Adventist Pioneer
Library
aplib.orgIlabhulali
Uluhlu lokuqukethwe
12 / 31
12 / 31

Isahluko 9 — Isikhathi Sokulinda

John Norton Loughborough

GSAM 148.1“Ngalesosikhathi umbuso wezulu uzafaniswa lezintombi ezilitshumi, ezathatha izibane zazo, zaphuma ukuyahlangabeza umyeni. Ezinhlanu zazo zazihlakaniphile, ezinhlanu ziyiziwula. Eziyiziwula zathatha izibane zazo, kodwa kazithathanga amafutha lazo; kodwa ezihlakaniphileyo zathatha amafutha ezitsheni zazo kanye lezibane zazo. Kwathi umyeni esalibele, zonke zozela zalala.”1

GSAM 148.2UKhristu ungumyeni womzekeliso.2 Ngakho ukuphuma ukuyahlangabeza umyeni kumele kutshengise umnyakazo wabantu beNkosi ukuyahlangabeza uKhristu ekufikeni kwakhe, ngoba indaba yentshumayelo ekuMathewu 24 lo-25 yikuza kweNkosi. Ilizwi leNkosi liyisibane.3 Zonke izintombi zathatha izibane zazo. Ubuwula bezinye izintombi babusekuthatheni imfundiso yeqiniso kuphela, zingelakho lokho kuzinikela ngenhliziyo yonke eNkosini okwakuzakhulisa izithelo zikaMoya enhliziyweni yokholwayo. Lumsebenzi umelwa ‘ngamafutha ezitsheni zazo’ emzekelisweni. Ukulibala komyeni kumele kutshengise ukudumala okuthile kulabo abaphuma belindele ukuhlangabeza iNkosi yabo.

GSAM 148Isikhathi Umzekeliso Osebenza Kuso

GSAM 148.3Ibala elithi ‘ngalesosikhathi,’ eliqalisa umzekeliso, lisinika umkhondo wesikhathi osebenza kuso. Lilandela masinyane lokho okwakutshiwo esahlukweni esedlulileyo, hatshi ngemva kokuza kwesibili kweNkosi, kodwa ngemva kokumenyezelwa komzekeliso womkhiwa, omemezela ukuthi ukuza kukaKhristu ‘kuseminyango,’ lokuthi isizukulwana sesifikile esingayikudlula uKhristu ngokwakhe engakabonakali emayezini ezulu. Usebenza futhi ngesikhathi lapho ezinye izinceku ebezihambisa umlayezo zisithi ezinhliziyweni zazo, ‘INkosi yami iyalibala ukuza kwayo; ziqalise ukutshaya ezinye izinceku ezikanye lazo, lokudla lokunatha lezidakwa.’

GSAM 149Ukutshaya Ezinye Izinceku Ezikanye Lazo

GSAM 149.1Laba bebeyizinceku ‘ezikanye lazo,’ bememezela umlayezo munye ngokuzwana; kodwa khathesi abanye babo bafulathela lokho abakufundisayo, ‘batshaye’ ezinye izinceku ezikanye labo ezinika ‘ukudla ngesikhathi esifaneleyo’—zimemezela ukulungiselela okudingekayo ukuze kuhlangatshwe leNkosi esizakuza masinyane. ‘Batshaya’ ngendlela efanana laleyo okwacebiswa ngayo ukutshaya uJeremiya. Abantu bathi, ‘Wozani, simtshaye ngolimi, singalaleli lelilodwa lamazwi akhe.’4 Ngokunjalo lezi zinceku zaqalisa ukufundisa ngendlela evimbela umsebenzi wezinceku ‘ezithembekileyo.’ Leliqembu likhulunyiswa njalo: ‘Ngakho khumbula ukuthi wamukela wezwa njani, ubambelele, uphenduke. Ngakho uba ungaphaphami, ngizakuza kuwe njengesela, kawuyikulazi ihola engizakuza ngalo kuwe.’5

GSAM 149.2Umzekeliso wezintombi usebenza ngesikhathi lapho izinceku ‘ezikanye lazo’ zifulathela umlayezo wokuza kweNkosi okuseduze, ‘ziqalise ukutshaya.’ Ziqalisa lokwenza okunye—‘ukudla lokunatha lezidakwa.’ Zihlanganyela emadilini lalabo abafuna ukusuthisa izinkanuko zabo zokudla. USolomoni wathi ngabanjalo, ‘Ungabi phakathi kwabanathi bewayini, phakathi kwabadla inyama ngobuhwaba; ngoba isidakwa lesihwaba bazakuba ngabayanga.’6

GSAM 149Ukudumala Kokuqala

GSAM 149.3Khathesi kungabuzwa ukuthi, ‘Kuyini okwenzakala kulabo ababelindele ukuza kweNkosi okuhambelana lamazwi la?’ Kwaba lezenzakalo ezivumelana ngokupheleleyo lesiprofetho. Labo ababenika umlayezo kwaze kwaba nguMabasa 1844 basebenza phakathi kwamabandla, labafundisi bamabandla atshiyeneyo bahlanganyela emizameni yabo. Ngokunjalo babeyizinceku ‘ezikanye lazo.’

GSAM 150.1Labo ababenika umlayezo bafundisa ukuthi insuku ezingu-2300 zikaDanyeli 8:14 zazizaphela lomnyaka wamaJuda ka-1843, okwakuzakuba semnyakeni wethu ka-1844. Bamemezela ukuthi ihola lokwahlulela kukaNkulunkulu lalizafika ekupheleni kwalesosikhathi. Wonke amabandla elizweni ngalesosikhathi ayekholwa ukuthi usuku lokwahlulela lwaluzaqaliswa yikuza kwesibili kweNkosi yethu. Ngakho kubonakala lula ukuthi ama-Adventist acabanga ukuthi iNkosi yayizakuza ekupheleni kwalesosikhathi sesiprofetho. Bathi, ‘Lesosikhathi singaphela ngenyanga, mhlaka 21 kuMbimbitho 1844, ekupheleni komnyaka wamaJuda wemvelo ka-1843.’ Ngakho bakhangela ekupheleni kukaMbimbitho loba ekuqaleni kukaMabasa 1844 njengesikhathi uMsindisi ayengafika ngaso.

GSAM 150Izinceku Ezimbi Ziyavela

GSAM 150.2Lapho ukuphela kukaMbimbitho sekufikile kwadlula, iNkosi ingafikanga, labo ababeke basebenza lezithunywa zeNkosi, kodwa bengazange banikele impilo zabo ngokupheleleyo emlayezweni ngenhliziyo yonke, bawuphikisa, baqalisa ukumelana lomsebenzi, benza konke ababelamandla okukwenza ukuvala indlela yalabo ababelokhu beqhubeka befundisa imfundiso yokuza kweNkosi okuseduze lomlayezo wehola lokwahlulela. ‘Ezinhliziyweni zabo’ bathi, ‘INkosi yami iyalibala ukuza kwayo.’ Ngemilomo yabo basebefundisa ukuthi umhlaba wonke kumele uphenduke iNkosi ingakafiki; ukuthi wonke amaJuda kumele abuyele ePalestina, amise inkonzo yawo yethempeli eJerusalema, uMesiya engakafiki. Abanye baze bafundisa ukuthi ukuza kukaKhristu ‘yikuza komoya,’ lokuthi kwakwenzakala ekuphendukeni komuntu, lasekufeni kwabantu bakhe.

GSAM 151Ukunika ‘Ukudla Ngesikhathi Esifaneleyo’

GSAM 151.1Lapho laba bephendukela ezinye izinceku ezikanye labo ngalindlela, labo ababesabambelele ekukholweni babebizela abakholwayo ndawonye emaholweni lasezixukwini zezihlahla, bebanika ‘ukudla ngesikhathi esifaneleyo’—bebatshengisa ukuthi izibonakaliso zezikhathi lesiprofetho esigcwalisekileyo kwakumemezela, njengakuqala bengakadumali, ukuthi ukuza kukaKhristu ‘kuseduze, kuseminyango.’

GSAM 151Amadili Emabandleni

GSAM 151.2Besakwenza lokhu kwaqalisa okwakungaziwa ngaphambili emabandleni amaProthestani—ukubizela abantu ndawonye endlini yebandla ukuze benze amadili ‘lokuzithokozisa ngemidlalo.’ Bonke ababefuna ukuza babenxuswa ukuthi bazohlanganyela labo ekudleni kwabo okumnandi.

GSAM 151.3Okwakuqala esake sakuzwa ngalokhu eMelika kwakusenyangeni kaNkwenkwezi 1844, ngemva nje kokudumala. Kwenzakala kanje: Ngesikhathi uWilliam Miller eseholo eRochester, N.Y., efundisa ekhuthaza amakhulu ambalwa ama-Adventist, ewatshela ukuthi, ‘Sisesikhathini sokulinda esikuMathewu 25; bambani ukholo lwenu luqine; masinyane sizakuba lokukhanya okwengeziweyo ngalindaba,’ kwahlelwa ‘idili’ endlini engaphansi komhlabathi kwenye yezindlu zokukhonzela ezinkulu kakhulu eRochester. Kwabuthana ixuku labantu, amalunga ebandla labangakholwayo, kwathi ngesikhathi umongameli wesikolo sabafundisi ethokozisa ixuku ngokuhlekisa ngoWilliam Miller, babathengisela izimbaza, uchago oluqandisiweyo, amaswidi, langamasenti angamatshumi amabili lanhlanu ibhukwana elincinyane elalilungiswe yileyondoda. Ibhuku lalibizwa ngokuthi Ukuvezwa Obala Kwezimfundiso Zabalandeli BakaMiller.

GSAM 151.4Kungakapheli amaviki amabili kusukela ngalesosikhathi, elinye ibandla kulelodolobho lahlela ‘idili’ eholo lomphakathi, lihlawulisa amasenti angamatshumi amabili lanhlanu okungena, linxusa bonke abathandayo ukuthi beze badle labo izimbaza zabo, uchago oluqandisiweyo, ikhekhe lamaswidi. Khonapho ngalesosikhathi kwaqalisa lokhu kwenza amadili kwalezinsuku emabandleni, osekukhule kwaba ‘yimibuthano ehlanyayo,’ ‘izikhwama zokudobha izipho,’ ‘amachibi okudoba izipho,’ ‘imibuthano yokuqabulana,’ lokunye okunjalo. Lomkhuba wamadili emabandleni usukhule kwaze kwaba sokuthi indlu yebandla yalezinsuku kayibalwa njengefaneleyo ingelakhitshi, indlu yokugcina ukudla lendlu yokudlela. Lesisimo yiso esaqalisa ‘esikhathini sokulinda,’ njengokutshengiswa emzekelisweni.

GSAM 152.1UWm. Miller ngokwakhe ukhuluma ngesenzakalo saseRochester ngamazwi alandelayo:

GSAM 152.1“Omunye wabafundisi abaleziqu zobudokotela kwezenkolo eRochester, uMnumzana _____, webandla le-_____, wabhala ibhukwana eliphikisa izimfundiso zabalandeli bakaMiller, wabizela abanumzana bakhe labomama endlini yeNkosi, wenza idili elikhulu lezimbaza lokunye ‘ukudla kwemikhosi,’ kwathi njengoBhelishazari banatha ikhofi labo letiye, badla izibiliboco zabo ezidulayo, bathengisa uchago lwabo oluqandisiweyo lamaswidi, lebhukwana lakhe eliphikisa ukuza kwesibili koMsindisi othandekayo.

GSAM 152.2“Ngobusuku obandulela ukusuka kwami, omunye walabanumzana abangabafundisi wenza idili lokudla endlini yomphakathi, loba eholo, wathengisa amathikithi akhe, uchago oluqandisiweyo lamaswidi, njengalowo osekukhulunywe ngaye. Ngathokoza ukuzwa ukuthi amanye amabandla ezinhlanganweni ezehlukeneyo ayengawavumi amadili anjalo aseBhabhiloni; njalo ngiyathemba enhliziyweni yami ukuthi kayisiwo wonke lawo mabandla amaqembu ezehlukeneyo azafunyanwa ‘esidla enatha lezidakwa’ lapho uKhristu efika. Kuyangimangalisa ukuthi laba banumzana abangabafundisi kabaziboni esibukweni selizwi likaNkulunkulu; njalo ngingabacebisa ukuthi bafunde uLukha 14:12-14; uMathewu 24:48-51; uLukha 13:25-28; u-2 Phetro 2:13; uJuda 10-21. Impela lezi yizikhathi zokucina.”

GSAM 152.3Aluba uMdala Miller wabona lokho amabandla asekungenile kusukela lapho, emadilini awo okuqoqa iminikelo, ‘lamakhekhe okuqagela ukuthi iringi ingaphi, imibuthano yokuqabulana ngamasenti alitshumi, imibukiso yabobabhemi, imibuthano ehlanyayo, inkatho engcwele,’ lamanye amalungiselelo emidlalo yenhlanhla, lokunye okunjalo, wayezahlehla ngokwesaba okungcwele.

GSAM 152Isikhathi Sokulinda

GSAM 152.4Ama-Adventist athola induduzo eqinisweni eliseMibhalweni lokuthi lapho kumenyezelwa ukuza kweNkosi okuseduze, kwakuzahambisana ‘lesikhathi sokulinda.’ Lokhu akubona emazwini oMsindisi wethu akuMathewu 25:5, 6, lakuHabakhukhi 2:1-3.

GSAM 153.1Mayelana lokuma kwawo entwasahlobo ka-1844, sicaphuna ku-Isikhalo Saphakathi Kobusuku lwamhla ka-9 kuNkwenkwezi 1844:—

GSAM 153.2“Sesidlulile lapho izikhathi zesiprofetho ezazibonakala ziphela khona, sibekwe esimeni uNkulunkulu abona ngaphambili ukuthi abantwana bakhe babezabekwa kuso ekupheleni kombono; njalo asilungiselela ngomprofethi uHabakhukhi, lapho esithi, ‘Ngizakuma endaweni yami yokulinda, ngizimise phezu komphotshongo, ngilinde ngibone ukuthi uzakuthini kimi, lokuthi ngizaphendula ngithini lapho ngisolwa,’ loba njengokulotshwe eceleni kwekhasi, ‘kuphikiswana lami.’ ‘INkosi yangiphendula yathi: Bhala umbono, uwenze ucace ezibhebheni, ukuze owufundayo agijime. Ngoba umbono usesengowesikhathi esimisiweyo, kodwa ekupheleni [kwezikhathi zesiprofetho] uzakhuluma, ungakhulumi amanga; loba ulindisa [ngale kokuphela kwazo okubonakalayo], uwulindele; ngoba uzakuza impela, [ekugcwaleni kwezikhathi zesiprofetho, lapho] ungayikulibala khona.’7

GSAM 153.3“Ukuthi lesisixwayiso siqondene lesikhathi samanje kuyabonakala ekusicaphuneni kukaPawuli kumaHebheru 10:36-39: ‘Ngoba liyaswela ukubekezela, ukuze kuthi selenzile intando kaNkulunkulu, lamukele isithembiso. Ngoba kuseseyisikhatshana nje, lozayo uzakuza, kayikulibala. Kodwa olungileyo uzaphila ngokukholwa; kodwa uba umuntu ehlehlela emuva, umphefumulo wami kawuyikuthokoza ngaye. Kodwa thina kasisibo abahlehla baye ekubhujisweni, kodwa singabokukholwa kuze kusindiswe umphefumulo.’

GSAM 153.4“Siyakholwa ukuthi sisesikhathini uMsindisi akhuluma ngaso, lapho umyeni elibala (uMathewu 25:5)—okwakumele umbuso wezulu ufaniswe laso,—lapho ‘leyo nceku embi [ngemva kokuba isikhathi sibonakale singagcwalisekanga] izakuthi enhliziyweni yayo: INkosi yami iyalibala ukuza kwayo, iqalise ukutshaya ezinye izinceku ezikanye layo, lokudla lokunatha lezidakwa,’ njalo iNkosi ifike ‘ngosuku engayilindelanga ngalo.’

GSAM 154.1“Siyakholwa ukuthi khathesi sisesikhathini uPhetro akhuluma ngaso, lapho ‘ukwahlulelwa kwabo osekumisiwe kusukela endulo kungalibali, lokubhujiswa kwabo kungozeli;’ lapho babezangenisa ‘ngasese izimfundiso zokuduka ezibhubhisayo.’8 UPhetro uthi laba babezabakhona, njengalokhu kwakukhona abaprofethi bamanga lapho iMibhalo ilotshwa. Ngakho njengalokhu abendlu ka-Israyeli bathi, ‘Insuku ziyalulwa, lawo wonke umbono uyehluleka,’9 ngokunjalo kwakumele kube lesikhathi lapho isikhathi esasimisiwe sasizabonakala sesidlulile, ukuze abahleka usulu abaku-2 Phetro 3:4 babuze bathi, ‘Singaphi isithembiso sokuza kwakhe?’ bazikhohlise ngokuthi ‘zonke izinto ziqhubeka zinjengalokhu zazinjalo kusukela ekuqaleni kokudalwa.’

GSAM 154.2“Siyakholwa ukuthi kwakungenxa yokulibala okunjalo kombono ukuthi umphostoli uJakhobe wathi, ‘Ngakho bekezelani, bazalwane, kuze kube sekuzeni kweNkosi;’ ‘lani bekezelani; qinisani inhliziyo zenu, ngoba ukuza kweNkosi sekusondele.’ Njalo wathi, ‘Khangelani, uMahluleli umi phambi komnyango.’

GSAM 154.3“Njalo siyakholwa ukuthi uMsindisi wethu esazi ngaphambili ukuthi isikhathi esilindelweyo sizadlula wasixwayisa esahlukweni selitshumi lambili sikaLukha, esithi, ‘Kakube zibotshiwe inkalo zenu, lezibane zenu zivutha; lani libe njengabantu abalindele iNkosi yabo lapho izabuya emtshadweni, ukuze nxa ifika iqoqoda bayivulele masinyane.’10 Ukulinda kutsho ukuthi isikhathi sesidlulile, ngoba singakafiki lesosikhathi kasilindi. Ngakho iNkosi yethu iyengeza isithi, ‘Zibusisiwe lezo zinceku iNkosi ezakuthi ekufikeni kwayo izifice zilindile.’

GSAM 154.4“Sizaqhubeka, nxa uNkulunkulu ethanda, simemezela sisithi, ‘Khangelani, umyeni uyeza; phumani liyomhlangabeza;’ lokuthi, ‘Ihola lokwahlulela kwakhe selifikile.’ Siyethemba njalo ukuthi kasiyikwehluleka ukuqhubeka simemeza kakhulu emhlabeni lasebandleni, ukuze bavuke ezingomeni zabo ‘zokuthula,’ balalele ukunxusa kukaNkulunkulu okugcwele isihawu. Sihlose ukuqhubeka silindele siphaphamele ukuza kweNkosi, sikholwa ukuthi sekuseduze kakhulu lathi.”

GSAM 155Ukuvikelwa Komsebenzi Wabo

GSAM 155.1Indlela ama-Adventist ayebona ngayo umsebenzi wawo ngaphambi komhla ka-21 kuMbimbitho 1844, langemva nje kwalolosuku, ingaqondwa kuhle ngokufunda amazwi alandelayo, athethwe esihlokweni esilesihloko esithi ‘Ukuvikelwa,’ kuMemezeli Wokuza lomhla ka-13 kuLwezi 1844, owawushicilelwa nguJ. V. Himes, uS. Bliss, lo-A. Hale:—

GSAM 155.2“Kasiphangisanga ukwamukela imibono yethu. Siyakholwa ukuthi sasingabadingi beqiniso abathembekileyo labaqotho. Salalela umlayo woMsindisi wethu wokuhlola iMibhalo. Kasithembelanga ekuhlakanipheni kwethu; kodwa sakhangela kuNkulunkulu ukuze asihole asiqondise, sazama ukuzibeka e-alithareni lakhe, sithemba ukuthi uzaqondisa izinyathelo zethu kuhle. Sahlola zonke izizatho ezazilethwa ukuphikisana lathi, silesifiso esiqotho sokwazi iqiniso lokulondolozwa ekudukeni; kodwa kumele sivume ukuthi imibono eminengi eyehlukeneyo yabaphikisi bethu yamane yasiqinisa emibonweni yethu. Sabona ukuthi, loba sasiqondile loba siphambanisa, abaphikisi bethu babengeke baqonde; njalo babengavumelani bodwa. Izizatho zomunye lomunye zazibuthakathaka kakhulu njalo zingezobuntwana, baze baphoqeleka ukuthi bahlale bechitha lokho ababekwenzile bona ngokwabo; njalo ngemibono yabo ephikisanayo lephambanayo batshengisa ukuthi, loba babeyibona njani imibono yethu, babengayethembi imibono yomunye lomunye. Phezu kwalokho, kwakungelaphuzu eliyinsika kuyo yonke imfundiso yethu lapho esasingasekelwa khona ngomunye loba ngabanye balabo ababezama ukuphikisa ukuthi iNkosi isizakuza masinyane. Lapho thina sasisekelwa yikuzwisisa iMibhalo ngokutsho kwamazwi ayo, abaphikisi bethu bazama ngeze ukutshengisa ukuthi iMibhalo kayifanelanga ukuzwisiswa ngokutsho kwamazwi ayo, lanxa sonke isiprofetho esesigcwalisekile sagcwaliseka kuzo zonke izingxenye zaso ezincinyane ngokutsho kwamazwi aso uqobo.

GSAM 156Ukudumala Kuyachasiswa

GSAM 156.1“Kodwa isikhathi—umnyaka ka-1843, umnyaka wamaJuda—sadlula, sadumala ngokungayiboni iNkosi ebuhleni bayo. Bonke ababesiphikisa ngobuqotho bacabanga ukuthi konke okwakwehlukanisa ukholo lwethu kolwabanye kwasekutshengiswe ukuthi kungamanga; lokuthi thina, njengabantu abathembekileyo, kwakumele silahle yonke imfundiso yethu. Ngakho bamangala besibona silokhu sibambelele ethembeni lethu, silokhu silindele iNkosi yethu.

GSAM 156.2“Kodwa thina ekudumaleni kwethu kasibonanga sizatho sokudangala. Sabona ukuthi iMibhalo itshengisa ukuthi kumele kube lesikhathi sokulinda, lokuthi ngesikhathi umbono ulibala kumele siwulindele. Sabona futhi ukuthi ekupheleni komnyaka isikhathi sasingeke siphele ngokupheleleyo, lanxa sibala ukuthi ukubala kwethu izikhathi kwakuqondile; lokuthi zazingagcwaliseka kuphela ngesinye isikhathi kulumnyaka okhona; kodwa savuma emhlabeni obala langokupheleleyo ukuthi sasiphambanisile ngesikhathi esiqondileyo esasisilindele ngokwethemba okukhulu kangaka; kodwa lanxa sasiphambanise ngalindlela, siyasibona isandla sikaNkulunkulu kulindaba. Siyabona ukuthi wasebenzisa lokho kumemezela njengesixwayiso emhlabeni, lesilingo ebandleni. Kwabeka abantu bakhe esimeni sokulindela. Kwabiza kwakhupha labo ababezimisele ukuhlupheka ngenxa yebizo lakhe. Kwatshengisa ukuthi ngobani ababemukela isimemezelo sokuza kweNkosi njengezindaba zentokozo enkulu, lokuthi ngobani ababesiwuzwa njengomsindo abangawufuniyo ezindlebeni zabo. Kutshengise izidalwa zonke ukuthi ngobani ababengakwamukela ukubuya kweNkosi, lokuthi ngobani ababengayilahla ekuzeni kwayo kwesibili, njengalokhu amaJuda ayenza ekuzeni kwayo kokuqala. Njalo sikubona njengesinyathelo ekugcwalisekeni kwenjongo kaNkulunkulu, ngalolu ‘suku lokulungiselela kwakhe,’ ukuze akhokhele abantu ababezakudinga intando yeNkosi kuphela, ukuze balungele ukuza kwayo.”

GSAM 157IMBALI YOMNYAKAZO NGEMVA KUKAMBIMBITHO 1844

GSAM 157.1Imbali emfutshane yomnyakazo wokuza ngemva komhla ka-21 kuMbimbitho 1844, ilandiswa emazwini alandelayo, athethwe ku-Izibonakaliso Zezikhathi lwamhla ka-31 kuMfumfu 1844:—

GSAM 157.2“Ngemva kokudlula kuka-1843,—umnyaka wamaJuda,—inengi elikhulu lama-Adventist lazinza ekukholweni ukuthi kusukela lapho sasingeke sibale izikhathi ezithile siqinisekile ngitsho. Bakholwa ukuthi sasilapho ukubala kwethu izikhathi okukhomba khona, ekupheleni kwazo zonke izikhathi zesiprofetho, okulindelwe ukuthi ukuza kweNkosi kwenzakale ekupheleni kwazo; lokuthi lanxa kwakuzamele silinde isikhatshana nje ukubala kwethu izikhathi okwakungabe kwehlukene ngaso lesikhathi sikaNkulunkulu, bakholwa ukuthi sasingeke sisaba lomunye umkhondo wesikhathi esiqondileyo. Bonke babethethe izibane zabo baphuma ukuyahlangabeza uMyeni; kodwa uMyeni wayelibele kwaze kwadlula isikhathi (1843) ayelindelwe ngaso. Kulokhu kulibala kombono, kwabonakala kuyisinqumo sabo bonke ukuwulindela, bekholwa ukuthi wawungeke wephuziswe, lokuthi wawungalindelwa loba yiwuphi umzuzwana. Kodwa kwahle kwacaca masinyane ukuthi amaxuku ayesenza amacebo esikhathi esizayo, ayengeke awenze aluba ayekholwa ukuthi iNkosi izakuza kulumnyaka; lokuthi ayeselele mayelana lokunanzelela ukuthi ukubonakala kweNkosi kwakusondele masinyane. Ngamanye amazwi, babecabanga ukuthi ingafika loba yiluphi usuku, loba ukuthi ingalibala isikhatshana, lapho ababengaphumula khona bezivuselela. Lokhu kwakunjengoba uMsindisi wethu watsho ukuthi kuzakuba njalo, ‘Kwathi umyeni esalibele, zonke zozela zalala.’

GSAM 157Ukukhangelwa Ekwindla Ka-1844

GSAM 157.3“Kusukela kuNkwenkwezi 1843, uMfowethu Miller wayesekhombise ukuthi sikhangele inyanga yesikhombisa yomnyaka ongcwele wamaJuda, njengesikhathi sokugcina lezo zifanekiso ezikhomba ukuza kwesibili; njalo ekwindla edlulileyo sasikhangele kulesosikhathi ngokulangazela okukhulu. Sesidlulile, uMfowethu S. S. Snow wamukela ngokupheleleyo umbono wokuthi, ngokwezifanekiso, ukuza kweNkosi, lapho kusenzakala, kumele kwenzakale ngosuku lwetshumi lwenyanga yesikhombisa; kodwa wayengaqiniseki ngomnyaka. Ngemva kwalokho wabona ukuthi izikhathi zesiprofetho kazipheli ngempela kuze kufike umnyaka okhona, u-1844; wasebambelela ekuthini phose ngomhla ka-22 kuMfumfu—usuku lwetshumi lwenyanga yesikhombisa yalumnyaka okhona—sasizabona ukuza kweNkosi yenkazimulo. Lokhu wakutshumayela eNew York, ePhiladelphia, lakwezinye indawo ngentwasahlobo langehlobo ezedlulileyo; lanxa abanengi bemukela imibono yakhe, kakubonakalanga ngokukhethekileyo imiphumela yayo kwaze kwaba phose nguNtulikazi.

GSAM 158Izilimo Zitshiywa Emasimini

GSAM 158.1“Ekuqaleni kwalesosikhathi abanye babazalwane bethu enyakatho yeNew Hampshire babethinteke kakhulu ngokukholwa ukuthi iNkosi yayizakuza obunye ubusika bungakafiki, baze bangalimi amasimu abo. Phose phakathi kukaNtulikazi,—okwakuyikuhlwa esigabeni saphakathi kobusuku bosuku olwalumela umnyaka wamaJuda (ukuhlwa-ukusa, kubalwa kusukela ekuthwaseni kwenyanga kaMabasa, ukuqala kwalowomnyaka wamaJuda), abanye ababehlanyele batshala emasimini abo bathinteka kakhulu ngokunanzelela ukuthi ukubonakala kweNkosi kwasekusondele masinyane, baze bangakwazi ukuvuna izilimo zabo bengaphikisanga ukholo lwabo. Abanye bathi besiya emasimini abo ukuyagunda utshani babo, bazithola bengasakwazi ngitsho ukuqhubeka, njalo belandela lokho ababekubona kungumlandu wabo, batshiya izilimo zabo zimi emasimini, ukuze batshengise ukholo lwabo ngemisebenzi yabo, ngalokho balahle umhlaba. Lokhu kwasabalala masinyane kuyo yonke inyakatho yeNew England.

GSAM 158Ukwahlulela Kuzakwandulela Ukuza KweNkosi

GSAM 158.2“Ngalesosikhathi esifanayo abazalwane bethu eMaine babemukele umbono wokuthi ukwahlulela kumele kwandulele ukuza kweNkosi; ukuthi kwakuqondana lokuvuna, njalo kwakungayisikho ekupheleni komhlaba kuphela, kodwa kwakuthatha isikhathi esandulela ukuphela masinyane. Ngokuvumelana lalumbono, bacabanga ukuthi sasisesikhathini sokwahlulela, ukuthi umngcele wokwehlukanisa wawudwetshwa, lokuthi izinceku zikaNkulunkulu zazibekwa uphawu emabunzini azo; ukuphela kwalokho kwakuzakuba yisibonakaliso ezingilosini ezine ezibambe imimoya emine yomhlaba (iSambulo 7:1), ukuthi ziyekele ukubamba leyo mimoya.

GSAM 159Ukuvuka Phakathi Kobusuku

GSAM 159.1“Phose phakathi kukaNtulikazi isibusiso sikaNkulunkulu ekubuyiseni abahlehlele emuva saqalisa ukuhambisana lokumenyezelwa kwesikhathi, njalo labo abemukela omunye waleyomibono esikhulume ngayo batshengisa inguquko enkulu ekuziphatheni kwabo, lokuphaphama masinyane ebuthongweni, njengalokhu kwakubikezelwe. ‘Phakathi kobusuku kwaba lokumemeza ukuthi: Khangelani, umyeni uyeza; phumani liyomhlangabeza. Khona zonke lezo zintombi zavuka, zalungisa izibane zazo.’ Kusukela kuNtulikazi leminyakazo yayisezindaweni ezehlukeneyo zeNew England, ingahlangene; kodwa yonke yayihambisana lesibusiso sikaNkulunkulu ekubuyiseni abanengi abalezibane ezaziseduze lokucitsha, lasekungcwelisweni kwabangcwele bakhe. Emhlanganweni wekhempu eExeter yonke lemithelela yahlangana, yaxubana yaba ngumnyakazo munye omkhulu, yasabalala masinyane kuwo wonke amaqembu alindele ukuza kweNkosi elizweni.”

Notes

  1. UMathewu 25:1-5. ↩
  2. UMakho 2:18-20. ↩
  3. AmaHubo 119:105. ↩
  4. UJeremiya 18:18. ↩
  5. ISambulo 3:3. ↩
  6. IZaga 23:20, 21. ↩
  7. UHabakhukhi 2:1-3. ↩
  8. U-2 Phetro 2:1, 3. ↩
  9. UHezekheli 12:22. ↩
  10. ULukha 12:35, 36. ↩

Inothi

Buyela emuva