Bab 12 — Keucewa—Kitab nyang Pahét

GSAM 185.1"Lôn cok kitab ubit nyan nibak jaroe malaikat nyan, laju lôn pajôh; mangat lam babah lôn lagèe madu. Teuma ban ka lôn pajôh nyan, pruet lôn jeuet keu pahét. Laju geupeugah lé gobnyan bak lôn, "Gata harôh meunubôt lom di hadapan ramèe bansa, suak, basa, ngon raja-raja." Teuma geubri keu lôn saboh bulôh nyang saban lagèe tongkat: dan malaikat nyan geudong, geupeugah, "Beudôh, ukô kheueh Bait Allah, ngon mezbah, ngon ureuëng-ureuëng nyang meuseumah di dalam nyan."¹

GSAM 185.2Lam basa kitab suci, “pajôh” saboh kitab nyan meumakna teurimong keubeunaran keu geupeusampoe bak ureuëng la'én, lagèe nyang na lam kitab Yehezkiel, di sinan nabi nyan geupeuleumah “saboh gulôngan kitab,” dan geupeugah bak gobnyan, “Pajôh gulôngan nyoe, dan jak peugah haba bak rumoh Israel.” Lheueh geupajôh gulôngan nyan, gobnyan geupeugah, “Teuma lôn pajôh nyan; dan lam babah lôn nyan lagèe madu manèh jih.”²

GSAM 185.3Nabi Yeremia geungui gambaran nyang saban: “Feureuman Droeneueh ka lôn teumèe, laju lôn pajôh; dan feureuman Droeneueh nyan jeuet keu seunang ngon keubahagiaan ate lôn.”³ Nibak bahsa nyan tateupeue bahwa “manèh” kitab nyan watèe tapajôh nyan meulambangkan seunang ngon pueh até nyang geurasa lé ureueng-ureueng nyang meunan geupajôh feureuman Tuhan.

GSAM 185Kitab Manèh, Lheueh Nyan Pahét

GSAM 185.4Kitab nyang geuseubôt lam Wahyu 10, nyang jikheun keu soe nyang pajôh nyan manèh lagèe madu, tapi sigra lheueh jipajôh jeuet keu “pahét” (atawa, lagèe nyang geupeugah lé ladôm ureueng teujeumah, “sigra lheueh lôn peululôh nyan, lam prôt lôn jeuet keu picra”⁴), nakeuh kitab nyan nyang nibak kitab nyan malaikat geupeumaklum, ateueh kuasa Gobnyan nyang peujeuet langèt, bumoe, ngon la'ôt, “Watèe hana lé.” Ngon meunan, pajôh kitab nyan ka teuntèe meulambangkan peunyoëmbôtan nyang seunang ateueh proklamasijih watèe nyan. Rasa pahét nyang teuka tiba-tiba nibak seukôm nyan keu ureuëng nyang pajôh jih ka meulambangkan keubandéngan nyang seudéh lam peungalaman awaknyan lheueh watèe kitab nyan ka habéh, dan awaknyan meurasa keucewa that ateueh harapan-harapan awaknyan.

GSAM 186Proklamasi Watèe Nyan Saboh Seukôm Manèh

GSAM 186.1Peumakluman wateè bak thôn 1844 nyan nakeuh haba nyang that seunang keu ureuëng-ureuëng nyang meuiman, dan nyang, hana syak lé, geuharap that sigra na peulheueh keukai dari mandum keujahatan, bala, ngon seudehèh donya meudesya nyoe. Pikéran bahwa lam padum boh minggu nyang paneuk mantong awaknyan akan geupeumulia, geupeukekal, dan na di banda meuh Allah, meusajan ngon Raja awaknyan, nyan nakeuh saboh hai nyang that peuseumangat jiwa. Lagee nyang geupeugah le sidroe ureueng nyang ka geurasa peungalaman nyan, “Ureueng-ureueng nyang beutôi-beutôi geugaséh Isa pasti geupaham perasaan ureueng-ureueng nyang geujaga deungon that teutarék haté keu teuka Peuseulamat geuh.... Kamoe meuhadap u watèe nyan deungon teunang tapi peunoh khidmat. Ureueng-ureueng nyang beutôi-beutôi meuiman geupiyôh lam saboh hubôngan nyang that damè deungon Tuhan, sibagoe tanda keu damè nyang teuma jeuet keu milék gobnyan bak masa ukeue nyang ceudah. Ureueng-ureueng nyang ka geurasa harapan ngon keupeucayaan nyan hana sagai jeuet geupeulupa watèe-watèe nyang that meuhareuga watee geupreh nyan.”

GSAM 186.2Keuadaan nyang brat that geurasa lé ureuëng-ureuëng nyang, bak uroe siblah buleuën keu-tujôh, mantong na lam donya nyang seupôt nyoe, donya cubaan ngon godaan, di sinan awaknyan harôh geuhadapi ejekan, sindiran, ngon caci maki dari ureuëng-ureuëng nyang padum jeuëm sigohlom nyan barô geupeusaran beu siëp sedia keu geujak meurumpok ngon Tuhan awaknyan, nyan meuteumèe gambaran nyang paih bak kisah Mariam watèe gobnyan “geudong di luwa jirat sira geumoë;” dan watee jiteumèe lé malaikat ngon su'eu, “Hai inong, pakon gata moe?” geupeugah lé gobnyan, “Sabab ka jicok Tuhan lôn, dan lôn hana lôn teupeue dipat ka jipeuduek gobnyan.”⁵

GSAM 187Keucewa, Teuma Hana Putôh Asa

GSAM 187.1Ureuëng-ureuëng nyang meualami keujadian nyang brat nyan geupeugah:

GSAM 187.1“Kamoe bingong ngon kecewa, tapi hana kamoe tolak iman kamoe. Kamoe meurasa ka kamoe peubuet tugaih kamoe; ka kamoe hudép meunurot iman kamoe nyang meuhareuga; kamoe kecewa, tapi hana putôh asa. Kamoe peureulèe saba nyang hana bataih, sabab le that ureueng nyang meuhina. Kamoe kayém geusapa ngon sindiran nyang hina keu keucewaan kamoe nyang ka leupah. ‘Gata goh lom neuék; pajan neuharap neuék?’ ngon sindiran-sindiran la'én nyang saban kayém that jipeugah bak kamoe lé ureuëng-ureuëng donya nyang kamoe turi, meunan cit lé ladôm ureuëng Kristen nyang meungaku, nyang jiteurimong Alkitab, tapi hana jimeurunoe keubeunaran-keubeunaran nyang rayek ngon peunténg di dalamjih. Keumatihan mantong meuleukek bak kamoe; akibat-akibat kutôk na di seulingka kamoe. Payah that keu kamoe jak tanggong lom beuban-beuban udep nyang meupusing ulèe nyang kamoe sangka ka geupeuduek siumu masa.”

GSAM 187Meubandéng Ngon Murid-murid Nyang Keucewa

GSAM 187.2Peurasaan ureuëng nyan, meunyo tabandéng ngon seunang haté awaknyan padum jeuëm seugolom nyan, pasti lagèe pahét nyang meucucôk nibak picra. Ureuëng di seulingka geupiké, lagèe nyang hana syak lé ureuëng ramèe lheueh Isa geusaléb, bahwa ureuëng-ureuëng nyang meuiman jinoe akan jitinggai iman jih, dan jiseutoet rôh geupeukhem ateueh keubodohan droe jih nyang geukira nyan. Hana trép lheueh nyan, awaknyan hireuen watee jiteupeue bahwa rasa cinta keu teuka Tuhan nyan hana mudah geupeugadoh nibak haté ureuëng-ureuëng nyang ka beutôi-beutôi geupeuseumah droe keu Po Teuh Allah.

GSAM 187“Hana Duek Ngon Ureuëng Peukhem”

GSAM 187.3Jalan nyang geujak lé ureuëng-ureuëng nyang sunggôh-sunggôh nyan, ngon perasaan awaknyan, ka geupeugah deungon jroh lé narit nabi Yeremia, nyang geupeugah,

GSAM 187.3"Feureuman Droeneueh ka lôn teumèe, laju lôn pajôh; dan feureuman Droeneueh nyan jeuet keu seunang ngon keubahgiaan haté lôn: sabab lôn geutawôk ngon nan Droeneueh, hai Tuhan, Po Teu Allah nyang mat keukuatan. Lôn hana lôn duek lam kawan ureuëng meuhina, dan hana lôn meugeumbira: Lôn duek keudroe sabab jaroe Droeneueh, sabab Droeneueh ka neupeupunoh lôn ngon beungèh. Pakon sakét lôn hana abéh-abéh, dan luka lôn hana jeuët jipeupuléh, nyang hana jitem puléh? Peuëkeuh Droeneueh keuneuk jeuët keu lôn lagèe ureuëng meusulet, dan lagèe ië nyang abéh?"⁶

GSAM 188James White keuhai Keucewa

GSAM 188.1Padum boh kutipan paneuk nibak ureuëng-ureuëng nyang keucewa tapi mantong na harapan nyan, akan jibri gambaran nyang jroh keuhai keuadaan nyan. Nyang phon nakeuh nibak Peundita James White, nyang geumeubuët deungon that meuhasé bak thôn 1843 ngon 1844. Gobnyan geupeugah:—

GSAM 188.2“Keucewaan wateè watèe nyan ka liwat nyan brat that. Ureuëng-ureuëng nyang meuiman beutôi ka geupeulheueh mandum keu Almaseh, dan ka geurasa keuhadiran Gobnyan nyang goh lom na sagai. Awaknyan, meunurot anggapan droe, ka geubri peuingat nyang keuneulheueh keu donya, dan ka geupeujioh droe, bacut leubèh kureuëng, dari ureuëng ramè nyang hana meuiman dan nyang meuhina. Dan deungon beureukat ilahi ateueh awaknyan, awaknyan leubeh meuh'eut meugabông deungon Tuhan awaknyan nyang ka rap geuharap teuka dan malaikat-malaikat suci, nibak deungon ureueng-ureueng nyang ka geupeujioh droe. Gaséh sayang Isa geupeunoh jiwa, dan meucahya nibak tiep-tiep muka, dan deungon meuh'eut nyang hana teukira awaknyan geumeudo'a, ‘Teuka kheueh, ya Tuhan Isa, dan teuka kheueh sigra,’ teuma Gobnyan hana teuka.

GSAM 188.3“Teuma Allah hana geutinggai umat Gobnyan.... Ngon teunaga ngon peunyejuk haté nyang khusuih, ayat-ayat lagèe nyang geutuléh keu Ibrani nyoe ka jitamong u dalam pikéran ngon haté ureuëng-ureuëng nyang teungoh geu-uji ngon teungoh geupreh: 'Sabab nyan, bèk sampoë gata peulheueh harapan gata, nyang na upah nyang rayek that. Sabab gata peureulèe saba, mangat, 'oh ka lheueh gata pubuet keuheundak Allah, gata jeuet teurimong janji nyan. Sabab siat treuk teuma, Gobnyan nyang teuma teuka nyan teuma teuka, dan hana geutunda. Jinoe ureueng nyang beuna udép deungon iman; teuma meunyoe na ureueng nyang meupaleng, jiwa Lôn hana galak keu ureueng nyan. Teuma geutanyoe kon dari ureueng nyang meupaleng u binasa; teuma dari ureueng nyang meuiman keu seulamat jiwa.'⁷ Hai-hai nyang peunteng lam beunagi Kitab Suci nyoe nakeuh nyoe:—

GSAM 188.4“1. Ureuëng nyang geutuju nyan na lam bahaya jitinggai keuyakinan jih bak hai-hai nyang ka jipeubuët deungon beutôi.

GSAM 189.1“2. Awaknyan ka geupeubuet keuheundak Po Teuh Allah, dan ka geupeutamong lam keuadaan ujian nyang peureulèe saba.

GSAM 189.2“3. Ureuëng beuna bak masa nyoe harôih udép deungon iman, kon deungon ragu-ragu peuëkeuh awaknyan ka jipeubuët keuheundak Po Teu Allah, tapi iman bak hai nyang ka jipeubuët keuheundak Po Teu Allah nyan.

GSAM 189.3“4. Ureuëng-ureuëng nyang hana ék teutap sabé lam ujian iman, tapi jitinggai keuyakinan ateuëh buët nyang ka jipeubuët keuheundak Tuhan, dan jipluëng u likôt, nyan ka jicok jalan langsong u binasa.”⁸

GSAM 189Nibak N. Southard, Editor Midnight Cry

GSAM 189.4Lam Midnight Cry tanggai 31 Oktober 1844, kira-kira siplôh uroe lheueh abéh masa dua ribèe lhee reutôh uroe, nyoe keuh nyang geupeuteubiet dari pèn editor:—

GSAM 189.5“Meunyo takalon banmandum keuadaan nyang na bak geurakan nyoe, peungarôh nyang meubri beureukat nyang ka jipeuhasé ateueh pikéran aneuk-aneuk Allah, ngon beunci seureuta niët jeuheuet nyang ka jipeuleumah lé musôh Gobnyan, geutanyoe harôh taanggap nyan seubagoe ‘su teungoh malam’ nyang beutôi. Dan meunyoe geutanyoe na padum uroe keu geu-uji iman geutanyoe, nyan mantong seusuai deungon parabel siploh dara; sabab watee awaknyan ka ban beudoh dan ka geupeusiap lampu, mantong na watee keu lampu dara nyang bangai nyan akan padam. Hai nyan hana jeuet teujadi seugolom uroe keu siploh nyan liwat; sabab sampoe watee nyan lampu awaknyan akan teutap hu. Ngon sabab nyan, harôih na uroe nyan jiliwat, mangat ureuëng nyang bangai jitinggai iman jih, lagèe nyang ka teujadi bak thôn 1843 keu masa penantian. Meunyo na teulat bacut, nyan kon sabab keu keucewa, teuma jipeuleumah betapa teupat Tuhan bak geupeuseuleusoe firman Gobnyan. Ngon sabab nyan, beu tapeukong peungakuan iman geutanyoe deungon hana meugoyang; sabab Gobnyan nyan teupat janji.”

GSAM 189Nibak Joseph Marsh, Editor Voice of Truth

GSAM 189.6Lam Voice of Truth tanggai 7 November 1844, geutuléh:—

GSAM 189.7“Kamoe deungon seunang até meungaku bahwa kamoe ka salah bak hakikat keujadian nyang kamoe harapkan akan teujadi bak uroe keu siplôh buleuen keu tujôh; teuma kamoe gohlom jeuet meungaku bahwa Peumimpin Keureubeuenan Rayeuk kamoe hana geupeubuet banmandum nyang jeut geupeusah lé lambang keu kamoe harapkan bak uroe nyan. Jinoe kamoe ka meuiman bahwa Gobnyan ka geupeubuet.”

GSAM 190.1Ureuëng Advent geuharap bahwa bak uroe keu siplôh buleuën keu tujôh thôn 1844, masa dua ribèe lhèe reutôh uroe nyan akan abéh, dan bak uroe nyan Kristus akan geupeuseuleusoe buet keuimaman Gobnyan dan geutron u bumoe keu geubri beureukat keu umat Gobnyan. Peunyelidikan leubèh lanjôt ka geupeunyata bahwa nyan nakeuh phôn mula buet Gobnyan geupeusucèe teumpat suci di langèt nyang teujadi bak uroe nyan, kon keu peuseuleusoe buet Gobnyan seubagoe imam.⁹ Kon geuanggap buet peusucôe teumpat suci nyan seubagoe beunagi nibak buet Kristus seubagoe imam, tapi geupeugah bahwa peusucôe teumpat suci nyan nakeuh peusucôe bumoe deungon apui bak watèe Kristus teuka. Meunyoe kon banmandum, paléng kureueng tanoh Kanaan teuma geupeusucôe bak watèe nyan.

GSAM 190Teumpat Suci nyang Jipeucaya Nakeuh Bumoe

GSAM 190.2Pendapat nyoe geupeugah lam saboh artikel lé Geo. Storrs, lam Midnight Cry tanggai 25 April 1844. Gobnyan geutanyong, “Peue nyang jeuet keu teumpat suci nyang keuneuk geupeusucé? Pandangan lôn seugolom nyoe nakeuh nyan ban sigom bumoe. Bahwa nyan nakeuh saboh bagi bumoe mantong lôn patéh. Teuma bagi nyang toh? Nyan keuh nyang akan lôn useuha keu lôn jaweueb.”

GSAM 190.3Gobnyan geucok kutipan janji keu Ibrahim, peuteutap nyang saban keu Ishaq, ngon peubarô keu Yakub, lheueh nyan geucok kutipan lagu Musa, nyang geupeugèt lé Miriam lheueh geuliwat La'ôt Mirah, nyang lam nyan awaknyan geumeulagu: “Gata neuba awaknyan tamong, ngon neupula awaknyan di ateueh gunong warisan Gata, di teumpat, hai Tuhan, nyang ka Gata peugèt keu teumpat tinggai Gata, di teumpat suci, hai Tuhan, nyang ka jaroe Gata peuteutap.”¹⁰

GSAM 190.4Meunyo ureuëng nyang baca geupeusaban ngon saksama teks di ateuëh nyan ngon catatan keuhai peunuhan jih nyang geutuléh lé ureuëng nyang karang mazmur, teuma geukalön bahwa hana geupeugah bahwa bahkan tanoh Palèstina nyan nakeuh teumpat suci nyan. Daud geupeugah, watèe geupeugah haba keuhai Tuhan nyang geupimpin aneuk-aneuk Israel: “Gobnyan geuba awaknyan u bataih teumpat suci Gobnyan, bahkan u gunong nyoe, nyang ka geubloe lé jaroe uneun Gobnyan.”¹¹ Lam lagu di La'ôt Mirah geupeugah bhah tanoh Kanaan, bahwa nyan nakeuh teumpat nyang ka geupeugöt keu “geuduek, lam teumpat suci.” Jadi lam kutipan nibak Zabur nyoe, Gunong Moriah, teumpat Bait Suci geupeudong, geukheun mantong “batas Bait Suci Gobnyan.” Teuma lam Zabur nyang saban nyan na geukheun, “Gobnyan geupiléh sukèe Yehuda, Gunong Sion nyang geugaséh. Dan geupeudong Bait Suci Gobnyan lagèe istana nyang manyang, lagèe bumoe nyang ka geupeukukôh siumu masa.”¹²

GSAM 191Peusucôe Teumpat Suci nyang Jipiké keu Peusucôe Bumoe

GSAM 191.1Lam artikel nyang ka geuseubôt di ateueh, lheueh geucok bukti nyang geukira bahwa donya, atawa paléng kureueng tanoh Palestina, nakeuh teumpat suci nyan, peundita nyan laju geutanyong, “Pakriban cara teumpat suci nyan geupeugleh?” Ngon narit nabi Mikha, gobnyan geujaweueb, “Sabab, kalon, Tuhan teuka geuteubiet dari teumpat Gobnyan, dan geutrôn, dan geumat gaki ateueh pucôk-pucôk bukét di bumoe. Dan gunong-gunong akan cair di yup gobnyan, dan leumbah-leumbah meuklèh-klèh, lagèe lilén di hadapan apui, dan lagèe ië nyang jipeutiek trôn nibak teubéng nyang curam.”¹³

GSAM 191.2Deungon pikeran nyang lazém jiteurimong bak masa nyan bahwa bumoe nyan keuh teumpat suci, ureuëng nyang baca teuntèe mudah jipham pakon awaknyan yakin, hana meusangsé, bahwa bak akhé masa dua ribèe lhee reutôh uroe nyan Tuhan akan teuka dan geupeusucoe bumoe lagèe nyang geupeugah lé Nabi Mikha. Lam mandum peulawanan nyang jipeuteubiët ateuëh ureuëng Advent, hana meusidroë pih lawan nyang peugah bahwa peusucôe bumoe ngon apui nyan kon keujadian nyang teuma teujadi lagèe peusucôe teumpat suci bak akhé duwa ribèe lhèe reutôh uroe.

GSAM 191Rasui-rasui Keucewa, Teuma Geupeuseuleusoe Kitab Suci

GSAM 191.3Nyoë kon keujadian nyang tunggai di manö ureuëng ka jipeubuët keuheundak Tuhan, ka jipeuseumpurna kitab suci, tapi teutap keucewa ngon harapan jih nyan kareuna jih hana jimeuphôm sifeuët keujadian nyang teuma teujadi. Meunan keuh nyang teujadi bak rasui-rasui Almaseh. Watèe Gobnyan geuduek ateueh aneuk keuleudèe, geutamong u Yerusalem, awaknyan geumeuhôi-meuhôi sira geuingat keu narit nabi:¹⁴ “Meuhôi-meuhôi kheueh, hai aneuk dara Yerusalem: kalon kheueh, Raja gata ka teuka bak gata; Gobnyan nyan ureueng beuna, dan na keuseulamatan; Gobnyan meureundah haté, geu-ék ateueh keuleudèe, dan ateueh aneuk keuleudèe.”¹⁵ That peureulèe na su meuhôi bak watèe nyan, sampoë meunyoe awaknyan seungap, batèe pih ka meuhôi.¹⁶ Murid-murid geusangka bahwa Almaseh, bak watèe nyan, teungoh geujak ék u singgasana Daud seubagoë raja donya (“kamoe yakin bahwa gobnyan nyan kheueh ureuëng nyang teuma teubôh Israel”¹⁷), ngon sabab nyan awaknyan meuhôi, “Meubri beureukat keu keurajeuën bapak kamoe Daud, nyang teuka lam nan Tuhan.”¹⁸ Padum na meuhôi-hôi nyang teujadi bak keujadian nyan meunyo awaknyan jipham bahwa lam si minggu Almaseh akan maté lam jirat Yusuf, jikeupông lé peunjaga Romawi? Padum na le “keumuliaan” keu Allah ngon peungabdian nyang na bak ureuëng Adventis bak thôn 1844 meunyo awaknyan jipham bahwa peugléh teumpat suci bak akhé mandum watèe nubuat nyan akan jipeuhabéh watèe meuthôn-thôn sigohlom Tuhan teuka?

GSAM 192Hana Salah bak Itông 2300 Uroe

GSAM 192.1Watée ureuëng-ureuëng nyan geupareksa beuget-get hitôngan masa nyan, hana geuteumèe cacat; teuma Tuhan hana geuteuka, meunan cit bumoe hana geupeugleh ngon apui. Peue makna jih? Ka teuntèe awaknyan geuteupeue bahwa Tuhan ka na sajan awaknyan lam geurakan nyang rayek nyan; teuma jinoe awaknyan bingong. Keuyakinan awaknyan keu Tuhan hana meugoyang. Awaknyan geuteupeue Gobnyan hana geutinggai awaknyan. Cahya nyan teuma teuka dari saboh sumber. Su'eu nyang brat di hadapan awaknyan geupeugah deungon narit Nabi Yeremia nyang ka geuseubôt, “Peu keuh Gata keu Lôn banmandum lagèe sidroe ureueng meusulet, dan lagèe ië nyang abéh?” Iman hana geupeulara syak wasangka nyan, sabab teuingat lam pikéran awaknyan narit Tuhan meulalu nabi Habakuk keuhai peunampakan nyan, “Bak akhé jih nyan teuma meututô, dan hana meusulet.”¹⁹ Ucapan nyang ka geucok dari editor Voice of Truth nyan deungon jroh that geupeugah posisi awaknyan: “Kamoe gohlom jeuet meungaku bahwa Imam Rayeuk kamoe hana geupeuseuleusoe bak uroe nyan mandum nyang geupeuteuntèe lé lambang keu kamoe harapkan.”

GSAM 193Cahya ateueh Teumpat Kudus Ka Jiteumèe

GSAM 193.1Hiram Edson, dari Port Gibson, N.Y., geupeugah bak lôn bahwa siuroe lheueh watee nyan ka liwat bak thôn 1844, watèe gobnyan teungoh meudo'a di likôt tumpôkan jagông lam saboh blang, Roh Allah geuteuka ateueh gobnyan deungon cara nyang that kreueh sampoe gobnyan karab reubah u tanoh, dan meusigoe deungon nyan teuka saboh pikéran, “Bait suci nyang keuneuk geupeusucoe nyan na di syeuruga.” Gobnyan geupeusampoe pikeran nyan bak O. R. L. Crosier, dan awaknyan duwa geuseulidek ngon teliti bhah nyan. Bak awai thon 1846, saboh peunjeulasan nyang that rinci bhah masalah teumpat suci nyan meunurot Alkitab, nyang geutuléh lé Tuan Crosier, geucetak lam Day Star, saboh surat haba nyang bak watèe nyan geupeuteubiet di Cincinnati, Ohio. Lam esei nyang panyang nyan, geupeuleumah bahwa buet peusucôe teumpat suci nyan nakeuh buet keuneulheueh Almaseh seubagoe Imam Rayeuk geutanyoe, nyang geupeuphôn bak thôn 1844 dan geupeuseuleusoe hana trep sigohlom Gobnyan keubiet-keubiet geuteuka lom lam awan di langèt seubagoe Raja Bansa Raja dan Tuhan Bansa Tuhan.

GSAM 193Geurija-geurija Mita Anggota nyang Gadoh

GSAM 193.2Uroe keu siploh buleuen keu tujôh ka liwat, dan geurèja-geurèja nyan jipiké awaknyan akan mudah jireubôt keulayi anggèta nyang ka gadôh, nyang ka meupisah dari awaknyan di yup “su teungoh malam” dan peusan malaikat keudua; teuma lam hai nyan awaknyan keucewa that, lagèe nyang teupeuleumah lé jaweueban di yup nyoe ateueh desakan-desakan untuk jiwoe keulayi bak organisasi awaknyan nyang awai, lagèe nyang na lam Midnight Cry tanggai 26 Des. 1844:—

GSAM 193.3“Teuma peu keuh fakta jih? Awaknyan sadar that bahwa lam kawan rayeuk geurija-geurija nyan, tema-tema utama nakeuh, ‘Peubeutôi donya,’ ‘milenium siribèe thôn,’ ngon ‘woe ureuëng Yahudi u Palestina,’ sigohlom teuka pribadi Juru Seulamat. Ureuëng-ureuëng nyang jiwoë keu jiduek di yup lagu-lagu nyang peu'éh nibak doktrin-doktrin nyang hana meunurot kitab suci dan hana meupatôt nyan, awaknyan jipeubuët nyan deungon mata teuhah; dan buët lagèe nyan dari pihak awaknyan nakeuh ‘jiwoë u likôt,’ nyan beutôi that.

GSAM 194.1“Ka jeuët keu ‘bibeuëh’ meunurôt makna Alkitab, leubèh aman ‘meutamah maju’ nibak ‘woë u likôt’ atawa ‘meugisa,’ terutamajih bak watèë nyoë, watèë makuta keumuliaan ka rap geubri keu ureuëng-ureuëng nyang seutia lam Isa Almaseh.”

GSAM 194.2Langkah geurèja-geurèja nyang peujioh uroe teuka Tuhan deungon cara jidukông ajaran-ajaran nyang hana meunurot kitab suci nyan, ka jipeuingat ureuëng Advent keu narit nabi Yehezkiel nyoe: "Hai aneuk manusia, kalon, awaknyan dari rumoh Israel jipeugah, 'Visi nyang jikalon nyan keu uroe-uroe nyang jioh u keue, dan jih nyan jipeugah nubuet keu masa nyang ji'ôh that.'" Lam hubôngan nyang saban teurumpok jaweueban nyang geunguy lé ureuëng Advent, "Ngon nyan, peugah keu awaknyan, Meunoe kheun Tuhan ALLAH: Hana lé geupeupanyang narit Lôn, teuma narit nyang ka Lôn peugah nyan pasti teujadi, kheun Tuhan ALLAH."²⁰

GSAM 194“Gata Harôh Meunubôt Lom”

GSAM 194.3Ureuëng-ureuëng nyang “geupajôh” kitab nyan, dan geupeusampoe proklamasijih “wateè”, geupike buet awaknyan keu donya ka seuleusoe; nyan kheueh sababjih geupeunyata bahwa awaknyan harôh geupeurunoe lom bansa-bansa, basa-basa, ngon raja-raja. Saboh beunagi la'én nibak buet nyan, nyang goh lom deuh, jinoe harôih geupeuseuleusoe,—nyakni peuleumah bak ureueng ramèe sifeuet nyang seubeutôijih nibak bait suci Allah di syeuruga ngon ibadah di ateueh mezbahjih. Pèrèntah keu geu-ukô bait suci²¹ nyan peureulèe mangat jeuet teupeue sifeuet keujadian nyang teuma teujadi bak akhé masa nubuet, dan ngon nyan jeuet geupeugah peunjeulasan ateueh narit, “Óh lheueh nyan teumpat suci nyan teuma geupeugléh.”

GSAM 194.4Beu neuingat bahwa malaikat dari peumakluman wateè nyoe teuka dari syeuruga, dan sigohlom buet gobnyan seuleusoe, gobnyan geubri tugaih keu geupeurunoe ureueng rame lom. Maka, peusan nyan, nyang akan peujeulaih masalah teumpat suci, keu jibri keuyakinan keu ureuëng-ureuëng nyang keucewa, dan bak watee nyang saban jisedia keu awaknyan saboh “bulôh,” atawa “tongkat,” atawa atôran, nyang deungon nyan umat Allah jeuet jipeureksa keududukan moral awaknyan di hadapan Gobnyan, harôih na tanda-tanda nyang nyata bahwa nyan asai jih dari syeuruga, dan kon dari asai manusia.

GSAM 195Praduga Peuhalang Akses u Ureuëng Ramèe

GSAM 195.1Praduga nyang na ateueh doktrin advent ka jeuet keu rintangan nyang rab hana ék liwat keu ureueng ramè; dan meunyoe tacuba peurunoe awaknyan lom deungon hana cahaya nyang trang dan pasti keuhai seubab keucewa nyan, nyan hana meuguna. Ureueng-ureueng Adventis nyan keudroe peureulèe that roh jih geupeuseumangat lom deungon tugas dari syeuruga, sigohlom ureueng ramè jeuet geupeurunoe deungon beutôi; dan pakri cara nyan jeuet teupeulaku? Peu keuh nyan jeuet geupeubuet ngon akai manusia mantong? Atawa peu keuh ureueng-ureueng nyang ka geurasa buet dalam Roh Allah lam gerakan nyang ka leupah nyan, akan puas ngon akai manusia mantong? Hana la'én nyang jeuet peuteubiet awaknyan dari keubingongan jih nyan seula'én buet lagèe “peusan malaikat keulhèe”²², dan nyoe, si langkah-si langkah, meunurot keumampuan awaknyan untuk geuteurimong, ka geupeuphôn deungon cara nyang patôt, deungon geuba bukti-bukti nyang that meyakinkan bahwa nyan asai jih dari syeuruga.

GSAM 195Lagee Biri-biri Hana Ureueng Peulara

GSAM 195.2Di sinan na keuh badan advent nyang rayeuk, bak saboh makna, lagèe biri-biri hana ureueng peulara, nyang ribèe droe nibak awaknyan barô padum boh minggu nyang ka leupah ka jipeupisah droe nibak mandum geurèja ngon keuyakinan, hana organisasi manusia nyang tanggông jaweueb ateueh keuseujahtraan rohani awaknyan. Awaknyan hana peunasihat di bumoe nyang jeuet jipeucaya; bak Tuhan mantong keuh teumpat awaknyan meuharap.

GSAM 195.3Teuma, awaknyan yakin keu saboh hai, dan nyoe keu awaknyan lagèe jangké—peumuman wateè nyan beutôi.²³ Teuma seubagoe saboh bansa awaknyan na bak saboh keuadaan, meunyoe kon Po Teuh Allah geupeutunyok ngon geujaga awaknyan, awaknyan mudah teurimong peunjeulasan nyang salah, atawa gadoh "saba" dan putôh iman bak peungalaman masa u likôt. Na ladôm nyang jipeubuët nyan; seudangkan nyang la'én, deungon mata iman jipeutheun bak Gobnyan nyang jigaséh lé jiwa awaknyan, deungon sunggôh-sunggôh jitanyong, "Hai penjaga malam, pakri haba malam nyoe? Hai penjaga malam, pakri haba malam nyoe?" Peunjaga malam nyan geujaweueb, "Ka trok beungoh, dan malam pih teuma trok; meunyo gata keuneuk tanyong, tanyong kheueh; gisa kheueh, jak kheueh."²⁴

GSAM 196J. N. Andrews keuhai Keucewa

GSAM 196.1Peundita J. N. Andrews, sidroe ureueng nyang geualami peungalaman nyoe bak thon 1844, geupeugah lagee nyoe bhah keucewa nyan:—

GSAM 196.2"Ureuëng-ureuëng nyan keucewa, nyang meuharap Tuhan teuka bak thôn 1843 ngon 1844. Fakta nyoë keu le ureuëng ka jeuët keu alasan nyang cukôp keu jitulak mandum keusaksian lam hai nyoë. Kamoe meungaku keucewa nyan, tapi hana jeuët meungaku bahwa nyan jeuët keu alasan nyang beutôi keu jitulak kuasa Tuhan lam buët nyoë. Geurija Yahudi pih keucewa watee, bak akhé buët Yahya Pembaptis, Isa geupeudeuh droë gobnyan seubagoë Mesias nyang ka geupeujanji. Dan murid-murid nyang meuiman nyan that hanco haté watee gobnyan nyang awaknyan harapkan keu peubeubaih Israel geumat ngon jipoh lé jaroe-jaroe jeuhet. Dan lheueh gobnyan bangkét, watee awaknyan meuharap gobnyan geupeupuléh keurajeuen keu Israel, ka teuntèe awaknyan keucewa watee awaknyan muphôm bahwa gobnyan geujak u Bapak geuh, dan awaknyan teuma geutinggai lam masa nyang trép lam bala ngon sangsara. Teuma keucewa nyan kon meukeusud jih bahwa Tuhan hana geumat bak geupimpin umat Gobnyan. Nyan seuharôh jih jeuet keu sabab keu awaknyan untôk geupeubeutôi keusalahan, teuma kon untôk geupeulheueh keuyakinan awaknyan bak Tuhan. Nyan kheueh sabab aneuk-aneuk Israel ka keucewa di padang pasé, sampoe awaknyan kayém that geutulak bimbingan ilahi. Awaknyan geupeuleumah seubagoe peuringatan keu geutanyoe, mangat bék teujatôh bak conto hana meuiman nyang saban."²⁵

GSAM 196Keubeunaran Na Upacara Peumandi Hana Meugalak

GSAM 196.3Lagèe jih nyan nakeuh rancana Tuhan keu geupeuduek keubeunaran-keubeunaran nyang peunténg lam saboh saluran nyang hana ramèe ureuëng galak, nyang jeuët keu saboh saléb²⁶ keu geuteurimong ngon geuseumèe nyan. Hai nyoe leubèh-leubèh beutôi bak uroe-uroe keuneulheueh nyoe. Petrus, watèe geupeugah haba bhaih masa nyan pajan ujông mandum peukara ka “toë,” ngon pajan “peungadelan” akan “geupeuphôn nibak rumoh Allah,” geupeugah, “Hai syèdara nyang lôn gaséh, bék hireuën ateuëh cubaan apui nyang teuma jicuba droëneuh, lagèe na hai nyang anèh teujadi ateuëh droëneuh; teutapi meugeumbira kheueh, saweuëb droëneuh ka rôh lam penderitaan Almaseh, mangat, watèe keumuliaan Gobnyan teupeuleumah, droëneuh pih meugeumbira deungon seunang nyang luwa biasa. Meunyo gata geucaci kareuna nan Almaseh, meubahgia kheueh gata; sabab Roh keumuliaan dan Roh Allah na ateueh gata. Bak pihak awaknyan Roh nyan geupeugah jeuheut, teuma bak pihak gata Roh nyan geupeumulia.”²⁷

GSAM 197.1Wateè keubeunaran ka jiteurimong cubaan hana jigalak lé ureuëng ramè, keu tateurimong nyan peureulèe rahmat nyang leubèh nibak sekadar seutot iman ureuëng ramè. Ureuëng munafék hana jikalon seubagoe daya tarék nyang rayeuk keu jiteurimong saboh keubeunaran nyang peureulèe buet, lagèe meudayông u tunong “meulawan angèn ngon ie kruëng.” Ngon lagèe nyan, keubeunaran nyan jeuët keu saboh ujian keu ureuëng nyang seutia, jujô haté, ikhlas, ngon na nurani.

GSAM 197.2Ka lheueh kamoe peuleumah sigohlom nyoe bahwa nubuet bhaih geurakan advent nyan jipeugah akan na keucewa. Nyan ka teujadi; ngon meunan, lam peungatôran Allah, bak teurimong peusan nyan na saléb jih.