Adventist Pioneer
Library
aplib.orgLibrary
Table of Contents
13 / 31
13 / 31

Pạṭh 10 — Tala ńindạ reakʼ hoho

John Norton Loughborough

GSAM 160.1“Tala ńindạre mitʼ hoho hoyena, Ńelpe, jãwãe beṭa hijukʼ kana; uni daram lạgitʼ bahre oḍokokʼpe. Unre onko sanam tetre kuṛiko beretʼena, ar akoakʼ diuheko sapṛaokeda.”1

GSAM 160.2“Gel tetre kuṛiko” reakʼ noa joneṛ kathare sodor akan Tạṅgi reakʼ okte babotre ale do laharegele roṛ akada. Nitokʼ do cetanre ol akan katha reakʼ ona hạṭińre bisesle mon emokʼa, oka do Dosar hijukʼre biswạsicʼ hoṛko “Tala ńindạ reakʼ hoho” menteko ńutum akada. Noa babotre mitʼ ńutumakʼ olokʼicʼ do Tala ńindạ reakʼ hoho ńutuman khobor sakam reakʼ Oktobar 3, 1844 aṅkre nonkae meneda:—

GSAM 160.3“Menkhan ale do noa tạṅgi ńindạre cetʼleka hecʼenle? Ente ale do dorson [2300 mãhã reakʼ dorson] reakʼ ehopʼ 457 Mạsi janam laha sal reakʼ sorot okte bạgi kate baha okterele dhorleda. Ale do goṭa akan jahaj ṭhekạure seṭerokʼ lạgitʼ turui cando ar thoṛa mãhãle kom ocoena. Onate ale do turui cando reakʼ tạṅgi ńindạrele paraoena.”

GSAM 160.4Eṭakʼ mitʼ olokʼicʼ, S. S. Snow, Agosṭ 22, 1844 reakʼ Hoho khobor sakamre 2300 mãhã babot roṛkate nonkae menkeda:—

GSAM 160.5“Jerusalem arhõ tej ar gogoṛ lạgitʼ hukum oḍok okte khonge ona do ehopʼena. Noa hukum do pạhilre Cyrus e emleda, Darius do arhõe nạwạkeda, ar Artaxerxes Longimanus do acʼakʼ raj reakʼ eaeakʼ serreye purạukeda. Mạsi janam laha 457 sal reakʼ sorot oktere ona hukum do porcarena ar kạmire hecʼena. Unre Esra do Probhuakʼ boge ti talate Jerusalemre seṭer kate Jihudikoakʼ raj jion arhõe tejkeda, hakim ar bicạricʼkoe bahalketʼkoa, ar pạcuri gogoṛe ehopʼkeda.”2

GSAM 160.6Dorson reakʼ okte do purạu 2300 serma tahẽkante, 2300 purạu lạgitʼ 457 reakʼ sanam serma ar 1843 reakʼ sanam serma hõ hoyokʼa. Ar Mạsi janam laha 457 sal reakʼ eaeakʼ cando hạbicʼ hukum bạṅ oḍoklen khan, 1844 sal reakʼ eaeakʼ cando hạbicʼ ona okte hõ bạṅ cabaokʼa mente cetʼako tahẽkana. Eaeakʼ cando reakʼ gelakʼ mãhã manao do ona okte ehopʼ reakʼ cinhạ hoy akan leka ńelokkante, nonka hõ nicuṭte udukʼena je eaeakʼ cando reakʼ gelakʼ mãhãre (Jihudi hisạbte), Oktobar 22, 1844 re, 2300 mãhã cabaokʼa, ar Sonot ṭhãi saphae reakʼ okte seṭerokʼa. 1843 re ona okte cabaokʼa mente oka sanam proman ko bewhar akada, onako do 1844 reakʼ hisạbre hõ soman daṛeteko lagaoena. Ona sãote akoakʼ Hados reakʼ karon bujhạu reakʼ mitʼ nicuṭ leka ńelokʼ upại ko ńam akada mente onkoakʼ monre bhorosa hoyena. Un jokhecʼ “sạri Tala ńindạ reakʼ hoho” mente ńutum akan porcar Dosar hijukʼre biswạsiko cetʼleka ko porcarleda, ona bujhạu lạgitʼ un oktere noa kạmire laha akan hoṛkoakʼ ol khon katha tul oḍokge sob khon boge upại kana.

GSAM 161“Uni daram lạgitʼ bahre oḍokokʼpe”

GSAM 161.1Oktobar 3, 1844 reakʼ Hoho khobor sakamre George Storrs akʼ mitʼ onol tahẽkana. Ona reakʼ ńutum do “Uni daram lạgitʼ bahre oḍokokʼpe” tahẽkana. Onare uni do nonkae menkeda:—

GSAM 161.2“Laha okare hõ bań aṭkar leda, nonkan mon reakʼ aṭkarte iń do kolom iń hataoeda. Ińakʼ monre jãhãn digdhạ begor, eaeakʼ cando reakʼ gelakʼ mãhãre aboren Probhu Jisu Mạsi do serma reakʼ rimilreye sodorokʼa. Ona ghoṭna lạgitʼ nit do thoṛa mãhãge sarecʼ akana—bako sapṛao akan hoṛko lạgitʼ ạḍi botor okte, menkhan sapṛao akan hoṛko lạgitʼ mohima reakʼ okte.

GSAM 161.3“‘Ńelpe, Jãwãe beṭa hijukʼ kana’ noa sermare; ‘uni daram lạgitʼ bahre oḍokokʼpe.’ Noa hoho onkore oka leka asorokʼ, ona chaḍa ńutum eskar reakʼ kạlisiạko ar sanam kharạpkosãote aleakʼ kạmi do caba akana. Nit do ‘akoakʼ diuheko hataokate jãwãe beṭa daram lạgitʼ oḍoklen tetre kuṛiko’ beretʼko reakʼ kạmi menakʼtalea. Nit abodo okare menakʼbona? ‘Dorson bilomlen khan, ona lạgitʼ tạṅgime.’ Calaoen Marc se Epril khon noa ge bạṅ aleakʼ roṛ ruạṛ kana?—Hẽ. Jãwãe beṭa bilomokʼ oktere cetʼ hoyena?—Sanam tetre kuṛiko do dudṛum ar jạpitʼena, bạṅ se? Mạsiakʼ kathako do bạṅ bhul akana; ar ‘Dhorom puthi reakʼ katha do bạṅ raputʼ daṛeakʼa.’ Ale do beretʼ akanle tahẽkana mente menjoṅre jãhãn labh bạnuia; ale do dudṛum akanle tahẽkana, Mạsi hijukʼ reakʼ sạriakʼre do bạṅ, menkhan ona reakʼ oktere. Ale do Tạṅgi reakʼ okterele hecʼena; ona do ‘tinạkʼ din’ bilomokʼa bale baḍaeleda, ar ona katharegele dudṛum akana. Ale modren thoṛa hoṛ do jạpitʼrele menkeda, ‘Ar mitʼ okte alope goṭaea!’ Onkagele jạpitʼ tahẽyena. Nit do ale beretʼ reakʼge muskil kana. E Probhu, goṛoalem, ente hoṛakʼ goṛo do bekar kana. E Probhu, ạm nijetʼ roṛme. Oho, ‘Baba’ do nitge ona okte ‘baḍae oco’ ma.

GSAM 162Sombad reakʼ tala ńindạ

GSAM 162.1“Tạṅgi reakʼ okte do tinạkʼ jhạl kana?—Adha serma. Cetʼlekape baḍaea?—Ente aboren Probhu do Jãwãe beṭa bilomokʼkan oktere ‘tala ńindạre’ mente men akada. Dorson do ‘2300 ạyupʼ-setakʼ,’ se mãhã, lạgitʼ tahẽkana. Mitʼ ‘ạyupʼ,’ se ńindạ, do onkan nạbi mãhã reakʼ adha kana, onate ona do turui cando kana. Tạṅgi reakʼ okte reakʼ sanam jhạl onage kana. Okte babot nit reakʼ noa daṛe hoho do Julai tala-tala leka ehopʼena, ar ạḍi usạra ar daṛete pasnao akana. Ona sãote Ạtma reakʼ onkan daṛe sodorokʼ kana, oka do ‘1843’ reakʼ hoho oktere iń do tishõ bań ńel leda. Nit do katha leka sạrige, ‘Uni daram lạgitʼ bahre oḍokokʼpe.’ Sanamakʼ bạgi reakʼ onkan bewhar ńelokʼ kana, oka ńelokʼa mente iń do kumure hõ bań uihạr leda. Noa hoho monre bololen khan, casako do akoakʼ baṛge ar onare menakʼ fosol hõko bạgi oṭokʼeda. Med dakʼ sãote ạḍi daṛe hoho hoyokʼ kana, ar sanamakʼ Isor ṭhen soprot hoyokʼ kana; nonkan do iń do tishõ bań ńel leda. Noa sạriakʼre onkan bhorosa menakʼa, oka do laha reakʼ hohore nonkan porimạnte tishõ bạṅ aṭkarlen tahẽkana. Onare rạg ar mon hewer reakʼ mohima menakʼa, oka do ona aṭkar akan hoṛko chaḍa eṭakʼkoakʼ sanam bujh khon cetan kana.

GSAM 162.2“Noa Nitokʼ reakʼ sạriakʼre, anugroho talate, sanamakʼ soprot lạgitʼ iń do sahosiń ńameda. Ona babot digdhạre tahen do Isor duk oco ar iń cetan ‘usạra binạs’ ạgu hoyokʼa menteiń aṭkareda. Jãhãre noa hoho do ṭhik leka porcar akana, onḍe nit ‘judi bạṅ hijukʼ khan’ mente uihạrte se noa sạriakʼre bharosa kate laha calakʼ reakʼ botorte, jãhãe hoṛ acʼakʼ jiwi bańcao lạgitʼe sendraya, uni do ‘acʼakʼ jiwiye khuạutaea’ mente iń do nicuṭiń baḍaea. Abraham do Isaac dãṛẽ lạgitʼ, Noah do jahaj gogoṛ lạgitʼ, Loṭ do Sodom bạgi lạgitʼ, Israel ren gidrạko do Egypt khon oḍokokʼ lạgitʼ goṭa ńindạ tạṅgi kate teṅgo tahen lạgitʼ, Daniel do dhạcri kulkoakʼ gupạre bolokʼ lạgitʼ, se pe Ibriko do seṅgel bhaṭire bolokʼ lạgitʼ oka biswạs ko manaoleda, onkan biswạsge nit hõ hoyokʼa. Nonkan biswạs reakʼ biḍạu begor rajrebon bolokʼa mentebon uihạr leda, menkhan onka do bạṅ hoyokʼa menteiń baḍaea. Noa mucạtʼ sạriakʼ do onkan biḍạue ạgueda. maraṅ ḍubạ dakʼ laha ren Sodom hoṛko, heṛem-lohoṭ kạlisiạ, se jạpitʼkan tetre kuṛiko do donḍo, pagla, se jãhãnakʼge mente onko cetan reko joṛao sanakʼ, ona ńutumko sahao reakʼ sahos menakʼako hoṛko eskar noa sạriakʼreko lahakʼa. Arhõ mitʼ dhao iń hoho sanayeda, ‘Ạmakʼ jiwi lạgitʼ dạṛme;’ ‘Tayom seḍ alom koyokʼa;’ ‘Loṭren bạhuwakʼ katha disạime.’”

GSAM 163Storrs akʼ capa dhiri

GSAM 163.1Oktobar 10, 1844 reakʼ Tala ńindạ reakʼ hohore George Storrs akʼ kolom khon noa latar katha chapaena. Ona reakʼ ńutum do “Mucạtʼ katha” tahẽkana, menkhan Dosar hijukʼre biswạsiko do “Storrs akʼ capa dhiri” menteko hohoetʼ tahẽkana:—

GSAM 163.2“Ona mãhã lạgitʼ cetʼlekabon sapṛaokʼa?—Isorakʼ sạriakʼ biswạspe, ar Isor mohima emae daṛe biswạste onare bharosa kate laha calakʼpe. Ona mãhãrebon gojokʼa mente baḍae akan khan cetʼlekabon uihạra, onkage mon reakʼ obostha hoyokʼtabona; Isor ṭhen purạu soprot ar dhạrti seḍte gocʼ leka tahen hoyokʼtabona.

GSAM 163.3“Dorea talare mitʼ maraṅ capa dhiri menakʼa mente uihạrlen khan, iń roṛ sanayetʼ katha bujhạu reakʼ ona khon boge joneṛ do bạń em daṛeakʼa. Mitʼ mohimawan ar daṛean raj hopon nonkan kạul emeda je goṭa akan oktere mitʼ ạḍi napay bhap-te calaokʼ jahaje kulaya. Onḍe uniakʼ katha purạu biswạs akada reakʼ proman sãote okakoeye ńamkoa, onko sanam hoṛko do ona jahajre mitʼ mohima reakʼ disomteye idikoa. Aema hoṛ do sahos kate ona dhirireko calaoena. Thoṛa hoṛ do dhirire nirạiteko seṭerlen khan, ḍoṅga reakʼ bạberko getʼkeda, ar jãhãte onḍeko hecʼlen ona ḍoṅga do onko khon ạṛicʼte bhese calaoena. Onako seḍ do ar bako koyokʼa, menkhan bhap-te calaokʼ jahaj hijukʼ reakʼko tạṅgieda. Ona kạul reakʼ sạriakʼre jãhãn digdhạ bạnuakʼtakoa, ar sanamakʼ onareko soproteda. Onḍe hecʼ akan eṭakʼ hoṛko do dhirire menakʼkoge etakʼreakʼ dorkar bạnuakʼa menteko uihạreda. Menkhan onko do ‘budan’ tahen sanayetʼkoa ar ạḍi utạr bipodre bako paraokʼ sanayeda.

GSAM 164.1“‘Ạmakʼ biswạs leka ạmakʼ hoyokʼtama’ mente katha do bhap-te calaokʼ jahaj hijukʼ reakʼ as reakʼ okte laha khonge porcar akan tahẽkana. Ona mãhã seṭerena. Budan hoṛko do, hoy daṛeakʼa, jahaj hijukʼ ko ńellen khan akoakʼ ḍoṅga reakʼ bạber getʼkate bhese calakʼ lagitʼko mon akada. Jahaj do ńelena; menkhan nit do bạṅ ńel oco kate ḍoṅga ạṛicʼ lạgitʼ ạḍi bilom akana. Ar onkoakʼ ona budan monge nit do menakoa je hijukʼkan jahaj oromre bako bhul akada mente nicuṭ bạṅ baḍae hạbicʼ ḍoṅga bako ạṛija. Nit jahaj do nonḍeṭicʼ hecʼ akana je bako ńeloco kate onko do tis hõ bạber bako getʼ daṛeakʼa.

GSAM 164.2“Bhap-te calaokʼ jahaj do dhirire seṭerena. ‘Jahaj hijukʼ reakʼ kạulre ape purạu bhorosa tahẽkan reakʼ proman do cetʼ kana?’—‘Aleakʼ ḍoṅgako reakʼ bạber getʼ akan ar ale khon bhese calao akana. Onate ale do atore bale seṭer daṛeakʼa, ar jahaj bạṅ hecʼlen khan ale do nicuṭle gojokʼa, ente noa dhiri ṭhen eṭakʼ jãhãn jahaj do tis hõ bạṅ calaokʼa.’ Bhap-te calaokʼ jahajren maran hoṛ doe hohokeda, ‘Unạkʼge hoyena; jahajre dećokʼpe; nonkan bhorosa do Hadosre bạṅ paraokʼa.’

GSAM 164.3“Akoakʼ ḍoṅga dhirire tol doho akan tahẽkan hoṛko do nitko jarwakʼa, ar bhap-te calaokʼ jahajre dećokʼ lạgitʼko kurumuṭuia. Jahajren maran hoṛ doe kulikoa, ‘Hante dhirire tol akan, se iń ńelena tayom khon eskar bạber getʼ akan oka ḍoṅgakoń ńeleda, onako reakʼ mane do cetʼ kana?’ Onko do meneda, ‘Ale do budanle hoyokʼa mentele uihạrleda, jahaj bạṅ hecʼlen khan atote ruạṛ lạgitʼ ale ṭhen jãhãnakʼ tahenma.’ Jahajren maran hoṛ doe hohokeda, ‘Un khan ape do hoṛmo lạgitʼ sapṛaope dohokeṭʼa, ar ińakʼ katharepe digdhạkeda? Ạmakʼ biswạs leka ạmakʼ hoyokʼtama. Proman do ape birudre menakʼa. Ape do ruạṛ lạgitʼ upạipe dohokeṭʼa, ar nit do ape biswạs bạnuakʼ reakʼ jope ir hoyokʼa.’ ‘Onate biswạs bạnuakʼte onko do bako bolokʼ daṛeada.’ Oho, as caba akan reakʼ tinạkʼ botor obostha!

GSAM 164.4“Boehako, nitge ape bạber getʼpe; ape ḍoṅgako do ńel khon bahre bhese calakʼ ocope; hẽ, ‘Manwa Hoponakʼ cinhạ sodorokʼ’ laha usạrokʼpe. Unre do ạḍi bilomokʼa. Nitge bharosa kate lahakʼpe, ar sanamakʼ soprotpe. Oho, ape lạgitʼ ińakʼ mon hasoyeda; alope biloma; ona ḍoṅga ṭhela ạṛicʼpe, bạṅkhanpe binạsokʼa; ente jãhãe hoṛ acʼakʼ jiwi bańcao lạgitʼe sendraya, uni do onae khuạutaea, aboren Probhu ar Bicạricʼ Jisu Mạsi do nonkae men akada. Un khan usạrokʼpe; arhõ mitʼ dhao iń ardasapekana, oho, usạrokʼpe! ‘Judi bạṅ hijukʼ khan’ atote dạṛ seṭer lạgitʼ oka sanam ḍoṅgare nitpe hisạb akada, onako ạṛicʼpe. Ona ‘judi’ do apeye binạspea. Nit do mucạtʼ biḍạu ar lobh kana. Soetanakʼ mucạtʼ biḍạure aboren Probhu cetʼlekae kạmi leda, onkage kạmipe—‘Soetan, nonḍe khon calakʼme,’ uni do menkeda. Unre soetan do uni bạgiadea, ar ‘ńelpe, serma dutko hecʼkate uniko sewaadea.’ Noa jitạu ape ńamlen khan, ape sãote hõ onkage hoyokʼa.”

GSAM 165Tala ńindạ reakʼ hoho reakʼ usạra kạmi

GSAM 165.1“Tala ńindạ reakʼ hoho” reakʼ Sombad tinạkʼ usạra, daṛean ar asorwan tahẽkana, ona do N. Southard akʼ katha khon ṭhik leka bujhạukʼa. Uni do ale lahare katha tul oḍok akan khobor sakam, Tala ńindạ reakʼ hoho, ren sapṛaokʼicʼ tahẽkana. Oktobar 31, 1844 tarik reakʼ aṅkre uni do nonkae meneda:—

GSAM 165.2“Pạhilre goṭa akan okte reakʼ katha do aema hoṛko birudleda; menkhan ona porcar sãote nonkan daṛe menakʼ leka ńelokkana, oka do jãhãe bako aṭkao daṛeakʼa ar ona samangre sanamko ikʼṛum ocoetʼkoa. Ona do maraṅ hoetʼ hulạr reakʼ usạra leka disomre pasnaoena, ar bhin bhin ar saṅgiń ṭhãiko reakʼ monre mitʼ okte lekage seṭerena. Nonkan upạite ona hoyena, oka do Isor onare menaegea mente biswạs chaḍa eṭakʼ leka bạṅ bujhạu daṛeakʼa. Ona do sanam seḍ re cetan sermaren Isor samangre ạḍi bhitri mon bicar ar jiwi reakʼ huḍińen ạgukeda. Noate noa dhạrti reakʼ jinis khon mon moṛena, kaphạriạu ar hĩsạ do cabaena, bhulko manao hoyena, Isor samangre mon hecʼ raputʼena, ar ikạ ar ataṅ lạgitʼ mon ruạṛkate raputʼ monte ardas hoyena. Noate apnar huḍiń ńel ar jiwi reakʼ ikʼṛum hoyena, oka do ale do laha tishõ bale ńel leda. Isorakʼ maraṅ mãhã hecʼ seṭerlen khan cetʼ hoyokʼa mente Isor do Joel talate hukum emleda, onkage noate kicricʼ cirao do bạṅ, mon cirao hoyena; upạs, rạg ar duk sãote Probhu seḍ ruạṛ hoyena. Isor do Sakaria talate men akatʼ leka, anugroho ar ardas reakʼ ạtma do acʼren gidrạko cetan dul oḍokena; okoeko bereṭʼ ladea uni seḍko koyokʼkeda, ar disomre maraṅ rạg duk hoyena, sanam gharoñj bhin bhin ar onkoakʼ bạhuko hõ bhin bhin; ar Probhu daramko tạṅgietʼ tahẽkan hoṛko do uni samangre akoakʼ jiwi dukko emkeda.”

GSAM 166Hoṛko do manwa daṛe khon cetan daṛeteko ạcurena

GSAM 166.1Mon beretʼ oco noa porcar babot uni do arhõe meneda:—

GSAM 166.2“Aleakʼ ńelre noa do manwa reakʼ goṛo khon unạkʼ pharak tahẽkana je Jãwãe beṭa bilomokʼ tayom ar tetre kuṛiko dudṛum ar jạpitʼ tayom, sanamko beretʼkate akoakʼ diuheko sapṛao reakʼ oktere ‘Tala ńindạ reakʼ hoho’ purạu kana mente chaḍa eṭakʼ leka bale ńel daṛeada. Ar mucạtʼ kạmi hõ purạu akan leka ńelokʼ kana; ente Dosar hijukʼ daram tạṅgi hoṛkoakʼ bhin bhin dolko do Probhu hijukʼ lạgitʼ nonkan boge sapṛao obosthare laha tishõ bako tahẽlena.”

GSAM 166Dhạrti reakʼ dhon-sompot bạgi oṭokena

GSAM 166.3Dosar hijukʼ reakʼ sikhạuna mon beretʼ oco porcar ańjomte aema hoṛ do akoakʼ dhạrti reakʼ dhon-sompotko ạkhriń se dạn oṭokkeda. Akoakʼ dhonte onko do sabhare roṛkoakʼ kạmireko goṛoketʼkoa, chapa akan khobor sakam ar huḍiń dhorom puthiko pasnao lạgitʼko kạmikeda, se goribkoakʼ dorkarko purạukeda. Onkate onko do akoakʼ sạri mon ar jut reakʼ sob khon boge proman dhạrtiko udukʼatʼkoa. Ar okoe do dhạrti reakʼ dhon-sompotko sap doho ar noa kạmi lạgitʼ jãhãn bises dãṛẽ bako emleda, onko do ako oka kathako manaoa mente meneda, onare sạrige bako biswạsa mente dhạrti-monean hoṛko ńelketʼkoa. Bujhạu lạgitʼ iń do barea ghoṭnań emokʼa, noa katha reakʼ bar seḍ khon mitʼ-mitʼṭen.

GSAM 166Mitʼ alu baṛge

GSAM 166.4Pạhil do New Ipswich, N.H., ren Hastings ńutuman mitʼ biswạsicʼ reakʼ katha kana. Uniakʼ mitʼ maraṅ baṛgere ạḍi napay alu tahẽkana, oka do bạṅ lao oḍok kateye bạgi oṭoleda. Acʼren aṛe-pase ren hoṛko do ona lạgitʼko cintạleda. Onko do uni ṭhen hecʼkate, uni okte emako khan, bhạṛa begor alu lao oḍok kate acʼ lạgitʼ ot latar reakʼ doho oṛakʼre doho emae reakʼko menkeda. “Ente,” onko do menkeda, “ape dorkarokʼ daṛeakʼa.” Gomke Hastings do menkeda, “Bạṅ! Probhu usạra sodorokʼre ińakʼ biswạs do ona alu baṛgege porcar ocoeyaeiń.”

GSAM 167.1Ona sorot oktere, Claremont (N.H.) ren Eagle khobor sakam, New York ren Sạri Siń cando, ar eṭakʼ aema sadharon khobor sakam khon baḍaeokʼ leka, “alu sarokʼ” rogte alu fosol do prae purạuge naṣṭoena. Siń cando khobor sakamre nonka olena, “Noa daman jomakʼ reakʼ goṭa fosol sarokʼte naṣṭo akana mente ańjom do tinạkʼ duk reakʼ katha kana. Philadelphia ren mitʼ khobor sakamren khobor emokʼicʼ doe meneda je ona ponotre alu fosol do naṣṭo akana. Eskar Maine khon thoṛa eskar nạlis ańjomokʼ kana, menkhan onḍe hõ fosol do noa rog khon bạṅ bańcao akana.”

GSAM 167.2Sorot okte do norom tahẽkan ar Gomke Hastings akʼ alu do Nobhembar hạbicʼ otrege tahẽkante, onako modre mitʼ hõ bạṅ sarolena. Onate uniakʼ lạgitʼ ar unren naṣṭo akan aṛe-pase ren hoṛko lạgitʼ aema alu tahẽyentaea. Calaoen Oktobar re onkoge acʼakʼ boge lạgitʼ unạkʼko cintạlen tahẽkana. Tayom baha oktere onko do uni ṭhen khon her lạgitʼ alu kiriń hoyentakoa, ar boge dam em lạgitʼko rạskạena. Gomke Hastings lạgitʼ maraṅ bipod hoyokʼa mente oka onkoko uihạrleda, ona do Isor do noa jion reakʼ ạsirbạdreye bodolkeda; uni lạgitʼ eskar do bạṅ, acʼren aṛe-pase ren hoṛko lạgitʼ hõ.

GSAM 167Acʼakʼ biswạse bạṛaekeda

GSAM 167.3Dosar ghoṭna do iń basao tahẽkan ṭhãirege hoyena. Mitʼ kạlisiạren hoṛakʼ katha kana, okoe do 1844 reakʼ sorot oktere Probhu hijukʼ babot sabhare ạḍiye roṛetʼ tahẽkana. Uni do aema dhon-sompotan hoṛe tahẽkana. Eṭakʼ jinis sãote acʼ ṭhen aema sukri tahẽkana, oka do hijukʼ baha okte reakʼ haṭ lạgitʼ doho lạgitʼ ṭhik umerreko tahẽkana. Ińren mitʼ kaka, okoe do dhorom reakʼ jãhãn dạbi bae menetʼ ar posu kiriń-ạkhriń reakʼ kạmiye kạmiyetʼ tahẽkana, noa Dosar hijukʼre biswạsicʼ ńutum hoṛ ṭhen acʼren sukri kiriń lạgitʼe senena. Menkhan uni ṭhen khon baḍaekeda je uni do onko ạkhriń bae sanayetʼa, ente hijukʼ baha okte hạbicʼ “posao lạgitʼ doho sukri” mente uni doho sanayetʼkoa. Kaka do ińren goṛom baba ṭhen hecʼkate, okoe do Dosar hijukʼre biswạsicʼe tahẽkana, nonkae menkeda, “Uni hoṛ do oka katha manaoa mente meneda, onare bae biswạsa.” Goṛom baba doe kulikeda, “Cetʼ lạgitʼ?” Kaka doe menkeda, “Ente uni do meneda, Probhu hijukʼ kana ar noa sorot oktere dhạrti cabakʼa, menkhan uni do hijukʼ baha okte hạbicʼ acʼren sukri doho sanayetʼkoa. Iń sãote uni roṛ reakʼ dorkar bạnuakʼtaea; ona reakʼ mitʼ katha hõ bae biswạsa.”

GSAM 168Ạḍi bilomte dhon em reakʼ katha

GSAM 168.1Onkan hoṛko tahẽkana, okoe do akoakʼ dhonko sap doholeda, menkhan noa kạmi lahanti lạgitʼ ona bewhar hoyokʼa mente sanam okte monreko laṛhạiyetʼ tahẽkana. Nonkate ona kạmire lagao reakʼ okte paromena. Onkan hoṛ do Sombad chapa kạmiko ṭhen hecʼkate, med dakʼ sãote akoakʼ ṭaka ataṅ lạgitʼko ardasetʼkoa. Menkhan roṛ ruạṛ do nonka tahẽkana, “Ape do ạḍi bilomtepe hecʼena! Mucạtʼ laha tinạkʼ chapa jinisle pasnao daṛeakʼa, ona sanamakʼ lạgitʼle dam cukạu akada. Siń ar ńindạ cạlu doho lạgitʼ aema daṛete calaokʼ chapa kol bhạṛarele hatao akada; ale do ar ṭaka bale khojokʼa.” Apnar medte ńel akan mitʼ hoṛ do ińe metaińa je uni do Sạriakʼ reakʼ saṛe chapa oḍokicʼ samangre mej cetanre hoṛko hajar hajar ḍolar dohoetʼe ńelketʼkoa. Onko do jiwi reakʼ dukte ona ataṅ ar bewhar lạgitʼko ardasadea. Roṛ ruạṛ do nonka tahẽkana, “Ape do ạḍi bilomtepe hecʼena! Nit ale do ape ṭaka bale khojokʼa! Ale do ona bale bewhar daṛeakʼa!” Unre onko do kulikeda, “Goribko do bạṅ emako daṛeakʼa?” Ona eskar roṛ ruạṛ tahẽkana, “Tinạkʼ goribko ṭhenle seṭer daṛeakʼa, onko sanamkoakʼ nit reakʼ dorkar lạgitʼle sapṛao akada.” Mon dukte onko do akoakʼ ṭaka idikateko calaoena. Onko do menkeda je biswạs komte ar laloc-te, Isorakʼ kạmi lạgitʼ dorkar oktere rạskạte bewhar hoy daṛeakʼ ṭaka bako emletʼte, Isorakʼ khisi do ako cetanre menakʼa.

GSAM 168Joton hataoicʼko bahalena

GSAM 168.2Chapa akan sakam pasnao lạgitʼ se oṛakʼ-oṛakʼ senkate hoṛko sãote roṛ ar koejoṅ lạgitʼ, akoakʼ fosol bạṅ ir kate ar dokanko sun dohokate okako calaoena, onkoakʼ caritor ar niyomre jãhãn dos em reakʼ ṭhãi bạnuakʼ tahẽkana. Onkan hoṛ ar maejiuko do akoakʼ roṛ akan sanam kathareko biswạsa mente hoṛko jãhãn digdhạ bako manaoleda. Ona sãote, onkosãote onkan daṛe tahẽkana je sạri monan hoṛko do onkoakʼ katha bako bạṛae ar bako aṭkao daṛeakʼ tahẽkana. Noa upạite hajar hajar hoṛ do sạriakʼ biswạs seḍko ạguena, ar Isorakʼ daya sendrakateko ńamkeda.

GSAM 169.1Menkhan landa-lade pape hoṛ ar dhạrti monan dhorom dạbi hoṛko do Dosar hijukʼ reakʼ chapa jinis pasnao kạmi bond hoyokʼa menteko goṭakeda. Onko do menkeda je noa hoṛko, okoe do mitʼ nagar elạka se goṭa jila hataokate Dosar hijukʼ reakʼ noa sikhạuna sãote oṛakʼ-oṛakʼko senokʼkan ar akoakʼ kạmi ar gharoñjko bạgi oṭoetʼkan, onko do paglageko hoy akan hoyokʼa, onate onko cetanre joton hataoicʼko bahal hoyokʼa. Biswạsikoakʼ bạṅ boge mon reakʼ oka proman udugeda menteko menkeda, ona do pagla reakʼ purạu proman bạṅ tahẽkana. Ente ona do ako sãoren hoṛkoakʼ bańcao lạgitʼ kạmi eskar tahẽkana, kạmi bạgi oṭokʼte onkoakʼ gharoñj dukko ńam kana reakʼ jãhãn goha hõ bạnuakʼ tahẽkana. Onate ạḍi thoṛa hoṛko eskar joton hataoicʼakʼ ti latarreko dohoena. Nitokʼ birudko noa katha tinạkʼ usạra ar monceko roṛeda ona ańjomte do aema ghoṭna tahẽkana mentebon uihạr daṛeakʼa. Menkhan Dosar hijukʼre biswạsicʼ dhorom porcaricʼ hisạbte ińakʼ 56 serma khon hõ baṛti reakʼ sanam kạmire, joton hataoicʼakʼ ti latarreko doho akan “Miller ren pańjaicʼko” reakʼ barea ghoṭna eskar iń ńam akada. Onakin reakʼ thoṛa katha nonḍe ol do bạṅ beṭhikaokʼa.

GSAM 169Acʼge acʼren joton hataoicʼ

GSAM 169.2Pạhil ghoṭna do New York ponotre, iń tahẽkan ṭhãi khon 30 mail khon hõ kom saṅgińre hoyena. Mitʼ hoṛ, okoeakʼ prae $100,000 reakʼ dhon-sompot tahẽkana, uni do Dosar hijukʼ reakʼ sikhạunae manaoleda. Uni do noa ṭaka reakʼ prae adha acʼren bạhu ar gidrạkoe ematʼkoa, okoe do biswạsre acʼ sãote bako tahẽkana. Sarecʼ ṭaka do acʼ ṭhik bujhleka bewhar lạgitʼ acʼakʼge kana mente uni do uihạrleda. Ar ona khon thoṛa Dosar hijukʼ reakʼ kạmire lagaoena khan, acʼren gidrạko do birudkeda. Onko do mitʼ bicạricʼ sãote solha kate ako baba cetanre mitʼ joton hataoicʼ bahal lạgitʼko ardasadea. Bicạricʼ do dhon-sompot calao reakʼ joton hataoicʼakʼ kạmi ar akteyar bujhạuako tayom, okoe bahal sanayetʼko uniakʼ ńutum men lạgitʼe metatʼkoa. Thoṛa okte ako-akore solha kate onko do goṭakeda je akoakʼ dhon-sompot bhorosate em lạgitʼ jãhãe eṭakʼ hoṛ bako baḍaedea. Onate ako baba do acʼren joton hataoicʼ leka ko bachaokedea mente bicạricʼko baḍae ocoadea. Bicạricʼ do uni hoṛ seḍ ạcur kate menkeda, “Gomke _____, ạmakʼ dhon-sompot calao lạgitʼ ạmge ṭhik hoṛ mente ạmren gidrạko bachaoketʼmea. Ạmakʼ kạmi-kathako do bicạr oṛakʼre ạm ạgu laha cetʼleka tahẽkana onkage menakʼa.”3

GSAM 170Mitʼ landa hijukʼ obostha

GSAM 170.1Eṭakʼ ghoṭna do Topsham, Maine, ren Stockbridge Howland akʼ tahẽkana. Uni do ona goṭa elạkaren sob khon boge kạrigorko modren mitʼ hoṛe tahẽkana, kol ar sãko gogoṛre mitʼ ạḍi baḍaean kạmicʼ. Noa “Tala ńindạ reakʼ hoho” ạndolonre, Gomke Howland do sadom deć kate aema nagar elạkareye calaoena, ar oṛakʼ-oṛakʼ Dosar hijukʼ reakʼ khobor sakam ar huḍiń dhorom puthikoe pasnaokeda. Onate birudko ar landako do ạḍiko khisi ocoena. Onko do nạliskeda je huḍiń dhorom puthi hạṭiń noa kạmire uni do acʼakʼ kạmiye bạgi oṭoeda. Onate onko do tạṛamge mitʼ joton hataoicʼko bahal ocoadea. Uni hoṛ do acʼ uihạr leda khon baṛti kạmiye ńamkeda, ente Gomke Howland do sanam khajna hataoko ar sạrige dam em reakʼ hisạb sãote okoege hecʼena, onko sanam hoṛ uni ṭhene kulketʼkoa; ente uni do menkeda, “Iń do jãhãn kạmi calao reakʼ joge hoṛ leka bako manaoeń kana.” Ona tayom thoṛa oktere jila do Kennebec gạḍa cetanre mitʼ sãko gogoṛe khojokʼkana,—onkan sãko, oka do baha okte reakʼ dakʼ baṛhạu jokhecʼ ạḍi daṛete lińjikkana dakʼ ar bhese hijukʼkan boroph sahao daṛeakʼa. Jila ren akteyaran hoṛko ar nagar ren bachaoko goṭakeda je noa kạmi lạgitʼ Stockbridge Howland ge ṭhik hoṛ kana. Sãko gogoṛ lạgitʼ onko do kạmi reakʼ bises ol ar kạul sakam sãote uni ṭhenko hecʼena khan, uni do biṅta roṛte menkeda, “Gomkeko, ape do ińren joton hataoicʼ ṭhen sen hoyokʼtapea. Ape baḍaeakʼ kana je ińakʼ nijetʼ kạmi joton lạgitʼ joge hoṛ leka iń do bako manaoeń kana, ar ape do sãko gogoṛ lạgitʼ iń ṭhenpe hijukʼ kana!” Bujhạn hoṛko lạgitʼ noa obostha do ạḍi landa hijukʼ leka hoyena, ar joton hataoicʼ bahal reakʼ bewhar do acoṭkage cabaena. Unạkʼ menge hoyokʼa je uni sasetko tayomte akoakʼ beńạe ar be-dorkar bewhar lạgitʼ ạḍi huḍiń monteko dos manaoleda.

Notes

  1. Mathae 25:6, 7. ↩
  2. Daniel 9:25; Esra 7:21-26; 9:9; Nehemia 1:3; 2:12-17 ńelpe. ↩
  3. Uni hoṛ ar noa ghoṭnako bogeteń baḍae akatʼ re hõ, uniakʼ ńutum em reakʼ akteyar do iń ṭhen bạnuakʼa. ↩

Note

Back