Pạṭh 11 — Dosar dutakʼ sombad
GSAM 171.1“Ar uni tayom eṭakʼ mitʼ dut hijukʼkateye menkeda, Babilon, ona maraṅ nagraha, ńurena, ńurena, ente ona do acʼakʼ bebicạr reakʼ edre dạkhạ raste sanam jạtkoye ńu ocoketʼkoa.”1
GSAM 171.2“Khan oṛakʼren mãlik edrekate acʼren cạkricʼe metadea, Nagraha reakʼ hor ar huḍiń horkore usạrage oḍokʼme, ar reṅgecʼko, hoṛmo hạni akanko, leṅgako ar kãṛãko noḍem ạguko.”2
GSAM 171.3Probhu do acʼren dhorom porcaricʼko hotete, “Uniakʼ bicạr reakʼ okte seṭerakana,” noa Sombadte dhạrtiren hoṛkoye uskurketʼkoa. Uni ren kana mente roroṛkan sanam hoṛko ko kusilen khan noa Sombadre mitʼko hoe daṛeakʼa. Noa do bapla “bhoj” lạgitʼ pạhil hoho tahẽkana. Noa do “hoho akan hoṛko ṭhen” porcar len tahẽkana.3 Noa hoho do ạḍi lekan bạhnạte ko ṭhelkeda iạte, Dosar dutakʼ sombad sãote jurikʼ dosar hoho emena.4 Noa hoho hotete Probhu do mitʼ dol hoṛkoye bhinạketʼkoa, jemon uniakʼ sạriakʼ reakʼ lahakʼkan marsal sãote okte reakʼ mucạtʼ hạbicʼko lahakʼ.
GSAM 171Bapla bhoj lạgitʼ dosar hoho
GSAM 171.4Bicạr reakʼ okte reaṅ hoho tayom hijukʼkan dosar Sombad do noaeye meneda, “Babilon, ona maraṅ nagraha, ńurena, ńurena, ente ona do acʼakʼ bebicạr reakʼ edre dạkhạ raste sanam jạtkoye ńu ocoketʼkoa.” Ar bhoj lạgitʼ dosar hohore do noa olakana, “Nagraha reakʼ hor ar huḍiń horkore usạrage oḍokʼpe, ar reṅgecʼko, hoṛmo hạni akanko, leṅgako ar kãṛãko noḍepe ạguko.” Noa barea sostor katharege, Probhu ren kana mente roroṛkan hoṛko do mitʼ “nagraha” men akana. Onkoakʼ birodhi ar golmal biswạs reakʼ cecetʼko iạte onko do “Babilon” men akana. Mucạtʼ okte reaṅ eṭakʼ mitʼ sostor katha khon abo bon ńela je, Probhuakʼ hijukʼ reakʼ ṭhikʼ laha uni ren hoṛko do “Babilon” khon oḍokʼ hijukʼ lạgitʼ hoho ocokʼ kana: “Maraṅ Babilon ńurena, ńurena, ar bhutkoakʼ basokʼ ṭhãi, sanam besapha ạtmakoakʼ tahen ṭhãi, ar sanam besapha ar hilsạu akan cẽṛẽkoakʼ khãcạ hoeakana.... E ińren hoṛko, ona khon oḍokʼ hijukʼpe, jemon ona reakʼ kạikore alope mesakʼ, ar ona reakʼ sasetko alope ńam.”5
GSAM 172“Cetʼ lekam ańjomakada, ona disạme”
GSAM 172.1Sardis kạlisiạ ṭhen em akan kathare abo noa bon paṛhaoa, “Onate cetʼ lekam ńamkeda ar ańjomkeda, ona disạme, ona sab dohome, ar mon ruạṛme. Onate am cehaṛte bam tahen khan, iń do kumbṛu leka am ṭheń hijukʼa, ar oka okte am ṭheń hijukʼa ona bam baḍaea.”6 Biswạs bagi akan kạlisiạ, “Jezebel”, ona reakʼ kạmi reaṅ ńut okte tayom, dhorom sudhrạu hotete Sardis kạlisiạ oḍokʼ akan leka ńelokʼ kana. Sardis kạlisiạ do laha jiwetʼ kạlisiạ tahẽkan mente lại ocokʼ lena; menkhan Probhuakʼ hijukʼ reaṅ cecetʼ ańjomkateye bạgikeda, onate acʼ do nonkan obosthareye dohoketʼa, je ona hijukʼ do “ńindạre kumbṛu” leka acʼ cetanre hecʼ paṛakʼ daṛeakʼa. Probhuakʼ hijukʼ sorokʼ jokhecʼ “Suluk ar rạkhi” mente roroṛkoren obostha onkage hoyokʼa, mente apostol Pạul do 1 Thessalonikiko 5:1-5 reye lạiakada. Sạriakʼ reakʼ marsal pańjakanko do “dinren hoponko” men akana, ar Probhu do onko ṭhen kumbṛu leka bae hijukʼa.
GSAM 172.2Eae kạlisiạ reaṅ noa nạbi bornonre, abo bon ńela je Sardis kạlisiạ reakʼ ńur tayomge Philadelphia, metakʼ me, boeha dulạṛ reaṅ kạlisiạ hijukʼ kana. Sạrige, Dosar dutakʼ sombad hotete ạḍi lekan sanam kạlisiạko khon oḍokʼ ạgu akan onko 50,000 biswạsiko do onkan geko tahẽkana. Mạsiakʼ soren hijukʼ reaṅ maraṅ asol sạriakʼre, boeha dulạṛ reakʼ mitʼ tonolte onko do mitʼ akan tahẽkana.
GSAM 173Dosar Sombad cetʼ leka porcar lena
GSAM 173.11844 sal sitambar 12 reakʼ Tala ńindạ reakʼ hoho re, Dosar dutakʼ sombad ar ona porcar lạgitʼ oka obosthako hoyelena, ona reaṅ Murubi J. V. Himes akʼ mitʼ katha menakʼa. Uniakʼ ciṭhi do McConnelsville, Ohio, 1844 sal agost 29 re olena, ar noṅka menakʼa:—
GSAM 173.2“1840 re Boeha Miller sãote ale kạmi ehopʼketʼ jokhecʼ, uni do are serma khonye bhạson em kan tahẽkana. Una okte uni do eskarge lekae teṅgo akan tahẽkana. Menkhan uniakʼ kạmi do begor thir ar sapholge tahẽkana: dhorom manao kana mente roroṛ hoṛko, Isor ren hoṛkoakʼ sạri ãs ar Probhuakʼ hijukʼ lạgitʼ jạruṛanakʼ sạprạu reaṅe jagaoetʼko tahẽkana. Ar okoe mon baṅko ruạṛletʼ, onkan sanam lekan hoṛko do akoakʼ nasaokʼ obostha baḍae, ar usạrage mon ruạṛkate Isor ṭhen ạcur hijukʼ reakʼ kạmi reaṅe jagaoetʼko tahẽkana, jemon Jãwae hijukʼ jokhecʼ sulukte uni sãoteko ńapamokʼ lạgitʼko sạprạukʼ. Onage uniakʼ kạmi reakʼ maraṅ jostahko tahẽkana. Hoṛko jãhãn dhorom dol ar gotre boloko lạgitʼ uni do bae ceṣṭaleda.
GSAM 173.3“Hijukʼ do sorakana, noa sạriakʼ ale bujhạukate ar sanamko samaṅre noa cecetʼ ale aṅgocketʼ jokhecʼ, aleakʼ hudis hõ onkage tahẽkana. Isorakʼ ạyurte oka bhinạ bhinạ dhorom dolkore kạmi lạgitʼ hoho ale ńamkeda, onḍe hõ ale do onkagele calakʼkan tahẽkana. Ale do dhorom porcaricʼko ar kạlisiạkole lạiatʼkoa je, onko raputʼ, hạṭiń ar golmal oko do aleakʼ kạmi reakʼ jãhãn hạṭiń hõ baṅ kana. Aleakʼ do mitʼ goṭa jostah tahẽkana: ‘hoho’ em, bicạr do ‘duạrre’ seṭerakana mente cehaona em, ar ona hoyokʼakʼ lạgitʼ sạprạukʼte ale sãoten hoṛko bujhạu. … Aleakʼ kạmi khon lab ńamletʼ dhorom porcaricʼko ar kạlisiạren hoṛko, menkhan mon khon noa cecetʼ baṅko aṅgocʼletʼko, onko do ko ńelkeda je, noa cecetʼge pańjakate porcar ar rạkhi hoyokʼtakoa, baṅkhan ako samaṅre hecʼ akan muskil oktere keṭecʼ biswạs ar goṭa monan hoṛko sãoteko muskilokʼa. Onate noa cecetʼ birudhgeko goṭakeda, ar okoe mitʼ hor, okoe eṭakʼ hor pańjakate noa katha ṭhenao lạgitʼko goṭakeda. Ona do onko talare menakʼ ale ren Boehako ar Miserako ạḍi muskil obosthareye dohoketʼkoa. Onko modre ạḍi hoṛ do akoakʼ kạlisiạko dulạṛetʼ tahẽkana ar ona bạgikʼ reakʼ hõ bako hudis daṛeatʼ tahẽkana. Menkhan tinre ko landa ocoyena, ko saset ocoyena, ar ạḍi lekan horte akoakʼ laharen chuṭ ar rạskạko khon ko bhinạ ocoyena, ar ‘ṭhikʼ oktere jomakʼ’ baṅko ńam ocoyena, ar Jirạukʼ mãhã khon Jirạukʼ mãhã hạbicʼ akoakʼ luturre ‘suluk ar rạkhi’ reaṅ bhulạukʼ sereń saḍelena, khange akoakʼ dol seć ṭan khon usạrageko bhinạena. Akoakʼ daṛe reakʼ man sãote biridkate jũạṛko raputʼ gidiakʼa, ar ko hohokeda, ‘E ińren hoṛko, ona khon oḍokʼ hijukʼpe.’
GSAM 174Mitʼ muskil obosthare
GSAM 174.1“Noa obostha do ale muskilreye dohoketʼlea, (1) ente ale do nạbi kathare em akan okte reakʼ ṭhikʼ mucạtʼrele tahẽkana, oka oktere Probhu do acʼren sanam hoṛko mitʼreye jarwakoa mente ale ãs tahẽkana; ar (2) ale do jaoge eṭakʼ cecetʼle porcarakatʼ tahẽkana. Ar nit obostha bodol akan iạte, ale ar aleakʼ Sombad aṅgocʼletʼ kạlisiạko khon bhinạkʼ ar onako raputʼ reakʼ hohore ale mesalen khan, ale do beimạn kana mente hudisokʼa tahẽkana. Onate ale do dilemale tahẽkana ar pạhil teṅgo ṭhãi lekagele kạmi idikeda, hạbicʼ kạlisiạ ar dhorom porcaricʼko do noa katha una sạṅgińko idikeda je, Isor botorte sạriakʼ ar Isor ren lebetʼ akan hoponko rạkhi lạgitʼ teṅgokʼ aleakʼ jạruṛ hoyena.
GSAM 174Aleakʼ calakʼ hor lạgitʼ apostolkoakʼ namuna
GSAM 174.2“‘Ar uni do Jihudikoakʼ jarwa oṛakʼre boloena, ar pe cando hạbicʼ bin botorte Isorakʼ raj reaṅ juktite roṛkateye bujhạuetʼko tahẽkana. Menkhan adom hoṛkoakʼ mon keṭecʼena ar baṅko biswạsletʼa, ar hoṛko samaṅre ona hor reaṅko bạṛicʼ roṛkeda. Khan uni do onko khon oḍokʼkate celakoye bhinạketʼkoa, ar Tyrannus ńutuman mitʼ hoṛakʼ iskulre din hilokʼ juktiteye roṛetʼ tahẽkana.’7 ‘Adom hoṛkoakʼ mon keṭecʼena’ ar ‘hoṛko samaṅre ona hor [Probhuakʼ hijukʼ] reaṅko bạṛicʼ roṛkeda’ ona baṅ hoyokʼ hạbicʼ, ale ren Boehako do kạlisiạko khon oḍokʼkate bhinạkʼ lạgitʼ bako uskur lena. Onko do ‘bạṛicʼ cạkrikoakʼ’ noa ‘bạṛicʼ roṛ’ bako sạhao daṛeakʼa. Ar ‘dhonyo ãs’ ńel horakan hoṛko saset ar ‘bạṛicʼ roṛ’ lekan hor pańja daṛeakʼ kạlisiạko do onko lạgitʼ bhedan Babilon ren kuṛi hoponko geko tahẽkana. Onkageko porcar ketʼkoa ar bhage Sombad reakʼ chạṛreko hecʼena. Ar Babilon do cetʼ katha te benaoakana, ona reaṅ ale sanam mitʼ hudisre bale tahen daṛeakʼa; menkhan hijukʼ ar Isorakʼ raj sorakana reaṅ cecetʼ birudhkan sanamko khon usạrage ar mucạtʼ lạgitʼ bhinạkʼre ale do mitʼ hudisre menakʼlea. Noa do jion ar gujukʼ reaṅ katha kana mente ale biswạseda. Probhuakʼ hijukʼ reaṅ bạicʼkate roroṛkan se ona birudhkan dolko sãote jopoṛao tahen do gujukʼ kana. Sanam manwa riạricʼ khon oḍokʼkate Isorakʼ kathare teṅgo ar din hilokʼ Probhuakʼ sodorokʼ ńel hor tahen do jion kana. Onate dạsot reakʼ jũạṛre jãhã lekate hõ tol akanko sanamko ṭhen nit ale noale meneda, ‘Onko tala khon oḍokʼ hijukʼpe, ar bhinạkʼpe, Probhuye meneda; ar besapha jinis alope jotʼa. Ar iń doń aṅgocʼpea, ar ape ren Babań hoyokʼa, ar ape do ińren koṛa hoponko ar kuṛi hoponkope hoyokʼa, sanam daṛean Probhue meneda.’”8
GSAM 175Bujhạu baṅ ńamokʼ birodh
GSAM 175.1Ona okte kạlisiạko ar Dosar hijukʼre biswạsiko talare oka lạṛhại tahẽkana, ona reaṅ Wm. Miller do noṅkaye meneda:—
GSAM 175.2“Khristan kạlisiạko do noa cecetʼ ar noa dhonyo ãs iạte ako ren hoṛko oḍokʼ gidiko, noa do ạḍige sobhạb birudh ar bujhạu baṅ ńamokʼ katha kana. Iń doń baḍaea je, adom Baptisṭ kạlisiạko do ko meneda, onkoakʼ biswạs iạte do bako oḍokʼ gidietʼkoa, menkhan Dosar hijukʼre biswạsiko sãote akoakʼ jom mitʼ iạte. Enḍekhan, hijukʼkan Babańcaoicʼre akoakʼ biswạs iạte do baṅ khan, iń do Baptisṭ kạlisiạ chaḍa eṭakʼ jãhãn kạlisiạ sãote bań jom mitʼ akan, enrehõ onkoakʼ bhạson em ṭhãiko khon cedakʼko oḍokʼ gidiakatʼińa? Noa do eṛe bạhnạ kana. Menkhan Methodist ar Presbyterian ko do noa bạhnạ bako em daṛeakʼa, ente onko do eṭakʼ kạlisiạrenko sãote hõ jom mitʼreko biswạseda. Cedakʼ onko do hoṛko oḍokʼ gidietʼkoa? Iń doń ańjomakada, adomko do Dosar hijukʼ reakʼ sereńko ‘sereń’ iạte oḍokʼ gidi ocoyena; ar adomko do bạiha mente, menkhan onko birudhre bạiha reakʼ ona tetʼge parman ńamena je, onko do Mạsi ńel horko tahẽkana. E Isor, ‘onko ikaako me, ente cetʼko kạmikan ona do bako baḍaea.’”
GSAM 176Kạlisiạkoakʼ hudis reaṅ Storrs akʼ katha
GSAM 176.1Dosar hijukʼre biswạsiko seć kạlisiạkoakʼ hudis reaṅ George Storrs do noṅkaye menkeda:—
GSAM 176.2“Nit okte onko modre okoe do ‘Iń do rạni lekań durupʼakana’ bako meneda? Ar mitʼ din dhạrtiko jitạua, ar dhạrti do akoakʼ biswạsreye tabeokʼa, noa hudiste onko modre okoe do bako rạskạkʼkana? Dosar hijukʼ do duạrre seṭerakana mente sanamko samaṅre bin botorte biswạs roroṛicʼ mitʼ hoṛ, ako talare sulukte tahen lạgitʼ onko modre okoe doye ocoya? Noa katha reaṅ apeakʼ baḍae jãhã lekage tahenma, ar ‘Isor botoraepe ar uni man emaepe, ente uniakʼ bicạr reakʼ okte seṭerakana’ mente hoho ape jãhã tinạkʼ jạruṛgepe bujhạu ma, enrehõ noa serma Probhu hijukʼa mente biswạs reakʼ katha sanamko samaṅre ‘purạge thir’ tahen, onage onko talare begor muskilte tahen reakʼ sorot do baṅ kana se?”
GSAM 176Mansfield akʼ Goha
GSAM 176.3Oneida, N.Y. khon 1844 sal marc 21 re olkate L. D. Mansfield do noṅkaye Goha emeda:—
GSAM 176.4“Serma khon Probhuakʼ hijukʼ tạṅgikʼkan acʼren dulạṛ hoponkoakʼ monre Isor doe kạmikana. ‘Jaejug reakʼ bhage Sombad porcar lạgitʼ sabakada, ar noaeye meneda, Uniakʼ bicạr reakʼ okte seṭerakana,’ uni dutakʼ katha ańjom lạgitʼ eken do baṅ, menkhan ona tayom reakʼ hukum, ‘E ińren hoṛko, ona khon oḍokʼ hijukʼpe!’ manao lạgitʼ hõe ạyuretʼkoa. Nit din reakʼ dhorom gãotako do ona Babilon reakʼ baṅ huḍiń hạṭińko benaoeda, okaṭakʼ do ãṭte ńur gidiokʼa, ar tis hõ baṅ ńamokʼa—noa katha do laha khon hõ nit iń artetʼgeń sạri bujhạu akada. … Menkhan iń doń bujhạueda je, adom gãotakoren huḍiń deṛe sãote mil do ạḍige ńelokʼ kana. Adom ghaṭnạko do noa katha bujhạu ocoa.
GSAM 176Huṛuṅgạ dol reakʼ ạtma sodorena
GSAM 176.5“Noa ṭoṭhare Probhuakʼ hijukʼ porcarre ạḍi sapholte kạmi akan mitʼ Boeha do, mitʼ ṭhãire mitʼ goṭa oktere bhạson em lạgitʼe goṭakeda. Probhu do onkaye benaokeda je, ona goṭa ṭhãi khon uni do 16 mail sạṅgińreye tahẽkana; menkhan mitʼ _____ dhorom porcaricʼ do huṛuṅgạ dolren ạyuricʼ hoyokate alkatra ar cẽṛẽ il sãote onḍeye tahẽkana, Sanam Khon Cetanren Isor ren uni cạkricʼre onako lagao lạgitʼ. Uni dhorom porcaricʼ do ona tayom thoṛa dinre mitʼ jiliń din calakʼ sabhaye ehopʼkeda, menkhan sanamakʼ do utar seć reakʼ borop gaḍa lekage ạḍi rear ar borop akan tahẽkana—jãhãe hoṛ hõ bae jagaoena ar mon bae ruạṛlena. Mucạtʼre uni dhorom porcaricʼ doye menkeda, acʼakʼ biswạs leka, acʼ do ‘cintạ hoṛkoakʼ durupʼ ṭhãire durupʼ hoyokʼtaya.’
GSAM 177.1“Ale noḍe sabha ehopʼketʼ khon, noa ạtu ren mitʼ dhorom dol ạyuricʼ do acʼren dolye metatʼkoa je, jãhãe hoṛ acʼakʼ oṛakʼre hecʼkate noa serma Mạsi hijukʼa mente acʼ biswạsye lại khan, acʼ do uni oṛakʼ khone oḍokʼ gidiyeya.”
GSAM 177Kạlisiạko seć dạitwa
GSAM 177.2Noa ṭhãire ale do mitʼ Goha le dohoeda. Ona do Boston, Massachusetts-re jarwa akan Dosar hijukʼre biswạsikoakʼ bạisi ṭhen em akan mitʼ bakhạṛ khon kana; ona reakʼ tạrik do Me 31, 1844, ar William Miller, Elon Galusha, N. N. Whiting, Apollos Hale ar Joshua V. Himes-ko suhi akada. Onko do ko meneda:—
GSAM 177.3“Kạlisiạko seć aboakʼ dạitwa bạbotre hõ ale do mitʼ katha le roṛ daṛeakʼa. Eṭakʼ ạḍi kathakoren leka, noa re hõ barea dhạr reakʼ baṛti senokʼre muskil menaṅa mentele ạṭkạreda. Pạhil muskil do noa kana: abo oka kạlisiạ sãote bon joṛao akan, ona reakʼ odhikar manao katʼe noṅkan dạitwa reakʼ katha re aboge bon hape ocokʼa. Noa bạbotre aćkoakʼ kạlisiạ reakʼ Baebel begor dabi ko manao ketʼte hajar hajar hoṛko Isor samanre dosiko hoe akan gea, noa re aleakʼ cetʼ sondeho bạnuṅa. Onko kajaḱ ar biswạs re ṭhika tahẽlen khan, nit do ạḍi boge baṅcao obosthare ko tahẽna ar baṛti upkạr ko em daṛeakʼa, duk sạhao hõ hoe ko kan tahẽlen rehõ.
GSAM 177.4“Dosar muskil do noa kana: kạlisiạko abo sãote auri ńạite ko beohar letʼte, onko birudre bodla hatao mon manao, ar joto noṅkan gãotako birudre begor bichạu lạṛhại. Dosar hijukʼre biswạsiko aćko joṛao akan kạlisiạko seć cetʼ ko kạmi hoyokʼa, ona bạbotre ale ṭhen updes ko khoj len rehõ, joto obosthare kạmi re ạgu daṛeakʼ updes do bale em daṛeakʼa. Onko do Isorakʼ botorte, aćkoakʼ obostha cetʼ khoj kana, onka ko kạmi hoyokʼa.
GSAM 178.1“Enrehõ abo do aboakʼ dạitwa purạure ar joto ṭhik ar bhage oktere sạriakʼ reakʼ Goha emre kajaḱ bon tahẽn hoyokʼa. Ar noṅka kạmi katʼe kạlisiạkobon khis ocoako khan, ar hape babon tahẽn khan ko oḍokʼbon men katʼeko botorbon khan (abo kusi mante kạlisiạ sãoten joṛaw rapudokʼ do ṭhik bon bujhạu khan, ona do baṛti bhage hor hoe daṛeakʼa), abo do aboakʼ dạitwa bon purạua, ar tinre ko oḍokʼbon, auri ńạiakʼ duk dhiraj sãote bon sạhaoa, ar aboren Guru sãote ‘uniaḱ nindạ goṅ kate duạr bahre oḍokʼ calakʼ’ lạgitʼ bon rajiokʼa.”
GSAM 178.2Dosar dutakʼ sombad emokʼko seć kạlisiạkoakʼ kạmi bạbotren noa katha ko khon alga ge ńel ńamokʼa je, “bhoj” lạgitʼ noa dosar hoho em reakʼ pạhil jo leka, mitʼ ạtmik bheḍa goṭre jarwa akan hoṛko do “aṅg hạni akan,” “leṅgeṛa” ar “kãṛã” mente ko roṛ akana. Noa te ạḍi kajaḱ cinhạ ńamokʼa je, onko do okoe “sãote gutiko” khon ko bhinạlena, onkoakʼ “dal” khon bạṛicʼ beohar ko ńam akada.
GSAM 178Nawa sạriakʼko aṅgocʼ lạgitʼ mitʼ bhinạ hoṛ goṭ baćhaoena
GSAM 178.3Dosar dutakʼ sombad—“bhoj” lạgitʼ dosar hoho—ar “Tala ńindạ reakʼ hoho” porcar talate mitʼ bhinạ hoṛ goṭ bahre oḍok ạgu re Probhuwakʼ monsubạ do sapha ge bujhạu ńamokʼa. Mucạtʼ mãhãko lạgitʼ gonong sạriakʼko sendra oḍokʼ ar porcar hoyokʼ tahẽkana. Noa kạmi do “biswạs reakʼ niạmte tol akan” kạlisiạkore baṅ hoe daṛeakʼa, cetʼ leka Jihudi dhorom dolko sãote joṛao tahẽn katʼe cela jokheć reakʼ kạlisiạ do dhạrtire bhage sombad baṅ porcar daṛeakʼ tahẽkana. Onḍe Isor do bhinạlokʼe metʼkoa,9 Ar Dosar hijukʼre biswạsiko do okoe onko aćkoakʼ biswạs niạm reakʼ gherere doho ko menletʼ, onko khon hõ bhinạlokʼ lạgitʼe metʼkoa.
GSAM 179Storrs-akʼ “Turui updesko”
GSAM 179.1Noṅka bahre oḍok heć tayom usạra ge ale do le ńel keda je, tayom reakʼ saja bạbotre Dosar hijukʼre biswạsikoakʼ dolko ṭhen marsal hećena. George Storrs-akʼ “Turui updesko” ńutuman huḍiń puthire ona sodor akana. Ona reakʼ sikhạuna do noa kana: manwa do aćakʼ sobhabte gujukʼicʼ kana; gujuḱ ar jiwetʼ beretʼ talare gocʼko do cetʼ hõ bako cetan ńama; bạṛicʼ hoṛkoakʼ mucạtʼ saja do ekal caba nạs kana; ar begor gujuḱ jion do Isorakʼ dạn kana, oka do aboren Probhu Jisu Kristore biswạs talate eken ńamokʼa.
GSAM 179.2Dosar hijukʼre biswạsiko modre hajar hajar hoṛko manwa reakʼ sobhab bạbotren noa sikhạuna ko aṅgocʼ keda, menkhan joto hoṛ do baṅ. Okoe noa bako aṅgocʼ letʼ, onko iạte onko talare ạkul-bạkul do baṅ hoe lena, ente noa do eken biswạs reakʼ katha kana, mon ar beohar reakʼ porikha do baṅ kana mente ko bujhạu letʼa. Onate Kristo sor hećokʼ kana mente dhạrtiren hoṛko cetaw lạgitʼ onkoakʼ mitʼte kạmi do baṅ rapud lena. Enrehõ noa do kạlisiạkoakʼ raṅgao onko birudreye baṛti keda.
GSAM 179“Turui updesko” bhul sabitʼ baṅ hoy daṛealena
GSAM 179.3Iń tahẽn kan nagraha ren Methodist dhorom porcaricʼ, okoe 1843 salre Dosar hijukʼ reakʼ sikhạuna porcarre laha hõe mesalen tahẽkana, uni do “Turui updesko” puthiye ńam keda, ye paṛhao keda ar aćren kạlisiạren hoṛko ṭhen noa sikhạuna do bhul baṅe sabitʼ daṛeakʼa menteye aṅgocʼ keda. Menkhan aćren ạḍi kạlisiạren hoṛko noa ko aṅgocʼ kana mente ńel katʼe, eṭakʼko do noa puthi alope paṛhaoa menteye updesatʼkoa, ente “ko paṛhao lekhan noa sikhạuna ko biswạsa.” Sepṭembor 1844 cando re, noa dhorom porcaricʼ serma serma reakʼ bạisi khon ruạṛ heć tayom, updes emokʼ ṭhãire teṅgo katʼe joto hoṛ samanre Dosar hijukʼ reakʼ sikhạuna ye bạgi keda, ar noa oṛakʼre bakhạṛ emokʼko hoho letʼko lạgitʼ kạlisiạ ṭhen ać huḍiń katʼe khamae khoj keda.
GSAM 179Bhul biswạs reakʼ dosre bicạr
GSAM 179.4Dhorom porcaricʼakʼ noa kạmi tayom usạra ge Dosar hijukʼre biswạsiko bhul sikhạuna reakʼ dosre bicạr lạgitʼ ceṣṭa hoeena. Menkhan onko do aćkoakʼ katha Baebel khon ko udug daṛeakʼ tahẽkan iạte kạlisiạ do baṅe jitạu daṛealena. Tinạkʼ hoṛkoakʼ cal-cạlon kạlisiạ reakʼ niạm sãote baṅ milạukʼ kana mente noa kạlisiạ khon ko oḍokʼ ketʼkoa. Ar onkoakʼ biswạs do Sonot Puthi birudre kana mente baṅko udug daṛealetʼ kạlisiạren hoṛko noṅka oḍokʼ akan iạte, ạḍi eṭakʼ hoṛko hõ kạlisiạ ko bạgi keda. Noṅka Dosar hijukʼ reakʼ sikhạuna do noa kạlisiạ khon jaejug lạgitʼ duạr siń katʼe bahre dohoena, oka kạlisiạre sae sae hoṛko Baṅcaoicʼ ko ńam akade tahẽkana ar Isorre rạskạ ko ńam akatʼ tahẽkana.
GSAM 180.1Ińakʼ janam nagrahare oka hoe lena, ona do disom goṭa re sae sae eṭakʼ kạlisiạkore hõ hoe lena. Aćkoren laha boehako khon noṅka beohar ńamletʼ hoṛko do nạbi Isạiawakʼ kathare ạḍi jiwi raṛecʼ ko ńam keda: “E, uniaḱ katha añjom katʼe thartharaokʼkan hoṛko, Probhuwakʼ katha añjompe: ińakʼ ńutum iạte ape hiṅsạletʼpe ar bahre oḍokʼ ketʼpe apekoren boehako do ko men keda, Probhu man ńamae ma; menkhan apeakʼ rạskạ lạgitʼe sodorokʼa, ar onko do ko lạjokʼa.”10
GSAM 180Bạṛicʼ hoṛkoakʼ raṅgao sodorena
GSAM 180.2Probhu hijukʼ lạgitʼ asa akan mãhã sorokʼkan sãote biswạsiko do aćkoakʼ kạmire baṛti mon ko em keda, ar bạṛicʼ hoṛko do baṛti ạḍi ko raṅgaoena ar ko landa keda. Noa do Okṭobor 31, 1844 reakʼ Tala ńindạ reakʼ hoho sakamren sompadokakʼ noa kathare ńelokʼa:—
GSAM 180.3“Noa ạndolon do bạṛicʼ hoṛko ṭhen oka jo hećena, ona te hõ Isor noa re menaea mente aleakʼ biswạs ạḍi kajaḱena. Isor ren gidrạko do uni samanre ombạkʼ ar aćko huḍiń lạgitʼ, ar uniaḱ sodorokʼ lạgitʼ sapṛaokʼ lạgitʼ, mitʼ ṭhãire ko jarwakʼkan tahẽkana. Daya talate eken baṅcao ńam daṛeakʼ pạpikoakʼ dol noṅka ge kạmi hoyokʼa. Un okte bạṛicʼ hoṛko do joto khon baṛti hiṅsạ ko sodor keda. Aleakʼ nij sakam chạṛa eṭakʼre sabha reakʼ cetʼ sombad bale emletʼa, ar sạdhạron hoṛko hõ onḍe bale hoholetʼkoa; enrehõ Belial ren hoponko do onḍe ko bhir jarwaena ar ạḍi halwạl ko sirjạu keda. Noa cando reakʼ 12 tạrik Sańcar mãhã reakʼ ạyupʼre [Okṭobor 12, 1844], ale do sewa oṛakʼre cetʼ sabha bale doholetʼa, jemon oṛakʼ jotonicʼ [oṛakʼ ren hoṛhoicʼ] do Jirạukʼ mãhã [Hapta reakʼ pạhil mãhã] lạgitʼ oṛakʼ saphae reakʼ okteye ńam. Menkhan raṅgao hoṛ bhir do duạr rapud katʼe oṛakʼre ko boloyena ar noa sujog hõ bako emletʼa. Enrehõ nagraha ren mukhiạ do begor nehor ge usạrae hećena ar onko bahreye oḍokʼ ketʼkoa.
GSAM 181.1“Tayom reakʼ Jirạukʼ mãhãre aleakʼ sabhakore sewa oṛakʼ pereć tayom, oṛakʼ saman reakʼ horre ạḍi ghan bhir jarwaena. Onko modre ạḍi hoṛko, jãhãe Probhuwakʼ hijukʼe biswạs kana mente ko raṅgaokʼkan tahẽkana. Hoṛkoakʼ halwạl iạte ạyupʼre cetʼ sabha do baṅ hoe lena; enrehõ usạra ge hor do raṅgao bhirte perećena. Menkhan nagraha ren mukhiạ ar uniren kạmi daṛe pulisko usạra ko hećena, ar tinạkʼ hoṛko hoṛho oṛakʼre kol katʼe hor ko khạli keda. Noa bhir reakʼ beohar do Sodom nạsokʼ khon laha reakʼ ạyupʼre Lot-akʼ duạrko gherletʼ bhir reakʼ beohar sãote eken le tulạu daṛealetʼa.... Onkoakʼ noa kạmi do acanak, mitʼ oktere ar ạḍi osarre hoeena. Onate Jihudikoakʼ eaeakʼ cando reakʼ pạhil mãhãre noa sodorena iạte, noage ona cando hoyokʼa mente aleakʼ bichạr baṛti kajaḱena.”
GSAM 181Landaicʼko serma rakaṕ reakʼ kicricʼ ko horokʼ keda
GSAM 181.2Okṭobor 22, 1844 re, 2300 mãhã purạuena ona mãhã, Paris, Maine-re biswạsiko do sewa oṛakʼre jarwa katʼe Isor ṭhen thir ar ạḍi bhokti sãote ko koejoṅkan tahẽkana. Ona mãhã ge Probhuye hijukʼa mente ko asa akatʼ tahẽkana. Unre landa ar nindạicʼ hoṛko do oṛakʼ beṛhaeko jarwaena ar landa reakʼ sereńko ko sereń keda. Noa bạṛicʼ hoṛko modre barea hoṛ do jeleń puṇḍ kicricʼkin horokʼ keda ar oṛakʼ chạtrekin dećena, sereńkin sereń keda ar oṛakʼ bhitrire koejoṅ ar Probhuwakʼ hijukʼ tạṅgikan hoṛkokin landa ketʼkoa.
GSAM 181.3Noa ghoṭna khon ge Dosar hijukʼre biswạsiko do serma rakaṕ reakʼ kicricʼ ko horokʼ letʼa menkʼko eṛe katha pasnaoena mente ḍher sombhob menaṅa. Ente Dosar hijukʼ reakʼ sakamko do, 1844 re mitʼ Dosar hijukʼre biswạsicʼ serma rakaṕ reakʼ kicricʼe horokʼ keda ar noṅka Probhuwakʼ hijukʼe tạṅgi keda reakʼ mitʼ sạri sabutʼ emicʼ lạgitʼ $500 hạbić puruskạr ko ghosna akatʼ rehõ, mitʼ ghoṭna hõ tis hõ baṅko ạgu akada.
GSAM 182Hazen Foss-akʼ Dorson, 1844
GSAM 182.1Noa okte re Poland, Maine-re Hazen Foss ńutuman mitʼ juạn hoṛe tahẽkan tahẽkana. Uni do eaeakʼ cando reakʼ gel mãhãre Probhuye hijukʼa mente kajaḱe biswạs akatʼ tahẽkana. Uni do bhage ńelokʼ, hewer roṛ ar ạḍi bhage paṛhao akan hoṛe tahẽkana. “Tala ńindạ reakʼ hoho” mucạtʼokʼ khon tinạkʼ hapta laha, Probhu do uni sor heć katʼe mitʼ Dorsone emadea. Ona re Dosar hijukʼre biswạsi hoṛko Isorakʼ nagraha seć senokʼ hor ar onkoakʼ muskilko udugadea. Cetaw reakʼ tinạkʼ Sombadko uni emadea, oka do uni hoṛko ṭhen lại hoyokʼ taya. Ar oko kathe udugadea, ona biswạs sãote lạiye lekhan, tayom cetʼ bidạu ar sasetʼ hijukʼ taya, ona hõe ńel keda. Gomke Foy leka uni hõ pe dhapko udugadea, oka talate Isor ren hoṛko sonot nagraha reakʼ horre ekal ko seṭerokʼa. “Ar tinạkʼ mãhã tayom ge” Probhuye hijukʼa mente kajaḱ biswạsicʼe tahẽkan iạte (onko un okte noṅka ko sereńkan tahẽkana), horre rakaṕ reakʼ pe dhapko bạbotren Dorson reakʼ hạṭiń do uni baṅe bujhạu daṛealena. Ar sobhabte ać ńumạnicʼe tahẽkan iạte, uni do krus goṅ reakʼ katha khone ruạṛena ar ona lại lạgitʼe mãnạ keda. Dosar dhao hõ ona Dorson udugadea; ar ona sãote uni do lạiadea je, oko kathe udugadea, ona lại lạgitʼ nit hõe mãnạ lekhan, uniaḱ dạitwa do uni ṭhen khon hatao katʼe Probhu ren joto khon komjor gidrạko modre mitʼ hoṛ emaea, okoe Isor cetʼe sodorae, ona biswạs sãote lạiya. Uni do arhõe mãnạ keda. Khan tesar mitʼ Dorsone ńam keda, ar uni do lạiadea je, nit uni do chạṛaena, ar ona dạitwa do komjorko modre joto khon komjor mitʼ hoṛ emakana, okoe Probhuwakʼ hukum purạua.
GSAM 182Foss do aćakʼ Dorson baṅe lại daṛealena
GSAM 182.2Noa te juạn hoṛ do acakạeena, ar cetʼe udugadea ona lại lạgitʼe goṭa keda; onate sabha reakʼ okte ar ṭhãiye lại oco keda. Hoṛko do ńel ar añjom lạgitʼ ạḍi bhirte ko jarwaena. Uni do aćakʼ baḍae ńam saphae lại keda: Probhu cetʼe udugadea ona lại lạgitʼ cetʼ lekae mãnạ letʼa, ar uniaḱ mãnạ iạte cetʼ hoyokʼa ona hõe lại keda. “Nit,” menteye men keda, “iń do Dorson iń lạiya.” Menkhan hạe! ạḍi ghạṛicʼ hoe caba len tahẽkana: uni do hoṛko samanre murut leka thir ge teṅgoena, ar mucạtre ạḍi jiwi hasote men keda, “Dorson reakʼ mitʼ katha hõ bań disạ daṛeakʼ kana.” Uni do dukte aćakʼ tikin nguy katʼe men keda, “Isor do aćakʼ kathaye purạu akada. Uni do iń ṭhen khon Dorsone hatao akada,” ar ạḍi mon reakʼ dukteye men keda, “Iń do nạs akan hoṛ kanań.” Ona okte khon uni do Kristo re asa ye ạtu keda ar asa begor obosthareye senena. Uni do arhõ tis hõ Dosar hijukʼre biswạsikoakʼ sabhare bae senlena, ar dhoromre aćakʼ cetʼ mon hõ baṅ tahẽlena. Uniaḱ beohar ạḍi kathare, kom khon kom noṅka roṛ daṛeakʼa, Guruakʼ Ạtma reakʼ hewer probhab khon bhinạ akan hoṛ reakʼ leka hoeena, “aćakʼ horre bạgi akan, aćakʼ kạmi reakʼ jote perejokʼ” hoṛ reakʼ leka. Noa mon reakʼ obosthare 1893 reye gujuḱena.
GSAM 183Eṭakʼ hoṛ Foss-akʼ Dorsone lại keda
GSAM 183.1Aćakʼ Dorson disạ baṅe daṛealetʼ okte khon pe cando leka tayom, uni do mitʼ sãoten koṭhri khon eṭakʼ hoṛ mitʼ Dorsone lại kanakʼe añjom keda. Ona sabha do uni menae kan tahẽkan basạ oṛakʼre hoyokʼkan tahẽkana. Uni do sabhare hijukʼ lạgitʼ ko nehoradea, menkhan uni doye mãnạ keda. Uni doye men keda je, barea hoṛ mitʼge katha cetʼ leka bhage kin lại daṛeakʼa, ona lekage noa Dorson do uni udugadea sãote milạukʼ kana. Noṅka uni cetʼe ńel letʼa, menkhan lại ceṣṭa jokheć baṅe disạ daṛealetʼa, ona baḍae ńamena. Tayom uni hoṛe ńel ketʼe men keda, “Noa ge ona sạdhan kana, okoe cetanre Probhu dạitwae doho akada.”
GSAM 183Ạḍi duk reakʼ Hados
GSAM 183.2Mucạtre Jihudi okte lekate eaeakʼ cando reakʼ gel mãhã (Okṭobor 22, 1844) hećena. Ona mãhã hajar hajar hoṛko aćkoakʼ asa purạu lạgitʼ ko tạṅgi kan tahẽkana. Ona tạrik tayom dhạrti reakʼ jãhãnakʼ katha lạgitʼ onko do cetʼ sapṛao hõ bako doholetʼa. “Baṅe hećlen khan” reakʼ uiḥạr hõ bako doholetʼa; ona mãhã aćkoakʼ sobhabik jion reakʼ okte mucạtʼokʼa mente ko asa lekhan cetʼ leka ko sapṛao, onkage dhạrti reakʼ kạmiko ko goṭa akatʼ tahẽkana. Hijukʼkan raṅgao khon dạṛ baṅcaokʼ lạgitʼ onko do bạṛicʼ hoṛko ko cetaw ar ko uskur akatʼkoa, ar onko modre ạḍi hoṛko noa Sombad sạri sabitʼokʼa mente ko botor akatʼ tahẽkana. Onko do aćkoren nij hoṛko sãote ko updes ar ko koejoṅ akatʼ tahẽkana, ar okoe Isor aćkoakʼ mon bako emade, onko ko biday akatʼkoa. Mucạtʼ katha, goṭa dhạrti ren Bicạricʼ sãote metʼhã-muhuń ńapamokʼ lạgitʼ sor seṭer akana mente bujhạukʼkan hoṛ cetʼ leka bhokti ar mon reakʼ thirte tahẽna, onkage onko do joto dhạrti reakʼ jinishko ko biday akatʼ tahẽkana. Noṅka, sañs hõ baṅ hatao daṛeakʼ leka udgạu sãote, aćkoakʼ sewa ṭhãikore ko jarwaena; jãhã tis ge “maraṅ dutakʼ araṅ ar Isorakʼ peṛer reakʼ saṛe,” ko añjoma, ar hijukʼkan aćkoren Rajawakʼ mohima te serma julukʼ kanakʼ ko ńela mente ko asa akatʼ tahẽkana.
GSAM 184.1Ghoṇṭako do dhire dhire paromena, ar mucạtre siń cando do pachim dhạr latarre haṛupena jokheć, Jihudikoakʼ eaeakʼ cando reakʼ gel mãhã mucạtʼena. Arhõ mitʼ dhao ńindạ reakʼ ńut do aćakʼ duk reakʼ dhạkṇạ goṭa dhạrtireye pasnao keda. Menkhan ona ńut sãote Dosar hijukʼre biswạsikoakʼ monre duk reakʼ haso hećena, oka reakʼ joṛ do eken aboren Probhuwakʼ celakoakʼ dukre ńam daṛeakʼa: uni krusre goj ar topa tayom reakʼ ńindạ, onko do thir ar duk monete aćkoakʼ oṛakʼ seć ko ruạṛokʼkan tahẽkana. Tinạkʼ okte laha eken onko do unige aćkoren Raja lekate jitạu rạskạ sãote Jerusalem-re ko ạgu bolowakade tahẽkana.