Adventist Pioneer
Library
aplib.orgLibrary
Table of Contents
23 / 31
23 / 31

Uidhal 20 — Dakchenggipa Kamo Boli On·anirang

John Norton Loughborough

GSAM 311.1“Angni rongtalgiparangko Angona damsan chimongbo; boli on·achi Ang baksa ku·monggrikaniko dakgiparangko. Aro salgi Uni toromi ong·aniko parakatgen; maina Isol An·tangan bichal ka·gipa ong·a.”1

GSAM 311.2Jun 3, 1902-ni Niani aro Aga·ata-o an·ching indine poraia:

GSAM 311.2“Da·o ia kamo napgiparang, kam a·bachengani somoio Gitel An·tangni kamni baljrimaniko jemangni kosako donahachim, uamangni an·tangtangni skaniko jegalani aro an·tangtangko boli on·ani gimin namen komian u·ia. Batanggimin somoini chagronganirangko uamangna changni chang aganna nanga; maina skangni bebegipa kam ka·giparango nikgimin apsan an·tangko onatani gisik aro an·tangtangko boli on·anichi uamang kamko mikkangchi ra·angna nanga.”

GSAM 311.3Aroba, Mondolina Saki on·anirang, bak 7-o, ia kattarangko man·a:

GSAM 311.3“An·ching ia a·gilsakni itihas bon·ani somoiona sepangbaenga, aro da·ona kingking mesokgiminna bateba bang·bata an·tangko boli on·anichi Isolni kamni dingtang dingtang bakrangko mikkangchi ra·angna nanga.”2

GSAM 311.41846-o Gipi Batesko Neng·takani salni gimin uni skanggipa ki·tapko sena aro chapa ka·na maidakgipa obostarango didiataha, uko skangan janapmanaha. Aro 1849-o Gipi James White Da·o Donggipa Bebe minggipa lekkako chapa ka·na a·bachengon uni rakbegipa obosthanikoba janapmanaha.

GSAM 311Salgirangko Oani Gimin Chongipa Ki·tap

GSAM 311.51846-ni bol bijak ga·akani kari somoio Topsham, Maine-o Mrs. White-na on·gimin Nikani ja·mano, jeon mitam salko wilwilgipa a·gilsakrangko una mesokahachim, Gipi Bates Salgirangko Oani minggipa chongipa ki·tapna jakchi segimin lekkako tarisoaha. Indiba uko chapa ka·na tarigimin tangka namen nangachim. Ia nanganiko gapatna, Massachusetts-o donggipa Adatang saksa, jean ba·ra gitchamrangchi dakgimin a·ao an·ani ba·ra gital ge·sako da·osa matchotatmanoe an·ahachim, uko de·e palaha, aro man·gimin tangkako Gipi Batesna on·aha; unon ua uni gnigipa ki·tapko chapa ka·na man·aha.

GSAM 312Mohor Su·ani Kamni Gimin Chongipa Ki·tap

GSAM 312.1November 18, 1848-o Dorchester, Mass.-o on·gimin mohor su·ani kamni Nikani ja·mano, Gipi Bates Tangenggipa Isolni Mohor minggipa gittamgipa chongipa ki·tapko seaha. Ianonba ua chapa ka·na tangka grini neng·nikaniko chagrongtaiaha. Me·tra segri saksa ia obosthako u·ie, songjinmaoni chel·ao donggipa uni chongipa noktangko palaha, aro unoniko man·gimin tangkani adha bakko Gipi Batesna on·aha. Indake ua changsatai ki·tap chapa ka·anina gamna man·aha.

GSAM 312Ki·tap Chapa Ka·ani Kamni Nanganirang

GSAM 312.21851-52-o Re·baani Niani aro Neng·takani Salni Aga·ata-ko Saratoga Springs, N.Y.-o chapa ka·aha. Iano Mr. Thompson Gipi White aro uni jikna gamgri dongchakani kuturiko on·aha; aro ra·chakgimin nokni bosturangchi uamang changsatai nokdangko a·bachengna chol man·aha.

GSAM 312.3Ia somoio Da·o donggipa bebe-o bebera·giparang bang·rorobaengachim, aro uamang bang·roroani baksa Gipi White aro Mrs. White-ni an·tangtang re·e dangdike on·ani kam nangrorobaaha. Ian, lekkako name tariani kam baksa, kam ka·ani noko dakchakgiparangko nangataha. Tik ua somoion gipinrangba seani kamo dakchakna gisiko didiatako man·aha. Gitel maidake An·tangni manderangni bebera·anina aganchaka, aro nangani somoio kam ka·giparangko ong·katata, uko mesokna West Wilton, N.H.-ni kakket on·kangipa Adatang saksa, Mrs. Rebecca Smith-ni chagronganiko an·ching on·enga:—

GSAM 312.4Tik ka·gimin somoi batanggiminni ja·mano, uni depante Uriah aro deme·chik Annie R. skigiparang ong·na an·tangtangko tarina gita skulo poraina namen skaaha. Ma·gipa an·tangni dedrang a·gilsakchipak re·angenga ine kenaha, aro uni kenani a·selgride ong·jachim. Dedrangba uamangni ma·gipani ka·saanina ka·saskiaha.

GSAM 313Phillips-ni Skul Dal·gipao Uriah Smith

GSAM 313.11848-oni 1851-ona depante Exeter, N.H.-o Phillips-ni Skul Dal·gipao poraiaha. Uano poraigiparangna kollejni skanggipa bilsini poraianiko skiaha, maikai kollejona napahaon uamang bilsi sa skang dongna man·gen. Ua ia poraianiko matchotataha. 1851-o ua kollejona poraina tangka man·na kam ka·aha, indiba uko kam ka·atgipani badingani chu·sokjaha, uni gimin uni tangka gimaha; aro indake ru·utbea somoina gisiko donenggipa kollejni poraianiko watgalaha.

GSAM 313Me·trarangni Skiani Noko Annie Smith

GSAM 313.2Uriah skul dal·gipao poraiengon, uni adatang Charlestown, Mass.-o me·trarangni skiani noko poraiengachim. Uni uani poraiani matchotnasiengachim; aro ua skulo poraianiko watnasihani gimin, una aro uni jonggipana Mt. Vernon, N.H.-ni skul dal·gipao bilsi gittamna skichina, bilsiprakna $1,000 aro cha·ani dongani baksa, on·na ku·rachakaha.

GSAM 313.3Ua somoini samtangtango ma·gipa “Da·o donggipa bebe”-ko ra·chakaha. Da·o dedrangni gimin uni bi·anirang, ong·na man·ode, skangna bateba gisik nangbata aro bimchipbataha. Gipi Bates West Wilton-ona re·baaha, aro Mrs. Smith uni dedrangni gimin una aganaha; aro uamangni gisik pil·anina bi·aha. Gipi Bates salgittamsani ja·mano Somerville, Mass.-o Paul Folsom-ni noko metingrangko ong·atna miksongengachim, aro Mrs. Smith an·tangni deme·chikna see, metingona re·bachina okamna nangachim. Ua somoio, Gipi Bates aro ma·gipa, ua metingona re·angchina Isol uni ka·tongo kam ka·china bi·na nangachim.

GSAM 313Jumang Minggni Chu·sokaha

GSAM 313.4Gipi Bates meting ong·gnigipa kuturiona pangnaba re·kuja, uni gimin uani bimang aro donaniko mamungkoba u·ijachim. Metingna skangni walo ua jumango an·tangko ua kuturio nikaha, aro cholgugani sambao donggipa asongchakani ge·sa mangmang bangbang dongachim, aro gipin pilak asongchakanirango manderang asongtokmanahachim. Ua jumango indakeba nikaha je, an·tangni aganna miksonggimin kattako dingtangate, Rongtala ba toromni biapni gimin aganaha; uamang skanggipa gitko ring·manaha, bi·manaha aro gnigipa gitko ring·manaha, aro ua uni Sastroko oe, noksa patni kosako donggipa Rongtala ba toromni biapni noksako mesoke, “Sal 2300-ona kingking; unon Rongtala ba toromni biap rongtalatako man·gen,” ine poraiengon, cholguga oaaha, aro me·tra saksa nape, bangbanggipa chokio asongaha. Jumango ua indakeba nikaha je ua mande Annie R. Smith ong·achim, aro ua rang·sanan gisik nange bebeko ra·chakaha.

GSAM 314.1Gipi Batesni meting Neng·takani salo (Sonibaro) ong·achim; aro ua salo skul dongjani gimin, Annie indine aganaha, “Angni ma·gipako katchaatnasan anga re·anggen.” Ua Neng·takani salna skangni walo ua jumango indine nikaha je ua re·angaha, indiba ru·utaha; ua cholgugao sokon skanggipa gitko ring·manaha, bi·manaha, aro uamang gnigipa gitko bon·atnasiengachim; ua napengon cholgugani sambao donggipa choki ge·sa mangmang bangbang dongachim, aro gipin pilak chokirangon manderang asongtokahachim; chugipa, mandera·na kragipa aro namgipa agangipa saksa, ua pangnaba nikkujaenggipa noksa patko mesoke, “Sal 2300-ona kingking; unon Rongtala ba toromni biap rongtalatako man·gen,” ine agantaiengachim. Ua jumango indine nikaha je uni agangipao ua namen gisik nangaha, aro ua katta bebe ong·achim.

GSAM 314.2Ua chu·onggipa somoi dongengon metingona re·ongkatangaha, indiba ramako brangaha; uni gimin gnigipa gitni bon·kamgipa bakko ring·engonasan uano sokaha. Ua napahaon pilakan jumango uni nikgimin gitan ong·achim, aro jumango nikgimin apsan mande Daniel 8:14-ni kattako apsan bewalon agantaiengachim. Ian rang·sanan uni ka·tongo bebeko ma·siatbeaha.

GSAM 314.3Ua cholgugao nape asongkujana kingking Gipi Bates an·tangni jumangko gisik ra·kujachim. Ua gipin kattani gimin aganna tarisoahachim, indiba uni gisik Rongtala ba toromni biapni giminon dongna skaiachim. Sastroni kattako agantaiengon, uni jumang rang·sanan uni gisikona re·bapilaha; aro ua knatimenggiparangni ka·tongona sokgipa kattako aganna dakchakanina jripjrip bi·aha. Annie u·igimin tik ka·gimin somoi batanggimaniko ua namen jakgitelbee talatna man·aha. Unikoa ua Gittamgipa sa·greni katta aro Neng·takani salni bebeko agane on·aha.

GSAM 315Annie Smith Bebeko Ra·chaka

GSAM 315.1Metingko bon·aton ua Annie-ni sepangona re·e indine aganaha, “Na·a West Wilton-ni Adatang Smith-ni deme·chik ong·a ine anga bebera·a. Anga nang·ko skang nikkuja, indiba nang·ni mikkangko u·isogimin gita nika. Mejanna walo anga nang·ko jumango nikaha.” Unon Annie uni jumangko aganaha. Uanon aro ua somoion Neng·takani salni bebeko ra·chakmane, uni chanchianirang aro skanirang pilakan dingtang ong·e ua metingoni re·ongkatangaha.

GSAM 315.2Ua skiani nokona re·pilangaha, uni bakso-o bosturangko donaha, aro noktangona re·angaha. Gipi White-ni chapa ka·ani salanirang aro skiprakani kamrangko u·ie, uni kam ka·ani noko dakchakna Isol uko okamenga ine ua ma·siaha. Agost 1851-o, lekkako Paris-oni Saratoga Springs, N.Y.-ona jitahaon, Annie Smith kam ka·giparangni saksa ong·e uano re·angaha.

GSAM 315Boli On·ani aro An·tangko On·kangani

GSAM 315.3Niani aro Aga·ata, bak 2, song·gipa 7-o, gaora de·gijagipa chongipa kamna uni skangni miksonganirangko watgalani ja·mano uni gisikni chanchianirangko mesokgipa, uni segimin kattarang adita donga. Ua indine agana:

GSAM 315.3“Mes Bi·sa jechi ramako dila, uachinan Uko ja·rikna anga pilakkon watgalmanaha ine ka·donga. A·gilsak uni pilak salaniko gimaatmanaha. Angni ka·donganirang, katchaanirang aro ka·saanirang da·o pilakan kosako donggipa aro Isolni bosturangon pangchaka. Jisuni ja·ao asonge Unoniko skie ra·na agre gipin biapko anga nangnikja—angni salgini Pagipana dangdike on·na agre gipin kamko nangnikja—aro pilak ma·sianina batgipa Isolni tom·tomanina agre gipin katchaaniko nangnikja.”

GSAM 315.4Chapa ka·ani noko chapa ka·gimin lekkako poraie gualanirangko name niatani aro gipin kamrango Adatang Annie-ni dakchakani tik nanggipa somoion sokaha. Ua bilsi gittamna kakket aro chu·sokbee kam ka·aha, aro cha·ani aro ganani ba·rarangko mangmang man·aha. Ia somoini bon·ao ka·sopko cha·minokgipa sabisi uko rim·manahachim. Ia ru·utbee duk on·gipa aro sina ra·anggipa sabisi uko ong·siatengon, ua nitoa poidorang aditako seaha; uarangoni namchikbatgipa “Iano Nok aro Salgio Nok” ong·achim. Uni siani skangni salo, Julai 26, 1855-o segimin uani aganchengania, uni cholono namen dal·roroahagipa ramram ong·ani aro an·tangko onatani gisikni namgipa gunrangko namen name mesokani gimin, an·ching uko chu·gimikan on·gija dongna man·ja:

GSAM 316.1“Anga angni Isolko mitelaha, maina ka·mao dongengmitingo, Ia katchaatgipa kamko angna on·ahachim; Aro angni poidorang jokani bon·ahaon, Anga ja·sku dipane salgichiko niaha.
GSAM 316.2“Ia chongipa kamko darangba da·aleke, Uni gualanirangko mikkangchi mesokjachina; Ian neng·nikani pindapani ning·o atchiaha, Aro dukni ripam ning·o dal·roroaha.”

GSAM 316Neng·nikanirangni Gisepo Nokdangko Salani

GSAM 316.3April 1852-o Gipi White Saratoga Springs-oni Rochester, N.Y.-ona jitaha. Ia songjinmaon, 124 Mt. Hope Avenue-o, uamang skanggipa changna ra·chakgimin bosturangchi ong·gija an·tangtang bree ra·gimin bosturangchi nokdangko salna a·bachengaha. Indiba lekkako somoi kri chapa ka·na aro indake bebeko pilakchinan gipatatna gita, chapa ka·ani kamko chu·sokatna uamangni ska salani inditan bilakachim je uamang janggi tangani bang·a ramramgipa namroroanirangko an·tangtangna jegalaha.

GSAM 316.4Ia somoio uamang maidake nokdangko salna a·bachengaha, uko Mrs. White-ni S. Howland-ni nokdangna April 16, 1852-o segimin ka·mao on·gipa an·tangtangni chition na·simang poraina man·gen:—

GSAM 316.5“Chinga iano Rochester-o da·osa songdongna tarienga. Chinga gitcham nok ge·sako bilsio $175-na bhara ra·aha. Chapa ka·ani kolko chinga nokning·on donaha. Iani gimin ong·jachimode, chinga kam ka·ani kuturina bilsio $50 gamna nanggenchim. Na·simang chingko nie, chingni nokni bosturangko nikna man·genchimode, na·simang minikigenchim. Chinga tusiani palang gitcham ge·gniko ge·prakna sent 25 dake breaha. Angni segipa angna gitcham choki ge·dokko ra·baaha; uarangoni ge·gniba apsan ong·jachim, aro uarangna ua dolar sa gamaha. Adita ja·mano ua angna asongchakani bak donggijagipa gitcham choki ge·briko on·taiaha; ua gimikkon ua sent 62 gamaha. Uarangni bolni bidingrang rakachim, aro anga rakgipa ba·rachi uarangni asongchakani bakrangko dakenga. Makkonni dam inditan chua je chinga uko breja, aro alukoba brena tangka chu·ongja. Makkonni palo chinga bitechi tarigimin su·utaniko jakkala, aro aluni palo salgumko jakkala. Chinga skanggipa cha·anirangko moida donani bangbanggipa pipa ge·gnini kosako don·gimin wa·alni ku·chilko chipani tektani kosako cha·aha. Isolni kam mikkangchi re·angna man·ode chinga nanggiparangko man·gijani dukko chakchikna sikgiparang ong·a. Ia biapona chingni re·baanio Gitelni jak dongaha ine chinga bebera·a. Kam ka·na bang·bea biap donga, indiba kam ka·giparang bang·ja. Batanggimin Neng·takani salo chingni meting namen namaha. Gitel An·tangni dongpaanichi chingko gital bil on·aha.”

GSAM 317Bebera·giparangni Jaksramani

GSAM 317.1May 6, 1852-o Rochester-o chapa ka·gimin Niani aro Aga·ata-ni skanggipa lekkani song·anio, Saratoga-oni Rochester-ona jitani gimin Gipi White indine aganaha:

GSAM 317.2“Jong-giparang ia lekkako rakkiangna chingni ka·dongsoanina bateba tangka on·aha. Aro Saratoga Springs-oni jitani aro ia songjinmao lekkako chapa ka·na a·bachengani chingni koros bang·oba, chingni gro dongja.”

GSAM 317Kam Ka·giparangni Boli On·ani

GSAM 317.3Oktobar 14-ni song·gipa 12-o kamni gimin chongipa agananio an·ching indine poraia:

GSAM 317.3“Indioba, ia a·selni gimin chapa ka·ani nok gro dongja: batanggimin ja dokna iano kam ka·gipa Jong-gipa Belden aro Jong-gipa Stowell uamangni cha·anina batgipa bang·gijako mangmang man·aha. Apsan kamo donggipa gipinrangba uamangna bate man·jaha. Da·o donggipa bebe-ni pilak ripengrangna, man·gimin tangkani chu·onggijaniko gapatna dakchakani katchaani ong·chongmotgen, maikai Niani aro Aga·ata-ko chapa ka·anio rake kam ka·giparang, mongsongbate chinga donggijani somoio aro saani gisepo kam ka·giparang, chu·onggipa janggi tangani dakchakaniko man·na amgen.”

GSAM 317Rochester, N.Y.-o Bebera·aniona Napbagiparang

GSAM 317.41852-ni ding·kari somoio, Rochester-o chapa ka·ani kam nambee a·bachengmanahaon, Gipi White aro uni jik gure aro garichi ja gittamna ramasong re·ongkatangaha. Uamang salaramchi Bangor, Maine-ona kingking re·angaha, ramadilgil metingrangko ong·ate aro dingtang dingtang biaprango donggipa Neng·takani salko rakkigiparangko grongna re·angaha. Uamang re·bapilna skang, September 26-oni a·bachenge, Gipi J. N. Andrews 124 Mt. Hope Avenue-o kattarangko sulsul skiprakaha. Ia somoio Skanggipa salko manigipa Adventistrang sakchet Da·o donggipa bebe-ko ra·chakaha; ia ki·tapko segipaba ua sakchetni saksa ong·achim.

GSAM 318Oswald Stowell An·sengaha

GSAM 318.1Oktobarni Sukrobar attam sal sao Gipi White aro uni jik salaramchi songre·aoniko noktangona sokbapilaha. Gnigipa salo (Neng·takani salo) an·ching uamangko Neng·takani salni metingo skanggipa changna nikaha. Ua metingni somoio chapa ka·ani kolko saligipa Oswald Stowell, ka·sopko pindapgipa be·enni ding·a saknaani sabisichi namen saengachim, aro uni daktar uko sigen ine watgalmanahachim. Daktar una “mamungkoba dakna man·jaha” ine aganaha. Olakiani somoio Oswald sambao donggipa kuturio dongachim, aro be·eno namen saknaengachim. Meting bon·ahaon ua an·tangna bi·china mol·molaniko watataha. Gipinrang baksa angkoba bi·anio bak ra·pachina okamaha. An·ching uni palangni sambao ja·sku dipanaha, aro bi·engmitingo Gipi White “Gitelni bimungo” uni kosako toko nong·aha. Isolni Gisikni dongpaaniko ma·sina man·achim, aro ua rang·sanan an·sengaha. An·ching bi·aoni chakatahaon ua palango asongengachim, skang namen saknaenggipa an·tangni oksiprangko dokdokie, “Anga chu·gimikan an·sengaha. Knalo anga jakchi saliani chapa ka·ani kolko salina man·gen,” ine aganengachim. Iani sal gni ja·mano ua uko salichongmotaha.

GSAM 318Rochester-ni Dolni Mikkango Mrs. White-ni Nikani

GSAM 318.2Jong-gipa Stowell-ko an·sengatgipa apsan pattianian dal·bata toanio Mrs. White-ni kosakoba ga·akaha. Gipi White una nie pil·e indine aganaha, “Ellen Nikani-o donga; indake dongengon ua rang·sitja. Na·simangoni saoba ia ong·aniko an·tangtangna u·ichongmotna skaode, uko sandie nina na·simang jakgitel ong·a.” Ua indake konta 1 minit 20 mang Nikani-o dongaha. Ua obosthao dongengmitingo ua kattarangko, aro basakobade rongtalbee katta chu·gimikrangko aganaha; indiba namen sepangoniko name sandioba uni be·eno rang·sitaniko mamungkoba nikna man·jaha.

GSAM 319Dongpagijagipa Saksa Mondolini Mandeni Dakbewalni Gimin Nikani

GSAM 319.1Mrs. White ia Nikani-oni ong·katbahaon, uni nikgiminni gimin Saki on·aniko on·aha. Gipi White aro uni jik salaramchi songre·aoni re·bapilna skang, an·chingni dolni saksa songjinmako wate Michigan a·songo badingani kamna songre·engachim. Uni gimin ua ia metingo dongpajachim, aro Gipi White ba uni jik saksakoba nikkujaengachim. An·tangni Nikani-ko aganengon, Mrs. White gipin kattarang baksa mande saksani gimin nikgiminikoba aganaha. Ua mande songre·e nokoni chel·ao dongengmitingo Isolni niam aro Neng·takani salni gimin bang·en aganachim, indiba ua somoion ge·etanirangni ge·sako pe·engachim. Ua mande, an·tang pangnaba grongkujaenggipa ong·a ine ua aganaha; indiba uni obosthako an·tangna oe mesokahani gimin, badiaba somoio uko nikgen ine ua bebera·aha. Indioba, an·chingni doloni saksaba ua mande an·chingni u·igipa saksaba ong·gen ine chanchijachim.

GSAM 319.2Kosako janapgimin Nikani-ni anti 6 mang ja·mano, skang janapgimin Jong-gipa Michigan-oni re·bapilaha. Mrs. White uni mikkangko nikon, Adatangrangni saksana indine aganaha, “Anga Nikani-o nikgimin, je mande gimin na·simangna aganahachim, ua mande ian.” Uni jik aro gipin adita manderangni mikkango ia Jong-gipana Nikani-ko aganengon, Mrs. White una indine aganaha, “Nathan Daudna agangimin gita, ‘Ua mande na·an ong·a.’” Unon Katchinike aganani on·ani-chi uamangni paprangna manengako man·ahaon mitam manderang maiko dakgen ine Paul aganahachim, ua tik ukon dakaha: “Indiba pilakan katchinike aganode, aro bebera·gijagipa ba u·igijagipa saksa napbaode, pilakni katta ua papigipa ong·a ine uko ma·siata, aro pilakni katta uko bichal ka·a; indake uni ka·tongni donnugimin kattarangko parakatgen; aro ua mikkangchi tuchikopile Isolko olakigen, aro Isol na·simangni gisepo bebe ong·e donga ine agangen.”3 Mrs. White uni namgija dakgiminrangko agananiko knamanahaon, ia Jong-gipa an·tangni jikni mikkango ja·sku dipanaha, aro mikchi baksa una aro uano donggipa adita manderangna, “Isol bebe ong·e na·simang baksa donga,” ine aganaha. Unikoa ua Michigan-o dongengmitingo snigipa ge·etaniko pe·gimin uni dakbewalko chu·gimikan ku·rachakaha; uan mail 500-na bate chel·ao ua kam ong·enggipa somoion parakgimin ong·achim.

GSAM 320.1Indake anti aditasani gisepo an·ching Saki on·anirang-ni bebena bilakgipa sakiko man·aha. Uarang mandeni bilna batgipa badiaba bilchi ong·aha ine aganna mangmang an·chingko diljaha; indiba uarang mandeni papko mamung jajaani gribe rongtalbee manenggipa a·bachengramoniko ong·katbaaha ine agannaba dilaha.

GSAM 320Uriah Smith Niani aro Aga·ata-ni Kam Ka·ani Nok Baksa Nangrimaha

GSAM 320.2Niani aro Aga·ata-ni bak 3-ko chapa ka·enggipa somoion Uriah Smith Neng·takani salko manina a·bachengaha, aro Niani aro Aga·ata-ni kam ka·ani nok baksa nangrimaha; uano ua bang·bea ru·utgipa bilsirangna segipa aro lekkako name tarigipa ong·aha. Ua lekkani kosako chapa ka·gimin uni skanggipa seani “Somoi aro Katchinike Aganani Mikrakani Ku·rang” minggipa poido ong·achim; ua March 17, 1853-o ong·katbaaha.

GSAM 320.3Gipi Smith September 10-oni 12-ona, 1852-o Washington, N.H.-o ong·atgimin kumonggrikanio Gittamgipa sa·greni katta-ko skanggipa changna knaha. West Wilton-ni noktangona re·bapile, ua knagimin kattarangko name poraie sandiaha, aro December 1852-ni skanggipa Neng·takani salo snigipa salko manina a·bachengaha. Ua May 3, 1853-o Rochester, N.Y.-o Niani aro Aga·ata-ni kam ka·ani nok baksa nangrimaha. Uano ua aro uni adatang Annie, skul dal·gipao bilsiprakna $1,000 aro cha·aniko man·e skiani palo, cha·ani aro ganani ba·rarangnasan kam ka·aha. Iarang Gittamgipa sa·greni katta-ni a·bachenggipa salrango uni kamko mangrakatna dakgimin boli on·anirangni mitam bimangrang ong·achim.

GSAM 320Toromni Kamo Donggipa Dangdikgipa Dake Don·gimin

GSAM 320.41863 bilsini samtangtango Gipi Smith mande jinmani mikkango aganna uni man·gimin on·aniko jakkalna a·bachengaha. 1866-o uko nama kattani Toromni kamo donggipa dangdikgipa dake don·aha. Unikoa ua Atlantic-oni Pacific-ona dingtang dingtang a·songrango A·tipni meting-rango aro A·songni mondolirangni kumonggrikani-rango bang·en kam ka·aha; aro uni an·tangni mondoli ong·gipa Battle Creek mondolioba mes nirikgipani kamko ka·aha. Battle Creek Kollejko a·bachengani ja·mano, ua uani Sastro skiani bako komiba bang·iba skiaha. Niani aro Aga·ata-ni kamna ua 1894 bilsio Atlantic Sagal Dal·gipako batsote, Europe-ni dingtang dingtang a·songrangona re·angaha. Syria-o dongengmitingo ua ding·a saako man·aha, aro ua saaoni ua pangnaba chu·gimikan an·sengpiljaha.

GSAM 321Bilsi 50-ni Neng·gija Kam Ka·ani

GSAM 321.11853-oni 1903-ona, ritchasa bilsini adha somoina, Gipi Smith Re·baani Niani aro Neng·takani Salni Aga·ata-ko name tariani kam baksa pilak somoion ong·nasipile nangrimangaha; aro ua somoini bang·bata bakna lekkako name tariani kam gimikko ua an·tangan saliaha. Uni siani saloba, be·enko wilatna man·gijagipa rang·san sabisichi ua ga·akatahako man·engon, chapa ka·na tarisogimin searangko ra·e ua kam ka·ani nokona re·angengachim. Ua mondolini ki·taprangna nangchongmotgipa adita ki·taprangkoba seaha. Ia ki·taprangni gisepo Daniel aro Parape·ani Gimin Chanchianirang, Mandeni Ong·tela Bimang aro Bon·kamani, Rongtala ba toromni biap aro Sal 2300-ni Gimin Dal·atgimin Ki·tap, Jatrangni Aiao Inmanani, aro Da·ororoni Me·mangrang Baksa Agangrikani donga. Ia ki·taprangni skanggipako bang·baten salni lekkako name tariani aro kam ka·ani nokni kamrang matchotani ja·mano, walni konta 9-oni waljatchiona kingking seahachim.

GSAM 321Gipi Smith-ni Siani

GSAM 321.2Uni janggi tangani namgni gnanggipa aro name jakkalgimin ong·achim. March 6, 1903-o Jisuo tusiaha, aro ua uni kamrangoni neng·takenga. Indiba uni gimin bebe ong·e indine aganna man·a, “Uni kamrang uko ja·rika,” aro siahaoba ua da·okoba aganengkua.

Notes

  1. Gitrang 50:5, 6. ↩
  2. Jak 240. ↩
  3. 1 Korinthirangna 14:24, 25. ↩

Note

Back