Pene 19 — “I ta ratou ïa mau hotu e ite maitai ai outou ia ratou”
GSAM 299.1“Ua horoa mai oia i te tahi pae ei aposetolo; te tahi pae ei peropheta; te tahi pae ei feia poro evanelia; e te tahi pae ei tiai e ei orometua; ia maitai roa te feia moʻa, no te ohipa taviniraa, no te patu i te tino o te Mesia; e ia tae paatoa tatou i te hoêraa o te faaroo e o te ite i te Tamaiti a te Atua, ei taata maitai roa, ia tae i te faito o te rahi o te îraa o te Mesia.”1
GSAM 299.2I to te Faaora tuuraa i te mau horoʻaraa a toʻna Varua i roto i te ekalesia, no te rave, “mai ta toʻna i hinaaro,” i te ohipa a te Fatu e tae noa aʻe i te mahana maitai roa, aita oia i vaiiho i toʻna nunaa ia imi noa i te manaʻo e no te raʻi anei te hoê faaiteraa, e aore ra no te mau varua ino. Ua horoa mai râ oia i te mau ture e ite ai tatou e no te Atua anei taua varua ra e aore ra aita. I teie atoa mau mahana hopeʻa nei, ia au i ta te peropheta Ioela i tohu, e ninii mai ai te Fatu i toʻna Varua i nia i te taata atoa, e e tohu atoa ai te mau tamaroa e te mau tamahine,2 Te parau nei Paulo e eiaha te taata e vahavaha i te mau parau tohu, ia “hiʻopoʻa râ i te mau mea atoa,” e ia “mau papu i te mea maitai.”3
GSAM 299.3Nafea e nehenehe ai e tamata i teie mau faaiteraa, maori râ ia faaau ia ratou i te mau ture o te mau Papai no te ite i te ohipa a te Varua o te Atua? E ere te mau mea atoa eita e taa i te feruriraa taotiʻahia o te taata i te mea no te Atua iho â, no te mea te parau nei te Bibilia e, i te mau mahana hopeʻa, e rave Satani i te mau semeio no te haavare i to te ao nei, e no te haaputuputu ia ratou i te aroraa o taua mahana rahi o te Atua Mana hope ra.4 No reira, na roto i te faaau-maite-raa i te faaiteraa i te mau ture o te Bibilia e ite ai tatou i te hoê horoʻaraa mau a te Varua. E titauhia te ara-maite-raa mai ta te taata o teie nei ao e rave ia imi ratou i te moni haavare.
GSAM 300Te Ite i te Moni Haavare
GSAM 300.1I roto i te vea Detroit Bank Note Reporter o Eperera 1863, ua horoa mai o Preston i na ture e pae no te ite i te moni haavare. Ua parau atoa oia e, te taata e hiʻopoʻa maite i te mau moni parau atoa e tae mai i roto i toʻna rima ia au i teie mau ture, eita roa ïa e mataʻu ia haavarehia oia.
GSAM 300.2Aita e ravea papu aʻe no te tamata i te hoê horoʻaraa o te tohu maori râ ia faaau i te reira i te faataaraa o te mau horoʻaraa tei faaitehia i te tau o te mau Papai, e ia tamata i te reira i te mau ture tei horoahia i reira. Te faaineine hope nei te mau Papai ia tatou no te mau ohipa maitatai atoa (2 Timoteo 3:16, 17). Te horoa mai nei ratou i te hoê faatiaraa tano no te mau faaiteraa o te horoʻaraa o te tohu, e no te ravea e taa ê ai te ohipa mau a te Varua o te Atua i te mau ohipa a Satani e taʻna mau horoʻaraa haavare.
GSAM 300TE MAU TURE NO TE ITE I TE MAU HOROʻARAA MAU
GSAM 300.3Ua horoa mai te Fatu i roto i taʻna parau i te mau ture taa ê e hitu aʻe, ei ravea no te faataa ê i te mau faaiteraa mau a te Varua o te Atua i te ohipa a Satani.
GSAM 300Ture Matamua — Haapiiraa Taa Ê
GSAM 300.4I te parauraa i te mau mea o te mau mahana hopeʻa, ua parau te peropheta Isaia e: “A nati i te iteraa papu, a taati i te ture i rotopu i taʻu mau pipi. E tiai au i te Fatu, o tei huna i toʻna mata i te utuafare o Iakoba, e e hiʻo atu vau iaʻna.... E ia parau mai ratou ia outou e, A ui atu i te feia e varua uiui to ratou, e i te feia tahutahu e vini e e muhumuhu ra; e ere anei i te mea tia ia imi te hoê nunaa i to ratou Atua? E ui atu anei i te feia pohe no te feia ora? I te ture e i te iteraa papu; ia ore ratou e parau ia au i teie parau, no te mea ïa aita e maramarama i roto ia ratou.”5
GSAM 301.1I roto i teie irava, te faahiti nei te parau i te hoê nunaa e faahoʻi nei i te tapao i nia i te ture a te Atua — te hoê nunaa e tiai nei i te Fatu e e rave nei i taʻna ohipa. Te tiai nei ratou iaʻna; oia hoi, te tiai nei ratou i toʻna taeraa mai. Te tupu nei atoa te reira i te hoê tau e pii nei te mau varua, o te parau ra e e varua ratou no te feia pohe, i te taata ia ui atu ia ratou. Te faaroo nei te tahi pae i ta ratou piiraa, e te ui nei ratou i te feia pohe ia noaa mai te ite; te titau manihini nei râ te Fatu i toʻna nunaa ia imi iaʻna. Te auraa mau, ia imi ratou iaʻna, e horoa mai oia i te haapiiraa taa ê na ratou. Aita e faufaa ia ui ratou i te feia pohe, o te ore e nehenehe e faaite mai i te tahi mea ia ratou; no te mea “aita atoa o ratou e tuhaa a muri noa aʻe i roto i te mau mea atoa e ravehia i raro aʻe i te mahana;” e “aita te feia pohe i ite i te tahi mea.”6
GSAM 301.2I roto i te irava i faahitihia i nia nei, ua horoahia te hoê ture e tia ia faaohipahia no te tamata i te mau parau atoa e tae mai: “ia ore ratou e parau ia au i teie parau, no te mea ïa aita e maramarama i roto ia ratou.” E tuea te mau parau atoa no ô mai i te Fatu i taʻna parau e i taʻna ture.
GSAM 301.3Ia faaohipa vau i teie ture i nia i te mau papai a Vahine White, e parau atu vau e, i roto i na matahiti e pae ahuru ma piti i mairi aʻe nei, ua taio maite au i taʻna mau iteraa papu, ma te faaau i te reira i te ture a te Atua e i te iteraa papu o te Bibilia. Ua ite au e te tuea hope roa nei raua. Aita taʻna mau haapiiraa i haere mai no te horoa i te hoê heheuraa apî ei mono i te mau Papai; te faaite mai nei râ te reira ia tatou e ihea e e nafea, i teie nei tau, e nehenehe ai te taata e arataʻihia i te hape e e faatea ê i te parau. Te vahi o te mau iteraa papu a Vahine White, e nehenehe e faataa maitai roa na roto i taʻna iho i papai no nia i te reira:—
GSAM 301.4“Ua navai te parau a te Atua no te haamaramarama i te feruriraa o tei poiri roa, e e nehenehe te reira e taa i te feia atoa e hinaaro to ratou ia taa i te reira. Noa râ taua mau mea atoa ra, te vai nei te tahi pae e parau ra e te haapii nei ratou i te parau a te Atua, te ora nei râ ratou ma te patoi roa i taʻna mau haapiiraa maramarama roa aʻe. No reira, ia ore te tane e te vahine ia roaa i te otoheraa, te horoa mai nei te Atua i te mau iteraa papu maramarama e te tano, no te faahoʻi ia ratou i te parau o ta ratou i haapao ore i te pee.
GSAM 302.1“Ua î te parau a te Atua i te mau haapiiraa tumu no te faatupu i te mau peu ora tia. E ua faataahia te mau iteraa papu no te taatoaraa e no te taata taitahi no te huti faahou i to ratou manaʻo i teie mau haapiiraa tumu.... Aita outou i matau i te mau Papai. Ahiri outou i haapii i te parau a te Atua ma te hinaaro ia tae i te faito o te Bibilia e i te maitai-roa-raa Kerisetiano, eita ïa outou e hinaaro i te mau iteraa papu....
GSAM 302.2“Te opua nei te Fatu e faaara ia outou, e aʻo e e horoa i te manaʻo aratai, na roto i te mau iteraa papu i horoahia mai, e ia mau i roto i to outou manaʻo te faufaa o te parau mau o taʻna parau. E ere te mau iteraa papu i papaihia i te mea no te horoa i te maramarama apî, no te haamau papu râ i roto i te aau i te mau parau mau faauruahia tei faaitehia aʻo nei.... Aita e parau mau apî e faaitehia mai; ua faaohie râ te Atua, na roto i te mau iteraa papu, i te mau parau mau rahi tei horoahia aʻo nei, e, ia au i taʻna iho ravea i maiti, ua tuu faahou i te reira i mua i te taata, ia ara e ia mau to ratou manaʻo i te reira, ia ore te taata atoa ia roaa i te otoheraa....
GSAM 302.3“E ere te mau iteraa papu i te mea no te faaiti i te parau a te Atua, no te faateitei râ i te reira e no te huti i te mau manaʻo i reira, ia mau i te taata atoa te nehenehe o te parau mau ohie.... Ahiri te feia e parau nei i teie nei e e taoʻa taa ê ratou na te Atua i haapao i taʻna mau titauraa, mai tei faataahia i roto i taʻna parau, eita ïa e horoahia mai te mau iteraa papu taa ê no te faaara ia ratou i ta ratou hopoia, e no te faaite papu ia ratou i to ratou hara e i te ati riaria e roohia ia ratou ia ore ratou e haapao i te parau a te Atua.”7
GSAM 302Ture Piti — Te Mau Peropheta Mau
GSAM 302.4Ua haapii aʻo nei tatou e e parau te mau peropheta mau atoa ia au i te ture a te Atua e i te iteraa papu o taʻna parau. Te horoa mai nei te aposetolo Ioane i te tahi atu ture e faataa ra i te haapiiraa a te mau peropheta mau. Te na ô ra oia e: “E au mau here e, eiaha e faaroo i te mau varua atoa, e tamata râ i te mau varua e no te Atua anei ratou; no te mea e rave rahi te mau peropheta haavare i haere atu i te ao nei. Teie te mea e ite ai outou i te Varua o te Atua: te mau varua atoa e faʻi e ua tae mai Iesu Mesia i roto i te tino, no te Atua ïa; e te mau varua atoa e ore e faʻi e ua tae mai Iesu Mesia i roto i te tino, e ere ïa i te Atua; e o te varua ïa o te anetikerito, o ta outou i faaroo e e haere mai, e tei roto aʻo nei oia i te ao nei.”8
GSAM 303.1A hiʻopoʻa maite i te irava i nia nei. Aita te reira e parau nei e te taata e faʻi e “ua haere mai na Iesu Mesia i roto i te tino,” e “ua tae mai râ oia i roto i te tino”; oia hoi, e haere mai oia na roto i toʻna Varua, e e parahi oia i roto ia tatou ei pahonoraa i to tatou faaroo. O te parau mau tumu iho â teie o te evanelia, “te Mesia i roto ia outou, te tiaturiraa o te hanahana.”9
GSAM 303.2Te haapiiraa no te oraraa e itehia nei i roto i te mau papai atoa a Vahine White, o te faufaaraa ïa ia vai te Mesia ei Faaora e parahi i roto ia tatou, ia hinaaro tatou e haere i mua i nia i te eʻa i te raʻi. Te haapii nei taʻna mau papai e e titauhia te Mesia i te omuaraa, i te hopeʻa, e i te mau taime atoa. Ei faaiteraa i te reira, a hiʻo na i taʻna buka Te Mau Taahiraa i te Mesia, ua hau atu i te hoê hanere tausani o taua buka ra i hoohia na roto i te reo peretane, taa ê atu i na tausani buka na roto i na reo ê hoê ahuru ma vau e neneihia nei te reira. Ua taio te hoê orometua no te ekalesia Perepitero i taua buka ra, e ua ani oia ia horoahia mai hau atu i te toru hanere buka na te mau melo o toʻna ekalesia e toʻna mau hoa. Ua parau oia e, “Na te hoê taata tei matau maitai i te Fatu ra ia Iesu Mesia i papai i teie buka.”
GSAM 303Ture Toru — Te Mau Peropheta Haavare
GSAM 303.3Te horoa mai nei Ioane i te hoê ture no te ite i te mau peropheta haavare: “No teie nei ao ratou; no reira ratou e parau ai i te mau mea o teie nei ao, e te faaroo nei to te ao ia ratou.”10 E faaanaanatae te haapiiraa a te mau peropheta haavare i te aau pae tino, eita râ e faateitei i te eʻa o te haapae iaʻna iho e o te amoraa i te satauro. E haapii te mau peropheta haavare i “te mau parau au,” eita râ e faateitei i “Tei Moʻa no Iseraela.”11 Te taata atoa e taio noa i te tahi mau api o te mau papai a Vahine White, e ite ïa e te aratai nei ratou i te haapaeraa iaʻna iho e i te amoraa i te satauro, e e ere i te mau parau e au ai te hoê aau pae tino e te here i teie nei ao.
GSAM 304Ture Maha — Te Mauiui e te Faaoromai
GSAM 304.1I te hiʻopoʻa-faahou-raa i teie tumu parau, e rave tatou ei maha o te ture i te mau parau a te aposetolo Iakobo: “E au mau taeae e, a rave i te mau peropheta tei parau na roto i te iʻoa o te Fatu ei hiʻoraa no te faaoromairaa i te mau ati e no te faaoromai.”12 Ia taio tatou i te mau mea i tupu i taua mau peropheta tahito ra, e ite tatou e te hoê o to ratou mau tamataraa rahi roa aʻe, o te iteraa ïa ia Iseraela i te patoiraa e aore ra i te haapao-ore-raa i te mau iteraa papu maramarama i hopoihia ia ratou. E faaite oioi mai te hoê haapiiraa poto no taua mau tau ra i te huru o te mau peropheta mau e te mau peropheta haavare atoa. “Te na ô maira te Fatu Sabaota, Eiaha e faaroo i te mau parau a te mau peropheta e tohu nei ia outou; te faaî nei ratou ia outou i te mau manaʻo faufaa ore; te parau nei ratou i te hoê orama no to ratou iho aau, e ere râ no roto i te vaha o te Fatu.”13
GSAM 304.2Aita e mea i roto i te mau papai a Vahine White e faaî ai i te taata taio i te mau manaʻo faufaa ore. Mai ta te tahi atu râ i parau, “E rave rahi roa te mau taime ua noaa iaʻu te maitai rahi pae varua na roto i te mau iteraa papu. Inaha, aita vau e taio i te reira ma te ore e ite e ua aʻohia vau no toʻu faaroo iti i te Atua, no toʻu pûpû-ore-raa iaʻu iho iaʻna, e no toʻu itoito iti i te faaora i te mau varua.” No reira, e mea taa ê roa te hotu o te mau iteraa papu a Vahine White i te hotu o te mau haapiiraa a te mau peropheta haavare, mai ta Ieremia i faataa mai.
GSAM 304.3Te parau atoa mai nei te peropheta ia tatou e nafea te mau peropheta haavare e haapii ai: “Te parau tamau nei ratou i te feia e vahavaha mai iaʻu e, Ua parau te Fatu e e hau to outou; e te parau nei ratou i te mau taata atoa e haere nei i muri i te manaʻo o to ratou iho aau e, E ore outou e roohia i te ino.”14
GSAM 304.4No nia i te huru o te haapiiraa a Vahine White i roto i taʻna mau iteraa papu, e faahiti au i te mau parau i muri nei a te hoê taata taio maite:
GSAM 304.4“Ua taio vau i taʻna mau iteraa papu atoa mai te omuaraa e tae noa i te hopeʻa, e te rahiraa o te reira e rave rahi taime. Aita roa vau i ite i te hoê noa aʻe irava faufau i roto i te reira atoa, e aore ra i te tahi mea o te ere i te mea viivii ore roa e te Kerisetiano; aita e mea e aratai ê i te taata i te Bibilia e aore ra i te Mesia. Te ite nei râ vau i reira i te mau taparuraa itoito roa ia haapao i te Atua, ia here ia Iesu, ia faaroo i te mau Papai, e ia imi tamau i roto i te reira. Teie huru piriraa i te Atua, teie huru pûpûraa itoito iaʻna iho, teie mau taparuraa hanahana ia ora i te hoê oraraa moʻa, eita te reira e tupu maori râ na roto i te faaitoitoraa a te Varua o te Atua.”
GSAM 305.1Te papai nei te hoê taata tei hiʻopoʻa maite i taʻna mau iteraa papu mai te omuaraa mai:
GSAM 305.1“No te parauraa ma te maramarama e te haapao maitai, ma te ore e mataʻu e e haamaitai i te tahi taata i nia i te tahi, te hinaaro nei au e faaite papu e aita roa te reira i ere. Ahiri te mau manaʻo faufaa ore e te ino te mana aratai i teie ohipa, e mono ïa te mau parau haamanea i te mau iteraa papu e hiʻopoʻa i te aau e te mau aʻo haapao maitai. Te parau maramarama, te mau aʻo haapao maitai no te hapa, te mau parau aroha e te faaitoito no te mau varua e rûrû nei e te ite nei i to ratou hinaaro i te Faaora, e no te feia hape e imi haehaa nei i te faarue i ta ratou mau hapa — o teie te mau mea tei rahi i roto i taʻna mau ohipa. Ua horoahia te iteraa papu a Vahine White, o te aʻo ra i te mau hapa a te mau taata e rave rahi taʻna i ite i roto i te orama, ma te haapao maitai rahi, e ua noaa mai te hotu maitai roa.”15
GSAM 305Ture Pae — E Tupu te Mau Parau Tohu Mau
GSAM 305.2Te vai ra te hoê parau a Mose no nia i te mau peropheta mau e te mau peropheta haavare, i roto i te ahuru ma vau o te pene o Deuteronomi. Te na ô ra oia e: “Nafea tatou e ite ai i te parau o ta te Fatu i ore i parau? Ia parau te hoê peropheta na roto i te iʻoa o te Fatu, e ia ore taua mea ra ia tupu e ia faatupuhia, o te parau ïa o ta te Fatu i ore i parau, na te peropheta râ i parau ma te teoteo; eiaha oe e mataʻu iaʻna.”16
GSAM 305.3Te itehia nei taua parau ra i roto atoa i teie mau irava: “O vai te parau e ua tupu, ia ore te Fatu i faaue i te reira?”17 No nia i te peropheta Samuela, ua parauhia e, “Te mau mea atoa taʻna e parau, e tupu mau ïa.”18 “Ia tupu te parau a te peropheta ra, e itehia ïa e na te Fatu mau i tono mai i taua peropheta ra.”19
GSAM 306.1Ua hau atu i teie nei i te pae ahuru ma toru matahiti mai to te taata papai iteraa matamua ia Vahine E. G. White i roto i te hoê orama tohu. I roto i taua mau matahiti ra, ua parau oia i te mau parau tohu e rave rahi no nia i te mau mea e tupu a muri aʻe. Te faahiti nei te tahi mau parau tohu i te mau mea tei tupu aʻo nei; te faatupuhia nei te tahi pae, e te tiai noa ra te tahi pae i te tau i mua. No te mau parau no nia i te mau mea i tupu aʻo nei e aore ra e tupu nei, aita vau i ite i te hoê noa aʻe parau i ore i tupu. Ua faahitihia aʻo nei te tahi o taʻna mau parau tohu. E itehia te tahi atu i roto i te mau pene i muri nei, a tamau noa ai tatou i ta tatou faatiaraa.
GSAM 306Ture Ono — E Ere te Mau Semeio i te Tapao no te Hoê Peropheta Mau
GSAM 306.2Ua haapapu mai te mau taata papai haapiiraa no nia i te Atua e rave rahi, e ua parauhia i roto i te mau faataaraa o te mau Papai, e te tapao o te hoê peropheta mau, o te raveraa ïa i te mau semeio. Aita â râ tatou i ite i roto i te mau Papai i te hoê ture mai te reira te huru.
GSAM 306.3Ahiri te raveraa i te mau semeio te haapapuraa o te hoê peropheta mau, e parauhia ïa e e peropheta mau iho â te “peropheta haavare” i faahitihia i roto i te Apokalupo 19:20; no te mea te na ô ra e, “Ua haruhia te puaa, e oia atoa te peropheta haavare tei rave i te mau semeio i mua iaʻna, e ua haavare oia na roto i te reira i te feia i farii i te tapao o te puaa.” Te faahitihia faahou ra taua mana ra i roto i te Apokalupo 13:14, e te haavare ra i “te feia e parahi nei i nia i te fenua na roto i te mau semeio i horoahia te mana iaʻna ia rave i mua i te puaa.” Ia faaohipa tatou i teie ture mai te reira, e faaoti atoa ïa tatou e e peropheta mau o Satani. Te tahi mau varua e rave i te hoê ohipa taa ê i te ono o na ati hopeʻa e hitu, te parauhia ra e o “te mau varua demoni e rave nei i te mau semeio, e haere atu nei i te mau arii o te fenua e o te ao atoa nei, no te haaputuputu ia ratou i te aroraa o taua mahana rahi o te Atua Mana hope ra.”20
GSAM 306.4Ahiri e imi tatou i te haapapuraa o te hoê peropheta mau i roto i te mau semeio taʻna e rave i te taime aita oia i roto i te orama, e mea iti roa ïa te mau peropheta o te Bibilia e manuïa i taua tamataraa ra, mai te peu iho â e niu te faaotiraa i nia i te mau mea i papaihia no nia i ta ratou mau ohipa. E parau mau, ua papaihia e ua rave te tahi o te mau peropheta i te mau semeio, mai ia Elia, Elisa, e Paulo. O vai râ tei ite i roto i te Bibilia i te hoê faatiaraa no te mau semeio a Isaia, Ieremia, Daniela, Hosea, Ioela, Amosa, e te tahi atu? E mau peropheta mau râ teie no te Fatu, e te faaitehia ra te reira na roto i te mau ture ta te Fatu i horoa ei tamataraa i te hoê peropheta mau.
GSAM 307.1Ia taiohia te faatiaraa o te mau Papai no nia ia Ioane Bapetizo, e ite maramarama tatou e e ere te raveraa i te mau semeio i te tamataraa o te hoê peropheta mau. E peropheta oia, mai tei faaitehia i roto i te parau tohu a toʻna metua tane ra o Zekaria, a faatia ai oia i te orama ta te Atua i horoa mai no nia i te tamaiti e fanau mai naʻna: “E o oe, e teie nei tamaiti, e parauhia oe e e peropheta na Tei Teitei roa; e na mua hoi oe i te Fatu e haere ai e faaineine i toʻna mau eʻa.”21 Ua faʻi mai to tatou Faaora iho e o Ioane taua peropheta ra o te faaineine i te eʻa i mua iaʻna; no te mea ua parau oia no nia ia Ioane e: “Eaha râ ta outou i haere atu e hiʻo? E peropheta anei? Oia mau, te parau atu nei au ia outou, e ua hau roa aʻe oia i te peropheta. O oia teie i papaihia ra e, Inaha, te tono nei au i taʻu veʻa na mua ia oe, e naʻna e faaineine i to eʻa i mua ia oe. Te parau atu nei hoi au ia outou, I rotopu i te feia i fanauhia e te vahine, aita e peropheta hau aʻe i te rahi ia Ioane Bapetizo?”22
GSAM 307.2Teie ïa te parau maramarama a te Faaora e e peropheta o Ioane. E faaohipa anaʻe tatou i te tamataraa o te raveraa i te semeio, e e hiʻo tatou i te hotu. I roto i te Evanelia i papaihia e Ioane te taata poro evanelia, te vai nei teie mau parau: “E rave rahi tei haere atu iaʻna [te Mesia], e ua parau e, Aita Ioane i rave i te hoê semeio; e parau mau râ te mau mea atoa ta Ioane i parau no nia i teie taata.”23 Ua navai teie noa parau no te patoi hope i te parauraa e te tapao o te hoê peropheta mau, o te raveraa ïa i te mau semeio.
GSAM 307.3Teie ture i horoahia i roto i te Deuteronomi 13:1-3, o ta tatou e parau nei e o te ono ïa o te ture i roto i ta tatou numeraraa i teie nei, no te paruru ïa ia tatou i te peeraa i te mau mea atoa e ofo ai e aore ra te mau semeio, hou tatou e hiʻopoʻa maite ai e te aratai ra anei te reira ia tatou ia piri atu â i te Fatu, e aore ra ia faaatea ê iaʻna. Te auraa mau o teie irava, ia faaohipa tatou i te mau ture atoa, ia hiʻo iho â râ e te tuea ra anei te reira i te Atua e i taʻna ture.
GSAM 308.1Te haapii nei teie ono o te ture e, ia ravehia te hoê semeio e te hoê taata haavare, e itehia ïa i pihai iho, ia tamata-maite-hia, te faarueraa i te mau parau mau moʻa o te parau a te Atua, e te faaitiraa i te faito i titauhia ia au i te hoê aau e hinaaro ra e ape i te eʻa o te haapaeraa iaʻna iho. Te faatia nei te Fatu ia tia mai te hoê taata haavare mai te reira, e e tamataraa taʻna haerea no te tamaiti mau a te Atua, ei ravea iaʻna ia hiʻopoʻa maite i te fa e aore ra i te manaʻo turai o taua taata rave semeio ra. Te feia e mau papu i te parau a te Atua, e ore e umehia e te taata rave semeio haavare, e puai aʻe ïa ratou i roto i te Atua na roto i taua tamataraa ra.
GSAM 308.2I teie mau mahana ino, e rave rahi te feia e parau ra e e “feia faaora maʻi na roto i te faaroo,” e “feia faaora maʻi na roto i te Atua,” e “feia faaora maʻi no te Ite Kerisetiano,” e te tahi atu â ratou. E mea maitai ia faaohipa maite i te mau ture o te mau Papai; no te mea e titauhia te mau ture a te Atua e te haamaramaramaraa a te Varua Maitai ia nehenehe tatou e ite maramarama i te manaʻo e te opuaraa o te tahi o teie mau “feia faaora maʻi,” no te huna-maite-raa hoi o ta ratou mau ravea. Te vai atoa ra râ te feia e patoi roa nei i te ture a te Atua e i taʻna parau mau o teie nei tau. I te tahi mau taime, ua riri uʻana teie mau “feia faaora maʻi” haavare mai te mau taata maamaa ra, ia faahitihia noa te ture a te Atua. Mai te mea papu e e poroi ta te Fatu e faaite nei i taʻna ture moʻa, e mea papu atoa ïa e aita te faaitoitoraa a te Varua Maitai i roto i te mau taata e faaino nei i taʻna ture, e e tiahi nei i mua ia ratou i te feia e faahiti noa i te reira.
GSAM 308Ture Hitu — Ta Ratou Mau Hotu
GSAM 308.3“E ara i te mau peropheta haavare, o te haere mai ia outou ma te ahu mamoe, i roto râ e mau luko taehae ratou. I ta ratou mau hotu e ite maitai ai outou ia ratou. E ooti anei te taata i te vine i nia i te raau taratara, e aore ra i te suke i nia i te mau raau taratara rii? Oia atoa, e hotu maitai to te mau raau maitai atoa; e hotu ino râ to te raau ino. Eita te hoê raau maitai e faahotu i te hotu ino, eita atoa te raau ino e faahotu i te hotu maitai. Te mau raau atoa e ore e faahotu i te hotu maitai, e tâpûhia ïa e e hurihia i roto i te auahi. No reira i ta ratou ïa mau hotu e ite maitai ai outou ia ratou.”24
GSAM 309.1Te faaite nei teie mau parau a to tatou Faaora e e vai te horoʻaraa o te tohu i te tau o te evanelia. Ahiri aita e peropheta mau e tuʻati i te ohipa, e ahiri no te hoê tumu ino te mau faaiteraa tohu atoa, eita anei oia e parau e, “E ara i te mau peropheta”? Te faaite-maite-raa mai oia ia tatou e nafea e ite ai i tera e tera huru, o te haapapuraa maitai roa ïa e, i roto i te ohipa a te Faaaʻo, te Varua Maitai, o te faaite mai i “te mau mea e tupu a muri aʻe” (Ioane 16:13), e vai te horoʻaraa mau o te tohu. Teie ture, o ta tatou i pii e o te hitu ïa i roto i ta tatou numeraraa, e ture ïa e ore roa e hape. Aita te Mesia i parau e e nehenehe outou e ite ia ratou i ta ratou mau hotu, ua parau papu râ oia e, “i ta ratou ïa mau hotu e ite maitai ai outou ia ratou.”
GSAM 309.2Te ui nei tatou e, Eaha te hotu e itehia i roto i te ohipa a te mau horoʻaraa mau a te Varua o te Atua? Te itehia nei te pahonoraa i roto i te parau a Paulo no nia i te opuaraa a te Fatu i te tuuraa i te mau horoʻaraa i roto i te ekalesia: “No reira oia i parau ai e, I toʻna revaraa i nia aʻe, ua aratai oia i te mau tîtî ei tîtî, e ua horoa i te mau horoʻaraa na te taata.... Ua horoa mai oia i te tahi pae ei aposetolo; te tahi pae ei peropheta; te tahi pae ei feia poro evanelia; e te tahi pae ei tiai e ei orometua; ia maitai roa te feia moʻa, no te ohipa taviniraa, no te patu i te tino o te Mesia; e ia tae paatoa tatou i te hoêraa [“i roto i te hoêraa,” parau i te hiti o te api] o te faaroo e o te ite i te Tamaiti a te Atua, ei taata maitai roa, ia tae i te faito o te rahi o te îraa o te Mesia.”25
GSAM 309.3A faaohipa na i teie ture i nia i te horoʻaraa o te tohu tei tuʻati i te poroi a te toru o te melahi mai toʻna omuaraa mai, e eaha te hotu? — Te ite nei tatou e te haapiiraa tamau tei horoahia na roto ia Vahine White, ua aratai ïa i te hoêraa e te auhoêraa, ma te aʻo ia “aparau amui no te imi i te manaʻo aratai,” e ia “piri atu â te tahi i te tahi,” e ia auhoê e te Mesia, ia papu ïa te amuiraa mau e te hoêraa te tahi i te tahi.
GSAM 310.1Ua faaooo mai te tahi o te feia e patoi nei i teie ohipa e, “Ahiri aita te mau orama a Vahine White i rotopu ia outou, ua parari noa ïa ta outou ohipa mai tahito mai â.” Te pahonohia atu nei e, “E parau mau te reira; no te mea na roto i taua ravea ra ua horoa mai te Fatu i te mau aʻo, te mau faaararaa, e te maramarama, e na reira ua faaorehia te mau amahamaharaa, e ua tupu maitai te ohipa.” No reira, te mea ta ratou i opua ei patoiraa i te horoʻaraa, e iteraa papu mau ïa e toʻna hotu, o te hotu ïa o te horoʻaraa mau o te tohu.
GSAM 310.2E ono ahuru matahiti e hau atu, ua tamatahia te mau faaiteraa o te horoʻaraa o te tohu na roto ia Vahine White i teie mau ture e hitu, e i roto i te mau tuhaa atoa ua tano ratou i te mau titauraa no te hoê parau tohu mau.
Notes
- Ephesia 4:11-13. ↩
- Ioela 2:28, 29. ↩
- 1 Tesalonia 5:20, 21. ↩
- Apokalupo 16:14. ↩
- Isaia 8:16-20. ↩
- Koheleta 9:6, 5. ↩
- Te mau Iteraa papu no te Ekalesia, buka 5, api 663-667. ↩
- 1 Ioane 4:1-3. ↩
- Ephesia 3:17; Kolosa 1:27. ↩
- 1 Ioane 4:5. ↩
- Isaia 30:10, 11. ↩
- Iakobo 5:10. ↩
- Ieremia 23:16. ↩
- Irava 17. ↩
- J. N. Andrews, i roto i Te Hiʻopoʻaraa e te Faaite parau o Titema 1867. ↩
- Deuteronomi 18:21, 22. ↩
- Oto 3:37. ↩
- 1 Samuela 9:6. ↩
- Ieremia 28:9. ↩
- Apokalupo 16:14. ↩
- Luka 1:76. ↩
- Luka 7:26-28. ↩
- Ioane 10:41. ↩
- Mataio 7:15-20. ↩
- Ephesia 4:8-13. ↩