Bung 19 — “Amaute Aga Un Na Thei Ding Uhi”
GSAM 299.1“Aman mi kimkhat sawlchah dingin, kimkhat guolnei dingin, kimkhat Khantanhoi tangkou dingin, kimkhat hattuom chawmtu leh thuhiltu dingin apie hi; misiengthoute a pichingsah ding leh, nasepna nna a sep ding leh, Khrist tahsa a tundoh dingin; eite zousie ginna leh Pasian Tapa theina ah pumkhat i hin, mi piching i suoh a, Khrist bukimna pichinna tehna tan i tun masangsiein ahi.”1
GSAM 299.2Hundampa in a Hagau silpiehte hattuom sungah akoi a, ni bukim a hing tun masangsie Mangpa nasep khu “ama kipahna bangin” a sepzou theina dingin, a kilahnate khu van akipat ahiei, hagau giloute akipat ahiei chi a mite gin gin maia a um dingin anusia sih hi. Tua hagau khu Pasian akipat ahiei ahisihiei chi i thei theina dingin thukhunte ahing pie hi. Tam hun nunungte nangawn ah, guolnei Joel in a genlawh bangin, Mangpa in a Hagau mihing zousie tungah a buohsuh dinga, tapate leh tanute in zong thu a genlawh ding uhi,2 Paul in mipite khu genlawhnate a musit lou ding uh, hinanleh “sil zousie a ze-et” ding uh leh, “sil hoi khu len kip un” achi hi.3
GSAM 299.3Pasian Hagau nasep theina ding Laisiengthou thukhunte toh a tehkak lou ngal leh, tam kilahnate bangchin ze-et thei ding ihi ei? Mihing lungsim tawpdong nei in a theizou lou sil chinteng Pasian akipat hi ngeingei ding ahisih hi. Aziehpen hun nunungte ah Setan in leitung a solna ding leh, Bangkimhihthei Pasian ni thupi a kidouna dingin amaute a kaikhawm theina dingin, sil lamdangte a bawl ding thu Laisiengthou in agen hi.4 Tuaziehin hagau silpieh dihtah khu a kilahdan leh Laisiengthou thukhunte pilvangtah a i tehkak chiengin i thei thei hi. Tami ah leitung mite in sum lem theidanna a pilvanna a zah bangma uh i zah ding akul hi.
GSAM 300Sum Lem Theidanna
GSAM 300.11863 kum, ha lina a Detroit Sum Lai Thuthangpu sungah, Pu Preston in sum lem theidanna ding thukhun nga apie a, tua thukhunte dungzui a mi koipou in a khut a hing tung sum lai chinteng a enchien taktak leh, sol a um ding a zau ngai sih ding hi, chiin agen hi.
GSAM 300.2Thugentheina silpieh khu Laisiengthou hunlai a kilang silpiehte genchietna toh a tehkak leh tua sunga thukhunte a ze-et sangin a muonhuoi zaw lampi dang a um sih hi. Laisiengthou in nasep hoi chinteng sep dingin eite ahing bukimsah hi (2 Timothi 3:16, 17). Thugentheina silpieh kilahnate a dihtah in akigiel a, Pasian Hagau nasep dihtah khu Setan leh a silpieh lemte nasep akipat a khen theidan zong akigiel hi.
GSAM 300SILPIEH DIHTAHTE THEINA DING THUKHUNTE
GSAM 300.3Mangpa in a thu sungah Pasian Hagau kilahna dihtahte leh Setan nasep a khen theina dingin a tawm penin thukhun sagih ahing pie hi.
GSAM 300Thukhun Khatna—Thuhilna Tuom
GSAM 300.4Guolnei Isai in hun nunung a sil umte thu a genin: “Theipina khu hen khawm inlen, ka nuazuite lahah dan khu chiemte in. Jakob innkuonte akipat a mai phuol Mangpa khu ka ngah dinga, ama ka en ding hi.... Tualeh amaun na kung uah, Shite hagau toh kihou theite leh aw neucha a ham leh phunchip a ham dawithiamte kungah sui un, a chi chiengun, mipite in a Pasian uh a sui ding uh hilou amah? A hingte a dingin a shite kungah a sui ding uh ahiei? Dan leh Theipina kungah pei un; amaute tam thu dungzui a a gen sih uleh, a sung uah vah a um lou zieh ahi.” achi hi.5
GSAM 301.1Tam Laisiengthou thu in Pasian dan ah chiemtena koikia a buoipi mite—Mangpa ngah a, a nasep a sem mite—lamah i lungsim ahing heisah hi. Amaute in Mangpa a en uh; tua khu a hing pei ding a ngahta uh china ahi. Tua hun mahin shite hagau kahi chi a kiphuong hagauten mipite a kung ua sui dingin a han uhi. Mi kimkhat in tua hanna a ngaikhe ua, theina mu dingin shite kungah a sui uhi; hinanleh Mangpa in a mite ama sui dingin a han hi. Tua khu ama a sui uleh thuhilna tuom a pe ding ahi chi a genna ma ahi. Shite in theina bangma a pe thei sih ziehun a kung ua sui ding a kul sih hi; aziehpen “nisa nuoi a sil kibawl bangmah ah kumtawnin tanvou a nei nawn sih uh”; tualeh “shite in bangma a thei sih uh.”6
GSAM 301.2A tunga Laisiengthou thu sungah thuhilna zousie ze-etna ding thukhun a um hi,—“Amaute tam thu dungzui a a gen sih uleh, a sung uah vah a um lou zieh ahi.” Mangpa akipat thuhilna zousie a thu leh a dan toh a kituoh ding hi.
GSAM 301.3Tam thukhun Pi White laigielte a zahin, kum 52 bei ta sungin a Theipinate pilvangtah in ka sim a, Pasian dan leh Laisiengthou Theipina toh ka tehkak a, a ni un kituoh bukim uh chi ka mu hi, ka chi nuom hi. A thuhilnate in Laisiengthou tang dinga kilahna tha bangmah ahing pe sih a; hinanleh tam hunte ah mite bang mun leh bangchiin a khelam a pui a um thei uh, Pasian thu akipat a pui mang a um thei uh, chi eite ahing ensah zaw hi. Pi White Theipinate a umna mun khu amanu ngei in tua thu a gelna akipat hoipen a genchiet thei ahi:—
GSAM 301.4“Pasian thu khu miel a khum pen lungsim nangawn tanvah dingin a hun a, a theichien nuomna neilou hilou koipou in a theichien thei hi. Hinanleh tua zousie um zing napiin, Pasian thu ka zil uhi chi a kiphuong mi kimkhat in a thuhilna chienpen nangawn dou in a hing uh chi akimu hi. Tuachi a pasalte leh numeite khu kiselna ding nei lou a a um theina dingun, Pasian in Theipina chien leh tumtahte a pie a, a zui lou a a nusiat ua thu lamah a puikia hi.
GSAM 302.1“Pasian thu ah hindan dihtah ngaina bawlna ding thubulpi tampi a um hi. Taangpi leh mimal a ding Theipinate khu tam thubulpite lang a tuomdeu a a lungsim uh hei dingin a kigong ahi.... Noute Laisiengthou toh na kithuoh sih uhi. Laisiengthou tehna tung a tung ding leh Khristian pichinna tung a tung nuomna toh Pasian thu khu na zilna uh hi hileh, Theipinate na mamoh sih ding uhi....
GSAM 302.2“Mangpa in Theipina kipete zangin noute hing vauhil ding, hing dem ding, hing thuhil ding leh, a thu thutah a thupidan na lungsim ua nga ding a tup ahi. Theipina kigielte khu vah tha pe dingin ahi sih a, kilangsahsa Pasian hukhumsana thutahte lungtang ah chientah a nga dingin ahi zaw hi.... Thutah belap a kipawtdoh sih a, hinanleh Pasian in Theipinate zangin thutah thupi a piehsa te a subai a, ama tel ngei lampi a mite masangah ahing tut a, tuate in a lungsim uh a thoudoh leh a luodim theina dingin ahi; mi zousie kiselna ding nei lou a a um theina dingun ahi....
GSAM 302.3“Theipinate khu Pasian thu neusimsah dingin ahi sih a, pahtawi ding leh mite lungsim tua lamah kai dingin ahi zaw hi; thutah a mawldan leh a hoidan in mi zousie lungsim a luodim theina dingin ahi.... Tu a Pasian gou tuomtuom kahi chi a kiphuong mipite in a thu sunga a thupiehte uh a zui uleh, a bawl ding uh thei dinga a phong ding leh, a khelna uh leh Pasian thu zui lou a a um ua lauhuaina a thupidan a lungsim ua nga dingin Theipina tuomte a kipie sih ding hi.”7
GSAM 302Thukhun Nina—Guolnei Dihtahte
GSAM 302.4Guolnei dihtah zousie in Pasian dan leh a thu Theipina toh kituoh a thu a gen ding uh ahi chi i zil zouta hi. Sawlchah Johan in guolnei dihtahte thuhilna genchietna ding thukhun dang ahing pie hi. Aman: “Ka itte aw, hagau chinteng gingta sih unlen, hagau te Pasian akipat ahi uh ahisih uh chi ze-et un; guolnei tahlou tampi leitung ah a pawtdoh zouta ziehun ahi. Tam bangin Pasian Hagau na thei ding uhi: Jesu Khrist tahsa in a hing pei ta hi chi a phuong hagau chinteng Pasian akipat ahi; Jesu Khrist tahsa in a hing pei ta hi chi a phuong lou hagau chinteng Pasian akipat ahi sih hi. Tua khu Khrist doupa hagau ahi, a hing pei ding thu na zahsa uh khu; tuin nangawn leitung ah a um zouta hi.” achi hi.8
GSAM 303.1A tunga Laisiengthou thu pilvangtah in en un. Jesu Khrist “tahsa in ana hing pei khinta” chi a phuong koipou achi sih a, “tahsa in a hing pei ta” achi zaw hi; tua khu i ginna dawnna in a Hagau zang a hing pei a, i sung ua a teen ahi. Tam khu Khantanhoi thubulpi dihtah ahi: “Noute sunga Khrist, loupina kinepna khu.”9
GSAM 303.2Pi White laigiel zousie sunga niteng hinna a i zui ding thupi khu, van lampi a i khantou ding leh i sung ua teen Hundampa Khrist i mamoh hi chi ahi. A laigielte in achiil, atawp leh hun chinteng ah Khrist i mamoh hi chi a hil hi. Tam thu etsahna dingin a laibu Khrist Kung Zuon Kengkalte khu en ding ihi. Tu a namkhiet a um gammang ham 18 a a laibu sang tamtahte gen louin, Sap ham bek a a laibu 100,000 val kizuakhie zouta hi. Presbyterian thugenpa khat in tua laibu a sim zouin, a hattuom mite leh a lawmte a dingin laibu 300 val a chah a, “Tam laibu khu Mangpa Jesu Khrist toh kithuoh mahmah mi khat giel ahi,” achi hi.
GSAM 303Thukhun Thumna—Guolnei Tahloute
GSAM 303.3Johan in guolnei tahloute theidanna ding thukhun ahing pie hi: “Amaute leitung a mite ahi uh; tuaziehin leitung thu a gen ua, leitung in a thu uh a ngaikhe hi.”10 Guolnei tahloute thuhilna in eima kinial leh kros puo lampi pahtawi sangin, tahsa deilam lungsim a lungkimsah ding hi. Guolnei tahloute in “Israelte Misiengthou” pahtawi sangin “thu nuomzakte” a hil ding uhi.11 Pi White laigielte laimai tawmcha nangawn a sim koipou in tua laigielte khu eima kinial leh kros puona lampi a hi a, leitung ngaina, tahsa deilam lungsim lungkimsah ding bang ahi sih chi a mu thei hi.
GSAM 304Thukhun Lina—Gimthuohna leh Thuohhatna
GSAM 304.1Tam thu a i suizop semsemna ah, thukhun lina dingin sawlchah Jakob thute i la ding hi: “Ka unaute aw, Mangpa min a thu gen guolneite khu gimthuohna leh thuohhatna etsahna dingin la un.”12 Tua tanglai guolneite silthuohte i sim chiengin, a ze-etna uh alienpen khat khu a kung ua Theipina chientah a kipete Israelte in a nial uh, ahisihleh a dou uh, a mu uh ahi chi i zil hi. Tua hunte tomcha a i zil leh, guolnei dihtah leh guolnei tahloute a nihgel ua hindan a hing kilang pah ding hi. “Sepai honte Mangpa in tambangin agen hi, Na kung ua thu genlawh guolneite thute ngaikhe sih un; amauten bangmalou a na um dingun a hing bawl uh; Mangpa kam akipat thu ahi sih a, amauh lungtang a Mengmuna a gen uh ahi.”13
GSAM 304.2Pi White laigielte sungah a simtu khu bangmalou a umsah ding bangma a um sih hi. Mi dang khat in a gen bangin, “Theipinate akipat kisim zou lou ding zah veivei hagau lam phattuomna thupi ka tang hi. A tahtah in, tuate ka sim chieng tengin Pasian a ka ginna a tawm zieh, ka kipiehkhietna a tawm zieh leh, hagau hundam ding a ka lunglutna a tawm zieh in ka kidem lou ngai sih hi,” achi hi. Tuaziehin Pi White Theipinate a gahsuoh khu Jeremiah in a gen guolnei tahloute thuhilna gahsuoh toh a kibang lou mahmah ahi ngeingei hi.
GSAM 304.3Guolnei in guolnei tahloute a thuhil ding dan zong ahing hil hi: “Kei hing musitte kungah, Mangpa in, Noute hamuonna na nei ding uhi achi hi, chiin a gen zing uhi; tualeh amauh lungtang ngaituona zui a vah mi chinteng kungah, Silhoilou na tung uah a tung sih ding hi, a chi uhi.”14
GSAM 304.4Pi White in a Theipinate sunga a thuhilna umdan toh kisaiin, pilvangtah a a simtu khat thute anuoi ah ka lasuon ding hi:
GSAM 304.4“A Theipinate zousie abul akipat atawp dongin ka sim suoh a, a tamzaw veivei ka sim kia hi. A zousie sungah umdan hoilou thu khat nangawn, ahisihleh siengthou dihtah leh Khristian toh kituoh lou sil bangmah ka mu ngai sih hi; mi koima Laisiengthou akipat ahisihleh Khrist akipat a pui mang ding sil a um sih hi. Hinanleh tua sungah Pasian thu mang ding, Jesu it ding, Laisiengthou gingta ding leh, tatlou a sui ding thu a nasapen a ngetna ka mu hi. Pasian toh tuazah a kinaina, tuabang a lunglut kipiehkhietna, hinna siengthou a hing ding thu zahhuoitah a ngetnate khu Pasian Hagau chilou in a phongthei sih ding hi.”
GSAM 305.1Achiil akipat a Theipinate pilvangtah a enchien mi khat in tambangin agiel hi:
GSAM 305.1“Zau lou leh deituom nei lou a chien leh ginumtah a vaihawmna thu ah, a kisapna bangmah a um sih chi theipi ka nuom hi. Tam nasep a puitu thahatna khu lungsim nien leh gilou hina hileh, enchienna Theipinate leh ginumtah a demnate tangah pahtawisiet thute a dim ding hi. Thu chientah a genna, sietna tungah ginumtah a demnate, Hundampa a mamoh dan a kimu a ling hagau te leh, amauh khelhnate nuoihkiet nuom a lungnemtah a suitu mi khielte kungah lainatna leh hanthawna thute,—tam silte khu amanu nasepte a atamzaw ahi uhi. Pi White in Mengmuna a a mu mi tampite sietnate demna a Theipina khu ginumtah in a puong a, a gahsuohte ahoi penpen ahi.”15
GSAM 305Thukhun Ngana—Genlawhna Dihtahte A Tangtung Hi
GSAM 305.2Guolnei dihtah leh guolnei tahloute toh kisaiin Mosi thugen khat Danpiehnina bung 18 sungah a um hi. Aman: “Mangpa in a genlou thu khu bangchin i thei ding ihi ei? Guolnei khat in Mangpa min a thu a gen a, tua thu a hing suoh sih a, a tangtung zong a tangtung sih leh, tua khu Mangpa in a genlou thu ahi; guolnei in uangtah a a gen ahi zaw hi; ama na zau ding ahi sih hi.” achi hi.16
GSAM 305.3Tam thu ma anuoi a Laisiengthou thute ah zong a um hi: “Mangpa in thu a piehloupi a, thu gen a, a tangtungsah thei koi ahiei?”17 Guolnei Samuel tungtang ah, “A thugen zousie a tangtung ngeingei hi” akichi hi.18 “Guolnei thugen a tangtun chiengin, tua guolnei khu Mangpa in a sawl dihtah ahi chi thei a hi ding hi.”19
GSAM 306.1Tam laigielpa in Pi E. G. White guolnei Mengmuna sungah a um ka mu masah a kipat tuin kum 53 val a hita hi. Tam kumte sungin amanu in sil hing tung dingte toh kisai genlawhna thu tampi agen hi. Tua genlawhnate kimkhat sil tangtung zoutate toh a kisai a, kimkhat a tangtung zing lai ahi ua, adangte bel tun na ding ahi nalai uhi. Abeisa leh tu a sil umte toh kisai genlawhnate ah, a tangtung lou khat nangawn ka thei sih hi. A genlawhnate kimkhat i gen zouta hi. I thugenna i zop semsem chiengin a nuazui bungte ah adangte a hing kilang ding hi.
GSAM 306Thukhun Guhna—Sil Lamdangte Khu Guolnei Dihtah Ze-etna Ahi Sih Hi
GSAM 306.2Pasian thu laigieltu tampite in, guolnei dihtah chiemtena khu sil lamdang bawlna ahi chi a det a, Laisiengthou hilchietnate sungah zong a gen uhi. Tam bang thukhun khu Laisiengthou akipat i zil nailou hi.
GSAM 306.3Sil lamdang bawlna khu guolnei dihtah theina ahi leh, Kihilna 19:20 a “guolnei tahlou” a kigen khu guolnei dihtah chia gen a hi ngeingei ding hi; aziehpen, “Gamsa khu manin a um a, a masanga sil lamdangte bawl guolnei tahlou zong ama toh manin a um hi; tua sil lamdangte zangin Gamsa chiemtena tangte a sol hi” akichi hi. Tua thahatna thu ma Kihilna 13:14 ah zong agen kia a, “gamsa masanga a bawl thei sil lamdangte zangin leitunga tengte a sol hi” achi hi. Tam thukhun mah tuabang a i zah leh, Setan nangawn guolnei dihtah ahi chi thu a i tun a kul ding hi. Gawtna nunung sagihte lah a aguhna nuoi a nasep tuom sem ding hagau koite ahiei khu, “dawite hagau, sil lamdangte bawlte ahi ua, Bangkimhihthei Pasian ni thupi a kidouna dingin amaute kaikhawm tum a leitung leh khuo vannuoi pumpi a leengte kungah a pawtdoh uh ahi” akichi hi.20
GSAM 306.4Guolnei dihtah ahina theina khu Mengmuna sunga a um lou hun a a sil lamdang bawlte ah i mu ding ahi leh, Laisiengthou guolneite lahah tua ze-etna a zou mi tawmcha bep i mu ding hi, a nasepte uh thu kigiel dungzui a thutanna a hi leh a tawm deusem ding hi. Guolnei kimkhat in sil lamdangte a bawl uh thu kigiel a um tahtah hi, Elijah, Elisha leh Paul bangte ahi uhi. Hinanleh Isai, Jeremiah, Daniel, Hosea, Joel, Amos leh adangte sil lamdang bawlna thu kigiel Laisiengthou sungah koiin amu kha ei? Hinanleh amaute Mangpa guolnei dihtahte ahi ua, guolnei dihtah ze-etna ding Mangpa pieh thukhunte in amaute tuabang ahi uh chi a ensah hi.
GSAM 307.1Sil lamdang bawlna khu guolnei dihtah ze-etna ahi sih hi chi Baptispa Johan tungtang a Laisiengthou thute i sim chiengin chientah a akimu hi. A pa Zakaria in a kunga hing pien ding tapa thu ah Pasian in a kunga a pieh Mengmuna a genna a a thugenlawh in, Johan khu guolnei ahi chi a ensah hi: “Tualeh nang, naungeh aw, Tungnungpen guolnei chiin a hing han ding uhi; aziehpen a lampite bawl dingin Mangpa masangah na pei ding hi.”21 I Hundampa ngei in zong Johan khu a masanga lampi bawl ding tua guolnei ma ahi chi a theipi hi; aziehpen Johan thu ah aman: “Hinanleh bang mu dingin na pawtdoh uh ahiei? Guolnei khat ahiei? Ahi, na kung uah ka gen ahi, guolnei sangin a thupi zaw mama hi. Tami khu, Ngai in, na masangah ka tangkou ka sawl a, aman na masangah na lampi a bawl ding hi, chi a kigielpa ahi. Aziehpen na kung uah ka gen ahi, numeite a piengte lahah Baptispa Johan sang a guolnei thupi zaw a um sih hi, hilou amah?” achi hi.22
GSAM 307.2Tua hiin, Hundampa in Johan khu guolnei ahi chi chientah in agen hi. Sil lamdang bawlna ze-etna khu zang in a gahsuoh en vaiin. Khantanhoi genpa Johan in a giel Khantanhoi sungah tam thute i mu hi: “Mi tampite ama [Khrist] kungah a hing pei ua, Johan in sil lamdang khat nangawn a bawl sih hi; hinanleh Johan in tami thu a gen zousie a dihtah ahi, a chi uhi.”23 Tam thugen khat bek nangawn in, guolnei dihtah chiemtena khu sil lamdang bawlna ahi chi a genna a nial zou sieng hi.
GSAM 307.3Danpiehnina 13:1-3 a kipie tam thukhun, tu i simkhietna ah thukhun guhna i chi khu, sil lamdang ahisihleh silbawltheina tuom a kibawl khatpeuh khu Mangpa toh kinai semsemna lam ahiei, ahisihleh ama akipat khenmangna lam ahiei chi i enchien masah loupi a a nua i delh pah lou nadingin ahi. Tam thu in thukhunte zousie zang ding, a tuomin Pasian leh a dan toh a kituoh ahiei chi en dingin eite ahing hil ahi.
GSAM 308.1Tam thukhun guhna in, mi lem khat in sil lamdang a bawl leh, pilvangtah a i ze-et chiengin, tua toh Pasian thu a thutah siengthoute akipat pialmangna leh, eima kinialna lampi zui lou nuom lungsim toh kituoh ding a tehna suhnemna a kilang ding hi chi ahing hil hi. Mangpa in tuabang mi lem a hing pawtdoh a phal a, a gamtatna khu Pasian ta dihtah a dingin ze-etna a hi hi; tua sil lamdang bawlpa a lamzuon leh a lungsim tup pilvangtah a teh ding hun ahing pie hi. Pasian thu len kipte khu sil lamdang bawltu tahlou in a sol louin, tua silthuohna a gahsuoh in Pasian ah a hing hat semsem uhi.
GSAM 308.2Tam ni giloute ah mi tampite “ginna a suhdamtu,” “Pasian thahatna a suhdamtu,” “Khristian Theina a suhdamtu,” leh adangte kahi chiin a kiphuong uhi. Laisiengthou thukhunte dettah a i zah ahoi ding hi; aziehpen tam “suhdamtute” kimkhat a nasep uh a pildan mahmah ziehin, a lungtup leh a thiltup uh chientah a i theina dingin Pasian thukhunte leh Hagau Siengthou tanvahna i mamoh ding hi. A langkhat ah bel Pasian dan leh tam hun a a thutah ngaihsah lou a kihouphuong mite a um uhi. Hun kimkhat ah tam “suhdamtu” a kilemte khu, Pasian dan thu gen khat nangawn ah, mi haithat lungsim dimte bangin a lungthah uhi. Mangpa in a dan siengthou puongzahna Thupuoh a nei ngeingei bangmahin, a dan gensie a, tua thu gen bek mite nangawn a masang ua pat a notkhiete khu Hagau Siengthou thoudohsahna neilou mite ahi ngeingei uhi.
GSAM 308Thukhun Sagihna—A Ga Uh
GSAM 308.3“Belam puon sil a na kung ua hing pei, hinanleh a sung uah ngia gongsante ahi, guolnei tahloute lahah pilvang un. A ga un amaute na thei ding uhi. Miten lingkung akipat grep a lo uh ahiei, ahisihleh linglou akipat theipi a lo uh ahiei? Tuabangmahin singkung hoi chinteng in ga hoi a suong a, hinanleh singkung sie in ga sie a suong hi. Singkung hoi in ga sie a suong thei sih a, singkung sie in zong ga hoi a suong thei sih hi. Ga hoi suonglou singkung chinteng a phuh ua, meilah ah a pai uh hi. Tuaziehin amaute a ga un na thei ding uhi.”24
GSAM 309.1I Hundampa tam thute in Khantanhoi hun ah Thugentheina silpieh a um ding thu a theipi hi. Nasep toh guolnei dihtah khat nangawn a kizop sih dinga, genlawhna kilahna zousie a gilou akipat hi ding hina leh, “Guolneite lahah pilvang un” a chi lou ding ahiei? A chi tuomtuom bangchi a thei thei ding chi eite a hing hil chientah khu, Hamuonpa, Hagau Siengthou in “sil hing tung dingte” a ensahna (Johan 16:13) a nasep sungah Thugentheina silpieh dihtah a um ding ahi chi a theipina hoi pen ahi. Tam thukhun, i simkhietna a thukhun sagihna i chi khu, khellou ahi. Khrist in a ga un amaute na thei thei maithei ding uhi, a chi sih a; chientahin “Amaute a ga un na thei ding uhi” achi hi.
GSAM 309.2Pasian Hagau silpieh dihtahte nasep sungah i mu ding ga khu bang ahiei, chiin i dong hi. A dawnna khu Mangpa in hattuom sungah silpiehte a koina a lungtup tungtang Paul thugenna ah i mu hi: “Tuaziehin Aman a chi hi, Aman tunglam ah a kaltou laiin, suongkul tangte sal in a pui a, mihingte kungah silpiehte a pie hi.... Tualeh aman mi kimkhat sawlchah dingin, kimkhat guolnei dingin, kimkhat Khantanhoi tangkou dingin, kimkhat hattuom chawmtu leh thuhiltu dingin apie hi; misiengthoute a pichingsah ding leh, nasepna nna a sep ding leh, Khrist tahsa a tundoh dingin; eite zousie ginna leh Pasian Tapa theina ah pumkhat i hin [“pumkhatna ah i lut,” a pang a kigiel], mi piching i suoh a, Khrist bukimna pichinna tehna tan i tun masangsiein ahi.”25
GSAM 309.3Tam thukhun khu Vansawlsieng thumna thupuoh a kipatna akipat tua toh kizom Thugentheina silpieh tungah zang lehang, bang gahsuoh i mu ding ihi ei?—Pi White zang a thuhilna kipie zing khu pumkhatna leh kituohna lam ahi chi i mu hi. “Thugen khawm un” leh “kinai khawm un,” Khrist toh kituoh un, chiin a hanthawn hi; tuachi a dihtah a kipawlkhawmna leh khat leh khat pumkhatna a kip umsah hi.
GSAM 310.1Tam nasep dou mi kimkhat in engbawlin, “Na lah ua um Pi White Mengmunate hilou hileh, na nasepna uh a sawt peh a kehthang zouta ding hi,” a chi uhi. A dawnna ah, “Tua a dihtah hi; aziehpen tua akipat Mangpa in thuhilna, pilvanna leh vah a pie a, tuachi a kinielnate a kimang a, nasep a khangtou hi,” akichi hi. Tuaziehin silpieh do nading a a tup uh khu, a tahtah in a ga khu Thugentheina silpieh dihtah ga ahi chi theipina a suoh hi.
GSAM 310.2Kum 60 leh a val sungin Pi White zang a Thugentheina silpieh kilahnate tam thukhun sagihte a ze-et a hita a, a khen chinteng ah genlawhna dihtah a dinga a kulte a tangtungsah hi.
Notes
- Ephesa 4:11-13. ↩
- Joel 2:28, 29. ↩
- 1 Thessalonika 5:20, 21. ↩
- Kihilna 16:14. ↩
- Isai 8:16-20. ↩
- Thugenpa 9:6, 5. ↩
- Hattuom a Ding Theipinate, bu 5, laimai 663-667. ↩
- 1 Johan 4:1-3. ↩
- Ephesa 3:17; Kolossa 1:27. ↩
- 1 Johan 4:5. ↩
- Isai 30:10, 11. ↩
- Jakob 5:10. ↩
- Jeremiah 23:16. ↩
- Tang 17. ↩
- J. N. Andrews, 1867 kum, ha 12-na a Ettha Kiana leh Tangkou sungah. ↩
- Danpiehnina 18:21, 22. ↩
- Kaala 3:37. ↩
- 1 Samuel 9:6. ↩
- Jeremiah 28:9. ↩
- Kihilna 16:14. ↩
- Luk 1:76. ↩
- Luk 7:26-28. ↩
- Johan 10:41. ↩
- Mathiu 7:15-20. ↩
- Ephesa 4:8-13. ↩