Isahluko 12 — Ukudumala—Incwadi Ebabayo
GSAM 185.1“Ngayithatha incwadi encinyane esandleni sengilosi, ngayidla; emlonyeni wami yayimnandi njengoluju; kodwa sengiyidlile, isisu sami sababa. Yasisithi kimi: Kumele uphinde uprofethe phambi kwabantu abanengi, lezizwe, lezindimi, lamakhosi. Ngasenginikwa umhlanga onjengentonga; ingilosi yema, isithi: Sukuma, ulinganise ithempeli likaNkulunkulu, lelathi, lalabo abakhonza phakathi kwalo.”1
GSAM 185.2Ngolimi lweMibhalo, “ukudla” incwadi kumela ukwamukela iqiniso ukuze ulitshele abanye, njengalokhu kubonakala kuHezekheli, lapho umprofethi etshengiswa “umqulu wencwadi,” wasetshelwa ukuthi: “Yidla umqulu lo, uhambe uyekhuluma lendlu ka-Israyeli.” Eseyidlile incwadi egoqiweyo, uthi: “Ngasengiwudla; emlonyeni wami wawumnandi njengoluju.”2
GSAM 185.3Umprofethi uJeremiya usebenzisa umfanekiso lo: “Amazwi akho atholakala, ngawadla; ilizwi lakho laba kimi yintokozo lokujabula kwenhliziyo yami.”3 Emazwini la sifunda ukuthi “ubumnandi” bencwadi ngesikhathi idliwa bumela intokozo lokusuthiseka okuzwiwa yilabo abazondla ngelizwi leNkosi ngale indlela.
GSAM 185Incwadi Imnandi, Ibisiba Baba
GSAM 185.4Incwadi ekhulunywa ngayo kuSambulo 10, okuthiwa kumuntu owayeyidla yayimnandi njengoluju, kodwa yathi isidliwe “yababa” (loba, njengokutsho kwabanye abahumutshayo, “ngisanda kuyiqeda ukuyigaya, esiswini sami yayisiyiphikhra”4), kwakuyileyo ncwadi ingilosi eyamemezela ikuyo, ngamandla alowo owenza izulu, lomhlaba, lolwandle, isithi: “Isikhathi kasisayikuba khona.” Ngakho ukudla incwadi le kumele kufanekise ukwamukela ngentokozo isimemezelo sesikhathi. Ukubaba masinyane kwalokho okwakudliwa yilabo abayidlayo kumele kufanekise ukuguquka okubuhlungu kwalokho ababekudlula kukho, isikhathi sencwadi sesiphelile, sebebona ukuthi amathemba abo ayesedanisiwe kakhulu.
GSAM 186Isimemezelo Sesikhathi Siyikudla Okumnandi
GSAM 186.1Isimemezelo sesikhathi ngo-1844 sasiyizindaba ezithokozisayo ngempela kulabo ababekholwa, ababelindele bengathandabuzi ukukhululwa masinyane kube phakade kubo bonke ububi, lenhlupheko, losizi lwalumhlaba olesono. Ukucabanga ukuthi ngemva kwamaviki amalutshwana babezakhazimuliswa, baphiwe ukungafi, babe semzini wegolide kaNkulunkulu, kanye leNkosi yabo, kwakuvuselela umphefumulo ngempela. Njengokutsho komunye owadlula kulokhu: “Labo abathanda uJesu ngobuqotho bangaqedisisa imizwa yalabo ababekulindele ngokulangazela okukhulu ukuza koMsindisi wabo.... Sasondela kulelihora ngokuthula langenhlonipho ejulileyo. Abakholwayo beqiniso babephumula ebudlelwaneni obumnandi loNkulunkulu, obabuyisibambiso sokuthula ababezaba lakho esikhathini esizayo esikhanyayo. Labo ababa lalelithemba lalokhukholwa kabasoze bawakhohlwa lawomahora aligugu okulinda.”
GSAM 186.2Isimo esinzima ngokukhethekileyo salabo abathi, ngosuku lwetshumi lanye lwenyanga yesikhombisa, bazithola belokhu bekulo umhlaba omnyama wokulingwa lezilingo, lapho okwakumele babhekane khona lokweyiswa, ukuklolodelwa lokuhlekwa yilabo ababesanda kubaxwayisa emahoreni amalutshwana ngaphambili ukuthi balungele ukuhlangabeza iNkosi yabo, sifanekiswa kuhle yisimo sikaMariya, lapho “wayemi ngaphandle kwengcwaba ekhala”; kwathi izingilosi zimbuza zithi: “Mfazi, ukhalelani na?” waziphendula wathi: “Ngoba bayisusile iNkosi yami, njalo kangikwazi lapho abayibeke khona.”5
GSAM 187Bedanile, Kodwa Bengaphelanga Amandla
GSAM 187.1Labo abadlula kulesisimo esinzima bathi ngaso:
GSAM 187.1“Sasikhathazekile, sidanile, kodwa kasilulahlanga ukholo lwethu. Sasizizwa ukuthi siwenzile umsebenzi wethu; sasiphile ngokuvumelana lokholo lwethu oluligugu; sasidanile, kodwa sasingaphelanga amandla. Sasidinga ukubekezela okungelamkhawulo, ngoba abahleki bethu babebanengi. Sasivame ukubingelelwa ngamazwi okweyisa ekhumbuza ngokudumala kwethu kwangaphambili. ‘Kalikenyuki okwamanje; lilindele ukwenyuka nini?’ Amazwi ahlabayo anjalo ayevame ukuphonswa kithi ngababesazi abathanda okomhlaba, kanye labanye ababezithi bangamaKhristu, ababelemukela iBhayibhili, kodwa behluleka ukufunda amaqiniso alo amakhulu laqakathekileyo. Sasilokhu singabantu abafayo; izithelo zesiqalekiso zazisihanqile. Kwakunzima ukuphinda sithwale izinkathazo zempilo ezihluphayo esasithi sesizibeke phansi kuze kube nininini.”
GSAM 187Baqathaniswa Labafundi Ababedanile
GSAM 187.2Imizwa yalabo bantu, nxa iqathaniswa lentokozo lokujabula kwabo emahoreni amalutshwana ayesanda kudlula, kumele ukuba yaba njengokubaba okubukhali kwephikhra kubo. Abantu bomhlaba ababebahanqile bacabanga, njengoba ngokungathandabuzekiyo izixuku zenza ngemva kokubethelwa kukaKhristu, ukuthi abakholwayo basebezalahla ukholo lwabo, bahlanganyele ekuhlekeni lokho okwakuthiwa yibuthutha babo. Masinyane bamangala lapho bebona ukuthi ukuthanda ukubonakala kweNkosi kwakungesuki lula ezinhliziyweni zalabo ababezinikele kuNkulunkulu ngeqiniso.
GSAM 187“Kangihlalanga Labaklolodayo”
GSAM 187.3Indlela laba abaqotho abahamba ngayo, kanye lemizwa yabo, ichazwa kuhle ngamazwi omprofethi uJeremiya, lapho esithi:
GSAM 187.3“Amazwi akho atholakala, ngawadla; ilizwi lakho laba kimi yintokozo lokujabula kwenhliziyo yami; ngoba ngibizwa ngebizo lakho, Nkosi Nkulunkulu wamabandla. Kangihlalanga emhlanganweni wabaklolodayo, njalo kangijabulanga labo; ngahlala ngedwa ngenxa yesandla sakho, ngoba ungigcwalise ngokuthukuthela. Kungani ubuhlungu bami bungapheli, lesilonda sami singelapheki, sisala ukusiliswa? Kambe uzakuba kimi njengomqambi wamanga, lanjengamanzi aphelayo na?”6
GSAM 188UJames White Ukhuluma Ngokudumala
GSAM 188.1Izingcaphuno ezimbalwa ezimfitshane ezivela kwabanye balaba ababedanile, kodwa belethemba, zizatshengisa kuhle isimo esasikhona. Esokuqala sivela kuMdala James White, owasebenza ephumelela kakhulu ngo-1843 lango-1844. Uthi:—
GSAM 188.2“Ukudumala okwaba khona lapho isikhathi sesidlulile kwakubaba. Abakholwayo beqiniso babedele konke ngenxa kaKhristu, njalo babekuzwile ukuba khona kwakhe njengabangazange bakuzwe ngaphambili. Njengokubona kwabo, basebewunike umhlaba isixwayiso sabo sokucina, njalo basebezehlukanise ngezinga elithile lesixuku esingakholwayo, esiklolodayo. Ngesibusiso sikaNkulunkulu siphezu kwabo, babelezifiso zokuba leNkosi yabo ababeyilindele masinyane lezingilosi ezingcwele, ukwedlula ukuba lalabo ababezehlukanise labo. Uthando lukaJesu lwalugcwalise umphefumulo, lukhanya ebusweni bomuntu wonke; ngokulangazela okungakhulumekiyo bakhuleka bathi: ‘Woza, Nkosi Jesu, woza masinyane,’ kodwa kazange eze.
GSAM 188.3“Kodwa uNkulunkulu kabalahlanga abantu bakhe.... Imibhalo enjengale elandelayo ebhalelwe amaHebheru yafinyelela ezingqondweni lasezinhliziyweni zalabo ababelindile, belingwa, ngamandla akhethekileyo langenduduzo: ‘Ngakho lingakulahli ukuqiniseka kwenu, okulomvuzo omkhulu. Ngoba liswela ukubekezela, ukuze seliyenzile intando kaNkulunkulu, lamukele isithembiso. Ngoba kuseseyisikhatshana nje, lowo ozayo uzakuza, kayikuphuza. Kodwa olungileyo uzaphila ngokholo; uba umuntu ehlehla, umphefumulo wami kawuyikuthokoza ngaye. Kodwa thina kasisibo abahlehlela ekubhujisweni, kodwa singabalokholo kube yikusindiswa komphefumulo.’7 Imicijo eqakathekileyo kule ingxenye yeMibhalo yile:—
GSAM 188.4“1. Labo abakhulunyiswa lapha basengozini yokulahla ukuqiniseka kwabo ngalokho ababenze kuhle kukho.
GSAM 189.1“2. Babeyenzile intando kaNkulunkulu, basebelethwe kulesosimo sokulingwa lapho ukubekezela okwakudingeka khona.
GSAM 189.2“3. Abalungileyo ngalesisikhathi kwakumele baphile ngokholo, hatshi ngokuthandabuza ukuthi babeyenzile yini intando kaNkulunkulu, kodwa ngokuba lokholo kulokho ababeyenzile intando kaNkulunkulu kukho.
GSAM 189.3“4. Labo ababengeke babekezelele ukulingwa kokholo, kodwa balahle ukuqiniseka kwabo ngomsebenzi ababeyenze kuwo intando kaNkulunkulu, bahlehle, babezathatha indlela eqonda ekubhujisweni.”8
GSAM 189Okuvela KuN. Southard, Umhleli WeSikhalo Saphakathi Kobusuku
GSAM 189.4KuSikhalo Saphakathi Kobusuku sangomhla ka-31 kuMfumfu 1844, phose insuku ezilitshumi ngemva kokuphela kwensuku ezingu-2300, kwashicilelwa okulandelayo okwakulotshwe ngumhleli:—
GSAM 189.5“Nxa sikhangela zonke izimo eziphathelane lalumnyakazo, izithelo ezibusisiweyo ozivezileyo ezingqondweni zabantwana bakaNkulunkulu, lenzondo lolunya olutshengiswe yizitha zakhe, kumele siwubone ‘njengesikhalo saphakathi kobusuku’ seqiniso. Njalo nxa silezinsuku ezimbalwa zokulingwa kokholo lwethu, kulokhu kuvumelana lomfanekiso wezintombi ezilitshumi; ngoba zonke sezivukile zalungisa izibane zazo, kwakusamele kube lesikhathi lapho izibane zezintombi eziyiziwula ezazizacitsha khona. Lokhu kwakungeke kwenzakale usuku lwetshumi lungakadluli; ngoba kuze kube yilesosikhathi izibane zazo zazizaqhubeka zivutha. Ngakho kwakumele lolosuku ludlule ukuze eziyiziwula zilahle ukholo lwazo, njengalokhu umnyaka ka-1843 kwakumele udlule ukuze kube lesikhathi sokulinda. Ngakho ukulibala kancinyane akusiso isizatho sokudumala, kodwa kutshengisa ukuthi uNkulunkulu ugcwalisa ilizwi lakhe ngokunembeka okungakanani. Ngakho asibambeni siqinise ukuvuma kwethu ukholo singanyikinyeki; ngoba lowo othembisileyo uthembekile.”
GSAM 189Okuvela KuJoseph Marsh, Umhleli WeLizwi Leqiniso
GSAM 189.6ELizwini Leqiniso langomhla ka-7 kuLwezi 1844, sifunda ukuthi:—
GSAM 189.7“Siyavuma ngentokozo ukuthi saphambanisa mayelana lohlobo lwesehlakalo esasikulindele ukuthi senzakale ngosuku lwetshumi lwenyanga yesikhombisa; kodwa okwamanje kasingeke sivume ukuthi uMpristi wethu oMkhulu kazange akufeze ngalolosuku konke esasilesizatho sokukulindela ngokwesifanekiso. Manje siyakholwa ukuthi wakwenza.”
GSAM 190.1Ama-Adventist ayelindele ukuthi ngosuku lwetshumi lwenyanga yesikhombisa, ngo-1844, insuku ezingu-2300 zazizaphela, lokuthi ngalolosuku uKhristu wayezaqeda umsebenzi wakhe wobupristi, eze emhlabeni ukubusisa abantu bakhe. Ukuhlolisisa okwenziwa kamuva kwatshengisa ukuthi ngalolosuku kwaqala umsebenzi wakhe wokuhlanzwa kwendawo engcwele yasezulwini, hatshi ukuthi kwaphela umsebenzi wakhe wokuba ngumpristi.9 Esikhundleni sokubona umsebenzi wokuhlanzwa kwendawo engcwele njengengxenye yomsebenzi kaKhristu njengompristi, kwakuthiwa ukuhlanzwa kwendawo engcwele kwakuzakuba yikuhlambululwa komhlaba ngomlilo ekufikeni kukaKhristu. Nxa kungayisiwo wonke umhlaba, okungenani ilizwe laseKhenani lalizahlanzwa ngalesosikhathi.
GSAM 190Kwakukholwa Ukuthi Indawo Engcwele Ingumhlaba
GSAM 190.2Lumcabango uyavezwa embhalweni kaGeo. Storrs, kuSikhalo Saphakathi Kobusuku sangomhla ka-25 kuMabasa 1844. Uyabuza athi: “Iyini indawo engcwele ezahlanzwa? Imibono yami yangaphambili ibiyikuthi ingumhlaba wonke. Ngisalokhu ngikholwa ukuthi iyingxenye yomhlaba. Kodwa yiyiphi ingxenye? Lo yiwo umbuzo engizazama ukuwuphendula.”
GSAM 190.3Ucaphuna isithembiso esanikelwa ku-Abhrahama, ukuqinisekiswa kwaso ku-Isaka, lokuvuselelwa kwaso kuJakhobe, abesecaphuna ingoma kaMozisi, eyaqanjwa nguMiriyamu ngemva kokuchapha uLwandle Olubomvu, lapho abahlabela khona bathi: “Uzabangenisa, ubahlanyele entabeni yelifa lakho, endaweni, Nkosi, ozenzele yona ukuthi uhlale kuyo, endaweni engcwele, Nkosi, izandla zakho eziyimisileyo.”10
GSAM 190.4Nxa umfundi engaqathanisa ngokunanzelela umbhalo ongenhla lalokho umlobi wamaHubo akulobayo ngokugcwaliseka kwawo, uzabona ukuthi kawutsho ukuthi ngitsho lelizwe lasePhalestina liyindawo engcwele. UDavida uthi, ekhuluma ngokukhokhela kweNkosi abantwana bako-Israyeli: “Wabaletha emngceleni wendawo yakhe engcwele, kuyo lintaba isandla sakhe sokunene esasiyithengile.”11 Engomeni eyahlatshwa oLwandle Olubomvu kuthiwa ilizwe laseKhenani laliyindawo ayezenzele yona ukuze “ahlale kuyo, endaweni engcwele.” Ngokunjalo kulesisicaphuno esivela kumaHubo, iNtaba iMoriya, lapho okwakhiwa khona indawo engcwele, ibizwa kuphela ngokuthi “umngcele wendawo yakhe engcwele.” Kodwa kulo ihubo elifanayo kuthiwa: “Wakhetha isizwe sakoJuda, iNtaba iZiyoni ayeyithanda. Wakha indawo yakhe engcwele njengezigodlo eziphakemeyo, njengomhlaba awumisa kuze kube nininini.”12
GSAM 191Ukuhlanzwa Kwendawo Engcwele Kwakucatshangwa Ukuthi Yikuhlambululwa Komhlaba
GSAM 191.1Esihlokweni esiqanjwe ngenhla, ngemva kokucaphuna lokho okwakuthiwa yibufakazi bokuthi umhlaba, kumbe okungenani ilizwe lePalestina, wawuyindawo engcwele, umdala uqhubeka ebuza esithi: “Indawo engcwele izahlanzwa njani?” Uphendula ngamazwi omprofethi uMikha esithi: “Ngoba khangela, iNkosi iyaphuma endaweni yayo, izakwehla, inyathele ezindaweni eziphakemeyo zomhlaba. Lezintaba zizancibilika ngaphansi kwayo, lezigodi zizaqhekezeka, njengengcina phambi komlilo, lanjengamanzi athululelwa endaweni eyehlelayo.”13
GSAM 191.2Njengoba ngalesosikhathi abanengi babesamukela umbono wokuthi umhlaba wawuyindawo engcwele, umfundi uzabona lula ukuthi kungani babecabanga bengelakuthandabuza ukuthi ekupheleni kwensuku ezingu-2300 iNkosi yayizakuza ihlambulule umhlaba ngendlela echazwe nguMikha. Kukho konke ukuphikiswa kwama-Adventist, kakho loyedwa umphikisi owake wasikisela ukuthi ukuhlanzwa komhlaba ngomlilo kwakungayisiso isehlakalo esasizakwenzeka njengokuhlanzwa kwendawo engcwele ekupheleni kwensuku ezingu-2300.
GSAM 191Abaphostoli Badumala, Kodwa Bagcwalisa Umbhalo
GSAM 191.3Lesi kayisiso sodwa isikhathi lapho abantu abenza khona intando yeNkosi, bagcwalisa umbhalo, kodwa badumala kulokho ababekulindele ngenxa nje yokungaqedisisi ukuthi isehlakalo esasizakwenzeka sasizakuba njani. Kwaba njalo ngabaphostoli bakaKhristu. Lapho ehlezi phezu kwethole likababhemi, engena eJerusalema, bamemeza bekhumbula amazwi omprofethi:14 “Memeza, wena ndodakazi yeJerusalema: khangela, iNkosi yakho iyeza kuwe; ilungile, ilensindiso; ithobekile, igade ubabhemi, ithole, inkonyane kababhemi.”15 Kwakudingeka kakhulu ukuthi kube lokumemeza ngalesosikhathi, okokuthi aluba bathula, amatshe ngokwawo ayezakhala.16 Abafundi babecabanga ukuthi uKhristu wayesezakuhlala esihlalweni sobukhosi sikaDavida ngalesosikhathi lakuleyondawo, eyinkosi yomhlaba (“thina besithemba ukuthi nguye obezahlenga u-Israyeli”17), ngakho bamemeza besithi: “Ubusisiwe umbuso kababa wethu uDavida, ozayo ebizweni leNkosi.”18 Kwakuzakuba lokumemeza okunganani ngalesosikhathi aluba babeqedisisa ukuthi lingakapheli iviki uKhristu wayezabe efile engcwabeni likaJosefa, ebiyelwe ngabalindi bamaRoma? Ama-Adventist ayezamnika “inkazimulo” enganani uNkulunkulu njalo azinikele kangakanani ngo-1844 aluba ayeqedisisa ukuthi ukuhlanzwa kwendawo engcwele ekupheleni kwaso sonke isikhathi sesiprofetho kwakuzathatha iminyaka eminengi iNkosi ingakafiki?
GSAM 192Kwakungelaphutha Ekubaleni Insuku Ezingu-2300
GSAM 192.1Lapho abantu laba behlolisisa ukubala kwabo lesosikhathi, kabatholanga phutha; kodwa iNkosi kayifikanga, lomhlaba kawuhlanzwanga ngomlilo. Kwakusitshoni lokhu? Babekwazi ngokuqinisekileyo ukuthi iNkosi yayilabo kulowomnyakazo omkhulu; kodwa khathesi babengasakwazi ukuthi kuzakwenzakalani. Ukuthemba kwabo iNkosi kwakunganyikinyekanga. Babekwazi ukuthi yayingayikubatshiya. Ukukhanya kwakuzavela ndawana. Umbuzo owawubahlupha uchazwa ngamazwi kaJeremiya aseqanjiwe, athi: “Uzaba kimi njengomqambi wamanga ngokupheleleyo, lanjengamanzi aphelayo yini?” Ukholo kaluzange luvumele lokhu kuthandabuza, ngoba bakhumbula amazwi eNkosi ngomprofethi uHabhakhukhi mayelana lombono, athi: “Ekupheleni uzakhuluma, njalo kawuyikuqamba manga.”19 Amazwi omhleli weLizwi Leqiniso asecashuniwe asichaza kuhle isimo sabo: “Kasikavumi ukuthi umPristi wethu omkhulu kenzanga ngalolosuku uqobo konke lokho isifanekiso esasisenza sikulindele ngokufaneleyo.”
GSAM 193Kwatholakala Ukukhanya Ngendawo Engcwele
GSAM 193.1UHiram Edson, wasePort Gibson, N.Y., wangitshela ukuthi ngosuku olwalandela ukudlula kwesikhathi ngo-1844, ekhuleka ngemva kwezithungo zombila ensimini, uMoya kaNkulunkulu wehlela phezu kwakhe ngamandla amakhulu waphosa wamwisela phansi, njalo wafikelwa ngumcabango othi: “Indawo engcwele ezahlanzwa isezulwini.” Watshela u-O. R. L. Crosier umcabango lo, basebehlolisisa ndawonye indaba le. Ekuqaleni kuka-1846 incazelo ebanzi yendaba yendawo engcwele ngokweBhayibhili, eyabhalwa ngumnumzana Crosier, yashicilelwa kuNkanyezi Yokusa, iphephandaba elalishicilelwa ngalesosikhathi eCincinnati, Ohio. Kulesosihloko eside kwavezwa ukuthi umsebenzi wokuhlanzwa kwendawo engcwele wawungumsebenzi wokucina kaKhristu njengompristi wethu omkhulu, owaqala ngo-1844 futhi ozaphela sekuseduze ukuthi abuye uqobo lwakhe emayezini ezulu eyiNkosi yamakhosi loMbusi wababusi.
GSAM 193Amabandla Edinga Amalunga Ayewalahlekele
GSAM 193.2Usuku lwetshumi lwenyanga yesikhombisa lwalusadlulile, lamabandla acabanga ukuthi kwakuzakuba lula ukubuyisa amalunga ayewalahlekele, ayehlukane lawo ngaphansi “kwesikhalo saphakathi kobusuku” lomlayezo wengilosi yesibili; kodwa kulokhu adumala kakhulu, njengoba kuzabonakala ngempendulo elandelayo ekuncengweni okungapheliyo ukuthi babuyele ezinhlanganweni zabo zakuqala, eyaphiwa kuSikhalo Saphakathi Kobusuku sikaZibandlela 26, 1844:—
GSAM 193.3“Kodwa yiziphi izinto ezenzakalayo? Bakwazi kuhle ukuthi emabandleni amanengi kangaka izihloko ezigcizelelwayo yilezi: ‘Ukuphenduka komhlaba,’ ‘umbuso weminyaka eyinkulungwane,’ kanye ‘lokubuyela kwamaJuda ePalestina,’ uMsindisi engakafiki uqobo lwakhe. Labo ababuyela ukuyahlala ngaphansi kwezingoma zokulalisa zezimfundiso ezinjalo ezingasekelwanga emibhalweni lezingelangqondo, bakwenza amehlo abo evulekile; futhi ukwenza kwabo njalo kuzabe ‘kuyikubuyela emuva’ isibili.
GSAM 194.1“Njengoba ‘sebekhululekile’ ngokutshiwo ngumbhalo, kuphephile kakhulu ‘ukuqhubekela phambili’ kulokuthi ‘babuyele emuva’ kumbe ‘bahlehle,’ ikakhulu ngalesisikhathi, lapho umqhele wenkazimulo usuzaphiwa masinyane abathembekileyo kuKhristu Jesu.”
GSAM 194.2Indlela amabandla ayekwenza ngayo ukuza kweNkosi kube khatshana ngokusekela izimfundiso eziqanjwe ngenhla ezingasekelwanga emibhalweni, yakhumbuza ama-Adventist amazwi la omprofethi uHezekhiyeli: “Ndodana yomuntu, khangela, abendlu ka-Israyeli bathi: Umbono awubonayo ngowensuku ezinengi ezizayo, njalo uprofetha ngezikhathi ezikhatshana.” Kuyo leyongxenye kutholakala impendulo eyayisetshenziswa ngama-Adventist, ethi: “Ngakho wothi kubo: Itsho njalo iNkosi uNkulunkulu: Kakusayikuba lelilodwa lamazwi ami elizalindiswa; kodwa ilizwi engilikhulumileyo lizakwenzeka, itsho iNkosi uNkulunkulu.”20
GSAM 194“Kumele Uprofethe Futhi”
GSAM 194.3Labo “abadla” incwadi, bamemezela “isikhathi,” babecabanga ukuthi umsebenzi wabo emhlabeni wawusuphelile; yikho kwathiwa kumele bafundise futhi izizwe, lezindimi, lamakhosi. Enye ingxenye yomsebenzi, eyayingakabonakali kuze kube ngalesosikhathi, yayisimele yenziwe,—ukuvezela abantu ukuthi ithempeli likaNkulunkulu ezulwini linjani ngempela kanye lenkonzo ye-alithare lalo. Umlayo wokulinganisa ithempeli (21) uyadingeka ukuze kwaziwe ukuthi isehlakalo esizakwenzeka ekupheleni kwesikhathi sesiprofetho sizakuba njani, ngaleyondlela kuchazwe amazwi athi: “Khona indawo engcwele izahlanzwa.”
GSAM 194.4Nanzelela ukuthi ingilosi yalokhu kumenyezelwa kwesikhathi yavela ezulwini, njalo ingakaqedi umsebenzi wayo ipha umlayo wokufundisa abantu futhi. Ngakho umlayezo ozachaza indaba yendawo engcwele, unike abadumalileyo ithemba, futhi ngesikhathi esifananayo ubaphe “umhlanga,” kumbe “intonga,” kumbe isilinganiso abantu bakaNkulunkulu abangahlola ngaso ukuma kwabo phambi kwakhe ngokuziphatha, kumele ube lezibonakaliso ezicacileyo zokuthi uvela ezulwini, hatshi ebantwini.
GSAM 195Ukucwasa Kwavimba Ukufinyelela Ebantwini
GSAM 195.1Ukucwasa imfundiso yokuza okwakukhona kwakungumgoqo owawuphosa ungeqiwe ekufinyeleleni ebantwini; njalo ukuzama ukubafundisa futhi kungelakukhanya okucacileyo lokuqinisekileyo ngembangela yokudumala kwakungasoze kuncede. Abakholwayo abangama-Adventist ngokwabo babedinga ukuthi imiphefumulo yabo ivuselelwe ngomlayo ovela ezulwini, abantu bengakafundiswa kuhle; lokhu kwakungenziwa njani? Kwakungenziwa ngokuhlakanipha kwabantu kuphela yini? Kumbe labo ababebone umsebenzi ojulileyo woMoya kaNkulunkulu ngaphansi komnyakazo owawusanda kwenzeka, babezaneliswa yikucabanga kwabantu nje yini? Ngumsebenzi ofana “lomlayezo wengilosi yesithathu”22 kuphela owawungabakhulula ekudidekeni kwabo; njalo lokhu kwaqaliswa ngesikhathi esifaneleyo, inyathelo ngenyathelo, njengalokho ababesenelisa ukukwamukela, kuletha ubufakazi obuqinisekisa kakhulu bokuthi kwakuvela ezulwini.
GSAM 195Njengezimvu Ezingelamelusi
GSAM 195.2Lelixuku elikhulu labakholwa ekuzeni, ngomunye umqondo, lalinjengezimvu ezingelamelusi; izinkulungwane zabo zazisanda kwehlukana lamabandla wonke lezivumo zokholo kungakapheli amaviki amalutshwana, kungelanhlanganiso yabantu eyayilomlandu wokunakekela impilo yabo yomoya. Babengelabeluleki basemhlabeni ababengabethemba; ukuthemba kwabo kwakukuNkulunkulu kuphela.
GSAM 195.3Kodwa babeqiniseka ngento eyodwa, eyayinjengehange kubo,—ukumenyezelwa kwesikhathi kwakuqondile.23 Kodwa njengabantu babesesimweni sokuthi, ngaphandle kokuthi uNkulunkulu abakhokhele njalo abalondoloze, babengamukela izincazelo zamanga, kumbe baphelelwe “yikubekezela” batshiye ukukholwa kulokho ababedlule kukho. Abanye bakwenza lokhu; kodwa abanye, ilihlo lokholo ligxile kulowo imiphefumulo yabo eyayimthanda, babuza ngokutshiseka besithi: “Mlindi, kuthiwani ngobusuku? Mlindi, kuthiwani ngobusuku? Umlindi wathi: Ukusa kuyeza, lobusuku futhi; uba lifuna ukubuza, buzani; buyelani, wozani.”24
GSAM 196UJ. N. Andrews Ukhuluma Ngokudumala
GSAM 196.1UMdala J. N. Andrews, omunye walabo abadlula kulokhu ngo-1844, ukhuluma ngokudumala kanje:—
GSAM 196.2“Labo ababelindele iNkosi ngo-1843 lango-1844 badumala. Kwabanengi lokhu kuyisizatho esaneleyo sokwala bonke ubufakazi ngalindaba. Siyakuvuma ukudumala, kodwa kasivumi ukuthi lokhu kunika isizatho esifaneleyo sokuphika isandla sikaNkulunkulu kulumsebenzi. Ibandla lamaJuda ladumala lapho, ekupheleni komsebenzi kaJohane uMbhabhathizi, uJesu eziveza enguMesiya owayethenjisiwe. Labafundi ababethemba badumala kabuhlungu kakhulu lapho lowo ababemlindele ukuthi ahlenge u-Israyeli ebanjwa ngezandla zababi, ebulawa. Njalo ngemva kokuvuka kwakhe, belindele ukuthi abuyisele umbuso ku-Israyeli, babengeke bangadumali lapho beqedisisa ukuthi wayesehamba esiya kuYise, lokuthi bona babezatshiywa okwesikhathi eside ekuhluphekeni lasebuhlungwini. Kodwa ukudumala kakuvezi ukuthi uNkulunkulu kalasandla ekukhokheleni abantu bakhe. Kumele kubakhokhele ekulungiseni amaphutha abo, kodwa kakumelanga kubakhokhele ekulahleni ukuthemba kwabo uNkulunkulu. Kwakungenxa yokuthi abantwana bako-Israyeli badumala enkangala, okwenza baphika kanengi ukukhokhelwa nguNkulunkulu. Babekwe njengesixwayiso kithi, ukuze singawi silandela sona lesosibonelo sokungakholwa.”25
GSAM 196Iqiniso Liyabhabhathizwa Ngokungathandwa Ngabantu
GSAM 196.3Kukhanya kulicebo leNkosi ukubeka amaqiniso aqakathekileyo endleleni engathandwa ngabantu, lapho ukuwamukela lokuwalalela okuzakuba yisiphambano.26 Lokhu kuliqiniso ikakhulu kulezinsuku zokucina. UPhethro, ekhuluma ngalesosikhathi lapho ukuphela kwezinto zonke kuzabe “sekusondele,” njalo “ukwahlulela” kuzabe “kuqala endlini kaNkulunkulu,” uthi: “Bathandekayo, lingamangali ngokulingwa okunjengomlilo okuzalilinga, sengathi lehlelwe yinto engaziwayo; kodwa thokozani, ngoba lihlanganyela ekuhluphekeni kukaKhristu, ukuze kuthi lapho inkazimulo yakhe isibonakaliswa, lithokoze lani ngentokozo enkulu kakhulu. Uba lithukwa ngenxa yebizo likaKhristu, libusisiwe; ngoba uMoya wenkazimulo lokaNkulunkulu uhlezi phezu kwenu; kubo uyahlanjalazwa, kodwa kini uyadunyiswa.”27
GSAM 197.1Lapho iqiniso selithole ubhabhathizo lwalo lokungathandwa ngabantu, ukulamukela kudinga umusa omkhulu kulokulandela nje ukholo lwabanengi. Abazenzisi kababoni lutho olukhulu olubakhuthaza ukwamukela iqiniso elidinga isenzo, esinjengokugwedla umfula usiya lapho ovela khona, “uphikisana lomoya lamaza.” Ngaleyondlela iqiniso liba yisivivinyo kwabathembekileyo, abaqotho enhliziyweni, abangelakuzenzisa, labalandela umzwangedwa wabo.
GSAM 197.2Sitshengisile ngaphambili ukuthi isiprofetho somnyakazo wokuza sidinga ukuthi kube lokudumala. Kwafika; njalo ngaleyondlela, ngokunakekela kukaNkulunkulu, ukwamukela lowomlayezo kwaba lokuthwala isiphambano.
Notes
- ISambulo 10:10, 11; 11:1. ↩
- UHezekheli 3:1-3. ↩
- UJeremiya 15:16. ↩
- Iphikhra—umuthi ongathandekiyo, obaba kakhulu, owenziwa ngotshwala, inhlaba lenhlaka yemure. ↩
- UJohane 20:13. ↩
- UJeremiya 15:16-18. ↩
- KumaHebheru 10:35-39. ↩
- Imilandu Emifitshane Yempilo Ka-Ellen G. White, amakhasi 107-109. ↩
- Ngalesosikhathi kwakungelamuntu owayelombono wendawo engcwele ezulwini. ↩
- U-Eksodusi 15:17. ↩
- AmaHubo 78:54. ↩
- AmaHubo 78:68, 69. ↩
- UMikha 1:3, 4. ↩
- UJohane 12:16. ↩
- UZakhariya 9:9. ↩
- ULukha 19:40. ↩
- ULukha 24:21. ↩
- UMakho 11:10. ↩
- UHabhakhukhi 2:3. ↩
- UHezekhiyeli 12:27, 28. ↩
- Ekulinganiseni okungelazinombolo eziphiwayo njengomphumela, okudingwayo yikuthi into injani, hatshi ubukhulu bayo. ↩
- ISambulo 14:9-12. ↩
- Ngokuhlolisisa kakhulu ukubala kwabo insuku ezingu-2300, kabatholanga phutha, njalo lakhathesi kalikho elingatholakala. ↩
- U-Isaya 21:11, 12. ↩
- Imilayezo Emithathu YeSambulo 14:6-12, ikhasi 33. ↩
- UMatewu 16:24. ↩
- 1 UPhethro 4:7, 17, 12-14. ↩