Isahluko 28 — Umnyango Okungelamuntu Ongawuvala
GSAM 462.1“Ngibeke phambi kwakho umnyango ovulekileyo, njalo kakho umuntu ongawuvala; ngoba ulamandla amancinyane, waligcina ilizwi lami, kawuliphikanga ibizo lami.”1
GSAM 462.2La ngamazwi aqondiswe kulabo abasesimeni seFiladelfiya ebandleni levangeli. Leli bandla yilo elalikhule ngokumenyezelwa kokusondela kokuza kukaKhristu, loba labo ababebambelele kulokho ababekuzwile ngalindaba; ngoba ukhuluma ngebandla leSardisi (elalandulelayo iFiladelfiya masinyane), esithi: “Ngakho khumbula ukuthi wemukela njani wezwa njani, ubambelele, uphenduke. Ngakho uba ungalindi, ngizakuza kuwe njengesela, njalo kawuyikwazi ukuthi ngizakuza kuwe ngaliphi ihola.”2
GSAM 462.3Ngakho ibandla leSardisi layizwa imfundiso yokuza kweNkosi masinyane. Labo ababebambelele kulokho ababekuzwile baqhubekela phambili eqinisweni lapho “uluthi lwesibane” lususwa, baba libandla leFiladelfiya, athi kulo: “Ngenxa yokuthi uligcinile ilizwi lokubekezela kwami, lami ngizakugcina eholeni lokulingwa elizakwehlela umhlaba wonke, ukulinga abakhileyo emhlabeni. Khangela, ngiyeza masinyane; bambelela kulokho olakho, ukuze kungabi lamuntu othatha umqhele wakho.”3 Ngakho kukuleli bandla leFiladelfiya lapho athi khona: “Ngibeke phambi kwakho umnyango ovulekileyo, njalo kakho umuntu ongawuvala.”
GSAM 462.4Ngakho lapha kulesimemezelo esiqinileyo seMibhalo Engcwele sokuthi labo abaqhutshwa yikuhola kukaNkulunkulu ukuba baxwayise umhlaba ngokuza kweNkosi, bancenge abantu ukuba balungiselele ukuhlangana loNkulunkulu, balomusa kaNkulunkulu okhethekileyo emsebenzini wabo. Abantu bangazama ukubavimba, ukwehlula imizamo yabo, ukuvala “umnyango wokukhuluma,” kodwa ilizwi likaNkulunkulu lilokhu lizwakala phezu kwawo wonke umsindo, lisithi: “Ngibeke phambi kwakho umnyango ovulekileyo.”
GSAM 463Intuthuko Yeminyaka Engamatshumi Ayisikhombisa Lane
GSAM 463.1Emakhasini angaphambili ale incwadi sikhangele ngamafitshane isikhathi seminyaka engamatshumi ayisikhombisa lane, kusukela ngo-1831 kusiya ku-1905, silandela ukuvela lentuthuko yemilayezo yokuza, ikakhulu umlayezo wengilosi yesithathu. Sitshengisile ukuthi, usuka ekungaziweni lasebumpofwini, lumlayezo uthuthuke njani ngamandla akhulayo umnyaka ngomnyaka, waze waba lezindawo zomsebenzi wezithunywa ezizungeze umhlaba. Ngempela kawuphumelelanga ngalindlela ngenxa yokuthi ungumlayezo othokozisa inhliziyo zenyama; ngoba phambili kwawo uthwele iSabatha leNkosi, okuligcinayo kuthwala isiphambano esinzima, kudinga ukwehlukana lokuthengiselana lomhlaba ngosuku lweviki oluphithizela kakhulu emisebenzini yansuku zonke. Njalo kawuqhubekelanga phambili ngenxa yokungabikhona kokuphikiswa; ngoba kusukela ekuqaleni uhlangane lakho, okulolaka olukhulu kakhulu kuvela ngaphandle, kanye lezinhlupho ezidalwa ngabantu abangazinikelanga kuNkulunkulu abangene phakathi kwethu okwesikhathi esithile. Ngesimo esidalwe ngamacebo lemizamo yezitha zangaphandle, singakhuluma kuhle ngamazwi kaDavida umhubi, sithi: “Aluba kwakungeyisiyo iNkosi eyayingakithi, u-Israyeli katsho khathesi, aluba kwakungeyisiyo iNkosi eyayingakithi, lapho abantu besivukela, babengasiginya siphila lapho ulaka lwabo lusivuthela; amanzi abengasigabhela, isifula besingadlula phezu komphefumulo wethu; amanzi azikhukhumezayo abengadlula phezu komphefumulo wethu. Kayibongwe iNkosi engasinikelanga ukuba sibe yimpango yamazinyo abo. Umphefumulo wethu uphunyukile njengenyoni emjibileni wabathiyi bezinyoni; umjibila wephukile, lathi siphunyukile. Usizo lwethu lusebizweni leNkosi, eyenza izulu lomhlaba.”4
GSAM 464Usizo LuseNkosini
GSAM 464.1INkosi ithi ibeke phambi kwabantu bayo “umnyango ovulekileyo, njalo kakho umuntu ongawuvala.” Ngakho kakumangalisi ukuthi umlayezo uqhubekele phambili ungaphambuki. Ungumlayezo kaNkulunkulu ebantwini, njalo kumele uphumelele. KuSambulo 7:2 umsebenzi wokulungiselela abantu ukuba beme lapho usuku olukhulu lolaka lukaNkulunkulu lufika ufanekiswa yingilosi “enyuka ivela empumalanga,” loba, njengoba abanye behumutsha, “njengokuphuma kwelanga.” Khangela ukusa kosuku—kuqala kubonakale imisebe yokukhanya empumalanga; ihlangane ibe yikukhanya okukhulu kuze kubonakale ilanga elibanzi, eliyindilingi, ngokucacileyo. Njengoba “iNkosi Yosuku” inyuka ifika phezulu esibhakabhakeni, ukukhanya kwayo, ukutshisa kwayo lamandla ayo kuqhubeka kusiba kukhulu.
GSAM 464.2Ngempela ibinjalo intuthuko yomlayezo wengilosi yesithathu kusukela ngo-1848, lapho amaqiniso awumumethweyo ecaciswa, njalo kusukela kulesosikhathi sitshengisile ukukhula okusobala, okungaphambukiyo, okumangalisayo. Lokhu singakuchasisa kuphela ngokuthi iNkosi igcwalisa ilizwi layo kulabo, kulesisikhathi lapho insindiso yayo isizafika, “abagcina iSabatha bengalingcolisi,”5 njalo bavimbele unyawo lwabo ekwenzeni intokozo yabo ngosuku olungcwele lukaNkulunkulu, ngaleyondlela, ngo“kholo lukaJesu,” njengoba kutshiwo emlayezweni wengilosi yesithathu kuSambulo 14, begcina yonke “imithetho kaNkulunkulu.” Ngabanjalo iNkosi yatsho ngomprofethi u-Isaya, yathi: “Khona ukukhanya kwakho kuzavela njengokusa, lokusila kwakho kuzavela masinyane; lokulunga kwakho [“iNkosi ukulunga kwethu.” UJeremiya 23:6] kuzahamba phambi kwakho; lenkazimulo yeNkosi izakuba ngumvikeli wakho ngemuva.”6 Sileziqinisekiso ezinje, singalindela njani okunye ngaphandle kokuthi umsebenzi uzaphumelela? “Uba uNkulunkulu engakithi, ngubani ongamelana lathi?”
GSAM 464Laba Bangaphumelela Njani?
GSAM 464.3Nxa sikhangela isimo sango-1846, lapho uMdala Joseph Bates eqala ukubhala leyoncwadi yokuqala, eyokuqala eyakhutshwa ngama-Adventist osuku lwesikhombisa ngendaba yeSabatha, elemasenti alitshumi lambili lengxenye kuphela ayelawo emhlabeni, njalo kwadingeka ukuthi awasebenzise engakapheli usuku lwakhe lokuqala lokubhala; siphinde sikhangele uMdala James White eshicilela iphetshana lakhe lokuqala, Iqiniso Lamanje, ngemali ayeyithole ngokucheba utshani ensimini yotshani, ethumela leliphephandaba mahala kubo bonke ababengalifunda, ekhuluma ngalo njengomlayezo owawuzafika emikhawulweni yomhlaba,—sikhangela lezi ziqalo ezincinyane, umuntu angabuza ngolimi lwabantu bezinsuku zika-Amosi, athi: “UJakobe uzavuka ngobani? Ngoba mncinyane.”7 Siqhathanisa lokhu lesimo sango-1905, lapho ukushicilelwa kwamaqiniso omlayezo kwenziwa ezindlini zokushicilela ezingamatshumi amabili ezisezindaweni ezitshiyeneyo zomhlaba, ezivame ukusebenza ngawo wonke amandla azo ukuze zanelise isidingo semibhalo yokufunda, singatsho ngeqiniso ukuthi: Khangelani, “umnyango ovulekileyo” okungakabi lamuntu owawuvalayo.
GSAM 465.1Ngalabo ababecabanga ngezikhathi zakuqala ukuthi umsebenzi awusoze uphumelele, singatsho ngamazwi umprofethi uZakhariya akhuza ngawo labo ababecabanga ukuvimba umsebenzi kaNkulunkulu wokwakhiwa kutsha kweJerusalema, sithi: “Ngubani odelele usuku lwezinto ezincinyane?”8 Ngezinto ezazibonakala zinjengezintaba zobunzima endleleni yabo, iNkosi yatsho ngomprofethi yathi:—
GSAM 465Intaba Yenziwa Igceke
GSAM 465.2“Ungubani wena, ntaba enkulu? Phambi kukaZerubhabheli uzakuba ligceke; njalo uzalikhupha ilitshe lokuqedisa kube lokumemeza kuthiwa: Umusa, umusa kawube kulo.”9 Kubenjalo emsebenzini womlayezo wengilosi yesithathu, njalo kuzakuba njalo kuze kulethwe “ilitshe lokuqedisa,” loba, ngamanye amazwi, uze uphele umsebenzi.
GSAM 465.3Khangela abalutshwana ngo-1846, ababengabayanga ngezinto ababelazo, bengabayanga kukho konke ngaphandle kokholo kuNkulunkulu lenotho yeqiniso, ubone ukuthi umsebenzi wabo usukhule kangakanani. Cabanga ngezinto zokusebenza esezikhona, izincwadi zonke sezilungisiwe, sezihunyutshiwe, zashicilelwa ngezindimi ezitshiyeneyo zomhlaba, lamakhulu abahambisi bezincwadi abafaka lezi zincwadi emizini yabantu, ezilenani le-$400,000 ngomnyaka. Uba isibusiso sikaNkulunkulu siqhubeka siphezu komsebenzi, singalindela ukuphumelela. Ngalezi zinto zokusebenza langezisebenzi ezandayo inyanga ngenyanga, sithembele kuKhristu, kasidingi ukulindela okunye ngaphandle kwalokho uSolomoni akuhlabelela ngebandla likaNkulunkulu lapho liphuma esimeni salo senkangala, “leyame engalweni yoThandiweyo walo,” elichaza libonakala, “lihle njengenyanga, licwebezela njengelanga, lesabeka njengebutho elilamafulegi.”10
GSAM 466Ukusizwa Yisipho Sesiprofetho
GSAM 466.1Kasibonanga kuphela ukuthi ukuhola kweNkosi kuvule indlela yokusabalala kweqiniso, lesibusiso sayo esisobala sahamba lemizamo yokulandela izindlela zokuhola kwayo, kodwa ekuveleni lasentuthukweni yomlayezo wengilosi yesithathu ikhulume labantu bayo ngesipho sesiprofetho. Lokhu kakubanga yisambulo esitsha esithatha indawo yeBhayibhili, njalo kakubanga yindlela yokuhlanekezela izimfundiso zeMibhalo, kodwa bekuyikutshengisa lapho, kulesisikhathi, kulengozi yokuphambuka ekubeni lula kwevangeli likaKhristu, lapho abantu besengozini yokuthathwa ngumkhuba walesisikhathi, besuthiseka ngesimo sokumesaba uNkulunkulu esingelamandla.
GSAM 466.2Nxa sikhangela lindaba ngesibonelo11 sabaprofethi bakudala, iNkosi esinike sona njengesinye sezilinganiso okumele kuhlolwe ngazo ukubonakala kwezipho okunje, sithola izizatho ezifananayo zokuthi kungani ukubonakala okunjalo kudingeka khathesi njengakudala; okutsho ukuthi, kuzo zonke izikhathi kulengozi yokuphambukiswa endleleni yeqiniso yizimfundiso lemikhuba elamandla futhi ekhethekileyo yalesosikhathi. Umphostoli uPhawuli, ekhuluma ngokubonakala kwezipho iNkosi ezibeke ebandleni, uthi zikhona “ukuze abangcwele bapheleliswe, ukuze kwenziwe umsebenzi wokukhonza, ukuze kwakhiwe umzimba kaKhristu; size sonke sifinyelele ebunyeni bokholo lasekwazini iNdodana kaNkulunkulu, sibe ngumuntu opheleleyo, sifinyelele esilinganisweni sesithunzi sokugcwala kukaKhristu; ukuze singabe sisaba ngabantwana, abajikijelwa ngapha langapha, bethwelwe yimimoya yonke yemfundiso, ngobuqili babantu, langokukhohlisa ngobuqili abacathela ngabo ukuze badukise; kodwa sikhuluma iqiniso ngothando, sikhule kukho konke siye kuye oyinhloko, uKhristu; kuye umzimba wonke, ohlanganiswe kuhle, wabotshwa ndawonye ngalokho okulethwa yilunga ngalinye, njengokusebenza ngamandla okulingana lomsebenzi wengxenye ngayinye, wenza ukuthi umzimba ukhule uze uzakhe ngothando.”12
GSAM 467.1Ukuphikisa okufanayo okuqondiswe ekubonakaleni kwesipho sesiprofetho kulesisikhathi kwakungavezwa ngamandla afananayo ezikhathini zakudala; okutsho ukuthi, sileMibhalo, ngakho kasidingi izipho ezinjalo. Kodwa yona leyoMibhalo isitshela ukuthi uKhristu ubeke lezi zipho ebandleni ukuze zenze umsebenzi wazo kuze “kufike lokho okupheleleyo [isimo esipheleleyo],” lokuthi ibandla kufanele “lingasileli kusiphiwo, lilindele ukuza kweNkosi yethu uJesu Khristu.”13
GSAM 467Sibadingelani Abaprofethi?
GSAM 467.2Abantu bakudala babengacabanga ukuthi babelomthetho kaNkulunkulu wokuziphatha, ubhalwe ngomunwe wakhe uqobo ezibhebheni zamatshe; ukuthi babelezimiso, izahlulelo lemilayo eyakhulunywa kuMozisi ivela emlonyeni kaNkulunkulu, eyayibhalwe ngonanzelelo; njalo kuyini okunye okwakudingeka? Kodwa lanxa babeleqiniso lonke lelo elihle kakhulu, uNkulunkulu wathokoza ukukhuluma labo “ngezikhathi ezitshiyeneyo langezindlela ezitshiyeneyo ngabaprofethi bakhe abangcwele.”
GSAM 467.3Sithola ukuthi ubufakazi obanikelwa ngabaprofethi abatshiyeneyo, abanjengo-Isaya, uJeremiya, uHezekheli, uDanyeli, uHoseya labanye, esikhathini ngasinye babufundisa isimiso esifanayo esikhulu sokulalela uNkulunkulu; kodwa umprofethi ngamunye wayelezikhuzi zakhe eziqondene labantu besikhathi sakhe, ngenxa yomkhuba wabo wokudonswa basuswe ezimisweni ezingcwele zokulunga yimikhuba eyayibusa esikhathini okwaphiwa ngaso isiprofetho.
GSAM 468Ukudingeka Kwezipho
GSAM 468.1Kungathiwa kasilazimfundiso ezinhle kakhulu zeMibhalo yeThestamente Elidala kuphela, kodwa phezu kwalokho silamazwi oMsindisi wethu uqobo lawabaphostoli, ngakho sikudingelani okunye ukukhanya? Iqiniso lilokhu likhona lokuthi bona laba abaphostoli abangcwele bakhomba phambili ezinsukwini zokucina, lapho “kuzafika izikhathi eziyingozi,” lalapho abantu “bezakuba lesimo sokumesaba uNkulunkulu, kodwa bephika amandla akho,” besitshela njalo ukuthi “abanye bazahlubuka ekukholweni, belalela imimoya edukisayo lezimfundiso zamadimoni.”
GSAM 468.2Ngenxa yakho konke lokhu, labo bantu uPhawuli akhuluma ngabo ekubhaleleni abaseThesalonika, abangayikuba semnyameni ukuze usuku lukaKhristu lubazume njengesela, kodwa abazaba ngabantwana bokukhanya, bayelulekwa ukuthi “bahlole konke” okumayelana “leziprofetho,” lokuthi “babambelele kulokho okuhle.”14 Lokhu kufanana lokubatshela ukuthi abantu abazabe belindele ukuza kweNkosi uJesu Khristu, abazatholakala ekucineni belulungele lolosuku, bazakuba lokubonakala “okuhle,” okuqotho kwesipho sesiprofetho phakathi kwabo.
GSAM 468Izibonakaliso Zokuphela
GSAM 468.3Sisesikhathini lapho izibonakaliso zigcwele inhlangothi zonke zokuthi usuku lweNkosi seluseduze. Siso kanye isikhathi lapho okwakufanele kuvele khona abantu ababezagcina yonke imithetho, njalo “babe lobufakazi bukaJesu”15—“uMoya wesiprofetho.”16 Kuyini esikutholayo? Ukuthi phakathi kweminyaka engamatshumi ayisithupha edlulileyo abantu abanjalo sebevele, bethwele umlayezo onjalo kanye, kwabonakala phakathi kwabo isipho sesiprofetho. Sihlola lesi sipho njengoba sibonakaliswa ngoNkosikazi E. G. White ngezilinganiso zeBhayibhili, sibonile ukuthi siyaphumelela kukho konke ukuhlolwa. Kusukela ekuqaleni kuze kube sekucineni, kuyo yonke imibhalo kaNkosikazi White, kakutholakalanga lamugqa owodwa ovumela isono loba kancinyane, loba ovumela loba yikuphi ukuphambuka elizwini likaNkulunkulu. Le imibhalo kayizange izibeke phezu kweBhayibhili, kodwa ihlala ikhuthaza ukufundwa kwelizwi likaNkulunkulu ngonanzelelo olukhulu, ikhomba kulo njengesilinganiso esikhulu amacala ethu azahlolwa ngaso ekwahlulelweni kokucina. Emibhalweni yakhe uKhristu uyaphakanyiswa phambi kwethu njengesibonelo sodwa okumele sisilandele. Kumenyezelwa ngokucacileyo okukhulu ukuthi nguye kuphela ithemba lethu lokunqoba lapha, isiphephelo sethu sodwa olakeni oluzayo, nguye yedwa esingasindiswa ngebizo lakhe, njalo nguye yedwa indlela esingasindiswa ngayo.
GSAM 469Amazwi Okudumisa Avela Kumuntu Owayemazi
GSAM 469.1Mayelana loNkosikazi White lohlobo lomsebenzi wakhe, kulandelwa lokhu okwabhalwa ngo-1877 ngumuntu owayemazi, owayefunde umsebenzi wakhe okweminyaka eminengi; njalo ngemva kokuhlola okweminyaka engaba ngamatshumi amahlanu lantathu, iminyaka yokunanzelela ngonanzelelo, ngivumelana ngokupheleleyo lawo wonke umcabango ovezwe lapha:—
GSAM 469.2“Mayelana lesimilo sobuKhristu sikaDadewethu White, ngicela ukutsho ukuthi ngicabanga ukuthi ngiyakwazi okuthile ngaso. Sengimazi okweminyaka elitshumi lasificaminwembili,—okwedlula ingxenye yomlando wabantu bakithi. Sengike ngaba semzini wabo kanenginengi, kwesinye isikhathi okwamaviki ngasikhathi sinye. Labo sebeke baba semzini wethu laphakathi kwemuli yethu kanengi. Sengihambe labo phose kuzo zonke izindawo; ngibe labo sisodwa laphambi kwabantu, emhlanganweni langaphandle komhlangano, njalo ngibe lamathuba amahle kakhulu okwazi okuthile ngempilo, ngesimilo langomoya kaMfowethu loDadewethu White. Njengomfundisi kuye kwadingeka ngisebenzelane labantu bazo zonke inhlobo, lezimilo zazo zonke inhlobo, ngaze ngacabanga ukuthi sengingahlulela okuthile ngokuthi umuntu unjani, okungenani ngemva kweminyaka yokwazana okuseduze.
GSAM 470.1“Ngiyamazi uDadewethu White njengowesifazana ongaziphakamisiyo, othobekileyo, olenhliziyo elomusa, olesimilo esihle. Lezi zimpawu zesimilo sakhe kazisizo zokuzenzisa nje loba azifundise ukuziveza, kodwa ziphuma kuhle langokulula esimeni sakhe semvelo. Kazikhukhumezi, kaziboni elungile ukwedlula abanye, njalo kaziboni emkhulu, njengoba labo abatshiseka ngokweqileyo behlala benjalo. Sengihlangane kanengi labantu abatshiseka ngokweqileyo, njalo ngibathole begcwele ukuzenzisa, begcwele ukuzigqaja, bephangisa ukunika imibono yabo, bezincoma ngobungcwele babo, lokunye okunjalo, kodwa ngihlala ngithola uDadewethu White etshiyene lakho konke lokhu.
GSAM 470Umngane Wabayanga
GSAM 470.2“Loba ngubani, ongumyanga kakhulu lothobeke kakhulu, angaya kuye ngokukhululeka ecela iseluleko lenduduzo, engaxotshwa. Uhlala enakekela abaswelayo, abangelalutho labahluphekayo, ebanika abakudingayo, ebancengela.
GSAM 470.3“Angikaze ngazane lomuntu ohlala elokumesaba uNkulunkulu phambi kwakhe njengaye. Akukho okwenziwayo kungazange kukhulekelwe kuNkulunkulu ngobuqotho. Ufunda ilizwi likaNkulunkulu ngonanzelelo langokuqhubekayo. Sengizwile uDadewethu White ekhuluma amakhulu ezikhathi, sengifunde bonke ubufakazi bakhe ngibuphindaphinda kusukela ekuqaleni kuze kube sekucineni, obunengi babo kanengi, njalo angikaze ngithole loba ngumusho owodwa wokuziphatha okubi kubo bonke, loba yini engahlanzekanga ngokupheleleyo njalo engayisiyo yobuKhristu; akukho okususa umuntu eBhayibhilini lakuKhristu; kodwa lapho ngithola ukuncenga okuqotho kakhulu kokuthi kulalelwe uNkulunkulu, kuthandwe uJesu, kukholwe iMibhalo, njalo iphenywe ngokuqhubekayo. Sengizuze usizo olukhulu emoyeni izikhathi ezingelakubalwa ebufakazini. Ngempela, angikaze ngibufunde ngingezwanga ngikhuzwa ngokusilela kwami ekukholweni kuNkulunkulu, ngokusilela kokuzinikela, langokusilela kobuqotho ekusindiseni imiphefumulo. Uba ngilenhlakanipho yokwahlulela, loba ukuqonda komoya, ngithi ubufakazi bulomoya ofanayo lokuqondisa okufanayo leMibhalo.
GSAM 470.4“Sekuyiminyaka engamatshumi amathathu [khathesi singatsho sithi iminyaka engamatshumi ayisithupha] lobu bufakazi bukholwa njalo bufundwa phakathi kwabantu bakithi. Bubenze baba njani? Bubasuse emthethweni kaNkulunkulu yini? Bubaholele ekulahleni ukholo kuKhristu yini? Bubaholele ekuphoseleni iBhayibhili eceleni yini? Bubaholele ekubeni ngabantu abonakeleyo, abaziphatha kubi yini? Ngiyazi ukuthi nxa beqathaniswa laloba yiliphi elinye ibandla lamaKhristu kabasoze babe ngaphansi kwalo ngokulunga.
GSAM 471.1“Kukhona into eyodwa engiyinanzeleleyo, yikuthi abaphikisi abalesihluku esikhulu kakhulu abamelana lemibono kaDadewethu White bayavuma ukuthi ungumKhristu. Ukuthi bakuvuma njani lokhu, angikwazi. Bazama ukukulungisa ngokuthi ukhohlisiwe. Kabenelisi ukukhomba loba lilinye ibala empilweni yakhe yonke, loba umusho wokuziphatha okubi kuyo yonke imibhalo yakhe. Kumele bavume ukuthi okunengi kwemibhalo yakhe kuhle kakhulu, lokuthi loba ngubani ongaphila ngakho konke akutshoyo angaba ngumKhristu omuhle, oqinisekileyo ngezulu. Kuyamangalisa kakhulu lokhu, uba eyisikhali sikadeveli, ephefumulelwe nguSathane, loba uba imibhalo yakhe ingeyokuziphatha okubi kumbe iyimicabango edukileyo yengqondo yakhe.”
GSAM 471Abangamaziyo Bafakaza Ngemibhalo Yakhe
GSAM 471.2Njengoba amaphephandaba ethu alemibhalo kaNkosikazi White ethunyelwa, adingwa ngabathobeke kakhulu, abesaba uNkulunkulu labazinikeleyo. Nxa bekhuluma ngalokho abakufundayo, bathi: “Silesifiso esikhulu ikakhulu ngemibhalo kaNkosikazi White. Ilusizo olukhulu empilweni, igcwele izifundiso ezihlose ukusondeza umuntu eNkosini, zimenze athobeke kakhulu, esabe uNkulunkulu, azinikele kuye. Le imibhalo ifanana kakhulu leMibhalo Engcwele kangangokuthi nxa siyifunda kubonakala sengathi uNkosikazi White kumele ukuthi uphefumulelwe ukuze abhale ngendlela abhala ngayo.” Bunjalo ubufakazi ezindabeni ezinengi zalabo ababhalelana lezisebenzi zethu zezithunywa, labo futhi abangelamqondo loba omncinyane wokuthi imicabango kaNkosikazi White uyemukela embonweni ongcwele.
GSAM 471Umthombo Wokuphikiswa
GSAM 471.3Sibona esikwenzileyo lesi sipho ezinhliziyweni zabantu, kuphakama umbuzo othi: Kuvele ngaphi njalo kungani ukuphikiswa kokubonakala kwalesi sipho? Njalo kube yini isiphetho salabo abaphikisayo? Sengilunanzelele ngonanzelelo lolu daba kusukela ngo-1852, ngithole ukuthi ukuphikiswa kwalokhu kubonakala kuvele kakhulu kulabo abakhuzelwe ukusilela kwesimilo, imikhuba emibi, loba indlela ethile engalunganga empilweni yabo. Abanengi abakhuzwayo babephikisa besithi kabababi njengokubatsho kobufakazi, njalo babezatshengisa ukuthi babengabambelela eqinisweni lanxa bephambana lokukhuzwa abakuphiweyo. Ngokuhamba kwesikhathi kubonakele ukuthi inengi labo lilahla ukholo lwalo, lisuka ngokupheleleyo phakathi kwethu. Abanye babonile ukuphambuka kwabo, babambelela baqinisa eqinisweni. Kuphakama umbuzo othi: Uba labo abaphikisa lesi sipho beholwa yiNkosi, kungani belahlekelwa yimpilo yabo yomoya, babuyele emuva besuka kuNkulunkulu? Isilinganiso soMsindisi wethu sithi isihlahla kumele saziwe ngezithelo zaso. Uqinisa kakhulu ukuthi “isihlahla esibi singeke sithele izithelo ezinhle.”
GSAM 472Ukwehluleka Kwabaphikisayo
GSAM 472.1Sikhumbula izikhathi lapho kwahlelwa khona ukuphikiswa kobufakazi bukaNkosikazi White, kumenyezelwa ukuthi umsebenzi wabo wawuzaphumelela kakhulu masinyane nje lapho sebelahle ubufakazi. Kodwa sebehluleke ngokupheleleyo ukufinyelela kulokho ababekuthembile. Ngemva kweminyaka yokulwa kabanikanga ubufakazi obukhulu bokusabalalisa iqiniso leSabatha emhlabeni obedlula obenziwa ngabanjengabo eminyakeni engamatshumi amane lasificamunwemunye edlulileyo. Uba umsebenzi wabo wawungumsebenzi okhethekileyo weNkosi, kungani umlayezo wabo ungazange uphumelele kakhulu?
GSAM 472Kungaphi Ukuphumelela?
GSAM 472.2Ngakwelinye icele, nxa sikhangela lowomlayezo okumenyezelwa ngawo imithetho kaNkulunkulu lokholo lukaJesu emhlabeni,—umlayezo oxhumene lalokhu kubonakala kwesipho sesiprofetho, esilezeluleko zaso, imilayo yaso lezikhuzi zaso,—sibona ukuthi uqhubekele phambili ngokuqina langokungaphambuki kusukela ekuqaleni kwawo kuze kube khathesi. Ngokulalela izeluleko zeNkosi eziza ngaleso sipho, uqhubeka ngamandla eNkosi, umlayezo, njengoba sitshengisile, usuzungeze umhlaba, njalo uhamba masinyane usiya kuzo “zonke izizwe, lemihlobo, lezindimi, labantu.”
GSAM 473.1Ngentuthuko yawo esikhathini esidlulileyo singatsho ukuthi ilizwi likaNkulunkulu liqinisekisiwe kulokho akutshoyo, esithi: “Akulasikhali esenzelwe ukumelana lawe esizaphumelela.” Ngempela, isandla sikaNkulunkulu sibonakele ekuphumeleleni okube sekuveleni lasentuthukweni yalumnyakazo omkhulu wokuza kuze kube khathesi, njalo ngekusasa sithembele ekugcwalisekeni okuqinisekileyo kwelizwi lakhe elithi: “Ngibeke phambi kwakho umnyango ovulekileyo, njalo kakho umuntu ongawuvala.” Silethemba leli, singahlabela ngokuqiniseka konke sithi:—
Notes
- ISambulo 3:8. ↩
- ISambulo 3:3. ↩
- ISambulo 3:10, 11. ↩
- AmaHubo 124:1-8. ↩
- U-Isaya 56:1, 2. ↩
- U-Isaya 58:8, 13. ↩
- U-Amosi 7:2. ↩
- UZakhariya 4:10. ↩
- UZakhariya 4:7. ↩
- INgoma Yezingoma 6:10. ↩
- UJakhobe 5:10. ↩
- Kwabase-Efesu 4:12-16. ↩
- 1 KwabaseKhorinte 1:6, 7. ↩
- 1 KwabaseThesalonika 5:5, 20, 21. ↩
- ISambulo 12:17. ↩
- ISambulo 19:10. ↩