Uidhal 11 — Gnigipa Salgini S·greni Aga·ata Kat
GSAM 171.1“Aro gipin sa·gre ja·rike inaha, Ga·akaha, ga·akaha, ua dal·gipa songjinma Babylon, maina ua pilak jatrangko an·tangni til·ekani ka·onangani draka bitchiko ringataha.”1
GSAM 171.2“Unon nokgipa ka·onange an·tangni nokkolna inaha, Songjinmani rama dal·giparang aro rama chongiparangona ta·rake ong·katangbo, aro kangalrangko, jak ja be·giminrangko, ja koragiparangko aro mikgri manderangko ianona ra·babo.”2
GSAM 171.3Gitel an·tangni dangdike on·giparangchi, “Uni bichal ka·ani konta sokbaaha,” ingipa Aga·ata katchi a·gilsakko moataha. Uni manderang ong·a ine ku·rachakgipa pilakan skagenchimode, ia Aga·ata kato nangrimna man·genchim. Ian bia ka·ani “mi cha·aniona” skanggipa okamani ong·achim. Iako “okamako man·giminrangna” aganprakaha.3 Dingtang dingtang pa·sikanirangchi ia okamaniko jegalahani gimin, Gnigipa Salgini s·greni aga·ata kat baksa meligipa gnigipa okamaniko on·aha.4 Ia okamanichi Gitel an·tangni bebeni seng·ani bariroroa baksa somoini bon·kamaona re·mikkangna gita dol sa manderangko dingtangataha.
GSAM 171Bia Ka·ani Mi Cha·aniona Gnigipa Okamani
GSAM 171.4Bichal ka·ani kontani chrikani ja·mano ong·gipa gnigipa Aga·ata kat indine agana, “Ga·akaha, ga·akaha, ua dal·gipa songjinma Babylon, maina ua pilak jatrangko an·tangni til·ekani ka·onangani draka bitchiko ringataha.” Aro mi cha·aniona gnigipa okamani indine agana, “Na·simang songjinmani rama dal·giparang aro rama chongiparangona ta·rake ong·katangbo, aro kangalrangko, jak ja be·giminrangko, ja koragiparangko aro mikgri manderangko ianona ra·babo.” Ia Sastroni kattarang minggnion Gitelni manderang ong·a ine ku·rachakgiparangko “songjinma” ine minga. Uamangni nanggrikgija aro jajagimin bebera·ani skianirangni gimin uamangko “Babylon” ine minga. Bon·kamani somoini gimin agangipa gipin Sastroni kattao an·ching nika je Gitelni re·baani skangdik uni manderangko “Babylon” oni ong·katchina okama: “Ga·akaha, ga·akaha, dal·gipa Babylon, aro ua diabolrangni dongchakani, pilak marang gnanggipa gisikrangni dongchakani aro pilak marang gnanggipa aro mitchibegni do·orangni chipchang ong·aha.... O angni manderang, uoni ong·katbabo, maikai na·simang uni paprango bak man·pajawa, aro uni sabisirangko man·pajawa.”5
GSAM 172“Na·a Maikai Knaahachim, Uko Gisik Ra·bo”
GSAM 172.1Sardis mondolina agangipa kattao an·ching poraia, “Uni gimin na·a maikai ra·chakaha aro knaaha, uko gisik ra·bo, aro kimkime rim·bo, aro gisik pil·bo. Uni gimin na·a mikrakjagenchimode, anga cha·ugipa gita nang·ona re·bagen, aro anga mai kontao nang·ona re·bagen, uko na·a u·ijawa.”6 “Jezebel”—bebera·aniko watchanggimin mondolini—kam ka·ani andalgipa somoini ja·mano, Toromko Nampilatani kamchi Sardis mondoli ong·katbaaha gita nika. Sardis mondoli janggi tanggipa mondoli ong·achim ine una aganaha; indiba Gitelni re·baani skianiko knae jegalahao, ua ong·gnigipa kam uko “walo cha·ugipa” gita rang·gitik man·na amgipa biapo an·tangko donaha. Watata Paul 1 Thessalonikirangna 5:1-5 o agana gita, Gitelni re·baani sepangon “Tom·tomani aro kenmangijani” ine chrikgiparangni obostha indaken ong·gen. Bebeni seng·aniko ja·rikgiparangko “salni dedrang” ine minga, aro Gitel uamangni kosako cha·ugipa gita re·bajawa.
GSAM 172.2Mondoli snini gimin ia katchinike agangipa talatanio an·ching nika je Sardis mondolini ga·akani ja·mano Philadelphia, ba ua kattani orto gita jongada ka·sagrikani mondoli rang·san ja·rika. Gnigipa Salgini s·greni aga·ata katchi dingtang dingtang mondolirangoniko ong·katatgimin aro Kristo ta·raken re·bagen ingipa dal·gipa mongsonggipa bebeni kosako jongada ka·sagrikani kaan ming sao nangrimatgimin bebera·gipa 50,000 manderang indaken ong·achim.
GSAM 173Gnigipa Aga·ata Katko Maikai Aganprakaha
GSAM 173.1September 12, 1844-ni Walni jatchio chrikani ingipa kobor ki·tapo Gipi J. V. Himesni Gnigipa Salgini s·greni aga·ata katni gimin aro uko aganprakna dilgipa obostharangni gimin agananiko dona. Uni chittio McConnelsville, Ohio, August 29, 1844 ine tarikko seaha, aro indine agana:—
GSAM 173.2“1840 bilsio an·ching Jong-gipa Miller baksa kamko a·bachengon, ua bilsi sku somoina skie aganaha. Ua somoio ua saksa mangmang gita chadenge dongachim. Indiba uni kam ka·ania dontonggija ong·aha aro toromko ra·chaka ine ku·rachakgiparangko Isolni manderangni chong·motgipa ka·donganina aro Gitelni re·baanina nanggipa tarisamsoanina mikrakatna bite gnang ong·aha. Gisik pil·gijagipa pilak rokom manderangkoba uamangni gimagimin obosthako u·iatna, aro Chawari Gital re·baon uko tom·tome grongna tarisamsoani ine rang·sanan gisik pil·na aro Isolona an·pilna nangani gimin mikrakatna bite gnang ong·aha. Iarangan uni kamrangni dal·gipa miksonganirang ong·achim. Ua manderangko toromni dol ba bak sani manderang ong·atna jotton ka·jaha.
GSAM 173.3“Re·baani sepangaha ingipa bebeni gimin an·ching ka·dongaha aro ua skianiko manderangni mikkango ra·chakahaon, an·chingba ua apsan chanchianirangko ra·aha aro Isolni dilanichi je dingtang dingtang toromni dolrango kam ka·na okamako man·aha, uno ua apsan cholko ja·rikaha. Uamangko pe·na ba bak dakna aro jajaatna an·chingni kam ong·ja ine an·ching dangdike on·giparangna aro mondolirangna aganaha. An·chingo ming sa rongtalgipa miksongani dongachim, uan ‘chrikani,’ bichal ‘cholgugao’ sokbaaha ingipa mikrakataniko on·na, aro ia ong·gnigipa kamna tarichina an·chingni mande jinmarangko didiatna ong·achim.... An·chingni kamrangoniko namgniko man·gipa, indiba gisik kakket ong·e ua skianiko ra·chakgijagipa dangdike on·giparang aro mondolini memborrang iako nikaha je uamang ua skiani baksa re·na, uko aganprakna aro uko rakkina nanggen, ong·jaode uamangni kosako sokbagipa ia neng·nikani somoio, kimkime aro ka·tongo mangsange bebera·giparang baksa neng·nikani ong·gen. Uni gimin uamang ua skianiko jegalna rai on·aha, aro mitam dolsa cholchi, mitam gipin cholchi, ia kattako dontongatna mangsongaha. Iara uamangni gisepo donggipa an·chingni Jongadarang aro noabirangko namen dake niani obosthao donaha. Uamangoni bang·an an·tangtangni mondolirangna ka·saachim aro uko watna chanchinaba man·jachim. Indiba uamangko ka·dingsteke, onia dake, dingtang dingtang cholchi skang man·ronggipa cholrang aro katchaanirangoniko chel·atahaon, aro ‘tik somoini cha·aniko’ uamangna on·jahaon, aro Neng·takani saloniko Neng·takani salona uamangni nachikolo ‘Tom·tomani aro kenmangijani’ ingipa togigipa gitko knaatahaon, uamang ru·utgijan an·tangtangni dolrangna ka·saani miksonganiko watgalaha, aro an·tangtangni bilni rasongo chakatbaha, pakriko mo·chakatgale, ‘O angni manderang, uoni ong·katbabo’ ine chrikaha.
GSAM 174Dake Niani Obosthao
GSAM 174.1“Ia obostha an·chingko dake niani biapo donaha, (1) Maina an·chingni katchinike agangimin somoini bon·kamchibegipao an·ching sokaha, aro ua somoio Gitel an·tangni pilak manderangko dol sa dake chimonggen ine an·ching ka·dongachim; aro (2) an·ching pangnan dingtang skianiko aganprakrongachim. Da·o obostharang dingtangahaon, an·chingko aro an·chingni Aga·ata katko ra·chakgimin mondolirangko watgrikna aro pe·na chrikani baksa an·ching bak ra·ode, an·chingko kakketgija daka ine chanchigenchim. Uni gimin an·ching jajrengaha, aro skanggipa chadengani gita dakkuaha. Indiba mondoli aro dangdike on·giparang ia kattako indita chel·aona dilangaha je Isolna kenani baksa bebeko aro ga·bela man·gipa Isolni dedrangko warachakna chadengna an·ching nangaha.
GSAM 174An·chingni Dakbewalna Watatarangni Mesokani
GSAM 174.2“‘Aro ua Jihudirangni olakiram nokona nape, ja gittamna kenmangija aganaha, Isolni songnokni gimin kattarangko jegrike agane aro ra·chakchina didiate dongaha. Indiba mitamrang ka·tong rakgipa ong·e bebera·jaha, aro mande jinmani mikkango ua ramani gimin namgija aganahaon, ua uamangoniko re·ongkate, sninggiparangko dingtangataha, aro Tyrannus minggipa sak sani skulo salantian jegrike aganaha.’7 ‘Mitamrang ka·tong rakgipa ong·aha’ aro ‘mande jinmani mikkango ua ramani [Gitelni re·baani] gimin namgija aganaha’ inani ja·manosa an·chingni Jong-giparang mondolirangoniko ong·katna aro dingtangna gisiko moako man·aha. Uamang ‘namgijagipa nokkolrangni’ ia ‘namgija agananiko’ chakna man·jaha. ‘Patia man·gipa ka·donganiko’ nisogiparangko onia dakna aro ‘namgija aganna’ man·gipa mondolirangko uamangde donnuani orto gnanggipa Babylonni deme·chikrang ine mangmang nikaha. Uamang indake uamangko aganprakaha aro nama kattani jakgitelaniona napaha. Aro Babylonara maia ine an·ching pilakan ku·mongjaoba, Isolni re·baani aro uni songnok sepangaha ingipa skianiko champenggipa pilak manderangoniko rang·sanan aro jringjrotna dingtangna nangani gimin an·ching ku·monga. Ian janggi tangani aro siani biding ong·a ine an·ching bebera·a. Gitelni re·baaniko chonnikgipa ba uko champenggipa dolrang baksa nangrime donganian siani ong·a. Pilak mandeni aganbewalrangoniko ong·katbae Isolni kattani kosako chadengani aro Gitelni mikkang pa·aniko salantian nisengsoanian janggi tangani ong·a. Uni gimin je cholchiba nokkol ong·ani pakrio nangjage donggipa pilak manderangna an·ching da·o indine agana, ‘Uamangni giseponiko ong·katbabo, aro dingtangbo, ine Gitel agana, aro marang gnanggipako da·a dangtapabo; unon anga na·simangko ra·chakgen, aro na·simangni Paa ong·gen, aro na·simang angni depanterang aro deme·chikrang ong·gen, ine Pilakni Kosako Bil Gnanggipa Gitel agana.’”8
GSAM 175Talatna Man·gijagipa Champengani
GSAM 175.1Ua somoio mondolirang aro Adventistrangni gisepo donggipa nanggrikgijani gimin William Miller indine agana:—
GSAM 175.2“Kristian mondolirang ia skianiko aro ia patia man·gipa ka·dongani gimin an·tangtangni memborrangko a·rikatana namen ong·ronggija aro talatna man·gijagipa ong·a. Mitam Baptist mondolirang uamangko uamangni bebera·ani gimin a·rikataja, indiba re·baaniko bebera·giparang baksa Gitelni mi cha·anio bak ra·ani giminsa ine agana, uko anga u·ia. Indide re·bagipa Jokatgipao uamangni bebera·ani giminde ong·jaode, Baptist mondoli baksa mangmang Gitelni mi cha·anio bak ra·gipa angko maina uamangni aganprakani biaprangoniko a·rikata? Ian tol·gipa pa·sikani ong·a. Indiba Methodist aro Presbyterian manderang indake pa·sikna man·jawa; maina uamang mondoli dingtangrang baksa Gitelni mi cha·anio bak ra·aniko bebera·a. Uamang maina a·rikata? Mitamrangko Gnigipa re·baani gitrangko ‘git ring·ani’ gimin a·rikata ine anga knaaha; gipinrangko gisik namgijagipa ong·a ine a·rikataha, indiba uamangni kosako sakiko on·na man·gipa gisik namgijaniara uamang Kristo re·baaniko nisengsoengachim inasan ong·a. O Isol, ‘uamangko kema ka·bo, maina uamang maiko daka uko u·ija.’”
GSAM 176Mondolirangni Dakbewalni Gimin Storrsni Aganani
GSAM 176.1Adventistrangni kosako mondolirangni dakbewalni gimin George Storrs indine aganaha:—
GSAM 176.2“Da·o ia somoio uamangoni sawa ‘Anga rani gita asonga’ ine aganjawa? Aro basakoba uamang a·gilsakko chegen aro a·gilsak uamangni bebera·anina bamna nanggen ingipa chanchianichi uamangoni sawa an·tangko katchaatjawa? Re·baani cholgugao sokbaaha ine kenmangija aro rongtale an·tangni bebera·aniko aganprakgipa sak sako uamangoni badia dol an·tangtangni gisepo tom·tome dongna on·gen? Ia bilsion Gitel re·bagen ingipa kattani gimin na·simang maidake ka·tongo mangrake bebera·oba, aro ‘Isolna kenbo, aro una rasongko on·bo, maina uni bichal ka·ani konta sokbaaha’ ine chrikna badita nangchongmota ine na·simang gisiko nikoba, manderangni mikkango ia bebera·aniko aganprakaniko ‘chu·gimik dontongna’ nangani uamangni gisepo neng·nikani gri dongna on·gipa niam ong·jama?”
GSAM 176Mansfieldni Saki On·ani
GSAM 176.3Oneida, N.Y. oni March 21, 1844 o segipa L. D. Mansfield indine saki on·a:—
GSAM 176.4“Salgioni Gitel re·baaniko nisengsoenggipa an·tangni ka·sagipa dedrangni gisikrangko Isol moata aro ‘Jringjrotni nama kattako aganprakna ra·gipa, Uni bichal ka·ani konta sokbaaha, ine agangipa’ sa·greni kattako knachakna mangmangsan ong·gija, ja·mano on·gipa ‘O angni manderang, uoni ong·katbabo!’ ingipa ge·etanikoba manina uamangko dila. Bilakbee galatako man·gni aro mamungdakeba niktaijagni ua Babylonni chongipa ong·gijagipa bakko da·ororo toromni dolrang ong·ata ine anga skangna bate da·o kimkimbate bebera·a.... Indiba ua dolrangoni mitamrangni grong chongipa baksa apsan ong·aniara namen rongtale nika ine angna nika. Mitam ong·gimin kamrang ia kattako talatgen.
GSAM 176Namgijako Dakgipa Jinmani Gisikko Mesokani
GSAM 176.5“Ia a·doko Gitelni re·baaniko aganprakanio namen chu·sokbee kam ka·gimin Jong-gipa saksa, biap sao tik ka·gimin somoio skie aganna somoiko donaha. Gitel indake dilaha je ua donsoaniko dakgimin biaponi mail 16 chel·ao dongachim, indiba Chubatsranggipa Isolni ua nokkolna alkatra aro do·o kimilrangko manate on·na miksongani baksa _____ toromni dangdike on·gipa saksa namgijako dakgipa jinmako dilgipa ong·e uno dongachim. Ia apsan dangdike on·gipa ru·utgijan sal bang·aona ong·gipa tom·bimonganiko a·bachengaha, indiba pilakan salgrochini ka·sne jokgipa borofni chibima gita ka·sinbegipa aro borof gita dakgipa ong·achim—sakoba gisiko mikrakatjaha ba gisik pil·atjaha. Bon·kamao ua dangdike on·gipa an·tangan ‘jajrenggiparangni asongchakao asongna nanggen’ ine bebera·a ine aganaha.”
GSAM 177.1“An·ching iano tom·bimonganirangko dakengani somoio ia songni dolko dilgipa saksa an·tangni dolna indine aganaha je saoba uni noko napbae Kristo ia bilsio re·bagen ine bebera·a ine aganode, ua uko nokoni a·rikatgen.”
GSAM 177Mondolirangna Dakna Nanggipa Kam
GSAM 177.2Iano an·ching Boston, Mass.-o tom·chimonggipa re·baanio bebera·giparangni kumonggrikanina agangimin kattaoni Saki on·ani mingsako ra·bagen. Uan 1844 bilsini 5gipa jani 31 tarikni ong·a, aro William Miller, Elon Galusha, N. N. Whiting, Apollos Hale aro J. V. Himes uo an·tangtangni bimungrangko seaha. Uamang indine agana:—
GSAM 177.3“Mondolirangna an·chingni dakna nanggipa kamni giminba an·ching katta ontisako aganna man·a. Gipin bang·a obostharango gitan, ianoba samgnichin batsrange dakaniosa kengniko an·ching nika. Kengnini skanggipa bimangara ian: indakgipa dakna nanggipa kamni gimin an·chingko jrip dongatna, an·ching bak nangrimgipa mondolini bilko on·ani. Ia bidingo an·tangtangni mondolirangni Sastro baksa meligijagipa dabianirangna bame, hajal hajal manderang an·tangtangko Isolni mikkango dosi ong·ataha ine an·ching mamung jajaani dongja. Uamang mangrakgipa aro kakketgipa ong·genchimode, dukko chakna okamako man·oba, da·o uamang batanggipa naljokao donggenchim aro batanggipa namgni kamko ka·na man·genchim.
GSAM 177.4“Kengnini gnigipa bimangara, mondolirang an·chingna kakketgija dakani a·sel uamangni kosako a·jak sokna sikgipa gisikna bame on·ani, aro indakgipa pilak dolrangni kosako ma·eke nigija dakgrikani ong·a. Adventistrang an·tangtang bak nangrimgipa mondolirangna mai kamko dakna nanga, iani gimin an·chingko dilaniko on·china agangenchimode, pilaknan jakkalna man·gipa ge·etaniko an·ching on·na amjawa. Uamang Isolna kene, an·tangtangni obostha maiko nangnika uni gita dakna nanga.
GSAM 178.1“Indioba, pilak kragipa aro namgipa somoio bebena saki on·e, an·chingni dakna nanggipa kamko dakna an·ching mangrakna nanga. Aro ia ramako ja·rikachi an·ching mondolirangko ka·onangatode, aro an·ching jrip dongjaode an·chingko a·rikatgen ine uamang kenatode, an·ching an·chingni kamko dakna hai. (An·ching mondoli baksa nangrimaniko tom·tome bon·atna kragipa ine nikode, uan nambatgipa rama ong·naba donga.) An·chingko a·rikaton, kakketgija dakaniko chakchike ra·na hai, aro an·chingni Gitel baksa ‘Uni on·teaniko ra·e, cholgugani a·palona ong·katna’ sikgipa ong·na hai.”
GSAM 178.2Gnigipa Salgini sa·greni aga·ata katko on·giparangna mondolirangni dakani gimin ia ra·gatgimin kattarangoniko iako altue nikna man·a: “me·jaoni cha·aniona” gnigipa chang okamako on·ani skanggipa bite ong·e, gisikni dol mingsaona rimchimonggimin manderangko “jak-ja·a chu·sokgijagiparang,” “ja·koragiparang,” aro “mikgri” ine aganaha. Iara uamangni chel·grikatgimin “nokkolskarangni” uamangko “dokani” a·sel man·gimin namgija dake jakkalaniko bilake mesoka.
GSAM 178Gital Bebenirangko Ra·chakna Dingtang Dolko Baseaha
GSAM 178.3Gnigipa Salgini sa·greni aga·ata katko aganprakanio—chong·motan “me·jaoni cha·aniona” gnigipa chang okamanio—aro “Walni jatchio chrikani”-o, dingtang mande dolko ong·katatani Gitelni miksonganiko rongtale nikna man·a. Bon·kamani salrangna gamchatgipa bebenirangko sandie man·na aro aganprakna nangachim. “Bebera·ani niamrangchi kagimin” mondolirango ia kamko ka·na man·jachim, jekai watatarangni mondoli Jihudirangni toromni dolrang baksa nangrimengon a·gilsakna nama kattako aganprakna man·jachim. Uano Isol dingtang ong·china okamaha,9 Aro re·baanio bebera·giparangko an·tangtangni bebera·ani niamrangni ning·o rim·kingkingna jotton ka·giparangoniko chel·grikchina Ua okamaha.
GSAM 179Storrs-ni “Skiprakanirang Dok”
GSAM 179.1Indake ong·katbaani ja·mano bakbakan, re·baanio bebera·giparangni dolrangona mikkangchi man·gnigipa sastini gimin seng·ani sokbaaha ine an·ching nika. Iako George Storrs-ni “Skiprakanirang Dok” minggipa chongipa ki·tapo talataha. Uo ia skianirangko on·aha: mande an·tangni ong·telao signigipa ong·a; sianioni chakatpilani somoiona kingking sigiminrang mamungkoba u·ija; torom grigiparangni bon·kamani sastide chu·gimik gimaani ong·gen; aro sigijanian Isolni on·ani ong·a, jekon an·chingni Gitel Jisu Kristoo bebera·achisan man·na ama.
GSAM 179.2Hajal hajal Adventistrang mandeni ong·tela bewalni ia skianiko ra·chakaha, indiba pilakan ra·chakjaha. Uko jegalani uamangni gisepo jajaaniko ong·atjaha, maina iako bebera·ani bidingni katta ine mangmang ra·aha, aro mandeni cholonni namako dake niani ine ra·jaha. Uni gimin Kristoni re·baani sepangaha ine a·gilsakko mikrakatrikanio uamangni damsan jotton ka·ani be·jaha. Indioba, ian mondolirangko uamangni kosako ka·onangatbeaha.
GSAM 179“Skiprakanirang Dok”-ko Bebe Ong·ja Ine Jechake Mesokna Amjaha
GSAM 179.3Angni donggipa songjinmani Methodist pamong, jean skang 1843 bilsio re·baani skianiko skiprakanio bak ra·paachim, “Skiprakanirang Dok”-ko man·aha aro poraiaha. Ua ia skianiko bebe ong·ja ine jechake mesokna amja ine an·tangni mondolini manderangna ku·rachakaha. Indiba an·tangni mondolini bang·a manderang uko ra·chakengaha ine u·ie, gipinrangko ua ki·tapko poraijachina ku·pattiaha, maina “uamang uko poraiode ia skianiko bebera·gen.” 1844 bilsini 9gipa jao, ua pamong bilsio bilsio ong·gipa kumonggrikaoni re·bapilani ja·mano, an·tangni skiprakramo chadenge pilakni mikkango re·baani skianiko jegalaha. Aro ua noko aganprakgiparangko aganchina okamatani gimin mondolioniko on·tue kema bi·aha.
GSAM 179Branggipa Skianina Bichal Ka·ako Man·aha
GSAM 179.4Pamongni indake dakani ja·mano bakbakan, re·baanio bebera·giparangko branggipa skianina bichal ka·na jotton ka·aha. Indiba uamangna Sastrooniko an·tangtangni bidingko aganchakna on·ani gimin mondoli amna man·jaha. Mitamrangni dakbewal mondolini niam baksa melijani gimin uamangko ia mondolioniko a·rikataha. Aro ia manderangni bebera·ani Sastro baksa melija ine mesokna man·jaoba uamangko a·rikatani a·sel, gipin bang·a manderangba mondolioniko ong·katangaha. Indake, je mondolio ritcha ritcha manderang Jokatgipako man·aha aro Isolo katchaatako man·aha, ua mondolioniko re·baani skianiko jringjrotna champengaha.
GSAM 180.1Angni atchigipa songjinmao dakgiminko a·song gimikni gipin ritcha ritcha mondolirangoba dakaha. Skangni jong-adarangchi indake jakkalako man·giparang katchinikgipa Isaiani kattarango dal·gipa ka·dimeataniko man·aha: “Uni kattana moagiparang, Gitelni kattako knabo: Na·simangko mitchigipa, Angni bimungni gimin na·simangko a·rikatgipa na·simangni jong-adarang, Gitel rasongko man·china ine aganaha; indiba Ua na·simangni katchaanina mikkang pa·gen, aro uamang kratcha·atako man·gen.”10
GSAM 180Namgijagiparangni Ka·onangani Parakaha
GSAM 180.2Gitel re·bagen ine ka·donggipa sal sepangroroon, bebera·giparang an·tangtangni kamrango bimchipbatroraha, aro namgijagiparang batroroe ka·onange kadingsteaha. Iako 1844 bilsini 10gipa jani 31 tarikni Walni Jatchio Chrikani-ni susagipani ka·mao agangipa kattarango nikna man·gen:—
GSAM 180.3“Ia cholni namgijagiparangni kosako ong·atgimin kamrangba, iano Isol donga ine chingni bebera·aniko namen mangrakatpaaha. Ka·sachakanichisan jokatako man·na amgipa papigiparangni dakna kragipa gita, Isolni dedrang Uni mikkango tuchikopna aro an·tangtangko on·atna, aro Uni mikkang pa·anina tarina tom·chimongon, namgijagiparang dal·batgipa mitchianiko mesokaha. Chingni songbad ki·tapo on·ani agre chingni tom·chimonge olakianirangni gimin u·iatgija, aro a·palni manderangko uona okamatgija dongoba, Belialni depanterang uno naproroe namen jajrengatbeaha. Ia jani 12 tarikni Sonibarni atamo [1844 bilsini 10gipa jani 12 tarik], nokko rakkigipa [nokko simsakgipa] Neng·takani salna [Robibar] nokko rongtalatna chol man·china, chinga olakiram dal·gipa noko tom·chimongjaha. Indiba jajrengatgipa mande jinma noko drae napaha aro ia cholkoba on·jaha. Indioba, songjinmako sason ka·gipa, saksaba mol·molkujaoba, bakbakan ja·dil su·e uamangko a·rikataha.
GSAM 181.1“Uni ja·man salni Neng·takani salo chingni tom·chimonge olakianirango, olakiram dal·gipa nok gapani ja·mano, mande jinma nokni mikkangni ramako gapataha. Gitelni re·baanio saoba bebera·a ine uamangoni bang·an ka·onangbeaha. Manderang jajrengbebeani a·sel atamo tom·chimonge olakijaha; indioba mande jinma skangonin ramako gapataha. Indiba songjinmako sason ka·gipa aro uni kamko name ka·gipa pulisrang bakbakan ja·dil su·e, mitamrangko rim·rakramona watani ja·mano, ramako bangbangataha. Ia mande jinmani dakbewalko Sodom nisiatako man·na skangni atamo Lotni do·gako duulgipa manderangni dakbewal baksasan chinga tosusana man·aiaha.... Uamangni ia dakani namen rang·san ong·aha, damsan ong·aha aro bang·a biaprangona gipangaha. Uni gimin, Jihudirangni snigipa jani skanggipa salo iani parakani, ian ua ja ong·na nanga ine chingni chanchianiko mangrakatbeaha.”
GSAM 181Kadingstegiparang Salgiona Doangani Cholarangko Ganaha
GSAM 181.21844 bilsini 10gipa jani 22 tarik, Sal 2300 bon·gipa salo, Paris, Maine-o, bebera·giparang olakiani noko tom·chimonge, Gitel ua salon re·bagen ine ka·dongchake, Isolna bimchipe bi·engachim. Unon kadingstegipa kal·stapgiparang nokko duule tom·chimonge, kadingstegipa gitrangko ring·aha. Ia jajrengatgiparangoni sakgni ro·gipa gipok cholarangko gane nokni kosakona gadoaha, gitrangko ring·aha, aro noko bi·e Gitelni re·baaniko sengenggiparangko kal·stapaha.
GSAM 181.3Ia ong·aonikon Adventistrang salgiona doangani cholarangko ganaha ine gipanggimin tol·a kattarang a·bachengaha ong·naba donga. Maina, 1844 bilsio Adventist saksa salgiona doangani cholako gane Gitelni re·baaniko sengaha ine saki gnanggipa ong·a mingsako mesokna man·gipana, re·baanini songbad ki·taprang $500-ona kingking boksisko on·gen ine aganahaoba, da·ona kingking indakgipa ong·a mingsakoba mesokna man·kuja.
GSAM 182Hazen Foss-ni Nikani, 1844
GSAM 182.1Ia somoio, Poland, Maine-o, Hazen Foss minggipa pante saksa dongachim. Ua snigipa jani chikkunggipa salo Gitel re·bagen ine bilake bebera·achim. Uni bimang nitoachim, uni aganani ku·sik manderangko katchaatgipa ong·achim, aro ua namedake poraigipa ong·achim. “Walni jatchio chrikani” bon·na antirang ontisamangkosan skang, Gitel uni sepangona re·bae una Nikani on·aha. Uano re·baanio bebera·gipa manderangni Isolni songjinmaona songreaniko aro uamangni kengniko una mesokaha. Una mitam mikrakani Aga·ata katrangko on·aha, jean uarangko aganprakna nangachim. Aro una mesokgiminko ua kakket ong·e aganprakode, uni ja·mano re·bagnigipa dake nianirang aro a·rik-sanalanirangkoba una mesokaha. Foy-na mesokgimin gitan, Isolni manderang rongtalgipa songjinmaona re·anggipa ramao chu·gimik ga·gatna nanggipa ja·gam gittamko unaba mesokaha. Gitel “sal ontisa bang·kusan re·bagen” ine ua bilake bebera·ani gimin (jekai ua somoio uamang ring·achim), ramaona gadoani ja·gam gittamni gimin Nikani bakko ua talatna man·jaha. Aro uni ong·tela gisik gaora degipa ong·ani gimin, ua chisolsako ra·na kengaha aro Nikaniko aganna jechakaha. Gnigipa chang Nikaniko una mesoktaiaha. Iani kosako, una mesokgiminko aganna ua jechakkuode, ia baljokko unoniko ra·e Gitelni dedrangni bilgribatgiparangoni saksana on·gen ine una aganaha; ua mande Isolni parakatgiminko kakket ong·e aganprakgenchim. Ua changsatai jechakaha. Unon gittamgipa Nikaniko una on·aha, aro ua watatako man·jok ine una aganaha. Ia baljokko bilgrigiparangni bilgribatgipa saksaona donaha, jean Gitelni ge·etaniko dakgenchim.
GSAM 182Foss An·tangni Nikaniko Aganna Man·jaha
GSAM 182.2Ian panteko kengatbeaha, aro ua an·tangna mesokgiminko aganna miksongaha; uni gita ua tom·chimongani somoiko u·iataha. Manderang nina aro knana jinma dake tom·chimongaha. Ua an·tangni chagronganiko simsakbee talataha: Gitelni an·tangna mesokgiminko maikai aganna jechakaha aro uni jechakani a·sel mai ong·genchim. “Da·o,” ua aganaha, “anga Nikaniko agangen.” Indiba dukni katta! Ru·utdugaaha: ua manderangni mikkango bikro gita ku·sik agangija chadengaha, aro bon·chote namen saknao aganaha, “Anga Nikani katta mingsakoba gisik ra·na amja.” Ua dukchi an·tangni jakrangko rip·e aganaha, “Isol An·tangni kattako chu·sokataha. Ua angoniko Nikaniko ra·angaha.” Aro gisiko duk man·bee, “Angara gimagimin mande ong·a,” ine aganaha. Ua somoioni ua Kristoo an·tangni ka·donganiko gimaataha aro ka·dongagrianiona ga·akaha. Ua changsaba Adventistrangni tom·chimonge olakianiona re·bataijaha, aro an·tangnade toromo gisik nangani dongjaha. Bang·a bidingo uni dakbewal, on·batako aganoba, Gitelni Gisikni ka·sroke dilanioniko galatako man·gipa mandeni gita ong·aha, chong·motan “an·tangni ramarango ong·china aro an·tangni kamrangchi gapatako man·china watgalako man·gipa” mandeni gita ong·aha. Ia gisikni obosthao ua 1893 bilsio siaha.
GSAM 183Foss-ni Nikaniko Sakgipin Aganaha
GSAM 183.1An·tangni Nikaniko gisik ra·na man·gijani ja gittam mang ja·mano, ua sepangni kamraoni sakgipinni agangipa Nikaniko knaha. Uni donggipa dongram noko ua tom·chimongani ong·engachim. Uko tom·chimongani ning·ona re·bachina mol·molaha, indiba ua jechakaha. Sakgni mande apsan ong·ako aganode maikai apsan ong·na man·a, indaken ia Nikani una mesokgimin baksa apsan ong·a ine ua aganaha. Indake, ua maiko nikaha indiba aganna jotton ka·on gisik ra·na man·jaha, uako u·ina man·aha. Ja·mano ua mandeko nikoa, ua aganaha, “Ian Gitelni baljokko donchakgipa mande ong·a.”
GSAM 183Dukbee Ka·donggijako Man·aha
GSAM 183.2Bon·chote Jihudirangni somoi chanani gita snigipa jani chikkunggipa sal (1844 bilsini 10gipa jani 22 tarik) sokbaaha. Hajal hajalni kosako hajal hajal manderang an·tangtangni ka·donganirang chu·sokgen ine ua somoiko sengengachim. Ua tarikni ja·manio a·gilsakni mamung bostuna uamang tarisoani dongjachim. “Re·bajaode mai ong·gen” ingipa chanchianiko uamang gisiko ra·pajachim; indiba ua salon an·tangtangni janggi tangani bon·gen ine chanchiode maikai dakgenchim, indaken an·tangtangni a·gilsakni kamrangko daksoaha. Re·bagnigipa ka·onangaoni katbo ine uamang namgijagiparangko mikrakataha aro mol·molaha, aro uamangoni bang·an ia Aga·ata kat bebe ong·naba donga ine kenaha. Uamang an·tangtangni ma·drangrangko ku·pattiaha aro uamang baksa bi·aha, aro Isolna an·tangtangni ka·tongko on·kujani ma·drangrangna watgrikani kattako aganaha. Chong·motan, a·gilsak gimikko bichal ka·gipako mikkangchakna am·engjok ine chanchigipa mandeni pilak bimchipani baksa, uamang a·gilsakni pilak bosturangko wate watgrikani kattako aganaha. Indake rang·sitna amgijagipa gita jajrengbee, uamang olakiani biaprango tom·chimongaha. Dikdikantio “pamong sa·greni ku·rang aro Isolni singga” knagen aro re·bagnigipa an·tangtangni Rajani rasongchi salgi teng·subeaniko nikgen ine uamang sengengachim.
GSAM 184.1Kontarang ka·sine re·angaha, aro bon·chote sal saliramni a·gitimo napangon, Jihudirangni snigipa jani chikkunggipa sal bon·aha. Walni salakimrang changsatai a·gilsakni kosako an·tangtangni andalgipa pindapaniko gipataha. Indiba ua andala baksa re·baanio bebera·giparangni ka·tongrango dukni su·ani re·baaha. Ua rokom dukko an·chingni Gitelni sninggiparangni duk baksasan tosusana man·a: uko chisolo datkapani aro gopani ja·manni walo, uamang dukbee an·tangtangni nokrangona re·angengachim; uko ru·utkuja skangsa, an·tangtangni Raja ine katchae amgiparang gita uamang Jerusalemona rimangachim.