Kabanata 24 — Aliwang Pamanula a Metupad

GSAM 376.1“ISIPAN yu ngeni manibat king aldong iti at king daratang, manibat king adwang pulu't apat a aldo ning kasiam a bulan, angga manibat king aldong mitatag ya ing pundasyun ning Templo ning Guinu, isipan ye. Atyu pa wari ing butil king kamalig? Wa, angga ngeni e pa mebunga ing baging, ing igos, ing granada, at ing oliba: manibat king aldong iti, pagpalain da kayu.”¹

GSAM 376.2Ing siguradu at alang patugut a pamanyulung ning mensahe ning katlung angel manibat king mumuna nang pamagumpisa, malyari yang ikumpara king kasaganaan a kayabe nang Zerubbabel manibat king aldo a linatag ne ing pundasyun ning templu.

GSAM 376Metung a Makasindak a Itsura

GSAM 376.3Anyang ding taung Hudyos, a alang laman a supot at kamalig, inaus la para italakad ing Templo ning Guinu, king panimanman da ring tau, metung yang makapangilabut a pag-asam. Anyang king casalpantayanan tinupad la king aus, at kusa rang sinagupa ing obra, ing gamat ning Dios a magparakal mepakit ya karela. King pamanyubaybay tamu kareng karanasan king pamanyulput na ning ikatlung mensahing ini, akakit tamu ing gamat a gagabay kareng pipili king dalan na. Angga man ing kasakitan ing karelang kapalaran, ing pamagmalasakit ning Dios para king kayang bayan at king kayang obra parati yang malinaw kareng manalig keya.

GSAM 376Testimonya a Maglarawan king Ugali

GSAM 376.4Anyang Nobyembre 24, 1862, adwang pulung ing meganap king pareung oras king bale nang William Wilson, ning Greenville, Mich., para king layuning mag-organisa adwang pisamban para kareng tinanggap king katutuan ning Sabado king lugal a ita. Ing pulung para king pisamban ning Greenville penimunan de ri Pastor White at ing asawa na king metung a kwartu, kabang aku at i Pastor Byington ing manibala king pulung king aliwang kwartu para king pisamban ning West Plains. Kabang makatutuk kami king paunang obra king metung a kwartu, daramdaman mi ya ing siwal nang Ginang White kabang magdalang testimonya ya king metung a kwartu. Mika-kasakitan kami king obra mi, anyang king saktung panaun, binuklat neng Ginang White ing pasbul, at sinabi, “Kapatad Loughborough, akit ku king pamaglawe ku kening grupu a atin kung testimonya para karing aliwang taung atyu keni. Nung handa na ka, lungub ku at magsalita.” Uling ita mismu ing panaun a kailangan mi saup, linub ya. Liban kang Pastor Byington at kanaku, balu na la mu reng lagyu da reng atlung tau king kwartu. Deng aliwa e la kakilala, a e na pa ikit, nune mu anyang mipakilala la keya king kapamilatan ning bisyun.

GSAM 377Ing Bie nang Ginu Pratt a Inilarawan

GSAM 377.1Anyang telakad ya para magsalita, ngana: “Pasensya na kayu kanaku king pamanyalita ku king kailangan kung sabian, nung ilarawan ku la reng itsura yu, uling e ku la balu reng lagyu yu. King pamaglawe ku karing lupa yu, lalto ya kanaku ing minarapat nang ipakit ning Guinu kanaku tungkul kekayu. Itang lalaking atyu king suluk a metung ing mata [atin mekibat, sinabing, ‘Pratt ya ing lagyu na’] matas ya amanu at magkunwaring masyadu king relihiyon, dapot eya pa mibalik-lub. E ye tanggapan king pisamban king kabilian na ngeni, uling eya Kristiyanu. Gugugulan na ing keraklan keng oras king pamaglibut-libut kareng tindahan, at pamisabi-sabi tungkul king teorya ning katutuan, kabang ing asawa na king bale ya ing kailangan magputul dutung, manalaga king hardin, at aliwa pa. Mangaku ya kareng kayang kasunduan a e na naman tutuparan. Ala lang tiwala deng kayang siping-bale king kayang pamangumpisal king relihiyon. Mas mayap para king kapakanan ning relihiyon, para keya, king kabilian na ngeni, ing e na ne man amanan iti.”

GSAM 378Ing Kapatad a i Barr, Pepasaya Ya

GSAM 378.1Pepatuluy na ing sasabian na, “Ining matwang kapatad [kabang tuturu ya kea, atin sinabing, ‘Kapatad Barr’] pepakit ya kaku bilang kabaligtaran na ning metung a lalaki. Metung yang alimbawa king kayang pamibie-bie, maingat yang tuparan ing eganagana nang pangaku, at mayap ing pamag-asikasu na king kayang pamilya. Halus e ne mangasang magsalita tungkul king katutuan karing kayang siping-bale, uling tatakut yang siran na ing obra at makasakit. E na akakit nung makananu ya ka-mapamye ing Guinu para ipatawad la ding kayang kasalanan, at isipan na e ya karapat-dapat maging dake man mu ning pisamban.” Kaybat, sinabi na keya, “Kapatad Barr, inutus na ku ning Guinu a sabian keka a ikumpisal mu na la ngan ding kasalanan a balu mu, at pinatawad na la ding kasalanan mu kanita pa, nung paniwalan mu mu.” Ing itsurang malungkot king lupa ning kapatad agad yang mewala. Tinangla ya a makangiti, at sinabi na, king kayang pagkasimple, “Mekapagpatawad ne?” “Wa,” pekibat nang Ginang White, “at sinabi da kanaku para sabian keka, ‘Sugud na ka, at makiabe ka king pisamban; at nung atin kang pagkakataun, magsalita kang metung a amanu para king katutuan; magdalang mayap a epektu ya ini, uling atin lang tiwala ding siping mu keka.’” Pekibat na, “Gawan ku.”

GSAM 378.2Kaybat, ngana, “Nung i Ginu Pratt malyari yang pansamantalang lumukluk king pwestung kalupa na ning tatalnan nang Kapatad Barr, makasaup ya.”

GSAM 378.3Makanian mewala ya ing metung a sangkan ning kekaming kasakitan king pamag-organisa. Bayu ya pa mepatutu, e mi ya apayunang i Ginu Barr a makiabe king pisamban; kabang king aliwang banda, ikit mi halos balang metung tututul ya king pamagtanggap kang Ginu Pratt; dapot alang ninuman ing mitmung lakas lub a sinabi nung bakit ya tututul.

GSAM 378Ing Selos king Pamilya Mepalambing

GSAM 378.4Kaybat na nita, kinausap ne ing metung a lalaking maputla-kapeng kutis a makalukluk king metung a gilid ning kwartu; at kaybat tinuru ya king metung a babaying payat lupa king eksaktung sumangid a gilid, at inaus na lang asawa. Inilarawan na la ding mapilan a bage a milyari king sadya rang bye, bayu pa man ing ninuman karela minamin king katutuan. Ngana, dening bage a reni pepalaki na la ning Satanas king isip ning babai angga king mitulak ya king kaburyanan. “Ikit ku,” nganang Ginang White, “a ining babai metung yang banua king asilu para karing baliw; dapot manibat inyang mibalik ya isip, pepaburen na la ding pareung kapanamdaman a selos a guluan ing isip na, a maragul a ikalungkut ning asawa na, a gewa na ing sablang agyu na para ipakit king asawa na a matapat ya keya, at ala yang sangkan para ilayu ya king paralan a gagawan na.”

GSAM 379.1King metung a saglit, bigla yang linusut king kwartu ing asawa, at king kayang pamandukû, minyad yang pasensya king kayang asawa. Halus dayu la ding tau king lugal a ita, at e ra balu ing karelang amlat a istorya. Dapot, detang mas makakilala karela, balu da ing ating pamiyawayan king pilatan da, dapot e ra balu ing sangkan.

GSAM 379Kapareu kang Eliseu at Hazael

GSAM 379.2Kaybat nang migpatutu Ginang White, agad meyari ing obra ning pamag-organisa king pisamban. I Ginu Barr lubus yang mekiabe king pamag-organisa, kabang i Ginu Pratt mekawani ya. King oras a meyari ya ing pulung, ing tauling mebanggit sinabi na, a masikan ing pamagsalita na, “Sabian ku keka, alang silbi ing subukang makiabe karening taung areni at magkunwari; e mu agawa ita.”

GSAM 379.3Ing pamaglarawan king ugali, anti king alimbawang mebanggit, masikan neng papaganaka kekatamu ing metung a kawangis a kasu a makatala karing aldo nang Eliseo ing profeta:² I Benhadad, Ari ning Syria, pepadala ne ing kayang alipan a i Hazael kang Eliseo ban mangutang nung makabawi ya king kayang sakit. I Eliseo mekapaglawe ya king kasu nang Hazael, at anyang dinatang ya ing tau king arapan na, at tiniman ne ing lupa na, ing eganagana masikan yang mebabalik king isip na.

GSAM 379I Pastor White Tinamaan king Paralisis

GSAM 379.4Anyang Miyerkules, Agostu 16, 1865, i Pastor White, pauli ning sobrang pamagobra at kakulangan king pamanudtud, tinamaan ya king paralisis. Uling ala pa kanitang mitatag a institusyon para king kalusugan karing kekatamung tau, dela re king Dansville, N.Y., king metung a institusyon para king kalusugan a mayayaus, “Ing Bale Mi king Bunduk-bundukan.” Ing asawa na at ing talasulat kayabe la kaya karin manibat Setyembre 14 anggang Disyembre 7. Uling ditak mu ing ikayap na karing pamanulu a binye king institusyon, minta kami king malugud a pibale-bale nang Bradley Lamson, king Lake View, Rochester, N.Y., nung nu kami menatili manga atlung dominggu. Keni, ikinatula ming akit i Pastor J. N. Andrews, a kabud pa menibalik king siyudad a ita, kaybat nang menatili pilang bulan king Maine.

GSAM 380Panalangin para kang Pastor White

GSAM 380.1Deng pamilya nang Pastor Andrews at Ginu Orton makikayabe la kekami balang gatpanapun king pamamanalangin a kayabe mi i Pastor White at para keya. Ini ing mituluy anggang Disyembri 25. Kabang ing kilwal a yatu mitmu ya king saya at salu-salu ketang aldong Pasku, iti inobserbahan ne ning pisamban ning Rochester bilang aldo ning pamag-ayunu at pamamanalangin para kang Pastor White. Atin kaming pamitipun king abak at gatpanapun, king bale nang Pastor Andrews, New Main St., at king bengi, detang sadya nang makipamanalangin kang Pastor White, mikit la pasibayu keya king bale nang Ginu Lamson.

GSAM 380Ing Bisyun a Mibiye King Bengi ning Pasku

GSAM 380.2Ing pulung ketang benging ita, masikan ya. I Pastor White, binindisyunan yang maragul, at i Ginang White mirinan yang metung a makapagmulalang bisyun, nung nu dakal la reng bage a pepakit kea. Kayabe kareti ding tuntunan para kang Pastor White nung makananu yang sumulung ban agawa na ing kayang casalpantayanan king Dios, a malinong-malino menandit king gamat na para gawa para kea ban abalik ne ing kayang kalusugan.

GSAM 380Panghula king Pamanyalakay nang Satanas

GSAM 380.3Kareng menalangin para kang Pastor White, nganang Ginang White:

GSAM 380.3“Ing layun nang Satanas ya pin ing siran ne ing asawa ku, at idala ne king kutkutan. Kapamilatan da rening masidhing panalangin, mesira ya ing upaya na. Pepakit ya kanaku a mimua ya i Satanas kening grupung iti a mituluy-tuluy kilub ning atlung dominggu a masigasig a manalangin para kanining lingkod ning Dios, at ngeni determinadu ne ing maki gawang masikan a ataki karela. Sinabi ra kanaku a sabian kekayu, ‘Manuknangan kayung malapit king Dios, ban maging handa kayu king nanu man ing datang kekayu.’”

GSAM 381Deng Paunang-balu nang J. T. Orton

GSAM 381.1King mumunang aldo ning Enero, 1866, i Pastor White ampo ing pamilya na meko la king tren papuntang Battle Creek, Mich. Menatili ku king albugan ning New York king mitagan a panaun ning dimla. Manibat pa king mismung bengi a mibiye ya ing bisyun, i Ginu J. T. Orton mekilub ya king kapanamdaman a atyu king peligru ing bie na, dapot e na balu nung nukarin menibatan. Ing kapanamdaman a ini sinabi na kareng mapilan. King Dominggung bengi, Marsu 4, migbalik ya king Rochester ibat Parma, nung nu ya mekyabe king metung a pulung a adwang aldo, kayabe i Ginu E. B. Sanders (ngeni, 1905, makatuknang king San Jose, Cal.), a pinakiusapan na para manatili la king dalan a pekamasala kabang lalakad la king syudad, “uling,” ngana, “panamdaman ku king kabilugan ning panaun a balamu ating taung susubuk paten ku.” Oneng balamu ala yang ideya ninu ing magnasang paten keya.

GSAM 381.2Mibalik ku Rochester ibat Parma, anyang Marsu 7, at menatili ku kang Ginu Lamson, manuyang nang Ginu Orton. Anyang ika-8, dinatang ya at i Ginang Orton para akit da kami, at keta mi inayos ing pamaglakbe mi king tutuking abak sakeng tren papuntang Lancaster, Erie Co., nung nu ku dapat gawan ing seremonya ning kasal para king bukud nang anak a lalaki. Masaya ing pamagpalipas mi king aldo, dapot metung ya namang solemneng aldo.

GSAM 381Pamakamate kang J. T. Orton

GSAM 381.3Meko la king bale nang Ginu Lamson alas-singku ning gatpanapun, at alas-syeti imedya ning bengi, dinatang ya ing metung a mensaheru, a migbalita kekami tungkul king marahas a pamanyugud a gewa kang Ginu Orton ning metung a e makikilalang tau, king sarili nang kamalig, kabang aalagaan na la ding kayang kabayu. Minadali kaming minta king lugal, at ikit mi yang marahas a pepaltukan king buntuk gamit ing metung a kartastake a makabalor king bakal, at mawawala ya king sarili. Mete ya alas-12:35 kanitang benging ita. Angga ngeni, e pa balu ninu ing ginawa king marok a dapat a ita. Siguradung ali ya para king pera, uling ing relo na king bulsa na e ya megalaw, anti murin ing pitaka na, a ating laman a $45. Maragul yang trauma ini kang Ginang Orton, a e na ne abawi pa. Bigla yang mepaluya ing katawan na, at e ya meluat mebyé kaybat ning asawa na.

GSAM 382Ing Prediksyun a Gewa Kanitang Pasku, Mipalyari

GSAM 382.1King kilub ning pilang bulan manibat ketang e malilimutang bengi ning Pasku, anam karing siyam a mekyabe king atlung dominggung pamamanalangin atyu na la king kutkutan. At makanian, metupad ya king makapagmulalang paralan ing metung pang prediksyon.

GSAM 382Saup Para Kareng Mawalang-pag-asa

GSAM 382.2King maranun a abak ning Disyembri 12, 1866, i Elias Stiles, a taga North Liberty, Ind., dinatang ya king bale ku, at pekisabi na ing samanan ke papunta karin ban sumaup, nung malyari, kang James Harvey, a nawalan pag-asa at panamdaman na alang pag-asa king kayang kabilian. Uling balu ku na i Ginang White atin yang malawak a akakit king tauling bisyun a binie kaya, at dakal a kasu ing pepakit kaya king paralan a propetiku, sinabi ku kaya, “Mapalyaring atin yang ikit i Kapatad White tungkul king kasu na, at nung makanian, at nung isulat ne, mas makapangumbinsi ya kesa king nanumang asabi ku kaya.”

GSAM 382.3Agad mi yang puntalan, at kabud e pa man mekapagsalita ninu man tungkul king kabilian nang Ginu Harvey, kinutang ku, “Kapatad White, atin ka bang ikit a sala kareng bisyun a binye keka tungkul king kasu nang Kapatad James Harvey?” “Wa,” ngana, “atin ku, at king pilang aldo ngeni, panamdaman ku na dapat kung isulat at iparla ke kaya.” Kaybat na nita, penimulan nang isalaysay kekami ing ikit na. Nganaku, “Puntalan ke bukas abak, at nung isulat me ing pepakit keka, aku na ing magdalang kaya.” King kasunduan a ita, likwan mi ya, at anyang bengi, mibalik kami. Ayari ne ing pamanyulat, at binasa ne para kekami.

GSAM 383Testimonya para kang James Harvey king Pamagkasákit lub

GSAM 383.1Malino nang sinabi ning testimonya a i Ginu Harvey maging malna ya ing katawan na, at i Satanas subukan neng isiksik king kawalan pag-asa, at subukan nang ipaisip keya a alang pakalulu para keya, at alang pag-asa king kayang kabilyan; dapot ikit na gewa na ing sablang agyu na para itama la ding kamalian ning milabas nang bye, at ing Dios pinatawad ne; at saka, potang matuksu yang paten ing sarili na, pepakit ya kaya a ding angel ning Dios makapalibut la kaya at ituturu de ing pag-asa king Dios at banua. Dakal la ding kalupa nang amanu ning pakalma at pamagpalakas lub king testimonya.

GSAM 383.2Uling atyu kanaku ing dokumentung ini, meko kami kinabukasan a abak papuntang North Liberty. King dalan, sinabi nang Ginu Stiles kanaku na buri na kung akit Ginu Harvey, dapot sinabi na na ala kung idalang salita ning pag-asa para keya; na, potang akit ke, maki-ayon ku keya na alang pag-asa ing kasu na, na metung yang taung mewala; at kanita, kalupa nang Eli kanitang minuna, inyang sinabian ya na meyakua ya ing Kaban ning Dios, mabual ya patalikud at mate ya.

GSAM 383.3Dinatang kami king bale nang Ginu Harvey mga alas tres ning gatpanapun. Anyang akit ke, sinabi ku, “Kapatad Harvey, kumusta ka?” King makalunus a bosis, pekibat na, “Mewala! mewala!! MEWALA!!!” “Ali! E ka mewala. Ating pag-asa king kekang kabilian!” nganaku. Anyang ikit na ing makanian kung pakibat keya, sinabi na, king kalmadung bosis, “Atlung dominggu ku nang isipan a alang pag-asa para kanaku, at mebating ku na; at ngeni, kabang papunta ku king balen manibat king asikan, at tatawid ku king tete king lawa-lawaan ning gilingan, atin yatang sinabing ‘Mebating ka! Alang pag-asa para keka! Lukso ka king lawa ning gilingan at lunuran me ing sarili mu!’ Isipan ku a ing pamangawang anti kanita magdalang pang-insultu king kapakanan nang Cristo, anya pinigilan ke ing sarili kung siran ya.”

GSAM 384Mabilis ing Kaligtasan

GSAM 384.1“Nanu pa man, Kapatad Harvey, e ka malili!” nganaku. “Atin kung testimonya keni a diretsu ibat banua, a sasabing e ka malili!” Pekibat na, “Nung makanian, pakiramdaman ku.” Kanian binasa ke keya ing testimonya, kaybat kung sinabing alang metung a amanu a sinabi kang Ginang White tungkul king kalagayan ning isip na angga na kaybat na sinulat na ing pepakit kea, at ing sinulat na binye king gamat ku. Anyang ayari ke nang basan, minie ya ing lupa na king ngiti kabang sasabian na, “Nung makanian, atin pang pag-asa king kasu ku. Manwala ku king Guinu.”

GSAM 384.2Kaybat ning pamamasa, menalangin kami, at kaybat na nita, megi yang taung mibayu at masaya. Sinabi na kekami a ing kasulatan a ita mas saktung larawan na ing pamipulayi ning isip na kareng milabas a atlung dominggu kesa king agyu nang isalita. Kanian ya mepakit ing lugud ning Dios king pamanyagip na kanining kapatad, king paralan a ini, ibat king kawalan pag-asa.

GSAM 384Pinalapad ing Lualangan Pámag-obra

GSAM 384.3Angga king banuang 1868, ing lugal ning obra da reng Adbentista ning Kapitung Aldo makakulong ya king Estados Unidos, at king dake na niti king pangulu ning mauling angganan ning Missouri at king aslagan ning Ilug Missouri. King metung a pulung para pisabian la ding lugal at ing pamipamudmud ning obra, kabang atin sesyon ing Pangkabilugan a Kumperensya a merapat king Battle Creek, Mich., anyang Mayo 28, mepasiya lang magpadalang adwang talapagobra at metung a toldang anam a pulung pie king California. I Pastor D. T. Bourdeau at ing talasulat miras la king San Francisco anyang Hulyo 18 na ning banwang ita.

GSAM 384Ing Pamuklat ning Misyon ning California

GSAM 384.4Metung a bage a buri kung pansinan kaugnayan king pamuklat ning misyon king California, a masanting a maglarawan king praktikal a gamit ning kaloob ning propesiya. I Pablo, king pamagsalita na tungkul kareng espiritwal a kaloob, kayabe ne ing kaloob ning propesiya, sinabi na la reni “para king pamagperpekto kareng banal, para king obra ning ministeryu, para king pamagpatatag king katawan nang Cristo.”³ Siguradu, ing pinakamabisang paralan para gawang sakdal ding banal ya pin ing ituru karela ding karelang kamalian, ban ilako da la reti, at malinis la karing karelang kasalanan king maulagang daya ning Guinu tamung Hesucristo. Para kanini, ing saup kapamilatan ning kaloob ning propesiya king obra ning ministeryu, manibat pa kanita, pepakit ya kaugnay king kapakanan ning kasalukuyang katutuan, a ituturu kareng alipan ning Guinu ding kakulangan king karelang paralan ning pamag-obra, at nung makananu, kapamilatan ning aliwang paralan, mas maging mabisa la king pamagbalik-loob da ring kaladua.

GSAM 385Testimonya Nung Makananu Magobra king California

GSAM 385.1E melambat kaybat ming miras California, mekatanggap kaming sulat ibat kang Ginang White, nung nu na isalaysay ing metung a bisyun a binie kaya king Battle Creek inyang bengi ning Biernes, Hunyo 12,—metung a aldo a ginugul mi king Lancaster, N. Y., bayu kami meko papuntang California. Eya pa mekapunta king California, at ala yang personal a balu tungkul karing ugali da ring tau. King tutu, kanitang panaun a ita, eya pa mekapunta king albugan ning Ilug Missouri. Ing sanumang kabaluan a atin ya tungkul kareng bage karin menibatan ya king inabuloy na ning Guinu a ipahayag kea.

GSAM 385.2King pamanuru king sulat na, linarawan na la ding mapamiyeng paralan da ring tau ning California, at nung nanu ing maging epektu ning pamag-obra karela king metung a makitid, “matipid king sentimu” a planu. King pamangaral kareng tau ning California, dapat lang lapitan king paralan a maki kaugnayan king mapamiyeng diwa nung makananu la gagawang obra, dapot e naman king paralan a mapag-aksaya.

GSAM 385Ing Hinulaan a Tagumpe Dintang Ya

GSAM 385.3Ngening babalikan ku la ding milabas a atlung pulu't pitung banua manibat inumpisan ya ing obra king California, at akit ku ing kabilian kanita, ing kabilyan da ring tau, at ing paralan nung makananu mi sanang penibala ing kekaming obra nung e mi sana tinggap ing testimonya, at kabang akakit ku la ding bunga ning pamamintu king utus a binye, Asabi ku na ing kekatamung obra mas meyasensu ya kilub ning atlung bulan kesa king metung a banwa nung e kami sinaupan “king obra ning ministeryu” kapamilatan ning instruksyun a tinggap mi king kaloob ning propesiya. Angga king tagsibol ning 1871, bilang resulta da ring pamagsikap king Sonoma County, limang pisamban da ring magmasusi king Sabado ing mitatag.

GSAM 386Ing Mumunang Pulung king Tolda king San Francisco

GSAM 386.1Anyang Hunyu ning pareung banwa, telak mi ya ing kekaming tolda king San Francisco king mumunang pamikatagun. Uling mibalik ne i Pastor Bourdeau king Aslagan, metung pang talapagobra ibat Michigan ing peparala para alilan ya. Dintang ya anyang Hunyu 17, at agad yang mekiabe kanaku king obra king siudad. Kaybat ning mapilan a dominggung pamagsikap king tolda, tinuluy mi la ring kekaming pamitipun angga Disyembri 1, 1871, karing upahang bulwagan. Bilang bunga ning pamagsikap a ini, lampas limampulu ring tinanggap king mensahe king San Francisco.

GSAM 386Deng Subuk a Pangkilub king California

GSAM 386.2Angga kanitang petsa, ding kekaming pagsubuk king California menibatan la keraklan king pamanyalungat ibat king kilwal, dapot ngeni mibangun ya ing e-inaasahang pagsubuk ning casalpantayanan para karing kekaming tau a aliwa itsura. Ing metung a kasamang talapagobra e ya tinuknang king metung a dapat a siguradu kung magdalang pamanyira king sarili na at king adhikain. Atin kaming mapait a kalaban king siudad, a babanten de ing balang kimut mi, at makasadya lang gamitan ing sanumang e matenakan a kimut para ikasira mi. Uli na niti, meging lubus a kailangan ing pakiramdaman ing bilin ning apostol a “iwasan ing balang itsura ning karokan.”

GSAM 386Mapanganib a Pamagsarili

GSAM 386.3Eku sinabi a ing kapatad mekakasalanan ya king kayang gewa, dapot ing rason ku, gawan deng sandata ding kalaban tamu ing bage a sasabian nang inosenti ya. Ing posisyun na, atin yang karapatan a “gawan ing buri na” king bage a ita, lalu na't inamin da a alang kasalanan king gagawan na. Makanian ing milyari angga king Enero 23, 1872, inyang meko ku manibat Sonoma County papuntang San Francisco ban akit nung nanu ing malyaring gawan para patuknangan la ding bage karin.

GSAM 387.1Kanitang panaun a ita, ding kalaban tamu gagamitan de ing keang gagawan anti ing inantak ku, at ing keang posisyun yapin ing “ali la dapat makialam,” a ipakit na karela a atin yang sarili nang isip, at malyari yang lumakad karing dalan nung kapilan na buri at ninu man ing kayabe na, a e la dapat makialam ding aliwa. Sinubukan ku, king pribadung pamagsikap, a ipakit keya a ing makanitang paralan e ya maging mabisa, at ing makanitang malayang espiritu magwakas ya king karokan. Atin yang kakaluguran, a masidhing makisimpatiya keya, at ding aliwa karela megumpisa lang menindig king metung a posisyun a magdalang mas maragul a pamanyaway keya. Ing maragul a dake ning pisamban ikit de ing karokan ning kayang pamaglayas king tamang dalan, at makasadya lang sumaup king pamagsikap a gagawan ku ban isalba ing adhikain king kahihiyan.

GSAM 387Mitalaga ya ing Pulung para king Imbestigasyun

GSAM 387.2Anti kaniti ing kabilian inyang Sabado, Eneru 27, inyang mepasyan a kailangan ing imbestigasyun king kasu, at kailangan ing metung a malinaw a kimut ibat king pisamban, ban iligtas la king mantsa a posibling idulut na ning mapanghamun a espiritung ini. Mitalaga yang pulung, a magumpisa king Dominggu, Eneru 28, alas-nuwebe ning abak, para king pamag-isip king sitwasyun, at ing kekatamung katungkulan bilang pisamban tungkul kaniti. King itsura na ning bage, e na maiwasan ing pamikakawani na ning pisamban a ita. Ginugul ku ing maragul a dake na ning benging ita king pamamanalangin king Dios, a sana gawa ya para kekami.

GSAM 387Metung a Makasulat a Kumpisal

GSAM 387.3King abak ning ika-28, kabang papunta ku king pulung, asaganan ke ing kasamahan king obra king bangketa, malapit king tutuluyan ku, a kakiyak. Ngana, “Kapatad Loughborough, e ku mako king pulung ngeni.”

GSAM 387.4“Eka mako king pulung?” nganaku; “ing pulung tungkul ya king kasu mu.”

GSAM 388.1“Balu ku ita,” ngana, “pero mali ku ngan. Tama ka king posisyun a kinua mu tungkul kanaku. Oyni ing sulat ning pamangumpisal a sinulat ku para king pisamban; akuan me at basan me karela. Mas mayap para keka, at mas mayap para karetang mapalyaring makisimpatiya kanaku, nung ala ku karin.”

GSAM 388.2“Nanu ing sangkan na nining maragul a pamagbayu keka manibat napun?” kutang ku.

GSAM 388Metung a Makapagmulalang Bisyun a Tinggap

GSAM 388.3Pekibat na, “Minta ku king post-office kabengi, kaybat ning Sabado, at mekatanggap kung sulat ibat kang Kapatad White, ibat Battle Creek, Mich. Metung yang testimonya a sinulat na para kaku.” Kabang bibie ne kaku, ngana, “Basan me yan, at akit mu nung makananu neng akakit ning Guinu ing kasu ku.”

GSAM 388.4Pinaki na kanaku na sabian ku king pisamban a mekatanggap yang testimonya ibat kang Kapatad White, a manasaway keya king keang ugali, at tinggap ne iti, uling iti ing katutuan.

GSAM 388Kapanalpuan ning Bisyun

GSAM 388.5Ini dake ne ning metung a panyilip a binie kang Ginang White king Bordoville, Vt., anyang Disyembri 10, 1871. Pegumpisan neng isulat ing dake tungkul king kasu na ning kapatad a lalaking ini anyang Disyembri 27, 1871, dapot uli ning metung a sangkan, ing pamiyari na ning dokumentu me-atrasu ya anggang Eneru 18, 1872, a kanita ya meyari at mipadala manibat Battle Creek. Kanita, manga siyam a aldo ing kailangan para miras la ding sulat manibat Michigan papuntang California king rutang panggabun.

GSAM 388.6King bisyun, dakal a bage ing pepakit keya king paralan a propetiku. Makanian ya ing milyari kening kasung ini. King panaun ning bisyun, aninu ya pa mu ning tutu nang milyari inyang miras ya ing testimonya king San Francisco. Akit ya, king pamiyanti da ring petsa, a ing kasukdulan ning kasu king San Francisco milyari ya kaybat nang meko ning makasulat a testimonya ibat king minunang lugal. Deng kapatad tamu king San Francisco agad dang ikit a alang ninu man ing makasulat king Battle Creek at ipabalu ing balita kang Ginang White king hustung oras para isulat ne ing sulat a ini, uling ing kabilian da reng bage kanita e pa milyari.

GSAM 389.1Ing katutuan a ini maragul ya ulaga karing kapatad karin, a mekumbinsi karela a ating banal a upaya king bisyun a ita. Ala kung sinulat man a metung a linya kang Pastor White o king asawa na tungkul king kabilyan da ring bage king San Francisco, at ing kasamang talapagobra sinabi na alang sinulat; at sinabi da ring kapatad, “Nung sinulat ya, e na sana sinabi ding bage a linto tungkul keya.”

GSAM 389Nung Makananu ya Mesulat ing Bisyun

GSAM 389.2Anyang abalu mi na kaibat, ibat king aliwang sepu ning linya, tungkul king pamanyulat at pamipadala ning testimonya, lalu pang meging malino a ing Guinu a minye king bisyun atin yang pamagmalasakit king oras ning pamanyulat at pamipadala na papunta king destinasyun na, ban datang ya karin king hustung oras.

GSAM 389.3King maranun a oras ning abak ning Eneru 18, 1872, migising ya i Ginang White a malinaw a makatatak king isip na ing testimonya a mebanggit king babo. Ing impresyun kasing klaru ya keya anti mo sanang mararamdam, “Isulat me agad itang testimonya para king California, at isakay me king susunud a mail; kailangan ya.” Anyang meulit iti king kadwang besis, tinikdo ya, mabilis yang migbisti, at tinapos ne ing pamanyulat. Bayu pa ing almusal, inabot ne iti kang anak nang i Willie, at sinabi na, “Dala me ining sulat king post-office, dapot e me isulud king butas a susuluran sulat. Iabot me king post-master, at siguradwan mung isulud ne king mail bag a mako ngening abak.” Kaybat, sinabi na king isipan na medyu kakatwa la ding bilin na, dapot e ya menkutang at gewa na ing inutus kaya, at “akit na ing sulat a linub king mail bag.”

GSAM 389Patune ning Banal a Pamanantabe

GSAM 389.4Nung balu mu ing kekaming sitwasyun king San Francisco kanitang panaun a ita, malagwa mung aintindyan ing ulaga ning pamipasulud na ning sulat a ita king mismung mail a ita. Kanitang panaun a ita, metung mu ing mail a idalan king gabun a atin balang aldo. Nung ing sulat miras ya anyang Dominggung bengi, ing ika-28, imbes na anyang Sabadung bengi, ing ika-27, alang duda mika maragul a pamipitna king pisamban. Nung miras ya pilang dominggu ing minuna, agyang kabud kayari ning bisyun, e na sana agad ikit ning pisamban ing kayang kabaldugan.

GSAM 390.1Atyu ing metung a testimonya a malinong papakit king gamat ning Guinu, e mu uling miras ya king ustung panaun para epektibung itama la ding kasalungsungan a pamagkamali, nune, uling mapagkumbabang tinggap at tuparan ne ning kapatad, mekapagdalang maragul a impluwensya para magdalang pamisanmetung at katatagan king bayung pisamban a ita.

GSAM 390Pamamaraan ning Pamanulat kareng Bisyun

GSAM 390.2Ing alimbawang ini magsilbi ya naman bilang pamipatune king sarili nang sinabi tungkul king paralan ning pamanyulat king ikit na. Tungkul kanini, ngana: “Meyagkat ku king pamanudtud ku a ating malinong kapanamdaman karing paksang sadya nang pepakit king isip ku; at sinulat ku, king kapitangang bengi, ding sulat a mekataglus king kontinente, at anyang miras la king krisis, selagip de ing adhikain ibat king maragul a kapahamakan.”⁴