Pene 15 — Te Maramarama e Rahi Aʻe e te Mau Mea Faahiahia Rahi Aʻe
GSAM 235.1“A haamanaʻo i te mau mahana tahito ra, i muri aʻe i to outou fariiraa i te maramarama, ua faaoromai outou i te aroraa rahi o te mau ati; i te tahi pae, ua faarirohia outou ei mea hiʻohia e te taata i roto i te mau faainoraa e te mau ati; e i te tahi pae, ua riro outou ei hoa no te feia i na reirahia ra.”1
GSAM 235.2Te tau mai te inoino o 1844 e tae noa i te faaiteraa i te maramarama papu no nia i te vahi moʻa e te poroi a te toru o te melahi, e tau ïa no te tamataraa taa ê. Te feia Petania tei tapea noa e mea tano ta ratou i roto i te tere i mutaa iho, ua riro mau ratou ei ‘mea hiʻohia’ e te feia i manaʻo e ua maumau roa te poroi; e no reira ua faainohia roa ratou. Ua nehenehe ratou e faaoromai i te reira ma te oaoa, a piri noa ai ratou i te Fatu na roto i te faaroo e a vai ai toʻna Varua Moʻa i rotopu ia ratou.
GSAM 235E piti tumu taa ê no te aro
GSAM 235.3E piti faahemaraa taa ê ta Satani no te feia Petania. Te matamua, o te turairaa ïa i te feia e mau papu ra i te faaroo e ua hope te tau i faataahia e te tohu, ia tiaturi e e taeraa mai i te pae varua te Taeraa mai piti o te Mesia, e na roto i te tahi ravea ua tae mai oia i te hopea o te 2300 mahana. Te piti, o te turairaa ïa i te feia e feaa ra no nia i te mau mea ta ratou i farerei i mutaa iho, ia faarue ratou i te reira atoa. No reira, a faaite-riirii-hia ai te parau mau no nia i te vahi moʻa e te poroi a te toru o te melahi i roto i te mau Papai, ua haapapu te mau poroi a te Varua o te Atua, na roto i te horoʻaraa o te tohu, i te tere i mutaa iho. Ua parau taua mau poroi ra e e ‘maramarama anaana’ te reira, ta te Atua i tuu i te omuaraa o te eʻa ia anaana noa e tae atu i te oire; e ua faaite ratou i te mau haapapuraa a te mau Papai e i te Taeraa mai piti o te Mesia e tae mau mai ai oia iho, e no reira eita te reira e nehenehe e riro ei ohipa i te hopea o te mau ‘mahana.’
GSAM 236Te mau faaiteraa faahiahia
GSAM 236.1Mai te peu e paraparau te Fatu i toʻna nunaa na roto i te mau orama i teie mau mahana hopea, eita anei tatou e tiaʻi i te mau tapao papu o te mana o te Atua i roto i taua faaiteraa iho ra? Te itehia ra taua mau tapao ra i roto i te mau orama a te Vahine E. G. White. Te huru iho o taua mau orama ra, mai tei faaitehia i roto i te Pene 13, e semeio mau ïa; te vai atoa ra râ e rave rahi mau mea faahiahia i taaihia i taʻna mau orama matamua, o ta outou e ite a tamau ai outou i te taio i teie buka. E nehenehe anei tatou e tiaʻi i te tahi atu huru no te hoê horoʻaraa mai teie, ta te Atua i faataa no te ume i te ara-maite-raa o te taata, e no te aratai ia ratou ia parau mai ia Mose ra: ‘E fariu ê vau e hiʻo i teie mea rahi e itehia nei’? Eita e navai te parau noa a te hoê potii veve, maʻi pinepine e te paruparu, e au ra e te fatata ra i te apoo tanu, e ua horoa te Fatu i te hoê orama iaʻna, no te faatupu i te reira. Ua faatupu te mau faaiteraa faahiahia i taaihia i te mau orama i te hinaaro e ite i te reira, e ua anihia taua potii ra ia haere na tera e tera vahi e faatia i ta te Fatu i faaue iaʻna ia faaite ia vetahi ê.
GSAM 236Te mau faaiteraa faahiahia i roto i te toru o te orama
GSAM 236.2E faatia vau i ô nei i te tahi mau mea i tupu no nia i taʻna toru o te orama, tei horoahia i roto i te fare o toʻna metua tane, tei faahitihia i roto i te Pene 13, api 212, mai tei faatiahia mai iaʻu e te metua tane e te metua vahine o te Vahine White, e toʻna tuahine, te Vahine Sarah Belden, e vetahi ê.
GSAM 236.3I roto i te piha i horoahia ai te orama, te vai ra i nia i te afata ahu te hoê Bibilia rahi roa a te utuafare. No roto mai te reira i te hoê neneiraa i Boston na Joseph Teale, i te matahiti 1822. E 18 initi te roa o taua buka ra, e 11 initi te aano, e 4 initi te meumeu, e toʻna teiaha e hau rii atu i te 18 paunu. A vai ai oia i roto i te orama, ua tia oia e ua rave i taua Bibilia teiaha ra i nia i toʻna rima aui, e te vai matara noa ra te buka, e ua tapea ma te faatoro i toʻna rima e poro tiʻa ai te reira e toʻna tino. E i muri iho, hau atu i te afa hora, ua huri oia i te mau api i tera e tera vahi ma toʻna rima atau, e ua tohu i te mau irava taa ê o te mau Papai, taʻna i faahiti a hiʻo noa ai toʻna mata i nia, i te tahi atu pae i te buka. Ua hiʻo toʻna tuahine o Sarah (tei riro i muri iho ei vahine na Stephen Belden), aore ra i te tahi mau taime te tahi atu taata i reira, i te mau irava atoa ta toʻna manimani i tohu, e ua ite maitai ratou e i te mau taime atoa, ua faahiti oia i te irava o te mau Papai i raro aʻe i toʻna manimani. Ua parau te Metua vahine Harmon e i toʻna huru matauhia, taʻna tamahine o Ellen ‘aita e maraa iaʻna, no te iti o toʻna puai, ia amo i taua Bibilia teiaha ra mai nia mai i te afata ahu; i roto râ i te orama ua tapea oia i te reira ma te māmā, i te hiʻoraa, mai te mea ra e e Faufaa Apī iti noa te reira no te pute.’
GSAM 237.1E mea faahiahia mau teie!—Te hoê potii paruparu, e 70 paunu noa toʻna teiaha, te tapea ra i te hoê Bibilia teiaha hau atu i te afa hora i te hoê huru e ore ai e nehenehe i te hoê tane puai e tapea i te reira e 2 noa a miniti; e te huri ra oia i tera e tera vahi o te mau Papai, e ua itehia i te mau taime atoa e o te irava iho taʻna e faahiti ra, noa atu e te hiʻo ra toʻna mata i nia, i te tahi atu pae i te buka; e te hopea, te hoê reo no roto mai i te hoê taata aita toʻna mau māhāhā e hauti ra, aita atoa e huti ra i te aho i roto i toʻna tino, e te faahiti tano ra i te mau irava i tohuhia ra,—eita roa e tano ia parauhia e na te taata i faatupu i teie mea, aore ra e no te maʻi te reira. Ua manaʻo te feia i ite i te reira e e faaiteraa papu roa te reira no te Varua o Iaʻna tei paraparau mai roto mai i te raau iti ama ra. Te mau faaiteraa mai teie i roto i te toru o te orama a te Tamahine Harmon, i te mau vahi i iteahia ai, ua horoa ïa i te haapapuraa papu e te vai ra i roto i te mau orama te hoê mana hau atu i to te taata otiʻa.
GSAM 237Te orama i Topsham
GSAM 237.2I muri iti noa aʻe i teie ohipa, ua faaroo te pupu Petania i Topsham, e 30 maile paha i te pae apatoerau hitia o te rā no Portland, Maine, i ta te Fatu i rave no te Tamahine Ellen G. Harmon, e ua titau mai iaʻna i reira. Ua fariihia te titau-manihini-raa, e o taʻna ïa tere matamua i Topsham. I taua tau ra, ua faatupuhia te mau putuputuraa Petania i roto i te fare o te Miti Curtiss. Ua horoa mai te Vahine Frances Lunt (te Tamahine Frances Howland i mutaa iho), no Oakland, Cal., i teie parau i raro nei, i papaʻihia i te 19 no Tenuare 1890:—
GSAM 238.1“Ua haere au e te utuafare o toʻu metua tane i te mau putuputuraa a te Tuahine Harmon i Topsham, i te matahiti 1845, e i roto i taua mau putuputuraa ra ua ite oia i te hoê orama. O te taime matamua ïa matou i ite ai iaʻna i roto i te orama. Tei te Taeae Curtiss ra te hoê o taua mau Bibilia tahito ra [te Bibilia a te utuafare na Teale, e 18 paunu toʻna teiaha]. Ua rave te Tuahine Harmon i teie Bibilia rahi mai nia mai i te afata ahu a vai ai oia i roto i te orama, e ua tohu oia i te mau irava o te mau Papai a huri ai i tera e tera api, ma te hiʻo noa toʻna mata i nia, i te tahi atu pae i te buka. Te mau irava taʻna i faahiti, e mau parau ïa no te haapiiraa, no te faaitoitoraa, aore ra no te faaiteraa i te hape. Te tahi atu mea taa ê o taua faaiteraa ra i taua taime ra, o te huru ïa o te tapeʻaraa i te buka. Ua tapeahia te reira i nia i toʻna apu rima matara, ma te faaʻopa i te reira e 45°, e aita e taata ê atu i nehenehe e tapea i te hoê noa aʻe buka ma taua poro ra ma te ore e pahee oioi atu i te rima; ua tapea râ te Tuahine Harmon i taua Bibilia ra ma taua ʻoparaa ra e rave rahi miniti, ma te mau roa mai te mea ra ua faapirihia te reira i toʻna rima, a haere noa ai oia i tera e tera taata i roto i te piha.”
GSAM 238Te iteraa papu a te Vahine Truesdail
GSAM 238.2Te tahi atu parau no nia i taua orama iho ra, no te Vahine M. C. Truesdail ïa, no Trenton, Mo., i papaʻihia i te 27 no Tenuare 1891. Te na ô ra oia:—
GSAM 238.3“E 15 matahiti toʻu i te matahiti 1845, e tei reira vau i te taime o te tere matamua o te Tuahine Harmon i Topsham, a ite ai oia i te orama i te fare o te Taeae Curtiss, i reira oia i rave ai i te Bibilia rahi a te utuafare e i tapea ai i te reira i nia i te hoê huru e ore ai e nehenehe i te tahi atu mau taata e tapea i te hoê buka i nia i te rima ma te ore e pahee oioi atu.
GSAM 238.4“Ua vai te Tuahine Harmon i roto i te orama hau atu i te 2 hora. O te faaiteraa faahiahia roa aʻe ïa o te mana o te Atua taʻu i ite aenei, e ua ite au iaʻna i roto i te orama hau atu i te 12 taime. E mau taime moʻa e te teiaha i te aau teie i te mau taime atoa, e e mau taime no te hiʻopoʻaraa ia tatou iho, ua hau râ teie i te reira atoa. Auê! to matou rurutaina a haapii mai ai te Hanahana o te raʻi ia matou na roto i taʻna mauhaa paruparu; a taio mai ai oia i te mau irava o tei tamahanahana roa e o tei tano i to matou huru ati; mai te Hebera 2:2, 3; Iakobo 5:7, 8; Hebera 10:35, 39; 1 Petero 1:7; Luka 12:32-37, e e rave rahi atu â, ma te tapea i te Bibilia rahi a te utuafare i nia roa, e ua titauhia iaʻu ia tia i nia i te hoê parahiraa no te taio i te vahi taʻna e tohu ra. Aita vau e manaʻo e ua hau atu i te 2 initi te teiteiraa o te Tuahine Harmon i toʻu.”
GSAM 239.1Ua haapapu teie mau faaiteraa i te feia aau haavare ore e na te hoê mana hau atu i to te taata e aratai ra i taua mauhaa haehaa ra, e ua tae mai te mau aniraa mai tera e tera tuhaa o New England ia haere oia e horoa i taʻna iteraa papu.
GSAM 239E hara te ohipa rima
GSAM 239.2I muri iti noa aʻe, ua faauehia te Tamahine Harmon, i roto i te orama, ia haere i Paris, Maine, i reira te tahi mau taata tei tiaturi e e hara te raveraa i te ohipa rima. O te Matahiapo Stephens, no Woodstock, Maine, te aratai i roto i teie hape, e mea puai toʻna mana i nia ia vetahi ê. E taata poro Metodi oia i mutaa iho, e ua manaʻohia oia e e Kerisetiano haehaa e te haapao maitai. Ua noaa iaʻna te tiaturiraa o te taata e rave rahi no toʻna itoito no te parau mau e toʻna huru oraraa moʻa i te hiʻoraa, e no reira ua manaʻo vetahi e na te Atua iho oia e aratai ra. Ua horoa te Fatu i te Tamahine Harmon i te hoê parau faaite i te hape noʻna. Ua parau oia e te patoi ra taua taata ra i te parau a te Atua i toʻna faaearaa i te ohipa, i toʻna onoonoraa ia fariihia taʻna mau hape e vetahi ê, e i toʻna faahaparaa i te feia atoa e ore e farii i te reira. Ua patoi oia i te mau haapapuraa atoa ta te Fatu i horoa no te faaite iaʻna i toʻna hape, e ua patoi i te faʻi i taʻna mau hapa. Ua pee oia i te mau manaʻo i tupu noa i roto iaʻna, e ua haere i te mau tere rohirohi, ma te haere avae i te mau vahi atea roa i reira oia e farii ai i te faainoraa anaʻe, e ua manaʻo oia e i roto i teie mau mea atoa te mauiui ra oia no te Mesia. Ua faarue oia i toʻna feruriraa e toʻna haroʻaroʻaraa.
GSAM 239.3No nia i te iteraa papu a te Tamahine Harmon e te hopea o teie ohipa, e faahiti au i te tahi parau no roto mai i te hoê rata i fariihia mai i te Vahine M. C. Truesdail, tei noho i taua tau ra i Paris, Maine. I muri aʻe i te faaiteraa i te tahi mau mea e au ra i te mau parau i nia nei, te na ô ra oia:—
GSAM 240.1“Ua faʻi ratou paatoa i ta ratou mau hape, maori râ to ratou aratai, o Jesse Stephens. Ua faaara te Tuahine Harmon iaʻna e mai te peu e ore oia e faahaehaa iaʻna iho na roto i te faʻiraa i taʻna mau hape, e fatata toʻna haerea i te hope. Ua taa i te taatoaraa e e parau tohu teie e e haapohe oia iaʻna iho na roto i te tahi ravea.”
GSAM 240.2Teie tei tupu i muri iho i nia iaʻna:—
GSAM 240.3“I muri aʻe i te faarueraa a taʻna nana iti iaʻna, ua oto roa oia, e aita i maoro ua ere oia i te feruriraa maitai, e ua patoi oia i te amu i te hoê noa aʻe maa i tunuhia e te feia ino. Aita oia i faaroo e ua hoʻi mai au mai Massachusetts mai i te taime a hopoi ai au i taʻna maa avatea. Ua ui mai oia, a faatoro mai ai i toʻna rima ivi na roto i te hoê apoo iti i te haamaramarama, ‘Na te Atua anei oe i tono mai e teie maa, e te Tuahine Marion?’ I te iteraa i toʻu feaa i te pahonoraa, ua patoi oia i te tamata i taua maa ra. Toʻna huru aroha mau, ma te opanihia i roto i te hoê piha iti i te fare o toʻna taeae (e taata faaroo ore), ua haamanaʻo ïa iaʻu i te faaararaa i tonohia mai iaʻna mai te raʻi mai ma te here rahi, e taʻna i patoi etaeta roa. E 2 mahana i muri aʻe i teie farereiraa oto, ua faahoʻihia oia i toʻna utuafare, e i reira aita i maoro ua haapohe oia iaʻna iho, ma te hamani i te hoê taura i toʻna mau ahu roʻi.”2
GSAM 240Te hoê parau tohu tei faatupuhia
GSAM 240.4I te tau veavea o te matahiti 1845, na roto i te titau-manihini-raa a Otis Nichols, ua haere te Tamahine Harmon i Massachusetts, e ua apee toʻna tuahine o Sarah iaʻna. Ua noho rāua i te fare o te utuafare o te Miti Nichols. E haere oia e taʻna vahine ma to rāua pereoo, e e hopoi ia rāua i tera e tera vahi no te faatupu i te mau putuputuraa, i reira te Tamahine Harmon i horoa ai i taʻna mau iteraa papu. Na reira oia i nehenehe ai e haere i Boston, Roxbury e Carver. I te taime o ta rāua piti o te tere i Boston, Mass., ua tupu te hoê ohipa faahiahia roa.
GSAM 240.5Te vai ra i Boston e i te mau vahi tapiri mai te hoê pupu taata itoito ma te feruri ore, o tei tiaturi atoa e e hara te raveraa i te ohipa, e teie ta ratou poroi rahi: ‘A hoo i ta outou mau taoʻa, e a horoa i te ô na te feia veve.’ Ua parau ratou e tei roto ratou i te iupili, e e tia i te fenua ia faafaaea, e e tia ia faaamuhia te feia veve ma te ore e rave i te ohipa. O Sargent, Robbins e vetahi ê te mau aratai. Ua faahapa ratou i te mau orama mai te mea ra no te diabolo te reira, no te mea ua faaitehia ta ratou iho mau hape. E mea etaeta ratou i nia i te feia atoa aita e tiaturi ra mai ia ratou.
GSAM 241.1A noho ai te Tamahine Harmon e toʻna tuahine i te fare o te Miti Nichols, ua haere mai o Sargent e Robbins mai Boston mai no te ani i te hoê tauturu iaʻna, e ua parau raua e ua haere mai no te farerei e no te taoto i toʻna fare i taua pō ra. Ua pahono te Miti Nichols e ua oaoa oia i to raua haereraa mai, no te mea tei roto te na Tamahine Sarah e Ellen Harmon i te fare, e ua hinaaro oia ia matau ratou te tahi i te tahi. Ua taui oioi raua i to raua manaʻo, e aita i nehenehe ia faatomo mai ia raua i roto i te fare. Ua ui te Miti Nichols e e nehenehe anei ia Ellen e faatia i taʻna poroi i Boston, e e faaroo anei raua, e i muri iho e haava. ‘E,’ ta raua ïa i parau, ‘a haere mai i Boston i te Sabati e haere mai nei [oia hoʻi te mahana matamua o te hepetoma, no te mea aita â ratou i farii i te Sabati]; te hinaaro nei maua i te fanaʻoraa e faaroo iaʻna.’
GSAM 241.2Ua faatia mai te Miti Nichols i teie mea iaʻu i toʻna fare, i Dorchester, i te matahiti 1858. Ua parau oia e ua faanaho oia i te mau mea atoa no te haere i Boston i te poipoi Sabati ma toʻna pereoo, no te hopoi i te Tamahine Harmon i te putuputuraa i opuahia. I taua ahiahi ra, i te taime pure a te utuafare, ua ite oia i te hoê orama. I te otiraa o te reira, ua parau oia, ‘E te Taeae Nichols, eita vau e haere i Boston ananahi; ua faaite mai te Fatu iaʻu e e tia iaʻu ia haere i Randolph. E ohipa Taʻna naʻu i reira.’ E mea rahi te haapao o te Miti Nichols i taʻna parau. Ua fafau oia e e hopoi iaʻna i Boston i te mahana i muri iho, e ua ui oia ma te ahoaho, ‘Eaha taʻu e rave i taʻu parau ia Sargent e ia Robbins?’ ‘A vaiho i te reira,’ te na ô ra te Tamahine Harmon, ‘ua faaue mai te Fatu iaʻu ia haere na te tahi atu eʻa.’ ‘Inaha,’ te na ô ra te Miti Nichols, ‘aita e taa ra iaʻu.’ ‘Ua faaite mai te Fatu iaʻu e e taa ia tatou ia tae tatou i reira,’ te na ô ra te Tamahine Harmon. ‘Inaha,’ te na ô ra te Miti Nichols, ‘aita e ravea e tae ai oe i reira maori râ ia haere matou e hopoi ia oe, aita râ vau i ite e nahea vau e faataa ai i teie mau mea i te mau Taeae i Boston.’
GSAM 241.2Ua parau atoa mai te Miti Nichols iaʻu e ‘ua ite te Tuahine Harmon i to ratou haavare i roto i te orama, e aita e putuputuraa i Boston i te Sabati, e e putuputu o Sargent, Robbins e te tahi atu mau taata patoi e te amuiraa rahi i Randolph (e 13 maile i Boston mai) i te Sabati; e e tia ia matou ia farerei i te feia patoi i Randolph, i ta ratou putuputuraa i te Sabati, e i reira e horoahia iaʻna te hoê poroi no ratou, o te haapapu i te feia aau haavare ore e te ore e manaʻo ino na mua, e no te Fatu anei taʻna mau orama aore ra no Satani.’ Ahiri ratou i haere na Boston e i muri iho i Randolph, e 22 maile ïa te tere; ua haere afaro râ ratou i Randolph, e ua tae i reira fatata i te hora putuputuraa. Ua ite ratou i reira i taua mau taata iho ra o tei farii e farerei ia ratou i Boston. Ua parau ihora te Miti Nichols, ‘Ua taa iaʻu i teie nei.’
GSAM 242.1Teie tamataraa a Sargent e Robbins i te ape i te iteraa papu a te Tamahine Harmon, e te huru i arataihia ai oia ia farerei ia raua, ua ohipa puai ïa i nia i te manaʻo o vetahi i reira. No nia i taua putuputuraa iho ra, e faahiti au i te aamu mai tei faatiahia e te Miti Nichols:—
GSAM 242Te mau faaiteraa faahiahia
GSAM 242.2“Ua roohia te Tuahine Ellen i te orama, e ua tupu te mau faaiteraa taa ê roa. Ua tamau noa oia i te paraparau i roto i te orama ma te reo maramarama, o tei faaroohia e o tei taa maitai i te feia atoa i reira, e tae roa i te area toparaa mahana. Ua riri roa e ua arepurepu atoa o Sargent, Robbins e French i te faarooraa i te Tuahine Ellen ia paraparau i roto i te orama, o ta ratou i parau e no te diabolo ïa. Ua faaohipa ratou i to ratou mana atoa i nia i te taata e to ratou puai tino atoa no te faaore i te ohipa a te orama. Ua amui ratou i te himene ma te reo puai roa; e ua taui ratou i te paraparau e te taio i te Bibilia ma te reo puai, ia ore to Ellen reo ia faaroohia, e tae noa atu i te pau o to ratou puai e te rūrū o to ratou rima, a ore atu ai ratou e nehenehe e taio i te Bibilia. I roto râ i taua arepurepuraa e taua maniania atoa ra, ua faaroo maitai te feia atoa i reira i to Ellen reo maramarama e te teitei a paraparau ai oia i roto i te orama. Ua tamau noa teie mau taata i te patoi a nehenehe noa ai ratou e paraparau e e himene, noaʻtu e ua aʻo te tahi o to ratou iho mau hoa ia ratou e ua ani ia faaea. Ua parau râ o Robbins, ‘Te piʻo nei outou i mua i te hoê idolo; te haamori nei outou i te hoê fanauʻa puaatoro auro.’
GSAM 243.1“Aita o Thayer, te fatu o te fare, i papu roa e no te diabolo taʻna orama, mai ta Robbins i parau. Ua hinaaro oia ia tamatahia te reira na roto i te tahi ravea. Ua faaroo oia e e faaea te mau orama no roto mai i te mana o Satani ia iritihia te Bibilia e ia tuuhia i nia i te taata i roto i te orama. Ua ani oia ia Sargent e tamata anei oia na reira, aita râ oia i farii. Ua rave atura o Thayer i te hoê Bibilia rahi e te teimaha no te utuafare, i neneihia i te faito o te api parau i tufahia e maha, o tei vai i nia i te airaa maa e o tei ore i faaohipahia pinepine. Ua iriti oia i te reira e ua tuu i taua Bibilia matara ra i nia i te ouma o Ellen a vai noa ai oia i roto i te orama; i taua taime ra, te turu ra toʻna tua i te patu i te poro o te piha. I muri noa iho i te tuuraahia te Bibilia i nia iaʻna, ua tia oia i nia e ua haere i ropu i te piha, ma te tapea i te Bibilia matara i roto i te hoê rima e ma te faateitei i te reira i nia roa e maraa iaʻna. Ua hiʻo tamau toʻna mata i nia, e ua parau oia ma te faatura rahi, ‘Te iteraa papu faauruahia no ǒ mai i te Atua,’ aore ra te tahi mau parau hoê â auraa. E a tapea noa ai oia i te Bibilia i roto i te hoê rima, ma toʻna mata e hiʻo i nia, eiaha i te Bibilia, ua tamau oia e taime roa i te huri i te mau api i toʻna tahi atu rima, i te tuu i toʻna manimani rima i nia i te tahi mau irava, e i te faahiti tano i te mau parau o taua mau irava ra ma te reo tura. E rave rahi feia i reira tei hiʻo i te mau irava ta toʻna manimani rima i faaite, no te ite e ua tano anei taʻna faahitiraa, no te mea te hiʻo noa ra toʻna mata i nia i taua taime atoa ra. Te tahi o te mau irava i faahitihia, e mau haavaraa ïa i te feia ino e te feia faaino i te Atua; e te tahi, e mau aʻo e e mau haapiiraa ïa no nia i to tatou huru i taua taime ra.
GSAM 243Taʻna orama maoro roa aʻe, hau atu i te ono hora
GSAM 243.2“Ua vai noa oia i roto i teie huru i te avatea taatoa e tae noa i te area toparaa mahana, e ua hope atura te orama. I to Ellen tiaraa i nia i roto i te orama, ma te Bibilia matara e te teimaha i roto i toʻna rima, e toʻna haereraa na roto i te piha ma te faahiti i te mau irava o te mau Papai, ua mamû o Sargent, Robbins e French. I te toea o taua taime ra, ua peapea ratou, e e rave rahi atoa te tahi atu. Ua tapiri râ ratou i to ratou mata e ua faaetaeta noa i to ratou aau, aore i faaite i to ratou manaʻo.”3
GSAM 244Te faaipoiporaa o te potii Harmon
GSAM 244.1I te 30 no Atete 1846, ua faaipoipo te potii E. G. Harmon e te Matahiapo James White, e ua rave amui raua i te ohipa no te faahaereraa i te poroi i mua. I te matahiti 1847, i Maine e Massachusetts te rahiraa o ta raua ohipa.
GSAM 244.2I te Sabati matamua no Eperera, ua horoahia mai i te Vahine White te hoê orama faahiahia roa, i te fare o Stockbridge Howland, i Topsham, i reira te mau putuputuraa i faatupuhiaʻi i te rahiraa o te taime i taua tau ra. O teie te orama i faahitihia i roto i Te mau Papai Matamua, i reira oia i ite ai i te vahi moʻa e taʻna mau tauihaa, te tau ati, te feia moʻa e horo ê ra i te mau oire, te feia ino e haaati ra ia ratou, to ratou faaoraraahia i te reo o te Atua, te iubili, te haereraa mai o te Fatu i roto i te pereoo ata, e te tahi atu â mau mea. E mea maitai paha ia hiʻo tatou i te tahi o taʻna mau haaraa tino i roto i teie orama.
GSAM 244E rave rahi Bibilia i faaohipahia i roto i te hoê orama
GSAM 244.3I te 19 no Tenuare 1890, ua parau mai te Vahine Frances Lunt, te tamahine a S. Howland, iaʻu:
GSAM 244.3“I te hoê pae o te piha i reira te mau putuputuraa i faatupuhiaʻi, te vai ra te hoê airaa maa e e rave rahi buka rau i nia iho, e te tahi mau Bibilia rahi au noa i rotopu ia ratou. A vai noa ai oia i roto i te orama, ua tia te Vahine White i nia e ua haere i te airaa maa. Ua rave oia i te hoê Bibilia ma te ore e tapea i te tahi atu buka. Ua tapea oia i te reira ma te matara i nia aʻe i toʻna upoo i toʻna rima aui, ma te faaite i toʻna manimani faatoro o te rima atau i te irava o te mau Papai taʻna e faahiti ra, a tia ai oia i mua i te taata noʻna taua irava ra. E ua tuu atura oia i te buka matara i nia i te ouma o te taata i mua iaʻna i faahiti ai oia i taua irava ra. Ua hoʻi oia i te airaa maa e ua rave mai i te tahi atu Bibilia. Ua na reira faahou oia i te faahiti i te tahi atu irava o te mau Papai e i te tuu i te Bibilia matara i nia i te ouma o te taata taʻna i parau atu. Ua ravehia teie ohipa i te area ono taata. I muri iho, ua parahi oia i nia i te hoê parahiraa ma te mārū e te nehenehe, e i taua taime atoa ra ua hiʻo noa toʻna mata i nia, eiaha i te buka.”
GSAM 245.1Teie ta te Vahine Truesdail i parau no nia i te reira:
GSAM 245.1“Tei reira vau [Eperera 1847] i te haereraa te Tuahine White i te airaa maa e i te raveraa mai i te mau Bibilia, te tahi i muri i te tahi, mai roto mai i te mau buka i nia i te airaa maa, ma te tuu i te Bibilia i nia i te ouma o te taata noʻna te irava o te mau Papai taʻna i faahiti. Ua ravehia te reira a hiʻo noa ai toʻna mata i nia i te raʻi. I taua taime ra, ua tapea oia i te Bibilia i nia aʻe i toʻna upoo a paraparau mai ai oia iaʻu; e ua tuu mai oia i te reira i nia i toʻu ouma. Te irava i horoahia mai iaʻu, o te 2 Korinetia 6:17 ïa.”4
GSAM 245.2I roto i te hoê rata a te Vahine Frances Lunt, ua faaite mai oia i te iʻoa o na taata e toru i reira i taua taime ra, e tei tuuhia te mau Bibilia i nia ia ratou a paraparau ai te Vahine White ia ratou no nia i te irava no ratou tataitahi; e tei roto atoa i taua mau iʻoa ra to te Vahine Truesdail.
GSAM 245Te ohipa matamua, i rotopu ïa i te feia i faaroo i te Taeraa mai
GSAM 245.3Te ohipa a te potii Harmon, i raro aʻe i te arataʻiraa a te horoʻaraa o te tohu, mai Tenuare 1845 e tae atu i te tau faatupuraa tiare o 1846, fatata hoê ahuru ma vau avaʻe, i rotopu ïa i te feia ‘faaroo’ i te haereraa mai o te Mesia e fatata nei, o taʻna i apiti na. I muri aʻe i te hopea o te 2300 mahana (22 no Atopa 1844), e tae atu i te taime e taa ai te tumu o to ratou inoino e te huru o te ohipa i tupu i taua taime ra, te vai ra te fifi ia fariu te feia faaroo i te mau manaʻo hape, aore ra ia faarue roa ratou i te mau mea ta ratou i ite e i ora na i muaʻtu. Teie taʻna poroi ia ratou: ‘No ǒ mai i te Atua te tere i tupu aʻenei. A tapea maite i to outou faaroo. E ohipa â ta te Fatu na toʻna nunaa. A haapii i te Bibilia. A imi i roto i te parau, e e ite outou i te maramarama.’
GSAM 245.4Te tuea ra teie haapiiraa i te faanahoraa a te Fatu. Mai te matamua mai â, o toʻna ïa opuaraa ia faahitihia mai roto mai i taʻna parau taʻna mau poroi taa ê no toʻna nunaa, i te tau i faataahia no taua mau poroi ra. I muri iho, e tae mai te horoʻaraa o te tohu, ei mea ‘piti,’ no te haapapu e no te faaitoito i te feia faaroo.
GSAM 246.1Te vai ra te hoê faaiteraa maramarama roa no teie parau i roto i te aamu o Korenelio, mai tei papaihia i roto i Te Ohipa a te mau Aposetolo. Ua fa mai te hoê melahi a te Atua iaʻna, e ua horoa iaʻna i te hoê orama i roto i toʻna iho fare. Ua ite maitai taua melahi ra i te mau parau mau o te evanelia, e ua nehenehe oia e haapii i te reira ia Korenelio; ua tonohia râ oia no te tavini i te hoê taata e fatu aiʻa no te faaoraraa, ma te horoa ia Korenelio i te hoê orama. Ua haapapu oia iaʻna e ua fariihia taʻna mau pure e toʻna pûpûraa iaʻna iho e te Fatu. Aita oia i poro i te evanelia iaʻna, ua parau noa râ ia tono i te taata e tii ia Petero, o tei parahi i te fare o Simona, te taata hamani iri animara, i Iopa. Ua haere mai o Petero e ua poro ia Korenelio i te evanelia o te Mesia no roto mai i te mau Papai.
GSAM 246Te tiaraa o te horoʻaraa o te tohu
GSAM 246.2I teie nei, e mea maitai paha ia hiʻo tatou i te anairaa o te tupuraa o te mau horoʻaraa, mai ta te Fatu i faaite i roto i taʻna parau. Ua faahiti o Paulo i te reira i roto i taʻna rata i to Korinetia, i reira oia i parau ai: ‘Ua tuu te Atua i te tahi pae i roto i te ekalesia, o te mau aposetolo na mua, e te mau peropheta i te piti.’5
GSAM 246.3Ia hiʻo tatou i te parau a te aposetolo no nia i te taairaa o teie mau horoʻaraa i roto i te ohipa o te evanelia, e ite oioi tatou i te tumu i haapaʻohiaʻi teie anairaa. I te faaauraa o Paulo i teie mau horoʻaraa, ua parau oia: ‘E teie nei, e tapao te mau reo ê, e ere no te feia faaroo, no te feia faaroo ore râ; e te tohu, e ere ïa no te feia faaroo ore, no te feia faaroo râ.’6 Te faanahoraa a te Fatu, ia faahitihia mai ïa taʻna mau poroi taa ê no to te ao nei no roto mai i taʻna parau. No reira, e turai oia i te mau taata ia imi i roto i te mau Papai e ia haere ei mau aposetolo, ma te hopoi i te hopoia o te mau poroi a te Fatu, e ia poro ratou i te reira no roto mai i te Bibilia, o tei vai mau noa i roto i te mau tamataraa o te mau tau. A tupu ai te feia faaroo, e tae mai te horoʻaraa o te tohu ei mea ‘piti,’ ma te rave i taʻna tuhaa ‘ia tia roa te feia moʻa, no te ohipa taviniraa, no te patu i te tino o te Mesia.’7