Uidhal 12 — Ka·donggijani — Ka·a Ki·tap
GSAM 185.1“Anga sa·greni jakoniko ua chongipa ki·tapko ra·e cha·aha; aro ua angni ku·siko bija bitchi gita chi·achim; indiba uko cha·manoa angni ok ka·aha. Aro ua angna aganaha, Na·a bang·a manderangni, jatrangni, ku·sikrangni aro rajarangni mikkango changsatai katchinike aganna nanggen. Aro go·ol gita nolko angna on·aha; aro sa·gre chadenge aganaha, Chakatbo, aro Isolni torom nokko, ganchiko aro uno olakigiparangko tobo.”1
GSAM 185.2Sastroni ku·siko, ki·tapko “cha·ani” gipinrangna agansualna gita bebeko ra·chakaniko mesoka. Iako Ezekielo nikna man·a, jeon katchinikgipana “dol·gimin ki·tapko” mesoke, una indine aganaha, “Ia dol·gimin lekako cha·bo, aro re·ange Israelni nokdangna aganbo.” Dol·gimin lekako cha·manoa ua agana, “Unon anga uko cha·aha; aro ua angni ku·siko bija bitchi gita chi·achim.”2
GSAM 185.3Katchinikgipa Jeremiaba ia apsan toe agananiko jakkala: “Nang·ni kattarangko man·aha, aro anga uarangko cha·aha; aro nang·ni katta angni ka·tongni katchaani aro kusi ong·ani ong·aha.”3 Ia kattarangoniko an·ching iako skie ra·a je, ki·tapko cha·mitingo uni “chi·ani” Gitelni kattako indake cha·giparangni chagronggipa katchaani aro chu·ongnikaniko mesoka.
GSAM 185Ki·tap Skango Chi·a, Unikode Ka·a
GSAM 185.4Parape·a 10-o janapgimin ki·tap, jeni gimin cha·gipana bija bitchi gita chi·achim, indiba cha·manoa “ka·aha” ine agana (ba mitamrangni pe·ani gita, “uko angni oke ra·manoa, angni oko ua pikra ong·aha”4), ua ki·taponi sa·gre, salgi, a·a aro sagalko dakgipani bilchi, “Somoi dongjawa.” ine aganprakaha. Indide ia ki·tapko cha·ania somoiko aganprakaniko katchae ra·chakaniko mesokna nanggen. Cha·giparangna ua cha·ani bak chonsani rang·sane ka·ani, ki·tapo agangipa somoi bon·mano uamangni chagronganio ong·gipa dukni dingtanganiko mesokna nanggen, maina uamangni ka·donggiminrang chu·sokgijani gimin uamang ka·donggija ong·beaha.
GSAM 186Somoiko Aganprakania Chi·gipa Cha·ani Bak Chonsa
GSAM 186.11844-o somoiko aganprakania bebera·giparangna beben katchaani katta ong·achim. Uamang jajagija, ia pap gapgipa a·gilsakni pilak namgijanirang, neng·nikanirang aro dukrangoniko jringjrotna ta·raken jokataniko man·gen ine ka·dongachim. Anti aditani ja·manon uamang rasongko man·gen, sichijawa, aro an·tangtangni Raja baksa Isolni sonani songjinmao donggen ine chanchiani uamangni janggiko didibegipa ong·achim. Ia chagronganiko man·gipa saksa indake aganaha, “Jisuna kakket ong·e ka·sagiparang an·tangtangni Jokatgipani re·baanina gisik nangbeao senggiparangni gisikni obosthako ma·sina man·a.... Ching·a tom·tomao aro mandera·ao ia kontana sepangbaaha. Bebe bebera·giparang Isol baksa chi·gipa nangrimanio neng·takaha; ian teng·gipa re·bagnigipa janggi tanganio uamangni man·gnigipa tom·tomani skang on·gimin sakki ong·achim. Ia ka·donganiko aro pangchakaniko chagronggiparang ua gamchatbegipa seng·ani kontarangko mamung saloba gualna man·jawa.”
GSAM 186.2Snigipa jani chisa salo an·tangtangko da·oba ia dake niani aro dakmajoani andalgipa a·gilsakon dongengkuenga ine nikgiparangni obostha dingtangmancha rakbegipa ong·achim. Konta adita skang uamang Gitelko grongna tarichina ku·patigimin manderangni chonnikani, kal·stapani aro ka·dingstekaniko da·o uamang chagrongna nangachim. Iako Mariamni obosthachi krae mesokna man·a. Ua “gopramni a·palo grapengachim”; aro sa·grerang una, “O me·chik, na·a maina grapenga?” ine sing·on, ua uamangna aganaha, “Maina uamang angni Gitelko ra·angaha, aro uamang uko bao donaha, anga u·ija.”5
GSAM 187Ka·donggija Ong·aha, Indiba Gisik Be·jaha
GSAM 187.1Ia rakbegipa obosthako chagronggiparang iani gimin indake aganaha:
GSAM 187.1“Ching·a jajrengaha aro ka·donggija ong·aha, indiba chingni bebera·aniko watgaljaha. Ching·a an·tangtangni dakna nanggniko dakmanaha ine ma·siaha; ching·a an·tangtangni gamchatgipa bebera·ani gita janggi tangaha; ching·a ka·donggija ong·aha, indiba gisik be·jaha. Chingna sima grigipa chakchikani nangachim, maina ka·dingstekgiparang bang·achim. Chingni skangni ka·donggijani gimin chonnikgipa kattarangchi chingko changni chang agangrikachim. ‘Na·simang da·oba doangkuja; basako doangna ka·dongenga?’ Indakgipa kal·stapgipa kattarangko chingni a·gilsakni ripengrang, aro Sastroko ra·chakoba uni dal·gipa aro nangchongmotgipa beberangko skie ra·gijagipa, an·tangtangko Kristian ine agangipa mitamrangba chingni kosako changni chang aganachim. Sina nangania chingo dongkuachim; sao on·ani bite chingni samtangtango dongachim. Janggi tangani je neng·nikgipa simsakna nanganirangko jringjrotna watmanaha ine chanchiachim, uarangko changsatai ra·na rakbegipa ong·achim.”
GSAM 187Ka·donggija Ong·gipa Sninggiparang Baksa Tosusaaniko Dakani
GSAM 187.2Konta adita skang uamangni katchaani aro kusi ong·ani baksa tosusao, ua manderangni da·oni gisikni obostha uamangna pikrani ka·begipa tam gita ong·enggenchim. Kristoko chisolo datkapmano mande jinmarangba indake chanchia ine jajana nangja; uamangni samtangtangni a·gilsakni manderangba da·o bebera·giparang an·tangtangni bebera·aniko watgalgen, aro an·tangtangni jadaani ine chanchigimino ka·dingstekpagen ine chanchiaha. Indiba, Isolna an·tangtangko kakket ong·e on·kangimin manderangni ka·tongoniko Gitelni mikkang pa·anina ka·saaniko altue gimaatna man·ja ine uamang ru·utgijan ma·sie aiao inmanaha.
GSAM 187“Ka·dingstekgiparang Baksa Asongjaha”
GSAM 187.3Ia gisik nangbegipa manderangni ja·rikgimin rama aro uamangni gisikni obosthako katchinikgipa Jeremiara an·tangni kattarangchi rongtalen mesoka, jeon ua indake agana,
GSAM 187.3“Nang·ni kattarangko man·aha, aro anga uarangko cha·aha; aro nang·ni katta angni ka·tongni katchaani aro kusi ong·ani ong·aha; maina, O kotokrangni Gitel Isol, nang·ni bimungchi angko okama. Anga ka·dingstekgiparangni tom·anio asongjaha, aro katchapajaha; nang·ni jakni gimin anga saksan asongaha; maina na·a angko ka·onangachi gapataha. Angni saknaania maina bon·ja, aro angni matani maina namatna amgijagipa ong·a, jean an·sengna jechaka? Na·a angna tol·gipa gita, aro ran·gipa chirang gita chong·mot ong·genma?”6
GSAM 1881844-ni Ka·donggijani Gimin James White-ni Aganani
GSAM 188.1Ka·donggija ong·oba ka·dongkuenggipa ia mitam manderangni kattarangoniko kan·dikgipa adita bakko ra·ani ua obosthako namedake ma·sina dakchakgen. Skanggipa kattarangara 1843 aro 1844-o chu·sokbee kam ka·gipa Gipi James White-oniko ong·a. Ua indake agana:—
GSAM 188.2“Somoi batangoa 1844-ni ka·donggijani ka·begipa ong·achim. Bebe bebera·giparang Kristona pilakkon watgalaha, aro skango mamung saloba chagrongkuja gita Uni dongpaaniko chagrongaha. Uamang an·tangtangni chanchiani gita, a·gilsakna bon·kamgipa mikrakatani kattako on·manaha, aro bebera·gijagipa, ka·dingstekgipa jinmaoniko mitam ba bang·e an·tangtangko dingtangatmanaha. Aro Isolni patiani uamangni kosako dongani gimin, uamang an·tangtangni watgalgimin manderang baksa nangrimana bate, ta·raken re·bagen ine ka·donggimin an·tangtangni Gitel aro rongtalgipa sa·grerang baksa nangrimna skabataha. Jisuni ka·saa janggiko gapataha aro mikkang sakantioniko teng·suaha; aro ku·sikchi aganna amsokgijagipa skanirang baksa uamang bi·aha, ‘O Gitel Jisu, re·babo, aro ta·raken re·babo,’ indiba Ua re·bajaha.
GSAM 188.3“Indiba Isol An·tangni manderangko watgaljaha.... Aro dake nianiko chagronggipa, sengenggipa manderangni gisik aro ka·tongrangona dingtangmancha bil aro ka·dimeatani baksa Ibrirangna segimin ia gita Sastroni kattarang sokbaaha: ‘Uni gimin na·simangni ka·donganiko da·alnabe, jeni on·pilskaanio dal·gipa boksis gnang. Maina na·simang Isolni skaniko dakmano ku·rachakgiminko man·na gita na·simangna chakchikani nangchongmota. Maina da·o dikdiksa mangmang, re·bagnigipa re·bagen, aro ru·utjawa. Da·o toromigipa bebera·achi tanggen; indiba saoba an·pilangode, angni janggi uko namnikjawa. Indiba an·ching gimaaniona an·pilanggiparangoni ong·ja, indiba janggiko jokatna bebera·giparangoni ong·a.’7 Ia Sastroni bakni gisik nangatgipa kattarangara iarang ong·a:—
GSAM 188.4“1. Jemangna ia kattarangko agana, uamang an·tangtangni kakket dakgimin kamni bidingo ka·donganiko galna kenbegipa obosthao donga.
GSAM 189.1“2. Uamang Isolni skaniko dakmanaha, aro chakchikani nanggipa dake niani obosthaona ra·baaniko man·aha.
GSAM 189.2“3. Ia somoio toromigiparang bebera·achi janggi tangna nangachim; uamang Isolni skaniko dakahama ine jajachi ong·gija, uamang Isolni skaniko dakgimin kamo bebera·achi janggi tangna nangachim.
GSAM 189.3“4. Bebera·aniko dake nianio chakchikgijagiparang, indiba Isolni skaniko dakgimin kamo an·tangtangni ka·donganiko gale an·pilanggiparang, gimaaniona re·anggipa sranggipa ramako ra·gen.”8
GSAM 189Walni Jatchio Chrikani-ko Tarigipa N. Southard-oniko
GSAM 189.4Sal 2300-ni bon·ani ja·mano sal chikkungmang ong·on, 1844-ni October 31-o Walni jatchio chrikani-o, uko tarigipani segimin ia kattarangko ong·ataha:—
GSAM 189.5“Ia chol baksa nangrimgipa pilak obostharangko, Isolni dedrangni gisikrango uni ong·atgimin namgipa biterangko, aro Uni bobilrangni mesokgimin mitakani aro namgija dakna skaniko niate, an·ching iako bebe ‘Walni jatchio chrikani’ ine ra·na nanggen. Aro an·chingni bebera·aniko dake nina sal adita dongode, ian da·oba metra sakchikkungni toe agananiko ja·rika; maina uamang pilakan chakate an·tangtangni chakirangko tarimanoba, gisik grigipa metrarangni chakirang kimitna amaigipa somoi dongna nangkuachim. Chikkunggipa sal batangjana skang ian ong·na amjawachim; maina ua somoiona kingking uamangni chakirang ching·genchim. Uni gimin gisik grigiparang an·tangtangni bebera·aniko watgalna gita ua sal batangna nangchongmota, jekai Seng·ani somoi ong·na gita 1843 batangna nangachim. Uni gimin dikdiksa ru·utani ka·donggija ong·na a·sel ong·ja, indiba Isol An·tangni kattako chu·sokatna baditana tik ong·a uko mesoka. Uni gimin hai an·chingni ku·rachakgimin bebera·aniko il·enggija rim·kingkingna, maina ku·rachakgipa kakketgipa ong·a.”
GSAM 189Bebeni Ku·rang-ko Tarigipa Joseph Marsh-oniko
GSAM 189.61844-ni November 7-o Bebeni Ku·rang-o an·ching indake poraia:—
GSAM 189.7“Snigipa jani chikkunggipa salo ong·gen ine chingni ka·donggimin ong·gnigipa kamni bewalko ma·sianio ching·a gualaha ine ching·a kusi ong·e ra·chaka; indiba ua salo an·chingni dal·gipa Kamal Dal·gipa, skangni mesokani gita an·chingni ka·dongna kragipa pilak kamko dakjaha ine da·oba ching·a ra·chakna man·ja. Ua uko dakaha ine da·o ching·a bebera·a.”
GSAM 190.11844-ni snigipa jani chikkunggipa salo Sal 2300 bon·gen, aro ua salo Kristo An·tangni kamalni kamko matchote, An·tangni manderangko patina a·gilsakona re·bagen ine Adventistrang ka·dongachim. Ja·mano sandirikkiani indine mesokmanaha je, ua salo ong·gipa kamara salgini Rongtalgipa biapko rongtalatani kamni a·bachengani ong·achim, Uni kamalni kamko matchotani ong·jachim.9 Rongtalgipa biapko rongtalatani-ko Kristoni kamalni kamni maiba bak ine ra·ani pal, Kristoni re·baon wa·alchi a·gilsakko rongtalatani Rongtalgipa biapko rongtalatani ong·gen ine aganachim. A·gilsak gimikko ong·jaoba, ua somoio Kanaan a·songkode rongtalatgen ine aganachim.
GSAM 190Rongtalgipa Biapko A·gilsak Ine Bebera·ani
GSAM 190.21844-ni April 25-o Walni jatchio chrikani-o Geo. Storrs-ni segimin kattarang ia chanchianiko parake mesoka. Ua sing·a, “Rongtalatna nanggipa rongtalgipa biapara maia? Skango angni chanchianirango ua a·gilsak gimikan ong·achim. Ua a·gilsakni baksa ong·a ine anga da·oba bebera·a. Indiba badia bak? Ian angni aganchakna jotton ka·gnigipa sing·ani ong·a.”
GSAM 190.3Ua Abrahamna on·gimin ku·rachakaniko, Ishakna ua ku·rachakanikon mangrakatgiminiko, aro Jakobna uko gital daktaiako ra·e agana. Unikode Sagal Gitchakko batgimin ja·mano Miriamni tarigimin Moseni gitko ra·e agana, jeon uamang indake ring·aha: “Na·a uamangko ning·ona ra·bagen aro Nang·ni man·rikanini a·brio ge·gen; O Gitel, Nang·ni dongramna Na·a tarigimin biapo, O Gitel, Nang·ni jakrangni mangrakatgimin rongtalgipa biapo.”10
GSAM 190.4Poraigipa kosakni ia podko git segipani uni chu·sokaniko serikgimin katta baksa simsakbee tosusade, ua Palestina a·songmangkoba rongtalgipa biap ine aganja ine nikgen. Gitel Israelni dedrangko dilgiminni gimin aganon Daud indake agana: “Ua uamangko An·tangni rongtalgipa biapni simaona, An·tangni jakrani bregimin ia a·briona ra·baaha.”11 Sagal Gitchakni samba ring·gimin gito Kanaan a·songni gimin, Ua uko “rongtalgipa biapo dongna” tarigimin biap ong·a ine agana. Apsan daken gitrangoniko ra·gimin ia kattao, rongtalgipa biapko rikgimin Moria a·briko “Uni rongtalgipa biapni sima” inesan minga. Indiba ia apsan gito agana, “Ua Juda ma·chongko, An·tangni ka·sagipa Sion a·briko baseaha. Aro Ua An·tangni rongtalgipa biapko chugipa rajani nokrang gita, An·tangni jringjrotna mangrakatgimin a·gilsak gita rikaha.”12
GSAM 191Rongtala ba toromni biapko a·gilsakko rongtalatna chanchiani
GSAM 191.1Skangni aganani kattarang-o, a·gilsak, ba Palestina-ni a·songsan, rongtala ba toromni biap ong·a ine chanchigimin sakkiko agananio, gipi indake sing·aha, “Rongtala ba toromni biapko maikai rongtalatgen?” Katchinikgipa Mikaini kattarangchi ua aganchaka, “Nibo, Gitel an·tangni biaponi ong·katba, aro ong·onbagen, a·gilsakni kosako chadenggipa biaprangko re·ata. Uni ningo a·brirang jronggen, aro a·kawekrang pitako man·gen, wa·alni mikkango ste gita, aro a·darechi rudapgimin chi gita.”13
GSAM 191.2Ua somoio manderangni gisepo a·gilsak rongtala ba toromni biap ong·a ine bang·a manderangni ra·gimin chanchiani dongachim. Uni gimin Sal 2300 bon·anio Gitel Mikai agangimin gita re·baba aro wa·alchi a·gilsakko rongtalatgen ine uamang mamung agangija bebera·ahani a·selko poraigipa altue ma·sina man·gen. Adventistrangni kosako pilak dakgrikani ong·oba, Sal 2300 bon·anio Rongtalgipa biapko rongtalatani gita wa·alchi a·gilsakko rongtalatani ong·jawa ine saksaba agangkuja.
GSAM 191Watatarang ka·donggijagimin, indiba Sastroni agangimin chu·soka
GSAM 191.3Ian mangmanggipa dakgipa ong·ja jeon manderang Gitelni namnikaniko dakaha, Sastroni kattarangko chu·sokataha, indiba ong·nasiengipa obostani gimin uamangni ka·dongsoani ka·donggija ong·aha. Kristoni watatarangnaba indaken ong·aha. Ua kor·bi-ni kosako asongmitingo Jerusalemona re·angengon, uamang katchinike agangimin kattarangko gisik ra·e indake chrikaha:14 “ Jerusalemni demechik, chrikbo; nibo, nang·ni Raja nang·ona re·baa; ua kakketgipa ong·a, aro jokataniko man·gipa; sontolgipa, aro kal-chi, kalni bi·sachi, re·baa.”15 Ua somoio chrikna namen nangbeachim; uamang jrip donggenchimode, ro·ongrang an·tangtangan chrikgenchim.16 Ua somoio Kriston Daudni sing·hasono a·gilsakni raja gita asonggen (“Israelko piokgen ine ching·ni ka·dongsoani ua ong·achim”17) ine sishurang chanchiaha, aro uamang indake chrikaha, “An·chingni pagipa Daudni songnok, Gitelni bimungo re·bagipa, pattianiko man·china.”18 Uamang u·igenchimode, antisa ning·on Kriston Joseph-ni gopramo sigimin ong·e donggen aro Romni sipairang uko duule nitimgen ine, ua somoio badia chrikani donggenchim? Adventistrang 1844-o Rongtalgipa biapko rongtalatani, katchinikanini somoio bon·kamao, Gitel re·baskangna skang bilsi-jolni joljol ong·na nanggen ine u·igenchimode, Isolna “rasong” on·ani aro an·tangtangko rongtalatani badia donggenchim?
GSAM 192Sal 2300-ni hisab-o mamung dakgija dongja
GSAM 192.1Ia manderang somoiko gisik seng·e niatmitingo, uamang mamung dakgija dongjaha ine nikaha; indiba Gitel re·bajaha, aro wa·alchi a·gilsakba rongtalatjaha. Iani miksongani maia? Bebeko aganna, dal·gipa Re·baani chol-o Gitel uamang baksa dongachim ine uamang u·iaha; indiba da·o uamang gisiko donggija dongachim. Gitelna uamangni ka·dongani mamung dingtangjaha. Ua uamangko watgaljawa ine uamang u·iaha. Seng·ani jeoba re·bagen. Uamangni mikkango donggipa neng·nikgipa sing·aniko skangni agangimin Jeremia-ni kattarangchi indake janapaha, “Na·a angna pilakni pilak tol·gipa gita, aro sikgijagipa chi gita, ong·genma?” Bebera·ani ia kenchakaniko jakkaljaha, maina nikaniko chanchiani gimin katchinikgipa Habakukni Gitelni kattarang uamangni gisiko re·baaha, “Bon·kamani somoio ua agangen, aro tol·jawa.”19 Bebe-ni Aga·ata-ni seagipani aganani kattarang uamangni obostako namen rongtalbe mesoka: “An·chingni Dal·gipa Kamal ia salosan mesoksoani chin gita an·ching ka·dongsoana kragipa pilakkon chu·sokatjaha ine an·ching da·aloba ra·chakna man·kuja.”
GSAM 193Rongtala ba toromni biapni gimin seng·ani man·aha
GSAM 193.1Port Gibson, N.Y.-ni Hiram Edson angna indake aganaha je, 1844-o somoi re·angani salni knalo ua jomni rui-rui donggipa biapni ja·mano bi·mitingo, Isolni Gisik namen bilakbee uni kosako re·baaha, indine ua a·gilsakona ga·akna gita ong·aha, aro uachi apsan somoio gisiko aganani re·baaha, “Rongtala ba toromni biapko rongtalatna nanggipa salgio dongenga.” Ua ia chanchianiko O. R. L. Crosier-na aganaha, aro uamang sakgnian ia kattako namen name sandiaha. 1846-ni a·bachenggipa salrango Crosier seaha gita Sastroni dilaniko man·e Rongtala ba toromni biapni gimin namen namen talatgipa kattarang Day Star-o seaha; ua Cincinnati, Ohio-o cina gita dakanigipa ki·tap ong·achim. Ua dal·gipa seanioba Rongtala ba toromni biapko rongtalatani kamo an·chingni Dal·gipa Kamal ong·e Kristo-ni bon·kamgipa kamo, 1844-o a·bachenge, ua rajarangni Raja aro gitelrangni Gitel gita salgini salrangni me·chengao re·bapilna skang bon·kamgen ine mesokaha.
GSAM 193Mondolirangni gimagimin memborrangko am·ani
GSAM 193.2Snigipa jani chikkunggipa sal re·angaha, aro “Walni jatchio chrikani” aro Gnigipa Salgini s·greni aga·ata kat ning·o mondolirangoni dingtangako man·gimin memborrangko mondolirang altue ra·bapilgen ine chanchiaha; indiba iano uamang namen ka·donggijaha, uko ning·tue skie on·ani gita, 1844-ni December 26-ni Walni Jatchio Chrikani-o segimin kattarangchi uamangni skangni mondolirango re·angpilchina sing·anina aganchakaniko on·aha:—
GSAM 193.3“Indiba bebe ong·gipa obostarang maia? Ua mondolirangni dal·gipa bakni gisepo, uamangni skie on·ani kattarang, ‘A·gilsakni gimikko bebera·atani,’ ‘bilsi-ribo rajarangni songnok,’ aro Jokatgipani an·tang re·baani skang ‘Jihudirangni Palestinaona re·baani’ ong·a ine uamang namen u·ia. Ia Sastroni agangimin gita ong·gijagipa aro chanchia gita ong·gijagipa skianirangni tusiatna ring·gipa gitrangni ning·o asongna re·angpilgiparang, mikronrang oe dakenga; aro uamangni ia kam ‘re·angpilani’ ong·gen.”
GSAM 194.1“Sastroni miksonganio ‘jakgitel’ ong·e, ‘skangchi re·angna’ ua mondolirangona ‘re·angpilna’ ba ‘de·erangpilna’ bate namen namgipa ong·a, dali Kristoo kakketgipa manderangna rasongni mukutko namen ru·utgijaan on·na tarigimin ia somoio.”
GSAM 194.2Mondolirangni Sastroni agangimin gita ong·gijagipa skianirangko agane Gitelni re·baani somoiko ru·utataha. Uni gimin Adventistrang Ezekiel katchinikgipani kattarangko gisik ra·aha: “Mande-ni depante, nibo, Israelni nokni manderang agana, ‘Ua nikgipa nikani namen ru·utgipa salrangna ong·a, aro ua ru·utgipa somoirangni gimin katchinike agana.’” Apsan kattarangni gisepo Adventistrangni jakkalgipa aganchakani dongachim, “Uni gimin uamangna indake aganbo, Gitel Isol indake agana: Angni kattarangoni mamungba ru·utjawa; indiba Angni agangimin katta chu·sokgen, ine Gitel Isol agana.”20
GSAM 194“Na·a Pila·pilan katchinike aganna nanggen”
GSAM 194.3Ki·tapko “cha·giparang” aro “somoiko” aganprakgiparang uamangni a·gilsakna kam bon·aha ine chanchiaha; uni gimin uamangna jatrangna, ku·sikrangna aro rajarangna changsatai skina nanggen ine aganaha. Skangni somoio nikgijagipa gipin kamko da·o chu·sokna nanggen—salgio Isolni torom nok aro uni boliko on·ani kamni bebe bimangko manderangna mesokna nanggen. Torom nokko mikna ge·etani21 katchinikanini somoi bon·anio ong·nasienggipa obostani gimin u·ianiko man·na nanggen; uni gimin ia kattarangni miksonganiko talatna man·gen, “Unon Rongtalgipa biapko rongtalatgen.”
GSAM 194.4Ia somoini aganprakani sa·gre salgioni re·baaha ine gisik ra·bo, aro uni kam bon·kujaon ua manderangna changsatai skina ge·etani on·a. Uni gimin Rongtala ba toromni biapni gimin talatna, ka·donggijagiparangna ka·dongsoaniko on·na, aro apsan somoio Isolni manderang an·tangtangni toromni obostako Una niatna man·gipa “gani,” ba “go·ol,” ba niam gita jakkalna man·gipa kattako on·na nanggipa aga·ata kat, salgioni ong·katgipa ong·a, aro mandeoni ong·katgipa ong·ja ine sakki rongtalgipa dongna nanggen.
GSAM 195Chanchisrangkujaon namniksogijani manderangona re·angani ramako champengaha
GSAM 195.1Re·baani-ni skianina donggipa man·gijagipa dakgrikani manderangona re·angna man·gijagipa gita ong·achim; aro ka·donggijanina miksongani gimin rongtalbee aro kakketbee seng·ani donggijan, uamangna changsatai skina am·ani chu·sokjawa. Adventist bebera·giparang an·tangtangni janggirangko salgini ge·etani gitan gitalatna nanggenchim, manderangna kakketgipa skianiko on·na skang; aro iako maikai chu·sokna man·gen? Ian manderangni ma·sisokani mangmangchi dakna man·genma? Ba skangni Re·baani cholni ning·o Isolni Gisikni dal·gipa kamo chakatgiparang manderangni chanchiani mangmangchi namnikgenma? “Gittamgipa Salgini s·greni aga·ata kat”22 gita kam mangmangsan uamangko uamangni neng·nikanirangoni jokata man·gen; aro uamang ra·chakna man·gipa pangchakani gita, ja·dil ja·dil ua kamko salgioni ong·katgipa ine sakki rongtalgipa on·e a·bachengataha, aro ua bilakgipa sakkirangchi parakaha.
GSAM 195Mesrangni gita nokgipa dilgipagri
GSAM 195.2Iano dal·gipa re·baani manderangni grik ong·achim—chanchiani saksa gita, mesrangni gita nokgipa dilgipagri; uamangoni hajal hajal manderang, anta adita skangsan mondolirang aro bebera·ani niamrangoni dingtangako man·aha, aro uamangni gisikni namgipa obostana mamung mandeni dolba daito ra·jachim. Uamangni ka·dongna man·gipa a·gilsakni dilgiparang dongjachim; Isol mangmangon uamangni ka·dongani dongachim.
GSAM 195.3Indiba uamang mingsa kattako namen ka·dongsoaha, aro ia katta uamangna siltin gita ong·achim—somoiko aganprakani kakketachim.23 Indiba manderang gita uamangni obostao, Isol uamangko diljagen aro rakkijagenchimode, tol·gipa talatanirangko ra·chakna ba “sabarani”ko watgalna aro skangni chagrongani-ni bebera·aniko watgalna uamang kenggipa ong·achim. Mitamrang indake dakaha; indiba gipinrang uamangni janggirangni ka·sagipa Uni kosako bebera·ani mikron donga, indake sing·aha, “Nipitgipa, walni gimin maia? Nipitgipa, walni gimin maia? Nipitgipa aganaha, ‘Pring re·baa, aro walba re·baa; na·simang sing·na skaode, sing·bo; re·bapilbo, re·bo.’”24
GSAM 196J. N. Andrews ka·donggijani gimin
GSAM 196.1Gipi J. N. Andrews, 1844-o ia chagrongani gitan re·anganggipa saksa, ka·donggijani gimin indake agana:—
GSAM 196.2“1843 aro 1844-o Gitel re·bagen ine ka·dongsoaha, uamang ka·donggija ong·aha. Ia obosta mangmangsan mitamrangna ia giminni sakki pilakkon jegalna chu·onggipa miksongani ong·a. An·ching ka·donggijaniko ra·chaka, indiba ian ia kamo Isolni jak donganiko jegalna kakketgipa miksongani ong·a ine an·ching ra·chakna man·ja. Johan Baptisti-ni kam bon·anio Jisu ku·rachakgimin Messia ong·e an·tangko parakmitingo Jihudi mondol ka·donggija ong·aha. Bebera·gipa sishurang Jisu Israelko jokatgen ine ka·dongsoaha, ua namgijagipa jakrangchi rim·e so·otako man·aha, aro uamang namen dukni ka·donggija ong·aha. Uni chakatpilani ja·mano, Ua Israelni songnokko gital daktaina ine ka·dongsoaha; indiba ua Pagipao re·angpilgen, aro uamang ru·utgipa somoina neng·nikaniko aro dukko man·gen ine u·imitingo, uamang ka·donggija ong·jawa ine dakna man·jaha. Indiba ka·donggijani Isol an·tangni manderangko dilani kam-o jak dongja ine sakki on·ja. Ia ka·donggijani uamangni tol·giminrangko srongatna dilna nanggen, indiba Isolna uamangni ka·dongsoaniko watgalna diljawa. Israelni dedrangni a·tip-o ka·donggija ong·ani gimin, uamang changni chang Isolni dilaniko jegalaha. Ua uamangko an·chingna mikrakani gita mesoka, jedakode an·ching bebera·gijanini apsan dakgiminni ja·mano re·angjawa.”25
GSAM 196Bebe man·gijagipa ong·ani-ni snanani dongenga
GSAM 196.3Namen nanggipa bebeko manderangni man·gijagipa cholgugao donaniko Gitelni dakbewal ong·a ine nikgipa ong·a, uko ra·chakna aro mani dakna silang ong·a26 Ia kattara bon·kamgipa salrango namen kakket ong·a. Pilak kattarangni bon·kamani “sepangengon,” aro “bichal” “Isolni nokoni a·bachenggen” somoio Pitor indake agana, “Ka·sagiparang, na·simangko dake niani wa·alni gimin, na·simangna dingtangmancha obosta ong·aha gita, aiao inmanjabo; indiba Kristoni dukrangni bak ong·ani gimin katchabo, jedakode Uni rasong parakgen somoio na·simang namen dal·gipa katchaanichi katchana man·gen. Kristoni bimungni gimin na·simangna kal·stapako man·ode, na·simang pattigipa ong·a; maina rasongni Gisik aro Isolni Gisik na·simangni kosako dongenga; uamangni bakon Ua kal·stapako man·a, indiba na·simangni bakon Ua rasongko man·a.”27
GSAM 197.1Bebe manderangni namnikgijani snanako man·ahaon, uko ra·chakna manderangni dal·gipa bakni bebera·aniko ja·rikna bate namen dal·gipa ka·sachakani nanggen. Cha·chipilgipa dakmaigiparang dakna nanggipa kam donggipa bebeko ra·chakna dal·gipa miksongani nikjawa; ua kamara “balwa aro chini jokani bobil dake” ring chona nanga gita ong·a. Uni gimin bebe kakketgipa, kakket ka·tonggipa, bebe agangipa aro ka·sachakgipa manderangna niani ong·a.
GSAM 197.2Re·baani cholkoni katchinikanio ka·donggijani nanggen ine an·ching skang mesokaha. Ua ong·aha; aro Isolni dilani gita, ua aga·ata katko ra·chakaniara silang donggipa kam ong·aha.
Notes
- Parape·a 10:10, 11; 11:1. ↩
- Ezekiel 3:1-3. ↩
- Jeremia 15:16. ↩
- Pikra—chuni bilakgipa bitchi, ghritakumari aro mur bolni dakko brine tarigimin, namnikna amsokgijagipa, ka·begipa sam. ↩
- Johan 20:13. ↩
- Jeremia 15:16-18. ↩
- Ibri 10:35-39. ↩
- Ellen G. White-ni Janggi Tangani Golporang, jak 107-109. ↩
- Ua somoio salgioba Rongtalgipa biap gnang ine darangba chanchianiko man·jachim. ↩
- Re·ongkata 15:17. ↩
- Git 78:54. ↩
- Git 78:68, 69. ↩
- Mikai 1:3, 4. ↩
- Johan 12:16. ↩
- Zekaria 9:9. ↩
- Luk 19:40. ↩
- Luk 24:21. ↩
- Mark 11:10. ↩
- Habakuk 2:3. ↩
- Ezekiel 12:27, 28. ↩
- Toani biteko angka gita on·gijaon, ian bimangni gro, gipeng ba chuani gimin ong·gija, uni cholonni gimin ong·a. ↩
- Parape·ani 14:9-12 ↩
- Sal 2300-ni hisabko namen name niatmitingo uamang mamung dakgija dongjaha, aro da·aloba mamung dakgija dongja. ↩
- Isaia 21:11, 12. ↩
- “Parape·ani 14:6-12-ni Gittam Aga·ata Kattarang,” jak 33. ↩
- Mati 16:24. ↩
- 1 Pitor 4:7, 17, 12-14. ↩