Egesieri 19 — “Ase Okwama Kwabo Morabamanyere”
GSAM 299.1“Ere akabeka abande koba abatomwa; abande koba ababani; abande koba abarandia b'Enchili; na abande koba abarisia na aborokia; erinde abachenu baikeranigwe, bakore emeremo y'obosomba, na omobere o Kristo oagachwe; goika intwe twensi toikere ase obomo bw'okwegena na bw'okomanya Omwana o Nyasae, tobe omonto omoikeranu, toikere ekerengo ki'obonene bw'ogoichora kwa Kristo.”1
GSAM 299.2Ekero Omotooria abekete ebiegwa bi'Omoika oye ase ekanisa, erinde emeremo y'Omonene ekorwe, “buna ere abwanchire,” goika rituko eriikeranu riaike, taretigete abanto baye bare gocharia nabonyene onye okororekana korwetete igoro gose ase emeika emibe. Korende nabaaire amachiko ago banyare komanya onye omoika noyo o Nyasae gose tari oye. Nonya ase amatuko aya ’omoerio, buna omobani Yoeli atang'aniaririe, Omonene naranyiete goitora Omoika oye igoro ya kera mwanyabanto, na abana abasacha na abakungu babane,2 Paulo natebire ng'a abanto tibanyara kobihena okobana, korende bateeme “ebinto bionsi,” na “babwate mono ekere ekiya.”3
GSAM 299.3Nenchera ki ende okororekana kobu kunyare goteemwa, otatiga ogokogererania namachiko ’Amariko aya komanya emeremo y'Omoika o Nyasae? Tari kera egento getanyare komanyekana ase ebirengererio bi'omonto ekorwa ase Nyasae. Ebibilia nigo egoteba ng'a ase amatuko ’omoerio Saitani nakore ebikone, erinde ang'aine ense na asangererie abanto ase riinde ri'rituko riria rinene ria Nyasae Omonyene Obonyare Bwonsi.4 Ase ayio, ekeegwa ki'ekeene ki'omoika nkemanyekane ase okogererania buya okororekana kwakio namachiko ’Ebibilia. Ogokora igo koganeirie oborendi buna boria abanto b'ense bakorenda ekero bakorigia komanya chibesa chi'oborimo.
GSAM 300Okomanya Chibesa chi'Oborimo
GSAM 300.1Ase Omorareri bw'Amaratasi a Chibesa chi'Ebenki ya Detroit bw'omotienyi bwe kane, 1863, Omogaaka Preston akarusya amachiko atano ’okomanya chibesa chi'oborimo. Akateba ng'a omonto onde bwensi oyogoching'ura buya kera raratasi ri'chibesa aikiri ase amaboko aye, koreng'ana namachiko aya, taganeirie kwoboa ng'a nang'aing'we.
GSAM 300.2Tori enchera ende egenire mono y'ogoteema ekeegwa gi'okobana kobua ogokegererania namang'ana arikire igoro y'ebiegwa ebio biarorekanete ase ebiro bi'Amariko, na goketeema ase amachiko aeirwe omwo. Amariko atoboyia buya ase emeremo emiya yonsi (2 Timotheo 3:16, 17). Naende ntobwate omwo oborori bw'ekeene bw'okororekana kw'ekeegwa gi'okobana, na buna emeremo y'ekeene y'Omoika o Nyasae enyare komanyekana korwa ase emeremo ya Saitani, amo nebiegwa biaye bi'oborimo.
GSAM 300AMACHIKO ’OKOMANYA EBIEGWA BI'EKEENE
GSAM 300.3Omonene atoeire ase ring'ana riaye amachiko agatiganete, are isano na abere gose amange kobua ayio, ago togwatananie okororekana kw'ekeene kw'Omoika o Nyasae na emeremo ya Saitani.
GSAM 300Erichiko Ria Ritang'ani—Okworokereria Kw'omwando
GSAM 300.4Omobani Isaya, ekero akokwana igoro y'amang'ana are ase amatuko ’omoerio, nateba: “Siba oborori, obeke amachiko ekemanyererio egati y'aborokigwa baane. Nainche nimoganyere Omonene, oyobisa obosio bwaye korwa ase enyomba ya Yakobo, na nimbe nimorigia.... Na ekero barabatebie, Rigi abare nemeika y'abakure, na abarogi abakoriria amariogi manini na komumura; tegwenereti abanto komorigia Nyasae obo? Abare moyo baborie abakure? Ase amachiko na ase oborori; onye tibagokwana koreng'ana nering'ana eri, nigo ere ekiagera omobaso tori ime yabo.”5
GSAM 301.1Ase Amariko aya, ntorokiigwa abanto abakorera okoboochokia ekemanyererio ase amachiko a Nyasae—abanto abamoganyete Omonene na bakomokorera emeremo. Nkomorigia bare; ayio nigo ere, nigo barenda ogocha kwaye. Aya nkoreka are ase engaki emeika ekweteba ng'a neya abakure erangia abanto komirigia. Abande mbaigwa okorangeria kwayo na koboria abakure erinde banyore obomanyi; korende Omonene narangeria abanto baye komorigia ere. Ase ogoteba igo nigo agoteba ng'a korabamorigiere nabaaire okworokereria kw'omwando. Tibaganeirie koboria abakure, abatakonyara kobaa obomanyi bwonsi; naki “tibari naende nensemo kare na kare ase egento gionsi gekogokorwa inse y'erioba;” na “abakure tibamanyeti gento gionsi.”6
GSAM 301.2Ase Amariko aya ’igoro, erichiko riaeirwe eri amang'ana onsi agwenerete goteemerwa,—“onye tibagokwana koreng'ana nering'ana eri, nigo ere ekiagera omobaso tori ime yabo.” Amang'ana onsi korwa ase Omonene nakwane ase obomo nering'ana riaye na amachiko aye.
GSAM 301.3Ekero nkobwatia erichiko eri ase amariko ’Omokungu White, nintebe ng'a ase emyaka 52 egietire, nasomete oborori bwaye ase oborendi, nkobugererania namachiko a Nyasae na oborori bw'Ebibilia, na nanyorire obomo oboikeranu mono egati yabi bibere ebi. Okworokereria kwaye tikogokorwa erinde koete okomaanoka okoyia koratware aase ’Amariko. Korende nigo gokotoorokia aase na enchera abanto banyare goetwa oborimo ase ebiro ebi, korusiigwa ase ring'ana. Aase oborori bw'Omokungu White bore nabwo nkomanyekane mono ase aya omonyene arikete igoro yabwo:—
GSAM 301.4“Ring'ana ria Nyasae nariikerete kobarera ebirengererio ebiri ase omosunte omonene mono, na abwo bare neriogio rionsi ri'okorimanya mbanyare korimanya. Korende, nonya aya onsi are igo, abande abateba ng'a nigo bakorigereria ring'ana ria Nyasae banyorekana bare komenya ase enchera egotigana mono nokworokereria kwaye gokomanyekana buya. Ase ayio, erinde abasacha nabakungu bataba negento gi'okwetetia, Nyasae naa oborori obogokwana buya na obogokong'a, akabairania ase ring'ana eri baborete kobwatia.
GSAM 302.1“Ring'ana ria Nyasae riichoire amachiko ’obogima, ago agararia emeroberio emiya y'okomenya. Oborori, obw'abanto bonsi na obw'omonto oyomo oyomo, bwakorirwe erinde borarererie ebirengererio biabo ase amachiko aya ase omwando.... Timomanyeti Amariko buya. Anga mwakorire ring'ana ria Nyasae koba eri mogosoma, na more neriogio ri'ogoikera ekerengo ki'Ebibilia na oboikeranu bw'Obokristo, timwanga mwaganeirie oborori....
GSAM 302.2“Omonene nigo arigetie kobakurera, kobagenia na kobaa amang'ana ’okobakonya, goetera ase oborori obwaeirwe, na konyagania ebirengererio biaino kobua obonene bw'ekeene ki'ring'ana riaye. Oborori obwariketwe tibwaretetwe erinde boete omobaso omoyia, korende erinde bonyaganie mono ase enkoro amang'ana ’ekeene aya Omoika aomanokete kare.... Ekeene kende gi'ogosangereria tigekoretwa; korende Nyasae, goetera ase oborori, agoteba ase obwangu amang'ana amanene ’ekeene aya aeirwe kare. Ase enchera aye omonyene asiborire, ayaretere bosio y'abanto, erinde gokorokie na konyagania ebirengererio biabo, na bonsi batabe negento gi'okwetetia....
GSAM 302.3“Oborori tiboretetwe erinde bokee ring'ana ria Nyasae, korende erinde boritonene na gokwega ebirengererio gocha asere, erinde obwangu obuya bw'ekeene bonyaganie bonsi.... Anga abanto bono abateba ng'a mbare omwando wa Nyasae ogotiganete barigwerete aya akobatuna, buna arikire ase ring'ana riaye, oborori bw'omwando tibwanga bwaeirwe erinde bobakorokie gokora emeremo yabo, na bobamanyesie obobe bwabo na okoba omogiro omonene ekero bakoborwa goigwa ring'ana ria Nyasae.”7
GSAM 302Erichiko Ria Kabere—Ababani b'Ekeene
GSAM 302.4Twaiyegerete kare ng'a ababani b'ekeene bonsi mbagokwana koreng'ana namachiko a Nyasae na oborori bw'ring'ana riaye. Omotomwa Yohana natoete erichiko rinde eri rikoorokia okworokereria kw'ababani b'ekeene. Nateba: “Inwe abanchani, timwegena emeika yonsi, korende moteme emeika, komanya onye neya Nyasae; naki ababani abange b'oborimo bagendete ase ense. Iga nigo moramanye Omoika o Nyasae: omoika onde bwensi oyogoteba oborori ng'a Yeso Kristo ochire ase omobere noyo o Nyasae. Na omoika onde bwensi otagoteba oborori ng'a Yeso Kristo ochire ase omobere tari o Nyasae; oyo nere omoika bw'omobisa o Kristo, oyio mwaigwete ng'a ngocha are; na bono nao are kare ase ense.”8
GSAM 303.1Rigereria buya Amariko aya ’igoro. Tigayagoteba ng'a onde bwensi oyogoteba oborori ng'a Yeso Kristo “naachete ase omobere,” “korende ochire ase omobere”; engencho yaye nigo ere ng'a ngocha are, ase Omoika oye, na komenya ime asetore, ase ogoiraneria okwegena gwaito. Eri, ekeene, nario ring'ana ri'ekeene riri egati y'Enchili, “Kristo ime asemore, ogosemeria kw'obonene.”9
GSAM 303.2Ring'ana riri ase amariko onsi ’Omokungu White, eri rigototebia buna tokomenya, nigo rire ng'a ntoganeirie Kristo koba Omotooria omenyete ime asetore, onye ntoragenderere nonya ng'ake ase enchera y'igoro. Amariko aye nigo akworokia ng'a Kristo naganeire ritang'ani, ase omoerio, na ase engaki yonsi. Erinde komanyesie aya, rigereria egetabu kiaye, Chintambuko gochia ase Kristo, ekio ebitabu biakio kobua 100000 biarendigwe ase Ekengereza, otatiga ebiyongo bi'ebitabu bire ase ebirogo 18 bi'ensencho, ebio bono egetabu eke kegokorusiigwa. Omorandia bw'ekanisa ya Presbyterian, abere asomete egetabu ekio, agasaba ebitabu biakio kobua 300, ase abanto b'ekanisa yaye nabasani baye. Akateba, “Egetabu eke kiariketwe n'omonto omomanyete Omonene Yeso Kristo buya mono.”
GSAM 303Erichiko Ria Gatato—Ababani b'Oborimo
GSAM 303.3Yohana natoete erichiko ri'okomanya ababani b'oborimo: “Abwo n'abanto b'ense; nigo ere bagokwana amang'ana ’ense, na abanto b'ense bakabaigwerera.”10 Okworokereria kw'ababani b'oborimo nkogosangererie okogania kw'enkoro y'omobere, otatiga ogotonenia enchera y'okweanga na okogega omosalaba. Ababani b'oborimo mbarorokie “amang'ana amanyabuya,” otatiga ogotonenia “Omochenu o Israeli.”11 Omonto onde bwensi oyogosoma nonya amaratasi make ’amariko ’Omokungu White nanyare korora ng'a nigo ari ase enchera y'okweanga na okogega omosalaba. Tare ay'ogosangereria enkoro y'omonto oyogania ense na okogania kw'omobere.
GSAM 304Erichiko Ria Kane—Emechando n'Oboremereria
GSAM 304.1Ekero togendererete korigereria ring'ana eri, ntoire, buna erichiko ria kane, amang'ana ’omotomwa Yakobo: “Abaminto, ira ababani, abwo bakwanete ase erieta ri'Omonene, babe omogwekano bwaino bw'okoremereria emechando na kobogorera.”12 Ekero tokosoma igoro y'aya aikere ababani baria ba kare, ntwiyegere ng'a ogotemwa kwabo okomo ase okunene mono nigo kwarenge korora Israeli eanga, gose ekogenda ngokwana, oborori obwakwanetwe buya asebare. Okorigereria ebiro ebio ase engaki enke nkwoorokie bwango emeroberio y'ababani b'ekeene na ab'oborimo. “Omonene bw'Emeganda nigo agoteba iga, Timoigwerera amang'ana ’ababani abwo bakobabanera; nigo bakobaa ebirengererio bia bosa. Nigo bakokwana okorora kw'enkoro yabo abanyene, tari korwa ase omonwa bw'Omonene.”13
GSAM 304.2Tori gento ase amariko ’Omokungu White egekonyara gokora omosomi agania ebinto bia bosa. Korende, buna onde atebire, “Nanyorire obuya obonene ase omoika, kero chinge chitanyare kobarwa, korwa ase oborori. Ekeene, tingosoma oborori obwo ntarigwete ng'a nangeniigwa ase okoborwa okwegena Nyasae, okoborwa okwea asare, na okoborwa omokia bw'okotooria emioyo.” Ase ayio, amang'ana oborori bw'Omokungu White bokorenta nigo agotigana mono naya ’okworokereria kw'ababani b'oborimo, buna Yeremia abooroketie.
GSAM 304.3Omobani natoorokia boigo buna ababani b'oborimo barorokie: “Bagendererete kotebia abwo bakombihena ng'a, Omonene atebete ati, Inwe namobe nomorembe; na bagotebia kera omonto ogendererete ebirengererio bi'enkoro yaye omonyene ng'a, Obobe tibokobaikera.”14
GSAM 304.4Ase engencho y'okworokereria kw'Omokungu White ase oborori bwaye, nimborokie amang'ana aya ’omosomi omorendi:
GSAM 304.4“Nasomete oborori bwaye bwonsi korwa omochakano goika omoerio, obonge ngabosoma kero chinge. Tinganyorete nonya egetebio kimo ki'obobe ase bwonsi, gose egento gionsi getari gechenu mono na ki'Obokristo; tori egento gionsi egekoeta omonto korwa ase Ebibilia gose Kristo. Korende omwo nanyora ogosorora okonene mono kw'ogoigwa Nyasae, komwancha Yeso, kwegena Amariko, na kobarigereria botambe. Okoba ang'e na Nyasae igo, okwea asare ase omokia buna oyo, na ogosorora okorito kw'okomenya obogima obochenu, nkunyare kwekorokiigwa n'Omoika o Nyasae bweka.”
GSAM 305.1Omonto origerereti oborori bwaye ase oborendi korwa omochakano narika iga:
GSAM 305.1“Ase engencho y'okogania amang'ana buya na ase obwegenwa, otari nobwoba gose okobogoria omonto oyomo kobua onde, ningania koba kirori ng'a tori ogotiga ogokora igo. Anga ebirengererio bimbe na bi'obobe nabio bikorigereria emeremo eye, amang'ana ’ogotonenia abanto nario anga aikire aase ’oborori obokorigia ime y'enkoro na ogogenia kw'obwegenwa. Okogokwana komanyekanete, ogogenia kw'obwegenwa igoro y'obobe, amang'ana ’amabeebe na okogosoria abanto bagotengeka, abakoigwa ng'a mbaganeirie Omotooria, na abagosira abakorigereria ase obokanyeku gotiga obobe bwabo,—aya nario abwate aase anene ase emeremo yaye. Oborori bw'Omokungu White, obokogenia obobe bw'abanto abange abaroche ase okorora, bwakwaneetwe ase obwegenwa obonene, na bukorenta obuya obonene mono.”15
GSAM 305Erichiko Ria Gatano—Obobani bw'Ekeene Bwaikeranigwa
GSAM 305.2Musa atebete amang'ana igoro y'ababani b'ekeene na ab'oborimo, ayanyorekana ase egesieri ki'ikomi na moanane ki'Okoiranerera. Nateba: “Nenchera ki toramanye ring'ana eri Omonene atakwaneti? Omobani karakwane ase erieta ri'Omonene, na ring'ana erio ritakonyoreka, gose ritakoikerana, erio nario ring'ana Omonene atakwaneti. Korende omobani oyio akarigokwana ase okwegarura; timomwoboa.”16
GSAM 305.3Ring'ana rirorio nanyorekana boigo ase Amariko aya: “Ning'o oyogoteba ring'ana, na rio rikoikerana, Omonene atariragerie?”17 Igoro y'omobani Samweli, nigo gwatebetwe, “Amang'ana onsi akogoteba naikeranigwe ekeene.”18 “Ekero ring'ana ri'omobani riraikerane, erio omobani oyio namanyekane ng'a Omonene ekeene namotomete.”19
GSAM 306.1Bono emyaka kobua 53 yaetire korwa ekero omoriki oroche Omokungu E. G. White ritang'ani are ase okorora kw'obobani. Ase emyaka eye, atebete amang'ana amange ’obobani igoro y'ebinto biaranyara gokoreka. Obobani bwaye obonde nigo bokogania ebinto biaikeranire kare, obonde nigo bogendererete koikeranigwa, na obonde konya mbore bosio. Ase aya ’obobani agokogania ebinto biaetire gose bire gokoreka bono, timanyeti nonya ring'ana rimo riaburire koikerana. Obobani bwaye obonde bwaorokigwe kare. Obonde noboorokigwe ase ebisieri bire gocha, buna toragenderere korandia amang'ana aya.
GSAM 306Erichiko Ria Gatano na Rimo—Ebikone Tibiari Egeteemo ki'Omobani bw'Ekeene
GSAM 306.2Abariki abange b'amang'ana a Nyasae batebete, naende amang'ana aya ariketwe ase ebitabu bi'okorota Amariko, ng'a ekemanyererio ki'omobani bw'ekeene n'okogokora ebikone. Konya titwanyora ase Amariko erichiko riri buna eri.
GSAM 306.3Onye ogokora ebikone nabwo oborori bw'omobani bw'ekeene, erio “omobani bw'oborimo” oria orokirwe ase Okomaanoka 19:20 nanga agetebetwe, ase omoerio, ng'a n'omobani bw'ekeene. Naki nigo egotebigwa, “Eng'iti ekabwatwa, na amo nayo omobani bw'oborimo, oyokorete ebikone bosio bwayo, ebio ang'ainete nabio abanto abarocheire ekemanyererio ki'eng'iti.” Okobua okororio nkogokwanwa boigo ase Okomaanoka 13:14, ng'a nkong'aina kore “abanto bamenyete ase ense, goetera ase ebikone ebio aeirwe obonyare bw'okobikora ase obosio bw'eng'iti.” Ase ogobwatia erichiko eri igo boigo, nanga tokagendwa koika ase ring'ana ng'a nonya Saitani n'omobani bw'ekeene. Emeika emwe, ere gocha gokora emeremo y'omwando ase riina ria gatano na rimo, egati y'amarina isano na abere ’omoerio, erokire “emeika y'amasaitani, ekogokora ebikone, egesoka egachia ase abaruoti b'ense na b'oboiko bwonsi, erinde ebasangererie ase riinde ri'rituko riria rinene ria Nyasae Omonyene Obonyare Bwonsi.”20
GSAM 306.4Onye oborori bw'omobani bw'ekeene nkobonyorekana kore ase ebikone akogokora ekero atari ase okorora, ntwanga twanyorire ababani bake mono b'Ebibilia abaranyare goeta egeteemo ekio. Igo nkore ekeene mono onye okorigereria kobekirwe ase ayariketwe igoro y'emeremo yabo. N'ekeene ng'a ebikone mbiariketwe ng'a mbiakorirwe nababani abande, buna Eliya, Elisa na Paulo. Korende ning'o ororire ase Ebibilia amang'ana arikire ’ebikone bia Isaya, Yeremia, Danieli, Hosea, Yoeli, Amosi, na abande? Korende aba bonsi nigo barenge ababani b'ekeene b'Omonene. Mbamanyekana igo ase amachiko Omonene atoeire ng'a nago ’ogoteema omobani bw'ekeene.
GSAM 307.1Ng'a okogokora ebikone tari nakio egeteemo ki'omobani bw'ekeene nkororekana buya ekero tokosoma amang'ana ’Amariko igoro ya Yohana Omobatisi. Ng'a n'omobani arenge nkogoorokiigwa n'obobani bw'ise Zakaria, ekero arandetie okorora Nyasae amoeire igoro y'omwana aranyara koiborerwa. Akateba: “Naye, omwana, norokwe omobani bw'Ore Igoro Mono; naki nogende bosio bw'Omonene, oroisie chinchera chiaye.”21 Omotooria oito omonyene naamanyete Yohana ng'a n'omobani oria oranyara koroisia enchera bosio bwaye. Naki igoro ya Yohana akateba: “Korende mwagendete isiko korora ki? Omobani? Ee, nabatebirie, n'omonto omonene kobua omobani. Oyio nere amariko akogania ekero ateba, Rora, nintoma omotomwa one bosio bwao, oyio oraroisie enchera yao bosio bwao. Naki nabatebirie ng'a, egati y'abaiboirwe nabakungu tori omobani omonene kobua Yohana Omobatisi?”22
GSAM 307.2Aiga, erio, ntobwate ring'ana ri'Omotooria rikogokwana buya ng'a Yohana n'omobani arenge. Ntoteme ogokora ebikone koba ekerengo, na torore aya ararueo. Ase Enchili yariketwe na Yohana omorandia, ntobwate amang'ana aya: “Abanto abange bakagenderera asare [Kristo], bagateba, Yohana tarakorete egekone gionsi; korende amang'ana onsi Yohana akwanete igoro y'omonto oyo nigo arenge ’ekeene.”23 Ring'ana eri rioka nigo rigotamwameria mono oyio ogoteba ng'a ekemanyererio ki'omobani bw'ekeene n'okogokora ebikone.
GSAM 307.3Erichiko eri riaeirwe ase Okoiranerera 13:1-3, eri torokete erichiko ria gatano na rimo ase okobara gwaito kwa bono, nigo rire erinde ritotange kobwatia egento gionsi ki'amakumia gose ki'ebikone, titaraigwereria buya onye ng'otogenda ang'e mono na Omonene, gose ng'otogenda aare na ere. Amariko aya nigo agototebia kobwatia amachiko onsi, ase omwando torore onye egento ekio nkeng'anete na Nyasae na amachiko aye.
GSAM 308.1Erichiko eri ria gatano na rimo nigo rigokworokia ng'a, onye egekone kiakorwa n'omonto oyokweteba ng'a noyo aetetwe na Nyasae, ekero kiateemwa buya, nigo korarorekana amo nakio okorua ase amang'ana amachenu ’ekeene ’ring'ana ria Nyasae, na ogochichia ekerengo erinde konyare goikerera enkoro erigetie gotama enchera y'okweanga. Omonene nigo agoa omonto oyio ribaga ri'okoboka. Emeroberio yaye nigo ere egeteemo ase omwana bw'ekeene o Nyasae, ekomoa ribaga ri'okorigereria buya enchera gose okogania kw'omokori bw'ebikone oyio. Abwo babwate ring'ana ria Nyasae, bakabura kong'ainwa n'omokori bw'ebikone oyio bw'oborimo, nigo bakorua ase amang'ana ayo bare abakong'u ase Nyasae.
GSAM 308.2Ase amatuko aya amabe, ekero abanto abange bakweteba ng'a mbare “abagwenia ase okwegena,” “abagwenia ase obonyare bwa Nyasae,” “abagwenia b'Obomanyi bw'Obokristo,” na abande, mbuya kobwatia buya amachiko ’Amariko. Naki ntoganeirie amachiko a Nyasae na ogobarerigwa kw'Omoika Omochenu, erinde tonyare komanya buya okogania na ekero ki'abande ase “abagwenia” aba, ekiagera emeremo yabo nemebise mono. Korende abande nigo bakobihena amachiko a Nyasae na ekeene kiaye ki'engaki eye ng'atare kobisa. Kero chimwe, “abagwenia” aba bakwetebete igo batinyire endamwamu buna abanto baichoire oborandaru, nonya ekero amachiko a Nyasae akorokwa bwoka. Buna ere ekeene ng'a Omonene nare nering'ana rikorandia amachiko aye amachenu, naboigo ere ekeene ng'a abanto abwo bakorumia amachiko aye, na gosokia baria nonya bakoyaroka korwa ase obosio bwabo, tibari n'ogokorokiigwa kw'Omoika Omochenu.
GSAM 308Erichiko Ria Gatano na Kabere—Okwama Kwabo
GSAM 308.3“Mwerende ababani b'oborimo, abagocha asemore baboyete ching'ubo chi'ching'ondi, korende ime mbare ebisusu ebikareru. Morabamanyere ase okwama kwabo. Abanto mbagosorora chinsabibu ase emechongoma, gose amako ase emebigiri? Igo boigo kera omote omuya nigo okwana amatunda amaya, korende omote omobe nigo okwana amatunda amabe. Omote omuya tokonyara kwana amatunda amabe; gose omote omobe tokonyara kwana amatunda amaya. Kera omote otakwani amatunda amaya nigo ogotemwa na konyagwa ase omorero. Ase ayio ase okwama kwabo morabamanyere.”24
GSAM 309.1Amang'ana aya ’Omotooria oito nigo akoigwaneria ring'ana ng'a ekeegwa gi'okobana nkiaranyara kobao ase ebiro bi'Enchili. Anga ababani b'ekeene tibare koba amo nemeremo, na kera okororekana kw'obobani korweire ase obobe, tanga atebete ng'a, “Mwerende ababani”? Ekero agototebia buya igo buna kera engencho y'ababani eranyare komanyekana, aya nario oborori obonene mono ng'a ase emeremo y'Omosorori, Omoika Omochenu, y'okoorokia “ebinto bire gocha” (Yohana 16:13), nkiaranyara kobao ekeegwa gi'okobana ki'ekeene. Erichiko eri, eri torokete erichiko ria gatano na kabere ase okobara gwaito, tirinyare gosira. Kristo tatebete ng'a monyare kobamanyera ase okwama kwabo, korende atebete ase obokong'u ati, “ase okwama kwabo morabamanyere.”
GSAM 309.2Ntoboria ng'a, N'ogwama ki korakorekana ase emeremo y'ebiegwa bi'ekeene bi'Omoika o Nyasae? Ogoiraneria nkonyorekana kore ase amang'ana ’Paulo igoro y'okogania kw'Omonene ase okobeka ebiegwa ase ekanisa: “Ase ayio nateba ati, Ekero agendete igoro, akabogoria abasakore, akabaa abanto ebiegwa.... Ere akabeka abande koba abatomwa; abande koba ababani; abande koba abarandia b'Enchili; na abande koba abarisia na aborokia; erinde abachenu baikeranigwe, bakore emeremo y'obosomba, na omobere o Kristo oagachwe; goika intwe twensi toikere ase obomo [“gochia ase obomo,” ase orubega] bw'okwegena na bw'okomanya Omwana o Nyasae, tobe omonto omoikeranu, toikere ekerengo ki'obonene bw'ogoichora kwa Kristo.”25
GSAM 309.3Bwatia erichiko eri ase ekeegwa gi'okobana ekio kiabeire amo na ring'ana ri'omomalaika o gatato korwa omochakano bwario; niaya akoruao?—Ntunyora ng'a okworokereria okogendererete okwaeirwe goetera ase Omokungu White nigo kwabeire kw'obomo na okoreng'ana, gokogena abanto “korigereria amo,” na “kobwatana amo,” erinde babe omo na Kristo, na ase igo babe nobosani bw'ekeene na obomo intwe ase intwe.
GSAM 310.1Abande abakwanga emeremo eye batebete ase obochori, “Anga tari ase okorora kw'Omokungu White, oko more nakwo egati yaino, emeremo yaino nanga yasire kare mono.” Ogoiraneria nigo kore, “Eyo n'ekeene; naki korwa ase okorora oko, Omonene atoeire amang'ana ’okotokonyia, okotokurera na omobaso, na ase igo okobagokana kwarusiigwe, emeremo egagenderera buya.” Ase ayio, aya barigereretie koba okorumia ekeegwa, ekeene nigo are oborori ng'a okwama kwakio n'ogw'ekeegwa gi'okobana ki'ekeene.
GSAM 310.2Ase emyaka 60 na kobua ayio, okororekana kw'ekeegwa gi'okobana goetera ase Omokungu White kwateemwa ase amachiko aya isano na abere. Na ase kera ring'ana, kwaikererire aya agotunwa ase obobani bw'ekeene.
Notes
- Abafeso 4:11-13. ↩
- Yoeli 2:28, 29. ↩
- 1 Abathesalonike 5:20, 21. ↩
- Okomaanoka 16:14. ↩
- Isaya 8:16-20. ↩
- Omorandia 9:6, 5. ↩
- Oborori ase Ekanisa, egetabu kia 5, amaratasi 663-667. ↩
- 1 Yohana 4:1-3. ↩
- Abafeso 3:17; Abakolosai 1:27. ↩
- 1 Yohana 4:5. ↩
- Isaya 30:10, 11. ↩
- Yakobo 5:10. ↩
- Yeremia 23:16. ↩
- Omorongo 17. ↩
- J. N. Andrews, ase Omoiroro bw'omotienyi bw'ikomi na kabere, 1867. ↩
- Okoiranerera 18:21, 22. ↩
- Ekerero kia Yeremia 3:37. ↩
- 1 Samweli 9:6. ↩
- Yeremia 28:9. ↩
- Okomaanoka 16:14. ↩
- Luka 1:76. ↩
- Luka 7:26-28. ↩
- Yohana 10:41. ↩
- Matayo 7:15-20. ↩
- Abafeso 4:8-13. ↩