Bung 20 — Nasep Pattil a Kipiehkhietnate
GSAM 311.1“Kipiehkhietna tungtawn a Kei toh thukhun bawlte, ka misiengthoute, ka kungah hing kaikhawm un. Tualeh vante in Ama dihtatna agen ding uhi; aziehpen Pasian Ama ngei khu thukhentu ahi.”1
GSAM 311.21902 kum ha 6 ni 3 a suoh Ettha Kiana leh Tangkou ah tambangin i sim uhi:
GSAM 311.2“Tulai a nasep a hing lutten, a pattil a Mangpa in a nasep puohgih a ngapna mite amau leh amau kiphatsah louhna leh kipiehkhietna tungtang atheina uh a tawm mama hi. Tanglai a sil tuohte khu akung uah gen nawnnawn ding ahi; aziehpen tanglai a nasem dihtahte mizie ahi kingaitawmna leh kipiehkhietna kibang toh nasep a puotou ding uh ahi.”
GSAM 311.3Tualeh Hattuom a Ding Theipinate, Laibu 7 ah tam kamtengte a um hi:
GSAM 311.3“Tam leitung tangthu tawpna i naita ua, Pasian nasep chi tuomtuomte khu tu masang a kilangsahsa sang a kipiehkhietna tamzaw toh puotou ding ahi.”2
GSAM 311.41846 kum a Khawlni thu tungtang a a laibu masapen giel a namkhie dingin Upa Bates sawl a aum hun a umdan khu genkhietsa ahi. Tualeh 1849 kum a Tulai Thutah kichi thuthangla namkhiet a pat lai a Upa James White hasatna tuohdan zong genkhietsa ahi.
GSAM 311Van Kihong Tungtang Laibu Neu Khat
GSAM 311.51846 kum singnah pohlai a Topsham, Maine ah Pi White kunga pieh Mengmuna a, van a peilele silsiem phabep etsah a aum zouin, Upa Bates in Van Kihong kichi laibu neu namkhiet ding lai agiel hi. Hinanleh namkhietna ding sum kiguotsa apoimaw mama hi. Tam poimawna sut dingin Massachusetts a teng unaunu khat in puonbuh a siemphu belhkhawm a, a zawhtha a aphahtha lai a inn sung phahpuon a la khie kia a azuata a, a sum mu teng Upa Bates kungah apie hi; tua ziehin a laibu nina anamkhiet theita hi.
GSAM 312Chiemtena Ngap Nasep Tungtang Laibu Neu Khat
GSAM 312.11848 kum ha 11 ni 18 a Dorchester, Mass. ah chiemtena ngap nasep tungtang Mengmuna pieh a aum zouin, Upa Bates in Pasian Hing Chiemtena Khat kichi laibu neu thumna agiel hi. Tam hun ah zong namkhietna ding sum neilouhna hasatna atuoh kia hi. Meithai nungah khat in tua umdan atheihin, gamdai a a inn neu neisun azua a, tua apat a sum mu chanve Upa Bates kungah apie hi. Tambangin laibu namkhietna man pie thei dingin panpina amu kia hi.
GSAM 312Laibu Namkhiet Nasep Poimawnate
GSAM 312.21851-52 kum in Khrist Hing Pei Niveina Ettha Kiana leh Khawlni Tangkou khu Saratoga Springs, N.Y. ah namkhiet ahi hi. Khunah Pu Thompson in Upa White leh a zi inn sung umna manlouin apie hi; tualeh inn vante a hawh uh toh innkuon khawsahna a pat kia theita uhi.
GSAM 312.3Tam hunlai in Tulai thutah gingtute a pungtou ua, tam punna toh kiton in Upa White leh Pi White ngei nasepna poimawna zong a pung hi. Tam sil leh lai etfel nasep in laigielna inn a panpitu poimawna a siem hi. Tua hun ngei in midangte zong laigiel nasep a panpi dingin lungsim chawh in a um uhi. Mangpa in a mite ginna adawng a nasepdan leh poimaw hun a nasemte a kaithawhdan etsahna dingin, New Hampshire a West Wilton a teng unaunu kipumpieh, Pi Rebecca Smith, thil tuoh i gen ding uhi:—
GSAM 312.4Hun kiguot a peikhit zouin, a tapa Uriah leh a tanu Annie R. in zilsiemna nasep a septhei na dingun sang a kai a zil a ut mama uhi. A nu in a tate leitung lam a a kalsawn mang uh a giing hi; dihtah in zong a giinna khu zieh neilou mawngmawng ahi sih hi. Nu in a tate a it bangin taten zong a nu a it uhi.
GSAM 313Phillips’ Sang a Uriah Smith
GSAM 313.11848 kum apat 1851 kum tan a tapa in Exeter, New Hampshire a Phillips’ Sang ah lai a zil hi. Khunah sangnaupangte khu sanglien a zil ding kum khatna zil dingte hil a um uhi; tuaziehin sanglien a a lut chiengun kum khat a masawnsa ahi ding uhi. Tam zilna khu aman a zou hi. 1851 kum in sanglien a kai theina ding sum mu dingin nasep a sem hi; hinanleh ama nasepsahpa sumdawnna a chim ziehin a sum a mansuoh a, tua ziehin a sawttah a lunggul, sanglien a laizil ding guotna, a nusia ta hi.
GSAM 313Numeite Zilna Sang a Nungah Smith
GSAM 313.2Uriah in sang a kai lai in, a sanggamnu in Charlestown, Mass. a nungahte zilna sang ah lai a zil hi. Khunah a zil ding a zawh kuon a, sawtlouin sang apat pawt ding ahitah ziehin, ama leh a sanggampa kungah Mt. Vernon, N.H. a sang khat ah kum thum sung, kum khat a $1,000 leh neh ding leh umna inn toh zilsiem na sem dingin ngen a um uhi.
GSAM 313.3Tam hun vel in a nu in “Tulai thutah” a pomta hi. A tate a ding a a thumna khu tu masang sangin zong nasazaw leh lungluozaw ahi thei lai leh tambang ahi hi. Upa Bates in West Wilton a veh a, Pi Smith in a tate tungtang ama kungah a gen a, amau lungsim kikhelna khu thumna ding thu ahi ta hi. Upa Bates in ni tawmkhat zou chieng Somerville, Mass. a Paul Folsom inn ah kikhopna nei ding a guot a, Pi Smith in a tanu kungah lai a giel a kikhopna a hing kai ding a sam ding ahi hi. Tua kaal in Upa Bates leh a nu in, kikhopna a pei ding a alungtang chawhsah dingin Pasian kungah a thum ding uh ahi hi.
GSAM 313Mang Ni Tangtunna
GSAM 313.4Upa Bates khu kikhopna um ding inn dan ah a lut ngei nai sih a, tuaziehin tua mun umdan bangma a thei sih hi. Kikhop masang zan in, tua inn dan sungah a um a mangta hi; kot gei a tutna khat lou ngal tutna zousie a dim hi chi a mang hi. Tualeh a gen ding a guot thu a kikhel a, Munsiengthou tungtang thu a gen a mang hi. La masapen a sata ua, a thumta ua, la nina a sata ua, aman a Laisiengthou a hong pan a, etsahna lim a Munsiengthou lim a kawh kawmin, “Ni sangni leh zathum tan ahi dinga, tuachi’n Munsiengthou siensuoh in a um ding hi,” chi a sim lai in, kot a kihong a, nungah khat a hing lut a tutna a hawmsun ah a tuta hi chi a mang hi. Tua numei khu Annie R. Smith ahi a, a thugen a lunglut pai a thutah a pom hi chi zong a mang hi.
GSAM 314.1Upa Bates kikhopna khu Khawlni (Kiginni) a um ahi a, tua ni sangkai a um sih ziehin Annie in, “Ka nu kipahsahna ding maimaiin ka pei ding,” a chi hi. Tua Khawlni masang zan in ama khu a pei a, a nukhia a mangta hi. Kot a a tun laitahin la masapen a sasa uh, a thumsa uh ahi a, la nina a zawh kuon lai uh ahi hi chi a mang hi. A lut laitahin, kot gei a tutna khat lou ngal tutna zousie a dim a mu hi; thugenpa sangtah, zahhuoi leh lungnuomhuoi khat in a mu ngeilou etsahna lim khat a kawh a, “Ni sangni leh zathum tan ahi dinga, tuachi’n Munsiengthou siensuoh in a um ding hi.” chi a gen nawnnawn hi chi a mang hi. A thugen khu ama a ding a lungluthuoi mama ahi a, thutah ahi hi chi a mang hi.
GSAM 314.2Hun ching lua a kikhopna dingin a pawt hi; hinanleh lam a mansuo ziehin la nina zawh kuon tan khunah a tung zou sih hi. A lut tahin sil zousie a mang a a mudan bang ngei ahi a, a mang a mi mu ngei khan Daniel 8:14 a thu a gen nawnnawn dan zong a kibang hi. A lungtang ah thutah ahi chi gintahna a lut pai hi.
GSAM 314.3Annie kot a hing lut a a tut masangsie Upa Bates in a mang a ngaihtuokha sih hi. Thu dang khat gen ding a kigingsa hinanleh, a lungsim Munsiengthou thu lam ah a um gige hi. Tua Laisiengthou chang a gen nawnnawn laitahin a mang alungsim ah a hing kilang thata a, a ngaikhietute lungtang a kawn theina dingin a ginglouin panpina a thum hi. Annie in a theisa hun kiguot a peikhitdan thu a hilchienna ah zalenna lienpi a nei hi. Tuazouin Vansawlsieng thumna thupuoh leh Khawlni thutah a hilchien hi.
GSAM 315Annie Smith in Thutah a Pom
GSAM 315.1Kikhopna a khah laitahin ama Annie kungah a pei a, “Nang khu West Wilton a Unaunu Smith tanu na hi ding chi ka ging hi. Tu masang nang ka mu ngei sih; hinanleh na maitang ka theisa bang hi. Zanni zan nang hing mu ka mang hi,” a chi hi. Tuachi’n Annie in zong a mang a gen hi. Kikhopna apat a pawt laitahin a lungsim leh a deinate zousie a kikhelta hi; tua mun a tua hun ngei in Khawlni thutah a pomta ahi hi.
GSAM 315.2Ama numeite zilna sang ah a kile a, a van puona bawm ah a khum a, inn ah a kileta hi. Upa White laibu namkhietna a a lungkhamnate leh thu hilna nasep a a hahsatnate a theihin, laigielna inn nasep a ama panpi dingin Pasian in ama a sam hi chi Annie in a ngaituo hi. 1851 kum ha 8 a thuthangla khu Paris apat Saratoga Springs, N.Y. ah sawn a ahitahin, Nungah Smith khu nasemte lah a khat hi dingin khunah a peita hi.
GSAM 315Kipiehkhietna leh Kipumpiehna
GSAM 315.3Ettha Kiana, Laibu 2, Nambat 7 ah, a masang guotnate a nusia a, a kingaitawm leh kilangsah utlou nasep a a lut zou a a lunggel genna a khutgiel kamteng tawmkhat a um hi. Aman tambangin a gen hi:
GSAM 315.3“Belamnou in a hing pui na photphot a zui dingin bangkim ka nusiata hi chi ka ging hi. Leitung in a lungngaihuoi sil zousie a mansuoh ta hi. Ka lametnate, ka kipahnate leh ka itnate khu tulai in tunglam silte leh Pasian silte ah a um khawmta hi. Jesu kengbul a tut a Ama kunga zil lou ngal mun dang ka dei sih; ka van Pa nasep a sep lou ngal nasep dang ka dei sih; theisiemna zousie sang a thukzaw Pasian hamuonna lou ngal nuomna dang ka dei sih.”
GSAM 315.4Unaunu Annie in laigielna inn ah lai namkhietsa etfelna leh nasep dangte a a panpina khu hun poimaw laitah a hing tung ahi hi. Kum thum sung ginumtah leh phatuomtah in nasep a sem a, neh ding leh silh ding maimai a mu hi. Tua hun a tawp laitahin khuhpi natna in ama a that dingin a manta hi. Sawttah a thuoh a shina tunpitu tam natna in a bawlgenthei lai in, la hoitah phabep a phuoh hi; tua zousie lah a lungngaihuoipen khu “Tammun a Inn leh Van a Inn” kichi ahi hi. 1855 kum ha 7 ni 26 a a shi masang ni a agiel tua la thumapui in, a mizie ah a khanglien mama lungsim siemlou leh kingaitawmna hoinate a tahlang mama ziehin, a kim in i lahkhiet lou thei sih uhi:
GSAM 316Hasatna Kaal a Innkuon Khawsahna
GSAM 316.31852 kum ha 4 in Upa White khu Saratoga Springs apat Rochester, N.Y. ah a kisaawn hi. Tam khopi a 124 Mt. Hope Avenue ah, inn van hawhsa toh hilouin leisate toh a masapen in innkuon khawsahna a pat uhi. Hinanleh thuthangla hunseh bang a namkhiet a um gige a, tua tungtawn a thutah mun chin a kizah theina dingin, laibu namkhiet nasep lawchingsah ding a alunggel uh a nasat ziehin, khawsahna a nuomsahna sil zaran tampi a nusia uhi.
GSAM 316.4Tam hun a innkuon khawsahna a patdan uh khu, 1852 kum ha 4 ni 16 a Pi White in S. Howland innkuonte kungah a giel mimal lai nuoia kigiel ah na sim thei hi:—
GSAM 316.5“Rochester a tammun ah i kiphamuo pan lai uhi. Kum khat a $175 in inn lui khat i sang uhi. Inn sungah lai namkhietna seh i koi uhi. Tam seh tammun a koi hilou hileh, laigielna inn dan a dingin kum khat a $50 i pieh ding ahi hi. Na hing en ua i inn vante na mu uleh na nui ding uhi. Lupna lui ni, khat a sum sen 25 chietin i leita uhi. Ka pasal in tutna lui guh ka dingin ahing leipieh a, a kibang ni nangawn a um sih hi; tuate man sum dollar khat a pie hi. Sawtlouin tutna lui li dang, tutna mun phah neiloute, a bawn a sum sen 62 a a lei ahing pe kia hi. A guote a hat a, tutna mun phah dingin puon sah ka zang hi. Bawngnawi thau a man a san ziehin i lei sih ua, alu zong i lei zou sih uhi. Bawngnawi thau tangin thei ki-awlthau i zang ua, alu tangin ankambalpum i ne uhi. A pattil a i annkuong khu tanghou vui bawm lien hawmpi ni tung a meiphuoh khahna singpek i phahna tung ahi hi. Pasian nasep khantou thei ding ahileh, poimaw sil neilouhna thuoh i ut uhi. Tammun a i hing peina ah Mangpa khut a um hi chi i ging uhi. Nasepna ding mun a lien a, nasemte a tawm uhi. Khawlni beisa a i kikhopna a hoi mama hi. Mangpa in a umpuina toh hing tha-ousah hi.”
GSAM 317Gingtute Piehphalna
GSAM 317.11852 kum ha 5 ni 6 a Rochester a namkhiet Ettha Kiana nambat masapen ah, Saratoga apat Rochester a kisaawnna thu genin Upa White in tambangin a chi hi:
GSAM 317.2“Unaute in thuthangla panpina ding sum i lamet sang a tamzaw a guot piehta uhi. Saratoga Springs apat i kisaawnna leh tam khopi a thuthangla i patna a sum zang tampi hinanleh, leiba i nei sih uhi.”
GSAM 317Nasemte Kipiehkhietna
GSAM 317.3Ha 10 ni 14 a Nambat 12 sunga nasep thu genna neu khat ah, tambangin i sim uhi:
GSAM 317.3“Hinanleh laigielna inn in leiba a neihlouhna zieh pen tami ahi hi: ha guh beisate sung laigielna inn a nasem Unaupa Belden leh Unaupa Stowell in aneh ding uh sang a tawmkhat bou a mu uhi. Tua nasep ma a sem midangte zong amaute sang a tamzaw a mu sih uhi. I um louh kaal ngei a, natna kaal a, Ettha Kiana leh Tangkou namkhietna a hahsat a nasemte a dingin khawsahna ching zo a um theina ding a, sum lut kimlouhna dimsah ding khu Tulai thutah lawmte zousie a dingin kipahhuoi ahimah ding hi.”
GSAM 317Rochester, N.Y. a Hing Behlapte
GSAM 317.41852 kum nipilai in Rochester a laibu namkhiet nasep a pat hoi kuon laitahin, Upa White leh a zi in saklam a Bangor, Maine tan sakol leh sakol kangtalai toh ha thum sung zin khat a nei uhi. Lam a kikhopnate a nei ua, Khawlni tantu a kithehthangte a veh uhi. A kile masang un, ha 9 ni 26 apat Upa J. N. Andrews in 124 Mt. Hope Avenue ah thu hilna kizinzom a nei hi. Tam hun in Nipikaal ni masapen tantu, Khrist hing pei kia ding ngahtu mi giet in Tulai thutah a pom uhi; tam laibu gieltu zong tua mi giette lah a khat ahi hi.
GSAM 318Oswald Stowell Suhdamna
GSAM 318.1Ha 10 sung a Septawpni nitah khat in Upa White leh a zi saklam a azinna uh apat inn ah a tungkia uhi. A zing (Khawlni) in Khawlni kikhopna ah amaute a masapen in i mu uhi. Tua kikhop hun in lai namkhiet seh khutdaw Oswald Stowell khu chuap tuamtu puon natna nasatah in a na a, a siamvu in zong shi dingin a ngaisah ta hi. Siamvu in ama a dingin “bangma ka bawl theita sih” a chi hi. Biehna um lai in Oswald khu a ki-ep inn dan sungah a um a, tahsa a na nasatah hi. Kikhopna khah laitahin a ding a thumpieh dingin ngenna a hing sawl hi. Midangte toh ka zong thumna a tel dingin sam a ka um hi. A lupna gei ah i khupboh ua, thumna i bawl lai in Upa White in “Mangpa min in” sathau a nu hi. Pasian Hagau umpuina kitheisiem a um a, ama a dam pai hi. Thumna apat i thawh chiengin ama lupna tungah a tutou a, tu masang a na mama a pangte a beng kawmin, “Ka dam bukim ta hi. Zing chiengin khut a kizang lai namkhietna seh ka sep thei ding,” a chi hi. Ni ni zouin tua seh a sem ngei hi.
GSAM 318Rochester Pawl Masang a Pi White Mengmuna
GSAM 318.2Unaupa Stowell damna tunpitu vangpiehna ma khu Pi White tungah a nasazaw in a tung hi. Upa White in ama en dinga a kihei laitahin, “Ellen khu Mengmuna ah a um hi; tambang umdan a a um lai in hu a nah sih hi. Noute lah a koipou tam thutah chiettah a thei ut na um uleh ama na enchiet thei uhi,” a chi hi. Ama tua Mengmuna a umdan in nai khat leh minit 20 vel a um hi. Tua umdan ah kamtengte, a chang chiengin thugen zong chiengtah in a gen hi; hinanleh chiettah a enchiet in zong a tahsa a hu nahna bangma muhthei a um sih hi.
GSAM 319Kikhopna a Umlou Pawlmi Khawsahdan Tungtang Mengmuna
GSAM 319.1Pi White tua Mengmuna apat a hong khah zouin, a musate tungtang Theipina a gen hi. Upa White leh a zi saklam zinna apat a hong kile masangin, i pawlmi khat in khopi a nusia a Michigan gamke ah sumdawn dingin a zin hi. Tuaziehin ama tam kikhopna ah a um sih a, Upa White ahiei a zi ahiei a mu ngei sih hi. Pi White in a Mengmuna a gen laitahin, sil dangte lakah, inn apat gamla a a zin lai in Pasian dan leh Khawlni thu tampi gen kawm a, tua hun ma a thupiehte lak a khat palkeh mi khat tungtang a mu a hing hil hi. Tua mi khu a mu ngei nailou mi ahi hi a chi hi; hinanleh ama thu khu etsah in a umtah ziehin a chang chiengin a mu ding hi chi a ging hi. Hinanleh i lak a koima’n tua mi khu i theihsa mi khat ahi ding chi a ngaituo sih hi.
GSAM 319.2Atunga Mengmuna um apat hapta guh vel zouin, masanga i gen unaupa khu Michigan apat a hong kileta hi. Pi White in a maitang a mu paitahin unaunu khat kungah, “Tua mi khu Mengmuna a ka mu, na kung ua ka gen mi ahi hi,” a chi hi. A zi leh midang phabep masangah tua unaupa kungah Mengmuna genkhiet a ahitahin, Pi White in ama kungah, “Nathan in David kunga a gen bangin, ‘Nang tua mi na hi,’” a chi hi. Tuachi’n Paul in, Thugentheina silpieh tungtawn a a khelna uh a taihil a um miten a bawl ding a agen bang ngei a bawlta hi: “Hinanleh mi zousie’n thugenthei ua, gingtalou mi khat ahiei, theina neilou mi khat ahiei ahing lut leh, ama khu a bawn un a khelna theisah in a um a, a bawn un thukhen in a um hi; tambangin a lungtang a sil ki-immte a kilangta a, tuachi’n a mai tuol suin a boh dinga Pasian a be ding a, Pasian nangmaute lahah a um tahtah hi chi a gen ding hi.”3 Pi White in a sil hoilou bawlte a genkhietna a ngaikhiet zouin, tam unaupa a zi masangah a khup a boh a, mittui toh a zi leh khuna um mi tawmte kungah, “Pasian in nangmaute a hing umpi tahtah hi,” a chi hi. Tuazouin aman Michigan a a um lai a thupieh sagina a palkeh a, mail 500 val gamla a tua sil a bawl lai ngei a kilahsa a um, a gamtatdan leh a khelna teng a phuonta hi.
GSAM 320.1Tambangin hapta tawmkhat sung hun in, Theipinate khu i dingin a kipsah mama hi. Thilbawltheina mihing sang a tungzaw khat in a bawl ahi hi chi gen ding bou a pui i hi sih ua, mihingte khelna chiengtah a taihil, kam helvetlouhna mun apat a hing suoh ahi hi chi gen dingin zong pui i hi uhi.
GSAM 320Uriah Smith Ettha Kiana Laigielna Inn a Tel
GSAM 320.2Ettha Kiana Laibu 3 namkhiet lai in Uriah Smith in Khawlni tan a pat a, Ettha Kiana laigielna inn ah a hing tel hi. Khunah kum sawtpi laigieltu leh lai etfeltu ahi hi. Thuthangla a a lai namkhiet masapen khu “Hun leh Genlawhna Vauhilna Aw” kichi la ahi a, 1853 kum ha 3 ni 17 in a suoh hi.
GSAM 320.3Upa Smith in Vansawlsieng thumna thupuoh a zak masapen khu 1852 kum ha 9 ni 10 apat 12 tan Washington, N.H. a khawmpi ah ahi hi. West Wilton a inn ah a hong kile a, a zak thu khu chiettah in a zil a, 1852 kum ha 12 a Khawlni masapen in ni sagina tan a pat hi. 1853 kum ha 5 ni 3 in Rochester, N.Y. a Ettha Kiana laigielna inn ah a lut hi. Khunah ama leh a sanggamnu Annie khu sang khat a kum khat a $1,000 leh neh ding mu a zilsiem a sep tangin, neh ding leh silh ding a ding maimaiin nasep a sem uhi. A pattil nite a Vansawlsieng thumna thupuoh nasep tundet ding a kipiehkhietnate phabep khu tambang ahi hi.
GSAM 320Thugenpa Hi Dinga Khut Ngap a Namdet
GSAM 320.41863 kum vel in Upa Smith in mipite masang a thu genna a silpieh a zat a pat hi. 1866 kum in khantanhoi thugenpa hi dingin khut ngap a namdet a um hi; tua zouin Atlantic apat Pacific tan gamke chi tuomtuom a puonbuhte a umkhawm a kibawl kikhopnate leh khawmpite ah nasep tampi a sem a, a inn hattuom ahi Battle Creek hattuom ah zong tuuching nasep a sem hi. Battle Creek Sanglien kihong zouin, tua sang a Laisiengthou zilna lam ah a tawm a tam in thu a hil hi. Ettha Kiana leh Tangkou nasep a dingin 1894 kum in Atlantic Tuipi a kaantou a, Europe gam chi tuomtuom a veh hi. Syria a a um lai in khosih natna a veilaw a, tua natna nghawng apat a dam bukim kia ngei sih hi.
GSAM 321Chawl Ngailou Nasep Kum 50
GSAM 321.11853 kum apat 1903 kum tan, kum za khat chanve sung, Upa Smith khu Khrist Hing Pei Niveina Ettha Kiana leh Khawlni Tangkou lai etfel nasep a a kizopna a kitan ngailou deuh hi. Tua hun a tamzaw in thuthangla lai etfel vaihawmna pumpi a puoh hi. A shi ni ngei, thalezung thusim natna in a bawlluh ni nangawn in, namkhiet ding a a guotsa lai a puo a, laigielna inn lam a a pei lai ahi hi. Hattuom laibute lah ah laibu poimaw phabep zong a behlap hi. Tam a laibute lah ah Daniel leh Kihilna Tungtang Ngaituonante, Mihing Pianzia leh A Tawpna, Munsiengthou leh Ni 2300 tungtang laibu a lienzaw a belhap, Namte Sil Lamdang, leh Tulai a Mishite Hagau toh Kihouna, a um uhi. Tam laibute lah a masapen khu, ni sung a lai etfel leh laigielna inn nasep zawh zou, zan nai 9 apat zankim tan a tamzaw giel ahi hi.
GSAM 321Upa Smith Shina
GSAM 321.2Ama hinna khu phatuomtah a zat hoi hinna ahi hi. 1903 kum ha 3 ni 6 a Jesu ah a ihmuta a, a nasepnate apat a tawlnga ta hi. Hinanleh ama thu ah, “A nasepte in ama a zui uhi,” chi dihtah in gen thei ahi a, a shi hangin thu a gen nalai hi.