Adventist Pioneer
Library
aplib.orgLibrary
31 / 31

Bung 28 — Koima Kha Theilou Kot

John Norton Loughborough

GSAM 462.1“Na ma ah kot kihong ka koita a, koima'n a kha theisih ding hi; aziehpen tha tawmnou na nei a, ka thu na zui a, ka min na phatsan sih hi.”1

GSAM 462.2Tam khu khantanhoi hattuom Philadelphia dinmun a umte kunga kigen thu ahi. Tam hattuom khu Khrist hing pei ding a nai tah thu puonzahna zieh a hing umkhie hattuom ahi a, tuami thu a a zahsate uh tukip a umte ahi uhi. Aziehpen Sardis hattuom (Philadelphia masangmah a um hattuom) thu a aman, “Tuaziehin na tan dan leh na zah dan theizing inlen, tukip inlen, kisia in. Tuaziehin na kiven sih leh, guta bangin na kungah ka hing pei ding a, bang hun a na tungah ka hing pei ding na theisih ding hi.”2 achi hi.

GSAM 462.3Tuachi'n Sardis hattuom in Mangpa hing pei ding a nai tah thu a za hi. A zahsate uh tukip a umte khu “meivah koina” kihiengkhiet laiin thutah ah masawn tou ua, Philadelphia hattuom ahing suoh uhi. Amau kungah aman, “Ka thuohhatna thu na zui ziehin, leitung a tengte ze-et ding a leitung pumpi tunga hing tung ding ze-etna hun apat ke'n zong nang ka hum ding hi. En in, kin in ka hing pei ding hi; koima'n na lallukhuh a lahmang louhna dingin na neisa tukip in.”3 achi hi. Tuachi'n tam Philadelphia hattuom kungmah ah, “Na ma ah kot kihong ka koita a, koima'n a kha theisih ding hi.” achi hi.

GSAM 462.4Tuaziehin Pasian vaihawmna banga Mangpa hing peina thu leitung vauna ding leh Pasian toh kimu ding a kigingsa dingin mite ngen ding a kipankhiete'n a nasep un Pasian deisahna tuom a nei uh chi khu Laisiengthou in nasatah a puong ahi. Mihingte'n amau dal ding, a kalsuonnate uh sutsiet ding, “thu genna kot” khah ding a hanciam thei uhi. Hinanleh kikou awging zousie tung ah Pasian aw in, “Na ma ah kot kihong ka koita hi.” chi in a gingkhie veve hi.

GSAM 463Kum 74 Sung Khantouna

GSAM 463.1Tam laibu laimai masate ah 1831 apat 1905 tan, kum 74 sung thu tomkim in i enkhieta ua, Khrist hing peina thupuohte leh adieh in Vansawlsieng thumna thupuoh kipatna leh khantouna i zui uhi. Tam Thupuoh khu theikhahlouhna leh gentheina apat in kum chin a tha leh silbawltheina pung semsem toh a khantou a, leitung kimvel ah khantanhoi nasepmunte a nei dan i etsahsa uhi. Tam Thupuoh in tahsa lungtang a lungdam sah zieh a tambang a a khantou ahi ngeisih hi. Aziehpen a maipenna ah Mangpa Khawlni a puo a, tuami tan ding khu singlamte gih khat puo toh kibang ahi; nipikaal sung a leitung nasep a tam penni ah leitung mite toh sumtawlna apat kikhen ding a ngen hi. Douna um lou zieh a a khantou zong ahi sih hi. A kipat apat douna a tuoh a, pulam apat a nasapen douna leh Pasian a kipiehlou mite hun tawmkhat sung a lah ua hing lutte'n a thunsah buoinate zong a tuoh hi. Pulam melmate guotna leh hanciamna zieh a dinmun um thu ah lasatu David thute zangin i gen thei hi: “Mangpa ei lam a pang hilou hileh—Israel in tuin tambang gen tahen—mihingte ei dou a a thouh lai un, Mangpa ei lam a pang hilou hileh, a hehna uh ei tunga a kuon lai in, amauten ei a hingpi in hing na valmang ding uhi. Tuachi'n tuite'n ei hing na khuh ding a, luite'n i hagau tung a hing na luong ding hi; tuachi'n tui kithupite khu i hagau tung a hing na luong ding hi. Amaute ha a neh dingin ei hing piehlou Mangpa phat in um tahen. Vasa mante thaang apat vasa a suoh bangin i hagau a suohkhie hi; thaang a kitanta a, ei i suohkhieta uhi. Ei huhna khu van leh lei siempa Mangpa min ah a um hi.”4

GSAM 464Mangpa a Huhna

GSAM 464.1Mangpa'n a mite ma ah “kot kihong, koima'n a khah theilou” a koisa ahi chi a puong hi. Tuaziehin Thupuoh a khantou zing khu lamdangsa ding ahi sih hi. Mite a dinga Pasian Thupuoh ahi a, a tangtung ngei ding hi. Kihilna 7:2 ah, Pasian hehna ni thupi hing tun chieng a ding thei ding mite kigingsahna nasep khu vansawlsieng khat “nisuolam apat hing katou,” ahisihleh mi pawlkhatte let danin “ni hing suoh bang,” chi'n etsah ahi. Zing khuovah dan en in—amasapen in nisuolam ah vah zangte a kilang a; tamte a kigawm ua a vah semsem zouin, ni pum lientah a kician in a kilang hi. “Ni Leengpa” khu vanlaizang a a katou lai in, a vah, a satna leh a tha a pung semsem hi.

GSAM 464.21848 apat Vansawlsieng thumna thupuoh khantou dan khu tambangmah ahi. Tuakum in a sung a thutahte a kician in kilangkhiesah ahi a, tuami apat i etsahsa bangin a khantouna a kician a, a khantou zing khu lamdanghuoi ahi. Tam hun ah a hundamna hing tung ding a nai lai in “Khawlni a subua lou a tantu,”5 leh Pasian ni siengthou ah amau lungdeilam bawlna apat a khete uh kidoh a umte tungah Mangpa'n a thu a tangtungsah ahi chih loungal in tam thu hilchienna dang i nei sih uhi. Tuabangin Kihilna 14 a Vansawlsieng thumna thupuoh in a puong bangin, “Jesu ginna” tungtawnin “Pasian thupiehte” zousie a zui uhi. Tuabang mite thu ah Mangpa'n guolnei Isai tungtawnin, “Tuachi'n na vah zingkhuovah bangin a hing suohkhie ding a, na damsahna zong kin in a hing pawtkhie ding a, na dihtatna [‘Mangpa, ei dihtatna.’ Jeremiah 23:6] na ma ah a pei ding a; Mangpa loupina in na nung a veng ding hi.”6 achi hi. Tamchibang kipsahna thute um lai in, nasep a tangtung ding chi loungal bang dang i ngahthei diei? “Pasian ei lam a a pang leh, koi ei dou thei ding hiei?”

GSAM 464Tamte Bangchin A Khantou Thei Ding Hiei?

GSAM 464.31846 in Upa Joseph Bates in a laibu masapen a giel pan dinmun en in. Tuami khu Ni sagina Khawlni tan a, Khrist hing pei kia ding ngahtute'n Khawlni thu a laibu a suohsah masapen uh ahi. Leitungah a neisun sum khu sent sawm leh ni leh a chanve ahi a, laigielni masapen a tawp masang in tuami zong zangmang ding a um hi. Tualeh Upa James White in gan an ding lou lohna a a tha man sum toh a laibu neunou masapen, Tulai Thutah, a namkhie a, sim nuom tapou kungah a thawn a hah a, tuami khu leitung mong tan a pei ding Thupuoh ahi a chi dan en kia in. Tam kipatna neuchate enin, Amos hunlai mite thugen bangin, “Jakob khu koi tungtawn a thou ding hiei? Aziehpen ama a neu hi.”7 chi'n mi'n a dong thei hi. Tuami leh 1905 dinmun khaikhin in. Tuin Thupuoh thutahte khu leitung mun tuomtuom a um Laibu namkhietna inn sawmni ah suohsah ahi a, sim ding laibute ngenna phuhzo dingin a bawlthei pen tan uh a hanciam zing uhi. Tuaziehin, En un, tuin zong koima'n a khah nailou “kot kihong” ahi, i chi thei tahzet hi.

GSAM 465.1Hun masalai a tam nasep a tangtung theisih ding a ngaite thu ah, Jerusalem lamkiana a Pasian nasep dal ding a ngaite guolnei Zekariah in a taihilna thu zangin, “Sil neute ni khu koi in a na musit a hiei?”8 i chi thei hi. A lampi ua hasatna tang liente banga kilang silte thu ah Mangpa'n guolnei tungtawnin tambangin a gen hi:—

GSAM 465Tang Khu Phailai a Kisiem

GSAM 465.2“Aw tang lien, nang koi na hiei? Zerubbabel ma ah phailai na hing suoh ding hi; tualeh aman a lu a suong a hing pawtkhietpih ding a, mite'n, Lungsietna, ama tungah lungsietna um tahen, chi in a kikou ding uhi.”9 Vansawlsieng thumna thupuoh nasep ah zong tuabangmah a hi a, “a lu a suong” hing pawtkhiet, thu dang a genin, nasep zawhkim tan zong tuabang a hi ding hi.

GSAM 465.31846 a mi tawmchate en un. Amaute'n neihlam ah a genthei ua, Pasian ginna leh thutah gou loungal ah lam zousie a genthei uhi; a nasep uh tuin bangzat a a khantou ta a hiei en un. Tu a khut ua um vanzahte ngaituo un: laibute bawl zousa, leitung ham tuomtuom a letsa leh namkhiet zousate, leh laibu zuami za tampite'n kum chin a $400,000 man laibute mite inn ua a tut dan uh ngaituo un. Tam nasep tungah Pasian guoljawlna a um zing leh, tangtunna i ngaituotou thei hi. Tam vanzahte leh nasepna lampite ha chin a a pung tou lai in, Khrist muongin, Solomon in Pasian hattuom gamda dinmun apat a hing pawtkhie lai a thu a a lasah thu loungal i ngah ding dang a um sih hi. Amah “a Itpa baan a kinga” a hing pawtkhie a, Solomon in ama khu a hing enkhie dan a genna ah, “ha bang a melhoi, ni bang a vah chien, dial um galkap pawl bang a lauhuoi,”10 chi ahi.

GSAM 466Thugentheina Silpieh in A Huh

GSAM 466.1Mangpa vaihawmna in thutah kizahna ding lampi a honsah leh a vaihawmna lampite a zui ding a hanciamnate tungah a guoljawlna tuom a um i mu uh giap ahi sih hi. Vansawlsieng thumna thupuoh kipatna leh khantouna ah, Thugentheina silpieh tungtawnin a mite kungah thu a gen zong ahi. Tam khu Laisiengthou tang luoh ding a kihilna tha khat banga hing um ahi sih a, Laisiengthou thuhilnate a hiloulama heikawina ding zong ahi sih hi. Tam hun ah Khrist khantanhoi a a baihlam dan apat pialmangna ding lauhuoi munte, leh mite'n tam hun deilam a zui a, Pasian ngaihsah dan mel nei giap a a tha neilou a lungkimna a puuhna ding lauhuoina munte etsahna ding ahi.

GSAM 466.2Mangpa'n tamchibang kilangnate ze-etna ding daan khat a ei a dinga a pieh, guolnei luite etsahna11 apat tam thu i en chiengin, nidanglai a tam kilangnate poimawna ziehte khu tuin zong a um veve i mu uhi. Tuami khu, hun chin a thuhilna leh chindan tuomtuom a kizui laite zieh a thutah lampi apat kipial sah ding lauhuoina ahi. Mangpa'n hattuom a a koih silpiehte kilang dan thu a Sawltah Paul in a genna ah, tua silpiehte khu “misiengthoute bukim sahna ding, thugen nasep sepna ding, Khrist sapum lamhatna ding ahi; ei zousie ginna a pumkhatna leh Pasian Tapa theina a pumkhatna ah i tun a, mi bukim i suoh a, Khrist bukimna a khansauh dan tena tan i tun masie ahi. Tuachi'n mihing khepna leh khep ding a a guot uh pilvenna gilou zieh a thuhilna hui chinchin in hing mutvaih a, lam tuomtuom a kitawiliah naupangte i hi nawnlouhna ding ahi. Hinanleh itna a thutah genin, sil zousie ah lutang ahi Khrist ama ah i khantou ding hi. Ama apat sapum pumpi khu kizopna chinchin in a pieh huhna toh hoitah a kigawmkhawm leh kikipsah ahi a, a khen chin in a hin ding dan a a nasep dungzui in sapum a khantou a, itna ah amah leh amah a kilamhat hi.”12 achi hi.

GSAM 467.1Tulai a Thugentheina silpieh kilangnate douna a kigen thute khu nidanglai in zong tha kibang toh kigen thei ahi: eite'n Laisiengthou i nei ta a, tuaziehin tuachibang silpiehte i poimaw nawnsih, chi ahi. Hinanleh tuami Laisiengthou mah in Khrist in tam silpiehte khu “a bukim [dinmun bukim] hing tun” masie a nasep uh sem dingin hattuom sungah a koih ahi chi ei a hil hi. Tualeh hattuom in “i Mangpa Jesu Khrist hing peina ngah kawm a, silpieh khat beek ah zong nungtollou,”13 ding ahi chi ei a hil hi.

GSAM 467Guolneite Bang Ding a I Poimaw Hiei?

GSAM 467.2Nidanglai mite'n, Pasian khutme mah a suongpeekte tunga a giel, mihing chindan ding a daan uh a nei ta ua; Pasian kam apat Moses kunga kigen a, chingthei taha kigiel daan tuomtuom, thukhenna leh thuhilnate a nei ta ua; bang dang poimaw nawn ding hiei, chi'n a ngai thei uhi. Hinanleh amauten tuachibang thutah hoitahte a nei napi un, Pasian in amau kungah “hun tuomtuom leh dan tuomtuom in a guolnei siengthoute tungtawnin” thu gen a lunggul hi.

GSAM 467.3Isai, Jeremiah, Ezekiel, Daniel, Hosea leh guolnei dangte'n a pieh Theipinate i en chiengin, a vek un Pasian thu man thu a thukhun thupi kibangmah a hil uhi. Hinanleh guolnei chin in a hunlai mite a dinga taihilna tuom a nei chiet uhi. Aziehpen genlawhna kipieh hun a chindan kizui laite in tua mite khu sil dih thukhun siengthou leh zahumte apat a kaimang thei hi.

GSAM 468Silpiehte Poimawna

GSAM 468.1Thuhun Lui Laisiengthou thuhilna hoitahte giap i nei uh ahi sih a, tua banah i Hundampa amah thute leh sawltahte thute zong i nei ua, bang ding a vah dang i poimaw nawn hiei, chi'n kiniel thei ahi. Hinanleh tam sawltah siengthoute mahin hun nunungni a “lauhuoi hunte hing tung ding,” leh mihingte'n “Pasian ngaihsahna mel a nei napi a, tuami tha a niel ding uh,” chi a genlawh uh khu thutah ahi veve hi. Tualeh “mi pawlkhatte'n kheptu hagaute leh dawite thuhilnate ngaikhiein, ginna a nuasie ding uhi,” chi zong ei a hil uhi.

GSAM 468.2Tamte zousie ngaituo chiengin, Paul in Thessalonika mite kunga a laihah ah a gen mite khu, Khrist ni in guta banga a lenkhah louhna dinga mieltam sung a um lou a, vah tate hi dingte ahi uhi. Tua mite khu “genlawhnate” lam ah “sil zousie ze-et ding,” leh “a hoi tukip ding,”14 chi'n phuondoh ahi uhi. Tam khu, Mangpa Jesu Khrist hing peina ngah a, a tawp chiengin tuami ni a dinga kigingsa a mu a um ding mite lah ah Thugentheina silpieh kilangna “hoi,” a dihtah, a um ding hi chi a hil toh kibang ahi.

GSAM 468Tawpna Chiemtenate

GSAM 468.3Mangpa ni a nai tah chi etsahna chiemtenate lam chin a a tamna hun ah i um uhi. Thupiehte zousie zui a, “Jesu Theipina nei”15—“Thugentheina Hagau,”16—zong nei mite hing um ding hunmah ah i um uhi. Bang i mu diei? Kum sawmguh peisa sungin tuachibang mite ahing um ua, tuachibang Thupuoh mah a puo ua, a lah uah Thugentheina silpieh a kilang hi. Pi E. G. White tungtawn a kilang silpieh khu Laisiengthou daante toh i ze-et chiengin, a lam chin ah ze-etna a zou chi i mu uhi. A kipatna apat a tawpna tan Pi White laigiel zousie ah, khelna a dinga phalna neunou beek pieh thu tanziel khat zong mu ahi sih a, Pasian thu apat pialmangna neunou beek phal thu zong a um sih hi. Tam laigielte'n Laisiengthou tungah amau a kikoih ngeisih uhi. Hinanleh Pasian thu chingthei pen a zil dingin a phuondoh zing ua, thukhenna nunung a i thute kizenna ding tehna lienpen khu tuami ahi chi'n a kawh uhi. A laigielte ah Khrist khu i zui ding etsahna omsun a ei ma ah dohsang ahi. A kician pen in ama khu tam mun a i zohna ding kinepna omsun, hing tung ding hehna apat i bukna omsun, leh i hundamna ding min leh lampi omsun ahi chi kigen hi.

GSAM 469Ka Mitmuh a Pahtawina

GSAM 469.1Pi White leh a nasep hiina thu ah, ama toh kithei a, kum tampi sung a nasep a zil mi khat in 1877 a a giel thu anuoi ah kipie ahi. Tuin kum sawmnga leh thum vel ze-etna, kum tampi a chingthei taka etkhietna nungin, a sung a kigen ngaituona zousie ka pomkim hi:—

GSAM 469.2“Unaunu White Khristian chindan thu ah, tawmkhat ka thei hi ka ngai chi gen nuom ing. Kum sawm leh giet sung ama toh ka kithei ta a,—i mite tangthu hun chanve sang a tamzaw ahi. A innkuon uah vei tamtah ka um a, a chang chiengin nipikaal bangzah ka um hi. Amaute zong ka inn leh ka innkuon lahah vei tamtah a um uhi. Mun zousie deuhthaw ah amaute toh khual ka zingkhawm a; mimal a umna ah leh mipite lahah, kikhopna ah leh kikhopna pulam ah amau toh ka um hi. Tuaziehin Unaupa leh Unaunu White hinkhuo, chindan leh hagau thu tawmkhat theina ding hunlem hoipen ka nei hi. Thugenpa khat ka hihna ah, mi chi zousie leh chindan chi zousie toh ka kizangkhawm a, tuaziehin mi khat bangchibang mi hiei chi tawmkhat ka khen thei ta hi ka ngai a, adieh in kum tampi sung a kitheina neitah nungin tuabang ahi hi.

GSAM 470.1“Unaunu White khu kiphatsanglou, kingiem, lunghoi leh zahum numei khat ahi chi ka thei hi. A chindan a tamte khu mite muh ding a a kisiem a, a neihdan ding a a zillawm giap ahi sih a, a pienpi lungput apat a hoitah leh a baihlam a hing suohkhie ahi. Sakhuo a kuoltuhtute a hi zing bangin, ama khu amah a kiletsah, amah leh amah dihtat a kisah leh amah a kithupisah mi ahi sih hi. Sakhuo a kuoltuhtute toh vei tamtah ka kimu a, amaute khu amau hiina sang a sangzaw a kigen, kiliansahna a dim, amau ngaituona gen ding a kisai, amau sienthouna a kipahthang, leh tuabang dangte a nei ka mu zing hi. Hinanleh Unaunu White khu tamte zousie toh a kilebul a um ka mu zing hi.

GSAM 470Mizawngte Lawmpa

GSAM 470.2“Koizong, a genthei pen leh a kingiem pen in zong, thuhilna leh lungmuonna nga dingin a nuolkhiet a um lou in, ama kungah suotah a a pei thei hi. Ama'n tasamte, neih neiloute leh thuohgimte a ve zing a, a poimawte uh a phu a, a thu uh a gensah zing hi.

GSAM 470.3“Ama banga Pasian launa a ma a koih zing mi dang khat toh ka kithei ngeisih hi. Pasian kungah guntah a thumna neilou in bangmah a sep pan sih hi. Pasian thu khu chingthei tah leh tawntungin a zil hi. Unaunu White in thu a gen vei za tampi ka za a, a Theipinate zousie a kipatna apat a tawpna tan ka simkim a, a tamzaw khu vei tamtah ka sim hi. Tua zousie sungah chindan sia thu khatbeek, ahisihleh a siengthou sih leh Khristian dan toh kituohlou sil khatbeek ka mu thei ngeisih hi; Laisiengthou leh Khrist apat pialmang sahna khat zong a um sih hi. Hinanleh tuana ah Pasian thu man ding, Jesu it ding, Laisiengthou gingta ding leh a sungah tawntungin suikawm ding a guntah a ngenna thute ka mu hi. Theipinate apat simzawhlou vei hagau lam phattuomna lienpi ka tan hi. A dihtah in, Pasian a ka ginna tlinlouna, ka kipiehkhietna tlinlouna leh hagaute hundam ding a ka hanciamna tlinlouna taihil a um ka kisah lou a ka sim hun a um ngeisih hi. Thukhen theina, hagau lam thu theikhenna tawmbeek ka nei ahileh, Theipinate khu Laisiengthou toh hagau kibang leh thugen lam kibang ahi, ka chi hi.

GSAM 470.4“Kum sawmthum [tuin kum sawmguh i chi thei ta] sungin tam Theipinate khu i mite lahah gingta leh sim ahi hi. Tuami'n amau tungah bang a bawlsah diei? Pasian daan apat amau a pialmangsah em? Khrist a a ginna uh a nusiasah em? Laisiengthou a paimangsah em? Mi sia, chindan gilou mite a suohsah em? Khristian hattuom pawl dang koizong toh khaikhin chiengin amaute khu amaute sang a niemzaw sih ding ahi chi ka thei hi.

GSAM 471.1“Ka chiamnget thu khat a um a, tuami khu Unaunu White Mengmunate dou nasapente'n zong ama khu Khristian ahi chi a pom uh ahi. Bangchin tuami a pom thei uh hiei chi ka thei sih hi. Ama khu khep a um ahi chi'n a gensiem ding a hanciam uhi. A hinkhuo pumpi ah mualphouna khatbeek a kawh theisih ua, a laigiel zousie ah chindan sia thu khatbeek zong a kawh theisih uhi. A laigiel tamtah khu a hoi ahi a, a thugen zousie banga hing mi tapou khu Khristian hoi, vanram tung ngei ding mi a hi ding, chi a pom kul uhi. Ama khu dawi vanzah, Setan huhahkhum mi ahi a, ahisihleh a laigielte khu chindan sietna ahisihleh a lungsim ngaituona ngawlte ahi leh, tam khu lamdanghuoi lua ahi hi.”

GSAM 471Midangte'n Laigielte Thu A Theipih Uh

GSAM 471.2Pi White laigielte umna i hunbi a suoh laibute i hahkhiet chiengin, a kingiem pen, Pasian lau leh a kung a kipiehte'n tua laibute a sui uhi. A simte uh thu a genna uah, “Pi White laigielte i ngaihsah dieh uhi. Tuate khu hinkhuo ah zui thei a, mi khu Mangpa kung a nai semsem sah ding leh kingiem zaw, Pasian lau zaw leh a kung a kipie zaw sah ding thuhilnate a dim ahi. Tam laigielte khu Laisiengthou thugen dan toh a kibang mama ziehin, i sim lai un Pi White in tam dan a laigielna ding khu Pasian huhahkhumna a tang ngei ding ahi i sa uhi,” a chi uhi. I khantanhoi nasemte toh laihah a kizang mi sawm tampite'n tamchibang Theipina a pie uhi. Amaute'n Pi White ngaituonate khu Mengmuna siengthou a a tan ahi chi thu thutawm negen zong a theisih uhi.

GSAM 471Douna Hing Kipatna

GSAM 471.3Tam silpieh in mite lungtang a a bawlsah dan i muhsa ziehin, tam silpieh kilangna douna khu koi apat leh bang zieh a hing kipan hiei, leh a doute tungah bang a tung ta hiei, chi dotna ahing um hi. 1852 apat tam thu chingthei taha ka etkhietna ah, tam kilangna douna tamzaw khu a chindan tlinlounate, a chindan sietnate, ahisihleh a hinkhuo a a zui dan dihlou khat zieh a taihil a umte apat hing kipan ahi chi ka mu hi. Taihil a umte tamtah in, Theipina in amau a gen dan banga sia ahi sih uh chi'n a niel ua, a kunga kipie taihilna toh a kikalleh zong thutah a tukip thei veve uh chi'n a etsah ding a hanciam uhi. Hun in a etsah danin, tuabang mite a tamzaw pen in a ginna uh a nuasie ua, a pawl apat a pum a a pawtsan uhi. Pawlkhatte'n a khielna uh a mu ua, thutah a kipzaw in a tawi uhi. Tam silpieh doute khu Mangpa pui ahi uleh, bang ding a a hagau lam hinna uh a mang a, Pasian apat a nungkia uh hiei, chi dotna ahing um hi. I Hundampa daan khu thingkung pen a ga a thei ding ahi. Aman “thingkung sia in ga hoi a suong theisih” chi nasatah in a kipsah hi.

GSAM 472Douna A Lawchinglouhna

GSAM 472.1Pi White Theipinate dou ding a kipawlkhawm a, Theipinate a nusiemang phet uh leh a nasep uh a lawching nasatah ding hi chi a puon uh hunte i theizing uhi. Hinanleh a kinepnate uh tangtunna ah a lawchinglou sieng uhi. Kum tampi a do zawh nung un, kum sawmli leh kuo masang a amau banga umte'n a sep dan sang a tamzaw in Khawlni thutah leitung a a zahsah uh chi etsahna bangmah a pie sih uhi. Amaute nasep khu Mangpa nasep tuom ahi leh, bang ding a a Thupuoh uh a khantou tamzawlou hiei?

GSAM 472Lawchinna Koi Ah A Um Hiei?

GSAM 472.2Tualeh Pasian thupiehte leh Jesu ginna leitung a puonzahna Thupuoh,—Thugentheina silpieh kilangna leh tuami thuhilna, zilsahna leh taihilnate toh kizop Thupuoh,—i en chiengin, a kipatna mah apat tuin tan kip tah leh a tawntung a a masawn dan i mu uhi. Tua silpieh tungtawn a Mangpa thuhilnate ngaikhie a, Mangpa tha a masawnin, i etsahsa bangin Thupuoh khu leitung kimvel ah a tung ta a, “nam chin, beh chin, ham chin leh mi chin” kungah kin in a lut tou hi.

GSAM 473.1A hun peisa khantouna thu ah, Pasian in a gen, “Nang dou ding a kisiem galvan bangmah a lawchingsih ding hi,” chi thu a tangtung ta hi i chi thei uhi. A dihtah in, Khrist hing pei niveina kalsuonna thupi kipatna leh khantouna a tuin tan lawchinna ah Pasian khut a kilang hi. Hing tung ding hun a dingin zong, “Na ma ah kot kihong ka koita a, koima'n a kha theisih ding hi,” chi a thu a tangtung ngei ding hi chi i muong uhi. Tam muonna toh kician tahin tambangin la i sa thei uhi:—

GSAM 473.2“Aziehpen ama ei toh a na um a, Tuin zong ei toh a um nalai a, A tawpna tan ei toh um dingin Thu ei a chiamta hi.”

Notes

  1. Kihilna 3:8. ↩
  2. Kihilna 3:3, ↩
  3. Kihilna 3:10, 11, ↩
  4. Late 124:1-8. ↩
  5. Isai 56:1, 2, ↩
  6. Isai 58:8, 13, ↩
  7. Amos 7:2, ↩
  8. Zekariah 4:10, ↩
  9. Zekariah 4:7. ↩
  10. Solomon La 6:10, ↩
  11. Jakob 5:10, ↩
  12. Ephesa 4:12-16, ↩
  13. 1 Korinth 1:6, 7, ↩
  14. 1 Thessalonika 5:5, 20, 21, ↩
  15. Kihilna 12:17, ↩
  16. Kihilna 19:10, ↩

Note

Back