Isahluko 24 — Ezinye Iziprofetho Ezagcwaliseka
GSAM 376.1“Cabangani khathesi kusukela kulolusuku kusiya phambili, kusukela ngosuku lwamatshumi amabili lane lwenyanga yesificamunwemunye, yebo, kusukela ngosuku okwabekwa ngalo isisekelo sethempeli leNkosi, cabangani ngakho. Imbewu isesiphaleni yini? Yebo, kuze kube khathesi umvini, lomkhiwa, lesihlahla sephomegranathi, lesihlahla som-oliva kakukatheli izithelo; kusukela kulolusuku ngizalibusisa.”1
GSAM 376.2Ukuthuthuka okuqinisekileyo lokungaguqukiyo komlayezo wengilosi yesithathu kusukela ekuqaleni kwawo kungafaniswa kuhle lokuphumelela kukaZerubhabheli kusukela ngosuku abeka ngalo ilitshe lesisekelo sethempeli.
GSAM 376Umsebenzi Owawukhanya Unzima Kakhulu
GSAM 376.3Lapho abantu bamaJuda bebizwa ukuba bakhe ithempeli leNkosi, bengelamali futhi iziphala zabo zingelalutho, kwakukhanya emehlweni abantu njengomsebenzi onzima kakhulu. Lapho belalela ukubizwa ngokholo, bebamba umsebenzi ngenhliziyo evumayo, isandla sikaNkulunkulu esiletha ukuphumelela sabonakala kubo. Nxa silandela okwenzakala ekuveleni kwalumlayezo wesithathu, sibona isandla esikhokhelayo silalabo abakhetha indlela yakhe. Lanxa behlangana lokuhlupheka, ukunakekela kukaNkulunkulu abantu bakhe lomsebenzi wakhe kuhlala kubonakala ngokucacileyo kulabo abamethembayo.
GSAM 376Ubufakazi Obuveza Isimilo
GSAM 376.4Mhlaka 24 kuLwezi, 1862, kwaba lemihlangano emibili ngesikhathi esisodwa endlini kaWilliam Wilson, eGreenville, Mich., ngenjongo yokuhlela amabandla amabili alabo ababesamukele iqiniso leSabatha kuleyondawo. Umhlangano webandla laseGreenville wawukhokhelwa nguMdala White lomkakhe kwelinye ikamelo, mina loMdala Byington sikhokhela umhlangano webandla laseWest Plains kwelinye ikamelo. Sisematasa ngomsebenzi wokuqala kwelinye ikamelo, sasilizwa ilizwi likaNkosikazi White enika ubufakazi bakhe kwelinye ikamelo. Sasihlangana lobunzima obuthile emsebenzini wethu, kwathi ngesikhathi esifaneleyo kanye, uNkosikazi White wavula umnyango wathi: “Mfowethu Loughborough, nxa ngikhangela leliqula ngiyabona ukuthi ngilobufakazi ngabanye babantu abakhona. Nxa selilungile, ngizangena ngikhulume.” Njengoba kwakuyiso kanye isikhathi esasidinga ngaso uncedo, wangena. Ngaphandle kukaMdala Byington lami, wayesazi amabizo abantu abathathu kuphela ababekulelokamelo. Abanye wayengabazi, engakaze ababone ngaphandle kwalapho babetshengiswe kuye embonweni.
GSAM 377Impilo kaMnumzana Pratt Iyachazwa
GSAM 377.1Lapho esukuma ukuba akhulume, wathi: “Kuzamele lingixolele ekulandiseni engifanele ukukutsho, nxa ngichaza ukubonakala kwenu, ngoba kangiwazi amabizo enu. Nxa ngibona ubuso benu, kuza phambi kwami lokho iNkosi ethande ukungitshengisa ngani. Lowomuntu osekhoneni olelihlo elilodwa [omunye wakhuluma wathi: ‘Ibizo lakhe nguPratt’] utsho amazwi amakhulu ngokukholwa kwakhe, azenze okholwa kakhulu, kodwa kakaphenduki. Lingamamukeli ebandleni esesesimeni sakhe samanje, ngoba kasuye umKhristu. Uchitha isikhathi sakhe esinengi ezihlalele ezindaweni zokusebenzela lasezitolo, ephikisana labantu ngemfundiso yeqiniso, kuthi umkakhe ekhaya kube nguye ogawula inkuni, anakekele isivande, lokunye. Ekuthengiselaneni kwakhe wenza izithembiso angazigcwalisiyo. Omakhelwane bakhe kabakuthembi ukuzitsho kwakhe ukuthi ungumuntu okholwayo. Kungaba ngcono emsebenzini wokukholwa ukuthi, esesesimeni sakhe samanje, angatsho lutho ngakho.”
GSAM 378UMfowethu Barr Uyathokoziswa
GSAM 378.1Waqhubeka wathi: “Lumfowethu osekhulile [wathi emkhomba, omunye wathi: ‘NguMfowethu Barr’] ngatshengiswa yena ephambene lalowomunye umuntu. Impilo yakhe iyisibonelo esihle kakhulu, uyananzelela ukugcina zonke izithembiso zakhe, njalo wondla kuhle imuli yakhe. Kalesibindi phose sokukhuluma ngeqiniso kubomakhelwane bakhe, esesaba ukuthi angaphambanisa umsebenzi enze okubi. Kaboni ukuthi iNkosi ingaba lesihawu esingaka esokumthethelela izono zakhe, njalo uzibona engafanelanga lokuba lilunga lebandla.” Wasesithi kuye: “Mfowethu Barr, iNkosi ingilaye ukuthi ngikutshele ukuthi usuvumile zonke izono obuzazi, lokuthi yazithethelela kudala izono zakho, uba ungakukholwa lokhu.” Ukudana okwakusebusweni bomfowethu kwanyamalala masinyane. Wakhangela phezulu emomotheka, wathi ngenhliziyo engelabuqili: “Isizithethelele yini?” “Yebo,” kuphendula uNkosikazi White, “njalo ngatshelwa ukuthi ngithi kuwe: ‘Woza, uhlanganyele lebandla; kuthi nxa uthola ithuba, ukhulume ilizwi elisekela iqiniso; lizakwenza okuhle, ngoba omakhelwane bakho bayakuthemba.’” Waphendula wathi: “Ngizakwenza.”
GSAM 378.2Wasesithi: “Aluba uMnumzana Pratt ubengahlala okwesikhathi esithile esesimeni esinjengaleso uMfowethu Barr abekuso, bekungamsiza.”
GSAM 378.3Ngaleyondlela kwasuswa esinye isizatho sobunzima bethu ekuhleleni ibandla. Engakaniki ubufakazi bakhe, sasingeke senze uMnumzana Barr avume ukuhlanganyela lebandla; kanti ngakwelinye icele sathola ukuthi phose wonke umuntu wayephikisana lokwamukelwa kukaMnumzana Pratt, kodwa kungekho owayezizwa ekhululekile ukutsho isizatho sokuphikisa kwakhe.
GSAM 378Umona Phakathi Kwabatshadileyo Uyaphela
GSAM 378.4Wasekhuluma lendoda eyayilombala obomvana, eyayihlezi kwelinye icele lekamelo; wakhomba lowesifazana owayelobuso obuzacileyo, ehlezi khatshana kwelinye icele eliqondane lalelo, wakhuluma labo njengendoda lomkayo. Wachaza ezinye izinto ezazenzakele empilweni yabo yakuqala, kungakabi lamunye wabo owayesethe uyakholwa iqiniso. Wathi uSathane wayezikhulisile lezozinto engqondweni yowesifazana waze waphambana ingqondo. “Ngabona,” kutsho uNkosikazi White, “ukuthi lowesifazana wayehlezi umnyaka owodwa endlini yokwelatshwa kwabaphambene ingqondo; kodwa selulame engqondweni, usevumele imizwa yomona efanayo ukuba ikhathaze ingqondo yakhe, okudabukisa kakhulu umkakhe, owenze konke angakwenza ukuze atshengise umkakhe ukuthi uthembekile kuye, lokuthi kalasizatho sokumxotsha ngendlela enza ngayo.”
GSAM 379.1Masinyane umfazi wagijima wachapha ikamelo, waguqa ngamadolo wancenga umkakhe ukuba amthethelele. Lababantu babengaziwa kangako kuleyondawo yelizwe, njalo imbali yempilo yabo yakuqala yayingaziwa. Kodwa labo ababebazi ngcono babesazi ukuthi babengasazwanani, bengasazi isizatho salokho.
GSAM 379Okufanana LokukaElisha LoHazayeli
GSAM 379.2Emva kokuba uNkosikazi White esenike ubufakazi bakhe, umsebenzi wokuhlelwa kwebandla waqedwa masinyane. UMnumzana Barr wangena ebandleni ngenhliziyo yonke, kuthi uMnumzana Pratt watshiywa phandle. Kwathi nje umhlangano usuphelile, uPratt wakhuluma ngamandla esithi: “Ngilitshela lokhu, kakusizi ukuzama ukuhamba lalababantu ube ngumzenzisi; ngeke ukwenze.”
GSAM 379.3Ukuvezwa kwesimilo, njengalokhu okwenzakala ngenhla, kusikhumbuza ngamandla indaba efanayo elotshwe ngezinsuku zikaElisha umprofethi:2 UBhenihadadi, inkosi yaseSiriya, wayethume inceku yakhe uHazayeli kuElisha ukuyabuza ukuthi wayezasila yini ekuguleni kwakhe. UElisha wayeboniswe indaba kaHazayeli, kwathi indoda leyo isiza phambi kwakhe, ekhangela ubuso bayo, konke kwabuya engqondweni yakhe ngokucacileyo.
GSAM 379UMdala White Uhlaselwa Yisifo Sokufa Uhlangothi
GSAM 379.4NgoLwesithathu, mhlaka 16 kuNcwabakazi, 1865, uMdala White wahlaselwa yisifo sokufa uhlangothi ngenxa yokusebenza ngokweqileyo lokungalali ngokwaneleyo. Njengoba izikhungo zezempilo phakathi kwabantu bakithi zazingakasungulwa, wasiwa eDansville, N.Y., esikhungweni sezempilo esasithiwa “Ikhaya Lethu Emthambekeni Wentaba.” Umkakhe lami engilobayo sasikhona laye kusukela mhlaka 14 kuMpandula kuze kube mhlaka 7 kuMpalakazi. Njengoba wayethola ukuphumuza okuncane kuphela ekwelatshweni ayekuthola esikhungweni leso, saya ekhaya likaBradley Lamson elalisamukela kuhle izethekeli, eLake View, eRochester, New York, sahlala khona okungaba ngamaviki amathathu. Lapha sathokoza ukuhlangana loMdala J. N. Andrews, owayesanda kubuyela kulelodolobho, ngemva kokuhlala izinyanga ezinengi eMaine.
GSAM 380Ukukhulekela UMdala White
GSAM 380.1Imuli kaMdala Andrews lekaMnumzana Orton zazihlangana lathi nsuku zonke ntambama ngesikhathi sokukhuleka loMdala White lokumkhulekela. Lokhu kwaqhubeka kwaze kwaba mhlaka 25 kuMpalakazi. Ngesikhathi abantu bangaphandle begcwele ukuthokoza lamadili ngalolosuku lweKhisimusi, ibandla laseRochester lalugcina njengosuku lokuzila ukudla lokukhulekela uMdala White. Saba lemihlangano ekuseni lantambama, endlini kaMdala Andrews, emgwaqweni uNew Main; kwathi kusihlwa labo ababekhuleka loMdala White ngaphambili bahlangana laye futhi endlini kaMnumzana Lamson.
GSAM 380Umbono Owanikwa Ngobusuku BeKhisimusi
GSAM 380.2Umhlangano walobobusuku wawulamandla amakhulu. UMdala White wabusiswa kakhulu, njalo uNkosikazi White wanikwa umbono omangalisayo, lapho atshengiswa khona izinto ezinengi. Phakathi kwazo kwakuleziqondiso ezazisiya kuMdala White zokuthi aqhubeke njani ukuze abonakalise ngokwenza ukholo lwakhe kuNkulunkulu, owayeselule isandla sakhe ngokusobala ukuba amsebenzele ukuze aphinde abe lempilo enhle.
GSAM 380Ukuhlasela KukaSathane Kubikezelwa
GSAM 380.3Kulabo ababekhulekela uMdala White, uNkosikazi White wathi:
GSAM 380.3“Injongo kaSathane yayiyikubhubhisa umkami, amehlisele ethuneni. Ngalimikhuleko eqotho amandla akhe ephuliwe. Ngitshengisiwe ukuthi uSathane ulithukuthelele leliqula eliqhubeke okwamaviki amathathu likhuleka ngobuqotho ngenxa yale inceku kaNkulunkulu, njalo khathesi uzimisele ukubahlasela ngamandla amakhulu. Ngatshelwa ukuthi ngithi kini: ‘Hlalani liseduze kakhulu loNkulunkulu, ukuze lilungele lokho okungalehlela.’”
GSAM 381Imizwa KaJ. T. Orton Yengozi Eyayizayo
GSAM 381.1Ngosuku lokuqala lukaZibandlela, 1866, uMdala White lemuli yakhe basuka ngesitimela besiya eBattle Creek, Michigan. Ngasala entshonalanga yeNew York ebusika obabusele. Kusukela khona kanye kusihlwa okwanikwa ngakho umbono, uMnumzana J. T. Orton wayesizwa ukuthi impilo yakhe isengozini, kodwa wayengazi ukuthi ingozi yayizavela ngaphi. Watshela abantu abambalwa ngalumuzwa. NgeSonto kusihlwa, mhlaka 4 kuMbimbitho, wabuyela eRochester evela eParma, lapho ayekade esemhlanganweni wezinsuku ezimbili, ehamba loMnumzana E. B. Sanders (okhathesi, ngo-1905, ohlala eSan Jose, Cal.). Wamcela ukuthi bahambe ngomgwaqo olokukhanya okunengi kulayo yonke ngesikhathi bedabula edolobheni, wathi: “Ngoba ngihlala ngisizwa angathi kulomuntu ozazama ukungibulala.” Kodwa wayengakhanyi elolwazi lokuthi ngubani owayefuna ukumsusa impilo.
GSAM 381.2Ngabuyela eRochester ngivela eParma mhlaka 7 kuMbimbitho, ngafikela kuMnumzana Lamson, umkhwenyana kaMnumzana Orton. Mhlaka 8 yena loNkosikazi Orton basivakatshela, sahlela ukuthi sihambe ngesitimela ngakusasa ekuseni siye eLancaster, esabelweni seErie, lapho engangizahlanganisa khona indodana yakhe eyodwa lomakoti wayo emtshadweni. Saluchitha kuhle lolosuku, kodwa lwalulusuku olulesizotha.
GSAM 381Ukubulawa KukaJ. T. Orton
GSAM 381.3Basuka emzini kaMnumzana Lamson ngehola lesi-5 ntambama, kwathi ngo-7:30 kusihlwa kwafika isithunywa, sisitshela ngokuhlaselwa okulolunya kukaMnumzana Orton ngumuntu ongaziwayo, esiphaleni sakhe, ngesikhathi enakekela amabhiza akhe. Saphangisa saya kuleyondawo, sathola ukuthi wayetshaywe kabuhlungu ekhanda ngesigodo senkalishi esasibotshwe ngensimbi, njalo wayengasazizwa. Wafa ngo-12:35 ngalobobusuku. Kuze kube lamuhla kakwaziwa ukuthi ngubani owenza lesosenzo esilolunya. Ngokuqinisekileyo kakwenzelwanga imali, ngoba iwotshi yakhe eyayisesikhwameni sesembatho sakhe yayingathintwanga, njalo lesikhwama sakhe semali esasiphethe i-$45 sasingathintwanga. Lokhu kwamethusa kwamlimaza kakhulu uNkosikazi Orton, njalo kazange alulame emiphumeleni yakho. Impilo yomzimba wakhe yawohloka masinyane, njalo kazange aphile isikhathi eside ngemva kokufa komkakhe.
GSAM 382Isiprofetho Esenziwa NgaleyoKhisimusi Siyagcwaliseka
GSAM 382.1Ngezinyanga ezimbalwa ngemva kwalobobusuku beKhisimusi obukhunjulwayo, abayisithupha kwabayisificamunwemunye ababekade bekhuleka kulawomaviki amathathu basebesemathuneni abo. Ngaleyondlela esinye isiprofetho sagcwaliseka ngendlela ecace kakhulu.
GSAM 382Uncedo Kulowo Oselahle Ithemba
GSAM 382.2Ekuseni kakhulu mhlaka 12 kuMpalakazi, 1866, uElias Stiles, waseNorth Liberty, Ind., weza ekhaya lami, engicela ukuthi ngihambe laye ngiye kuleyondawo ukuyanceda, nxa kungenzeka, uJames Harvey, owayeselahle ithemba, esizwa ukuthi akulalo ithemba kuye. Ngisazi ukuthi uNkosikazi White wayeboniswe okunengi kakhulu embonweni wokucina ayewunikiwe, lokuthi izindaba zabantu abanengi wayezitshengiswe ngendlela yesiprofetho, ngathi kuye: “Kungaba yikuthi uDadewethu White ubone okuthile ngendaba yakhe, njalo nxa kunjalo, futhi angakuloba phansi, kuzaba lamandla amakhulu kulakho konke engingakutsho kuye.”
GSAM 382.3Sahle saya kuye, njalo singakakhulumi lelilodwa ilizwi kuye ngesimo sikaMnumzana Harvey, ngabuza ngathi: “Dadewethu White, kukhona yini ukukhanya owakunikiwayo kweminye yemibono oyinikiweyo ngendaba kaMfowethu James Harvey?” “Yebo,” watsho, “kukhona, njalo okwezinsuku ezimbalwa ngizizwe angathi kufanele ngikulobe phansi ngikuthumele kuye.” Waseqala ukusitshela ayekubonile. Ngathi: “Ngizakuyambona ekuseni, njalo nxa ungaloba phansi okutshengisiweyo, ngizakusa kuye.” Sesivumelene ngalokhu, sasuka kuye, sabuya futhi kusihlwa. Wayeseqedile ukuloba, wasenzela umusa ngokusibalela ngelizwi elizwakalayo.
GSAM 383Ubufakazi ngoJames Harvey Ekuphelelweni Lithemba
GSAM 383.1Ubufakazi babuchaza ngokucacileyo ukuthi uMnu. Harvey wayezangeniswa esimeni sempilo esibuthakathaka, lokuthi uSathane wayezazama ukumcindezela aze aphelelwe lithemba, emenza acabange ukuthi kwakungelazwelo kuye njalo kungelathemba ngodaba lwakhe; kodwa wabona ukuthi wayesenzile konke ayesenelisa ukukwenza ukuze alungise amaphutha empilo yakhe yangaphambili, lokuthi uNkulunkulu wayemthethelele; njalo, lapho wayezalingwa ukuthi azibulale, watshengiswa ukuthi izingilosi zikaNkulunkulu zazimhaqile zimkhomba ethembeni kuNkulunkulu lasezulwini. Ubufakazi babulamazwi amanengi afanana lawo enduduzo lokukhuthaza.
GSAM 383.2Ngalombhalo engangilawo, saya ngakusasa ekuseni eNorth Liberty. Endleleni, uMnu. Stiles wangitshela ukuthi uMnu. Harvey wayefuna ukungibona, kodwa wathi ngangingelalizwi lethemba engangizamtshela lona; lokuthi lapho ngihlangana laye, ngangizavumelana laye ukuthi udaba lwakhe lwalungelathemba, lokuthi wayengumuntu olahlekileyo; njalo-ke, njengoEli wasendulo lapho etshelwa ukuthi umphongolo kaNkulunkulu wawuthathiwe, wayezawela emhlane afe.
GSAM 383.3Safika emzini kaMnu. Harvey ngabo-3 P.M. Lapho ngihlangana laye, ngathi, “Mfowethu Harvey, unjani?” Waphendula ngelizwi elilusizi kakhulu wathi, “Ngilahlekile! Ngilahlekile!! NGILAHLEKILE!!!” Ngathi, “Hatshi! kawulahlekanga. Kulathemba ngodaba lwakho!” Lapho ebona ukuthi ngimphendule ngaleyondlela, wathi ngelizwi elithobekileyo, “Sengamaviki amathathu ngicabanga ukuthi kangilalathemba, lokuthi ngilahlekile; njalo lamuhla, ngisuka epulazini ngingena edolobheni, ngidlula ibhulorho elisedamu lesigayo, kwaba sengathi okuthile kwathi kimi, ‘Ulahlekile! Kakulathemba ngawe! Zigxume edamini lesigayo uziminzise!’ Ngacabanga ukuthi ukwenza into enjalo kwakuzaletha ihlazo emsebenzini kaKristu, yikho ngavinjelwa ukuzibulala.”
GSAM 384Ukukhululwa Kwafika Masinyane
GSAM 384.1“Kulungile, Mfowethu Harvey, kawulahlekanga!” ngatsho. “Nabu ubufakazi obuvela ezulwini obuqondileyo, obuthi kawulahlekanga!” Waphendula wathi, “Ngakho ngizabuzwa.” Ngase ngimfundela ubufakazi, ngemva kokumazisa kuqala ukuthi kwakungafakwanga ngitsho lelizwi ezandleni zami. Lapho ngiqeda ukufunda, ubuso bakhe bakhazimula ngoncumo wathi, “Ngakho kulathemba ngodaba lwami. Ngiyakholwa sibili eNkosini.”
GSAM 384.2Emva kokufunda saba lesikhathi somthandazo, wasukuma esengumuntu oguqukileyo lejabulayo. Wasitshela ukuthi lowo mbhalo wawuchaza okwakwenzeka engqondweni yakhe emavikini amathathu adlule ngokunemba okukhulu kakhulu kunalokho ayengakuchaza yena. Ngalindlela uthando lukaNkulunkulu lwabonakaliswa ngokumphakamisa lumfowethu lumsusa ekuphelelweni lithemba.
GSAM 384Insimu Yomsebenzi Yandiswa
GSAM 384.3Kuze kube ngomnyaka ka-1868, insimu yomsebenzi yama-Adventist osuku lwesikhombisa yayivalelwe e-United States, lakulowomango wayo owawungasentla komngcele waseningizimu weMissouri njalo empumalanga koMfula iMissouri. Emhlanganweni wokucabangela izinsimu lokwabiwa komsebenzi, ngesikhathi somhlangano weNgqungquthela Jikelele eyayibanjelwe eBattle Creek, Mich., ngoNkwenkwezi 28, kwanqunywa ukuthi kuthunyelwe izisebenzi ezimbili lethende elingamafidi angamatshumi ayisithupha eCalifornia. UMdala D. T. Bourdeau lombhali bafika eSan Francisco ngoNtulikazi 18 walowomnyaka.
GSAM 384Ukuvulwa Komsebenzi Wokuthunywa eCalifornia
GSAM 384.4Kulento eyodwa engifisa ukuyiphawula mayelana lokuvulwa komsebenzi wokuthunywa eCalifornia, ebonisa kuhle usizo olusebenzayo lwesipho sesiprofetho. UPawuli, ekhuluma ngezipho zikaMoya, okugoqela isipho sesiprofetho, uthi ziyenzelwe “ukuze abangcwele bapheleliswe, kube ngumsebenzi wokukhonza, lokwakhiwa komzimba kaKristu.”3 Ngempela indlela elula kakhulu yokuphelelisa abangcwele yikubatshengisa amaphutha abo, ukuze bawasuse, bahlanjululwe ezonweni zabo ngegazi eliligugu leNkosi yethu uJesu Kristu. Ngenxa yalokhu, usizo lwesipho sesiprofetho emsebenzini wokukhonza belulokhu lubonakaliswa mayelana lomsebenzi weqiniso lamanje, lutshengisa izinceku zeNkosi iziphambeko endleleni yazo yokusebenza, lokuthi, ngendlela etshiyeneyo, zazingasebenza ngamandla amakhulu ekuguquleni imiphefumulo.
GSAM 385Ubufakazi Obuphathelene Lendlela Yokusebenza eCalifornia
GSAM 385.1Kungekudala emva kokufika kwethu eCalifornia samukela incwadi evela kuNkosikazi White, lapho alandisa khona ngombono ayewunikiwe eBattle Creek ngoLwesihlanu kusihlwa ngoNhlangula 12,—usuku esasichithe eLancaster, N. Y., singakaqali uhambo oluya eCalifornia. Wayengakaze abe seCalifornia, njalo engelakwazi okwakhe ngemikhuba yabantu. Eqinisweni, ngalesosikhathi wayengakaze aye entshonalanga koMfula iMissouri. Ulwazi ayelalo ngezinto zalapho lwalutholakala kulokho iNkosi eyathanda ukukwembula kuye.
GSAM 385.2Emfundisweni eyayisencwadini yakhe, wachaza izindlela zokupha ngokukhululekileyo zabantu baseCalifornia, lomphumela owawuzakuba khona ukusebenza phakathi kwabo ngecebo eliqinileyo lokonga ipeni ngalinye. Ekutshumayeleni ebantwini baseCalifornia, kwakumele kusondezwe kubo ngomoya wokupha okukhululekileyo ababesebenza ngawo, kodwa hatshi ngendlela yokuchitha imali ngokunganaki.
GSAM 385Impumelelo Eyaprofethiweyo Yafika
GSAM 385.3Nxa khathesi ngikhangela emuva eminyakeni engamatshumi amathathu lasikhombisa kusukela umsebenzi waqalwa eCalifornia, ngibona isimo esasikhona ngalesosikhathi, isimo sabantu, lendlela esasizawenza ngayo umsebenzi wethu aluba sasingelabo ubufakazi esabamukelayo; futhi njengoba ngibona imiphumela yokulandela imfundiso eyaphiwayo, ngingatsho ukuthi umsebenzi wethu waqhubeka kakhulu ezinyangeni ezintathu ukwedlula lokho owawuzakwenza ngomnyaka owodwa aluba sasingancedwanga “emsebenzini wokukhonza” ngemfundiso eyatholakala ngesipho sesiprofetho. Kuze kube yisikhathi sentwasa ka-1871, ngenxa yemizamo eyenziwa eSonoma County, kwasekumiswe amabandla amahlanu abagcini beSabatha.
GSAM 386Umhlangano Wokuqala Wetende eSan Francisco
GSAM 386.1NgoNhlangula ngalowomnyaka samisa ithende lethu okokuqala eSan Francisco. Njengoba uMdala Bourdeau wayesebuyele empumalanga, kwathunyelwa esinye isisebenzi esivela eMichigan ukuba sithathe indawo yakhe. Safika ngoNhlangula 17, sahle sahlanganyela lami emsebenzini edolobheni. Emva kwamasonto ambalwa omsebenzi ethendeni, saqhubeka lemihlangano yethu kwaze kwaba nguMpalakazi 1, 1871, emahholo aqashiweyo. Ngenxa yalomsebenzi, kwaba labedlula amatshumi amahlanu abamukela umlayezo eSan Francisco.
GSAM 386Izilingo Zangaphakathi eCalifornia
GSAM 386.2Kuze kube lusuku lolu izilingo zethu eCalifornia zazivela kakhulu ekuphikeni kwangaphandle, kodwa khathesi kwavela ukuhlolwa kokholo okwakungalindelwanga kubantu bakithi, okwakulolunye uhlobo. Isisebenzi esasisebenza lathi saqhubeka lendlela yokwenza izinto engangileqiniso lokuthi yayizazilethela ihlazo sona lomsebenzi. Sasilezitha ezibuhlungu edolobheni, ezazibukele konke esikwenzayo, zilungele ukusebenzisa loba yisiphi isenzo esingahlakaniphanga ukusilimaza. Ngakho kwaba yinto eqakatheke kakhulu ukulalela isixwayiso somphostoli sokuthi “balekelani konke okubonakala kubi.”
GSAM 386Ukuzimela Okuyingozi
GSAM 386.3Angitshongo ukuthi umfowethu wayenze isono soqobo endleleni ayesenza ngayo izinto, kodwa ngacabanga ukuthi izitha zethu zazizakwenza inzuzo ngalokho yena ayekubiza ngokungelacala. Wathi wayelalungelo “lokwenza ngokuthanda kwakhe” kuloludaba, ikakhulu ngoba kwakuvunywa ukuthi kwakungelasono kulokho ayekwenza. Izinto zaqhubeka kanjalo kwaze kwaba nguZibandlela 23, 1872, lapho ngasuka eSonoma County ngaya eSan Francisco ukuyabona ukuthi kwakungenziwani ukumisa izinto zalapho.
GSAM 387.1Ngalesisikhathi izitha zethu zasebenzisa indlela yakhe njengoba ngangisesaba, yena wema phezu kokuthi kwakungasilo udaba lwabo, lokuthi wayezabatshengisa ukuthi wayelengqondo yakhe, njalo wayengahamba emigwaqweni njengokuthanda kwakhe, lokuthi ahambe laloba ngubani ayemthanda, engabekezeli ukuphawulwa kwabo. Ngazama, ngomsebenzi wangasese, ukumtshengisa ukuthi indlela enjalo yayingasoze iphumelele, lokuthi umoya onjalo wokuzimela wawuzaphetha ebubini. Wayelabangane bakhe ababezwana laye kakhulu, njalo abanye babo baqalisa ukuthatha uhlangothi olwaluzamenza asolwe kakhulu. Ingxenye enkulu yebandla yabubona ububi bokuphambuka kwakhe, njalo yayizimisele ukusekela imizamo engangiyenza ukusindisa umsebenzi ehlazweni.
GSAM 387Kwahlelwa Umhlangano Wokuphenya
GSAM 387.2Ngakho izinto zazimi ngaleyoSabatha, ngoZibandlela 27, lapho kwanqunywa ukuthi udaba lolu lwalumele luphenywe, njalo ibandla lithathe isenzo esiqinileyo ukuze lizisindise ehlazweni elalingabangelwa ngumoya lo wokudelela. Kwahlelwa umhlangano owawuzakuqala ngeSonto, ngoZibandlela 28, ngo-9 A.M., wokucabangela isimo lomsebenzi wethu njengebandla mayelana lalokhu. Ngokubona konke, ukwehlukana kwalelo bandla kwakungasoze kugwemeke. Ngachitha ingxenye enkulu yalobo busuku ngithandaza kuNkulunkulu ukuthi asisebenzele.
GSAM 387Ukuvuma Okubhaliweyo
GSAM 387.3Ekuseni kwangomhla ka-28, ngathi ngisuka ngisiya emhlanganweni, ngahlangana lesisebenzi engangisebenza laso eceleni kwendlela, eduze lendawo engangihlezi kuyo, sikhala. Sathi, “Mfowethu Loughborough, kangiyi emhlanganweni lamuhla.”
GSAM 387.4“Kawuyi emhlanganweni?” ngatsho; “umhlangano uphathelene lodaba lwakho.”
GSAM 388.1“Ngiyakwazi lokho,” satsho, “kodwa ngiphambanisile kukho konke. Wena uqondile kulokho okwenzileyo mayelana lami. Nansi incwadi yokuvuma engiyibhalele ibandla; yithathe uyifundele lona. Kuzakuba ngcono kuwe, njalo kube ngcono kulabo abangathambekela ukungisekela, nxa ngingekho lapho.”
GSAM 388.2“Yini ebangele inguquko le enkulu kuwe kusukela izolo?” ngabuza.
GSAM 388Umbono Omangalisayo Owemukelweyo
GSAM 388.3Waphendula wathi, “Ngaya ehhovisi leposi izolo ebusuku, emva kweSabatha, ngasamukela incwadi evela kuDadewethu White, eseBattle Creek, Mich. Ngubufakazi abubhalele mina.” Wanginika yona wathi, “Bala lokho, uzabona indlela iNkosi ebona ngayo udaba lwami.”
GSAM 388.4Wangicela ukuthi ngitshele ibandla ukuthi wayesamukele ubufakazi obuvela kuDadewethu White, obabumsola ngokuziphatha kwakhe, lokuthi wayebamukele ngoba babuyiqiniso.
GSAM 388Ubunjalo Obuqinisekisayo Bombono
GSAM 388.5Lokhu kwakuyingxenye yombono owawunikwe uNkosikazi White eBordoville, Vt., ngoMpalakazi 10, 1871. Waqalisa ukubhala ingxenye ephathelene lodaba lwalumfowethu ngoMpalakazi 27, 1871, kodwa ngesizatho esithile ukuqediswa kombhalo kwalibaziseka kwaze kwaba nguZibandlela 18, 1872, lapho waqedwa khona wathunyelwa ngeposi uvela eBattle Creek. Kwasekuthatha phose amalanga ayisificamunwemunye ukuthi izincwadi zihambe ngohambo lwasemhlabeni zisuka eMichigan zisiya eCalifornia.
GSAM 388.6Embonweni izinto ezinengi ziboniswa kuye ngokuprofetha. Kwaba njalo lakulindaba le. Ngesikhathi sombono kwakulesithunzi nje salokho okwacaca kamuva lapho ubufakazi bufika eSan Francisco. Kuzabonakala, ngokufanisa izinsuku, ukuthi ukufinyelela kwesimo saloludaba eSan Francisco kwafika ngemva kokuba ubufakazi obubhaliweyo busukile endaweni yakuqala. Abafowethu eSan Francisco bahle babona ukuthi kwakungekho muntu owayengabhalela iBattle Creek atshele uNkosikazi White lezondaba ngesikhathi esanele sokuthi abhale lincwadi, ngoba lesosimo sasingakabi khona ngalesosikhathi.
GSAM 389.1Leliqiniso laba lesisindo esikhulu kubafowethu bakhona, libaqinisekisa ukuthi kwakulamandla kaNkulunkulu kulowombono. Ngangingabhalanga ngitsho umuda owodwa kuMdala White kumbe kumkakhe mayelana lesimo saseSan Francisco, njalo lesisebenzi engangisebenza laso sathi sasingabhalanga lutho; abafowethu bathi, “Aluba wayebhalile, wayengeke alandise izinto ezavezwa ngaye.”
GSAM 389Indlela Umbono Owabhalwa Ngayo
GSAM 389.2Lapho sesifunde emva kwalokho, ngakwelinye icele lolayini, ngokubhalwa lokuthunyelwa kobufakazi, kwacaca kakhulu ukuthi iNkosi eyanika umbono yayilondoloze isikhathi sokubhalwa kwawo lokuthunyelwa kwawo endaweni yawo, ukuze ufike khona ngesikhathi esifaneleyo.
GSAM 389.3Ekuseni kakhulu ngoZibandlela 18, 1872, uNkosikazi White wavuswa ubufakazi lobu obugxile ngokucacileyo engqondweni yakhe. Umcabango wawucace kuye kungathi ukhulunywe ngelizwi elizwakalayo, “Bhala masinyane lobufakazi beCalifornia, ubufake eposini elilandelayo; buyadingeka.” Kwathi lokhu sekuphindwe okwesibili, wasukuma, wagqoka masinyane, waqeda ukubhala. Ngaphambi kokudla kwasekuseni wawunika indodana yakhe uWillie wathi, “Thatha lincwadi uye layo eposini, kodwa ungayifaki ebhokisini lokuphosa. Yinike umphathi weposi, umtshele aqiniseke ukuthi uyayifaka esikhwameni seposi esiphuma lamuhla ekuseni.” Emva kwalokho wathi wayecabanga ukuthi imilayo yakhe yayingajwayelekanga kancane, kodwa kazange abuze lutho, wenza ayetshelwe khona, “wabona incwadi ingena esikhwameni seposi.”
GSAM 389Ubufakazi Bokuqondiswa Kwaphezulu
GSAM 389.4Njengoba ususazi isimo sethu eSan Francisco ngalesosikhathi, uzakubona lula ukuqakatheka kokuthi lincwadi ingene kuleloposi kanye kanye. Ngalezonsuku sasileposi elilodwa kuphela elalihamba ngohambo lwasemhlabeni ngosuku. Aluba incwadi yafika ngeSonto ebusuku, mhlaka-28, kulokuthi ifike ngoMgqibelo ebusuku, mhlaka-27, ngokungathandabuzekiyo kwakuzaba lokwehlukana okubuhlungu ebandleni. Aluba yafika emavikini amanengi ngaphambili, loba nje emva kokunikezwa kombono, ibandla lalingasoze liwabone masinyane amandla ayo.
GSAM 390.1Lapha kwakulobufakazi obuphethe izimpawu ezicacileyo zesandla seNkosi, hatshi kuphela ngoba bafika ngesikhathi esifaneleyo ukuze balungise ngokupheleleyo amaphutha ayekhona, kodwa futhi, ngenxa yokwamukelwa lokusetshenziswa kwabo ngokuthobeka ngumfowethu, baba lethonya elikhulu lokuletha ubunye lokuqina kulelibandla elaliselincane.
GSAM 390Indlela Yokubhala Imibono
GSAM 390.2Isibonelo lesi sisebenza futhi njengomboniso wesitatimende sakhe mayelana lendlela yokubhala lokho akubonileyo. Uthi: “Ngivuswe ebuthongweni bami ngomuzwa ocacileyo wezindaba ezake zavezwa engqondweni yami; njalo ngibhale, phakathi kobusuku, izincwadi eziye zawela ilizwekazi, zathi zifika ngesikhathi sobunzima, zavimbela umonakalo omkhulu emsebenzini.”4