Parau omuaraa
GSAM 3.1E rave rahi aʼena buka faufaa i roto i te rima o te taata. Te tumu e tuu atu ai au i te tahi atu buka i taua anairaa ra, oia hoi, i roto i teie mau api e faaite au e rave rahi parau no niʻa i te mau Petania, e te mau Mahana Hitu, Petania iho â râ, o tei ore i faaitehia i mua i te taata i teie huru e tae roa mai i teie nei. Hau atu i te reira, e rave rahi o tei amui mai i roto i te ohipa i te mau matahiti i muri mai, e aita i ite mata i te mau mea i faahitihia, tei ani uʼana i te feia i rave i te ohipa na mua ia faatia mai i teie mau ohipa i tupu e ta ratou i ite. No te mea ua matau vau i te tere o te Taeraa mai i te mau matahiti 1843 e 1844, e ua poro vau i taua haapiiraa ra mai te 2 no Tenuare 1849 mai â, ei Petania na mua, e mai te matahiti 1852 mai â ei Mahana Hitu, Petania, e oaoa vau i te “parau i te mau mea taʼu i ite e i faaroo.”
GSAM 3.2Ua horoa vau i te hoê faatiaraa no niʻa i te tere o te Taeraa mai, o tei parare mai te matahiti 1831 e tae atu i te matahiti 1844 i te mau nunaa atoa o te ao nei e oraraa faanahohia to ratou.
GSAM 3.3Mai te matahiti 1845 mai â, te vai ra te tahi atu mau pupu Petania o tei poro, e te poro noa nei â, e ua fatata te taeraa mai o te Mesia. Aita vau i opua e faatia i te aamu o taua mau pupu atoa ra; te opuaraa taʼu, e faatia maoro rii i te tupuraa e te haereraa i mua o te mau Mahana Hitu, Petania. E faataa taa ê atu vau i te mau ravea o tei tauturu, na roto i te arataʻiraa a te Atua, i te faatupuraa, mai roto mai i te veve e te hoê omuaraa iti, i te hoê nunaa e hoê hanere tausani anaʼe paha to ratou rahiraa. No ratou râ te tahi mau enemi i parau ai e, “Ia hiʼohia te puai e te itoito i roto i ta ratou ohipa, e manaʼohia e e piti mirioni ratou.”
GSAM 3.4Te feia atoa e ite iti noa nei i te aamu o te mau Mahana Hitu, Petania, ua ite ïa e mai te matahiti 1845 mai â e tiaraa faufaa to te Vahine E. G. White i roto i te tere, ei taata orero e ei taata papai. Ua ite atoa ratou e ua apeehia taʼna ohipa e te mau ohipa varua taa ê, aore ra te mau horoʻaraa. Ua fanaʻo vau i te taeraa i reira e te ite-mata-raa i te faaohiparaa i teie horoʻaraa fatata e pae ahuru taime. I roto i teie mau api ua faaite au fatata e piti ahuru e ono parau tohu papu a te Vahine White o tei tupu ma te tano roa.
GSAM 4.1Taa ê atu i taʼu iho mau mea i ite, ua horoa atoa vau i te parau faaite a te tahi atu feia i ite mata, no niʻa i ta ratou i ite. E tia i teie mau mea i tupu ia hau atu te teimaha i roto i te manaʼo o te taata taio aau haavare ore, i te mau parau tumu ore a te feia aita roa i tae i reira i taua mau taime ra.
GSAM 4.2Te tuu atu nei au i teie ohipa i te feia taio, ma te tiaturi e, na roto i te haamaitairaa a te Atua, e riro te taioraa i teie mau api ei ravea no te faahaere i te ohipa a te Mesia i mua i roto i te aau o te taata e rave rahi. Te tiaturi atoa nei au e, a taio ai ratou, e haamanaʻo te taatoaraa i te mau parau a Paulo i to Tesalonia, “E tamata i te mau mea atoa; e tapea maite i te mea maitai.”