Bung 27 — Theipina Dangte Kipsahna
GSAM 442.1“Jehoshaphat adinga, Juda leh Jerusalem a tengte aw, ka thu ngai un; na Mangpa Pasian uh ging un, tuachi'n na kip ding uhi; a guolneite ging un, tuachi'n na lamzang ding uhi, achi hi.”1
GSAM 442.2Kum tampi masangin Thugentheina silpieh tungtawnin theipina khat a kipie a, tawpna hun matungin tam thutah namkhiet laiphekte khu “favang singnahte bangin a kithezak ding” achi hi. Thutah ging mite nasep dingin bangbang ahiei a kipawlkhawmna leh kiguotna a neilou ua leh, tam sil bangchin a tangtung thei diei, chi khu mi tampite lungsunga dotna ahi hi. Pasian vaihawmna ah, kipatna neu mama akipat sil thupi tampi a tangtung zel hi; i lah ua hing piang nasepdan kiguotna zong tuabangmah ahi hi.
GSAM 442Laibu Neu leh Khantanhoi Puozah Pawl
GSAM 442.31870 kum velin, Massachusetts gamsunga South Lancaster a Pasian kunga kipie unau numei tawmkhatte nasep akipatin Laibu Neu leh Khantanhoi Puozah Pawl bawl ding ngaihtuona a hing kipan hi. Tam unau numeite'n hun khat sung i ginna pualama mi tuomtuomte kungah i hattuom laite leh laibu neute lai tawihna tungtawnin a sawl ua, tua zouin amaute kungah lai a gel uhi. Tuaziehin mi bangzah ahiei in thutah a pom ua, tua khu Upa S. N. Haskell lungsungah, “Unau numei tawmkhatte'n a sepsa bang, i mite zousie'n bang dinga sep theilou ding ihi uoi?” chi dotna a piangsah hi. Adiehin 1871 kum sungin, tam thu khu Ettha Kiana leh Tangkou laisunga tawm ahiei tampi ahiei in a kigen hi. 1871 kum, ha 12 ni 29 a Hattuom Khawmpi Lienpi kikhopna tuom a kibawlah, Upa Haskell a um a, tam kalsuonna in a tahbah a phattuomdan a genchien zouin, laibu neu pawlte phut ding deihna thu a pom uhi. Tuabang pawlte phutna ding guotnate kimtah a bawl dingin Upate S. N. Haskell, W. H. Littlejohn, J. N. Andrews, J. H. Waggoner leh I. D. Van Horn khu tua guotnate bawl ding vaihawm pawl khat din a guot uhi.
GSAM 443.1Tam kalsuonna in Thupuoh nasep zawmna ah hun tha khat a hon hi. Tua matengin thutah hilna khu a hinglai thugenpa a tah ngei nasep ah dehtahin a kinga hi. Kum tampi sung Upa Haskell in Laibu Neu leh Khantanhoi Puozah Pawl lamzanna ding guotnate zil leh puohdohna ah hahpatahin na a sep hi. Tua nasepdan ah ama khu a patkhetu tah ahi, chi khu ama tungah a dihtah genna ahi hi. Gamke sunga Laibu Neu leh Khantanhoi Puozah Pawlte thu ah bek hilouin, 1878 kuma Battle Creek a Hattuom Khawmpi Lienpi kikhawmah a huopzau Laibu Neu Pawl khat phut ding guotna a puohdohpa zong ama ahi hi; tua pawl khu a nuaipi in Nam Chin Pawl chi a kiminvawh ahi hi. A nasepna gam khu i Gamke sung hattuomte khawmpi huongsung pualamte ahi a, America bek hilouin, gam dangte zong a huop hi.
GSAM 443Na Sem Siam Laigelpite—Maria Huntley
GSAM 443.2Mangpa'n a vaihawmna ah na sem siam laigelpite a piangsah a, tam kalsuonna ah amaute khu Upa Haskell panpitu thupite ahi uhi. Unaunu Maria Huntley khu a nung kumte ah tahsa natna nasatah a thuoh lai nangawnin, a kisam vialou a na sem zingte lah a khat ahi a, kum sawm leh li vel masangin a nasepna mun ah a shita hi. A nasepna ziehin gam dangte a tulaia nasepna ding kot kihong tampite khu a masapenin a kimudoh hi. Laigelpi dangte zong tua nasepmahmah ah a pangkhawm ua, nasepna gam a zau semsem ziehin ham tuomtuom a laigelpite a kisamta hi.
GSAM 444Mun Chin Hattuomte Tunga A Phattuomna
GSAM 444.1Hinanleh i lah ua laibu neu pawl nasep a kiphutna phatuomna thupipen khu mun chin Hattuom kipawlkhawmnate sunga khantanhoi nasep utna piangsah leh khangsahna ahi hi. Mi chinin lai kigelna leh sim ding laite hawmzakna a sil khat peuh sepna ding hunlem a nei a, hagau hundamna dinga a tah ngei a nasep kipahna leh thahouna a thei theita hi.
GSAM 444Laibu Neu Nasep Toh Kisai Theipina
GSAM 444.2Laibu neu leh khantanhoi nasep thu ah Thugentheina Hagau tungtawn a thuhilna kipie umdan etsah dingin, Hattuom a Ding Theipinate nombat 29 leh 30 akipatin tamte i lakhe hi:—
GSAM 444.3“Nasep khat khu a dang sang a thupizaw a um leh, i namkhiet laite mipite kungah tunsah a, tuabang a Laisiengthou sui dinga puihuoina ahi hi. Khantanhoi nasep—insungte kungah i namkhiet laite puoh lutna, amaute toh kihoulimna, amaute toh leh amaute a dinga thumna—khu nasep hoi ahi a, pasalte leh numeite hattuom kem nasep sem ding a zilsahtu zong ahi hi.
GSAM 444.4“Tam nasep dingin mi chinin a kilawm sih hi. Theina leh hih theina hoipen neite, hechien leh guotlawhtah a nasep pat a, thahatna leh thuohhatna toh a masawnpite khu a tel ding ahi uhi. Kimtah a kiguot guotna khat a um ding ahi a, tua khu ginumtahin a zui ding ahi hi. Mun chin a hattuomte'n laibu neu leh khantanhoi nasep ah deihsakna thupitah a nei ding ahi uhi.”
GSAM 444.5“Laibu neu leh khantanhoi nasep khu nasep hoi ahi hi. Pasian nasep ahi hi. Bang chinchin in zong a neusim ding ahi sih hi; hinanleh a tupna dihtah akipat a pialkhietna ding lauhuaina a um zing hi. Khantanhoi nasepna gam a na sem ding Khuo chin a laibu zuamite a kisam hi. Gamtat siemlou mite tam nasep dingin a kilawm sih uhi. Mi toh kizepdan siam, pauhoi, masang sil hawl mu siam leh thu khenthei lungsim nei, hagau manphatna thei pasalte leh numeite khu a lamzang theite ahi uhi.”
GSAM 445.1Kum sawm leh ni sungin i hattuomte leh Khuo chin a laibu zuamite'n $8,000,000 sang tamzaw man laibute, laibu neute leh laiphekte a zuakhietna khu, Laibu Neu leh Khantanhoi Puozah Pawl nasep a tahbah a phattuomna etsahna thupi ahi hi.
GSAM 445Genlawhna leh Leilung Pilna
GSAM 445.2Europe gamsunga nasep toh kisaiin genlawhna thu khat a kipie a, tua khu a thu bangtahin a tangtung zing ziehin tam munah a gen ding a kilawm hi. Nasemte leh mipite'n America a bangin tua gam ah, adiehin Scandinavia ah, nasep a zawm thei sih ding, achi uhi. Amaute lametna sangin tuom deuhin Pi White in tua mun ah lamzangtah a nasep a zawm thei bek hilouin, America a a kibawl bangmahin sum lam a zong a kisuh hat thei ding achi hi. Amaute'n a sumbat tawmcha uh akipat nangawnin a Sawma khat uh pe ding a pan a la ua leh, Pasian in a lamet sang ua lamdang tah a amaute a vualzawl ding, chi Mangpa'n ama anu a etsah ahi, achi hi. Khuo chin a laibu zuamite'n Scandinavia ah laibu lei dinga mi min gelkhumsa danin laibute a zuathei ding ua, tua a lamzang ding ahi, chi'n zong a va hil hi. Tua gamte a Laibu namkhietna inn vaihawmtute'n, “A hih thei sih ding,” “Tuabangin laibu ka zuakha ngei sih uhi,” achi uhi. A nung a sil hing umte'n, tam thu ah Mangpa vansawlsieng in ama anu a etsah khu leilung laibu zuate leh laibu namkhetute pilna sangin a hoizaw mama, chi a etsah hi. Tua muna laibu zuak nasep khu a pattil akipatin a lamzang hi. A sumbat tawmcha uh Sawma khat Pasian nasepna a pe dinga pan late pawlkhat khu Khuo chin a laibu zuamite a hing hita ua, amau leh amau a kihal thei bek hilouin, a masang ua sangin sum a muzaw ua, tuaziehin Sawma khat tamzaw pe thei a hing hita uhi.
GSAM 445.3Norway gama Christiana a i Laibu namkhietna inn a kinamkhiet laibute khu 1895 kumin Khuo chin a laibu zuamite'n $40,000 sang tamzaw man a zuak uhi. Tam khu genlawhna dang khat tangtunna hi a chiemteh un; hattuom sung leh pualam, lam chin akipatin a hih thei sih ding chi a nialna tampi a um laiin nangawn a tangtung hi.
GSAM 445.41871 kum leh tua nung a kiphut laibu neu pawlte nasep toh kisaiin, tuabang nasemte hahpatna zieh a thutah a puilutte khu, thugenpite a tah ngei nasepna zieh a hing lutte toh a zahzah dehtah ahi uhi, chi ngam a thei hi. Tam nasep tungtawnin Thupuoh khu leitung nam chin leh ham chin kungah a kiphuongkhie zing hi.
GSAM 446Kisilh Bawlnate leh Laibu Neu Nasep
GSAM 446.11873 kum, ha 4 in California a Laibu Neu leh Khantanhoi Puozah Pawl in thuthang ngaihvenhuoi khat a gen hi. Tua ni matenga tua gamke sunga thutah pomte'n pawl kunga a pieh uh kisilh bawlnate khu, a suitui ua, a siensuona a et ua, asunga sanate leh dangkate a man tah bangin $200 in a zuakta uhi. Tua sum zousie khu laiphekte, laibu neute leh hunbi a suoh laite leina ah a zang ua, tuate a hawmzak uhi. Kisilh bawlnate zuakna suma kilei laite tungtawnin mi sawmni in thutah a pomta uhi, chi pawl in a hechien zouta hi. Lai simna zieh a thutah he hing hite lah ah California, Oakland a John I. Tay zong a pang hi.
GSAM 446San Francisco Khantanhoi Nasepna Mun
GSAM 446.21875 kumin San Francisco hattuom kungah theipina thupi khat a kipie hi. Tua khu a tangtungdan a chien mama ziehin tuin i ngaihven ding ahi hi. Tam hattuom khu a pattil akipatin biehna dingin kikhopna inn a luoh a ngai hi. Tua zong a man tam a, a haksatna pawlkhat a um hi; aziehpen tua innte khu hun tamzaw ah sil dang a zat a ngai ziehin, tuate ah kikhopna kizomzom a bawl thei sih uhi.
GSAM 446.31875 kum, ha 4 ni 14 leh ni 20 nitahte in San Francisco hattuom a puitu mite khu Market Lam gei, Fifth Lam a Pi J. L. James innah a koukhawm uhi. Tua munah Pi White in tua umdan toh kisai Mengmuna a ama anu a kietsah khu ka kung uah ahing gen hi. San Francisco khu khantanhoi nasepna mun zing ding, tua mun ah na a sep thei zing ding ahi a, pilvangtah a a kibawl leh, hagau neite'n thutah a pom paisuoh ding uhi, achi hi. Mipite sap theina leh na sep theina biehinn khat a kilam leh, a mi zah uh ah hagau dangte a hing belap ding ua, amaute'n zong a chiel ua sum kisemna a huh ding ua, kikhopna inn bawlna dinga kinei ngeingei ding leiba suh bei dingin a panpi ding uhi, achi hi.
GSAM 447.1Pi White in a gen zom a, San Francisco hattuom kungah biehinn lam ding a thupidan ama anu'n a va gen hun chiengin, tua hattuom genthei adingin khu muthim sunga kal suon bang a lang ding ahi, chi a mu ahi, achi hi. Hinanleh amaute'n a pan a la ua leh, kal khat khat a masang ua Pasian vaihawmna in lampi a hon a, a tawp a leiba zousie a kisuah masangsiein a lampi zousie uh ah lawmpite a hing um ding ahi, chi gen ding a thu pieh ahi hi.
GSAM 447.2A tung a kigen kikhopnate a pang tawmkhatte lah a khat ka hih ziehin, tam thu ka gen thei hi. Tua pawl a mi dehtah zousie khu leitung a migentheite ahi ua, amaute'n keng 35 x 80 a lien kikhopna inn lam ding a pan lah ngaihtuona khu, adiehin innmun khat a nep penin $6,000 a ngai a kilatna khopi ah, a tahbahin “muthim sunga kal suon” bang ahi hi. Pi White in a kung ua a gen theipina khu Mangpa kunga kipat ahi a, a tangtung ngeingei ding ahi, chi a ginchakna kim uh zieh bekin tua pan lah dingin a lungsim uh a kithousah hi.
GSAM 447.3Tam nasep khu a kipattil akipat tulai dongin tawm ahiei tampi ahiei a ka kisai den ziehin, a tung a theipina khu a thu chinchinin a tangtungta hi, chi tam munah ka gen nuom hi. Innmun sui dinga ka pan lah un, $6,000 man mun khat khu $4,000 in ka leithei uhi. Unaunu khat in a mun a zuathei leh $1,000 a pe ding achi hi. Ama'n tua neihlehlam khu innmun zuakpi pa khutah a kawl paitah a, tua pa'n aman a tawm lua ahi, chi a hil hi. Kal ni sungin a mun khu a pattil a a man a ngaidan sangin $1,000 a tamzaw in a kizuata a, a thuchiem sum a pe zouta hi. Mi dang khat, unaupa genthei khat in, biehinn bangchin a kilam zou ding diei, chi a theichienlou hinanleh, “Mangpa'n a hih ngeingei ding ahi a chi leh, lampi bangbang ahiei a hon ding hi,” achi hi. A lamdanlouin a chinghei khat a gou kihawm zou ah, ama'n $20,000 a tang ahidan a theita hi. Ama'n inn lamna dingin $1,000 a pe a, ama tenga ding inn bawlna dingin hattuom innmun hop thum a hop khat a lei hi. Tuabangin lam ni in pawl a huh hi.
GSAM 448San Francisco a Ding Phattuomna Thupi Khat
GSAM 448.1Tuabangin vaihawmtute'n inn lam a zawm ua a muh uh silpiehna leh huhnate tampi i gen thei ding hi. Innmun toh biehinn a lamna uh ah $14,000 vel a zang ua, tua hopkhen sang tamzaw khu inn a zawh matungin silpiehnate'n a suah zou hi, chi gen a hunta hi. Inn a kilamna Laguna Lam khu laizilna ding inn tasamna khopi sung mun khat a hih ziehin, inn tung a delh matung nangawnin sang vaihawmtute'n sang hawnna dinga innnuoia pindante luoh dingin a hing pei uhi. Kum ni dehtah sung, ha khat ah $75 a luoh man a muh uh in sum pung leh nisim sum zangte a suah zou a, tuaziehin pawl in a suikhawm thei sum zousie khu a umnailai leiba suhna a zat theina ding a umsah hi.
GSAM 448Tui a Natna Bawlna Mun
GSAM 448.2Tulaiin tua hun a kinei leiba tawmcha a um nailai a, biehinn innnuoiah kisamna zousie nei tui a natna bawlna mun khat a um hi. Tua mun khu sum lam buoina neilou ahi a, a umnailai leiba sangin a man a tamzaw mama hi; tua leiba zong a sawtloin a bei ding ahi hi.
GSAM 448.3Hagau neite'n thutah a pom ding chi theipina peng khu lamdang tahin a tangtungta hi. Tua khopi ah sawmzahte bek hilouin, zate'n thutah vah a tangta ua, tuin leitung mun tuomtuom ah a kithezakta uhi. Hun khat khat a San Francisco ka vawh chiengin, a nunungpen a amaute toh ka kimu zou a thutah pom mi ni akipat sawm tan ka mu zel hi; a tawp nailou hi.
GSAM 449Upa White Shina
GSAM 449.11880 kum velin Pi White khu Thugentheina Hagau tungtawn a thuhilna a tang hi. A pasal Upa James White kungah, a puohsa lungkhamna leh mawhpuohna tampite a koih ding a, mi dang leh khangno zawte khutah a pia ding ahi; ama pen “a nunungpen kikhelna ding a kiging ding” ahi, chi gen ding ahi hi. Tua khu leitung a a taina a sawtloin a tawp ding, chi na ahi hi. Ama'n tam thuhilna a zui pan a, a zui hun a man hi; aziehpen 1881 kumin a nasepte a tawpta a, Jesu ah a ihmu ta hi. Ha 7 ni 31 in thosi pan khosih kholum natna in a man hi. Ha 8 ni 3 in a inn akipatin Battle Creek Tahsadamna Innah a pua ua, tua ah a pieh thei zousie uh kemna leh ngaihvenna a pieh uh hinanleh, a phatuom sih hi. A damlou a nasazaw semsem hi. A nat pattil akipatin a “nunungpen kikhelna” a tungta ahi, chi theina a nei hi.
GSAM 449Upa Smith Genna
GSAM 449.2Tam sil tungtang genin Upa Uriah Smith in tambangin agen hi: “A shina umdan khu tua sang a hoi zaw ding a haksa hi. A natna ni nunung thum sung, a phoh lai tapouin bangmah natna a thuoh sih ahi, chi a gen hi. Tua Khawlni sun nunglam nuom huoi ah a hinna a bei tawmteh laiin, lungsim tahtah toh a kham lawmpi tampite inn sung leh inn gei ah a ding uhi. Daihtah a ihmu bangin shina ah a tum hi; a zousie a tawp chiengin, a mai mel zousie tungah hamuonna nuom khat a cham a bang hi. Tam thumna a dawn bang ahi hi:
GSAM 449.4A shi laiin a kum sawmguh leh ni ni ahi hi. Battle Creek ah ama a zahtahdan khu ha 8 ni 13 a a vuitna ah mi sangni leh zanga sang tawm lou a umna in a etsah hi. A tawpna khawlna mun Oak Hill hankhuoh tanin sakawl kangtalai sawmkua leh nga leh khe a va zui mi tampite'n a zui uhi.
GSAM 450.1A shi zou a kigen a thupinate tampi Ettha Kiana leh Tangkou ah a kisuongte lah akipatin, Upa S. N. Haskell gel tam thu ka lakhe uhi:—
GSAM 450.2“Haksatna kintah dehtah zousie a a thukhen dihna, a kisihna chiemtena a muh chienga a khielte, ama siet a bawlte nangawn tunga a lungsim nunnemna leh a hagau hoina a etsahdan, leh a dih a a gin sil a itna te ka ngaihtuoh chiengin, Israel a pa khat a pukta hi, chi a tahtah ka gen thei hi. Ama a khawl laiin, Pasian nasep leh mi tampite'n a masang sil mu theina leh pa bang a kemna a tasamdan uh a thei ding uhi.”
GSAM 450.3A shi chiengin, i melmate'n tuin Thupuoh khu a tawp ngeingei ding ahi, achi uhi. Tuabang a hi sih hi; Pasian khut nuoi a ama'n a phut kipawlkhawmnate khu thupizaw semsema khangtou dingte ahi ua, “Mangpa'n a phut singte” bang hi a, tuate akipat a gah tam tah, a banguo tampite a hing zamkhie ding ahi hi.
GSAM 450Sahkhua Dan Bawlna Genlawhna
GSAM 450.4Vansawlsieng thumna thupuoh puozahte'n, Thupuon 13 a genlawhna bangin, Pasian thupiehte zui ziehin United States leh mun dangte ah mite a kisawmthoh ding hun a hing tung ding ahi, chi a gen ua kipatin kum sawmnga leh giet a beita hi. Pi White in a gel laibu, Laisut Masate, sungah tam thuhilna toh kisaiin tambangin i sim hi:—
GSAM 450.5“Vansawlsieng in, ‘En un!’ achi hi. Ka ngaihvenna khu migiloute, ahisihleh gingloute lamah a kihei hi. Amaute zousie a buoi mama uhi. Pasian mite laha thahou utna leh silbawltheina in amaute a thou a, a hehsah hi. Lam chinchin ah buoina, buoina a um hi. Pasian vah leh silbawltheina nei pawl dou ding a kiguotna ka mu hi. Amaute kimkot ah muthim a sah semsem hi; hinanleh Pasian pomsahna tangin, Ama muongin a dingkip uhi. Amaute a lungbuoi ka mu hi; tua nungin Pasian kungah hahpataha a kikou uh ka za hi. Sun leh zan a kikouna uh a tawp sih hi: ‘Pasian aw, na deihna tangtung hen! Na min a pahtawi thei leh, na mite adingin suotkhietna lampi bawl in! Ka kimkot ua pasian dang biehte akipatin hing suahkhie in. Amaute'n shina dingin ahing guot uhi; hinanleh na banin hundamna a puathei hi.’”2
GSAM 451.1“Tuachi'n leitung a puitu mite a vaihawmsa uh leh amaute kimkot ah Setan leh a vansawlsiengte a buoihdan ka mu hi. Lai khat ka mu a, a kibatte khu gam sung mun tuomtuom ah a kithezak hi. Tua lai in, misiengthoute'n a ginna tuom uh a nusia a, Khawlni a nusia ua, Nipikaal khat a ni masapen a tan ua louleh, hun kigontuom khat zouin mipite'n amaute a that thei ding uhi, chi thu a pie hi.”3
GSAM 451America a bawlsietna
GSAM 451.2Ei hing doudalte’n tam gamah bawlsietna a tung thei ngei sih ding hi achi uhi, aziehpen United States gam dan bulpi in, ‘Gamsung Danbawl Khawmpi in biehna khat phutna ding dan ahiei, biehna ah suohtatna a zang ding khamtu dan ahiei a bawl ding ahi sih hi,’ achi hi. Tua banah, gamke tamzawte a ‘Hamphatna Dan’ in zong biehna tungtang dan bawl a kham hi. Amaute’n tuabanga nielkal nanleh, i mite un vauhilna Thupuoh leh kidouna tuoh ding a kisahkhawl a poimawh dan a tangkou zom ngitnget uhi.
GSAM 451.31863 kum in, United States gam dan bulpi leh gamsung dante heng a, biehna ngennna a zang thei dingin pawl khat a kiphut hi. Tam ngaidan pom mite a hing pung manhlam mama a, mihingte sil dih bawl dinga ngen, adiehin Nipikaal khat a ni masapen tan dinga ngen ding ngaidan a hing hat semsem ziehin, gamke tampi ah bawlsietna a hing kipan tahzetta hi. Nipikaal khat a ni masapen dan in lungsim theipina zieh a ni dang tante a dingin hamphatna piehsa gamkete ah nangawn tuabanga a um hi; tualeh Nipikaal khat a ni masapen a tanlou ziehun mi pawlkhat suongkul ah a kikhumta uhi.
GSAM 452Man a umna 116
GSAM 452.1Ka masangah, 1878 kum a kipat 1896 kum ha 3 dong a America a Ni sagina Khawlni tan a, Khrist hing pei kia ding ngahtute man a umna 116 gualna a um hi. Amaute lah ah mi 109 mawh nei a siemtan in a um uhi. Amaute tampi ni 20 a kipat ni 60 sung suongkul ah a kikhum ua, mi 12 vel pen tuolthatte, gute leh suolbawl giloupen mite toh khainieng a kisuom a na sem dinga ngen in a um uhi. Thubuoi chiet ah, atung ua gawtna thu piehte ngel in, amaute khu gamsung mite lah a hoipen ahi uh chi, amau chiet un a phuong uhi.
GSAM 452Biehna Suohtatna Pawl
GSAM 452.21889 kum ha 7 ni 21 in Battle Creek, Michigan ah, Gamsung Biehna Suohtatna Pawl kichi pawl khat a kiphut hi. Tua pawl tupna khu biehna tungtang danbawlna dou ding, biehna leh gamsung vaihawmna kikaal a kizopna dih mite kung a theisah ding, leh lungsim theipina zieh a bawlsiet a umte panpi ding ahi hi. Tam pawl in laibute thehdalna leh i gam sung ngel a hunte a mawpawhna leh lauhuoinate mite theisiemsahna ah na tam mama a sem hi. Tahzetin, Kihilna 14:9-12 a Thupuoh sunga vauhilnate thehdalna ah na thupi a sem hi.
GSAM 452Biehna pawl toh kisailou chanchinbuite panpina
GSAM 452.3Tua hun a Ni sagina Khawlni tan a, Khrist hing pei kia ding ngahtute tunga bawlsietna nasatah a umte thu khu New York Sun, New York World, Chicago Inter Ocean leh adang chanchinbuite a laibu lamkai thugenna munte ah a hing kisuong hi. United States gam mi khat in ama lungsim theipina a zui zieh leh thupieh a kiguot ni tah a tan zieh a, atunga adihlou bawl uh thu hangsantah a gen laigielte a hing pawt hi. Tuabang chanchinbu laigielte tungtawnin, tam thu khu mi simtu nuoi sawm tamtah kungah a hing tung hi. Ha khat sungin, kum 20 val sung a i theisah zou sang ua mi tamzaw kungah Vansawlsieng thumna thupuoh a thutah bulpi a hing kitheisahta hi.
GSAM 453Mihing lungthahna in Mangpa phatna a tun
GSAM 453.1Tuabanga, Pasian nasep kham ding leh thupieh lina a kigen Khawlni nielkal ni dang khat panpi ding a dan mu na dingin mihingten a hahpan uh khu, thutah manhlam zaw a khantouna ding lampi honna a hing suoh hi.
GSAM 453.2Tam bangte tungtawn a ha tawmkhat sung a sil tangtungte i ngaituo chiengun, Laisiengthou thu ni i lungsim ah nasatahin a hing kilang hi. Khat in, “Kouten thutah nielkal dingin sil bangma ka sem thei sih ua; thutah panpi dingin bou ka sem thei uhi;” achi hi.4 Adang khat in zong, “Pellouin mihing lungthahna in Nang a hing phat ding a, lungthahna a umsun Nangman na kham ding hi.” achi hi.5
GSAM 453Nipikaal khat a ni masapen dante tungtang genlawhna
GSAM 453.31885 kum a namkhiet Theipina Bu 32 ah, United States gam a Nipikaal khat a ni masapen dante bangchi a pom a um ding hiei chi thu a um hi. Tuabangin a kigiel hi: ‘Mipi deisahna leh panpina mu dingin, danbawlten Nipikaal khat a ni masapen dan a ngenna uh a pom ding uhi.’6 Tam thu a tangtungta dan tomkhat i en ding uhi.
GSAM 453Leitung Sil Etsahna Puoi a ding danbawlna
GSAM 453.41892 kum in, tua kum ha 5 a kipat ha 10 dong a Chicago, Illinois ah bawl ding Leitung Sil Etsahna Puoi khu Nipikaal khat a ni masapen a honlou dingin Gamsung Danbawl Khawmpi kungah ngetna a kipietha hi. A tung a genlawh bang ngei a ngetna nasatah nuoi ah, 1892 kum ha 7 ni 19 in tuabang dan a kipom hi. Tam khu America Malam a United States gam Gamsung Danbawl Khawmpi in Khawlni thu a dan a bawl masapen ahi chi phawh ding ahi hi.
GSAM 453.5Hattuomten min gualna tam mama, ngetna laite leh khau a thupuoh hahte a sawl uhi. Gamsung Danbawl Khawmpi kungah a ngen giap uh hilouin, a khawmpi mite kungah ngainatahin (?) thu a theisah uhi: ‘Tam vaihawmna thukhenna a kigente chilou, Leitung Sil Etsahna Puoi a dingin panpina bangchi ahiei belap pieh ding pomna mi pie Gamsung Danbawl Khawmpi mi, Tungnung Khawmpi mi ahiei mipi aiawh ahiei, koi pouma pen tuni a kipat in, nasepmun bangbang ahiei, muonhuoina mawpawhna mun bangbang ahiei a dingin, mi pieh leh panpi ka ut nawn sih ding uh, chiin nouma leh nouma leh khat leh khat ka kichiem uhi.’ Tua vaihawmna a kigen khu, Nipikaal khat a ni masapen in Puoi kikhah ding ahi hi.
GSAM 4541892 kum a Gamsung Danbawl Khawmpi sung a thugenna
GSAM 454.1Dan ding guot a kipom laia Gamsung Danbawl Khawmpi sung a thugen dan etsahna dingin, a nuoi a thu sim un:
GSAM 454.1‘Tua nielkalna khu lai a kichientah a giel a, United States Gamsung Danbawl Khawmpi in a tut ka mu nuom hi. Giel un. Bangchi bangin na giel ding uoi? ... Na ngam uh leh kam a bawldoh un; na ngam uh leh panpi un; tua thu pomna mi piete lah ah bangzat tam mun ah hing kilekia ding uoi? Khat zong um sin chi ka kinep hi. Tua thu na dou uh ziehin nouma leh nouma lauhuoi ah na kikoih uh ahi.’
GSAM 454Hattuom kisielna
GSAM 454.2Tam dan guot pom ding a ngen a, Gamsung Danbawl Khawmpi apat a muzoute’n, biehna danbawlna a tupna uah guolzawna thupitah ahi chi a ngaisut uh a kichien hi. Aziehpen tua zawh phet in, amaute lah a thugenpa minthang khat in Pittsburg, Pennsylvania a thuhilna khat ah hichiin a gen hi:—
GSAM 454.3‘Hattuom in gamvai leh vaihawm pawl liente tungah thu a tun theina, tumasang a Leitung Sil Etsahna Puoi thu ah kichientahin a kilangsah hi. Gamsung a pawl sangpen United States Tungnung Danbawl Khawmpi in biehna aw a ngai a, hattuom in a guot banga, Nipikaal khat a ni masapen a etsahna thupitah kotpite honlou ding thu toh, Puoi a ding $5,000,000 zat ding dan guot a pom hi. Tam sil hoitah leh thupitah in, tam bang bawl thei a ahileh, tuabanga poimawh kibang na dangte zong bawl thei ding ahi chi Khristian lungsim ah a theisah hi. Hattuom in thuneina a la mu semsem ngitnget a, a peisa sangin mailam ah a aw zah a um hun tamzaw mama ding hi.’
GSAM 454.3Tuabanga 1885 kum a pieh Theipina a tangtungta dan leh a tangtung zom nalai dan i mu uhi.
GSAM 455Katholik leh Protestant kipumkhatna
GSAM 455.1Tam thu toh kizopin, 1885 kum a genlawhna dang khat, Theipina Bu 32 ah zong a um thu i gen ding uhi:—
GSAM 455.2‘Protestant biehdan in kuohawm galkhie a khut zan a Rome thuneina khut a tu chiengin; mishi hagau toh kihouna biehdan toh khut kisuina ding a kuohawm tung galkai a khut a zan chiengin; tam pawl thumte pumkhatna thuneina nuoi ah, i gam in Protestant leh mipi tel vaihawmna a dan bulpi a thugin zousie a nial a, pope zuounate leh solnate thehdalna ding vai a hawm chiengin, Setan silbawl lamdangte nasep ding hun a tungta a, tawpna a naita chi i thei ding uhi.’7
GSAM 455.3Tam genlawhna bul lam a tangtung pan tah dan etsah dingin, i kimvel ua sil umte i en giap uh a poimawh hi. Protestant thugenpate leh mite’n Katholikte deisahna sui a, a pawlna uah tel ding a a sawm dan u’leh sil dangte en un. Tu banga i muh uh, tam lam thu a silte pen, a tung a Theipina a pieh 1885 kum lai in a lim tawmkhat nangawn a kilang tasih chi phawh ding ahi hi.
GSAM 455.4Protestantte’n pope zuite khut leh panpina a sui dan etsah dingin, 1896 kum ha 3 ni 18 a Kansas City (Missouri) Star chanchinbu a thu ka la ding hi.
GSAM 455Methodistte leh Misiengthou Patrick Ni
GSAM 455.51896 kum ha 3 ni 17, Misiengthou Patrick Ni in, Kansas City a Methodist hattuom masapen thugenpa Doktor Mitchell in Kansas City, Missouri a Coates Lasa Inn ah thu a gen hi. Star chanchinbu in tua thugen sekhat khu ‘etsahna lim neu khat bang’ achi hi. Doktor Mitchell in a nuoi a thu a gen tahin mite’n nasatahin khut a beng uhi:—
GSAM 455.6‘Ngaidan dang nielkal ngitngetna khu theilouna a suoh ahi hi. I innvengte hoihtah a i theilou ziehun ngaidan dangte i nielkal ngitnget uhi. Eite Protestantte khu Katholikte tungtang a genkhieh tham lou silte gingta ding a hil i hi uhi. Katholikte zong Protestantte tungtang a genkhieh tham lou silte gingta ding a hil ahi uhi. Tuin kimunai a, khat leh khat mit a kiet a, khut a ikisui chiengun, khat leh khat tungtang a i ngaidan uh a khial dan i theidoh uhi; khat leh khat i kithei zaw uh leh, i kiit zaw ding uhi. Kikhen a ding a, gensiet i na bawl uhi. Guolzawl Khrist nuazuite a dingin zumhuoi ahi hi. Khristian zousie khu sisan mantam kibang tah a tantuahsa i hi uhi; Pasian hepina kibang tahin ei dom zing a, van kibang tah lut ding i kinep uhi. Unaute aw, tam leitungah khat leh khat i kithei masa uh a hoi zaw ding hi.’
GSAM 456.1Star chanchinbu in hichiin a gen zom hi:—
GSAM 456.2‘Tualeh Doktor Mitchell in a nunglam tah a tou Pa Dalton [Katholik siempu] lam ah a kihei a, a khut a zan a, “Unaupa Dalton, tanah ka khut a um hi,” achi hi. Pa Dalton a dingdoh a, a khut zansa a tu a, Doktor Mitchell in a khut a vuh laiin, “Leitung a khopi khat ah sawtpi i tenkhawm nua a, van a khat leh khat theisah dingin vansawlsieng khat i mamawh nalai uh leh, zumhuoi mahmah ding ahi hi. Tam leitungah i kithei masa ding uhi,” achi hi. Ngai mipite’n khut a beng ua, Pa Dalton a tou suh nua in Doktor Mitchell in a thugen a gen zom hi.’
GSAM 456Thupitah leh thukhenna tun ding sil khat
GSAM 456.3Melbourne, Australia, 1892 kum ha 2 ni 18 chi ni guot laithot dang khat apat thu i la uhi:
GSAM 456.3‘Van pumpi in sil tungte a kithehkhie dan a en ngitnget bangin ka kungah etsah in a um hi. Leitung a Pasian vaihawmna thu a kidouna thupitah leh sau mama sungah, hun hahsa khat a hing kilang ding hi. Sil thupi leh thukhenna tun ding khat a tung ding a, tua zong manhlam mama in ahi ding hi.’
GSAM 456Thukhenpa Brewer a ‘Khristian gam’
GSAM 456.4Tam lai a kigiel ni 11 nua a, United States gam a tung nailouin, Protestant leh Katholikte’n tam gam mailam khensatna ahi a achi uh sil khat a tung hi. Ka gen khu, ha 2 ni 29 a Thukhenpa Ulienpen Brewer in pieh, United States Thukhenna Inn Sangpen a, ‘Tam khu Khristian gam ahi hi,’ chi thukhenna ahi hi. Gen masa bangin, tua kum ha 7 ni 19 in, Leitung Sil Etsahna Puoi khu Nipikaal khat a ni masapen a kikhah ding dan guot a kipom hi. Tua dan pom ding a hahpan taha ngen thugenpate’n, Thukhenna Inn Sangpen in tam khu Khristian gam ahi a achi tah ziehin, Khristian Khawlni pen suhbualna apat humbit ding a kilawm ahi hi chiin nasatahin a ngen uhi. Gamsung Kisiemphatna Pawl in zong tuabanga a ngaituo uhi. Tam khu Khristian gam ahi ziehin, vaihawmna suongphum dingin Pasian leh a dante a pom ding ahi hi, leh thu dangte a gen uhi. Tam tawpna lam kidouna ah sil thupitah leh thukhenna tun ding khat a tung tahzet a, tua zong ‘manhlam mama in’ ahi hi.
GSAM 457Tanglai guolneite
GSAM 457.1Pasian suohte, guolneite, kung a pieh Mengmuna pen chi ni um bang ahi hi—khat khu, mengmuna a muh lai a tua mipa mite’n a mu thei uh, ‘Mit a mu mengmuna’ kichi ahi a, adang khu ‘zan mengmuna’ kichi ahi hi. A masa Mengmuna thu pen 1 Samuel 3:1 ah a kigen a, naupang Samuel thuohna khu tam thu a muh ahi hi: ‘Tua nite laiin Mangpa thu a manpha a, Mit a mu mengmuna a um sih hi.’
GSAM 457Mit a mu mengmuna
GSAM 457.2Guolnei Ezekiel tunga Mangpa khut a um lai a Mengmuna khu tambang (Mit a mu mengmuna) ahi hi. Juda upate a masang a a tou laiun, ama Mit a mu mengmuna a mu lai a mu uhi.8 Hun dang khat ah guolnei Daniel khu Khaldea vaihawmte lah a um laiin Mengmuna a mu hi. Amaute umden hileh, Mengmuna a mu laiin a mu thei ding uhi; hinanleh tua sangin, “zauna nasatah in amaute a suhchitun a, tuaziehin amau kibu dingin a taimang uhi.”9
GSAM 457Pi White a zan Mengmunate
GSAM 457.3Pi White a tumasang Mengmunate zousie khu Mit a mu mengmunate ahi hi. 1884 kum a kipat in tam lam a Mengmunate umdan a kiheita hi; tuin Laisiengthou a ‘zan mengmuna’ kichi ahi hi. Mang nehna mai ahi sih a, tumasang kumte a Mit a mu mengmunate bangin, tua vansawlsieng vah mama ngel a hing kilang a, amanu thu a hil ahi hi. Laisiengthou ah ‘zan mengmuna’ tampi a kigiel a, Siemchilbu 46:2; Daniel 2:19; 7:13; Nasepte 16:9; 18:9; 23:11; 27:23-25 sim a muh baihlam ahi hi.
GSAM 458.1Pi White a tam zan Mengmunate ah, genlawhna poimawh tampi a kipie a, gen masa bangin, a kichientah mama in a tangtungta uhi. A nukhia zaw a Mengmuna pawlkhat tuin ka gen ding hi.
GSAM 458Washington a kisuonna
GSAM 458.21893 kum in Pi White in hichiin a gen hi:
GSAM 458.2‘Tuin Battle Creek ah nasepmun tam seng a kisuong khawm hi. Tua nasepmunte a kihawmkhie a, mun dangte vah leh theina a guolzawl theina dingin khopi dangte a kikoih hileh, Pasian guot bang ahi ding hi. Mangpa in Battle Creek ah Jerusalem nina a deilou ahi hi. Pasian deilam bawl a ahi leh, kisiemphatna leh kiheina nasatah, nasep vante leh innmunte suonna a um ngeingei ding hi.’
GSAM 458.31903 kum ha 3 a Oakland, California a Hattuom Khawmpi Lienpi ah amanu’n hichiin a gen hi:
GSAM 458.3‘Kum tampi sung i mite kungah, Battle Creek apat pawtdoh un, chi vauhilna pieh ahi hi. Hinanleh tuana nasepmun tampi a kiphut ziehin, umden a baih a, bangzieh a kisuon ding ahi chi mite’n a theisiem sih uhi.’
GSAM 458.4‘Mun dang a kiten ding thu a kidong ka dawngna pen, Hi, kachi hi. Hattuom Khawmpi Lienpi nasep innte leh laibu namkhiet nasep Battle Creek apat suonkhiet hita hen. Tua mun khu Atlantic Tuipi Gei ahiei mun dang ahiei ding chi ka thei sih hi. Hinanleh tami ka gen ding hi, Review and Herald nasep inn khu tua mun a lamkia dingin, Battle Creek ah suong khat ahiei lei suong khat ahiei mawngmawng koi nawn sih un. Pasian in tuami a dingin mun hoi zaw a nei hi.’
GSAM 458.5Tam thuhilna a zah nua un, gingtu khawmpi in, ‘Hattuom Khawmpi Lienpi nasep innte Battle Creek, Michigan apat Atlantic Tuipi Gei a mun khat peuh a suon ding,’ chi thu a tel uh hi.
GSAM 459.1Hattuom Khawmpi Lienpi kikhop zawh a, Battle Creek a kibawl Hattuom Khawmpi Lienpi vaihawm khawmpi ah, ‘Hattuom Khawmpi Lienpi nasep inn lutangpen khu New York khopi kimvel ah koi ka pom uhi,’ chi thu tel ahi hi. Tuaziehin mun kilawm sui dingin vaihawm pawl lien khat a kitel hi. Pawl in a guotna uh Pi White kungah a theisah ua, amaute a dingin vah belap a nei ei chi a dong uhi. A dawngna in hichiin a gen hi:—
GSAM 459.2‘Theisiemna leh thungetna toh i kisuon theina dingin Mangpa’n ei panpi hen. I Laibu namkhietna inn khu heiah i koi ding uh chi, manhlam mama a i thei ding uh Ama’n a deilam ahi chi ka chien hi. Meilum a kisuon hun ngei a kisuon ding a kigingsa um khu i lampi bit umsun ahi chi ka pomdet hi. Ama’n ei pui dingin thu i ngen ding uhi. Battle Creek i nuasie ding Ama’n a dei dan a vaihawmna in a theisahta hi....
GSAM 459.3‘New York ah na sep a poimawh hi, hinanleh i Laibu namkhietna inn khu tua mun ah phut ding ahiei chi ka gen thei sih hi. Tam kisuonna pomna dingin ka vah musah khu kichien ching ahi chi ka ngai ding ahi sih hi.’
GSAM 459.4Hapta ni chinglou deuh New York khopi leh a kimvel khuote a a sui nua un, vaihawm pawl in Laibu namkhietna inn a ding mun kilawm a mu thei sih uhi. Tua hun in ha 5 ni 30 chi ni guot lai khat a hing tung a, tuami ah Pi White in hichiin a gen hi:—
GSAM 459.5‘I unaute’n Review and Herald Laibu namkhietna inn a ding mun a sui laiun, Mangpa a ngentang a sui ding uhi. Pilvangna nasatah, kivengna leh thungetna toh, a hatlouna uh thei ngitnget kawm in a kalsuon ding uhi. Mihing thukhenna i suong ding ahi sih hi. Pasian pieh pilna i sui ding uhi....
GSAM 459.6‘New York a innmun phut thu ah, Pilvang un, ka chi ngeingei ding hi. New York nai a a um ding ka pom sih hi. Tu in ka ziehte zousie ka gen thei sih hi, hinanleh tua khopi apat mail 30 sung a mun bangbang zong nai seng ahi ding chi ka chien hi. Mun dangte kimvel enchien un. Washington, D.C., a hamphatnate enchien tahzet ding ahi chi ka chien hi.
GSAM 460.1‘Tam innmun khu khopi sung ahiei khopi kimvel a tenna ahiei i phut ding ahi sih hi. Lei gam in a hum theina dingin khuo lam a gamke ah phut ding ahi hi.’
GSAM 460Zua man hoi a pieh ding genlawhna
GSAM 460.2Tam thu a thei nua un, vaihawm pawl in thungetna toh Washington kimvel en a kipan uhi; tua hun in tam thuhilna umna lai thumna a hing tung hi:
GSAM 460.2‘Nisuahlam a i nasep koihna ding mun thu a vah mu dingin thu i ngen ngitnget a, kichientah mama a vah i kungah a hing tungta hi. Sum zalentah a zang thei mite’n sum tamtah a zatna munte pen, ei kungah zua ding a pieh ahi ding chi, vah kichien ka kungah a kipie hi. Tam inn thupite neite a shi uh, ahisihleh sil dang lamah a lungsim uh a kihei a, inn leh gam pen man ngiem mama a zua dingin a pie uhi....
GSAM 460.3‘Ka kunga vah pieh apat in, tu hun a dingin, Review and Herald lutangmun khu Washington nai ah a um ding ahi chi ka thei hi.’
GSAM 460Genlawhsa mun a hing kimu
GSAM 460.4Tam lai toh vaihawm pawl in District of Columbia ah mun sui a kipan ua, hinanleh eka khat a dollar 1,000 sang a man ngiem zaw lei gam bangma a mu thei sih uhi. Atawpna ah amaute kungah Takoma Park thu a kitheisah hi. A nuoi a thu khu vaihawm pawl thu theisahna ahi hi:—
GSAM 460.5‘District of Columbia gamgi pulam phet, hinanleh Takoma Park khopi gamgi sung a lei gam eka 50 vel, dollar 6,000 a lei thei ding, ahisihleh eka khat a dollar 120 man, ka mu uhi. Tam mun ka enchien tahzet uhi. Kum tawmkhat tumasangin Boston a damdawi siempa khat in tahsadamna inn a ding mun a a tel ahi chi ka mu uhi. Lei man leh a sunga singbuohte, singtungte leh ninsiete paihmangna ah dollar 60,000 vel a zat ahi chi a kigen hi. Sum lam hasatnate’n a guotna tangtung ding a khamta a, tua lei gam khu a tunga lei bat a khum piehpa khut ah a tungta a, ama a dingin dollar 15,000 a senga ahi hi.
GSAM 461.1‘Takoma Park khopi mite aiawhin khopi lamkai leh mi poimawh pawlkhatten tua mun ah lungtang takin ahing na kipahpi ua, ka guotnate uh bawlna ah lawm leh guol bang a ahing panpi khawm ding uh chi thu ahing pie uhi.
GSAM 461.2‘Ka zinna leh ka suina zousie uah, tam mun banga Theipinate a thupiehte bukimtah a zui thei mun dang ka mu sih uhi. Pasian vaihawmna in Ama’n ka tenna ding ua a dei mun ah ahing puizouta hi chi ka gingta uhi.’
GSAM 461.3Tam bung leh a masang bungte a etsah Theipina tampite tangtunna i et chiengun, mailam a sil tung dingte tuoh ding a kigingsa i um theina ding u’leh, theilou kaal a i um lou nadingin, “Mangpa i Pasian uh i gingta ding ua, tuachi’n i kip ding uhi; Ama guolnei i gingta ding ua, tuachi’n i khantou ding uhi.”