Adventist Pioneer
Library
aplib.orgLibrary
Table of Contents
31 / 31
31 / 31

Uidhal 28 — Mande Sakoba Dog·na Amgijagipa Cholguga

John Norton Loughborough

GSAM 462.1“Nibo, anga nang·ni mikkango oe donggipa cholgugako donaha, aro darang mande uko chipna amja; maina nang·ni bil bang·jaoba, na·a angni kattako rakkiaha, aro angni bimungko jegaljaha.”1

GSAM 462.2Nama kattani mondolini Filadelfia obosthao donggiparangna agangipa kattara ian ong·a. Kristo ta·raken re·bagen ine aganprakanichi ia mondoli ong·katbaaha; ba, ia kattao uamangni knagiminko kimkime rakkigiparangoniko ong·aha. Maina ua Sardis mondolini gimin (Filadelfiana tik skango donggipa mondoli) indine agana, “Uni gimin na·a maikai man·aha aro knaaha uko gisik ra·bo, aro uko kimkime rakkibo, aro gisik pil·bo. Uni gimin na·a mikrakjaode, anga nang·ona cha·ugipa gita re·bagen, aro badia kontao anga nang·ona re·bagen uko na·a ma·sijawa.”2

GSAM 462.3Indake Sardis mondoli Gitelni ta·raken re·baani skianiko knaaha. Uamangni knagiminko kimkime rakkigiparang, “chakki donchakaniko” jitatahaon, bebeo mikkangchi re·angaha, aro Filadelfia mondoli ong·aha. Uamangna ua aganaha, “Na·a angni chakchikani kattako rakkiani gimin, a·gilsako donggiparangko dake nina a·gilsak gimiko sokbanasigipa dakmajoani kontaoniko angaba nang·ko rakkigen. Nibo, anga ta·raken re·baa: nang·ni mukutko darangba ra·angjana gita, nang·ni donggiminko kimkime rakkibo.”3 Uni gimin ia Filadelfia mondolinan ua indine agana, “Anga nang·ni mikkango oe donggipa cholgugako donaha, aro darang mande uko chipna amja.”

GSAM 462.4Indake Rongtalgipa Sastro rongtalen aganenga je, Isolni dilanichi Gitelni re·baaniko a·gilsakna mikrakatna aro Isolko grongna tarichina manderangko mol·molna ong·katgiparangni kamo Isolni dingtangmancha ka·sachakani donga. Manderang uamangko champengna, uamangni kamrangko chu·sokgijatna, aro “aganani cholgugako” chipna jotton ka·naba donga; indiba pilak beng·bangani kosako Isolni ku·rang gam·e aganenga, “Anga nang·ni mikkango oe donggipa cholgugako donaha.”

GSAM 463Bilsi 74-ni Mikkangchi Re·angani

GSAM 463.1Ia ki·tapni skanggipa jakrangon an·ching bilsi 74-ni somoiko, 1831-oni 1905-ona, kan·dike niatbaaha. Re·baani Aga·ata kattarangni, aro mongsongbate Gittamgipa Salgini sa·greni aga·ata katni ong·katani aro mikkangchi re·anganiko an·ching sandibaaha. Ma·sianiko man·gijani aro kangal ong·anioniko ia Aga·ata kat bilsiantio bil aro bilakani batroro baksa mikkangchi re·angaha, aro da·ode a·gilsakko duulenggipa nama katta aganani kamrang donga ine an·ching mesokaha. Ia Aga·ata kat be·enni skaniko ja·rikgipa ka·tongrangko namnikatani gimin indake chu·sokaha ong·ja. Maina uan Gitelni Neng·takani salko mikkangbatgipa biapo dona; uko rakkianio jrimbegipa chisolko ripee ra·na nanga, aro antini a·gilsakni kamrangko ka·batgipa salon a·gilsak baksa palani-brerani kamko watna nanga. Champengani grini giminba ia kam mikkangchi re·angaha ong·ja. A·bachengantaltal ua champenganiko man·aha; a·paloni namjabatsranggipa champenganikoba, aro adita somoina ia dolo napbagipa an·tangtangko Isolna on·kangijagipa manderangni ong·atgipa jajaanirangkoba man·aha. A·palni bobilrangni miksongani aro jottonrangchi ong·gipa obosthani gimin, git ring·gipa Daudni kattarangchi an·ching aganna man·a, “Gitel an·chingni pako dongjagenchimode—da·o Israel aganchina—manderang an·chingni kosako chakaton, Gitel an·chingni pako dongjagenchimode, uamangni ka·onanga an·chingni kosako ching·on, uamang an·chingko tangengmitingon minokgenchim. Unon chirang an·chingko dubiatgenchim, chibima an·chingni janggi kosako jokanggenchim; unon gaora degipa chirang an·chingni janggi kosako jokanggenchim. An·chingko uamangni wagamna cha·ani dake on·gijagipa Gitelko mitelchong. Do·o rim·giparangni jagaoniko do·o gita an·chingni janggi jokaha; jaga chotaha, aro an·ching jokaha. Salgi aro a·ako dakgipa Gitelni bimungon an·chingni dakchakani donga.”4

GSAM 464Gitelo Dakchakani

GSAM 464.1Gitel an·tangni manderangni mikkango “oe donggipa cholgugako” donaha, “aro darang mande uko chipna amja” ine agana. Uni gimin Aga·ata kat kimkime mikkangchi re·angaha ine aiao inmanani dongja. Ian manderangna Isolni Aga·ata kat ong·a, aro uan chu·sokna nanga. Isolni ka·onangani dal·gipa sal sokbaon chadengna man·gipa manderangko tariani kamko Parape·a 7:2-o “salaramoni doanggipa” sa·grechi mesoka; ba, mitamrangni pe·ska gita, “sal napdoa gita” ong·a. Sal seng·baaniko nibo—skanggipa seng·ani ja·dilrang salaramchi nikbaa; uarang nangrime seng·batroroe salni dal·gipa aro rongtalgipa bimangko nikatkujana kingking ong·a. “Salni Raja” salgini jatchi biapona doangoa, uni seng·ani, ding·ani aro bil bilakbatroroa.

GSAM 464.21848-o Gittamgipa Salgini sa·greni aga·ata katni bak ong·gipa beberangko rongtale donahaoni uani mikkangchi re·angani indaken ong·baaha. Ua somoioni aiao inmanbegipa, rongtalgipa aro kimkimgipa dal·roroaniko an·ching mesokbaaha. Ian Isolni jokataniko on·ani sokbaenggipa ia somoio, “Neng·takani salko marang nangatgija rakkigiparangna,”5 aro Isolni rongtalgipa salo an·tangtangni namnikako dakani-oniko ja·ako an·pilatgiparangna Gitel an·tangni kattako chu·sokatenga ine aganana agre gipin mamungchi an·ching talatna amja. Uamang indake, Parape·a 14-ni Gittamgipa Salgini sa·greni aga·ata kato agangimin gita, “Jisuni ka·dongani” chi pilak “Isolni ge·etanirangko” rakkia. Indakgiparangni gimin Gitel Isaia katchinikgipachi aganaha, “Unon nang·ni seng·ani pring gita ong·katgen, aro nang·ni ansengani ta·raken chabaagen; aro nang·ni torom [“Gitel an·chingni torom.” Jeremia 23:6] nang·na skang re·anggen; aro Gitelni rasong nang·ni janggilni rakkigipa ong·gen.”6 Indakgipa ka·dongatanirang baksa ia kam chu·sokgen ine ong·gija an·ching mai gipinko ka·dongna man·gen? “Isol an·chingni pako ong·ode, sawa an·chingni kosako ong·na amgen?”

GSAM 464Iarang Maikai Chu·sokna Amgen?

GSAM 464.31846-o Gipi Joseph Bates ua skanggipa ki·tapko, Snigipa Sal Adventistrangni Neng·takani salni gimin ong·atchenggipa ki·tapko, sena a·bachengon, a·gilsako uni donggipa tangka pilakan sent 12 aro adhachisan ong·achim. Aro uni skanggipa seani sal bon·kuna skangan uko jakkalna nangaha. Ua obosthako nibo; aro Gipi James White me·suna sam raani abao kam ka·e man·gipa tangkachi uni skanggipa chongipa kattani jak Da·o Donggipa Bebeko chapa ka·e, poraina skagipa pilaknan indinari watataha, aro uan a·gilsakni bon·kamgipa biaprangona sokangnasigipa Aga·ata kat ong·a ine aganaha. Ia chonbegipa a·bachenganirangko nie, Amosni salrango manderangni agangipa kattachi saksa sing·naba donga, “Jakob sachi chakatgen? Maina ua chongipa ong·a.”7 Iako 1905-ni obostha baksa toatbo: a·gilsakni dingtang dingtang biaprango donggipa Ki·tap seani nok 20-o Aga·ata katni beberangko parakatenga; poraiani ki·taprangna nangnikaniko chu·sokatna uarang bang·a changon an·tangtangni bil chu·gimikchi kam ka·na nanga. Uni gimin an·ching bebeko aganna man·a, Nibo, da·ona kingking darangba chipkujaenggipa “oe donggipa cholguga.”

GSAM 465.1Skangni somoirango ia kam mamungdakeba chu·sokjawa ine chanchigiparangni gimin, Jerusalemko riktaiani kamo Isolni kamko champengna chanchigiparangko Zekaria katchinikgipani manenggipa kattarangchi an·ching aganna man·a, “Chongipa bosturangni salko sawa chonnikaha?”8 Uamangni ramao neng·nikani a·brirang gita nikgipa bosturangni gimin Gitel katchinikgipachi indine aganaha,—

GSAM 465A·briko A·kawe Dakata

GSAM 465.2“O dal·gipa a·bri, na·a sawa? Zerubbabelni mikkango na·a a·ka ong·gen; aro ua kosakgipa ro·ongko ong·atbagen, aro manderang, Iana ka·sachakani, ka·sachakani ong·china, ine chrike agangen.”9 Gittamgipa Salgini sa·greni aga·ata katni kamoba indaken ong·baaha, aro “kosakgipa ro·ongko” ra·bakujana kingking, ba gipin kattachi aganode, kamko matchotkujana kingking, indaken ong·gen.

GSAM 465.31846-o donggipa bang·gija manderangko nibo: Isolo bebera·ani aro bebe gamna agre, tangka paisao aro pilak gitaba uamang kangal ong·achim. Aro uamangni kam baditan dal·roroaha uko nibo. Da·o jako donggipa kam ka·ani cholrangko, tarisogimin, a·gilsakni dingtang dingtang ku·sikrangona pe·skagimin aro chapa ka·gimin ki·taprangko, aro bilsiantio $400,000 gamchatgipa ia ki·taprangko manderangni nokrangona ra·napgipa ritchani ritcha Ki·tap bikhalgiparangko chanchibo. Isolni patiani ia kamo dongkamode, an·ching chu·sokaniko ka·dongna man·a. Jaantio bang·rorogipa ia kam ka·ani cholrang aro dakchakgiparang baksa, Kristoo ka·donge, an·ching Solomonni ring·gipana agre gipinko ka·dongna nangja. Isolni mondoli uni bakra obosthaoniko “an·tangni Ka·sagipani jako pangchake” ong·katbaon, ua mondoli mikkangchi niako mesoke indine ring·aha, “ja gita nitoa, sal gita rongtala, aro nisanrangko rim·gipa sipai kotok gita kenbegnigipa.”10

GSAM 466Katchinike Aganani On·anichi Dakchakako Man·a

GSAM 466.1Gitelni dilani bebeko gipatna ramako oaha, aro uni dilani ramarango re·angna dakgipa jottonrangna uni dingtangmancha patiani dongpaaha inesan an·ching nikaha ong·ja. Gittamgipa Salgini sa·greni aga·ata katni ong·katani aro mikkangchi re·anganioba ua Katchinike aganani on·anichi an·tangni manderang baksa agangrikaha. Ian Sastroni pal ong·na gital parape·ani ong·ja, aro Sastroni skianirangko dingtangatna ong·ja. Indiba ia chasongo Kristoni nama kattani ramram ong·aoniko ekangani kenani bano donga, aro manderang ia chasongni bewalrangni ning·o ga·ake, bil gri toromni bimangsan dongao chu·ongnikani kenani bano donga, uko mesokna ong·a.

GSAM 466.2Indakgipa parakanirangko dake nina niamrangoni mingsa dake Gitel an·chingna on·gipa gitcham katchinikgiparangni dakmesokaniko11 niate ia kattako chanchion, skang gitan da·oba indakgipa parakanirang nangani a·sel apsan ong·a ine nika. Chong·motan, chasongantio ua chasongni gipatgimin aro dingtangmancha skiani aro dakbewalrangchi bebe ramako watatako man·ani kenani donga. Gitel mondolio dongimin on·anirangni parakani gimin aganmitingo watata Paul indine agana, uaranga “rongtalgiparangko chu·sokatna, dangdike on·ani kamna, Kristoni be·enko rikna ong·a; an·ching pilakan bebera·ao aro Isolni Depanteko ma·sianio apsan ong·aniona, chu·sokgipa mande ong·aniona, Kristoni chu·gimik ong·ani dal·ani toaniona sokkujana kingking ong·a. Maikai an·ching da·onipiltalde bi·sarang ong·jawa, aro manderangni togiani aro brangatna seng·soe donggipa tol·napani chanchisoanichi skiani balwaantichi salang-salbatatako man·jawa; indiba ka·saao bebeko agane, skotong ong·gipa Kristona pilakoba dal·roroagen. Uoniko be·en gimikan krae nangrime, changbri changbri bakni on·giminchi nangrimako man·e, bakantini toani gita bil gnange kam ka·achi, ka·saao an·tangko rikna be·en dal·roroa.”12

GSAM 467.1Da·o Katchinike aganani on·ani parakanirangni kosako agangipa jegalanirangko gitcham somoirangoba apsan bilchi aganna man·genchim; chong·motan, an·chingna Sastro donga, uni gimin indakgipa on·anirang nangja ine aganna man·genchim. Indiba ia apsan Sastro an·chingna agana je, “chu·sokgipa [chu·sokgipa obostha] sokbaa” ona kingking uamangni kamko ka·china Kristo ia on·anirangko mondolio donaha. Aro mondoli “an·chingni Gitel Jisu Kristoni re·baaniko seng·engmitingo, mamung on·anioba janggil ong·jachina.”13

GSAM 467An·chingna Katchinikgiparang Maina Nanga?

GSAM 467.2Gitcham somoio manderang indine chanchina man·genchim: Isol an·tangni jaksichi ro·ongni rong·plengo segipa namgija-namani niam an·chingna donga; Isolni ku·sikoniko Mosena agangimin aro simsakbee see dongimin niamrang, bichalrang aro skianirangba donga; uni gimin aro mai nangkua? Indiba uamangni jako donggipa ua pilak namgipa beberang donggenchimoba, Isol uamangna “dingtang dingtang somoirango aro dingtang dingtang bewalrangchi an·tangni rongtalgipa katchinikgiparangchi” aganna namnikaha.

GSAM 467.3Isaia, Jeremia, Ezekiel, Daniel, Hosea aro gipin dingtang dingtang katchinikgiparangni on·gipa Saki on·anirang, changantion Isolko maniani apsan dal·gipa niamko skiaha ine an·ching nika. Indiba katchinike aganani on·gipa chasongo gipatgimin dakbewalrangchi kakketni rongtalgipa aro marang grigipa niamrangoniko rim·angako man·na skani gimin, katchinikgipa sakanti an·tangni somoio donggipa manderangna dingtang dingtang manenganirangko on·aha.

GSAM 468On·anirangni Nangani

GSAM 468.1An·chingna Niam Gitcham Sastroni namgipa skianirangsan ong·gija, an·chingni Jokatgipa an·tangni aro watatarangni kattarangba donga; uni gimin aro seng·ani an·chingna maina nangkua ine agannaba donga. Indiba ia apsan rongtalgipa watatarang bon·kamgipa salrangko mesokaha: unon “kenbegnigipa somoirang sokbagen,” aro manderang “toromni bimangko man·gen, indiba uni bilko jegalgen.” Aro “mitamrang tol·napgipa gisikrangko aro korerangni skianirangko knachake, bebera·aoniko ekanggen” ine an·chingna aganaha.

GSAM 468.2Ia pilakni gimin chanchie, Paul Thessalonikarangna seon janapgipa ua manderang, jerangan andalao dongjawa, jedakode Kristoni sal cha·ugipa gita uamangko rim·jawa, indiba seng·ani dedrang ong·gen, uamangko “katchinike agananirangni” bidingo “pilakkon dake nibo” aro “namako kimkime rakkibo” ine ku·pattia.14 Ian Gitel Jisu Kristoni re·baaniko seng·gipa aro bon·kamao ua salna tarie dongako niknasigipa manderangni gisepo Katchinike aganani on·ani “namgipa,” bebegipa parakanirang donggen ine uamangna aganani baksa apsan ong·a.

GSAM 468Bon·kamani Chinrang

GSAM 468.3Gitelni sal sepangaha ine pilakchin chinrang bang·begipa somoio an·ching donga. Pilak ge·etanirangko rakkigipa aro “Jisuni Saki on·aniko man·gipa”15—“Katchinike agangiminni Gisik”16—ko man·gipa mande dolsa ong·katna nanggipa ua tik somoion an·ching donga. An·ching maiko nika? Batanggimin bilsi 60-o indakgipa mande dol ong·katbaaha, aro indakgipa Aga·ata katkon ra·bitaha; uamangni gisepo Katchinike aganani on·ani parakaha. Mrs. E. G. Whitechi parakgipa ia on·aniko Sastroni niamrangchi dake nie, an·ching pilak bidingoba uan dake nianiko chakna man·a ine nikaha. A·bachengaoni bon·kamaona Mrs. Whiteni pilak seanirango, papna ontisaoba jakgitelaniko on·gipa, ba Isolni kattaoniko ontisa ekanganiko chakgipa katta riting mingsakoba nikkuja. Ia seanirang an·tangtangko Sastrona kosakode donrongja; indiba pangnan Isolni kattako namen simsakbee poraichina ku·pattia, aro bon·kamgipa bichalo an·chingni bidingrangko niatnasigipa dal·gipa toani niam ine uko mesoka. Uni seanirango Kristoko an·chingni ja·rikna nanggipa saksasan dakmesokgipa ine an·chingni mikkango de·doa. Ua ia a·gilsako cheani an·chingni saksasan ka·dongani, sokbanasigipa ka·onangaoniko an·chingni saksasan katnapram, aro an·chingko jokatna man·gipa saksasan bimung aro rama ong·a ine namen rongtalen parakata.

GSAM 469An·tangni Mandera·ani Katta

GSAM 469.1Mrs. White aro uni kamni bewalni gimin ka·mao on·gipa kattarangko, uko ma·sigipa aro bang·a bilsirangna uni kamko poraie niatgipa saksani 1877-o seaha. Bilsi 53 mangna dake niani, simsakbee nirokani bilsirangni ja·mano, uno agangipa kattaantiko anga chu·gimik ra·chaka:—

GSAM 469.2“Adatang Whiteni Kristian cholonni gimin, anga aditako ma·sia ine aganna cholko anga bi·a. Bilsi 18-na anga un baksa ma·sigrikaha—ian an·chingni manderangni itihasni adhachina bate ong·a. Anga changni chang uamangni nokdang baksa dongaha, basakobade antirangna dongaha. Uamangba bang·a changrangna an·chingni noko aro nokdang baksa dongaha. Anga uamang baksa pilak biaprangonan gita songre·aha; an·tangtangsan dongonba, manderangni mikkango dongonba, tom·anio aro tom·ani a·paloba uamang baksa dongaha. Uni gimin Jong-gipa aro Adatang Whiteni janggi tangani, cholon aro gisikni gimin ma·sina anga namgipa cholrangko man·aha. Toromni dangdikgipa ong·e, anga pilak rokomni manderang aro pilak rokomni cholonrang baksa kam ka·na nangaha; uni gimin, bang·a bilsirangna sepange ma·sigrikani ja·manode, mande maidakgipa ong·a uko adita bichal ka·na anga ama ine chanchia.

GSAM 470.1“Adatang White an·tangko de·gijagipa, sontolgipa, ka·sa ka·tonggipa aro mandera·na kraa me·chik ong·a ine anga ma·sia. Uni cholonni ia bewalranga mesokna mangmang dakanirang ba jottonchi ong·atanirangsan ong·ja; indiba uni ong·telaigipa cholononiko nitobe aro altuen ong·kata. Toromo sima batgipa manderangni pangnan ong·a gita, ua an·tangko dal·nikgipa, an·tangko toromi chanchigipa aro an·tangko nangchongmotgipa ine chanchigipa ong·ja. Anga bang·a changon toromo sima batgipa manderangko grongaha; uamang an·tangtangni gimin dal·bee agananian gapgipa, gaora deanian gapgipa, an·tangtangni chanchianiko aganna rongrake donggipa aro an·tangtangni rongtalani gimin gaoradegipa ong·a ine anga pangnan nikaha. Indiba Adatang White ia pilakni bikpil ong·a ine anga pangnan nikaha.

GSAM 470Kangalrangni Ripeng

GSAM 470.2“Sakanti, kangalbatsranggipa aro onbatsranggipaba, jegalako man·gijan ku·pattiani aro ka·dimeataniko man·na jakgitele uni mikkangona re·angna man·a. Ua pangnan nangnikgiparangko, mamungba grigiparangko aro duk man·giparangko niroka, uamangna nanggiparangko on·a aro uamangni palo mol·mola.

GSAM 470.3“Isolna kenaniko inditan pangnan an·tangni mikkango dongipa mande saksakoba anga ma·sigrikkuja. Isolo gisik nangbee bi·gija ua mamung kamkoba a·bachengja. Ua Isolni kattako simsakbee aro pangnan poraia. Anga Adatang Whiteni agananiko ritchani ritcha changrangna knaaha, aro uni pilak Saki on·anirangko chu·gimik poraiaha, uarangni bang·akon bang·a changrangna poraiaha. Indiba ua pilako namgijagipa cholonko skigipa katta mingsakoba, ba chu·gimik rongtalgipa aro Kristianni gita ong·gijagipa mamungkoba anga nikna man·kuja. Sastro aro Kristooniko ekatgipa mamungkoba nikja. Indiba Isolko manichina, Jisuna ka·sachina, Sastroko bebera·china aro uko pangnan sandichina namen gisik nangbee mol·molanirangko anga uano nika. Channa amgijagipa changrangna ia Saki on·anirangoniko anga dal·gipa gisikni namgni man·aha. Bebeko aganode, Isolo angni bebera·ani chu·onggijani, angni on·kangani chu·onggijani aro janggirangko jokatna angni gisik nangani chu·onggijani gimin manengako man·a ine ma·sianiko man·gija anga uarangko poraikujaha. Ango bichal ka·ani ba gisikni ma·siani adita dongode, ia Saki on·anirang Sastro baksa apsan gisik aro apsan kattani bewalko man·a ine anga agana.

GSAM 470.4“Bilsi 30-na [da·ode an·ching bilsi 60 ine aganna man·a] an·chingni manderangni gisepo ia Saki on·anirangko bebera·aha aro poraiaha. Uarang uamangko maikai dingtangataha? Uarang uamangko Isolni niam-oniko ekataha ma? Kristoo bebera·aniko watgalchina dilaha ma? Sastroko galchina dilaha ma? Namgijagipa aro cholon namgijagipa mande dol ong·china dilaha ma? Gipin badia Kristian mondolini dol baksaba toatode uamangko namgipa ong·a ine nikgen, uko anga ma·sia.

GSAM 471.1“Angni nikgimin katta mingsa ian: Adatang Whiteni Nikanirangko namjabatsrange champenggiparangba ua Kristian ong·a ine ra·chaka. Maikai uamang iako ra·chakna ama, uko anga ma·sija. Ua tol·napako man·aha ine agane uamang iako talatna jotton ka·a. Uni janggi tangani gimiko marang mingsakoba, aro uni seanirango namgijagipa cholonko skigipa katta mingsakoba uamang mesokna amja. Uni seanirangni bang·an namen nama, aro uni agangiminkon chu·gimik ja·rike tanggipa sakanti namgipa Kristian ong·gen aro salgi soka ka·dongani donggen ine uamang ra·chakna nanga. Ua diabolni jakreng, Satanni gisikchi bilko man·gipa ong·ode, ba uni seanirang cholon namgijagipa ba an·tangni gisikni ramram brangani ong·ode, ian namen aiao inmanani ong·a.”

GSAM 471Gipinrang Seanirangni Gimin Saki On·a

GSAM 471.2Mrs. Whiteni seanirang donggipa an·chingni somoiantio ong·katgipa kattani jakrangko wataton, onbatsranggipa, Isolna kengipa aro Una on·kanggipa manderang uarangko am·a. Uamangni poraigiminni gimin aganon, uamang indine agana, “Chinga Mrs. Whiteni seanirangna dingtangmancha gisik nangbea. Uaranga salantini janggi tanganio ja·rikna man·gipa ong·a; mandeko Gitelona sepangatna, aro uko onbatgipa, Isolna kenbatgipa aro Una on·kangbatgipa ong·atna amgipa skianirangan gapa. Ia seanirang Sastroni kattani bewal baksa inditan apsan ong·a je, chinga poraion, Mrs. White indake sena gisikni dilaniko man·gipa ong·na nanga ine chingna nikna man·a.” An·chingni nama katta aganani kam ka·giparang baksa chiti see agangrikgipa bang·a chot manderangni Saki on·ani indaken ong·a. Mrs. Whiteni chanchianirangko rongtalgipa Nikanio man·a ine ontisaoba ma·sigijagiparangba uamangni gisepo donga.

GSAM 471Champengani Baoni Ong·kata

GSAM 471.3Ia on·anini manderangna ong·atgipa chanchianiko an·chingni mikkango donon, sing·ani ong·kata, Ia on·ani parakaniko champengani baoni aro maina ong·katbaaha? Aro champenggiparangni bon·kamani maia ong·aha? 1852-oni ia kattako simsakbee nirokbaahaoni anga iako nikaha: ia parakaniko champenganirangni bang·batan cholonni namgijanirang, namgijagipa bewalrang ba uamangni janggi tangani ramani namgijagipa re·anirangna manengako man·giparangoniko ong·katbaaha. Manengako man·giparangni bang·an Saki on·anio mesokgipa gita uamang namjachim ong·ja ine jegalaha; aro uamangna on·gipa manenganiko ja·rikjagenchimoba uamang bebeko kimkime rakkina ama ine mesokna skaaha. Somoi re·angon indakgiparangni bang·batsrangan uamangni bebera·aniko watgale doloniko chu·gimik ong·katangaha ine mesokaha. Mitamrang an·tangtangni gualaniko nike, bebeko kimkimbate rim·aha. Sing·ani ong·kata, Ia on·aniko champenggiparangko Gitel dilenga ong·ode, maina uamang gisikni janggi tanganiko gimaata aro Isoloniko an·pile re·anga? An·chingni Jokatgipani niam gitade bolko uni bitechi ma·sina nanga. Ua namen kimkime agana, “namgijagipa bol namgipa biteko nangna amja.”

GSAM 472Champengani Chu·sokgijani

GSAM 472.1Mrs. Whiteni Saki on·anirangko dol dake champengani ong·katgipa somoirangko an·ching gisik ra·a. Uamang ia Saki on·anirangko galataon uamangni kamo dal·gipa chu·sokani ong·gen ine aganaha. Indiba uamangni ka·donggiminko chu·sokatanio uamang chu·gimik chu·sokjaha. Bang·a bilsirangna dakgrikani ja·mano, bilsi 49-na skang uamang gita ong·giparangni dakgipana bate Neng·takani salni bebeko a·gilsakna gipatani mamung sakiko uamang mesokkuja. Uamangni kam Gitelni dingtangmancha kam ong·ode, maina uamangni Aga·ata katna chu·sokani bang·batjaha?

GSAM 472Chu·sokani Bano Donga?

GSAM 472.2Gipin pako, Isolni ge·etanirang aro Jisuni ka·donganiko a·gilsakna aganprakgipa ua Aga·ata katko an·ching nion—ku·pattianirang, skianirang aro manenganirang baksa ia Katchinike aganani on·ani parakani nangrimgipa Aga·ata katko nion—uani a·bachengaoni da·ona kingking uan kimkime aro dongdikgija mikkangchi re·angaha ine an·ching nika. Ua on·anichi on·gipa Gitelni ku·pattianirangko knachake, Gitelni bilo mikkangchi re·ange, ia Aga·ata kat an·chingni mesokgimin gita a·gilsakko duulaha, aro ta·raken “pilak jat, aro ma·chong, aro ku·sik, aro manderangona” re·angenga.

GSAM 473.1Batanggimin somoio uani mikkangchi re·angani gimin an·ching aganna man·a, Isolni katta chu·sokaha, maina ua aganaha, “Nang·ni kosako dakgimin mamung silchidareba chu·sokjawa.” Bebe, da·ona kingking ia dal·gipa Re·baani cholni ong·katani aro mikkangchi re·anganio donggipa chu·sokanichi Isolni jak parakaha. Aro mikkangchinade uni ia katta chu·sokchongmotgen ine an·ching pangchaka, “Anga nang·ni mikkango oe donggipa cholgugako donaha, aro darang mande uko chipna amja.” Ia ka·donganio an·ching chu·gimik ka·donge ring·na man·a:—

GSAM 473.2“Maina ua an·ching baksa dongbaaha, Aro ua da·oba an·ching baksa donga, Aro bon·kamaona kingking An·ching baksa donggen ine ua ku·rachakaha.”

Notes

  1. Parape·a 3:8. ↩
  2. Parape·a 3:3. ↩
  3. Parape·a 3:10, 11. ↩
  4. Git 124:1-8. ↩
  5. Isaia 56:1, 2, ↩
  6. Isaia 58:8, 13. ↩
  7. Amos 7:2. ↩
  8. Zekaria 4:10. ↩
  9. Zekaria 4:7. ↩
  10. Solomonni Git 6:10. ↩
  11. Jakob 5:10, ↩
  12. Ephesusrangna 4:12-16. ↩
  13. 1 Korinthirangna 1:6, 7. ↩
  14. 1 Thessalonikarangna 5:5, 20, 21. ↩
  15. Parape·a 12:17 ↩
  16. Parape·a 19:10 ↩

Note

Back