe go sala Kwana morago gongwe le gongwe kwa a etelelang pele teng. Lefatshe le latlhegetswe gotlhelele ke dikgogedi tsa lone. Ditebello tsa me, boitumelo jwa me, lorato lwa me, jaanong tsotlhe di totile kwa dilong tse di kwa godimo le tse di bomodimo. Ga ke batle lefelo lepe le lengwe fa e se go nna fa dinaong tsa ga Jesu, le go ithuta mo go ene—ga ke batle tiro epe e nngwe fa e se go direla Rara wa me wa selegodimo—ga ke batle boitumelo bope bo bongwe fa e se kagiso ya Modimo, e e hakgamatsang thata go feta e mogopolo wa motho o ka e tlhaloganyang.”

GSAM 315.4Thuso ya ga Kgaitsadi Annie kwa ofising jaaka motlhatlhobi wa dikwalo, jalo jalo, e ne e le ya botlhokwa ka nako e e maleba. Ka dingwaga di le tharo o ne a dira ka boikanyego le ka matsetseleko, a amogela fela dijo le diaparo. Kwa bokhutlong jwa nako eno, bolwetse jwa makgwafo bo ne bo mo supile go nna motswasetlhabelo wa jone. Ka nako ya tshenyo ya bolwetse jono jo bo diegang le jo bo bolayang, o ne a kwala maboko a mantle, a a monate go gaisa tsotlhe e le, “Home Here and Home in Heaven,” mme mafoko a a kwa pele a jone, a a kwadilweng letsatsi pele ga loso lwa gagwe, ka Phukwi 26, 1855, a supa sentle thata dika tsa bonolo le boikokobetso tse di neng di godile thata mo botho jwa gagwe mo re sa kgoneng go itshwara go se di neele ka botlalo:

GSAM 316Go Tlhokomela Legae mo Mathateng

GSAM 316.3Ka Moranang, 1852, Moruti White o ne a fudugela go tswa kwa Saratoga Springs go ya kwa Rochester, N.Y. E ne e le mo toropong eno, kwa 124 Mt. Hope Avenue, kwa ba neng ba dirisa dilwana tse di rekilweng go na le tse di adimilweng mo legaeng la bone ka lekgetlo la ntlha. Mme go ne go na le tlhobaelo e e kalo ya bone ya go atlegisa tiro ya kgatiso, gore pampiri e kgone go gatisiwa ka metlha, mme ka jalo boammaaruri bo anamisiwe, mo ba neng ba itatola bontsi jwa dilo tse di tlwaelegileng tse di itumedisang mo botshelong.

GSAM 316.4Mokgwa o ba simolotseng go aga legae ka one ka nako eno, o ka o bala mo lokwalong lo lo latelang lwa sephiri lo lo kwadilweng ke Mohumagadi White go lelwapa la ga S. Howland, ka Moranang a le 16, 1852:—

GSAM 316.5“Re sa tswa go aga fano mo Rochester. Re hirile ntlo ya bogologolo ka $175 ka ngwaga. Re na le motšhini wa go gatisa mo ntlong. Fa e ne e se ka ntlha ya seno, re ka bo re duela $50 ka ngwaga go hira ofisi. O ka bo o nyenya fa o ka re bona le go bona thepa ya rona. Re rekile metheo e mebedi ya bolao ya bogologolo ka disente di le masome a mabedi le botlhano e le nngwe le e le nngwe. Monna wa me o ntliseditse ditulo di le thataro tsa bogologolo, tse di sa tshwaneng, tse a di rekileng ka dolara e le nngwe, mme go ise go ye kae a nnaya gape tse dingwe di le nne tsa bogologolo, tse di se nang manno, tse a di rekileng ka disente di le masome a marataro le bobedi tsotlhe. Dikarolo tsa tsone tsa logong di ne di tiile, mme ke dirile manno a tsone ka letsela le le thata. Botoro e turu thata mo re sa e rekeng, le rona ga re kgone go reka ditapole. Re dirisa soso ya maungo mo boemong jwa botoro, le di-turnip mo boemong jwa ditapole. Dijo tsa rona tsa ntlha re ne re di ja re di beile mo letlapaneng la molelo le le beilweng mo godimo ga metomo e mebedi e e se nang sepe ya folouru. Re ikemiseditse go itshokela ditlhabelo fa fela tiro ya Modimo e ka tsweledisiwa pele. Re dumela gore letsogo la Morena le ne le le mo go gorogeng ga rona mo lefelong leno. Go na le tshimo e kgolo ya tiro, mme badiri ba le bannye. Mo Sabata e e fetileng phuthego ya rona e ne e le ntle thata. Morena o ne a re lapolosa ka go nna teng ga gagwe.”

GSAM 317Bopelotshweu jwa Badumedi

GSAM 317.1Mo kgatisong ya ntlha ya Review, e e gatisitsweng kwa Rochester, ka Motsheganong 6, 1852, fa a bua ka go fuduga go tswa kwa Saratoga go ya kwa Rochester, Moruti White o ne a re:

GSAM 317.2“Bakaulengwe ba re neetse madi a go tshegetsa pampiri go feta jaaka re ne re solofetse. Mme le fa ditshenyegelo tsa rona tsa go fuduga go tswa kwa Saratoga Springs, le go simolola pampiri mo toropong eno, di le dintsi, le gale ga re na sekoloto.”

GSAM 317Boitelo jwa Badiri

GSAM 317.3Mo molaetseng wa kgwebo mo go Nomoro 12, Phalane 14, re bala jaana:

GSAM 317.3“Le fa go ntse jalo, ofisi ga e na sekoloto ka lebaka le: Bakaulengwe Belden le Stowell ba ba berekileng mo ofising dikgwedi tse thataro tse di fetileng, ba amogetse madi a a seng makae fela go feta a go itlhokomela. Ba bangwe ba ba neng ba dira tiro e e tshwanang ga ba a amogela se se fetang se ba se amogetseng. Ruri e tla nna boitumelo mo ditsaleng tsotlhe tsa boammaaruri jwa jaanong go thusa go kaba tlhaelo mo go amogetsweng, gore ba ba berekileng ka natla, bogolo jang fa re seyo, mo gare ga bolwetse, mo go gatiseng Review and Herald, ba nne le tlamelo e e siameng.”

GSAM 317Badumedi ba Basha kwa Rochester, N.Y.

GSAM 317.4Ka selemo sa 1852, fa tiro ya kgatiso e ne e setse e simolotse sentle kwa Rochester, Moruti White le mosadi wa gagwe ba ne ba tsaya loeto lwa dikgwedi di le tharo ka pitse le kariki, go ya kwa botlhaba go fitlha kwa Bangor, Maine, ba tshwara dipitso le go etela badumedi ba Sabatha ba ba neng ba gasame mo tseleng. Pele ga ba boa, go simolola ka di 26 Lwetse, Moruti J. N. Andrews o ne a neela dithuto tse di latelanang kwa 124 Mt. Hope Avenue. Ka nako eno, Baadventista ba Letsatsi la Ntlha ba le robedi ba ne ba amogela boammaaruri jwa gompieno, mme mokwadi e le mongwe wa bone.

GSAM 318Oswald Stowell o Foladitswe

GSAM 318.1Mo maitseboeng mangwe a Labotlhano ka Diphalane, Moruti White le mosadi wa gagwe ba ne ba goroga gae ba tswa mo loetong lwa bone lwa kwa botlhaba. Letsatsi le le latelang (Sabatha) re ne ra ba bona la ntlha, mo phuthegong ya Sabatha. Ka nako ya phuthego eno Oswald Stowell, modiri wa kgatiso, o ne a lwala thata ka go ruruga ga lera le le dikologileng makgwafo, mme ngaka ya gagwe e ne e mo tlogetse gore a swe. Ngaka e ne ya re e “ka se ka ya mo direla sepe.” Ka nako ya tirelo Oswald o ne a le mo phaposing e e bapileng, a le mo botlhokong jo bo maswe jwa mmele. Fa tirelo e fela o ne a romela kopo gore a rapelelwe. Ke ne ka lalediwa le ba bangwe go nna le nako ya thapelo. Re ne ra khubama fa thoko ga bolao jwa gagwe, mme fa thapelo e ntse e dirwa, Moruti White o ne a mo tlotsa ka lookwane “ka leina la Morena”. Go ne go na le go utlwala ga Mowa wa Modimo, mme a fola ka yone nako eo. Fa re sena go tsoga mo thapelong, o ne a ntse a dutse mo bolaong, a itaya matlhakore a gagwe, a pele a neng a utlwisa botlhoko thata, a ntse a re, “Ke fodile gotlhelele. Ke tla kgona go dira ka motšhini wa go gatisa ka seatla ka moso.” Malatsi a mabedi morago ga fa, o ne a dira ka one.

GSAM 318Pono ya ga Mohumagadi White fa pele ga Setlhopha sa Rochester

GSAM 318.2Tshegofatso e e tshwanang le e e fodisitseng Mokaulengwe Stowell e ne ya wela mo go Mohumagadi White ka selekanyo se se fetang, mme jaaka Moruti White a retologa go mo leba, a re, “Ellen o mo ponong; ga a hema fa a le mo seemong se. Fa mongwe wa lona a batla go itlhomamisetsa ntlha e, lo gololesegile go mo tlhatlhoba.” O ne a nna mo ponong eo mo e ka nnang oura e le nngwe le metsotso e le masome a mabedi. Fa a le mo seemong seo o ne a bua mafoko, mme ka dinako tse dingwe dipolelo tse di utlwalang sentle; le fa go ntse jalo, le fa go ne go tlhatlhobiwa ka kelotlhoko e kgolo, go ne go sa bonale mowa o tswa mo mmeleng wa gagwe.

GSAM 319Pono ka ga Boitshwaro jwa Leloko le le Seyong

GSAM 319.1Fa Mohumagadi White a sena go tswa mo ponong eno, o ne a supa ka se a neng a se bone. Pele ga Moruti White le mosadi wa gagwe ba boa mo loetong lwa bone lwa botlhaba, mongwe wa rona o ne a tlogetse toropo, mme a ne a le mo loetong lwa tiro kwa Nageng ya Michigan. Ka jalo, o ne a seyo kwa phuthegong eno, mme o ne a ise a ko a bone Moruti White kgotsa mosadi wa gagwe. Fa a ne a anela pono ya gagwe, Mohumagadi White o ne a re bolelela, gareng ga dilo tse dingwe, se a se boneng ka ga monna yo, fa a ne a le mo loetong a le kgakala le gae, a neng a bua go le gontsi ka molao wa Modimo le Sabatha, mme ka nako e e tshwanang a ne a roba nngwe ya ditaelo. O ne a re e ne e le motho yo a iseng a kopane le ene, le fa go ntse jalo o ne a dumela gore o tla mo bona nako nngwe, ka jaana kgang ya gagwe e ne e mo senotswe. Le fa go ntse jalo, go ne go se ope mo go rona yo o neng a akanya gore ke mongwe yo re neng re mo itse.

GSAM 319.2Mo e ka nnang dibeke di le thataro go tloga ka nako ya ponatshegelo e e fa godimo, morwarra yo o umakilweng pele o ne a boa a tswa kwa Michigan. Fela jaaka Mohumagadi White a bona sefatlhego sa gagwe, o ne a raya mongwe wa bokgaitsadi a re, “Ke one monna yo ke mmoneng mo ponatshegelong, yo ke lo boleletseng ka ene.” Fa ponatshegelo e sena go bolelelwa morwarra yo, fa mosadi wa gagwe le batho ba bangwe ba le mmalwa ba le teng, Mohumagadi White a mo raya a re, “Jaaka Nathane a rile go Dafide, ‘Ke wena monna yoo.’” Go tswa foo o ne a dira fela jaaka Paulo a ne a buile gore bangwe ba tla dira fa ba kgalwa ka ntlha ya maleo a bone ka neo ya boporofeti: “Mme fa lo porofesa, lo rera Lefoko la Modimo, (le fa tota thero e e ntseng jalo bogolo e le ya badumedi) mme motho yo o sa bolokwang, kgotsa Mokeresete yo mosha a tsena, yo o sa tlhaloganyeng kaga dilo tse, dithero tse tsotlhe di tlaa dira gore a dumele gore ke moleofi, le segakolodi sa gagwe se tlaa tlhajwa ke sengwe le sengwe se a se utlwang. E tlaa re fa a reeditse, dikakanyo tsa gagwe tsa sephiri di tlaa bewa mo pepeneneng mme o tlaa wela fa fatshe ka mangole a obamela Modimo, a bolela gore tota Modimo o teng mo gare ga lona.”³ Morago ga go reetsa Mohumagadi White a balela ditlolo tsa gagwe tsa molao, morwarre yo o ne a wela ka mangole fa pele ga mosadi wa gagwe, mme ka dikeledi a mo raya, le ba se kae ba ba neng ba le teng, a re, “tota Modimo o teng mo gare ga lona,” mme a dira boipolelo jo bo feletseng jwa boitshwaro jwa gagwe fa a ne a le kwa Michigan, mo go robeng taelo ya bosupa, jaaka go ne ga senolwa ka nako ya tiragalo eo, a le bokgakala jwa dimaele di feta makgolo a matlhano.

GSAM 320.1Ka jalo, dibeke di sekae di ne tsa re naya tlhomamiso e e nonofileng ya bosupi. Ga re a ka ra felela fela ka go bua gore bo dirilwe ke maatla mangwe a a sa tlwaelegang, mme gape ra bona gore bo tswa mo motsweding o o neng o kgalemela batho ka ntlha ya boleo ka tsela e e sa belaetseng.

GSAM 320Uriah Smith o Simolola go Dira mo Ofising ya Review

GSAM 320.2E ne e le ka nako ya kgatiso ya Bolumo 3 ya Review fa Uriah Smith a ne a simolola go tshwara Sabatha, mme a amana le ofisi ya Review, kwa a neng a nna mokwadi le morulaganyi dingwaga di le dintsi. Kwalelo ya gagwe ya ntlha e e gatisitsweng mo pampiring e ne e le leboko le le nang le setlhogo se se reng, “The Warning Voice of Time and Prophecy,” le le tlhageletseng ka di 17 Mopitlwe, 1853.

GSAM 320.3Moruti Smith o ne a utlwa la ntlha molaetsa wa moengele wa boraro kwa khonferenseng e e neng e tshwaretswe kwa Washington, N.H., go tloga ka Lwetse 10 go fitlha ka 12, 1852. Fa a boela gae kwa West Wilton, o ne a ithuta ka kelotlhoko se a neng a se utlwile, mme a simolola go tshegetsa letsatsi la bosupa, e leng Sabatha ya ntlha ka Sedimonthole, 1852. O ne a simolola go dira le ofisi ya Review kwa Rochester, N.Y., ka Motsheganong 3, 1853, kwa ene le kgaitsadie Annie ba neng ba berekela dijo le diaparo tsa bone, mo boemong jwa go ruta kwa sekolong se segolwane ka $1,000 ka ngwaga le dijo tsa bone. Tse e ne e le dingwe tsa ditlhabelo tse di neng tsa dirwa go tlhoma tiro ya molaetsa wa moengele wa boraro mo metlheng ya yone ya tshimologo.

GSAM 320O ne a tlhomiwa go nna Moruti

GSAM 320.4Mo e ka nnang ka ngwaga wa 1863, Moruti Smith o ne a simolola go dirisa neo ya gagwe ya go bua phatlalatsa. Ka 1866 o ne a tlhomiwa go nna moruti wa efangele, mme morago ga foo a dira thata mo dikopanong tsa kwa kampeng le dikhonferenseng mo Dipusong tse di farologaneng go tswa kwa Atlantic go ya kwa Pacific, mmogo le ditiro tsa boruti mo kerekeng ya Battle Creek, e e neng e le kereke ya gaabo. Morago ga go bulwa ga Kholetšhe ya Battle Creek, o ne a ruta ka selekanyo se se rileng mo lephateng la Baebele la setheo seo. A direla dikgatlhego tsa Review and Herald o ne a kgabaganya Lewatle la Atlantic, ka ngwaga wa 1894, a etela dinaga tse di farologaneng kwa Yuropa. Fa a le kwa Syria o ne a tshwarwa ke letshoroma, le a sa kang a fola ka botlalo mo ditlamoragong tsa lone.

GSAM 321Dingwaga di le Masome a Matlhano tsa Tiro e e sa Lapeng

GSAM 321.1Go tloga ka 1853 go fitlha ka 1903, dingwaga di le masome a matlhano, Moruti Smith o ne a na le kamano e e neng e batla e sa kgaotse ya borulaganyi le Advent Review and Sabbath Herald; mme mo karolong e kgolo ya nako eo o ne a na le bolaodi jotlhe jwa borulaganyi jwa pampiri eo. Le mo letsatsing la loso lwa gagwe, fa a ne a iteisitswe ke setorouku, o ne a le mo tseleng e e yang kwa ofising a tshotse dikgang tse a neng a di baakantse go gatisiwa. Gape o kwadile dibuka di le mmalwa tsa botlhokwa mo dikwalong tsa phuthego. Mo gare ga ditiro tse go na le Thoughts on Daniel and the Revelation, Nature and Destiny of Man, buka e e atolositsweng ka ga Sanctuary and Twenty-three Hundred Days, The Marvel of Nations, le Modern Spiritualism. Buka ya ntlha mo go tse e kwadilwe thata magareng ga nako ya borobongwe ya maitseboa le bogare jwa bosigo, morago ga tiro ya go rulaganya le ya ofisi ya letsatsi e sena go fela.

GSAM 321Loso lwa ga Moruti Smith

GSAM 321.2E ne e le botshelo jwa mosola jo bo dirisitsweng sentle. O ikhuditse mo ditirong tsa gagwe, ka a robetse mo go Jesu ka di 6 Mopitlwe, 1903. Mme ka ene go ka buiwa nnete gore, “Ditiro tsa gagwe di mo sala morago,” mme le fa a sule, o sa ntse a bua.