Bab 11 — Peusan Malaikat Keudua

GSAM 171.1"LAJU jiseutöt lé sidroe malaikat la'én, nyang geukheun, "Ka reubah, ka reubah kuta nyang rayek nyan, Babilonia, sabab jih ka jipeumabôk ban saboh donya ngon ië anggô beungéh dari buet zina jih."¹

GSAM 171.2"Teuma ureuëng po rumoh nyan, deungon beungèh, geupeugah bak namiet gobnyan, 'Jak sigra u luwa u rot-rot ueh ngon lorong-lorong banda, dan ba u dalam keunoe ureuëng gasien, ureuëng cacat, ureuëng lumpôh, ngon ureuëng buta.'"²

GSAM 171.3Tuhan meulalu peulayan-peulayan Gobnyan ka geupeusadar donya ngon peusan, “Ka trok watèe hukôman Gobnyan,”—saboh peusan nyang banmandum umat Gobnyan nyang meuaku nyan jeuet meusaboh meunyo awaknyan jitem. Nyan keuh panggilan phôn keu “jamuan” meukawen. Nyan ka geupeumaklum “keu awaknyan nyang ka geuundang.”³ Saweueb panggilan nyan geupeubiyeu deungon meubagoe alasan, laju geubri lom panggilan keudua, nyang saban deungon peusan malaikat keudua.⁴ Deungon panggilan nyoe Tuhan geupeupisah saboh umat keu geujak u ujông masa deungon cahaya keubeunaran Gobnyan nyang seumaken meucahya.

GSAM 171Tawôk Keudua u Jamuan Meukawén

GSAM 171.4Peusan nyang keudua—nyang teuka lheueh su meuklik keuhai watèe hukôman—geupeugah, “Babilonia ka reubah, ka reubah, banda nyang rayek nyan, sabab jih ka jipeumabôk mandum bansa ngon ië anggô beungèh zina jih.” Dan su meuhôi keudua u jamuan nyan geutuléh, “Jak kheueh sigra u rot-rot ueh ngon lorong-lorong banda, dan ba u dalam ureuëng gasien, ureuëng cacat, ureuëng lumpôh, ngon ureuëng buta.” Lam tiep-tiep ayat nyan, umat nyang geupeungaku atra Tuhan geukheun “saboh banda.” Deungon ajaran-ajaran nyang meulawan ngon meupuséng, awaknyan geukheun “Babel.” Meunurôt saboh ayat la'én nyang geupeugah bhah jameun akhé, geutanyoe takalon bahwa sigohlom Tuhan geuteuka, umat Gobnyan geuyue teubiet dari “Babel:” “Babel nyang rayek ka reubah, ka reubah, dan ka jeuet keu teumpat tinggai iblih, dan kandang banmandum roh nyang jeuheut, dan sangka banmandum cicém nyang kuto dan nyang jeuheut.... Teubiet kheueh nibak jih, hai umat Lôn, mangat gata bék rôh lam desya jih, dan bék keunong bala jih.”⁵

GSAM 172“Ingat Kiban Gata Ka Tadèngö”

GSAM 172.1Lam surat keu geurija Sardis na geutuléh, “Ingat kheueh pakriban cara gata ka neuteurimong ngon neudeungo, ngon teugon beukong, ngon meutobat. Jadi, meunyoe gata hana sadar, Lôn teuka u bak gata lagèe sidroe pancuri, ngon gata hana neuteupeue bak jeum padum Lôn teuka u bak gata.”⁶ Geukrèe Sardis nyan lagèe jih ka jipeuteubiët lé Reformasi, lheueh masa seupôt buet “Yezabel”—geukrèe nyang murtad. Geukrèe Sardis geupeugah bahwa jih nyan nakeuh geukrèe nyang udép; teuma watee jih jideungö dan jitulak ajaran keuhai teuka Tuhan, jih nyan jipeuduek droe jih bak teumpat nyang mudah keunong lé keujadian nyan lagèe “pancuri lam malam.” Ngon lagèe nyan, lagèe nyang geupeugah lé rasui Paulus lam 1 Tesalonika 5:1-5, nyan keuh keuadaan ureuëng-ureuëng nyang meuhôi, “Damè ngon seulamat,” watèe teuka Tuhan ka to. Ureuëng-ureuëng nyang seutot cahya keubeunaran geukheun “aneuk-aneuk uroe,” dan Tuhan hana teuka ateuëh awaknyan lagèe sidroe pancuri.

GSAM 172.2Lam gambaran nubuat keu tujôh boh jeuma'ah nyoe, geutanyoe takalon keujatuhan jeuma'ah Sardis laju geusambông lé jeuma'ah Philadelphia, atawa (lagee makna nan nyan) jeuma'ah gaséh sayeue. Keubit, nyan keuh 50.000 droe ureueng meuiman nyang, meulalu peusan malaikat keudua, geupeuteubiet dari mandum jeuma'ah nyang meubida-bida, dan meusaboh lam saboh ikatan gaséh sayeue ateueh kebenaran utama keuhai teuka Almaseh nyang ka to.

GSAM 173Pakriban Peusan Keudua Geupeusampoe

GSAM 173.1The Midnight Cry tanggai 12 September 1844, na meusampô saboh peunyata nyang geupeugèt lé Peundita J. V. Himes keuhai peusan malaikat nyang keudua, ngon keuadaan nyang jeuet keu seubab geupeusampoe peusan nyan. Surat gobnyan geutuléh bak tanggai 29 Agustus 1844, di McConnelsville, Ohio, dan isoe jih nakeuh:—

GSAM 173.2“Watèe kamoe peuphôn buet deungon Syèdara Miller bak thôn 1840, gobnyan ka sikureueng thôn geupeugah kuliah. Bak watèe nyan gobnyan karab sidroe. Teuma buet gobnyan hana putôh-putôh ngon meuhasé bak geupeusadar ureuëng-ureuëng nyang meuaku keu ureuëng meuiman keu harapan nyang beutôi keu umat Tuhan, ngon persiapan nyang peureulèe keu teuka Tuhan; meunan cit geupeusadar mandum ureuëng nyang goh lom meuiman keu sadar keu keuadaan awaknyan nyang ka sesat, ngon keuwajiban sigra meutobat ngon meuiman keu Tuhan, seubagoe persiapan keu meurumpok ngon Lintô Barô bak damè bak watèe gobnyan teuka. Nyan keuh tujuan-tujuan utama nibak buet gobnyan. Gobnyan hana geu-useuha keu geupeu-ubah ureueng u saboh sekte atawa golongan lam agama.

GSAM 173.3“Watèe kamoe ka yakin keu beutôi teuka Gobnyan nyang ka rap, dan kamoe teurimong ajaran nyan secara umum, kamoe na pandangan nyang saban, dan kamoe jak bak jalan nyang saban di antara macam-macam golongan, pat kamoe geutawök, ateueh keuheundak Allah, keu meubuet. Kamoe peugah bak para peulayan ngon geurèja bahwa kon tugas kamoe keu peuhanco, atawa peucre, atawa peukacho awaknyan: Kamoe na saboh tujuan nyang jeulah, nyakni keu peusampoe ‘su meuklik,’ peuingat keu hukôman nyang ‘ka di pintô,’ ngon meuyakinkan manusia la'én mangat beu siab keu keujadian nyan.... Peulayan ngon anggèeta jema'ah nyang geumanfa'at buet kamoe, tapi hana geuteurimong doktrin nyan ngon sunggôh-sunggôh, geukalon bahwa awaknyan harôh geuseutôt doktrin nyan, dan geupeusampoe serta geupeuteun jih, atawa bak masa sulit nyang ka di hadapan awaknyan, awaknyan akan meususah ngon ureueng-ureueng meuiman nyang ka teugas dan teukah. Ngon sabab nyan awaknyan geupiléh untôk geutulak doktrin nyan, dan geupeuteuntèe, na nyang ngon saboh cara dan na nyang ngon cara la'én, untôk geupeuseungap masalah nyan. Hai nyoe ka geupeuduek syèdara-syèdara kamoe lamkawan awaknyan bak saboh posisi nyang brat that geuuji. Leubeh le nibak awaknyan jigaséh keu geurèja-geurèja awaknyan, dan hana teupike lé keu jitinggai. Teuma watee awaknyan jipeuhina, jipeuseungsara, ngon jipeujioh nibak hak-hak ngon keuseunangan nyang ka na sigohlom nyan deungon meubagoe cara, ngon watee ‘peunajoh bak watee jih’ jitham nibak awaknyan, dan su manèh ‘damè ngon seulamat’ jipeudeungo lam geulinyueng awaknyan dari uroe Sabat u uroe Sabat, awaknyan sigra jipeulheuh droe nibak keusukaan keu pihak droe jih, dan jibeudoh deungon keukuatan nyang meugah, jipeulheuh droe nibak ikatan nyan, dan jiklik su, ‘Tubiet kheueh nibak jih, hai umat Lôn.’

GSAM 174Lam Keuadaan Nyang Payah

GSAM 174.1“Keuadaan nyoe ka jipeuduek kamoe bak saboh posisi nyang brat, (1) Sabab kamoe ka bak ujông that masa nubuet kamoe, nyang bak watèe nyan kamoe meuharap Tuhan geupeusapat mandum umat Gobnyan lam saboh; dan (2) kamoe ka sabe meukhutbah doktrin nyang la'én; dan jinoe saweueb keuadaan ka meu'ubah, nyan akan dianggap hana jujô bak kamoe meunyoe kamoe meugabông lam su meupisah dan peuhanco geurèja-geurèja nyang ka jiteurimong kamoe ngon peusan kamoe. Sabab nyan kamoe ragu-ragu, dan teutap meulaku bak pendirian kamoe nyang phon, sampoe geurija ngon peulayan ka jipeujioh that masalah nyan, kamoe ka teupaksa, ateuh teumakot keu Allah, untuk meucok sikap meubela keubeunaran ngon aneuk-aneuk Allah nyang teupeukia.

GSAM 174Conto Rasul keu Langkah Geutanyoe

GSAM 174.2“‘Teuma gobnyan geutamong u sinagogah, geumeututô ngon beurani seulama lhèe buleuen, geumeudebat dan geupeuyakin ureueng-ureueng bhah keurajeuen Allah. Teuma watee na ladôm ureueng nyang kreueh até, hana jipatéh, malah jipeugah haba brôk keu jalan nyan di hadapan ureueng ramè, gobnyan geutinggai awaknyan, geupeupisah murid-murid geuh, dan tiep uroe geumeudebat di sikula sidroe Tyrannus.’⁷ Barô lheueh ‘na ladôm ureueng nyang kreueh até’ dan ‘jipeugah haba brôk keu jalan nyan [teuka Tuhan] di hadapan ureueng ramè,’ syèdara geutanyoe barô geupeugrak até keu jiteubiet dan jipisah droe dari geurèja-geurèja nyan. Awaknyan hana ék jiteuen ‘caci maki’ nyan dari ‘namiet-namiet jeuheut,’ dan geurèja-geurèja nyang jiseutot jalan penindasan dan ‘caci maki’ ateueh ureuëng-ureuëng nyang teungoh jipreh ‘harapan nyang meubri beureukat,’ nyan keu awaknyan kon la'én nakeuh aneuk-aneuk dara Babilonia mistik. Meunan kheueh awaknyan jipeunyata, dan jitamong lam keubebasan Injil. Dan bah pih geutanyoe hana mandum seupakat tentang peu nyang jeuet keu Babilonia, geutanyoe ka seupakat untuk sigra dan siumu masa meupisah droe dari mandum ureueng nyang meulawan ajaran tentang teuka dan keurajeuen Allah nyang ka rab teuka. Kamoe yakin nyan nakeuh saboh masalah udep ngon maté. Nyan nakeuh maté meunyoe teutap na hubôngan ngon golongan nyang jipeugah haba nyang peureumeh atawa nyang lawan teuka Tuhan. Nyan nakeuh udep meunyoe teubiet dari mandum adat manusia, dan teudong ateueh feureuman Allah, dan siuroe-uroe meuharap keu teuka Tuhan. Ngon sabab nyan, jinoe kamoe peugah bak banmandum ureuëng nyang teupioh lam ikatan peuhambaan, ‘Tubiet kheueh dari teungoh awaknyan, dan beu meupisah kheueh gata, kheun Tuhan, dan bèk mat peue nyang kuto; dan Lôn teuma teurimong gata, dan teuma jeuët keu Ayah keu gata, dan gata teuma jeuët keu aneuk agam ngon aneuk inong Lôn, kheun Tuhan Nyang Maha Kuasa.’”⁸

GSAM 175Penentangan Nyang Hana Teupatéh

GSAM 175.1Wm. Miller meunan geupeugah bhah konflik nyang na bak masa nyan antara geurèja-geurèja ngon ureuëng-ureuëng Advent:—

GSAM 175.2“That hana wajar dan hana jeuet tapeugah sababjih meunyoe geurèja-geurèja Kristen jipeuteubiet doktrin nyoe ngon anggèta-anggèta jih kareuna harapan nyang meubri beureukat nyoe. Ulôn kuteupeue na padum-padum boh geurèja Baptis jipeugah awaknyan hana jipeuteubiet ureueng nyan kareuna iman jih, tapi kareuna meujema'ah ngon ureueng-ureueng nyang meuiman keu teuka keulayi. Meunyoe meunan, meunyoe kon kareuna iman awaknyan keu sidroe Peuseulamat nyang teuma teuka, pakon ulôn hana geupeuidin jak khutbah di ateueh mimbar awaknyan, padahai ulôn hana tom meujema'ah ngon geurèja la'én seula'én geurèja Baptis? Nyan nakeuh alasan nyang hana beutôi. Teuma nyoe hana mungkén jeuët keu alasan lé ureuëng Methodist ngon Presbyterian; sabab awaknyan meuiman bak pergaulan campuran. Keu peuë jipeuteubiet awaknyan? Ulôn na deungö na ladôm nyang jipeuteubiet kareuna jimeunyanyi lagu keu teuka keudua; nyang la'én kareuna sakét akai, padahai banmandum bukti sakét akai nyang na ateuëh awaknyan nakeuh awaknyan teungoh jipeujaga keu Kristus. Ya Tuhan, ‘neupeuampôn awaknyan, sabab awaknyan hana jiteupeuë peuë nyang jipeubuët.’”

GSAM 176Storrs keuhai Sikap Geurèja-geurèja

GSAM 176.1George Storrs geupeugah bhah sikap geurèja-geurèja ateueh ureuëng Advent, lagèe nyoe:—

GSAM 176.2“Soë nibak awaknyan, bak watèë nyoë, nyang hana jikheun, ‘Lôn duek lagèë sidroë ratu’? Dan soë nibak awaknyan nyang hana jipeuseunang haté droëjih ngon pikeran bahwa bak saboh uroë awaknyan akan jireubôt donya, dan donya nyan akan jipeutundôk bak iman awaknyan? Soë nibak awaknyan nyang jipeubiyeuë sidroë jiwa tinggai lam damè di teungoh-teungoh awaknyan, nyang ngon trang dan hana teumakot jiaku iman jih bak teuka Almaseh nyang ka rab? Peu kon syarat keu jeuët tinggai lam kawan awaknyan deungon teunang nakeuh droëneuh ‘beutôi-beutôi geutheun droë’ nibak peunyata iman secara umum ateuëh teuka Tuhan bak thôn nyoë, hana keunira pakriban keyakinan droëneuh ateuëh hai nyan, dan pakriban peunténg droëneuh rasa keu meuhôi, ‘Takôt kheueh keu Allah, dan bri keumuliaan keu Gobnyan, sabab ka trôk watèë hukôman Gobnyan’?”

GSAM 176Testimoni Mansfield

GSAM 176.3L. D. Mansfield, nyang geutuléh dari Oneida, N.Y., tanggai 21 Maret 1844, geupeusaksi lagèe nyoe:—

GSAM 176.4“Tuhan teungoh geupeugrak pikéran aneuk-aneuk geuh nyang geusayang nyang teungoh geupreh Tuhan dari syeuruga, dan geupeuarah awaknyan kon mantong keu geupeuduli keu malaikat ‘nyang na Injil keukai keu geupeusampoe, sira geupeugah, Ka trok watèe hukôman Gobnyan,’ tapi cit keu geuseumèe peurintah lheueh nyan, ‘Teubiet kheueh dari dalam jih, hai umat Lôn!’ Lôn ka leubèh yakin nibak sigohlom nyoe, bahwa organisasi-organisasi agama jameun jinoe nakeuh saboh beunagi nyang hana ubeut nibak Babilonia nyang teuma geupeureubah ngon kreueh, dan hana teurumpok lé sagai-sagai.... Teuma, bak pikeran lôn, bak ladôm organisasi nyan, keusabanan jih ngon tanduk ubeut nyan leupah that deuh. Ladôm contoh teuma peudeuh hai nyan.

GSAM 176Sifeuet Umat Ramèe Nyang Teupeuleumah

GSAM 176.5“Sidroe syèdara nyang ka geumeubuet deungon that meuhasé di wilayah nyoe, lam geupeusampoe haba teuka Tuhan, geupeuteuntèe jadwal keu geupeugah kuliah bak saboh teumpat bak watèe nyang ka geupeuteuntèe. Tuhan ka geuatô sampoe gobnyan na nam blah mil ji'ôh nibak teumpat nyan, teuma sidroe peundita _____ na di sinan, geupimpin saboh kawan ureueng ramè, deungon getah ngon bulèe, deungon niët keu geupeulét nyan bak hamba Po Teuh Allah nyang Maha Manyang nyan. Peundita nyan keudroe hana trep lheueh nyan geupeuphôn saboh rapat doa nyang meulangsông trép, teuma mandum ka leupie ngon beuköi lagèe gunong èh di Utara—hana sidroe pih nyang teusadar atawa meu-ubah haté. Bak akhé jih peundita nyan geupeugah gobnyan yakin gobnyan ‘harôh geuduek bak kurusi ureueng nyang meuhajat.’

GSAM 177.1“Sidroe ureueng keutuha kelas di gampông nyoe geupeugah bak anggèeta kelas gobnyan, yôh kamoe peuna rapat di sinoe, meunyoe na ureueng jitamong u rumoh gobnyan dan jipeugah jih yakin Almaseh teuma teuka thôn nyoe, teuma jipeuteubiet ureueng nyan u luwa.”

GSAM 177Tanggông Jaweueb keu Geurèja-geurèja

GSAM 177.2Bak teumpat nyoe kamoe peuturi saboh keusaksian dari saboh pidato keu konferensi advent ureuëng-ureuëng meuiman nyang meusapat di Boston, Mass., tanggai 31 Mei 1844, dan geutèkèn lé Wm. Miller, Elon Galusha, N. N. Whiting, Apollos Hale, ngon J. V. Himes. Awaknyan geupeugah:—

GSAM 177.3“Teuntang wajéb geutanyoe keu geurèja-geurèja, kamoe jeuet cit peugah si patah haba. Bahaya jih disinoe, lagèe bak leubèh le hai la'én, meunurot kamoe na bak hai nyang meuleubèh-leubèh. Bèntuk phôn nibak bahaya nyan nakeuh geupeubiyeu kuwasa geurèja nyang na hubôngan ngon geutanyoe jipeuseungap geutanyoe lam hai soai wajéb lagèe nyoe. Kamoe yakin ribèe droe ka jipeutamong droe lam hukôman di hadapan Tuhan kareuna jiseumah droe bak tuntutan-tuntutan geurèja nyang hana meunurôt Alkitab lam hai nyoe, nyang meunyoe awaknyan teuga haté ngon seutia, jinoe ka teungoh lam keuadaan nyang leubèh aman, ngon leubèh meuguna, bah pih awaknyan mungkén cit geutawôk keu meudeurita.

GSAM 177.4“Bentuk bahaya nyang keudua nakeuh meunyeurah bak seumangat keuneuk balaih dindam ateueh geurèja-geurèja seubab hana adé awaknyan keu geutanyoe, ngon tapeulancarkan prang hana meupiléh ateueh mandum organisasi lagèe nyan. Meunyang keu tugaih ureueng Advent, meunyang meuhubông ngon geurèja-geurèja pat awaknyan na hubôngan, meunyoe geutanyoe geuyue pubuet nyan, geutanyoe hana jeuet tabri peutunyok nyang jeuet geunguy keu mandum ureueng. Awaknyan harôh jipeubuet buet lam teumakôt keu Allah, meunurot keuadaan nyang na.

GSAM 178.1“Teuma, geutanyoe harôih teugas bak tapeubuet tugaih geutanyoe, bak tapeusaksi keubeunaran bak tiep-tiep keuseumpatan nyang patôt ngon teupat. Dan meunyoe deungon geutanyoe pubuet nyan jeuet keu sabab geurèja-geurèja sakét até, dan awaknyan geuancam keuneuk peuteubiet geutanyoe meunyoe hana geutanyoe seungap (bah pih meunyoe geutanyoe anggap leubeh gèt tapeuputôh hubôngan deungon geurèja deungon cara damè, nyan mungkén nakeuh cara nyang leubeh gèt), bah geutanyoe pubuet buet geutanyoe, dan watee geutanyoe ka geupeuteubiet, beu saba geutanyoe meudeurita kareuna peulakuan nyang hana adé nyan, dan beu tém deungon Tuhan geutanyoe ‘teubiet u luwa pintô, geuba hinaan Gobnyan.’”

GSAM 178.2Nibak kutipan-kutipan nyoe nyang meuhubôngan ngon tindakan geurèja-geurèja ateueh ureuëng nyang peutrôh peusan malaikat keudua, deungon mudah jeuet takalon pakriban, seubagoe hasé phon nibak peutrôh panggilan keudua u “jamuan makan,” ureuëng-ureuëng nyang ka meusapat lam saboh kawan rohani geupeugah seubagoe “ureuëng cacat,” “nyang pincang,” ngon “nyang buta,” nyang that geupeuleumah peuniyahan nyang brok nyang ka jiteurimöng dari “geupoh” lé “rakan-rakan seubakti” awaknyan, nyang ka geupeupisah dari awaknyan.

GSAM 178Saboh Umat Teupiléh nyang Teupisah keu Geuteurimöng Keubeunaran Barô

GSAM 178.3Tujuan Tuhan jeuet geupahami deungon jeulah lam geupeuteubiet saboh bansa nyang meubida di yup peumuman peusan malaikat keudua—tawôk keudua u “jamuan makan”—ngon “su teungoh malam.” Kebenaran-kebenaran meuhareuga keu uroe-uroe keuneulheueh harôih geumita ngon geupeusampoe—saboh buet nyang hana mungken geupeubuet lam geurèja-geurèja nyang “teukurông lé akidah” lagee cit peusampoe Injil u donya hana mungken geupeubuet lé geurèja apostolik meunyo mantong na hubôngan ngon aliran-aliran Yahudi. Tuhan geuyue meupisah di sinan,⁹ dan Gobnyan cit geuyue meupisah ureueng-ureueng nyang meuiman keu teuka Isa dari ureueng-ureueng nyang jicuba keu jipeutheun awaknyan lam lingka akidah awaknyan.

GSAM 179“Six Sermons” Storrs

GSAM 179.1Hana trép lheueh jiteubiet nyan, geutanyoe takalon bahwa cahya ka trok bak kawan-kawan advent keuhai hukôman masa ukeue, lagee nyang ka geupeugah lam brosur, “Six Sermons,” lé George Storrs, nyang geupeugah bahwa manusia secara kodrati nyan fana; bahwa ureuëng maté hana sadar antara maté ngon uroe bangkét; bahwa hukôman akhé keu ureuëng nyang hana ta'at nyan nakeuh binasa mandum; dan bahwa keabadian nyan nakeuh saboh karunia dari Tuhan, nyang teurimong meulalu iman keu Tuhan geutanyoe Isa Almasih mantong.

GSAM 179.2Ribèe droe ureuëng Adventis geuteurimong ajaran bhaih sifeuet manusia nyoe, tapi hana mandum. Penolakan ateueh ajaran nyan hana jipeuteuka keukacauan lamkawan awaknyan, saweueb nyan geuanggap sibagoe masalah keuyakinan mantong, dan kon keu ukôran keupatutan moral; ngon sabab nyan, usaha meusaboh keu peuingat donya bhaih teuka Isa nyang ka rab nyan hana putôh. Teuma, hai nyan ka jipeuteuka beungèh geurèja-geurèja ateueh awaknyan.

GSAM 179Hana Ék Geubantah “Six Sermons”

GSAM 179.3Peundita Methodist di banda pat lôn tinggai, nyang sigohlom nyan ka rôh geupeusampoe ajaran teuka Almaseh bak thôn 1843, geuteurimong kitab “Six Sermons,” geubeuet, dan geupeugah bak anggèeta geurèja gobnyan bahwa gobnyan hana ék geubantah ajaran nyan; tapi watee geuteupeue le anggèeta geurèja gobnyan nyang teurimong ajaran nyan, gobnyan geupeusaran bak ureueng la'én bék geubeuet kitab nyan, saweueb “ureueng nyan akan meuiman keu ajaran nyan meunyo geubeuet.” Bak buleuen Sikureueng, thôn 1844, lheueh pandita nyan jiwoe nibak konferensi thônan, gobnyan geudong ateueh kurusi khutbah dan geupeunyata hana seutuju deungon ajaran advent nyan, dan deungon meureundah droe geulakèe meu'ah bak jama'ah geuh saweueb ka lheueh geuundang ureueng-ureueng nyang peugah kuliah nyan keu geupeugah haba di rumoh nyan.

GSAM 179Geupeusidang kareuna Bidah

GSAM 179.4Tindakan lé pendeta nyan sigra geuseutöt lé usaha keu geupeuhukôm ureuëng-ureuëng nyang meuiman keu advent nyan ateuëh tudôhan sesat; teuma saweuëb awaknyan geupeu-izin keu geupeugah hujah droë geuh dari Alkitab, hana keumeunangan nyang meuteumeung lé geurija. Padum droe ureueng geupeuteubiet dari geurija nyan saweueb cara awaknyan hana seusuai ngon disiplin, dan le la'en jitarék droe saweueb na anggèeta nyang geupeuteubiet nyan padahai keuyakinan awaknyan hana teubukti meulawan ngon Kitab Suci. Deungon nyan, ajaran advent geupeuteubiet siumu masa dari geurija nyan, teumpat meureutôh droe ureueng ka meurumpok Juru Seulamat dan meurasa bahgia lam Tuhan.

GSAM 180.1Peue nyang geupeubuet di gampông halaman lôn nyan cit geupeubuet di meureutôh boh geurèja la'én di bansaboh nanggroe. Ureuëng-ureuëng nyang jipeulaku lagèe nyan lé syèdara-syèdara jih nyang dilee meuteumèe peunyejuk haté nyang rayeuk lam feureuman nabi Yesaya: "Deungo kheueh feureuman Tuhan, hai gata nyang meuguncang ateueh feureuman-geuh: Syèdara-syèdara gata nyang banci keu gata, nyang jipeuteubiet gata kareuna nan Lôn, jipeugah, 'Bah keuh Tuhan meugah; teuma Gobnyan teuma geupeuleumah droe keu keubahagiaan gata, dan awaknyan teuma meumalèe.'"¹⁰

GSAM 180Beungèh Ureuëng Jahéat Nyang Teupeuleumah

GSAM 180.2Seumakén rab uroe Tuhan geuharap teuka, ureuëng-ureuëng meuiman seumakén sunggôh-sunggôh bak buet gobnyan, dan ureuëng-ureuëng jeuhet seumakén kreueh meureuka dan jipeukhem, lagèe nyang deuh takalon bak peunyata di yup nyoe nyang geutuléh lé editor Midnight Cry tanggai 31 Oktober 1844:—

GSAM 180.3“Peungarôh nyang jipeuhasé lé geurakan nyan ateueh ureueng-ureueng jeuhet, nyan cit that meubantu keu peukong keuyakinan kamoe bahwa Tuhan na lam geurakan nyan. Watèe aneuk-aneuk Allah meusapat keu sujud ngon peureundah droe di hadapan Gobnyan, dan keu peusiap droe keu teuka Gobnyan, lagèe nyang patôt jipeubuet lé saboh kawan ureueng meudesya nyang cuma jeuet teupeuseulamat ngon rahmat, ureueng-ureueng jeuhet nyan jipeuleumah beunci nyang paléng rayek. Watèe kamoe hana meupeugah haba keuhai pertemuan kamoe la'én nibak lam surat haba kamoe keudroe, dan hana meuhôi ureueng ramè keunan, aneuk-aneuk Belial jipeupunoih teumpat nyan, dan jipeugot that kacho. Bak malam Sabtu, tanggai 12 buleuen nyoe [12 Oktober 1844], kamoe hana meupeuna pertemuan di kemah suci, mangat ureueng nyang urôh bangunan [ureueng jaga] na keuseumpatan geupeugléh rumoh nyan keu uroe Sabat [Aleuhad]. Teuma, ureueng ramè nyan jiseurubu u dalam rumoh, dan hana jibri keuseumpatan nyan. Teuma, walikota, hana geulakèe, sigra geutindak, dan geupeuteubiet awaknyan.

GSAM 181.1"Bak pertemuan kamoe bak uroe Aleuhad lheueh nyan, 'oh ka peunoh geudong ibadah nyan, ureueng ramè that ka jipeunoh rot ueh di keue geudong nyan, le di antara awaknyan beungèh that saweueb na ureueng nyang peucaya bak teuka Tuhan. Bak watèe malam, seubab ramèe ureuëng ka heboh, hana geupeuna rapat; bah pih meunan, jalan ka peunoh lé ureuëng ramèe dari awai; teuma, campô tangan walikota nyang sigra ngon polisi gobnyan nyang cakap ka geupeusibak jalan nyan, lheueh geupeutamong padum droe ureuëng u kantô polisi. Kamoe hanya jeuet peusaban buet ureueng ramè nyan ngon buet ureueng-ureueng nyang keupông pintô Lot, bak malam seugolom Sodom hancô.... Geurakan awaknyan that tiba-tiba, serentak, ngon luwah, sampoe deungon teuka jih bak uroe phon buleuen keu-tujôh Yahudi nyan ka jipeukong keyakinan kamoe bahwa nyoe keuh buleuen nyan."

GSAM 181Ureuëng Peukhem Geungui Bajeè Keu'ék Langèt

GSAM 181.2Bak uroe 22 Oktober 1844, uroe nyan keuh watèe abéh masa dua ribèe lhee reutôh uroe, di Paris, Maine, bak watèe ureuëng-ureuëng nyang meuiman teungoh meusapat lam rumoh ibadah, teungoh meudo'a ngon khusyuk ubak Tuhan, sira geuharap Tuhan geujak teuka bak uroe nyan, ureuëng-ureuëng nyang peuhina nyan ka meusapat di seulingka rumoh nyan, sira geumeulagu ngon cara meuhina. Duwa droe ureueng rusuh nyan jipakèk bajèe panyang wareuna putéh laju jiek u ateueh bubông rumoh, jimeu'en-en lagu, ngon jipeuhina ureueng-ureueng lam rumoh nyang teungoh meudo'a ngon jipreh Tuhan teuka.

GSAM 181.3Mungkin that dari keujadian nyoe lahé haba-haba sulet keuhai Umat Advent nyang geungui bajèe keu ék langèt; sabab bah pih surat-surat haba Advent ka geupeuna hadiah sampoe $500 keu saboh mantong keujadian nyang beutôi na sidroe ureueng Advent nyang geungui bajèe keu ék langèt bak thôn 1844, dan ngon nyan geupreh Tuhan teuka, hana meusaboh kasus pih nyang ka lheueh geupeuleumah.

GSAM 182Visi Hazen Foss, 1844

GSAM 182.1Bak watèe nyan, na sidroe ureueng agam muda nan jih Hazen Foss, tinggai di Poland, Maine, nyang yakin that Tuhan akan teuka bak uroe keu siploh buleuen keu tujôh. Gobnyan nakeuh ureueng nyang rupajih gagah, cara meututô mangat geudeungo, dan cukôp that meupendidikan. Padum-padum minggu seugolom “peuneugah teungoh malam” nyan abéh, Tuhan geujak bak gobnyan dan geubri saboh wahyu, nyang lam wahyu nyan geupeuleumah bak gobnyan peujalanan ureueng-ureueng advent u banda Allah, deungon bahaya-bahaya nyang teuka. Na padum-padum boh peusan peuingat nyang geubri keu jih, nyang harôih jipeusampoe, dan jih nyan pih geupeuleumah keu jih cubaan ngon penganiayaan nyang teuma teuka meunyo jih seutia jipeugah peue nyang ka geupeuleumah keu jih. Jih, saban lagèe Tuan Foy, geupeuleumah keu jih lhèe boh langkah nyang rot nyan umat Tuhan teuma trok beutôi-beutôi u ateueh jalan u banda suci. Saweueb jih nyan ureueng nyang that yakin ateueh teuka Tuhan “lam padum uroe teuk” (lagee nyang jimeulagu bak masa nyan), bagian nibak wahyu nyang meuhubong ngon lhèe boh langkah u ateueh rot nyan hana jeuet jipeujeulaih; dan saweueb jih nyan ureueng nyang sombong, jih jipeujioh droe nibak saléb, dan hana jitem peugah haba nyan. Wahyu nyan geupeugah lom keu dua go, dan seulaén nibak nyan geupeugah bak jih meunyoe jih mantong hana jitem peugah peue nyang ka geupeuleumah bak jih, beuban nyan akan geucok nibak jih, dan geujok bak sidroe ureueng nyang paleng leumoh lamkawan aneuk-aneuk Tuhan, sidroe ureueng nyang akan jipeugah deungon seutia peue nyang akan geupeunyata lé Tuhan. Jih mantong hana jitem cit. Lheueh nyan geubri keulayi wahyu nyang keulhèe, dan geupeugah bak jih bahwa jih ka geupeulheueh, dan beuban nyan ka geupeukeubah ateueh sidroe ureueng nyang paleng leumoh lam kawan nyang leumoh, nyang akan jipeubuet peurintah Tuhan.

GSAM 182Foss Gagal Geupeugah Wahyu Gobnyan

GSAM 182.2Hai nyan teukeujot that aneuk muda nyan, dan jihnyan jipeuputôh keu jicerita peue nyang ka jipeuleumah bak jih, dan laju jipeuteubit watee meureumpok jih. Ureueng rame meugumpôi keu jikalon ngon jideungo. Jihnyan ngon ceureumat jicerita peungalaman jih, pakriban jihnyan hana jitem peugah peue nyang ka Tuhan peuleumah bak jih, dan peue akibatjih meunyoe jihnyan hana jitem. “Jinoe,” kheun jih, “lôn keuneuk lôn peugah wahyu nyan.” Teuma sayang that! Ka terlambat: jih teudong di hadapan ureuëng ramè lagèë patông nyang bisu, dan bak akhé jih jikheun deungon sakét até nyang paléng dalam, “Lôn hana ék lôn ingat meusaboh kata pih nibak wahyu nyan.” Jih jipeupôt-peupôt jaroe jih lam sakét até, sira jikheun, “Tuhan ka geupeuseuleusoë firman Gobnyan. Ka geucok wahyu nyan nibak lôn,” dan deungon that bingong pikéran jikheun, “Lôn ka hancô.” Phôn yôh nyan jih ka gadôh harapan bak Almaseh, dan jitamong lam keuadaan putôh asa. Jih hana lé jiseutöt peuramè Adventis, dan hana lé meuhajat keu agama. Sifeuët jih lam le hai, meunyo tapeugah si'at mantong, nakeuh lagèe ureuëng nyang ka teupisah nibak peungarôh leumbôt Roh Po Teungku, lagèe ureuëng nyang “geupeubiyeu meunurôt hawa nafsu droe, dan jipeunoh lé buët-buët droe.” Lam keuadaan pikéran lagèe nyan, jih meuninggai bak thôn 1893.

GSAM 183Visi Foss nyang Geucalitra lé Ureuëng La'én

GSAM 183.1Kira-kira lhèe buleuen lheueh jih hana le ék jipeuingat wahyu nyan, jih jideungo nibak kamue nyang meuseubelah saboh wahyu nyang jicerita lé ureueng laén. Peusapat nyan geupeuna di rumoh tinggai teumpat jih. Jih geuyue tamong u dalam peusapat, tapi jih hana jitem. Jih jipeugah wahyu nyan rab saban lagèe nyang ka geupeuleumah bak jih, lagèe dua droe ureueng jicerita saboh hai nyang saban. Ngon lagèe nyan keuh teuturi peue nyang ka jikalon tapi hana le ék jipeuingat watee jicuba jicerita. Watee lheueh nyan jikalon ureueng nyan, jih jipeugah, “Nyan keuh alat nyang Tuhan ka geupeubeban.”

GSAM 183Keucewa nyang Seudéh

GSAM 183.2Uroe keu siploh nibak buleuen keu tujôh, meunurot watèe Yahudi (22 Oktober 1844), bak akhéjih ka trôk cit. Bak watèe nyan, na meuribèe-ribèe droe ureueng nyang teungoh geupreh-preh uroe nyan keu peunoh harapan awaknyan. Awaknyan hana lé geupeusiap sapeue pih keu urôsan donya leupah nibak uroe nyan. Awaknyan hana sagai-sagai geupike, “meunyo nyan hana teuka,” teuma ka geuatô urôsan donya awaknyan lagèe nyang geupeubuet meunyo awaknyan geuharap uroe nyan keu geupeuakhé masa umu awaknyan. Awaknyan ka geupeuingat ngon geupeusaran ureueng-ureueng jeuhet beu geuplueng dari murka nyang teuma teuka, ngon le di antara awaknyan nyang takôt meunyo peusan nyan jeuet keu beutôi. Awaknyan ka geubri nasehat ngon geumeudo'a meusajan ngon syèdara-syèdara jih, dan ka geupeugah seulamat tinggai keu syèdara-syèdara nyang goh lom jiseurah haté keu Po Teuh Allah. Paneuk jih, awaknyan ka geupeu-ilée mandum hai donya deungon seurius jih sidroe ureueng nyang yakin droe jih ka rab geuhadap langsong deungon Hakim ban sigom donya. Deungon meunan, lam keukhawatiran nyang brat that, awaknyan geupeusapat droe bak teumpat-teumpat ibadah, geupreh, siat teuk siat teuk, keu geudeungo “su malaikat agong ngon terompet Allah,” dan keu geukalon langèt meuhu deungon keumuliaan Raja awaknyan nyang teuka.

GSAM 184.1Watèe ka meujalan ngon meulèt-lèt, dan bak akhé jih matauroë ka lhop di likôt langèt blah barat, uroe keu siplôh bansa Yahudi bak buleuen keu tujôh ka abéh. Seupôt malam ka jiseubô lom lindông seupôt jih ateueh donya; teuma deungon seupôt nyan teuka cit rasa seudéh nyang that lhôk lam haté ureuëng-ureuëng nyang meuiman keu teuka Gobnyan, saban lagee nyang jeuet ta bandéng ngon seudéh murid-murid Tuhan geutanyoe, watee awaknyan deungon khidmat jiwoe u rumoh maséng-maséng bak malam lheueh geusaléb ngon geukubu Gobnyan nyang baroesa sigohlom nyan ka geuba deungon meunang u Yerusalem seubagoe Raja awaknyan.