Bung 25 — Laizilna Innmunte
GSAM 391.1“Pilna nei in, theisiemna nei in; mangngil sinlen, ka kam a suoh thute apat peisan sin. Ama nusia sinlen, aman nang a kem ding hi; ama it inlen, aman nang a hum ding hi. Pilna pen a thupipen ahi; tuazieh in pilna nei in; na sil nei zousie toh theisiemna zong nei in.”1
GSAM 391Sangsye lien G. H. Bell Sang
GSAM 391.2I hattuom siemzilna nasep pen tulai in a lien mama ta hi. A masang a i gen khinsa nasep dangte bang in, a kipatna pen a neu mama ahi. 1868 kum in Sangsye lien G. H. Bell in Battle Creek khuo a Kalamazoo leh Washington lampite a kisuhtona sahlam-nisuohlam kil a um zung inn lui sung ah sang a hon hi. Tuaban ah, 1871 kum singkung a hing tha hun in Hattuom Khawmpi Lienpi a tawp chieng in, thugen nasep leh hattuom nasep a semte panpi ding in, thugenpate a ding nipikaal li sung thuhilna a nei uhi.
GSAM 391Hattuom Sang Nei Ding a Sapna
GSAM 391.31872 kum ha 4 ni 16 a Ettha Kiana leh Tangkou sung ah, “I Hattuom Sang I Nei Ding Uoi?” chi thulu nei thu a suoh a, tuachibang sang a poimawna thute a chientah in a gen hi. Ha 7 ni 16 a Ettha Kiana leh Tangkou sung ah, zillai sawmlehni toh sang a kihon thu, nipikaal ni a pei zou in sawmnilehnga a a pun thu, leh nitahlam ham dan zil pawl zillai sawmnga toh a kipat thu a puong uhi. Sang hun nina pen 1872 kum ha 9 ni 16 in zillai sawmli toh a kihon hi. Ha 12 ni 16 a tun chieng in sang a lien mama ta zieh in kikhopna inn ah a suon uhi; tuana hattuom sung tounate nunglam ah khieh leh phut thei laigielna sabuolte a gawm uhi. Hattuom inn a tunglam touna ah zillai sawmguhlehthum nei pattil sang zong a nei uhi.
GSAM 392Sangpi a Ding Sum Kholkhawmna
GSAM 392.11873 kum ha 3 a Hattuom Khawmpi Lienpi in, nasep mun tuomtuom a lut ding semtute kisahkholna ding hattuom sang a ding inn a kilawmte lamna sum kholkhawm ding a phatuomna thu, hun tamtah sung a gelkhawm uhi. Tuami thu a lemsah ua, a poimaw sumte kholkhawmna vaipuoh ding pawl khat a guot uhi. Tua hun sung in Upa Butler, White leh mi dangte in tam thu toh kisai thu thahat leh thupi tahte Ettha Kiana leh Tangkou sung ah hun leh hun in a giel uhi. Upa Butler leh Upa Haskell in Taamkhawmna khawmpi tuomtuom a a panlahna zieh un, a guot uh sang a ding sum tamtah a kholkhawm uhi.
GSAM 392.21873 kum ha 11 ni 16 in khawmpi khat a nei kia ua, tuana Ni sagina Khawlni tan a, Khrist hing pei kia ding ngahtu siemzilna sum a ding $52,000 pieh ding a kichiemsa a um thu a zahsah uhi. Tua sum pen kum ban a lei lei ding leh inn a kilawmte lam ding a zah ding ahi. Tuami khawmpi ah mah, mite a telna toh siemzilna pawl khat din ding leh inn lamna ding lei sui ding mi sagi pawl khat a tel uhi.
GSAM 392.3A tung a kigen khawmpi ah, George I. Butler pen Hattuom Khawmpi Lienpi lutang ding leh Sidney Brownsberger pen laigieltu ding in a tel uhi. Hattuom Khawmpi Lienpi in a tel pawl mite pen George I. Butler, S. N. Haskell leh Harmon Lindsay ahi uhi. Hattuom Khawmpi Lienpi vaihawm pawl toh Mi Sagi Pawl a pan ding in James White, Ira Abbey, J. N. Andrews leh Uriah Smith minte a behlap ua, amauten “Ni sagina Khawlni tan a, Khrist hing pei kia ding ngahtute Siemzilna Pawl” chi min toh dan dungzui in pawl a din uhi. Tua hun apat in Sangsye lien Brownsberger pen Battle Creek Sangpi toh a kisai a, Healdsburg, California a kihon ding sangpi vaipuoh ding a sap a hina tan in tuana a sem hi.
GSAM 393Sangpi a Ding Lei Ekar Sawmlehni Kilei
GSAM 393.11873 kum ha 12 ni 31 in tam pawl in Battle Creek khuo nitumlam ah lei ekar sawmlehni a lei uhi. Tuate lah a ekar sagi pen Battle Creek Sangpi huongsung a suoh hi.
GSAM 393.2Battle Creek a hattuom sang in 1873 kum ha 12 ni 15 ah zung inn thumna sung pindante ah, zillai zakhatleh sawm min kisimsah toh, a phalbi sang hun a pat hi.
GSAM 393Hattuom Sangte Poimawna
GSAM 393.3I hattuom in siemzilna a kilawm sangte i poimawna thu toh kisai in, Pi White in 1873 kum ah tambang in a giel hi:—
GSAM 393.4“Pasal leh numeite lungsim khuokim a a nei theina ding un, lungsim a thahatna zousie zangsah a, khangsah ding ahi. Leitung pen a lamkhat giap a khang pasal leh numeite in a dim hi; a theina uh a khenkhat a khangsah laitah ua, a dangte pen a zah lou zieh in a khang thei sih a, tuachibang a suoh uhi. Khanglai a tamzawte siemzilna pen a lawhchingsih hi. A laizil uh a tam lua a, nitin hinkhuo a nasep dihtah toh kisai silte pen a ngaihsah sih uhi....
GSAM 393Siemzilna Khuokim Poimawna
GSAM 393.5“Tulai a sangte a kipuizah dan bang a laizil giap a kizang zing pen, khanglaite nitin hinkhuo a ding a kilawm lou a bawl hi. Mihing lungsim pen a sepdoh tei ding ahi. A lam dih ah a sepdoh sih leh a lam dih lou ah a sepdoh ding hi. Lungsim a kimbangna kem ding in, sangte ah khut a nasep leh laizilna a kizop ding ahi.
GSAM 393.6“A peisa suonlebeite lai in siemzilna a zauzaw ding a kisahkholna a um ding ahi. Sangte toh kithuah in lousuona leh van bawlna munte a um ding ahi. Innsung nasep hil ding sangsyete a um ding a, tahsa leh lungsim thahatnate kibangtah a zah a hina ding in, ni chin a hun khenkhat pen nasepna ding a pieh ding ahi. I genna guotna bang a sangte kidin hileh, tu a bang lungsim kimbang lou a tam sih ding hi.”2
GSAM 394Battle Creek Sangpi
GSAM 394.11874 kum nipi leh favang sung in Battle Creek Sangpi inn a lam uhi. A inn pen leivui suong toh kilam, leinuoi pindan tung ah inn kithuop thum um, a sau leh a zau 75′ x 75′, Grik mite kros lim bang ahi. 1875 kum ha 1 ni 4 in a zaw ua, a kilawm kikhopna nei in Pasian kung a lan uhi. Tam inn sung ah zillai zakhat val leh a khen tuomtuom a ding sangsye siem sagi toh sang a kihon hi. 1877 kum sang hun a sangpi a kihon chieng in, zillai zani a kai thu a zahsah uhi. 1880 kum ha 10 a Hattuom Khawmpi Lienpi ah Siemzilna Pawl in a zahsahna ah, 1873 kum apat 1880 kum ha 12 tan in Battle Creek Sangpi ah zillai 1400 min a kisimsah thu a um hi.
GSAM 394Sang Ni Dang Kihon
GSAM 394.21882 kum ha 12 a Hattuom Khawmpi Lienpi ah, tua kum sung in khawmpi etkolna nuoi ah hattuom sang ni kihon thu a zahsah uhi. A khat pen Healdsburg, California a um Healdsburg Sangpi hi a, ha 4 ni 11 in a kihon hi; a dang pen South Lancaster, Massachusetts a um South Lancaster Sang Sang hi a, ha 4 ni 19 in a kihon hi.
GSAM 394Healdsburg Sangpi
GSAM 394.31884 kum ha 1 ni 15 a Ettha Kiana leh Tangkou sung ah, Pacific tuipi gei a hattuom sang toh kisai lunglut huoi tam thu a suoh hi:—
GSAM 394.4“1881 kum ha 9 in California Gamke sung hattuomte khawmpi in hattuom sang khat hon ding in thu a khensat a, tua nasep a tangtun ding in pawl khat a guot hi. 1882 kum ha 4 a tun chieng in, lei a tam kilawm leh pindan sawm nei inn a kilawm khat a leisa ua, sangsye ni a guotsa ua, zillai sawmthumlehthum toh sang a pat ta uhi. Sangpi kum sung ah (1882 kum ha 7 ni 29 a kipat), sang pen dan dungzui in sangpi hina a pieh ua, lei ekar nga dang a lei ua, inn zau [zillaite umna ding] khat a lam ua, sangsye guh pawl khat a nei ua, zillai 152 min a kisimsah uhi. A kihon apat in tam nasep a ding $27,000 dehtah pieh ding a kichiemna a um a, tua sum a tamzaw pen California mite in a pe ta uhi.”
GSAM 395South Lancaster Sang Sang
GSAM 395.1New England mite in Massachusetts a South Lancaster Pasian biahopna inn sung ah a sang uh a pat uhi. Upa S. N. Haskell panlah zingna leh New England a i mite kipiehkhietnate zieh in, 1884 kum favang hun a Pasian kung a lan ding sang inn kithuahte a kisahkhol ta hi. Tua hun in South Lancaster Sang Sang Pawl in a nei innte a nga hi a, tua lah a ni pen a thakim ahi. Sang inn pen 60′ x 65′ hi a, inn tha dang, zillaite umna inn pen 36′ x 88′ ahi. Tam innte pen 1884 kum ha 10 ni 19 in Pasian kung a lan uhi.
GSAM 395.2Tam innmun in kum sawmni leh khat sung phatuomtah a nasep zou in zong a khangtou nalai a, Toupa nasep a lunglut semtute leitung mun tuomtuom ah a sawlkhie ta hi. Tulai sang lutang pen Frederick Griggs ahi a, aman Hattuom Khawmpi Lienpi Siemzilna Lam laigieltu nasep zong a sem hi.
GSAM 395London (England) Kisahkholna Sang
GSAM 395.3London, England a nasep a khantou a, a hat semsem zieh in, 1887 kum nipi hun in Laisiengthou nasep semte kisahkholna sang khat hon ding a phatuom a ngai uhi. Tuami sang toh Laisiengthou nasep dihtah a sepna zong kizop ding ahi. Tam sang apat semtute pen United Kingdom leh a nuoi a um gam dangte a nasep ding in a sawlkhie uhi. Tulai in London sahlam a Duncombe Hall ah, Sangsye lien H. R. Salisbury vaipuohna nuoi ah sang a khangtou khat a um hi. Aman a pattil siemzilna pen Battle Creek, Michigan a sangpi ah a nei hi.
GSAM 396Battle Creek Sangpi Kizau Behlap
GSAM 396.1Battle Creek Sangpi ah pindan tamzaw a poimaw mama zieh in, 1886 kum nipi hun in sangpi inn a lienpi a behlap ding a ngaita hi. Kum ban (1887) in zillai numeite umna inn khat (Nitumlam Inn chi a kithei) lam ding zong a ngaita hi. Nitumlam Inn ah zillai 150 umna pindante a um a, annkuongna inn ah mi 225 a leng thei hi; 1884 kum a sangpi huong simlam a kilam Simlam Inn pen zillai pasalte umna inn in a zang uhi. 1886-87 phalbi sang hun a sangpi a kihon chieng in zillai 568 a kai uhi.
GSAM 396.21885 kum in Sangsye lien W. W. Prescott pen Battle Creek Sangpi lutang ding in a guot ua, hun sawt lou nua in hattuom Siemzilna Lam laigieltu ding in a guot uhi. Tam thutanna pen pilna toh kituoh ahi chi a kilang hi. Battle Creek Sangpi in phatuomna a mu ban ah, tuachibang laigieltu nasepnate leh Pasian malsawmna zieh in, i hattuom sang zousiete a nasepna ah kipumkhatna a nai zaw a, phatuomna zong a lien zaw hi.
GSAM 396Emmanuel Khantanhoi Puozah Sangpi
GSAM 396.3Battle Creek Sangpi in 1901 kum tan in nasep phatuom a sem a, tua kum in a lei leh a innte pen America Damdawi leh Khantanhoi Puozah Sangpi Pawl kung ah a zuah ua, Siemzilna Pawl zong a tawpsah uhi. Sangpi pawl tha khat pen a rang in a din ua, Emmanuel Khantanhoi Puozah Sangpi chi min a vuoh uhi. Michigan simlam-nitumlam a Berrien Springs nai ah lou khat a lei ua, tuana zillaite in innte a lam ua, a khangtou sang khat a um hi. Tam sang a tupna kip pen, tam bung a masalam a kilahkhie thuhilna toh kituoh a “lam zousie a khuokim siemzilna” pieh ding ahi. Emmanuel Khantanhoi Puozah Sangpi a sangsyete a tup leh a deilam thupipen pen, Pasian vaihawmna toh leitung mun koiah zong nasep ding a sap a hi ua leh, tuana sem ding a kisahkhol kim semtute siem ding ahi.
GSAM 397Laisiengthou Sang Laigil, Chicago, Illinois
GSAM 397.11887 kum ha 3 a Ettha Kiana leh Tangkou sung ah Upa George I. Butler in Chicago, Illinois ah khantanhoi nasepna inn khat lam ding thu a tut hi. Tua inn pen Laisiengthou nasep semte thuhilna ding Laisiengthou sang laigil hi ding a, tua toh kithuah in khuo sung a i mite a ding Pasian biahopna inn leh khantanhoi nasepna inn in zong zah thei ding ahi. 1888-89 favang leh phalbi sung in tua inn a lam uhi. Lei, inn, innsung vanzat leh sil dangte huop a a senso pen $28,000 vel ahi. 1889 kum ha 4 ni 4 in Khuo chin a laibu zuamite kisahkholna kikhopna toh a hon tahzet uhi. Pasian kung a a lat hun un, Laisiengthou nasep semte panlahna zieh in gamsung mun tuomtuom ah Tulai thutah a pomsa mi a tawmngiem in sangkhat a um chi i mite in a thei thu a gen uhi.
GSAM 397.2Tam sang pen Upa Geo. B. Starr in 1891 kum singkung a hing tha hun tan in siemtah in a puizang hi. Tua zou in, Hattuom Khawmpi Lienpi vaihawm pawl in a guot sangsyete toh nasep a zom ua, 1893 kum a tun chieng in Laisiengthou zilna a poimawna a pung semsem zieh in inn a kim nawnlou chi a thei uhi. Battle Creek Sangpi toh Laisiengthou sang khat zop ding a guot a hi zieh in, Chicago inn pen Damdawi leh Khantanhoi Puozah leh Lainatna Pawl kung ah a zuah uhi. Tua inn pen a zau behlap ua, tahsadamna inn neu a ding vanzat a koi ua, tulai in Battle Creek Tahsadamna Inn a Chicago Khen chi min a vuoh uhi.
GSAM 397Kipumkhatna Sangpi, Nebraska
GSAM 397.31889 kum Hattuom Khawmpi Lienpi in, anuoi a Gamke sung hattuomte khawmpi kuate a ding a kilawm mun khat ah sangpi lam ding thu a gelkhawm hi. Tuate pen Iowa, Minnesota, Kansas, Missouri, Nebraska, Dakota, Texas, Colorado leh Arkansas ahi. Tuazieh in khawmpi in sang umna ding mun a hoitah tel ding pawl khat a guot hi. Des Moines, Iowa; Fremont leh Lincoln, Nebraska; leh mun dangte a khuosung mite in i sep ding uh thu a thei chieng un, a khuo chiet uah innte a um ding a a deih mama zieh un, tua nasep a ding silpiehte pieh ding a kichiemna ah a kidem uhi. Lincoln, Nebraska in silpieh a tam pen a kichiem a, a kilawm pen mun ahi chi a ngaih zieh un, tuana sang a din uhi.
GSAM 398.1A innpi, Kipumkhatna Sangpi inn tahzet pen, a sau leh a zau 141′ x 84′ ahi. Lei apat a innkhuh pum a tungtawp tan a sangna pen 100′ ahi. Tam inn ban ah zillai umna inn ni a um a, a khat chiet uh 104′ x 104′ leh inn kithuop thum sang ahi. Silpieh a kipe leitung apat sum a mu ding un, tam hattuom sangpi laigil kisahkholna senso a kimkhat tal a phu ding chi a lam-en uhi. Tam sangpi ah sangsyete in a pienpui ham chiet un semtute Sap, Scandinavia leh German ham a khen tuomtuom ah a zilsah ding uhi.
GSAM 398.2Innte pen 1891 kum ha 9 ni 24 in Pasian kung a lan ua, sang pen ha 9 ni 30 in a hon uhi. Kum khatna a min kisimsah pen 301 ahi. 1892 kum in sang a kihon chieng in zillai 222 a kai ua, tua kum sung a min kisimsah pen 553 ahi. Tamte lah ah sawmsagilehkhat pen German ham lam ah, sawmgiatlehnga pen Scandinavia ham lam ah a um uhi.
GSAM 398.3Sangpi toh lou khat a kizop a, lousuona lam a nasep nuom zillaite a ding nasep a pe hi. Sangpi in tanghou bawlna inn zong a nei a, tuana tahsadamna ding ann chi khenkhat a bawl uhi. 1903 kum sung in German, Sweden leh Denmark-Norway hamte a thuzah laite leh laibute sutkhiet ding a tupna toh pawl khat a din uhi. Tam pawl in a laibu namkhietna inn uh leh, tam namte a ding hattuom in America a a nei laisuoh nasep zousie a nei hi. Nasep pen a tamzaw zillaite in a sem uhi. Laisuoh nasep a zilsahna a mu ban uah, tam mun ah khantanhoi puozah nasep a sep tahzetna apat sil tuohkhah a nei uhi.
GSAM 398.4Tam sangpi toh kithuah in damdawi nasep zong a um hi. Pindante hoi a zahna zieh in zillai umna inn lien khat tel lou in sang a um thei ding chi a thei ua, tuachin senso tawmcha toh tahsadamna inn khat a hon ua, nasep hoitah a sem hi.
GSAM 399Walla Walla Sangpi
GSAM 399.1Tam sang pen Washington Gamke a Walla Walla nai ah a um a, 1892 kum ha 12 ni 8 in Pasian kung a lan uhi. A masang ni in zillai 101 toh sang a kihon hi. Tua kum sung in tam simzat pen 185 tan a pung hi. Lou neu khat leh khut a nasepna dangte tam sang toh a kizop hi. A khangtou a, nasep hoitah a sem hi. Tulai in Sangsye lien J. L. Kay pen sangsyete lutang ahi.
GSAM 399Australia Sang
GSAM 399.21892 kum ha 8 ni 24 in Melbourne, Australia ah, inn a lua khat sung in sangsye nga toh sang khat a hon uhi. Battle Creek, Michigan a sangpi apat L. J. Rousseau pen tam sang lutang masapen ahi. 1894 kum in tam sang ah zillai 89 min a kisimsah hi.
GSAM 399Avondale a Kisuonna
GSAM 399.3Sang a dintute in khut a nasep leh laizilna a zopkhawm nuom zieh un, a umna mun uh suon ding a phatuom a ngai uhi. Tuazieh in Melbourne khuo lien apat, Avondale, Cooranbong, New South Wales a thingtang mun khat ah a suon uhi. Tuana lou khat a lei ua, inn a kilawmte a lam uhi. Tulai in sang pen khut a nasep leh laizilna kithuah guotna dungzui in lawhching tah in a kipuizang hi.
GSAM 399Avondale Toh Kisai Genlawhna Tangtunna
GSAM 399.4Sang a dinna leh a puizahna ah, vaihawm pawl in a tup uh pen, khut a nasepna sangte toh kisai thuhilnate a zui theipen a zui ding ahi. Tam pen “etton ding sang” hi ding a, a dih a kipuizang leh a lawhching ding chi hun leh hun in kipsahna a pieh hi. Sang a lawhchinna giap hi lou in, a phatuom lou ding a ngaih uh lei ngei zong a gah ding ahi. Toupa malsawmna toh hun a hing pei dan in tam genlawhna a dihna a langsah hi. Kum tampi kizom a khua a kang mama zieh in a kimvel uah lousuona nasep a sie a, a lousuohte a suoh lou vang in, Avondale lou pen a hing leh a gah hi. Tam sil a lamdang mama zieh in kumpi vaihawmte ngei in, tuachibang lawhchinna lamdang piangsah ding a a zah uh lousuona dan dotchet ding in a hing pei uhi.
GSAM 400.11903 kum sang nasep dan zahsahna in, sang kai simzat a za a sawmnga a pun thu a langsah hi. A sum leh pai zong a hoi hi—senso zousie a chingsa a, sum kemna ah sang a ding a zah ding sum $1,500 a um nalai hi. Sangsye lien C. W. Irwin in kum li dehtah tam sang etkoltu leh lutang nasep a sem ta hi.
GSAM 400Mt. Vernon Sang Sang
GSAM 400.21893 kum in Hattuom Khawmpi Lienpi in Mt. Vernon, Ohio ah sang sang khat hon ding a lemsahna thu a phasah hi. Tam sang toh khut a nasepna khenkhat a kizop a, nasep hoitah a sem chi a zahsah uhi. 1894 kum a min kisimsah pen 140 ahi. Sangsye lien J. W. Loughhead in tam sang lutang in kum tampi a sem a, Washington, D.C. ah sap a hina tan in a sem hi. Sang laithot tunna ding mun pen Academia, Ohio ahi.
GSAM 400Keene Khut a Nasepna Sang
GSAM 400.31893 kum Hattuom Khawmpi Lienpi in Keene, Texas ah khut a nasepna sang khat hon ding a lemsah hi. Ekar 130 val lou khat a lei ua, innte a lam ua, Sangsye lien C. B. Hughes leh a panpitu te etkolna nuoi ah sang a hon uhi. Khut a nasep leh laizilna zopkhawm guotna toh kituoh in a kipuizang hi. 1894 kum a min kisimsah pen zillai 160 ahi. Tam sang zong a lawhching tahzet hi.
GSAM 400Claremont Kipumkhatna Sangpi
GSAM 400.4Tam sang pen South Africa a Cape Town nai Kenilworth ah a um hi. A sangsyete a tamzaw pen Battle Creek Sangpi apat a tel ahi. 1894 kum in zillai sawmkua min kisimsah toh a kihon hi. Sang kum khatna a tawp chieng in, zillai simzat a pung mama ta zieh in pindan tamzaw a nei theina ding un sang inn zau behlap ding a ngaita hi. Tulai in tam sangpi pen Sangsye lien C. H. Hayton etkolna nuoi ah a um hi.
GSAM 401.1Ni sagina Khawlni tan a, Khrist hing pei kia ding ngahtute in Claremont ah zillai sawmsagi toh khuo sung sang (pattil sang) khat zong a puizang ua, Beaconsfield ah hattuom sang khat a nei uhi. Tua sang ah 1894 kum in zillai sawmthum min a kisimsah hi.
GSAM 401Siemzilna Nasep Tomkim, 1895
GSAM 401.21895 kum ha 2 a Hattuom Khawmpi Lienpi ah Siemzilna Lam laigieltu in anuoi a zahsahna a bawl hi:—
GSAM 401.3“Hattuom siemzilna munte pen tambang in a tomkim a gen thei ahi: Anuoi a munte ah sangpi nga a um hi: Battle Creek, Michigan; College View, Nebraska; Healdsburg, California; College Place, Washington; leh Kenilworth, South Africa. Tam gamsung ah sang sang li, ahisihleh sang sang khenteng a laizilsah sangte, South Lancaster, Massachusetts; Mt. Vernon, Ohio; Keene, Texas; leh Graysville, Tennessee ah a um hi.... Tamte ban ah Australia Laisiengthou Sang; Mexico ah damdawi leh khantanhoi nasep toh kizop sang; Pitcairn tuikul a gamsung naupangte sang; Pacific tuipi simlam a Society tuikul pawl lah Raiatea tuikul a sang; Caribbean tuipi a Bay Islands lah Bonacca tuikul a sang; tam gam leh gam dangte ah hattuom sang sawmlehnga vel; Hattuom Khawmpi Lienpi Laisiengthou sang ni; leh a kipawlkhawm kip lou Khuo chin a laibu zuamite sangte leh tualsung hattuomte khawmpi sang tamtah a um hi.”
GSAM 401.4Hattuom sangpite leh a kipawlkhawm kip sangte a kai simzat a tomkim a genna ah laigieltu in tambang in a gen hi: “A khial lou ding a hisap in, tulai in Ni sagina Khawlni tan a, Khrist hing pei kia ding ngahtu sangte ah kum tuomtuom a upa leh naupang zillai 3,000 val min a kisimsah hi.”
GSAM 402Siemzilna Innmunte Tomkim, 1903
GSAM 402.1Ni sagina Khawlni tan a, Khrist hing pei kia ding ngahtute lah a siemzilna nasep leh innmunte pen Thupuoh nasep dangte a khantou dan bang in a khangtou uhi. 1904 kum a Hattuom Khawmpi Lienpi Kum Laibu in a langsah bang in, tulai in America ah sangpi leh sang sang kua, gam dangte ah nga a um hi. Gam dangte a umte pen anuoi a munte ah a um hi: Avondale, New South Wales; Cape Town nai a Kenilworth, Claremont, South Africa; Holloway, London sahlam, England; Nyhyttan, Järnboås, Sweden; leh Magdeburg nai a Friedensau, Germany.
GSAM 402.2America ah sang lailailte sawmlehli leh gam dangte ah nga a um hi. Gam dangte a umte pen Copenhagen, Denmark; Honolulu, Hawaii gam; Diamante, Entre Rios, Argentina Mipite Ukna Gam, America simlam; Curityba, Brazil, America simlam; leh Brusque, Brazil, America simlam ah a um hi.
GSAM 402.3A tung a kigen siemzilna innmunte ban ah hattuom in a puizah tualsung hattuom sang 357 a um hi. Tamte lah a 317 pen United States ah, sawmli pen gam dangte ah a um hi. Tulai tan a simzat dihtahte i nei hileh, tam simzatte a tamzaw mama ding hi. 1902 kum a tawp apat sang tampi a kihon ta hi. A etsahna in, Nebraska Gamke sung hattuomte khawmpi in hattuom sang sawm a nei thu a zahsah hi. 1904 kum ha 2 ni 1 a a zahsahna un “hattuom sang sawmni leh li” a um chi a langsah a, khawmpi khat sung ah sawmlehli a pung hi.
GSAM 402.4Tahzet in Toupa puihna khut in tam mite lah a siemzilna nasep pen lamdang tah in a pui a, lampi a honsah hi. A nasep a tam lam vaipuoh ding a sap mite kung ah pilna pe henlen, sang tuomtuomte ama a guotna toh kituoh in a kipuizang thei ding hi. Tuachieng in Toupa a ding semtu siem leh a lam zousie a khang kim mi tamtah a um ding a, siemzilna leh gamtatna ah “a lamkhat giap a khang” pasal leh numeite a hi sih ding hi. Laphuohtu in “Toupa in thu a pe,” chi a, “tua thu a tangkoupite pawl [sepai pawl, laimai gei ah] pen a tam mama hi,” a chi hi.