Adventist Pioneer
Library
aplib.orgLibrary
Table of Contents
22 / 31
22 / 31

Uidhal 19 — “Uamangni Bitechi Uamangko U·igen”

John Norton Loughborough

GSAM 299.1“Ua mitamko watata, mitamko katchinikgipa, mitamko nama kattako aganprakgipa, aro mitamko nitimgipa aro skigipa dake on·aha; rongtalgiparangko chu·sokatna, dangdike on·ani kamna, Kristoni be·enko rikna; an·ching pilakan bebera·anio aro Isolni Depanteko u·ianio nangrime, chu·sokgipa mande ong·aona, Kristoni chu·sokani dal·ani toani gita ong·aona sokjana kingking.”1

GSAM 299.2Jokatgipa Uni Gisikni on·anirangko mondolio donon, chu·sokgipa sal sokbajana kingking Gitelni kamko “Uni namnikani gita” chu·sokatna Ua uarangko donaha. Parakaniara salgioniko ong·ama ba namgijagipa gisikrangoniko ong·ama, uko chanchichipna Ua An·tangni manderangko watgaljaha; indiba ua gisikara Isolni ong·ama ong·jama uko an·ching u·ina man·na gita Ua niamrangko on·a. Ia bon·kamani salrangoba, katchinikgipa Joelni agansoani gita, Gitel An·tangni Gisikko pilak be·enni kosako rudapgen aro depanterang aro deme·chikrang katchinike agangen,2 Paul agana, manderang katchinike agananirangko chonnikna nangja, indiba “pilakkon dake nibo,” aro “namgipako kimkime rim·bo.”3

GSAM 299.3Isolni Gisikni kamko u·ie ra·na Sastroo on·gimin niamrang baksa tosusae nigijade indakgipa parakanirangko gipin maikai porikka ka·na man·gen? Ari gnanggipa mandeni gisikni u·ina amani nalsao donggipa pilakan Isoloniko ong·a ine ong·ja. Maina Satan bon·kamani salrango a·gilsakko tol·napna aiao inmangipa kamrangko dakgen, aro Bilakgipa Isolni ua dal·gipa salni dakgrikaniona uamangko chimonggen ine Sastro agana.4 Uni gimin parakaniko Sastroni niamrang baksa namedake tosusae nianichisa gisikni bebegipa on·aniko u·ina man·a. Tol·gipa tangkako u·ie ra·na a·gilsakni manderangni simsakani gitan ianoba simsakna nanga.

GSAM 300Tol·gipa Tangkako U·ie Ra·ani

GSAM 300.11863-ni April jani Detroit Tangka Lekkarangni Kobor-o, Mr. Preston tol·gipa tangkako u·ie ra·na niam mingbongako on·aha. Ia niamrang gita, an·tangni jako sokbagipa tangka lekka mingantiko namedake sandie nigipa darangba tol·napako man·na kenna nangjawa ine ua parakataha.

GSAM 300.2Sastroni salrango parakgipa on·anirangni talatani baksa tosusae niani aro uno on·gimin niamrangchi porikka ka·anina bate katchinike aganani on·aniko dake nina ka·dongchakbatgipa ramani dongja. Sastro an·chingko pilak namgipa kamna chu·soke tarie on·a (2 Timothyna 3:16, 17). Aro Katchinike aganani on·anini parakanirangni gimin aro Isolni Gisikni bebegipa kamko Satan aro uni tol·gipa on·anirangni kamoniko maikai u·ie dingtangatna man·gen, uni gimin kakketgipa serikaniko on·a.

GSAM 300BEBEGIPA ON·ANIRANGKO U·IE RA·ANI NIAMRANG

GSAM 300.3Isolni Gisikni bebegipa parakanirangko Satanni kamoniko dingtange u·ina man·na gita Gitel An·tangni kattao komibatoba dingtanggipa niam mingsniko on·aha.

GSAM 300Skanggipa Niam—Dingtangmanchagipa Skiani

GSAM 300.4Katchinikgipa Isaia bon·kamani salrango ong·gni obostharangni gimin aganon indine agana: “Saki on·aniko katomde donbo, angni sninggiparangni gisepo niamko mohor su·bo. Jakobni nokdangoniko An·tangni mikkangko donnugipa Gitelko anga senggen, aro Uko nichakgen.... Aro uamang na·simangna, Sigiminrangni gisik baksa agangrikgiparang aro chit·chite agangipa aro ku·simile agangipa montol dakgiparangko am·bo ine aganon, manderang an·tangtangni Isolko am·na nangjama? Tanggiparangna sigiminrangko am·genma? Niamona aro saki on·aniona re·angbo; uamang ia katta gita aganjaode, uamango seng·ani dongjani gimin ong·a.”5

GSAM 301.1Ia Sastroo Isolni niamni mohorko donpilani kamo donggipa manderangko nina okama—uamang Gitelko senge Uni dangdike on·ani kamo donggipa manderang ong·a. Uamang Uko nichakenga; chong·motan, Uni re·baaniko nichakenga. Ia somoion, sigiminrangni gisikrang ong·a ine an·tangtangko agangipa gisikrang manderangko uamangona am·china aganenga. Mitam uamangni okamaniko knachake, u·ianiko man·na sigiminrangko am·a; indiba Gitel An·tangni manderangko Uko am·china okama. Iani orto ian, uamang Uko am·ode Ua uamangna dingtangmanchagipa skianiko on·gen. Uamangna mamung u·ianiko on·na amgijagipa sigiminrangko uamang am·na nangja; maina “salni ning·o dakgimin mamung kamoba uamangni bak jringjrotna dongjajok;” aro “sigiminrang mamungkoba u·ija.”6

GSAM 301.2Kosako janapgimin Sastroo pilak kattarangko porikka ka·na niamko on·aha,—“uamang ia katta gita aganjaode, uamango seng·ani dongjani gimin ong·a.” Giteloniko re·bagipa pilak kattarang Uni katta aro Uni niam baksa nangrime agangen.

GSAM 301.3Ia niamko Mrs. Whiteni seanirango jakkalon, anga indine aganna man·a, re·anggimin bilsi sotbonga gnini somoio anga uni Saki on·anirangko simsakbee poraiaha, aro uarangko Isolni niam aro Sastroni saki on·ani baksa tosusae nie, ia minggnini gisepo chu·sokgipa nangrimaniko nikaha. Uni skianirang Sastroni biapo gital parakaniko on·na re·baja; indiba ia somoio manderang bano aro maikai tol·dilako man·na, kattani ramako watgalna man·a, uko an·chingna mesokna re·baa. Mrs. Whiteni Saki on·anirangni biapko, uarangni gimin uni an·tangni segiminchi nambate talatna man·a:—

GSAM 301.4“Isolni katta andalbatgipa gisikkoba seng·atna chu·onga, aro uko u·ina skani gnanggipa pilakan uko u·ina man·a. Indiba ia pilakni gisepoba, Isolni kattako poraia ine ku·rachakgipa mitamrang uni rongtale skibatsrangani baksa mikkang dake janggi tangenga ine nikna man·a. Unon me·a aro me·chikrang an·tangtangko dos gri ine aganna man·gija ong·na gita, Isol rongtalgipa aro tik ong·gipa Saki on·anirangko on·a, aro uamangni ja·rikna simsakgijagipa kattaona uamangko rimbapila.

GSAM 302.1“Isolni kattao kakketgipa janggi tangani dakbewalrangko rikna pangchakgni skianirang bang·bea. Aro pilaknan aro sakprakan on·gimin Saki on·anirang, dingtangmancha ia pangchakgni skianirangna uamangni gisikko on·atchina on·gimin ong·a.... Na·simang Sastroko namedake u·ija. Sastroni toani gita ong·na aro Kristianni chu·sokaniko man·na skachi Isolni kattako na·simangni poraiani dakahaode, na·simangna Saki on·anirang nangjawachim....

GSAM 302.2“On·gimin Saki on·anirangchi Gitel na·simangko mikrakna, manengna, aro ku·pattina miksonga, aro Uni kattani bebeni gamchataniko na·simangni gisiko donatna ska. Segimin Saki on·anirang gital seng·aniko on·na ong·ja, indiba Isolni gisikchi skango parakatman·gimin bebekon ka·tongo rongtale gisik ra·atna ong·a.... Gipin bebe gitalrangko ra·baja, indiba Isol Saki on·anirangchi skango on·gimin dal·gipa beberangko u·ina altubate dakaha. Aro sakantian an·tangko dos gri ine aganna man·gija ong·na gita, Ua An·tangni seokgimin ramachi uarangko manderangni mikkangona ra·baaha, uamangni gisikko mikrakatna aro ua beberangko uamangni gisiko donatna ong·a....

GSAM 302.3“Saki on·anirang Isolni kattako chonnikatna ong·ja, indiba uko chuatna aro uachi gisikrangko salna ong·a, maikai bebeni nitogipa altuania pilakni ka·tongo nanggen.... Da·o an·tangtangko Isolni dingtangmanchagipa gam ong·a ine agangipa manderang Uni kattao rongtale on·gimin Uni nangnikanirangko maniahaode, uamangni dakna nanggni kamko gisik ra·atna, aro Isolni kattako manina simsakgijachi uamangni pap gnangani aro kenbegnigipa obosthako uamangna u·iatna dingtangmanchagipa Saki on·anirangko on·jawachim.”7

GSAM 302Gnigipa Niam—Bebegipa Katchinikgiparang

GSAM 302.4Pilak bebegipa katchinikgiparang Isolni niam aro Uni kattani saki on·ani baksa nangrime agangen ine an·ching skie ra·manaha. Watata Johan bebegipa katchinikgiparangni skianiko talate gipin niamko on·a. Ua agana: “Ka·sara, pilak gisikko bebera·nabe, indiba ua gisikrang Isolni ong·ama ong·jama porikka ka·bo; maina bang·a tol·gipa katchinikgiparang a·gilsakona ong·katangaha. Iachi na·simang Isolni Gisikko u·ia: Jisu Kristo be·eno re·baaha ine ku·rachakgipa gisik minganti Isolni ong·a; aro Jisu Kristo be·eno re·baaha ine ku·rachakgijagipa gisik minganti Isolni ong·ja. Aro ian Kristoni bobilni ua gisik ong·a; ian re·bagen ine na·simang knaaha, aro da·oba a·gilsako dongmanaha.”8

GSAM 303.1Skango janapgimin Sastroko simsakbee nibo. Ua Jisu Kristo “be·eno re·baahachim” ine ku·rachakgipani gimin aganja, indiba “be·eno re·baaha aro dongenga” ine agana; chong·motan, an·chingni bebera·anina aganchake Ua An·tangni Gisikchi re·bae an·chingo donga. Beben, ian nama kattani mongsonggipa bebe ong·a, “na·simango donggipa Kristo, rasongni ka·dongani.”9

GSAM 303.2Salgichi re·ani ramao an·ching mikkangchi barina skaode, an·chingni ning·o donggipa Jokatgipa ong·e Kristo nangchongmota, ian Mrs. Whiteni pilak seanirango man·gipa janggi tanganio jakkalgni mongsonggipa skiani ong·a. Skangoba, bon·kamoba, aro pangnan Kristo nanga ine uni seanirang skia. Iako mesokna uni ki·tap, Kristoona Re·ani Ja·kurang, ko nina agana. Ia ki·tapko Inglis ku·siko hajal ritchasana bate palmanaha; da·o uko gipin ku·sik chicheto chapaenggipa hajalni hajal ki·taprangkoa agankujaba. Presbyterian mondolini saksa dangdike on·gipa ki·tapko poraiman·o, an·tangni mondolini manderang aro ripengrangna ritchagittamna bate ki·taprangko ra·na ge·etaha, aro aganaha, “Ia ki·tapko segipa Gitel Jisu Kristoko namen namedake u·igipa mande ong·a.”

GSAM 303Gittamgipa Niam—Tol·gipa Katchinikgiparang

GSAM 303.3Johan tol·gipa katchinikgiparangko u·ie ra·na niamko on·a: “Uamang a·gilsakni ong·a; uni gimin uamang a·gilsakni kattako agana, aro a·gilsak uamangko knachaka.”10 Tol·gipa katchinikgiparang an·tangko jegalani aro chisolko ripani ramako chuatani pal be·enni skana on·gipa ka·tongko namnikatna skigen. Tol·gipa katchinikgiparang “Israelni Rongtalgipako” chuatani pal “kusi ong·atgipa kattarangko” skigen.11 Mrs. Whiteni seanirangni jak aditakosa poraigipaba uarang an·tangko jegalani aro chisolko ripani ramako skia, aro a·gilsakni aro be·enni skana on·gipa ka·tongko namnikatna ong·ja ine nikna man·a.

GSAM 304Brigipa Niam—Duk Chakani aro Chakchikani

GSAM 304.1Ia kattako aroba sandiangon, brigipa niam dake watata Jakobni kattarangko an·ching ra·gen: “Angni jongadarang, Gitelni bimungo agangipa katchinikgiparangko duk chakanio aro chakchikanio dakmesokgipa dake ra·bo.”12 Ua gitchamni katchinikgiparangni janggi tanganiko poraion, uamangna on·gimin rongtale agangipa Saki on·anirangko Israelni jegalani ba uarangni kosako dakani, uamangni dal·batgipa dukrangoni mingsa ong·achim ine an·ching u·ia. Ua somoirangko kan·dike poraiaon bebegipa aro tol·gipa katchinikgiparangni cholonko rang·sanan nikna man·gen. “Kotokrangni Gitel indine agana, Na·simangna katchinike agangipa katchinikgiparangni kattarangko knachaknabe; uamang na·simangko ong·gramaigipa ka·donganichi gapa; uamang Gitelni ku·sikoni ong·gijagipa an·tangtangni ka·tongni Nikaniko agana.”13

GSAM 304.2Mrs. Whiteni seanirango poraigipako gaora de·atna mamungba dongja. Indiba sakgipinni aganani gita, “Saki on·anirangoniko anga chansokpilgijagipa changrangna gisikni dal·gipa namgniko man·aha. Beben, Isolo bebera·ani komiani, Una an·tangko on·kanganini komiani, aro janggirangko jokatna gisik nanganini komianina manenganiko man·a ine ma·sigijade anga uarangko changsaba poraikuja.” Indide Jeremia talatgimin tol·gipa katchinikgiparangni skianini biterangoni Mrs. Whiteni Saki on·anirangni biterang namen dingtanga.

GSAM 304.3Tol·gipa katchinikgiparang maikai skigen, ukoba katchinikgipa an·chingna agana: “Angko chonnikgiparangna uamang pangnan agana, Gitel aganaha, Na·simang tom·tomaniko man·gen; aro an·tangtangni ka·tongni chanchiani ja·man re·gipa sakantina agana, Mamung namgijani na·simangni kosako re·bajawa.”14

GSAM 304.4Mrs. Whiteni Saki on·anirango uni skiani maidakgipa ong·a, uni gimin simsakbee poraigipa saksani ka·mao on·gimin kattarangko anga ra·e agangen:

GSAM 304.4“Anga uni pilak Saki on·anirangko a·bachengaoni bon·aona poraiaha, bang·batanikon changni chang poraiaha. Aro uarang gimiko cholon namgijagipa katta ming·saba, ba rongtalchongmotgijagipa aro Kristian ong·gijagipa mamungkoba anga nikna man·kuja; Sastrooni ba Kristooni sakoba chel·ata mamungba dongja. Indiba uno Isolko manichina, Jisuna ka·sachina, Sastroko bebera·china aro pangnan sandichina gisik nangbee mol·molbatgipa kattarangko anga nika. Indake Isol baksa sepangani, indake gisik nangbee Una an·tangko on·kangani, indake rongtalgipa janggi tangna gisik nangbee mol·molanirang, Isolni Gisiknisan didiatna man·gipa ong·a.”

GSAM 305.1A·bachengaonin uni Saki on·anirangko simsakbee nigipa saksara indine sea:

GSAM 305.1“Kengija aro mamingchina mikkang nigija, rongtale aro kakkete mandeko jakkalani bidingo mamung komiani dongjaha ine anga saki on·na ska. Ia kamko chongipa aro namgijagipa mangsonganirang sason ka·achimode, ka·tongko sandigipa Saki on·anirang aro kakketgipa manenganirangni biapo namnikatna mitelani kattarang gapanokchim. Kattako rongtale aganani, namgijanina kakkete manengani, Jokatgipako an·tangtangna nangenga ine ma·sie kenggipa janggirangna ka·sachakani aro ka·dongatani kattarang, aro an·tangtangni gualanirangko galna on·gipa gisikchi am·gipa ramagualgiparangnaba indakgipa kattarang,—iarangan uni kamrango bang·e bak ra·giminrang ong·a. Nikanio uni nikgimin bang·a manderangni gualanirangko manenge on·gipa Mrs. Whiteni Saki on·aniko namen kakkete on·aha, aro ian namen namgipa biteko ra·baaha.”15

GSAM 305Bongagipa Niam—Bebegipa Katchinike Agananirang Chu·soka

GSAM 305.2Bebegipa aro tol·gipa katchinikgiparangni gimin Moseni agangimin katta Deuteronomyni odhai chicheto donga. Ua agana: “Gitelni agangijagipa kattako an·ching maikai u·igen? Katchinikgipa Gitelni bimungo aganon, ua agangimin ong·baja aro chu·sokjaode, uan Gitelni agangimin katta ong·ja; indiba katchinikgipa gaora de·e an·tangni ska gita uko aganaha; na·a una kennabe.”16

GSAM 305.3Ia apsan kattako ka·mao on·gimin Sastrorangoba man·a: “Gitelni ge·etgija, sawa aganon ua chu·soka?”17 Katchinikgipa Samuelni gimin indine aganaha, “Uni agangimin pilakan beben chu·soka.”18 “Katchinikgipani katta chu·sokahaon, Gitel beben uko watataha ine ua katchinikgipako u·igen.”19

GSAM 306.1Ia ki·tapko segipa anga Mrs. E. G. Whiteko katchinikani Nikanio skanggipa changna nikanioni da·ona bilsi sotbonga gittamna bataha. Ia bilsirangni somoio ua ong·gnirangni gimin bang·a katchinike agananirangko aganaha. Ia agansoanirangoni mitamrang ong·man·giminrangni gimin, mitamrang da·o chu·sokangenggiparangni gimin, aro gipinrang mikkangchi ong·gnirangni gimin ong·a. Batanggimin ba da·o ong·enggipa kamrang baksa nangrimgiparangni gimin aganode, chu·sokgijagipa changsaba dongaha ine anga u·ija. Uni mitam agansoanirangko skangon janapmanaha. An·chingni golpoko aganangon gipinrangko ja·mano re·bagipa odhairango nikgen.

GSAM 306Dokgipa Niam—Aiao Inmangipa Kamrang Bebegipa Katchinikgipako U·iani Porikka Ong·ja

GSAM 306.2Bebegipa katchinikgipani chinan aiao inmangipa kamrangko dakani ong·a ine bang·a Isolni gimin skianiko segiparang aganaha, aro Sastroko talatgipa ki·taprangoba seaha. Indakgipa niamko an·ching Sastrooniko skie ra·kuja.

GSAM 306.3Aiao inmangipa kamrangko dakani bebegipa katchinikgipa ong·ani sakki ong·ode, Parape·a 19:20-o janapgimin “tol·gipa katchinikgipa” kobao bon·kame bebegipa katchinikgipa ine aganna nanggen; maina indine sea, “Matburungko rim·aha, aro uni mikkango aiao inmangipa kamrangko dakgipa tol·gipa katchinikgipakoba uni baksa rim·aha; ua kamrangchi ua Matburungni chinko man·giparangko tol·napaha.” Ia apsan bilni gimin Parape·a 13:14-oba changsatai agana, ua “matburungni mikkango dakna bil man·gipa aiao inmangipa kamrangchi a·ao donggiparangko” tol·napa. Ia niamko indaken jakkalode, Satanba bebegipa katchinikgipa ong·a ine an·ching aganna nanggen. Bon·kamgipa sabisi mingsnini dokgipani somoio dingtangmancha kam ka·gni mitam gisikrangko indine minga, “aiao inmangipa kamrangko dakgipa diabolrangni gisikrang, uamang a·ani aro a·gilsak gimikni rajarangona re·onge, Bilakgipa Isolni ua dal·gipa salni dakgrikaniona uamangko chimongna re·a.”20

GSAM 306.4Nikanio donggijagipa somoio katchinikgipani dakgipa aiao inmangipa kamrango bebegipa katchinikgipa ong·ani sakki man·na nanggenchimode, Sastroni katchinikgiparangoni ia porikkao chadengna man·giparangko an·ching ontisako man·gen. Dingtangmancha, uamangni kamrangni gimin serikgimino pangchake bichal ka·na nanggenchimode indaken ong·gen. Mitam katchinikgiparang, jedake Elia, Elisha aro Paul, aiao inmangipa kamrangko dakaha ine serikanirang gnang, ian bebe. Indiba Isaia, Jeremia, Daniel, Hosea, Joel, Amos aro gipinrangni aiao inmangipa kamrangni serikaniko Sastroo sawa man·aha? Indioba uamang Gitelni bebegipa katchinikgiparang ong·achim, aro bebegipa katchinikgipako porikka ka·na Gitelni on·gimin niamrangchi uamang indakgipa ong·a ine mesoka.

GSAM 307.1Aiao inmangipa kamrangko dakani bebegipa katchinikgipako u·iani porikka ong·ja ine Rurichina On·gipa Johanni gimin Sastroo serikaniko poraiaon rongtale nikna man·a. Una atchigni depanteni gimin Isol uni pagipa Zakariana on·gimin Nikaniko ua aganmitingo, Johan katchinikgipa ong·gen ine agansoaha: “Aro na·a, bi·sa, Chubatsranggipani katchinikgipa ine mingako man·gen; maina Uni ramarangko tarina na·a Gitelni mikkang mikkang re·anggen.”21 An·chingni Jokatgipa An·tangba Johan Ua An·tangna skang ramako tarigipa katchinikgipan ong·a ine ra·chakaha; maina Johanni gimin Ua aganaha: “Indiba maiko nina na·simang ong·katangaha? Katchinikgipakoma? Oe, anga na·simangna agana, katchinikgipanaba dal·batgipako. Iani gimin indine sea, Nibo, Anga nang·ni mikkang mikkang Angni kattako ra·anggipako watata, ua nang·na skang nang·ni ramako tarigen. Maina anga na·simangna agana, me·chikrangoniko atchigiparangni gisepo Rurichina On·gipa Johanna bate dal·gipa katchinikgipa gri?”22

GSAM 307.2Indide Johan katchinikgipa ong·achim ine Jokatgipani rongtale aganani iano donga. Aiao inmangipa kamrangko dakani porikkako jakkale uni biteko an·ching nibo. Nama kattako aganprakgipa Johanni segimin Nama Kattao ia kattarangko an·ching man·a: “Aro bang·a manderang Uona [Kristoona] re·bae aganaha, Johan aiao inmangipa kamko dakjaha; indiba ia Mandeni gimin Johanni agangimin pilakan bebe ong·achim.”23 Bebegipa katchinikgipani chinan aiao inmangipa kamrangko dakani ong·a ingipa kattaniko ia aganani saksaan chu·soke jegala.

GSAM 307.3An·chingni da·o chanenggipa niamrango dokgipa niam ine minggipa, Deuteronomy 13:1-3-o on·gimin ia niamara, aiao inmangipa ba dingtangmanchagipa kamni ja·man an·ching katgni ong·jachina simsakatna ong·a. Skang, uan Gitelona sepangbatatama ba Uoniko chel·atama uko an·ching namedake nina nanga. Ia podni orto ian, pilak niamrangkon jakkalna aro dingtangmancha Isol aro Uni niam baksa nangrima nangrimja uko nina an·chingko agana.

GSAM 308.1Ia dokgipa niam indine skia, tol·e an·tangko mesokgipa aiao inmangipa kamko dakode, uko simsakbee porikka ka·on Isolni kattani rongtalgipa beberangoni ekangani aro an·tangko jegalani ramako watgalna skagipa ka·tong baksa nangrimna toaniko onatani, ua kam baksa dongenga ine nikna man·gen. Indakgipa an·tangko tol·e mesokgipa ong·katna Gitel on·a, aro uni re·bewal Isolni bebegipa dedena porikka ong·a. Ua aiao inmangipa kamko dakgipani mangsonganiko ba uni re·bewal badichi dilenga, uko namedake tobagina man·na cholko una on·a. Isolni kattako kimkime rim·giparangko tol·gipa aiao inmangipa kamko dakgipa salangna man·ja; indiba ia chagrongani bite ong·e uamang Isolo bilakbate ong·kata.

GSAM 308.2Ia namgijagipa salrango bang·an an·tangtangko “bebera·achi an·sengatgiparang,” “Isolni bilchi an·sengatgiparang,” “Christian Science-ni an·sengatgiparang,” aro indakgiparang ine agana. Uni gimin Sastroni niamrangko simsakbee jakkalode namgen. Maina ia mitam “an·sengatgiparangni” kam namen tol·napani chol gnang; uamangni miksongani aro mangsonganiko rongtale u·ina man·na Isolni niamrang aro Gisik Rongtalgipani seng·ataniko nanggen. Gipinrangde Isolni niam aro ia somoina Uni bebeko rongtalen jegala. Mitam changrango ia tol·e “an·sengatgiparang” Isolni niamko janapasan, gisik gimae ka·onangbegipa manderang gita ong·aha. An·tangni rongtalgipa niamko aganprakgipa Aga·ata kat Gitelni gnangan gita, Uni niamko intekgiparang aro uko janapgiparangko mangmangba an·tangtangni mikkangoniko arikgalgipa manderango Gisik Rongtalgipani didianirang dongja ine beben u·ina man·a.

GSAM 308Snigipa Niam—Uamangni Biterang

GSAM 308.3“Tol·gipa katchinikgiparangna simsakbo; uamang mesni ba·ra gane na·simangona re·baa, indiba ning·ode uamang cha·minokgipa ching·aburirang ong·a. Uamangni bitechi na·simang uamangko u·igen. Manderang bu·surangoniko draka biteko, ba bu·sugipa samrangoniko dumur biteko kolama? Indaken pilak namgipa bol namgipa biteko nanga; indiba namgijagipa bol namgijagipa biteko nanga. Namgipa bol namgijagipa biteko nangna amja, aro namgijagipa bol namgipa biteko nangna amja. Namgipa biteko nanggijagipa bol mingantikon den·pe waa·o gala. Uni gimin uamangni bitechi na·simang uamangko u·igen.”24

GSAM 309.1An·chingni Jokatgipani ia kattarang nama kattani chasongo Katchinike aganani on·ani donggen ine ra·chaka. Kam baksa bebegipa katchinikgiparang dongjawa aro pilak katchinikani parakanirang namgijagipa ja·pangoniko ong·genchimode, Ua “Katchinikgiparangna simsakbo” ine aganjawachimma? Maidake ma·gni katchinikgiparangko u·ina man·gen uko Ua inditan rongtale aganani, Ka·dimeatgipa, Gisik Rongtalgipani, “ong·gnirangko” mesokani kamo (Johan 16:13) bebegipa Katchinike aganani on·ani donggen ingipani nambatsranggipa sakki ong·a. An·chingni chanenggipa niamrango snigipa niam ine minggipa ia niamara mamung dakeba gualgijagipa ong·a. Kristo uamangni bitechi na·simang uamangko u·ina man·naba donga ine aganjaha, indiba kimkime indine aganaha, “uamangni bitechi na·simang uamangko u·igen.”

GSAM 309.2An·ching sing·a, Isolni Gisikni bebegipa on·anirangni kamo nikgnigipa biteara maia? Mondolio on·anirangko donon Gitelni mangsonganini gimin Paulni agananio aganchakaniko man·a: “Uni gimin Ua agana, Ua chuaona doangon, Ua rim·gittanggiparangko rim·gittange ra·angaha, aro manderangna on·anirangko on·aha.... Aro Ua mitamko watata, mitamko katchinikgipa, mitamko nama kattako aganprakgipa, aro mitamko nitimgipa aro skigipa dake on·aha; rongtalgiparangko chu·sokatna, dangdike on·ani kamna, Kristoni be·enko rikna; an·ching pilakan bebera·anio aro Isolni Depanteko u·ianio nangrime [rikamo, “nangrimani ning·ona”], chu·sokgipa mande ong·aona, Kristoni chu·sokani dal·ani toani gita ong·aona sokjana kingking.”25

GSAM 309.3A·bachengaonin Gittamgipa Salgini sa·greni aga·ata kat baksa nangrimgipa katchinike aganani on·anio ia niamko jakkalbo, aro biteara maia?—Mrs. Whitechi pangnan on·gimin skianirang nangrimani aro melianiko skibaaha ine an·ching nika. “Damsan ku·pattigrikbo,” aro “damsan sepanggrikbo” ine uarang mikrakata, Kristoni gisik baksa nangrimchina agana, aro indake saksa sakgipin baksa bebegipa bak dongpae nangrimaniko kimkimata.

GSAM 310.1Ia kamni mitam bobilrang kal·stekani gisikchi aganaha, “Na·simangni gisepo donggipa Mrs. Whiteni Nikanirang dongjachimode, na·simangni kam ru·utbea skangon pe·tongtonganganokchim.” Indine aganchaka, “Ian bebe; maina ua ja·pangoniko Gitel ku·pattiani, simsakatani aro seng·aniko on·aha, aro indake nangrimgijanirangko galaha, aro kam mikkangchi nambee re·angaha.” Uni gimin on·aniko dokna uamangni miksonggiminara, beben uni bite bebegipa Katchinike aganani on·anini bite ong·a ingipa saki on·ani ong·a.

GSAM 310.2Bilsi sotdok aro unaba bata somoina Mrs. Whitechi Katchinike aganani on·anini parakanirangko ia niam mingsnichi porikka ka·baaha, aro mingantio uarang bebegipa katchinike agananina nanggni pilakni gitan ong·aha.

Notes

  1. Ephesusrangna 4:11-13. ↩
  2. Joel 2:28, 29. ↩
  3. 1 Thessalonikarangna 5:20, 21. ↩
  4. Parape·a 16:14. ↩
  5. Isaia 8:16-20. ↩
  6. Aganprakgipa 9:6, 5. ↩
  7. Mondolina Saki on·anirang, bak 5, jak 663-667. ↩
  8. 1 Johan 4:1-3. ↩
  9. Ephesusrangna 3:17; Kolossirangna 1:27. ↩
  10. 1 Johan 4:5. ↩
  11. Isaia 30:10, 11. ↩
  12. Jakob 5:10. ↩
  13. Jeremia 23:16. ↩
  14. Pod 17. ↩
  15. J. N. Andrews, 1867-ni December jani Niani aro Aga·ata-o. ↩
  16. Deuteronomy 18:21, 22. ↩
  17. Kalimani 3:37. ↩
  18. 1 Samuel 9:6. ↩
  19. Jeremia 28:9. ↩
  20. Parape·a 16:14. ↩
  21. Luk 1:76. ↩
  22. Luk 7:26-28. ↩
  23. Johan 10:41. ↩
  24. Mati 7:15-20. ↩
  25. Ephesusrangna 4:8-13. ↩

Note

Back