Adventist Pioneer
Library
aplib.orgLibrary
12 / 31

Bung 9 — Ngahna Hun

John Norton Loughborough

GSAM 148.1“Tua hun chiengin van leenggam khu nungah sieng sawm, amauh meivahte la a moupasal dawntuoh dinga pawtte toh tehkhin ahi ding hi. Amaute lah a nga khu apil ua, nga khu amo uhi. Amote'n amauh meivahte ala ua, hinanleh sathau apuo sih uhi; apilte'n vang amauh meivahte toh sathau a umte uah apuo uhi. Moupasal ahing pei sawtlai ziehin amaute zousie ahing ihmusuh ua, aimuta uhi.”1

GSAM 148.2Tam tehkhinna sunga moupasal khu Khrist ahi.2 Tuaziehin moupasal dawntuoh dinga pawt khu, Mangpa mite'n Khrist ahing pei chieng a Ama dawntuoh dinga akalsuonna uh etsahna ahi ngeingei ding hi; aziehpen Mathiu bung sawmni leh li leh sawmni leh nga a thugenna thu bulpi khu Mangpa hing peina thu ahi. Mangpa thu khu meivah ahi.3 Nungah siengte zousie'n amauh meivahte ala chiet uhi. Amaute khenkhat mona khu, thutah thu hilna maimai apom ua, gingtute lungtang a Hagau hehpihnate khangsah ding, lungsim zousie a Mangpa kunga kipumpieh taktakna aneih lou zieh uh ahi. Tua nasep khu tehkhinna in ‘a umte ua sathau’ chi in a etsah hi. Moupasal hing pei sawtlai khu, amauh Mangpa mu ding kineem a pawtte'n Lungkiehna khat atuoh ding uh etsahna ahi ngeingei ding hi.

GSAM 148Tehkhinna Tangtunna Hun

GSAM 148.3Tehkhinna kipatna a ‘tua hun chiengin’ chi thu in, banghun a tangtung ding ahiei chi theina ahing pie hi. Tua khu bung masanga kigen thute zou zep a zui ahi; Mangpa hing pei niveina zou a thu ahi sih a, theipi kung tehkhinna phuongzah a aum zou a thu ahi zaw hi. Tua tehkhinna in Khrist hing peina ‘kot bulte ah’ ahita chi leh, Khrist amah van meipite lah a ahing kilat masangsie bei ngeilou ding khang ahing tungta chi agen hi. Thupuoh phuongzah a pang suohte khenkhat in a lungtang uah, ‘Ka Mangpa ahing pei sawtlai hi; tualeh amauh suohpi dangte vuo pat in, zukhamte toh an ne leh dawn khawm ahing pat uhi’ achi hun lai a zong tangtung ahi.

GSAM 149Amauh Suohpite Avuo Uh

GSAM 149.1Amaute khu Thupuoh kibang khat lungtuoh taha phuongzah a pang ‘suohpite’ ana hi uhi; hinanleh tuin amauh khenkhat in ana hilsa uh thu akiheisan ua, ‘ahun taka an’ pekte, ahing pei pah ding Mangpa dawntuoh dinga kisahkhawlna poimoh thu phuongzahte, amauh suohpite, ‘avuo’ uhi. Jeremiah vuo dinga ana guot uh bangin amaute'n zong ‘avuo’ uhi. Mipite'n, ‘Hing pei unlen, i leiten ama va vuo vai; a thugente bangma i ngaikhie sih ding hi’ achi uhi.4 Tuabangin tam suohte'n ‘ginum’ suohte nasep dal ding danin thu ahil pat uhi. Tam mi pawlte kung ma ah, ‘Tuaziehin bangchibanga na san leh na zah ahiei chi thei zing inlen, tuate lenkip inlen, kisia in. Na hahthah sih leh gutpa bangin na tungah ka hing pei ding a, bang hun chieng a na tunga ka hing pei ding ahiei chi na thei sih ding hi’ chi thu kigen ahi.5

GSAM 149.2Nungah siengte tehkhinna khu, ‘suohpite’ in Mangpa ahing pei nai ta chi Thupuoh akiheisan ua, ‘vuo ahing pat’ hun a tangtung ahi. Tuathamlou sil dang zong abawl pat ua, ‘zukhamte toh an ne leh dawn khawm’ ahing pat uhi. Neh leh dawn utna tasuah nuomte toh annkuong abuonkhawm uhi. Solomon in tuabangte thu agen a, ‘Zu dawn nasa mite lah ah leh sa ne luo mite lah ah um sin; aziehpen zukham mi leh ann nehluo mi khu zawngna ah atung ding hi’ achi hi.6

GSAM 149Lungkiehna Masapen

GSAM 149.3Tuin, ‘Khrist hing pei ding lamet a umte siltuohte lah a, tam thute toh kituoh bang sil aum ei?’ chi dotna ahing um ding hi. Genlawhna toh kituoh chiettah kalsuonnate ana um hi. 1844 kum ha 4 tandong Thupuoh phuongzahte'n hattuomte lah ah nna ana sem ua, hattuom chituomtuom a thugenpate'n amauh toh nna asepkhawm uhi. Tuabangin amaute khu ‘suohpite’ ahi uhi.

GSAM 150.1Thupuoh phuongzahte'n Daniel 8:14 a Ni 2300 khu Judate kum 1843 tawpna a bei ding ahi chi ahil uhi; tua khu i kum simdan a 1844 sung ahi ding hi. Tua hun tawpna ah Pasian thukhenna darkar hing tung ding ahi chi aphuongzah uhi. Tua hun lai in gamsung hattuom chituomtuom zousie'n i Mangpa hing pei niveina in thukhenna ni ahing patsah ding hi chi agingta uhi. Tuaziehin Khrist hing pei kia ding ngahtute'n tua genlawhna hun tawp chiengin Mangpa hing pei ding ahi chi ana ngaituo uh baihtahin theithei ahi. Amaute'n, ‘Tam hun khu ha tawpna, 1844 kum ha 3 ni 21, Judate kum pangngai 1843 ni nunungpen toh atawp kha ding hi’ achi uhi. Tuabangin 1844 kum ha 3 tawp lam ahisihleh ha 4 kipat lam khu Hundampa hing pei theina hun dingin aen uhi.

GSAM 150Suoh Giloute Ahina Uh Ahing Kilang

GSAM 150.2Ha 3 tawpna ahing tung a, abei a, Mangpa ahing pei sih tahin, Mangpa thupuote toh nna ana semkhawm hinanleh alungtang uapat a hinna uh Thupuoh adinga pumhlum a kipeloute'n Thupuoh adou pat ua, tua nasep akalh pat uhi. Mangpa ahing pei nai ta chi thuhilna leh thukhenna darkar Thupuoh hil teiteite lampi dal dinga atheih teng uh abawl uhi. ‘A lungtang uah’ ‘Ka Mangpa ahing pei sawtlai hi’ achi uhi. Tuin akam un leitung pumpi khu Mangpa ahing pei masangin piangthah masak ding ahi chi ahil uhi; Messiah ahing pei masangin Judate zousie Palestine ah kile kia ua, Jerusalem ah a biehinn nasep uh tungding kia masak ding ahi chi ahil uhi. Khenkhat in Khrist hing peina khu ‘hagau a hing peina’ ahi a, mi pianthah chieng leh Ama mite shi chieng a tangtung ahi chi nangawn ahil uhi.

GSAM 151‘Ahun Taka An’ Apieh Uh

GSAM 151.1Tam mite'n amauh suohpite adou lai un, ginna lenkip teiteite'n gingtute khu inn lienpite leh singbukte ah ahankhawm ua, ‘ahun taka an’ apie uhi. Hun chiemtenate leh genlawhna tangtungte'n, amauh Lungkiehna masang a bangmahin, Khrist hing peina khu ‘anai ta, kot bulte ah nangawn’ ahi chi agen zing lai hi chi aensah uhi.

GSAM 151Hattuomte A Annkuong Buonna

GSAM 151.2Amaute'n tua sil abawl lai un, Protestant hattuomte a theikhah ngailou sil khat ahing kipan hi: annkuong buonna leh ‘kimawl nopna’ adinga hattuom sungah mipite hantuoh khawm ahi. Hing pei nuom zousie khu a ann lim leh tuitahte uh nehkhawmpi dingin achiel uhi.

GSAM 151.3America ah tuabang sil i zah masapen khu 1844 kum ha 5, Lungkiehna zou zep ahi. Aumdan tambang ahi: William Miller in Rochester, N.Y., a inn lien khat ah Khrist hing pei kia ding ngahtute za tampite thu ahil a, ‘Eite khu Mathiu bung sawmni leh nga a Ngahna hun sungah i um uhi; na ginna uh lenkip un; tam thu tungtang ah sawtlouin vah tamzaw i nei lai ding uhi’ chi a thuhatna apieh lai in, Rochester a kikhopna inn lienpen pawl khat nuoilam inn sungah ‘pawi’ bawl dingin agouta uhi. Hattuom mite leh gingloute zong mipite tampi ahing kikhawm ua, Pasian thu zilna sang lienpi ukpa'n William Miller zahmailahin mipite anuisah lai in, tuipi chengkou sa, bawngnawi khal lim, sil limte leh, tam mipa guot laibu neu khat, sent sawmni leh nga in amaute kunga azua uhi. Tua laibu min khu Miller Thuhilna Phouhdohna ahi.

GSAM 151.4Tua hun a kipat nipikaal ni abei masangin, tua khopi ma ah hattuom pawl dang khat in mipi kikhopna inn lien khat ah ‘pawi’ abawl ua, lutman sent sawmni leh nga alah ua, hing pei nuom zousie khu tuipi chengkou sa, bawngnawi khal lim, tanghou lim leh sil limte nehkhawmpi dingin achiel uhi. Tua mun leh tua hun in tuni hattuomte a annkuong buonna ahing kipan a, tua khu ‘kimawl nopna lamdangte,’ ‘sil kiselna ipte dahlah kimawlna,’ ‘nga dilte,’ ‘kitawp kimawlna’ leh tuabang dangte suohin ahing khangta hi. Hattuomte a annkuong buonna khu tuazah a khangta ahiziehin, tuni a hattuom inn khat in anhuonna, ann koihna leh ann nehkhawmna inn anei sih leh a poimohte kicingin angai thei nawn sih uhi. Tam sil umdan khu tehkhinna in agen bangchiettahin ‘Ngahna hun’ a hing kipan ahi.

GSAM 152.1Wm. Miller amah in Rochester a sil tung khu tambangin agen hi:

GSAM 152.1“Rochester a Pasian thu a D.D. min nei mi khat, _____ hattuom a Pu _____ in Miller thuhilna doukalh laibu neu khat agiel a, a pasal leh numei miliente Mangpa inn sungah ahankhawm a, Belshazzar bangin tuipi chengkou sa leh gamdal a annkuong buonna ‘ann lim’ dangte annkuong lienpi abawl a, a kawphi leh cha tui uh adawn ua, amauh ann man tamtahte ane ua, amauh bawngnawi khal lim leh sil limte leh, i Hundampa ittah Khrist hing pei niveina doukalh dinga a laibu neu uh azua uhi.

GSAM 152.2“Ka peikhiet masang zankhat in, zahum thugenpa dang khat in mipi inn ahisihleh inn lien khat ah annkuong buonna abawl kia a, atunga bangmahin a lutna laite, bawngnawi khal lim leh sil limte azua hi. Hattuom pawl chituomtuomte lah a khenkhat in tuabang Babilon annkuongte aphal sih uh chi ka zahin ka kipah hi; tualeh Khrist hing pei chiengin tam hattuom pawlte zousie khu ‘zukhamte toh neh leh dawnkhawm’ a um ding hilou dingin ka lungsim a kipat ka kineem mama hi. Tam zahum thugenpate'n Pasian thu limlang ah amauh leh amauh akimuh louh ziehin ka lamdangsa hi; amaute'n Luk 14:12-14; Mathiu 24:48-51; Luk 13:25-28; 2 Peter 2:13; Juda 10-21 sim dingin ka guotnuom hi. Tamte khu hun nunungte ahi ngeingei hi.”

GSAM 152.3Upa Miller in tua nua a hattuomte'n silpieh khopna pawite ah ahing bawl uh, ‘khutsip kiselna tanghou lim guolzut kimawlna, sent sawm pieha kitawp kimawlna, sabengtung etsahna, kimawl nopna lamdangte, van kietna kisiengthou’ leh adang van kietna kimawlna guotnate amu khata hileh, siengthou lungsim a lau leh gindan in akinungtol ding hi.

GSAM 152Ngahna hun

GSAM 152.4Mangpa hing pei nai ta chi phuongzahna toh ‘Ngahna hun’ khat kizom ding ahi chi Laisiengthou thutah ah Khrist hing pei kia ding ngahtute'n hamuonna amu uhi. Tam khu i Hundampa thugente, Mathiu 25:5, 6 leh Habakuk 2:1-3 ah amu uhi.

GSAM 153.11844 kum silhing kithou hun a amaute umdan thu ah, 1844 kum ha 5 ni 9 a Zankim kikouna laigel a kipat thu i lahkhie uhi:—

GSAM 153.2“Genlawhna hunte bei ding banga kilatna hun i peikanta a, Pasian in Mengmuna tawpna chieng a atate umna dingin amuhlawhsa dinmun ah i umta uhi. Tam dinmun adingin Ama'n guolnei Habakuk tungtawnin aguotlawhta a, ‘Ka venna mun ah ka ding dinga, inn sang tungah ka ding dinga, ka kunga bang agen ding ahiei leh hing tai a ka um chiengin bang ka dawn ding ahiei chi thei dingin ka hahthah ding hi’ achi hi; ahisihleh lai gei a kigiel bangin, ‘kei toh thu kiselna’ ahi. ‘Tualeh Mangpa'n ka hing dawng a, Mengmuna gel inlen, asimpa atai theina dingin lai peek tungah chientahin gel in. Aziehpen Mengmuna khu hun guotlawh khat adingin aum nalai a, hinanleh atawpna [genlawhna hunte tawpna] chiengin agen ding a, zuou agen sih ding hi. Sawt nanleh [atawpna banga kilang hun peikan nanleh], ngah in; aziehpen hing tung ngeingei ding ahi, [genlawhna hunte akim chiengin, tua peikanin] asawt nawn sih ding hi’ achi hi.7

GSAM 153.3“Tam thuhilna khu tulai hun thu ahi chi, Paul in Hebrute 10:36-39 ah tam thu alahkhietna a kipat achien hi: ‘Aziehpen Pasian deilam na bawl zou ua, thuchiem na san theina dingun thuohhatna na poimoh uhi. Hun tomnou khat aum nalai a, hing pei dingpa ahing pei ding a, asawt sih ding hi. Tuin midihtat khu ginna a hing ding ahi; hinanleh mi koipou anungtol leh ka hinna in ama tungah kipahna anei sih ding hi. Hinanleh eite khu mangthaina lama nungtolte i hi sih ua, hinna hundamna tan dinga gingtate i hi zaw uhi.’

GSAM 153.4“Hundampa'n agen, moupasal asawtlai hun sungah (Mathiu 25:5) tuin i um uhi chi i gingta uhi; van leenggam khu tua hun toh tehkhin ding ahi. Tua hun ah ‘tua suoh giloupa'n [hun guot khu abukimlou banga ahing kilat ziehin] a lungtangah, Ka Mangpa ahing pei sawtlai hi, chi dinga, asuohpite avuo pat ding a, zukhamte toh an ne leh dawnkhawm apat ding hi,’ tualeh Mangpa khu ‘ama'n Ama ahing pei ding a kineem louh ni in ahing pei ding hi.’

GSAM 154.1“Peter in agen hun sungah tuin i umta uhi chi i gingta uhi; tua hun a amaute ‘thukhenna khu tanglai a kipat asawt sih a, amaute mangthaina zong aimu sih hi;’ tualeh amaute'n ‘mangthaina tun thei thuhilna dikloute aguh in ahing tun ding uhi.’8 Laisiengthou kigiel lai a guolnei zuoute ana um bangin tam mite zong um ding ahi chi Peter in agen hi. Tuaziehin Israel innkuonte'n ‘Nite asawt deuhdeuh a, Mengmuna chinteng atangtung sih hi’9 ana chi bangun, ahun khu peikan bang a kilatna hun khat um ngeingei ding ahi; tuachiin 2 Peter 3:4 a zahmailahtute'n ‘Ama hing pei ding thuchiem khu heiah aum ei?’ chiin adong thei ding ua, ‘Sil zousie siemchil a kipat a um bangmahin aum zing hi’ chiin amauh leh amauh akimuongsah thei ding uhi.

GSAM 154.2“Mengmuna khu tambanga asawtlai ding athei ziehin sawltah Jakob in, ‘Tuaziehin, unaute aw, Mangpa hing pei masangsie thuohhat un;’ ‘Nou zong thuohhat un; na lungtangte uh sukip un; aziehpen Mangpa hing peina anai ta hi’ achi ahi chi i gingta uhi. Tualeh ‘En un, Thukhenpa kot masangah ading hi’ achi hi.

GSAM 154.3“Tualeh i kineem hun hing peikan ding amuhlawh ziehin i Hundampa'n Luk bung sawm leh nina ah ahing hil ahi chi i gingta uhi: ‘Na kawngte uh kigaah henlen, na meivahte uh kuong zing heh; tualeh noumau khu, amauh mangpa zineina pawi apat ahing kile kia ding ngahte bangin um un; ahing pei a, kot ahing kiu tahin, akungah paipeia ahon theina dingun.’10 Ngahna in ahun peikan ahita chi a etsah hi, aziehpen tua hun masangin i ngah sih uhi. Tuaziehin i Mangpa'n, ‘Mangpa ahing pei chiengin hahthah a amuh suohte khu ahampha uhi’ chi thu abelap hi.

GSAM 154.4“Pasian aphal leh, ‘En un, Moupasal ahing pei hi; ama dawntuoh dingin pawt un;’ chi leh ‘Ama thukhenna darkar ahing tungta hi’ chi phuongzah i sunzawm ding uhi. Tualeh leitung leh hattuomte'n a ‘hamuonna’ late uapat akhanglawn ua, Pasian hehpihna chielnate angaikhiet theina dingun, aw sangtah a kikou sunzawm ding i zouseng ding hi chi i muong uhi. Mangpa hing peina khu i masang zepah aumta hi chi gingtain, tua hing peina ngah leh hahthah i sunzawm ding uh ahi.”

GSAM 155Amaute Nasep Dihna Kipsahna

GSAM 155.1Khrist hing pei kia ding ngahtute'n 1844 kum ha 3 ni 21 masang leh tua ni zou zep a amauh nasep uh bangchibanga aen uh ahiei chi theichien nuom leh, 1844 kum ha 11 ni 13 a Khrist Hing Pei Niveina Tangkou laigel sung, J. V. Himes, S. Bliss leh A. Hale in anamkhiet uh, ‘Dihna Kipsahna’ chi luu nei laigel a kipat alahkhiet tam thute simin theithei ahi:—

GSAM 155.2“Ka ngaihdante uh pom lam ah ka kinawh sih uhi. Thutah sui a kitah leh lungsim dihtah nei ka hi uhi chi ka gingta uhi. Laisiengthou sui chiet ding i Hundampa thupieh ka zui uhi. Eima pilna ka muong sih ua, puihuoi leh hilna dingin Pasian lam ka en uhi. Aman ka kengkalte uh adihlam a ahing pui ding hi chi muongin, Ama maitam tungah eimah kilan dingin ka han uhi. Thutah thei leh khielhna a kipat kikep nuomna dihtah toh, ka hing kalhna ding ua thu kigen zousie ka enchiet uhi; hinanleh ka hing doute uh ngaihdan chituomtuom leh lamdang tampite in ka ngaihdante uh ahing sukipsah semsem ahi chi ka phuongdoh ngeingei ding uhi. Eite idih ahiei, ikhiel ahiei zong, ei hing doute khu adih thei sih uhi chi ka mu ua; tualeh amaute zong amauhma a lungtuohna anei sih uhi. Amauh chiet a thu guonkhawmte khu ahat louh leh naupang thu bang ahih luot manin, amauh bawlsa zong sunzawma phelkia ding atulah uhi. A ngaihdante uh khat leh khat kidou leh kikalh ahih ziehin, ka ngaihdante uh bangchibangin ngai nanuleh, amauhpi dangte ngaihdan khu amuonlouh uh aensah uhi. Tuathamlouin, Mangpa ahing pei pah ding chi thu alouhna ding gen a pangte lah a khat ahiei tampi ahiei in, ka thugin thu bulpite uh zousie ah ka hing panpi ua, panpi louhna thu poimoh khat nangawn aum sih hi. Laisiengthou thumal kigen bangbang a letna in ka hing kipsah lai in, ka hing doute uh in Laisiengthou khu athumal kigen bangbang a theisiem ding ahi sih chi etsah dingin thawnin ahan uhi; hinanleh genlawhna tangtungta chinteng khu athu neupenpen tandong zong athumal bangchiettah in ana tangtungta ahi.

GSAM 156Lungkiehna Hilchienna

GSAM 156.1“Hinanleh ahun, Judate kum 1843, abei a, Leengpa ama kilawmna a i muh louh ziehin i lungkieta uhi. Tualeh ei hing doute zousie'n i thugin a tuomna chinteng khu adihlouhna kiensah zousie ahita hi chi lungsim dihtahin ana ngaituo uhi; tuaziehin eite, mi kitahte ihih ziehin, i thugin zousie i nusia ding ahi chi ana ngaituo uhi. Tuaziehin i lametna i lenkip zing nalai leh i Leengpa i ngak zing nalai uh amuh tahun lamdang asa uhi.

GSAM 156.2“Hinanleh eite'n i Lungkiehna sungah, lunglhah ding zieh bangma i mu sih uhi. Laisiengthou in Ngahna hun khat um ngeingei ding leh, Mengmuna asawtlai sungsie i ngah ding ahi chi aensah i mu uhi. Kum leh hun i simdan uh adih hi chi kingaituo nanleh, kum tawpna toh genlawhna hun khu abeikim thei nai sih hi chi zong i mu uhi; tualeh tua hunte khu tulai kum sung a hun khat chiengin beithei pan ding ahi chi i mu uhi. Tuabang hinanleh, ginngamna lienpi a i en ahun guot ah i khielta hi chi leitung masangah imlou leh kicingtahin i phuong uhi. Hinanleh tuabanga i khiel lai un zong, tua thu ah Pasian khut i mu thei uhi. Aman tua phuongzahna khu leitung vauhilna leh hattuom ze etna dingin azangta hi chi i mu thei uhi. Ama mite khu kineem a ngah dinmun ah akoi hi. Ama min zieha thuohgim nuomte akoukhie hi. Mangpa hing peina tangkouna khu koite adinga kipahna thupuoh thupi ahiei leh, koite adinga abil ua zahnop louh aw ahiei chi aensah hi. Mangpa hing kile kia ding koite'n dawntuoh nuom ding ahiei leh, Judate'n ahing pei masapen lai a anol bangun, ahing pei niveina a koite'n nol ding ahiei chi vannuoi pumpi aensah hi. Tualeh tam khu ‘Ama kisahkhawlna ni’ a Pasian tum tangtunna kal khat ahi chi i ngai uhi; Ama hing pei ding adinga kisa khawl theina dingun, Mangpa deilam guoh sui mite khat Ama'n apuidoh theina dinga kal khat ahi.”

GSAM 1571844 KUM HA 3 ZOU A KALSUONNA TANGTHU

GSAM 157.11844 kum ha 3 ni 21 zou a Khrist hing pei niveina kalsuonna tangthu tomnou khu, 1844 kum ha 10 ni 31 a Hunte Chiemtenate laigel a kipat alahkhiet anuoi a thute ah ahing kilang hi:—

GSAM 157.2“Judate kum 1843 abei zouin, Khrist hing pei kia ding ngahtute akhatamzaw in, tu a kipatin ahun tuamtuam i simlawh dinga, hinanleh kician taha aum ding i chi thei nawn sih ding hi chi ginna ah akimuongta uhi. Khrist hing peina i kineem hun khu genlawhna hunte zousie tawpna ahi a, kum leh hun i simdan in a etsah tua mun ah i umta uhi chi agingta uhi. Kum leh hun i simdan leh Pasian hun kikal a lamdanna tomnou khat sung giap i ngah ding uh hinanleh, ahun kician theina ding thu khat zong i nei thei nawn sih ding hi chi agingta uhi. Amauh zousie'n amauh meivahte ala ua, Moupasal dawntuoh dingin apawtta uhi; hinanleh Moupasal khu ahing pei dingin kineem kum (1843) peikanin asawtta hi. Mengmuna asawtlai sunga, sawt thei nawn sih a, hun bangkimah kineem thei ahi chi gingtain, amaute zousie'n angah ding uh akipsa bangin akilang hi. Hinanleh Mangpa tulai kum sungah hing pei ding ahi chi agingta taktak uh ahileh abawl louh ding uh, malam adinga guotnate mipite tampi'n abawl uhi chi sawtlouin achientah ahing kilangta hi. Mangpa ahing kilang pah ding chi thu ah, a lungtang a theichienna uh aum nawn sih a, aihmu bang ahita uhi. Thu dang a genin, Ama khu ni bangkimah hing pei thei ahi, ahisihleh hun tomnou khat sawt nalai thei ahi, tua hun sungin khawldam nuom khat ana man thei ding uhi chi angaituo uhi. Tami khu i Hundampa'n um ding ahi chi agen bangchiettah ahi: ‘Moupasal ahing pei sawtlai ziehin amaute zousie ahing ihmusuh ua, aimuta uhi.’

GSAM 1571844 Kum Favang Hun Ngaihtuoh Ding A Chielna

GSAM 157.3“1843 kum ha 5 lai a kipat in Unaupa Miller in Judate kum siengthou a ha sagina ngaihtuoh dingin ahing chielta hi; tua khu Khrist hing pei niveina etsahna limte zui a aumna hun ahi. Tualeh abei favang hun in tua hun lam deihsakna lienpi toh i en uhi. Tua abei zouin, Unaupa S. S. Snow in, tua etsahna limte dungzui in Mangpa ahing pei taktak chiengin ha sagina ni sawm ni ah hing pei ngeingei ding ahi chi ngaihdan apomkimta hi; hinanleh bang kum a hing pei ding ahiei chi aginngam sih hi. Anuain genlawhna hunte khu tulai kum 1844 matan abei taktak sih hi chi amu a, tua nuain ha 10 ni 22 vel, tulai kum ha sagina ni sawm ni chiengin thupina Mangpa hing peina i mu ding uhi chi thu tungah akingata hi. Tam khu abei silhing kithou hun leh nipisat hun in New York, Philadelphia leh mun dangte ah aphuongzah hi. Mipite tampi in a ngaihdan apom nanuleh, ha 7 vel matan anasepga kilang tuam bangma mu ahi nai sih hi.

GSAM 158Lou A Kinuasie Lou Annte

GSAM 158.1“Tua hun kipat lam in New Hampshire mallam a i unaute khenkhat khu, phalbi dang ahing tun masang a Mangpa hing pei ding ahi chi ginna in a lungsim uh alen luot ziehin a loute uh abawl sih uhi. Ha 7 laizang vel khu Judate ni-kum a zankim nitahlam ahi; tua ni-kum khu nitah-zingmawng danin, Judate tulai kum kipatna ha 4 thakha a kipat sim ahi. Tua hun velin, amauh lou a haichi tuh leh louhing phut a pang dangte'n zong, Mangpa ahing kilang pah ding chi theihna in alungtang uh alen mama a, amauh ginna toh kituohin a lou annte uh aat thei nawn sih uhi. Khenkhat in a lou uah loupa tan dinga apei un, nna sunzawm dingin abawl thei vawt nawn sih uhi chi akimu ua; tuaziehin a bawl ding dante uh angaidan bangin, nasep in amauh ginna uh aensah a, tuabanga leitung amawpai theina dingun, a lou annte uh louah ading denin anusia uhi. Tam khu New England mallam ah a zam pai mama hi.

GSAM 158Khrist Hing Pei Masang A Thukhenna

GSAM 158.2“Tua hun ma in Maine a i unaute'n Khrist hing pei masang a thukhenna um masak ding ahi chi ngaihdan apomta uhi; thukhenna khu ann at hun toh akituoh a, leitung tawpna ah guoh um ding hilouin, tawpna masang zep a hun khat sung luo ding ahi achi uhi. Tam ngaihdan toh kituohin, eite khu thukhenna sungah i umta uhi, khenna giit khu kigii lai ahita a, Pasian suohte atal uah chiemtena kineih lai ahi chi angaituo uhi. Tua nasep akim chiengin leitung huipi lite len a pang vansawlsieng lite'n (Kihilna 7:1) amauh lenna uh hadoh dingin chiemtena ahi ding hi.

GSAM 159Zankim A Khanglawhna

GSAM 159.1“Ha 7 laizang velin, ahun guot phuongzahna toh, nungtollehte puikia dinga Pasian guolzawlna ahing pang pat hi. Atunga ngaihdante lah a khat pou pomte'n, genlawh a aum bangin, amauh gamtatdan uh lamdang chientah leh ihmut a kipat thakhat a khanglawhna aensah uhi. ‘Zankim in, En un, Moupasal ahing pei hi; ama dawntuoh dingin pawt un, chi kikouna ahing um hi. Tuachi'n tua nungah siengte zousie athou ua, amauh meivahte aguotphata uhi.’ Ha 7 a kipat tam kalsuonnate khu New England mun chituomtuom ah aum ua, khat leh khat akituom chiet uhi; hinanleh meivah athim dehsa mite tampi pui kia leh Ama misiengthoute suhsiengthouna ah, Pasian guolzawlna amaute zousie toh aum hi. Exeter a Taamkhawmna khawmpi ah tam nasahna chituomtuomte zousie akituo ua, kalsuonna lienpi khat suohin akibuonkhawm ua, gamsung a Khrist hing pei ding ngahtu pawlte zousie kungah azam pai mama hi.”

Notes

  1. Mathiu 25:1-5. ↩
  2. Mak 2:18-20. ↩
  3. Late 119:105. ↩
  4. Jeremiah 18:18. ↩
  5. Kihilna 3:3. ↩
  6. Thupilte 23:20, 21. ↩
  7. Habakuk 2:1-3. ↩
  8. 2 Peter 2:1, 3. ↩
  9. Ezekiel 12:22, ↩
  10. Luk 12:35, 36. ↩

Note

Back