Isahluko 27 — Obunye Ubufakazi Obuqinisekisiweyo
GSAM 442.1“UJEHOSHAFATHI wema wathi: Ngizweni, lina bakoJuda labakhileyo eJerusalema; kholwani eNKOSINI uNkulunkulu wenu, njalo lizaqiniswa; kholwani kubaprofethi bayo, njalo lizaphumelela.”1
GSAM 442.2Eminyakeni eyedlulayo kwanikezwa ubufakazi ngesipho sesiprofetho bokuthi kungakafiki ukuphela, amakhasi ashicilelweyo aleli qiniso ayezaku“hlakazwa njengamahlamvu ekwindla.” Abanengi bazibuza ukuthi lokhu kwakungenziwa njani ngaphandle kokuthi abantu abakholwa iqiniso bahlelwe loba babuthelwe ukwenza umsebenzi lo. Ngokuhola kukaNkulunkulu, izinto ezinkulu zivame ukufezwa kuqalwe ngokuncinyane kakhulu; kwaba njalo ekukhuleni kwendlela yokusebenza eyaqala phakathi kwethu.
GSAM 442Inhlangano Yamapheshana Labavangeli
GSAM 442.3Ngomnyaka ongaba ngu-1870, umcabango wokuba lenhlangano yamapheshana labavangeli waqala ukuvela ngenxa yalokho okwenziwa ngodadewethu abalutshwana abazinikeleyo eSouth Lancaster, eMassachusetts. Okwesikhathi esithile, odadewethu laba bazama ukuthumela ngeposi amaphephandaba lamapheshana ebandla lethu ebantwini abatshiyeneyo ababengasibo bokholo lwethu, besebebhalela izincwadi. Lokhu kwenza abantu abanengana bamukela iqiniso, kwasekubangela uMdala S. N. Haskell ukuthi azibuze athi: “Kungani bonke abantu bakithi bengenzi lokho okwenziwe ngodadewethu abalutshwana?” Ikakhulu ngomnyaka ka-1871, indaba le yayikhulunywa ngezikhathi ezitshiyeneyo emakhasini e-Isibuyekezo loMemezeli. Emhlanganweni okhethekileyo weNgqungquthela Jikelele owabanjwa mhlaka 29 Mpalakazi 1871, uMdala Haskell ekhona njalo echasisa ukuthi umnyakazo lo wawungasiza njani emsebenzini, kwamukelwa isinqumo esasikhuthaza ukusungulwa kwezinhlangano zamapheshana. Abadala S. N. Haskell, W. H. Littlejohn, J. N. Andrews, J. H. Waggoner lo-I. D. Van Horn bakhethwa ukuba yikomithi eyayizaphelelisa amacebo okusungula izinhlangano ezinjalo.
GSAM 443.1Umnyakazo lo wavula isikhathi esitsha ekuqhubekiseleni phambili umsebenzi womlayezo. Kuze kube yileso sikhathi, ukufundiswa kweqiniso kwakucishe kwenziwe kuphela ngumtshumayeli owayezifikela ebantwini. Okweminyaka ethile uMdala Haskell wasebenza ngokukhuthala okukhulu efunda njalo esungula amacebo okwenza inhlangano yamapheshana labavangeli iphumelele. Kuyabe kumfanele ukubongwa nxa kuthiwa nguye owaqala ngempela kulowo msebenzi. Lokhu kakusikho kuphela ngezinhlangano zamapheshana labavangeli zezifundazwe, kodwa nguye futhi owethula icebo leNhlangano Yamapheshana jikelele eNgqungqutheleni Jikelele eyayihlangene eBattle Creek ngo-1878. Inhlangano le, eyacina ibizwa ngokuthi ngeyamazwe ngamazwe, isebenza ezindaweni ezingaphandle kwezinkomfa zethu zamabandla ezifundazweni, eMelika lasemazweni angaphandle.
GSAM 443Onobhala Abasebenza Kuhle—Maria Huntley
GSAM 443.2INkosi, ngokuhola kwayo, yavusa onobhala abasebenza kuhle, abamncedisa kakhulu uMdala Haskell emnyakazweni lo. UDadewethu Maria Huntley wayengomunye owasebenza engahlehli, lanxa eminyakeni eyalandelayo wayehlupheka kakhulu emzimbeni, waze wafela emsebenzini wakhe eminyakeni engaba litshumi lane eyedlulayo. Ngemizamo yakhe, amathuba amanengi omsebenzi akhona khathesi emazweni angaphandle aqala ukutholakala. Abanye onobhala bangena kulowo msebenzi, njalo njengoba indawo yokusebenza yayisanda, kwaba lesidingo sabonobhala bezindimi ezitshiyeneyo.
GSAM 444Umthelela Emabandleni Endawo
GSAM 444.1Kodwa umphumela oqakatheke kakhulu wokusungulwa komsebenzi wenhlangano yamapheshana phakathi kwethu ube ngumthelela wawo ekuvuseni lekukhuliseni umoya wokuvangela emabandleni endawo ahleliweyo. Unike wonke umuntu ithuba lokwenza okuthile ngokubhalelana izincwadi langokusabalalisa okubhaliweyo kokubala, lokuzwa ukukhuthazwa okuvela ekusebenzeleni insindiso yemiphefumulo ngokuqondileyo.
GSAM 444Ubufakazi Obumayelana Lomsebenzi Wamapheshana
GSAM 444.2Ukuze sitshengise ukuthi yayinjani imfundiso eyanikezwa ngoMoya wesiprofetho mayelana lomsebenzi wamapheshana lowevangeli, sicaphuna ku-Ubufakazi beBandla, inombolo 29 lo-30:—
GSAM 444.3“Nxa kulomsebenzi oqakatheke ukwedlula omunye, ngowokufikisa okubhaliweyo kwethu ebantwini, ngaleyondlela sibaholele ekuphenyeni iMibhalo. Umsebenzi wevangeli—ukungenisa okubhaliweyo kwethu ezimulini, ukuxoxa lazo lokukhuleka lazo kanye lokuzikhulekela—ngumsebenzi omuhle, ozafundisa amadoda labesifazana ukwenza umsebenzi wokwalusa.
GSAM 444.4“Kayisuye wonke umuntu olungele umsebenzi lo. Abaphiwe izipho lamandla amahle kakhulu, abazabamba umsebenzi ngokuwuzwisisa langendlela ehlelekileyo, bewuqhubekisela phambili ngamandla langokuqinisela, yibo okumele bakhethwe. Kufanele kube lecebo elihlelwe kuhle kakhulu; njalo kufanele lilandelwe ngokuthembeka. Amabandla ezindaweni zonke kufanele awukhuthalele kakhulu umsebenzi wamapheshana lowevangeli.”
GSAM 444.5“Umsebenzi wamapheshana lowevangeli ngumsebenzi omuhle. Ngumsebenzi kaNkulunkulu. Akufanelanga weyiswe langayiphi indlela; kodwa kuhlala kulengozi yokuwuphambukisa enjongweni yawo eqotho. Kudingeka abahambisi bezincwadi abazasebenza ensimini yevangeli. Abantu abangaziphathi kuhle kabawufanelanga umsebenzi lo. Amadoda labesifazana abalobuhlakani ekuphatheni abantu, abakhuluma kuhle, ababona khatshana njalo abalengqondo ezikwazi ukwehlukanisa izinto, futhi abazwayo ukuqakatheka kwemiphefumulo, yibo abangaphumelela.”
GSAM 445.1Ukuthengiswa kwezincwadi, izincwajana lamapheshana okwedlula $8,000,000 ngamabandla ethu labahambisi bezincwadi phakathi kweminyaka elitshumi lambili, kungubufakazi obukhulu bokuthi umsebenzi weNhlangano Yamapheshana Labavangeli uyasiza ngempela.
GSAM 445Isiprofetho Siqhathaniswa Lenhlakanipho Yomhlaba
GSAM 445.2Kwakulelizwi lesiprofetho elanikezwa mayelana lomsebenzi eYurophu, eligcwaliseka njengoba nje latshiwo, kangangokuthi kufanele sikhulume ngalo lapha. Izisebenzi labantu babegcizelela ukuthi umsebenzi wawungeke wenziwe khonale, ikakhulu eScandinavia, ngendlela owawusenziwa ngayo eMelika. Kwabamangalisa ukuthi uNkosikazi White wathi wawungenziwa ngempumelelo, futhi wawungasekelwa ngendlela efanayo lowaseMelika, lokuthi iNkosi yayimtshengise ukuthi nxa babenganikela okweshumi kwabo, langemali encinyane ababeyihola, uNkulunkulu wayezabaphumelelisa okwedlula kakhulu ababekukhangelele. Wabatshela njalo ukuthi abahambisi bezincwadi babengathengisa izincwadi eScandinavia ngokubhalisa abantu ukuthi bazithenge kusengaphambili, lokuthi lokhu kwakuzaphumelela. Abaphathi bezindlu zokushicilela kulawo mazwe bathi: “Akwenzeki;” bona “babengakaze bathengise izincwadi ngaleyondlela.” Okwalandelayo kwatshengisa ukuthi lokho ingilosi yeNkosi eyamethulela khona ngalolu daba kwakuphakeme kakhulu kulenhlakanipho yabathengisi bezincwadi labashicileli bomhlaba. Umsebenzi wokuhambisa izincwadi waphumelela khonale kusukela ekuqaleni kwawo. Abanye abaqala ukunikela ngengxenye eyodwa kwezilitshumi yemali yabo encinyane emsebenzini kaNkulunkulu baba ngabahambisi bezincwadi. Kabasekeli izidingo zabo kuphela, kodwa bahola imali enengi kulakuqala, ngalokho sebesenelisa ukunikela okweshumi okunengi kakhulu.
GSAM 445.3Ngomnyaka ka-1895 abahambisi bezincwadi bathengisa izincwadi zenani eledlula $40,000, ezazishicilelwe endlini yethu yokushicilela eChristiana, eNorway. Kuphawuleni lokhu njengesinye isiprofetho esagcwalisekayo, lanxa kwakuphikiswa inxa zonke, ngaphakathi kwebandla langaphandle kwalo, kusithiwa kwakungeke kwenzeke.
GSAM 445.4Mayelana lomsebenzi wezinhlangano zamapheshana ezasungulwa kusukela ngo-1871, singatsho singathandabuzi ukuthi inani labantu abalethwe eqinisweni ngemizamo yezisebenzi ezinjalo licishe lilingane lalabo abalethwe ngemizamo yabafundisi uqobo. Ngale ndlela umlayezo usatshumayelwa ezizweni zonke lasezindimini zonke zomhlaba.
GSAM 446Ubucwebe Lomsebenzi Wamapheshana
GSAM 446.1Inhlangano Yamapheshana Labavangeli eCalifornia yabika indaba ethokozisayo ngoMabasa 1873. Yabika ukuthi ubucwebe obabunikelwe enhlanganweni ngabantu ababesamukele iqiniso kuleso sifundazwe kuze kube yileso sikhathi babuncibilikisiwe, bahlolwa, bathengiswa ngenani labo langempela legolide lesiliva elingu-$200; ukuthi yonke imali le yayisetshenziswe ukuthenga amapheshana, izincwajana lamaphephandaba, okwasekusabalalisiwe; lokuthi inhlangano yayisisazi ngokuqinisekileyo ngabantu abangamatshumi amabili ababelethelwe ekwamukeleni iqiniso ngokubhaliweyo okwathengwa ngemali yobucwebe. Phakathi kwalabo abazi iqiniso ngokubala kwakuloJohn I. Tay, wase-Oakland, eCalifornia.
GSAM 446ISan Francisco Iyindawo Yomsebenzi Wevangeli
GSAM 446.2Ngo-1875 kwanikezwa ibandla laseSan Francisco ubufakazi obuqakathekileyo, esikhuluma ngabo khathesi ngenxa yokuthi bugcwaliseke ngendlela emangalisayo. Kusukela ekuqaleni, ibandla leli kwakufanele liqatshe amaholo okuqhuba izinkonzo, futhi ngemali enengi langobunzima obuthile, ngoba kwakungelakwenzeka ukubamba uchungechunge lwemihlangano kuwo, njengoba ezikhathini ezinengi ayedingelwa eminye imisebenzi.
GSAM 446.3Ngokuhlwa kwamalanga ka-14 lo-20 Mabasa 1875, amalunga akhokhelayo ebandla laseSan Francisco abizelwa endlini kaNkosikazi J. L. James, emgwaqweni uFifth eduze lomgwaqo uMarket. Khonapho uNkosikazi White wasilandisela lokho ayekutshengiswe embonweni mayelana lesimo, okwakuyikuthi iSan Francisco yayizahlala iyindawo yevangeli lapho umsebenzi wawungaqhutshwa khona; lokuthi imiphefumulo yayizaqhubeka isamukela iqiniso nxa udaba lwaluphathwa ngenhlakanipho. Nxa kwakungakhiwa indlu yokukhonzela lapho abantu babengamenyelwa khona, lalapho okwakungenziwa khona umsebenzi, kwakuzakwengezwa abantu enanini labo, labo ababengancedisa ekuhlangabezeni izindleko lasekubhadaleni isikwelede esasizakwenziwa ekulungiseni indlu yokuhlangana.
GSAM 447.1UNkosikazi White waqhubeka esithi wayebonile ukuthi lapho esekhuthaza ibandla laseSan Francisco ngokubaluleka kokwakha indlu yokukhonzela, kwakuzabonakala kulelo bandla elingabayanga njengokuthatha inyathelo emnyameni. Kodwa wayetshelwe ukuthi athi, nxa beqala ukwenza lokhu, babezakubona ukuhola kukaNkulunkulu kubavulela indlela inyathelo ngenyathelo, lokuthi babezathola abangane abazabancedisa kuyo yonke indlela, kuze kuthi ekucineni isikwelede sonke sibhadalwe.
GSAM 447.2Njengomunye wabalutshwana ababekhona emihlanganweni esengikhulume ngayo, ngingatsho ukuthi umcabango wokuthi lelo qembu, elalilabantu phose bonke ababengabayanga balumhlaba, liqalise ukwakha indlu yokuhlangana engamafithi angu-35 x 80, edolobheni lapho kwakubonakala sengathi isiza esilentengo ephansi kakhulu sasibiza okungenani $6,000, wawubonakala ngempela “njengokuthatha inyathelo emnyameni.” Bakhuthazeka ukuthatha inyathelo lelo kuphela ngenxa yokwethemba kwabo ngokupheleleyo ukuthi ubufakazi ababubikelwa nguNkosikazi White babuphuma eNkosini, njalo babuzagcwaliseka impela.
GSAM 447.3Njengoba bengilokuxhumana lomsebenzi lo ngezinga elithile kusukela ekuqaleni kwawo kuze kube khathesi, ngifisa ukutsho lapha ukuthi ubufakazi obungenhla bugcwaliseke kukho konke. Lapho siqala ukudinga iziza, senelisa ukuthola isiza esibiza $6,000 ngo-$4,000. Omunye udadewethu wathi wayezanikela ngo-$1,000 nxa wayengathengisa indawo yakhe. Wahle wanika umthengisi wezindlu lezindawo umsebenzi wokuyithengisa, yena wamtshela ukuthi intengo yakhe yayiphansi kakhulu. Kungakapheli amaviki amabili, indawo yakhe yathengiswa ngemali eyayedlula leyo ayeyiqambile ekuqaleni ngo-$1,000, wasenikela imali ayeyithembisile. Omunye, umfowethu ongumyanga, owayengaboni ukuthi indlu yebandla yayingakhiwa njani, kodwa esithi: “Nxa iNkosi isithi kufanele kwenziwe, izavula indlela ngandlela ithile,” wamangala lapho esizwa ukuthi ukwabiwa kwelifa lesinye isihlobo sakhe kwasekuphelile, njalo ngalokho wayeselama-$20,000. Wanikela ngo-$1,000 ekwakheni, wathenga lengxenye yesithathu yesiza sebandla ukuze azakhele indawo yokuhlala, ngaleyondlela encedisa inhlangano ngezindlela ezimbili.
GSAM 448Usizo Oluqakathekileyo ESan Francisco
GSAM 448.1Besingabala izipho ezinengi losizo olwatholwa yikomithi lapho iqhubeka ngokwakha indlu. Sekwanele ukuthi indlu yebandla yakhiwa ngezindleko ezazingaba yi-$14,000, kuhlanganiswe lesiza, njalo izipho zasezihlangabeze okwedlula ingxenye yezindleko lezo indlu ingakapheli. Umgwaqo uLaguna, lapho okwakhiwa khona indlu, wawusengxenyeni yedolobho eyayisilela izakhiwo zezikolo. Ngakho ibhodi lezikolo lafika laqhatsha amakamelo angaphansi ukuze kuvulwe isikolo, indlu ingakafulelwa. Imali yokuqhatsha engamadola angamatshumi ayisikhombisa lanhlanu ngenyanga, eyatholwa phose okweminyaka emibili, yabhadala inzalo lezindleko zokuqhuba indlu, kwatshiya inhlangano isenelisa ukusebenzisa imali eyayingayibutha ekubhadaleni isikwelede esasisasele.
GSAM 448Indawo Yokwelapha Ngamanzi
GSAM 448.2Khathesi kusele ingxenye encinyane yesikwelede esenziwa ngaleso sikhathi, njalo ngaphansi kwendlu yebandla kulendawo yokwelapha ngamanzi elayo yonke impahla edingekayo, engelabunzima bemali. Inani layo lidlula kakhulu isikwelede esiseleyo, esizaphela masinyane.
GSAM 448.3Ingxenye yobufakazi emayelana lokwamukela kwabantu iqiniso igcwaliseke ngokumangalisayo kakhulu. Akusibo abangamatshumi kuphela, kodwa abangamakhulu abamukele ukukhanya kweqiniso kulelo dolobho, njalo khathesi sebehlakazekile ezindaweni ezitshiyeneyo zomhlaba. Ngezikhathi ezitshiyeneyo nxa ngivakatsha eSan Francisco, ngibona abantu abaphakathi kwababili labalitshumi abamukele iqiniso selokhu ngacina ukuhlangana labo; kodwa ukuphela kakukafiki.
GSAM 449Ukufa KukaMdala White
GSAM 449.1Ngomnyaka ongaba ngu-1880, uNkosikazi White wafundiswa ngoMoya wesiprofetho ukuthi atshele umkakhe, uMdala James White, ukuthi ayekele imithwalo eminengi lokunakekela izinto ezinengi ayekuthwele, akudlulisele kwabanye abasebatsha, yena abe “eselungiselela inguquko yakhe yokucina”—kutshiwo ukuthi umjaho wakhe wasemhlabeni wawususondele ekupheleni. Waqala ukulalela imfundiso le, njalo kwakufanele ayilalele ngaleso sikhathi, ngoba ngomnyaka ka-1881 imisebenzi yakhe yaphela, walala kuJesu. Mhlaka 31 Ntulikazi wahlaselwa ngumkhuhlane wemalariya. Mhlaka 3 Ncwabakazi wasuswa emzini wakhe wasiwa esibhedlela saseBattle Creek, lapho anakekelwa khona ngayo yonke indlela eyayingenzeka, kodwa akusizanga. Waqhubeka esiba kubi. Kusukela ekuqaleni kokugula kwakhe wayelomuzwa wokuthi “inguquko yakhe yokucina” yayisifikile.
GSAM 449Amazwi KaMdala Smith
GSAM 449.2Ekhuluma ngesehlakalo lesi, uMdala Uriah Smith uthi: “Izimo zokufa kwakhe zazingeke zibe ngcono kulalezo ezazikhona. Ngezinsuku ezintathu zokucina zokugula kwakhe, nxa wayesakwazi okwakusenzakala, wayefakaza ukuthi wayengezwa buhlungu. Ixuku elikhulu labangane abaqotho ababelezinyembezi lema ngaphakathi leseduze kwendlu, ngesikhathi impilo yakhe yayiphela kancinyane ngaleyontambama yeSabatha enhle. Wehlela ekufeni njengomuntu ozumeka ngokuthula; njalo sekwedlulile konke, kwakhanya ukuthula okumnandi kugxilile kubo bonke ubuso bakhe. Kwakungathi umthandazo lo wawuphenduliwe:
GSAM 449.4Ekufeni kwakhe wayeleminyaka engamatshumi ayisithupha lensuku ezimbili. Ukuhlonitshwa kwakhe eBattle Creek kwabonakala ngokuthi abantu abangekho ngaphansi kwezinkulungwane ezimbili lamakhulu amahlanu babekhona emngcwabeni wakhe, mhlaka 13 Ncwabakazi. Walandelwa waze wayafika endaweni yakhe yokucina yokuphumula emathuneni ase-Oak Hill ludwendwe lwezinqola ezingu-95 kanye lexuku labantu ababehamba ngezinyawo.
GSAM 450.1Ebufakazini obunengi obanikezwa ngemva kokufa kwakhe, obashicilelwa ku-Isibuyekezo loMemezeli, sicaphuna okulandelayo okwalotshwa nguMdala S. N. Haskell:—
GSAM 450.2“Nxa ngikhumbula ukwahlulela kwakhe okuhle phose kuzo zonke izikhathi zobunzima, inhliziyo yakhe emnene lobuntu bakhe obuhle ayebutshengisa kulabo abadukileyo, ngitsho lakulabo ababemphathe kubi, nxa ebona ubufakazi bokuphenduka kwabo, kanye lothando lwakhe kulokho ayekholwa ukuthi kuqondile, ngingatsho ngeqiniso ukuthi: Ubaba ko-Israyeli usewile. Njengoba ephumula, umsebenzi kaNkulunkulu, kanye labantu abanengi, bazakuzwa ukuswela ukubona kwakhe khatshana lokunakekela kwakhe njengobaba.”
GSAM 450.3Lapho esifa, izitha zethu zathi umlayezo wawusuzakuma. Akubanga njalo; lezo zikhungo ezazisungulwe nguye ngaphansi kwesandla sikaNkulunkulu zazizakhula zibe nkulu kakhulu, zibe “njengezihlahla ezihlanyelwe yiNkosi,” okwakuzaphuma kuzo ingatsha ezinengi ezithela izithelo.
GSAM 450Ukubekwa Kwemithetho Ephathelene Lenkolo Kwabikezelwa
GSAM 450.4Sekwedlule iminyaka engu-58 selokhu labo ababethula umlayezo wengilosi yesithathu bathi isikhathi sasizafika, ngokwesiprofetho seSambulo 13, lapho abantu babezahlukunyezwa khona e-United States lakwezinye izindawo ngenxa yokugcina imithetho kaNkulunkulu. Encwadini eyalotshwa nguNkosikazi White, elesihloko esithi Imibhalo Yakuqala, sibala lokhu mayelana lemfundiso le:—
GSAM 450.5“Ingilosi yathi: ‘Khangelani!’ Ngakhangeliswa ababi, loba abangakholwayo. Bonke babexokozela. Ukutshiseka lamandla okwakusebantwini bakaNkulunkulu kwakubavusile kwabathukuthelisa. Kwakuyisiphithiphithi, isiphithiphithi inxa zonke. Ngabona amanyathelo ethathwa okumelana leqembu elalilokukhanya lamandla kaNkulunkulu. Umnyama wabazungeza waba mkhulu; kodwa bema beqinile, bevunyelwe nguNkulunkulu, bethembele kuye. Ngababona bedidekile; ngasengibezwa bekhala kuNkulunkulu ngokukhuthala. Emini lebusuku isikhalo sabo kasizange sithule: ‘Intando yakho, O Nkulunkulu, kayenziwe! Nxa kungadumisa ibizo lakho, vulela abantu bakho indlela yokuphunyuka! Sikhulule kwabezizwe abasihanqileyo. Basimisele ukufa; kodwa ingalo yakho ingaletha insindiso.’”2
GSAM 451.1“Ngasengibona amadoda akhokhelayo omhlaba ecebisana, loSathane lezingilosi zakhe bematasatasa bewazungezile. Ngabona umbhalo, amakhophi awo ayehlakazwe ezindaweni ezitshiyeneyo zelizwe, uqukethe imilayo yokuthi, ngaphandle kokuba abangcwele bayekele ukholo lwabo olubehlukanisayo, batshiye iSabatha, bagcine usuku lokuqala lweviki, abantu babevunyelwe ukubabulala ngemva kwesikhathi esithile.”3
GSAM 451Ukuhlukuluzwa eMelika
GSAM 451.2Abasiphikisayo bathe ukuhlukuluzwa akusoze kwenzakale kuleli lizwe, ngoba uMthethosisekelo we-United States uthi “iKhongiresi kayisoze yenze umthetho wokumisa inkolo, loba owalela ukukhonzwa kwayo ngenkululeko.” Phezu kwalokhu, “uMqulu Wamalungelo” wezifundazwe ezinengi uyakwalela ukwenziwa kwemithetho ephathelane lenkolo. Lanxa bekhuluma beqiniseka kanje, abantu bakithi baqhubekile bememezela umlayezo wesixwayiso kanye lokulungiselela okudingekayo ukuze bahlangane lalokhu kulwisana.
GSAM 451.3Ngo-1863 kwasungulwa inhlangano eyayilenhloso yokuguqula uMthethosisekelo we-United States lemithetho yelizwe, ukuze isetshenziswe ngamandla ekubambeni abantu ngamandla ukuthi balandele inkolo. Imicabango le isithole abalandeli masinyane kakhulu, njalo isimiso sokubamba abantu ngamandla ukuthi benze okulungileyo, ikakhulu ngokugcina usuku lokuqala lweviki, sesisamukelwe kakhulu, kangangokuthi ukuhlukuluzwa okubuhlungu sekuqalile ezifundazweni ezinengi. Lokhu kwenzakele lasezifundazweni lapho imithetho yosuku lokuqala lweviki ivumela labo abagcina olunye usuku ngenxa yomzwangedwa wabo, njalo abantu sebebotshiwe ngenxa yokungagcini usuku lokuqala lweviki.
GSAM 452Ukubotshwa Okulikhulu Letshumi Lesithupha
GSAM 452.1Phambi kwami kuloluhlu lokubotshwa okulikhulu letshumi lesithupha kwama-Adventist osuku lwesikhombisa eMelika, kusukela ngomnyaka ka-1878 kuze kube nguMbimbitho, 1896. Kulaba, abalikhulu layisificamunwemunye batholakala belecala. Abanengi babo babotshwa okwensuku ezingamatshumi amabili kusiya kwezingamatshumi ayisithupha, njalo abangaba litshumi lambili babanjwa ngamandla ukuthi basebenze “eqenjini lezibotshwa ezibotshwe ngamaketane” lababulali, amasela lezigebenga ezimbi kakhulu. Kuzo zonke lezi zehlakalo, labo ababebagweba bavuma ukuthi babeyizakhamizi ezinhle kakhulu.
GSAM 452Inhlangano Yenkululeko Yenkolo
GSAM 452.2NgoNtulikazi 21, 1889, eBattle Creek, Mich., kwasungulwa inhlangano eyabizwa ngokuthi yiNhlangano Yelizwe Yenkululeko Yenkolo. Inhloso yayo yayiyikuphikisa imithetho ephathelane lenkolo, ukwazisa abantu abanengi ngobudlelwano obuqondileyo phakathi kwenkolo lohulumende welizwe, kanye lokunceda labo abahlukuluzwa ngenxa yomzwangedwa wabo. Inhlangano le yenza umsebenzi omkhulu kakhulu wokusabalalisa imibhalo lokukhanyisela abantu ngemisebenzi langezingozi zaleso sikhathi esizweni sakithi. Ngeqiniso, yenza umsebenzi omkhulu wokwandisa izixwayiso ezisemlayezweni weSambulo 14:9-12.
GSAM 452Uncedo Lwamaphephandaba Angasiwo Awenkolo
GSAM 452.3Ukuhlukuluzwa okwakuvutha ngaleso sikhathi kuma-Adventist osuku lwesikhombisa kwakhulunywa ngakho ezihlokweni zabahleli bamaphephandaba anjenge-New York Sun, i-New York World, le-Chicago Inter Ocean, lamanye. Kwavela izihloko ezakhuluma ngokukhululeka ngokungabi lokulunga kwendlela isakhamuzi se-United States esasiphathwa ngayo ngenxa yokulalela umzwangedwa waso, lokugcina lona kanye usuku olumiswe emlayweni. Ngezihloko zamaphephandaba ezinjalo, indaba le yafikiswa kuzigidi zabafundi. Ngenyanga eyodwa iqiniso eliyinsika yomlayezo wengilosi yesithathu laziswa abantu abanengi kulalabo esasenelise ukubafinyelela eminyakeni edlula amatshumi amabili.
GSAM 453Ulaka Lomuntu Lwenziwa Ukuthi Ludumise INkosi
GSAM 453.1Ngakho kuyabonakala ukuthi imizamo yabantu yokuvimba umsebenzi kaNkulunkulu, leyokuthola imithetho yokusekela elinye iSabatha eliphikisana lalelo elilaywe emlayweni wesine, isivule indlela yokuthi iqiniso liqhubekele phambili masinyane kakhulu.
GSAM 453.2Nxa sicabangisisa ngalokho osekwenziwe ngezinyanga ezimbalwa ngalezindlela, imibhalo emibili isikhumbuza ngamandla. Omunye uthi, “Kasingeke senze lutho oluphikisana leqiniso, kodwa olwenzela iqiniso kuphela;”4 Omunye uthi, “Impela ulaka lomuntu luzakudumisa; okusele kolaka uzakuvimba.”5
GSAM 453Isiprofetho Ngemithetho Yosuku Lokuqala Lweviki
GSAM 453.3Ebufakazini Nombolo 32, obashicilelwa ngo-1885, kulamazwi atsho ukuthi imithetho yosuku lokuqala lweviki yayizaphasiswa njani e-United States. Athi: “Ukuze abenzi bemithetho bathandwe njalo bathole ukusekelwa, bazavuma isicelo somthetho wosuku lokuqala lweviki.”6 Ake sikhangele okwesikhatshana ukuthi lokhu sekugcwaliseke njani.
GSAM 453Imithetho Yombukiso Womhlaba
GSAM 453.4Ngo-1892 kwacelwa iKhongiresi ukuthi yale ukuvulwa ngosuku lokuqala lweviki koMbukiso Womhlaba owawuzakuba seChicago, Illinois, kusukela kuNkwenkwezi kusiya kuMfumfu walowo mnyaka. Umthetho onjalo waphasiswa ngoNtulikazi 19, 1892, ngenxa yokucindezelwa okufana xathu lalokho okwakuprofethwe phezulu. Kukhunjulwe ukuthi lesi kwakuyisikhathi sokuqala lapho iKhongiresi ye-United States yaseNyakatho Melika yenza khona umthetho ngendaba yeSabatha.
GSAM 453.5Amabandla athumela izinhlu ezinkulu kakhulu zamabizo, lezicelo ezibhalwe phansi, lamatelegramu. Kawacelanga kuphela iKhongiresi, kodwa futhi atshela amalunga ayo ngomusa (?) ukuthi “ngalokhu siyazibophelela thina sodwa laphakathi kwethu ukuthi, kusukela khathesi kusiya phambili, sizakwala ukuvotela loba ukusekela, kunoma yisiphi isikhundla loba umsebenzi wokwethenjwa, loba yiliphi ilunga leKhongiresi, kungaba ngelesiSenethi loba elabamele abantu, elizavotela olunye uncedo lwaloba yiluphi uhlobo kuMbukiso Womhlaba ngaphandle kwemibandela etshiwo kulezi zinqumo.” Imibandela yayiyikuthi uMbukiso uvalwe ngosuku lokuqala lweviki.
GSAM 454Izinkulumo EKhongiresi, 1892
GSAM 454.1Ukuze libone isibonelo sezinkulumo ezazikhulunywa eKhongiresi ngesikhathi umthethosivivinywa uphasiswa, fundani okulandelayo:
GSAM 454.1“Ngingathanda ukubona amazwi okwala elotshwe phansi, njalo ethulwa yiKhongiresi ye-United States. Walobeni. Lingawaloba njani? ... Wabekeni ngamazwi, nxa lilesibindi; awasekeleni, nxa lilesibindi; bangaki abawavoteleyo abangabuya lapha futhi? Ngithemba ukuthi akulamunye. Lizifaka engozini ngokukuphikisa.”
GSAM 454Ukuzigqaja Kwebandla
GSAM 454.2Ukuthi labo ababefune njalo bazuza ukuphasiswa kwalumthethosivivinywa eKhongiresi bakubona njengokunqoba okukhulu ecebeni labo lokwenza imithetho ephathelane lenkolo, kuyacaca emazwini omunye wabafundisi laba abaziwayo. Entshumayelweni ePittsburg, Penn., masinyane ngemva kwalokhu, wathi:—
GSAM 454.3“Ukuthi ibandla lilamandla ezinhlanganweni ezinkulu zombusazwe loba ezibusayo kubonakaliswe ngokugcweleyo endabeni yoMbukiso Womhlaba esanda kwedlula. IsiSenethi se-United States, esiyinhlangano ephakeme kulazo zonke elizweni, salalela ilizwi lenkolo, saphasisa umthethosivivinywa wokwabela uMbukiso Womhlaba imali engu-$5,000,000, silombandela owamiswa libandla wokuthi amasango ombukiso omkhulu angavulwa ngosuku lokuqala lweviki. Iqiniso leli elihle kangaka lenza umKhristu acabange ukuthi nxa lokhu kungenziwa, lezinye izinyathelo ezidingeka ngokufananayo zingenziwa. Ibandla liqhubeka lithola amandla, njalo esikhathini esizayo ilizwi lalo lizazwakala kanengi kakhulu kulakuqala.”
GSAM 454.3Ngakho siyabona ukuthi lobo bufakazi obanikwa ngo-1885 sebugcwalisekile njalo buyaqhubeka bugcwaliseka.
GSAM 455Ukumanyana KwamaKatolika LamaProthestani
GSAM 455.1Kulokhu sizakhuluma ngesinye isiprofetho esanikwa ngo-1885, esitholakala laso ebufakazini Nombolo 32:—
GSAM 455.2“Lapho ubuProthestani buzakwelula isandla sabo ngaphesheya komhosha bubambe isandla samandla eRoma; lapho buzakwelula isandla phezu kwalowo mgodi ojulileyo bubambane lokukhulumisana lemimoya yabafileyo; lapho, ngenxa yamandla alumanyano olulezingxenye ezintathu, ilizwe lethu lizalahla zonke izimiso zoMthethosisekelo walo njengohulumende wobuProthestani lowombuso wabantu, njalo lenze amalungiselelo okusabalalisa amanga lokukhohlisa kukapapa, khona sizakwazi ukuthi isikhathi sokusebenza okumangalisayo kukaSathane sesifikile, lokuthi ukuphela kuseduze.”7
GSAM 455.3Ukuze sibonise ukuthi ingxenye yokuqala yalesi siprofetho isigcwaliseka, sidinga kuphela ukukhomba lokho okwenzakala phansi kwamehlo ethu. Khangelani amaProthestani, abafundisi labantu, bedinga ukuthandwa ngamaKatolika, bewamema ukuthi aze emihlanganweni yezinhlangano zabo, lokunye. Kukhunjulwe ukuthi ngo-1885, lapho ubufakazi obungenhla buphiwa, cishe kwakungakabonakali lutho lwalokho okubonakala khathesi kulokhu.
GSAM 455.4Ukuze ngibonise ukuthi amaProthestani azama njani ukubamba isandla lokuthola uncedo lwabalandeli bakapapa, ngicaphuna ku-Kansas City (Mo.) Star kaMbimbitho 18, 1896.
GSAM 455AmaWeseli LoSuku LukaPatrick ONgcwele
GSAM 455.5NgoSuku lukaPatrick oNgcwele, uMbimbitho 17, 1896, uDokotela Mitchell, umfundisi webandla lamaWeseli elihamba phambili eKansas City, wakhuluma eNdlini Yemidlalo Yokuhlabelela iCoates, eKansas City, Mo. I-Star ibiza enye ingxenye yalenkulumo ngokuthi “yisehlakalo esifitshane esinjengesomdlalo.” UDokotela Mitchell watshayelwa ihlombe elikhulu lapho esithi:—
GSAM 455.6“Ukubandlulula ngokwenkolo ngumntwana wokungazi. Siyabandlulula ngoba asibazi kuhle ngokwaneleyo omakhelwane bethu. Thina maProthestani safundiswa ukukholwa izinto ezimbi ezingeke zikhulunywe ngamaKatolika. AmaKatolika afundiswa ukukholwa izinto ezimbi ezingeke zikhulunywe ngamaProthestani. Khathesi sesibona ukuthi besicabangana ngokuphambeneyo nxa sisondelana size sibukane emehlweni sibambane ngezandla; aluba besisazana kakhulu besizathandana kangcono. Simele khatshana omunye komunye sasolana. Lihlazo kubalandeli bakaKhristu obusisiweyo. Wonke amaKhristu ahlengwe ngegazi linye eliligugu; sigcinwa ngumusa munye kaNkulunkulu, njalo sithemba ukufika ezulwini linye. Lalelani, bafowethu, kungcono sazane lapha phansi.”
GSAM 456.1I-Star iyaqhubeka ithi:—
GSAM 456.2“UDokotela Mitchell wasephendukela kuBaba Dalton [umphristi wamaKatolika] owayehlezi ngemva kwakhe, welula isandla sakhe wathi, ‘Nansi, Mfowethu Dalton, isandla sami.’ UBaba Dalton wasukuma wabamba isandla eseluliweyo, njalo uDokotela Mitchell esixhawula wathi, ‘Kungaba lihlazo elibi kakhulu nxa, ngemva kokuhlala isikhathi eside kangaka edolobheni linye emhlabeni, besingadinga ingilosi ukuthi isazise omunye komunye ezulwini. Asazaneni lapha emhlabeni.’ Izilaleli zatshaya ihlombe, njalo ngemva kokuba uBaba Dalton ehlezi phansi, uDokotela Mitchell waqhubeka ngenkulumo yakhe.”
GSAM 456Into Enkulu Ezaletha Isinqumo
GSAM 456.3Sicaphuna komunye umbhalo olosuku lukaNhlolanja 18, 1892, waseMelbourne, Australia:
GSAM 456.3“Lonke izulu ngilitshengiswa likhangele ukwembuleka kwezehlakalo. Kuzabonakaliswa isikhathi esinzima empikiswaneni enkulu esithathe isikhathi eside ephathelane lokubusa kukaNkulunkulu emhlabeni. Kuzakwenzakala into enkulu ezaletha isinqumo, njalo lokho masinyane kakhulu.”
GSAM 456“Isizwe SamaKhristu” Somahluleli Brewer
GSAM 456.4Ngemva kwensuku ezilitshumi lanye kulotshwe lumbhalo, njalo ungakafiki e-United States, kwenzakala into amaProthestani lamaKatolika womabili ayibiza ngokuthi yenza isinqumo ngekusasa lalesi sizwe. Ngikhuluma ngesinqumo seNkantolo Ephakemeyo ye-United States sokuthi “Lesi yisizwe samaKhristu,” esakhutshwa mhla ka-29 kuNhlolanja nguMahluleli oMkhulu uBrewer. Njengoba sekubonisiwe, mhla ka-19 kuNtulikazi walowo mnyaka kwaphasiswa uMthethosivivinywa Wokuvala uMbukiso Womhlaba Ngosuku Lokuqala Lweviki. Abafundisi ababekhuthaza ngamandla kangaka ukuthi uphasiswe, bancenga kakhulu besithi, njengoba iNkantolo Ephakemeyo yayisithe lesi yisizwe samaKhristu, kwakufanele nje ukuthi iSabatha lamaKhristu livikelwe ekungcolisweni. Leqembu leNguquko Yelizwe lacabanga kanjalo. Njengoba lesi yisizwe samaKhristu, kufanele samukele uNkulunkulu lemithetho yakhe njengesisekelo sikahulumende, lokunye. Ngeqiniso kwenzakala into enkulu eyaletha isinqumo kulempikiswano yokucina, “njalo lokho masinyane kakhulu.”
GSAM 457Abaprofethi Basendulo
GSAM 457.1Emibonweni eyaphiwa izinceku zikaNkulunkulu, abaprofethi, kwakubonakala kulezinhlobo ezimbili—olunye lwaluthiwa “yimibono evulekileyo,” okutsho eyayiphiwa lapho umuntu ebonakala kwabanye esembonweni; olunye lwaluthiwa “yimibono yasebusuku.” Kukhulunywa ngemibono yohlobo lokuqala ku-1 USamuyeli 3:1, lapho kutholakala khona okwenzakala emntwaneni uSamuyeli ngalamazwi: “Ilizwi leNkosi laliyigugu ngalezonsuku; kwakungelambono ovulekileyo.”
GSAM 457Imibono Evulekileyo
GSAM 457.2Kwakungumbono walolu hlobo (umbono ovulekileyo) lapho isandla seNkosi sasiphezu komprofethi uHezekheli. Njengoba abadala bakoJuda babehlezi phambi kwakhe, bambona esembonweni ovulekileyo.8 Ngesinye isikhathi umprofethi uDanyeli wathathwa ngumbono ephakathi kwababusi bamaKhaledi. Aluba bahlala, babengambona esembonweni, kodwa endaweni yalokho, “ukuthuthumela okukhulu kwabehlela, baze babaleka bayacatsha.”9
GSAM 457Imibono Yasebusuku KaNkosikazi White
GSAM 457.3Imibono yokuqala kaNkosikazi White yonke yayiyimibono evulekileyo. Kusukela ngo-1884, isimo semibono siguqukile kulokhu, njengoba khathesi isiyilokho iMibhalo ekubiza ngokuthi “yimibono yasebusuku.” Kayisiwo amaphupho nje, kodwa kubonakala yona leyo ngilosi ekhanyayo imnika izifundiso, njengaseminyakeni yakuqala emibonweni evulekileyo. Izibonelo ezinengi “zemibono yasebusuku” zilotshiwe eBhayibhilini, njengoba kubonakala lula ngokufunda uGenesisi 46:2; uDanyeli 2:19; 7:13; ImiSebenzi 16:9; 18:9; 23:11; 27:23-25.
GSAM 458.1Kulemibono yasebusuku kaNkosikazi White kunikwe iziprofetho ezinengi eziqakathekileyo, ezigcwaliseke ngokunemba okukhulu, njengalokho osekuveziwe. Khathesi ngizakhuluma ngeminye imibono eyaphiwa muva.
GSAM 458Ukuthuthela EWashington
GSAM 458.2Ngo-1893, uNkosikazi White wathi:
GSAM 458.2“Imisebenzi eminengi kakhulu isibuthelelwa eBattle Creek. Aluba leyomisebenzi yayingehlukaniswa ibekwe kwamanye amadolobho, lapho ukukhanya lolwazi okungabusisa khona ezinye izindawo, lokho kwakuzavumelana lohlelo lukaNkulunkulu. INkosi kayifuni iJerusalema yesibili eBattle Creek. Kuzafuneka kube lenguquko enkulu lokuguqulwa kwezinto, lokuthuthwa kwezakhiwo lamathuluzi lezikhungo, nxa intando kaNkulunkulu izakwenziwa.”
GSAM 458.3ENgqungqutheleni Jikelele e-Oakland, Cal., ngoMbimbitho, 1903, wathi:
GSAM 458.3“Okweminyaka abantu bakithi baphiwe isixwayiso esithi, Phumani eBattle Creek. Kodwa ngenxa yemisebenzi eminengi eyayimiswe khona, kwakulula ukusala, njalo abantu babengaboni ukuthi kungani kufanele bathuthe.”
GSAM 458.4“Ekuphenduleni umbuzo obuziweyo ngokuyahlala kwenye indawo, ngiphendula ngithi, Yebo. Amawofisi eNgqungquthela Jikelele lomsebenzi wokushicilela kawasuswe eBattle Creek. Angazi ukuthi indawo izakuba ngaphi, loba izakuba ogwini lwe-Atlantic kumbe kwenye indawo. Kodwa lokhu ngizakutsho ngithi, Lingabeki loba yiliphi ilitshe loba isitina eBattle Creek ukuze lakhe kutsha iwofisi ye-Review lapho. UNkulunkulu ulendawo engcono yayo.”
GSAM 458.5Ngemva kokuzwa lezi ziqondiso, inkomfa yamakholwa yavota “ukuthi amawofisi eNgqungquthela Jikelele asuswe eBattle Creek, Mich., aye kwenye indawo ogwini lwe-Atlantic.”
GSAM 459.1Emkhandlwini weNgqungquthela Jikelele owabanjelwa eBattle Creek ngemva komhlangano weNgqungquthela Jikelele, kwavotwa “ukuthi sisekela ukubekwa kwesigodlo sewofisi yeNgqungquthela Jikelele endaweni eseduze ledolobho leNew York.” Ngakho kwakhethwa ikhomithi enkulu ukuthi idinge indawo eyayingenelisa. Ikhomithi yazisa uNkosikazi White ngecebo layo, yabuza ukuthi wayelokunye ukukhanya angabapha khona yini. Ekuphenduleni wathi:—
GSAM 459.2“INkosi kayisincede ukuthi sihambe ngokuhlakanipha langokukhuleka. Ngileqiniso lokuthi iyathanda ukuthi sazi, njalo masinyane kakhulu, ukuthi kufanele siyibeke ngaphi indlu yethu yokushicilela. Ngiyaneliseka ukuthi indlela yethu ephephileyo yinye kuphela, yikuhlala silungele ukuthutha lapho nje iyezi lithutha. Asikhulekeni ukuthi isiqondise. Isitshengisile ngokuqondisa kwayo ukuthi ifuna sisuke eBattle Creek....
GSAM 459.3“Umsebenzi kufanele wenziwe eNew York, kodwa angingeke ngitsho ukuthi indlu yethu yokushicilela kufanele imiswe khona yini. Angiboni ukukhanya engikuphiweyo njengokucace okwaneleyo ukuthi ngisekele ukuthuthela khona.”
GSAM 459.4Ngemva kokuchitha phose amaviki amabili idinga edolobheni leNew York lasemadolobheni aseduze, ikhomithi yehluleka ukuthola indawo efaneleyo yendlu yokushicilela. Ngalesi sikhathi kwafika incwadi eyayilosuku lukaNkwenkwezi 30, lapho uNkosikazi White athi khona:—
GSAM 459.5“Njengoba abafowethu bedinga indawo yendlu yokushicilela ye-Review and Herald, kufanele bayidinge ngobuqotho iNkosi. Kufanele bahambe ngonanzelelo olukhulu, ngokulinda langokukhuleka, behlala bekhumbula ubuthakathaka babo. Akufanelanga sithembele ekwahluleleni kwabantu. Kufanele sidinge ukuhlakanipha okuphiwa nguNkulunkulu....
GSAM 459.6“Ngokumiswa kwalesi sikhungo eNew York, kufanele ngithi, Qaphelani. Angisekeli ukuthi sibe seduze leNew York. Angingeke nginike zonke izizatho zami khathesi, kodwa ngileqiniso lokuthi loba yiphi indawo ephakathi kwamamayela angamatshumi amathathu kusukela kulelo dolobho izabe iseduze kakhulu. Hlolisani okuzungeze ezinye izindawo. Ngileqiniso lokuthi okuhle okutholakala eWashington, D.C., kufanele kuhlolisiswe.
GSAM 460.1“Akufanelanga simise lesi sikhungo edolobheni kumbe emaphethelweni edolobho. Kufanele simiswe endaweni yasemaphandleni, lapho esingenelisa khona ukuzungezwa ngumhlabathi.”
GSAM 460Isiprofetho Sethuba Lokuthenga Ngentengo Enhle
GSAM 460.2Ilalolu lwazi, ikhomithi yaqala ukukhangela ezindaweni eziseduze leWashington ngokukhuleka, kwasekufika incwadi yesithathu eyayilalezi ziqondiso:
GSAM 460.2“Besikhulekela ukukhanya ngendawo yomsebenzi wethu eMpumalanga, njalo ukukhanya kusifikile ngendlela ecace kakhulu. Ngiphiwe ukukhanya okuqinisekileyo ukuthi sizanikwa ithuba lokuthenga izindawo abantu ababelemali yokuyisebenzisa ngokukhululeka abachithe kuzo imali enengi. Abanikazi balezi zigodlo bayafa, kumbe banake enye into, impahla le ithengiswe ngentengo ephansi kakhulu....
GSAM 460.3“Ngokukhanya engikuphiweyo, ngiyazi ukuthi, okwamanje, isigodlo se-Review and Herald kufanele sibe seduze leWashington.”
GSAM 460Indawo Eyaprofethwayo Iyatholakala
GSAM 460.4Ilombhalo lo esandleni, ikhomithi yaqala ukudinga indawo esiFundeni seColumbia, kodwa kwakungatholakali mhlabathi owawubiza ngaphansi kwamadola ayinkulungwane nge-ekha. Ekucineni bakhonjiswa iTakoma Park. Okulandelayo ngumbiko wekhomithi:—
GSAM 460.5“Sathola isiqinti esingaba ngama-ekha angamatshumi amahlanu ngaphandle nje kwesiFunda, kodwa siphakathi kwemingcele yedolobho leTakoma Park, esasingasithenga ngamadola azinkulungwane eziyisithupha, kumbe ngentengo yamadola alikhulu lamatshumi amabili nge-ekha. Sayihlolisisa kakhulu le indawo. Sathola ukuthi eminyakeni ethile eyadlulayo yakhethwa ngudokotela waseBoston ukuba yindawo yesikhungo sokwelatshwa lokuphumula. Kuthiwa wachitha amadola angaba zinkulungwane ezingamatshumi ayisithupha ekuyithengeni lasekuyihlambululeni, esusa zonke izihlahla ezincane, izigodo lezibi. Ubunzima bemali bamvimbela ukuthi afeze amacebo akhe, njalo isiqinti leso sadlulela ezandleni zenye indoda eyayisibambile njengesibambiso sesikwelede, yona yasithola ngamadola azinkulungwane ezilitshumi lanhlanu.
GSAM 461.1“Izakhamizi zeTakoma Park, ezazimelwe ngusodolobho labanye babantu abakhokhelayo, zasamukela ngentokozo enkulu kule indawo, zasiqinisekisa ukuthi zizabambisana lathi ngobungane ekufezeni amacebo ethu.
GSAM 461.2“Kukho konke ukuhamba lokudinga kwethu, kasitholanga enye indawo eyagcwalisa ngokugcweleyo izimfuneko zobufakazi njengale. Sikholwa ukuthi ukuqondisa kukaNkulunkulu kusiholele endaweni afuna sihlale kuyo.”
GSAM 461.3Ngenxa yokugcwaliseka okunengi kobufakazi okuvezwe kulesi sahluko lakwezanduleleyo, “asikholweni eNkosini uNkulunkulu wethu, ukuze siqiniswe; sikholwe umprofethi wayo, ukuze siphumelele,” ukuze silungele izehlakalo ezisazayo, zingasifici singalindelanga.