Capitulo 24 — Otro prediccionnan cu a wordo cumpli
GSAM 376.1“CONSIDERA awor, di e dia aki pa dilanti, di e binti cuatro dia di e di nuebe luna, di e dia cu a pone e fundeshi di e templo di Señor, considera esaki. E simia ta ainda den e mangasina? Si, ainda e mata di wendruif, e mata di figo, e mata di granatapel y e mata di oleifi no a duna fruta: di e dia aki pa dilanti lo Mi bendiciona boso.”1
GSAM 376.2E progreso sigur y constante di e mensahe di e di tres angel for di su prome cuminsamento por wordo compara bon cu e prosperidad cu a acompaña Zorobabel for di e dia cu el a pone e piedra di fundeshi di e templo.
GSAM 376Un perspectiva desalentador
GSAM 376.3Ora cu a yama e pueblo hudio, cu su cartera y mangasinanan di grano bashi, pa construi e templo di Señor, segun tur apariencia humano e perspectiva tabata desalentador. Ora cu pa medio di fe nan a obedece e yamada y a cuminsa e trabou di buena gana, e man di Dios cu ta duna prosperidad a bira visibel pa nan. Ora nos ta sigui e experiencianan den e surgimento di e di tres mensahe aki, nos ta distingui e man cu ta guia esnan cu ta scoge Su caminda. Maske nan tin cu sufri afliccion, e cuido di Dios pa Su pueblo y Su obra semper ta bira cla pa esnan cu ta confia den Dje.
GSAM 376Testimonio cu ta describi caracter
GSAM 376.4Dia 24 di november 1862, a tene dos reunion na e mes ora den cas di William Wilson, di Greenville, Mich., cu e proposito di organisa dos iglesia pa esnan cu a acepta e berdad tocante sabat den e cercania ey. Pastor White y su casa a dirigi e reunion pa e iglesia di Greenville den un camber, mientras cu Pastor Byington y ami tabata encarga cu un reunion den un otro camber pa e iglesia di West Plains. Mientras nos tabata ocupa cu e trabou preliminar den un camber, nos por a tende e stem di Sra. White mientras e tabata duna su testimonio den e otro camber. Nos tabata encontra algun dificultad den nos trabou, ora cu net na e momento oportuno Sra. White a habri e porta y a bisa: “Ruman homber Loughborough, ora mi ta wak e grupo aki, mi ta mira cu mi tin testimonionan pa algun di e personanan presente. Ora boso ta cla, lo mi drenta y papia.” Como esey tabata net e momento cu nos mester di ayudo, el a drenta. Fuera di Pastor Byington y ami, e tabata conoce e nomber di solamente tres persona den e camber. E otronan tabata hende desconoci pa dje, cu nunca el a mira, sino manera nan a wordo presenta na dje den vision.
GSAM 377E bida di Sr. Pratt describi
GSAM 377.1Ora el a lanta pa papia, el a bisa: “Boso mester dispensa mi si, ora mi conta loke mi tin pa bisa, mi describi boso apariencia, pasobra mi no conoce boso nombernan. Ora mi mira boso caranan, loke Señor a haya bon di mustra mi tocante boso ta bini dilanti di mi. E homber ey den e huki cu un solo wowo [un hende a papia, bisando: “Su nomber ta Pratt”] ta declara hopi y ta pretendi grandi cos den religion, pero ainda nunca el a wordo converti. No acepta e den e iglesia den su condicion actual, pasobra e no ta un cristian. E ta pasa hopi di su tempo sin haci nada na tayernan y tiendanan, discutiendo e teoria di e berdad, mientras su casa na cas mester corta leña, cuida e cura, etc. Den su negoshinan e ta haci promesanan cu e no ta cumpli. Su bisiñanan no tin confianza den su profesion di religion. Pa e causa di religion lo ta mihor si, den su condicion actual, e no bisa nada tocante dje.”
GSAM 378Ruman homber Barr a haya alegria
GSAM 378.1El a sigui, bisando: “E ruman homber di edad aki [mientras e tabata mustra na dje, un hende a bisa: “Ruman homber Barr”] a wordo mustra na mi den contraste directo cu e otro homber. Su bida ta hopi ejemplar, e ta percura di cumpli tur su promesanan y e ta percura bon pa su famia. E casi no ta risca papia di e berdad cu su bisiñanan, pa miedo cu e lo daña e obra y haci malesa. E no por compronde con Señor por ta asina misericordioso cu E ta pordona su picarnan, y e ta considera su mes indigno hasta di ta miembro di e iglesia.” Despues el a bisa na dje: “Ruman homber Barr, Señor a manda mi bisa bo cu bo a confesa tur e picarnan cu bo tabata conoce, y cu hopi tempo caba El a pordona bo picarnan, si solamente bo lo kere esey.” E expresion di tristesa riba e cara di e ruman homber a desaparece mesora. El a hisa su cara cu un sonrisa y a bisa den su senciyes: “El a haci esey?” “Si,” Sra. White a contesta, “y mi a wordo manda di bisa bo: ‘Bin y uni bo cu e iglesia; y segun bo tin oportunidad, bisa un palabra na fabor di e berdad; lo e tin un bon efecto, pasobra bo bisiñanan tin confianza den bo.’” El a contesta: “Lo mi hacie.”
GSAM 378.2Despues el a bisa: “Si Sr. Pratt por, pa algun tempo, tuma un posicion similar na esun cu Ruman homber Barr tabata ocupa, esey lo hacie bon.”
GSAM 378.3Asina un di e causanan di nos dificultad pa organisa a wordo kita. Prome cu el a duna su testimonio, nos no por a haya Sr. Barr pa consenti di uni su mes cu e iglesia; mientras cu, di otro banda, nos a haya cu casi tur hende tabata contra di acepta Sr. Pratt, pero ningun hende no tabata sinti su mes liber pa bisa dicon e tabata contra.
GSAM 378Celos den un famia a wordo cura
GSAM 378.4Despues el a dirigi su mes na un homber cu cuero di color di santo, cu tabata sinta na un banda di e camber; y despues el a mustra na un muhe cu cara fini na e otro banda, completamente enfrente, dirigiendo su mes na nan como esposo y esposa. El a describi algun cos cu a pasa den nan bida di antes, prome cu cualkier un di nan a declara su fe den e berdad. El a bisa cu Satanas a haci e cosnan ey bira asina grandi den e mente di e muhe cu esaki a hacie perde su rason. “Mi a mira,” Sra. White a bisa, “cu e muhe aki a pasa un aña den e asilo pa hende cu a perde nan rason; pero desde cu el a recobra su rason, el a permiti cu e mes sentimentonan di celos ta perturba su mente, causando hopi tristesa na su esposo, cu a haci tur loke tabata den su poder pa mustra su esposa cu e ta fiel na dje y cu e no tin ningun motibo pa tene su esposo na distancia manera e ta haci.”
GSAM 379.1Mesora e esposa a core crusa e camber y, riba su rudianan, a suplica su esposo pa pordone. E personanan aki tabata casi desconoci den e parti ey di e pais, y nan historia di antes no tabata conoci. Sin embargo, esnan cu tabata conoce nan mihor tabata sa cu nan no tabata bon cu otro, pero nan no tabata conoce e causa.
GSAM 379Similar na Eliseo y Hazael
GSAM 379.2Despues cu Sra. White a duna su testimonio, e trabou di organisa e iglesia a wordo completa pronto. Sr. Barr a drenta den e organisacion di henter curason, mientras Sr. Pratt a keda pafor. Na e momento cu e reunion a termina, esun ultimo a bisa cu hopi vehemencia: “Mi ta bisa boso, no tin ningun sentido den purba cana cu e pueblo aki y actua como hipocrita; bo no por hacie.”
GSAM 379.3E descripcion di caracter, manera den e caso ariba, ta corda nos fuertemente di un caso similar registra den e dianan di e profeta Eliseo:2 Benhadad, rey di Siria, a manda su sirbiente Hazael cerca Eliseo pa puntra si e lo recupera di su malesa. Eliseo a haya un vision di e caso di Hazael, y ora e homber a presenta su mes dilanti di dje y el a wak su cara, tur cos a bini cla dilanti di su mente.
GSAM 379Pastor White a wordo paralisa
GSAM 379.4Diarason, 16 di augustus 1865, como resultado di trabou excesivo y falta di soño, Pastor White a haya un atake di paralisacion. Como ainda no a establece institucionnan di salud entre nos pueblo, a hibe na Dansville, N.Y., na un institucion di salud yama “Nos cas na e ladera”. Su casa y e autor tabata cu ne aya di 14 di september te 7 di december. Como el a haya solamente poco alivio di e tratamentonan duna den e institucion, nos a bai na e cas hospitalario di Bradley Lamson, Lake View, Rochester, N.Y., unda nos a keda mas o menos tres siman. Aki nos tabata contento di encontra Pastor J. N. Andrews, cu a caba di bolbe na e ciudad ey despues di a pasa varios luna na Maine.
GSAM 380Oracion pa Pastor White
GSAM 380.1E famianan di Pastor Andrews y Sr. Orton a reuni cu nos tur atardi pa un tempo di oracion cu Pastor White y pa dje. Esaki a sigui te 25 di december. Mientras e mundo pafor tabata yen di alegria y comementonan na e dia di Pasco di Nacemento ey, e iglesia di Rochester a observa esaki como un dia di ayuno y oracion pa Pastor White. Nos tabatin reunion mainta y atardi den cas di Pastor Andrews, na caya New Main, y anochi esnan cu anteriormente tabata ora cu Pastor White a reuni cu ne atrobe den cas di Sr. Lamson.
GSAM 380E vision duna e anochi di Pasco di Nacemento
GSAM 380.2E reunion e anochi ey tabata poderoso. Pastor White a wordo bendiciona grandemente, y Sra. White a haya un vision maraviyoso, den cual a mustre hopi cos. Entre esakinan tabatin instruccionnan pa Pastor White con e mester procedi pa e por pone su fe den Dios na practica, Dios cu asina claramente a baha Su man pa obra na su fabor pa e por recobra su salud.
GSAM 380E atake di Satanas anuncia di antemano
GSAM 380.3Na esnan cu tabata ora pa Pastor White, Sra. White a bisa:
GSAM 380.3“E proposito di Satanas tabata di destrui mi esposo y hibe den graf. Pa medio di e oracionnan ferviente aki, su poder a wordo kibra. Mi a wordo mustra cu Satanas ta rabia cu e grupo aki cu a sigui ora fervientemente durante tres siman na fabor di e sirbiente di Dios aki, y awor el a dicidi di haci un atake poderoso contra nan. Mi a wordo manda di bisa boso: ‘Biba hopi cerca di Dios, pa boso ta prepara pa loke por bini riba boso.’”
GSAM 381E presentimentonan di J. T. Orton
GSAM 381.1E prome dia di januari 1866, Pastor White y su famia a sali cu trein pa Battle Creek, Mich. Ami a keda den e parti west di New York durante e resto di invierno. For di e mes anochi cu e vision a wordo duna, Sr. J. T. Orton tabatin e impresion cu su bida tabata den peliger, y toch e no tabata sa di unda e peliger tabata bini. El a expresa e impresion aki na varios hende. Diadomingo anochi, 4 di maart, el a bolbe na Rochester for di Parma, unda el a asisti na un reunion di dos dia, den compania di Sr. E. B. Sanders (cu awor, na 1905, ta biba na San Jose, Cal.), na kende el a pidi pa keda riba e caya cu mas lus mientras nan tabata cana door di e ciudad, “pasobra,” el a bisa, “tur ora mi tin e sintimento cu un hende lo purba mata mi.” Y toch e no tabata parce di tin ningun idea ken tabata esun cu kier a kita su bida.
GSAM 381.2Mi a bolbe na Rochester for di Parma dia 7 di maart y a keda cerca Sr. Lamson, yerno di Sr. Orton. Dia 8, e y Sra. Orton a bishita nos, y nos a haci areglonan pa bai e siguiente mainta cu trein pa Lancaster, den e condado di Erie, unda mi lo celebra e ceremonia di casamento di su unico yiu homber. Nos a pasa e dia agradablemente, pero toch e tabata un dia solemne.
GSAM 381Asesinato di J. T. Orton
GSAM 381.3Nan a sali for di cas di Sr. Lamson pa 5 or di atardi, y pa 7:30 or di anochi un mensahero a yega, informando nos di un atake brutal cu un persona desconoci a haci riba Sr. Orton den su mes stal, mientras e tabata cuida su cabainan. Nos a core bai e lugar y a haya cu el a wordo bati cruelmente riba su cabes cu un staca di garoshi cu bandanan di hero, y cu el a perde conocemento. El a muri pa 12:35 e anochi ey. Te awe no ta conoci ken a comete e acto cruel. Siguramente no a hacie pa placa, pasobra su oloshi den su saco no a wordo toca, ni tampoco su cartera, cu tabatin $45 aden. Esaki tabata un golpe pisa pa Sra. Orton, di cual su efectonan nunca el a recupera. Su salud fisico a deteriora rapidamente, y el a biba solamente poco tempo mas cu su esposo.
GSAM 382Prediccion haci e Pasco di Nacemento ey a wordo cumpli
GSAM 382.1Den algun luna despues di e anochi memorable di Pasco di Nacemento ey, seis di e nuebe cu a participa den e tres siman di oracion ey tabata den nan graf. Y asina un otro prediccion a wordo cumpli di un manera sumamente impresionante.
GSAM 382Alivio pa esnan den desesperacion
GSAM 382.2Mainta trempan dia 12 di december 1866, Elias Stiles, di North Liberty, Ind., a bini na mi cas, pidiendo mi pa bai cu ne na e lugar ey pa duna alivio, si ta posibel, na James Harvey, cu tabata den desesperacion y cu tabata sinti cu no tabatin ningun speransa pa su caso. Sabiendo cu Sra. White a haya un bista hopi amplio den e ultimo vision cu el a haya, y cu hopi caso a wordo mustra na dje profeticamente, mi a bisa na dje: “Por ta cu Ruman muhe White a mira algo tocante su caso, y si ta asina, y si e ta skirbi esey, lo e tin mas forsa cu cualkier cos cu mi por bisa na dje.”
GSAM 382.3Mesora nos a bai bishite, y sin bisa niun palabra na dje tocante e condicion di Sr. Harvey, mi a puntra: “Ruman muhe White, bo a haya algun lus den cualkier di e visionnan duna na bo tocante e caso di Ruman homber James Harvey?” “Si,” el a bisa, “mi a haya, y pa algun dia caba mi ta sinti cu mi mester skirbi esey y mand'e pe.” Despues el a cuminsa conta nos loke el a mira. Mi a bisa: “Mi ta bai mire mainta, y si bo skirbi loke a wordo mustra na bo, lo mi hiba esey pe.” Cu e acuerdo aki nos a laga e, y anochi nos a bolbe bishite. El a caba di skirbi y a haci nos e fabor di lesa esey na bos halto.
GSAM 383Testimonio pa James Harvey den desesperacion
GSAM 383.1E testimonio a bisa claramente cu Sr. Harvey lo yega den un condicion debil di salud, y cu Satanas lo busca di empuhe den desesperacion y lo purba hacie pensa cu no tabatin misericordia pe, ni speransa den su caso; pero e a mira cu el a haci tur loke tabata den su poder pa drecha e erornan di su bida pasa, y cu Dios a perdone; y ademas, ora e lo wordo tenta pa kita su mes bida, a wordo mustra na Sra. White cu angelnan di Dios tabata rond di dje, mustrando cu e por tin speransa den Dios y den cielo. Den e testimonio tabatin hopi otro palabra di consuelo y di animo di e mesun clase.
GSAM 383.2Cu e documento aki den mi poder, nos a bai North Liberty e siguiente mainta. Na caminda, Sr. Stiles a conta mi cu Sr. Harvey kier a mira mi, pero cu el a bisa cu lo mi no tin ningun palabra di speransa pe; cu, ora mi lo encontra cu ne, lo mi ta di acuerdo cu ne cu su caso tabata sin speransa, cu e tabata un homber perdi; y despues, mescos cu Eli di antiguedad, ora nan a bise cu e arca di Dios a wordo captura, lo e cay bai patras y muri.
GSAM 383.3Nos a yega na cas di Sr. Harvey pa mas o menos 3 or di atardi. Ora mi a encontre, mi a bisa: “Ruman homber Harvey, con bo ta?” Den un tono masha lamentabel el a contesta: “Perdi! Perdi!! PERDI!!!” “No! Bo no ta perdi. Tin speransa den bo caso!” mi a bisa. Ora el a mira cu mi a conteste asina, el a bisa den un tono mas suave: “Durante tres siman mi a pensa cu no tabatin speransa pa mi y cu mi tabata perdi; y awe, ora mi tabata bin ciudad for di e cunucu, pasando riba e brug na e dam di e mulina, tabata parse cu algo a bisa mi: ‘Bo ta perdi! No tin speransa pa bo! Bula den e dam di e mulina y hoga bo mes!’ Mi a pensa cu haci un cos asina lo trece deshonor riba e causa di Cristo, y asina mi a wordo deteni di kita mi mes bida.”
GSAM 384Liberacion a bin lihe
GSAM 384.1“Bon, Ruman homber Harvey, bo no ta perdi!” mi a bisa. “Mi tin un testimonio aki directamente for di cielo, cu ta bisa cu bo no ta perdi!” El a contesta: “Anto lo mi scuche.” Despues mi a les'e e testimonio, despues di a declara prome cu ni un palabra no a wordo poni den mi mannan. Ora mi a termina di lesa, su cara a bira radiante cu un sonrisa, mientras el a bisa: “Anto tin speransa den mi caso. Mi ta kere den Señor di berdad.”
GSAM 384.2Despues di e lesamento, nos a pasa un rato den oracion, y el a lanta como un homber cambia y feliz. El a conta nos cu e escrito ey a describi loke tabata pasa den su mente durante e ultimo tres siman cu mas exactitud cu e mes por a haci. Asina e amor di Dios a wordo mustra door di saca e ruman homber aki for di desesperacion pa medio di e testimonio.
GSAM 384E tereno di trabou a wordo amplia
GSAM 384.3Te na aña 1868, e tereno di trabou di e Adventistanan di Siete Dia tabata limita na Estados Unidos, y na e parti di dje pa noord di e frontera zuid di Missouri y pa oost di e rio Missouri. Durante un sesion di e Conferencia General, cu a wordo tene na Battle Creek, Michigan, dia 28 di mei, den un reunion pa considera e terenonan y e reparticion di trabou, a wordo decidi di manda dos trahado y un tent di sesenta pia na California. Pastor D. T. Bourdeau y e autor a yega San Francisco dia 18 di juli di e aña ey.
GSAM 384Cuminsamento di e mision na California
GSAM 384.4Tin un cos cu mi kier menciona tocante e cuminsamento di e mision na California, cu ta ilustra bon e utilidad practico di e don di profesia. Pablo, ora e ta papia di donnan spiritual, incluyendo e don di profesia, ta bisa cu nan ta “pa perfecciona e santonan, pa e obra di e ministerio, pa edifica e curpa di Cristo.”3 Seguramente e manera mas eficaz pa perfecciona e santonan ta di mustra nan nan erornan, pa nan por kita nan y wordo laba di nan picannan den e sanger precioso di nos Señor Hesus Cristo. Pa e fin aki, ayudo pa medio di e don di profesia den e obra di e ministerio a wordo manifesta durante henter e caminda den e causa di e berdad presente, mustrando e sirbidonan di Señor e defectonan den nan manera di traha, y con, cu un otro manera, nan por ta mas eficaz den e conversion di almanan.
GSAM 385Testimonio tocante con pa traha na California
GSAM 385.1Poco despues cu nos a yega California, nos a ricibi un carta di Sra. White, den cua el a conta di un vision cu el a ricibi na Battle Creek riba diabierna anochi, dia 12 di juni, un dia cu nos a pasa na Lancaster, New York, prome cu nos a sali pa California. Nunca e no tabata na California, y e no tabatin conocemento personal di e custumbernan di e hendenan. Di berdad, na e tempo ey e no a yega mas pa west di e rio Missouri nunca. Cualkier conocemento cu e tabatin di e cosnan aya a bin di loke Señor a desea di revela na dje.
GSAM 385.2Den e instruccionnan di su carta, el a describi e manera generoso di e hendenan di California, y cua lo ta e efecto di traha entre nan segun un plan limita cu ta spaar cada cent. Ora di predica na e hendenan di California, mester acerca nan cu algo di e spiritu generoso cu nan mes ta traha cu ne, pero sin desperdicia placa.
GSAM 385E exito pronostica a bin
GSAM 385.3Awor cu mi ta mira bek riba e ultimo trinta y siete aña desde cu e obra a cuminsa na California, y mi ta considera e situacion di e tempo ey, e condicion di e hendenan y e manera cu nos lo a dirigi nos obra si nos no a ricibi e testimonio, y ora mi ta mira e resultadonan di a sigui e instruccionnan duna, mi por bisa cu nos causa a avansa mas den tres luna cu loke e lo a haci den un aña si nos no a wordo yuda “den e obra di e ministerio” door di e instruccionnan ricibi pa medio di e don di profesia. Te na e primavera di 1871, como resultado di e esfuerzonan den e condado di Sonoma, cinco iglesia di wardadonan di sabat a wordo estableci.
GSAM 386E prome reunion den tent na San Francisco
GSAM 386.1Den juni di e mesun aña, nos a arma nos tent pa di prome biaha na San Francisco. Como cu Pastor Bourdeau a bolbe pa e parti oost, un otro trahado for di Michigan a wordo manda pa tuma su luga. El a yega dia 17 di juni, y mesora el a uni cu mi den e trabou den e ciudad. Despues di algun siman di esfuerzo den e tent, nos a sigui cu nos reunionnan den salanan gehuur te dia 1 di december di 1871. Como resultado di e trabou aki, mas cu cincuenta hende a acepta e mensahe na San Francisco.
GSAM 386Pruebanan interno na California
GSAM 386.2Te na e fecha aki, nos pruebanan na California tabata bin mas di oposicion di pafor, pero awor a lanta un prueba di fe inespera di un otro clase pa nos pueblo. Un compañero di trabou a persisti den un manera di actua cu mi tabata sigur lo trece deshonor riba su mes y riba e causa. Nos tabatin algun enemigo feroz den e ciudad, cu tabata observa cada movemento di nos, y cu tabata cla pa usa cualkier accion imprudente pa haci nos daño. P'esey, a bira sumamente necesario pa scucha e amonestacion di e apostel pa “evita tur apariencia di maldad.”
GSAM 386Independencia peligroso
GSAM 386.3Mi no a pretende cu e ruman homber a comete un picado berdadero cu su manera di actua, pero mi a razona cu nos enemigonan lo saca bentaha di loke e tabata declara ta inocente. El a tuma e posicion cu e tabatin derecho di “haci loke e kier” den e asunto, especialmente ora a wordo admiti cu no tabatin picado den loke e tabata haci. Asina e cosnan a sigui te dia 23 di januari di 1872, ora mi a bai di e condado di Sonoma pa San Francisco pa mira kico por a wordo haci pa frena e situacion aya.
GSAM 387.1Pa e tempo aki, nos enemigonan tabata usando su conducta mescos cu mi a teme, y e tabata tuma e posicion cu “esey no tabata nan asunto”, cu lo e mustra nan cu e tabatin su mes pensamento y por a cana den e cayanan manera e kier y cu kende e kier, sin ta suheto na nan comentarionan. Mi a purba, papia cu ne na solas, di mustre cu un manera di actua asina no lo duna bon resultado, y cu un spiritu independiente asina lo termina den maldad. E tabatin su amigonan, cu tabata fuertemente na su banda; algun di nan a cuminsa tuma un posicion cu lo expon'e na ainda mas censura. Un gran parti di e iglesia a mira e maldad di su terquedad, y tabata cla pa apoya e esfuerzonan cu mi tabata haci pa salba e causa di deshonor.
GSAM 387Un reunion pa investiga a wordo fiha
GSAM 387.2Asina e cosnan tabata riba sabat, dia 27 di januari, ora a wordo decidi cu mester a investiga e caso y cu e iglesia mester a tuma un accion decisivo pa libr'e di e deshonor cu e spiritu desafiante aki por a causa. Un reunion a wordo fiha pa cuminsa riba diadomingo, dia 28 di januari, pa 9 or di mainta, pa considera e situacion y nos deber como iglesia tocante esey. Segun tur apariencia, un division di e iglesia ey tabata inevitabel. Mi a pasa un gran parti di e anochi ey den oracion na Dios, pa e actua na nos fabor.
GSAM 387Un confesion por escrito
GSAM 387.3Riba mainta di dia 28, ora mi a sali pa e reunion, mi a encontra e compañero di trabou riba e acera, cerca di e cas caminda mi tabata aloha, yorando. El a bisa: “Ruman homber Loughborough, mi no ta bai e reunion awe.”
GSAM 387.4“Bo no ta bai e reunion?” mi a bisa; “e reunion ta trata di bo caso.”
GSAM 388.1“Mi sa esey,” el a bisa, “pero mi ta completamente robes. Bo tin razon den e posicion cu bo a tuma tocante mi. Aki tin un carta di confesion cu mi a scirbi na e iglesia; tume y les'e pa nan. Lo ta miho pa bo, y miho pa esnan cu lo por ta inclina pa tuma mi banda, si mi no ta aya.”
GSAM 388.2“Kico a causa e gran cambio aki den bo desde ayera?” mi a puntra.
GSAM 388Un vision maraviyoso ricibi
GSAM 388.3El a contesta: “Mi a bai postkantoor ayera anochi, despues di sabat, y mi a ricibi un carta di Ruman muhe White, di Battle Creek, Michigan. Ta un testimonio cu el a scirbi pa mi.” Dunando mi e carta, el a bisa: “Lesa esey, y lo bo mira con Señor ta mira mi caso.”
GSAM 388.4El a pidi mi pa bisa e iglesia cu el a ricibi un testimonio di Ruman muhe White, reprendiendo pa su conducta, y cu el a acepta esey, pasobra ta e berdad.
GSAM 388E caracter convincente di e vision
GSAM 388.5Esaki tabata parti di un vision duna na Sra. White na Bordoville, Vermont, dia 10 di december di 1871. El a cuminsa scirbi e parti cu tabata trata di e caso di e ruman homber aki dia 27 di december di 1871, pero pa algun motibo e terminacion di e documento a wordo tarda te dia 18 di januari di 1872, ora el a wordo termina y manda pa post for di Battle Creek. Na e tempo ey, tabata tuma mas o menos nuebe dia pa cartanan yega di Michigan na California pa tera.
GSAM 388.6Den vision, hopi cos ta wordo mustra na dje profeticamente. Asina tabata den e caso aki. Na e momento di e vision, tabatin solamente un sombra di loke realmente a desaroya pa ora e testimonio a yega San Francisco. Ora di compara e fechanan, por mira cu e caso na San Francisco a yega na su punto culminante despues cu e testimonio scirbi a sali di Battle Creek. Nos rumannan homber na San Francisco a mira mesora cu ningun hende no por a scirbi na Battle Creek y comunica e informacion na Sra. White na tempo pa e scirbi e carta aki, pasobra e situacion ainda no tabata existi e tempo ey.
GSAM 389.1E hecho aki tabatin hopi peso pa e rumannan homber aya, convenciendo nan cu tabatin poder divino cu e vision ey. Mi no a scirbi ni un regel na Pastor White ni su casa tocante e situacion na San Francisco, y e compañero di trabou a declara cu e no a scirbi nada; y e rumannan homber a bisa: “Si e lo a scirbi, e no lo a conta e cosnan cu a wordo revela tocante su mes.”
GSAM 389Con e vision a wordo scirbi
GSAM 389.2Ora despues nos a tende, for di e otro banda di e trayecto, tocante con e testimonio a wordo scirbi y manda pa post, a bira ainda mas evidente cu Señor, kende a duna e vision, a cuida e momento cu e mester a wordo scirbi y manda pa su destino, pa e yega aya net na e momento oportuno.
GSAM 389.3Masha tempran riba mainta di dia 18 di januari di 1872, Sra. White a wordo lanta for di soño cu e testimonio menciona aki riba vivamente imprimi den su mente. E impresion tabata asina cla pe cu ta como si e palabranan a wordo papia na bos halto: “Scirbi e testimonio ey pa California mesora, y percura pa e bai cu e proximo envio di post; tin mester di dje.” Ora esaki a wordo ripiti pa di dos biaha, el a lanta, bisti lihe y termina e escrito. Net prome di desayuno el a dun'e na su yiu homber Willie, bisando: “Hiba e carta aki postkantoor, pero no pon'e den e buzon. Dun'e na e hefe di post, y percura cu e pone sigur den e saco di post cu ta sali e mainta aki.” Despues el a bisa cu e tabata haya su instruccionnan un poco straño, pero e no a puntra nada, y a haci loke el a wordo manda, y “a mira e carta drenta den e saco di post.”
GSAM 389Prueba di guia divino
GSAM 389.4Si bo conoce nos situacion na San Francisco na e tempo ey, lo bo mira facilmente e importancia di haci e carta ey bai cu net e envio di post ey. Den e dianan ey nos tabatin solamente un envio di post pa tera pa dia. Si e carta lo a yega diadomingo anochi, dia 28, en bes di diasabra anochi, dia 27, sin duda lo tabatin un ruptura tristo den e iglesia. Si el a yega varios siman prome, asta net despues cu e vision a wordo duna, e iglesia no lo a mira su fuerza cu mes tanto facilidad.
GSAM 390.1Aki tabatin un testimonio cu tabatin señalnan evidente di e man di Señor, no solamente pasobra el a yega na un momento oportuno pa coregi eficazmente e erornan existente, sino tambe pasobra, siendo acepta humildemente y poni den practica door di e ruman homber, el a eherce un influencia poderoso pa trece unidad y estabilidad den e iglesia hoben ey.
GSAM 390Manera di scirbi e visionnan
GSAM 390.2E caso aki ta sirbi tambe como un ilustracion di su mes declaracion tocante e manera di scirbi loke el a mira. Tocante esaki e ta bisa: “Mi a wordo lanta for di mi soño cu un impresion cla di asuntonan cu anteriormente a wordo presenta na mi mente; y mi a scirbi, na mei anochi, cartanan cu a cruza e continente y cu, yegando den un momento di crisis, a evita un gran desastre pa e causa.”4