Isahluko 19 — “Lizabazi Ngezithelo Zabo”
GSAM 299.1Wapha abanye ukuba babe ngabapostoli, abanye babe ngabaprofethi, abanye babe ngabavangeli, abanye babe ngabelusi labafundisi, ukuze kulungiswe abangcwele, kwenziwe umsebenzi wenkonzo, kwakhiwe umzimba kaKristu, size sonke sifinyelele ebunyeni bokholo lolwazi lweNdodana kaNkulunkulu, sibe ngumuntu opheleleyo, sifinyelele esilinganisweni sobude bokugcwala kukaKristu.1
GSAM 299.2Ngesikhathi uMsindisi ebeka izipho zikaMoya wakhe ebandleni, ukuze umsebenzi weNkosi ufezwe “njengokuthanda kwakhe” kuze kufike usuku olupheleleyo, kazange atshiye abantu bakhe beqagela ukuthi ukubonakaliswa kuvela ezulwini kumbe emimoyeni emibi; kodwa ubanika imithetho esingazi ngayo ukuthi umoya uvela kuNkulunkulu kumbe hatshi. Ngitsho kulezi nsuku zokucina, lapho, njengokwaprofethwa ngumprofethi uJoweli, iNkosi yayizathululela uMoya wayo phezu kwayo yonke inyama, lamadodana lamadodakazi aphrofethe.2 UPawuli uthi abantu bangadeleli iziprofetho, kodwa “bahlole zonke izinto,” “babambe okuhle.”3
GSAM 299.3Kungenziwa njani okunye ukuhlola ukubonakaliswa okunjalo ngaphandle kokukuqhathanisa lemithetho yeMibhalo yokwehlukanisa umsebenzi kaMoya kaNkulunkulu? Konke okudlula ukuqonda kwengqondo elinganiselweyo kakusuki kuNkulunkulu njalo; ngoba iBhayibheli lithi ensukwini zokucina uSathane uzakwenza izimangaliso ukuze akhohlise umhlaba, abaqoqele empini yalolosuku olukhulu lukaNkulunkulu uSomandla.4 Ngakho-ke isipho somoya seqiniso saziwa ngokuqathanisa ngokucophelela ukubonakaliswa lemithetho yeBhayibheli. Kulokhu kudingeka ukunakekela okufanayo lokho abantu bomhlaba abakusebenzisayo ukubona imali yomgunyathi.
GSAM 300Ukuthola Imali Yomgunyathi
GSAM 300.1KuMbiki Wamanothi Ebhange laseDetroit ngoMbasa 1863, uMnu. Preston wanika imithetho emihlanu yokuthola imali yomgunyathi, wathi umuntu owayezahlola ngokuqinileyo yonke imali eyayingena ezandleni zakhe ngokwale mithetho wayengasoze esabe ukukhohliswa.
GSAM 300.2Akulandlela eqinisekileyo yokufakazela isipho sesiprofetho njengokusiqhathanisa lenkcazelo yezipho ezabonakaliswa ngezikhathi zeMibhalo, lokusihlola ngemithetho enikelweyo. IMibhalo isihlomisa ngokupheleleyo kuyo yonke imisebenzi emihle (2 KuThimothi 3:16, 17), isinika umbiko oqondileyo wokubonakaliswa kwesipho sesiprofetho, lokuthi umsebenzi weqiniso kaMoya kaNkulunkulu wehlukaniswa njani lemisebenzi kaSathane lezipho zakhe zomgunyathi.
GSAM 300IMITHETHO YOKWEHLUKANISA IZIPHO EZIYIQINISO
GSAM 300.3INkosi inikezile elizwini layo okungenani imithetho eyisikhombisa ehlukeneyo okwehlukaniswa ngayo ukubonakaliswa kweqiniso kukaMoya kaNkulunkulu lomsebenzi kaSathane.
GSAM 300Umthetho Wokuqala—Imfundiso Ekhethekileyo
GSAM 300.4Umprofethi u-Isaya, ekhuluma ngezinto ezenzakalayo ezinsukwini zokucina, uthi: “Bopha ubufakazi, unamathisele umthetho phakathi kwabafundi bami. Ngizalindela iNkosi, efihla ubuso bayo endlini kaJakobe, ngiyikhangele. Lapho besithi kini, ‘Dingani kwabalamadlozi lakubathakathi abahlebayo lababubulayo,’ abantu kabadingi yini uNkulunkulu wabo? Kambe badingele abafileyo abaphilayo? Emthethweni lobufakazini! Nxa bengakhulumi ngokwalelilizwi, kungenxa yokuthi kakukho ukukhanya phakathi kwabo.”5
GSAM 301.1Kulo mbhalo, kukhonjwa abantu abasebenza ukubuyisela uphawu emthethweni kaNkulunkulu—abantu abalindele iNkosi besebenza enkonzweni yayo. Bayayikhangela; okutsho ukuthi balindele ukuza kwayo—lokhu ngesikhathi lapho imimoya ezithi ngeyabafileyo icela abantu bayidinge. Abanye balalela ubizo lwayo, badinge kwabafileyo ulwazi; kodwa iNkosi imema abantu bayo ukuthi bayidinge. Lokhu kutsho ukuthi nxa beyidinga, izabanika imfundiso ekhethekileyo. Kakudingeki ukuthi badinge kwabafileyo, ngoba kabangalubaniki ulwazi; ngoba kabaselalo futhi isabelo esilaphakade kukho konke okwenziwa phansi kwelanga; njalo abafileyo kabazi lutho.6
GSAM 301.2Kulo iMibhalo ephezulu kunikelwe umthetho wokuhlola ngawo zonke izindaba—“Nxa bengakhulumi ngokwalelilizwi, kungenxa yokuthi kakukho ukukhanya phakathi kwabo.” Zonke izindaba ezivela eNkosini zizakhuluma zivumelane lelizwi layo lomthetho wayo.
GSAM 301.3Ngisebenzisa umthetho lo emibhalweni kaNkosikazi White, ngithi kuleminyaka engamatshumi amahlanu lambili edluleyo ngifunde ubufakazi bakhe ngokucophelela, ngibaqathanisa lomthetho kaNkulunkulu lobufakazi beBhayibheli, njalo ngithola ukuvumelana okupheleleyo phakathi kwakho kokubili. Imfundiso yakhe kayizi ukuzonika isambulo esitsha esithatha indawo yeMibhalo, kodwa izositshengisa ukuthi abantu kulezi zikhathi bangadukiswa ngaphi futhi njani, basuswe elizwini. Isikhundla esithathwa bubufakazi bukaNkosikazi White sichazwa kuhle ngamazwi yena awabhalayo ngabo:—
GSAM 301.4“Ilizwi likaNkulunkulu lanele ukukhanyisa ingqondo egubuzelwe kakhulu, njalo lingaqondwa yilabo abalesifiso sokuliqonda. Kodwa, lanxa kunjalo, abanye abathi benza ilizwi likaNkulunkulu libe yisifundo sabo batholakala bephila bephikisana lezimfundiso zalo ezicacileyo. Ngakho, ukuze amadoda labesifazane bangabi lasizatho, uNkulunkulu unika ubufakazi obucacileyo lobuqondileyo, ebabuyisela elizwini abangalilandelanga.”
GSAM 302.1“Ilizwi likaNkulunkulu ligcwele izimiso ezijwayelekileyo zokwakha imikhuba yokuphila eqondileyo, njalo ubufakazi, obujwayelekileyo lobomuntu ngamunye, benzelwe ukubakhumbuza ikakhulu ngalezi zimiso. Lina kalijayelene leMibhalo. Ngabe lenze ilizwi likaNkulunkulu laba yisifundo senu, lifisa ukufinyelela esilinganisweni seBhayibheli lokuphelela kobuKristu, ngabe belingayidinganga ubufakazi.”
GSAM 302.2“INkosi ihlose ukulixwayisa, ukulisola, lokulicebisa ngobufakazi obunikelweyo, lokucindezela ezingqondweni zenu ukuqakatheka kweqiniso lelizwi layo. Ubufakazi obulotshiweyo kabuphatheli ukukhanya okutsha, kodwa bucindezela enhliziyweni amaqiniso okuphefumulelwa asevele embuliwe. Iqiniso elengezelelweyo kalikhutshwa, kodwa uNkulunkulu, ngobufakazi, wenze amaqiniso amakhulu asenikeliwe abe lula, wawabeka phambi kwabantu ngendlela ayikhethileyo, ukuze avuse ingqondo njalo ayigxilise kuwo, ukuze bonke bangabi lasizatho.”
GSAM 302.3“Ubufakazi kabufanelanga buyehlise ilizwi likaNkulunkulu, kodwa baliphakamise, budonse izingqondo kulo, ukuze ubuhle bokulula kweqiniso buhlaba bonke. Ngabe abantu abazibiza ngokuthi bayigugu likaNkulunkulu elikhethekileyo babelalela okufunwa nguye njengokulotshiweyo elizwini lakhe, ngabe ubufakazi obukhethekileyo babungeke bunikelwe ukubavusa emsebenzini wabo, bubacindezele ngesono sabo langengozi enkulu yokunganaki ukulalela ilizwi likaNkulunkulu.”7
GSAM 302Umthetho Wesibili—Abaprofethi Beqiniso
GSAM 302.4Sesifundile ukuthi bonke abaprofethi beqiniso bazakhuluma bevumelana lomthetho kaNkulunkulu lobufakazi belizwi lakhe. Umpostoli uJohane unika omunye umthetho ochaza imfundiso yabaprofethi beqiniso. Uthi: “Bathandekayo, lingakholwa wonke umoya, kodwa lihlolisise imimoya ukuthi ngekaNkulunkulu yini; ngoba abaprofethi abanengi bamanga baphumele emhlabeni. Ngalokhu liyawazi uMoya kaNkulunkulu: wonke umoya ovumayo ukuthi uJesu Kristu uzile enyameni ungokaNkulunkulu; njalo wonke umoya ongavumiyo ukuthi uJesu Kristu uzile enyameni kawuveli kuNkulunkulu; lo ngumoya womphikukristu elawuzwa ukuthi uyeza, njalo khathesi usukhona emhlabeni.”8
GSAM 303.1Qaphelisisa iMibhalo le. Katsho ukuthi loba ngubani ovumayo ukuthi uJesu Kristu “weza enyameni,” kodwa uthi “usezile enyameni”; okutsho ukuthi uza ngoMoya wakhe ahlale phakathi kwethu ekuphenduleni kokholo lwethu. Leli yiqiniso eliphakathi levangeli: “UKristu phakathi kwenu, ithemba lenkazimulo.”9
GSAM 303.2Umongo osebenzayo otholakala kuyo yonke imibhalo kaNkosikazi White yisidingo sikaKristu njengoMsindisi ohlala phakathi kwethu nxa sifuna ukuthuthuka endleleni yasezulwini. Imibhalo yakhe ifundisa ukuthi uKristu uyadingeka ekuqaleni, ekucineni, ngaso sonke isikhathi. Njengesibonelo salokhu, kukhangwa incwadi yakhe ethi Izinyathelo Zokuya KuKristu, esithengiswe amakhophi angaphezu kwekhulu lamawaka ngesiNgisi, kungabalwa amakhophi ayizinkulungwane ngezilimi zakwamanye amazwe ezilitshumi lasificaminwembili eselinyatheliswa ngazo. Umfundisi wamaPresbyterian, eseyifundile leyo ncwadi, wa-oda amakhophi angaphezu kwamakhulu amathathu amalunga ebandla labangane bakhe, wathi, “Le ncwadi yabhalwa ngumuntu omazi kuhle uJesu Kristu.”
GSAM 303Umthetho Wesithathu—Abaprofethi Bamanga
GSAM 303.3UJohane unikeza umthetho wokubona abaprofethi bamanga: “Bangabomhlaba; ngakho bakhuluma okomhlaba, lomhlaba uyabalalela.”10 Imfundiso yabaprofethi bamanga izathokozisa inhliziyo yenyama, kulokuphakamisa indlela yokuzilandula lokuthwala isiphambano. Abaprofethi bamanga bazafundisa “izinto ezibushelezi,” kulokuphakamisa “oNgcwele ka-Israyeli.”11 Loba ngubani ofunda amakhasi ambalwa nje emibhalweni kaNkosikazi White uyabona ukuthi isendleleni yokuzilandula lokuthwala isiphambano, njalo kayiyona eyokuthokozisa inhliziyo yomhlaba, eyenyama.
GSAM 304Umthetho Wesine—Ukuhlupheka Lokubekezela
GSAM 304.1Ekulandeleni indaba le ngokuqhubekayo, sizathatha amazwi ompostoli uJakobe njengomthetho wesine: “Bafowethu, thathani abaprofethi abakhuluma ebizweni leNkosi babe yisibonelo sokuhlupheka lokubekezela.”12 Lapho sifunda ngempilo yabaprofethi bakudala, sifunda ukuthi olunye lwezinhlupho zabo ezinkulu kwakuyikubona u-Israyeli esala ubufakazi obucacileyo ababunikiweyo kumbe esebuphikisa. Ukufunda okufitshane ngalezo zikhathi kuzakutshengisa masinyane isimilo sabaprofethi beqiniso labamanga. “Itsho kanje iNkosi yamabutho: Lingalaleli amazwi abaprofethi abaprofetha kini; balenza libe yize, bakhuluma umbono wenhliziyo yabo, kungaveli emlonyeni weNkosi.”13
GSAM 304.2Kakulalutho emibhalweni kaNkosikazi White olwenza umfundi abe yize; kodwa, njengokwatshiwo ngomunye, “Sengithole inzuzo enkulu yomoya izikhathi ezingenakubalwa ngobufakazi. Impela, kangikaze ngibufunde ngingazizwa ngisolwa ngokuswela kwami ukholo kuNkulunkulu, ngokuswela ukuzinikela, langokuswela ukukhuthala ekusindiseni imiphefumulo.” Ngakho-ke umphumela wobufakazi bukaNkosikazi White wehluke kakhulu kulezimfundiso zabaprofethi bamanga ezachazwa nguJeremiya.
GSAM 304.3Umprofethi usitshela lokuthi abaprofethi bamanga bazafundisa njani: “Baqhubeka besithi kulabo abangidelelayo, ‘INkosi ithe, Lizakuba lokuthula’; njalo bathi kuye wonke ohamba ngokucabanga kwenhliziyo yakhe, ‘Kakukho bubi obuzalehlela.’”14
GSAM 304.4Mayelana lendlela imfundiso kaNkosikazi White ekubufakazini bakhe eyiyo, ngizacaphuna amazwi alandelayo omfundi oqaphelisisayo:
GSAM 304.4“Sengibufunde bonke ubufakazi bakhe kusukela ekuqaleni kuze kube sekucineni, obunengi izikhathi ezinengi, njalo kangikaze ngithole umusho owodwa ongcolileyo kubo bonke, kumbe okungekho msulwa ngokugcweleyo kobuKristu; akukho lutho olususa umuntu eBhayibhelini kumbe kuKristu; kodwa ngithola lapho ukunxusa okuqinileyo ukulalela uNkulunkulu, ukuthanda uJesu, ukukholwa iMibhalo, lokuyihlolisisa njalo. Ukusondela okunjalo kuNkulunkulu, ukuzinikela okunjalo, lokunxusa okunzima kangaka ukuthi umuntu aphile impilo engcwele, kungavuswa nguMoya kaNkulunkulu kuphela.”
GSAM 305.1Umhloli oqaphelisisayo wobufakazi bakhe kusukela ekuqaleni ubhala athi:
GSAM 305.1“Endabeni yokukhuluma iqiniso ngokusobala langokuthembeka, kungelakwesaba kumbe ukukhetha, ngifisa ukufakaza ukuthi kwakungekho ukusilela. Ngabe izinhloso ezimbi eziphansi zazilawula lo msebenzi, amazwi okuthophayo ayegcwalisa indawo yobufakazi obuhlolisisayo lokusola okuthembekileyo. Ukukhuluma sobala, ukusola okuthembekileyo okubi, amazwi ozwelo lesikhuthazo emiphefumulweni ethuthumelayo ezwa isidingo soMsindisi, lakwabadukileyo abazama ngokuthobeka ukulahla iziphambeko zabo—yikho okwakugcwele emisebenzini yakhe. Ubufakazi bukaNkosikazi White, obusola iziphambeko zabantu abanengi ayebabone embonweni, banikelwa ngokuthembeka okukhulu langomphumela omuhle kakhulu.”15
GSAM 305Umthetho Wesihlanu—Iziprofetho Zeqiniso Ziyagcwaliseka
GSAM 305.2Kulesitatimende esenziwa nguMosi mayelana labaprofethi beqiniso labamanga, esitholakala esahlukweni se-18 sikaDuteronomi. Uthi: “Sizakwazi njani ilizwi iNkosi engalikhulumanga? Nxa umprofethi ekhuluma ngebizo leNkosi, into ingalandeli kumbe ingenzeki, leyo yinto iNkosi engayikhulumanga; umprofethi uyikhulume ngokuqhosha. Ungamesabi.”16
GSAM 305.3Into efanayo itholakala lakuleMibhalo elandelayo: “Ngubani otshoyo, kwenzeke, lapho iNkosi ingakuyalanga?”17 Kwathiwa ngomprofethi uSamuweli, “Konke akutshoyo kwenzeka isibili.”18 “Lapho ilizwi lomprofethi lisenzeka, umprofethi uzakwaziwa ukuthi iNkosi imthume ngeqiniso.”19
GSAM 306.1Sekudlule iminyaka engaphezu kwamatshumi amahlanu lantathu kusukela umbhali aqala ukubona uNkosikazi E. G. White embonweni wesiprofetho. Kuleminyaka, wenze izitatimende ezinengi zesiprofetho ngezinto ezazizakwenzeka. Ezinye iziprofetho zikhuluma ngezehlakalo esezigcwalisekile, ezinye ziyagcwaliseka, ezinye zisengaphambili. Mayelana lalezo eziphathelene lezehlakalo ezedlulileyo kumbe ezikhona khathesi, kangilwazi loyedwa olwehlulekileyo. Ezinye iziprofetho zakhe sezikhulunywe ngazo. Ezinye zizavela ezahlukweni ezilandelayo njengoba siqhubeka lombiko wethu.
GSAM 306Umthetho Wesithupha—Izimangaliso Kazisibo Ubufakazi Bomprofethi Weqiniso
GSAM 306.2Ababhali abanengi bezemfundiso yenkolo bathe, njalo kwatshiwo ezincwadini ezichasisa iMibhalo, isibonakaliso somprofethi weqiniso yikwenza izimangaliso. Kodwa asikatholi eMibhalweni umthetho onjalo.
GSAM 306.3Nxa ukwenza izimangaliso kungubufakazi bomprofethi weqiniso, khona-ke “umprofethi wamanga” okukhulunywa ngaye kuSambulo 19:20 wayezabizwa ngokuthi ungumprofethi weqiniso; ngoba kuthiwa, “Isilo sabanjwa, kanye laso umprofethi wamanga owenza izimangaliso phambi kwaso, ngazo wakhohlisa labo abamukele uphawu lwesilo.” Amandla lawo aphinda akhulunywa kuSambulo 13:14, ekhohlisa “abahlala emhlabeni ngezimangaliso ayenikwe amandla okuzenza phambi kwesilo.” Ngokusebenzisa umthetho lo, singafinyelela esiphethweni sokuthi loSathane ungumprofethi weqiniso. Eminye imimoya ezakwenza umsebenzi okhethekileyo ngaphansi kwesifo sesithupha sezifo eziyisikhombisa zokucina ibizwa ngokuthi “yimimoya yamadimoni, eyenza izimangaliso, ephuma iye emakhosini omhlaba wonke ukuze iwaqoqele empini yalolosuku olukhulu lukaNkulunkulu uSomandla.”20
GSAM 306.4Nxa ubufakazi bomprofethi weqiniso butholakala ezimangalisweni azenzayo engekho embonweni, besizathola abaprofethi beBhayibheli abalutshwana abangaphumelela kulolu vivinyo, ikakhulu nxa isinqumo sisekelwe kulokho okulotshiweyo ngemisebenzi yabo. Kuliqiniso ukuthi izimangaliso zenziwa ngabanye abaprofethi, njengo-Elija, u-Elisha loPawuli. Kodwa ngubani othole embikweni weBhayibheli izimangaliso zika-Isaya, uJeremiya, uDaniyeli, uHoseya, uJoweli, u-Amosi labanye? Lanxa kunjalo babengabaprofethi beqiniso beNkosi, njalo babonakala benjalo ngemithetho iNkosi eyinikeleyo yokuhlola umprofethi weqiniso.
GSAM 307.1Ukuthi ukwenza izimangaliso kakusikho ukuhlola umprofethi weqiniso kubonakala ngokucacileyo embikweni weBhayibheli kaJohane uMbhabhathizi. Ukuthi wayengumprofethi kwatshengiswa yisiprofetho sikayise uZakariya, lapho echaza umbono uNkulunkulu ayemnike wona mayelana lendodana eyayizazalwa kuye: “Wena mntwana, uzabizwa ngokuthi ungumprofethi woPhezukonke; ngoba uzahamba phambi kobuso beNkosi ukulungisa izindlela zayo.”21 UMsindisi wethu yena ngokwakhe wamvuma uJohane njengalowomprofethi owayezalungisa indlela phambi kwakhe; wathi ngaye: “Laphumelani ukuyabona? Umprofethi yini? Yebo, ngithi kini, ngowedlula kakhulu umprofethi. Nguye okubhalwe ngaye ukuthi, ‘Khangela, ngithuma isithunywa sami phambi kobuso bakho, esizalungisa indlela yakho phambi kwakho.’ Ngithi kini, phakathi kwabazelwe ngabesifazane kakho umprofethi omkhulu kuloJohane uMbhabhathizi.”22
GSAM 307.2Nanku-ke isitatimende esicacileyo soMsindisi sokuthi uJohane wayengumprofethi. Kasisebenzise ukuhlola kokwenza izimangaliso sibone umphumela. Evangelini elabhalwa nguJohane umvangeli, sithola amazwi la: “Abanengi beza kuye [uKristu] bathi, ‘UJohane kazange enze isimangaliso; kodwa konke uJohane akukhuluma ngalo muntu kwakuliqiniso.’”23 Isitatimende lesi sodwa siyakuphikisa ngokupheleleyo ukuthi isibonakaliso somprofethi weqiniso yikwenza izimangaliso.
GSAM 307.3Umthetho lo onikelwe kuDuteronomi 13:1-3, esiwubiza ngokuthi ngumthetho wesithupha kulokhu kubalwa kwethu, wenzelwe ukusivikela ekulandeleni loba yini emangalisayo kumbe eyisimangaliso size siqale siqaphele ngokucophelela ukuthi ithambekela ekusondeleni kakhulu eNkosini kumbe ekusisuseni kuyo. Umbhalo lo usitshela ukuthi sisebenzise yonke imithetho, ikakhulu sibone ukuthi kuyavumelana yini loNkulunkulu lomthetho wakhe.
GSAM 308.1Umthetho lo wesithupha ufundisa ukuthi nxa isimangaliso senziwa ngumkhohlisi, kuzabonakala kanye laso, lapho sesihlolisiswe kuhle, ukwehlukana lamaqiniso angcwele elizwi likaNkulunkulu lokwehliswa kwesilinganiso ukuze kuhambelane lenhliziyo efuna ukubalekela indlela yokuzilandula. INkosi iyamvumela umzenzisi onjalo ukuthi avele, njalo indlela yakhe iba yisilingo kumntwana kaNkulunkulu weqiniso, imnike ithuba lokukala ngokucophelela ukuthambekela kumbe injongo yalowo owenza izimangaliso. Ababambelela elizwini likaNkulunkulu, kulokuthatheka ngumkhohlisi wezimangaliso, baphuma beqinile kuNkulunkulu ngenxa yalokhu okuhlangenwe lakho.
GSAM 308.2Kulezinsuku ezimbi, lapho abanengi bezibiza ngokuthi “ngabelaphi bokholo,” “ngabelaphi baphezulu,” “ngabelaphi beSayensi yobuKristu,” njalo njalo, kungaba kuhle ukusebenzisa eduze imithetho yeMibhalo; ngoba kuzadingeka imithetho yaphezulu lokukhanyiselwa nguMoya oNgcwele ukuze sihlukanise ngokucacileyo inhloso lenjongo yabanye balaba “belaphi,” umsebenzi wabo ubucashile; kanti ngakwelinye icele bakhona abadelela obala umthetho kaNkulunkulu leqiniso lakhe lalesi sikhathi. Kwezinye izimo laba “belaphi” abazenzisayo bahlanya njengabantu abagcwele ubuhlanya nxa nje kukhulunywa ngomthetho kaNkulunkulu. Njengoba iNkosi ilomlayezo omemezela umthetho wayo ongcwele, ngokunjalo abantu abathuka umthetho wayo labaxotsha labo abawukhulumayo baswela ukunyakaza kukaMoya oNgcwele.
GSAM 308Umthetho Wesikhombisa—Izithelo Zabo
GSAM 308.3“Qaphelani abaprofethi bamanga, abeza kini bembethe okwezimvu, kodwa ngaphakathi bazimpisi ezidlayo. Lizabazi ngezithelo zabo. Abantu babutha izithelo zamagilebhisi emeveni, kumbe amakhiwane emakhakhasini yini? Ngokunjalo sonke isihlahla esihle sithela izithelo ezinhle, kodwa isihlahla esonakeleyo sithela izithelo ezimbi. Isihlahla esihle singeze sathela izithelo ezimbi, lesihlahla esonakeleyo singeze sathela izithelo ezinhle. Sonke isihlahla esingatheli izithelo ezinhle siyaganyulwa siphoswe emlilweni. Ngakho lizabazi ngezithelo zabo.”24
GSAM 309.1La mazwi oMsindisi wethu ayavuma ukuthi isipho sesiprofetho sasizakuba khona esikhathini sevangeli. Ngabe kwakungasoze kube labaprofethi beqiniso abahambisana lomsebenzi, njalo konke ukubonakaliswa kwesiprofetho kwakuvela emthonjeni omubi, wayengayikuthi, “Qaphelani abaprofethi”? Iqiniso lokuthi usitshela ngokucacileyo ukuthi lolohlobo ngalunye lwaziwa njani libubufakazi obukhulu bokuthi emsebenzini woMduduzi, uMoya oNgcwele, ekutshengiseni “izinto ezizayo” (Johane 16:13), kwakuzakuba lesipho sesiprofetho seqiniso. Umthetho lo, esiwubiza ngokuthi ngumthetho wesikhombisa, kawusoze wehluleke. UKristu katshongo ukuthi lingabazi ngezithelo zabo, kodwa wathi ngokuqinileyo, “Ngezithelo zabo lizabazi.”
GSAM 309.2Siyabuza, yisiphi isithelo esibonakala emsebenzini wezipho eziqotho zikaMoya kaNkulunkulu? Impendulo itholakala emazwini kaPawuli mayelana lenjongo yeNkosi ekubekeni izipho ebandleni: “Ngakho uthi, esenyukele phezulu, wathumba abathunjiweyo, wanika izipho abantu. Wapha abanye ukuba babe ngabapostoli, abanye babe ngabaprofethi, abanye babe ngabavangeli, abanye babe ngabelusi labafundisi, ukuze kulungiswe abangcwele, kwenziwe umsebenzi wenkonzo, kwakhiwe umzimba kaKristu, size sonke sifinyelele ebunyeni [‘size singene ebunyeni,’ eceleni] bokholo lolwazi lweNdodana kaNkulunkulu, sibe ngumuntu opheleleyo, sifinyelele esilinganisweni sobude bokugcwala kukaKristu.”25
GSAM 309.3Sebenzisa umthetho lo esiphweni sesiprofetho ebesihambisana lomlayezo wengilosi yesithathu kusukela ekuqaleni kwawo, umphumela uyini? Sithola ukuthi imfundiso eqhubekayo enikelwa ngoNkosikazi White ibisemgqeni wobunye lokuvumelana, ikhuthaza “ukwelulekana ndawonye” lokuthi “sisondelelane,” sibe munye loKristu, ngalokho kuqinisekiswe ubudlelwano beqiniso lokumanyana phakathi kwethu.
GSAM 310.1Abanye abaphikisana lomsebenzi lo bahlekisa bathi, “Ngabe bekungesikho imibono kaNkosikazi White elilayo phakathi kwenu, udaba lwenu ngabe lwahlakazeka kudala.” Kuphendulwa kuthiwe, “Kuliqiniso; ngoba ngalowomthombo iNkosi isinike iseluleko, isixwayiso lokukhanya, ngalokho ukungezwani kususiwe lomsebenzi waphumelela.” Ngakho lokho ababekuhlose ukukuphosa esiphweni empeleni kungubufakazi bokuthi isithelo saso singesesipho sesiprofetho seqiniso.
GSAM 310.2Sekuyiminyaka engamatshumi ayisithupha langaphezulu ukubonakaliswa kwesipho sesiprofetho ngoNkosikazi White kuhlolwa ngale mithetho eyisikhombisa, njalo kukho konke kuhlangabezane lezimfanelo ezifunekayo kusiprofetho seqiniso.
Notes
- Kwabase-Efesu 4:11-13. ↩
- Joweli 2:28, 29. ↩
- 1 KwabaseThesalonika 5:20, 21. ↩
- IsAmbulo 16:14. ↩
- Isaya 8:16-20. ↩
- UmTshumayeli 9:6, 5. ↩
- Ubufakazi beBandla, Umqulu 5, amakhasi 663-667. ↩
- 1 Johane 4:1-3. ↩
- Kwabase-Efesu 3:17; KwabaseKolose 1:27. ↩
- 1 Johane 4:5. ↩
- Isaya 30:10, 11. ↩
- UJakobe 5:10. ↩
- UJeremiya 23:16. ↩
- Ivesi 17. ↩
- J. N. Andrews, ku-Isibuyekezo sikaZibandlela 1867. ↩
- Duteronomi 18:21, 22. ↩
- IsiLilo 3:37. ↩
- 1 Samuweli 9:6. ↩
- UJeremiya 28:9. ↩
- IsAmbulo 16:14. ↩
- Luka 1:76. ↩
- Luka 7:26-28. ↩
- Johane 10:41. ↩
- UMathewu 7:15-20. ↩
- Kwabase-Efesu 4:8-13. ↩