Wase 28 — Na katuba e sega ni dua na tamata e sogota rawa
GSAM 462.1“Au sa biuta e matamu e dua na katuba sa dola tu, ka sega ni dua na tamata e sogota rawa; ni sa lailai na nomu kaukauwa, ia ko sa vakabauta na noqu vosa, ka sega ni cakitaka na yacaqu.”1
GSAM 462.2Oqo na vosa sa tukuni vei ira era tiko ena ituvaki vakafilatelifia ni soqosoqo lotu ni kosipeli. Na soqosoqo lotu oqo sa tubu mai na kena kacivaki ni sa voleka na lako mai i Karisito, se ko ira era a taura matua na ka era a rogoca me baleta na ka oqo; ni sa kaya ko koya me baleta na soqosoqo lotu mai Sariti (na kena sa liu sara vei Filatelifia), “O koya mo nanuma kina na ka ko sa rawata ka rogoca, ka taura matua, ka veivutuni. Ia kevaka ko sa sega ni vakatawa, au na lako yani vei iko me vaka na daubutako, ka ko na sega ni kila na tiki ni siga ka'u na lako yani kina vei iko.”2
GSAM 462.3O koya gona, na soqosoqo lotu mai Sariti sa rogoca na ivakavuvuli ni sa voleka na nona lako mai na Turaga. Ko ira era a taura matua na ka era a rogoca, era a toso tiko ena dina ni sa tokitaki na “itutu ni cina,” ka ra sa yaco me soqosoqo lotu mai Filatelifia, sa kaya kina ko koya, “Ni ko sa vakabauta na vosa ni noqu vosota, au na maroroi iko talega mai na gauna ni veivakatovolei, ena yaco ki vuravura taucoko, me vakatovolei ira era sa tiko e vuravura. Raica, au sa lako kusarawa mai: taura matua na ka sa tu vei iko, me kakua ni dua e kauta tani na nomu isala.”3 O koya gona, sa kaya ko koya ki na soqosoqo lotu oqo mai Filatelifia, “Au sa biuta e matamu e dua na katuba sa dola tu, ka sega ni dua na tamata e sogota rawa.”
GSAM 462.4Oqo gona na itukutuku matata ni iVolatabu ni ko ira sa uqeti ena nona veivakarautaki na Kalou me ra lako yani ka vakasalataki vuravura ena nona lako mai na Turaga, ka masuti ira na tamata me ra vakavakarau me ra veitata kei na Kalou, sa tiko vei ira na nona loloma vakatabakidua na Kalou ena nodra cakacaka. Era na tovolea na tamata me ra vakataotaka, me ra vakadruka na nodra sasaga, me ra sogota na “katuba ni vunautaki ni vosa,” ia sa rogo cake tikoga na domo ni Kalou e cake ni ue kecega, “Au sa biuta e matamu e dua na katuba sa dola tu.”
GSAM 463Na toso ena vitusagavulu ka va na yabaki
GSAM 463.1Ena veitabana sa oti ni ivola oqo, eda sa dikeva vakalekaleka na loma ni vitusagavulu ka va na yabaki, mai na 1831 ki na 1905, ka vakamuria na kena tekivu kei na kena toso na itukutuku ni lesu mai i Karisito, vakauasivi na itukutuku ni ikatolu ni agilosi. Keimami sa vakaraitaka ni sa tekivu na itukutuku oqo ena sega ni kilai kei na dravudravua, ka sa toso tiko ena igu kei na kaukauwa sa tubu tiko ena veiyabaki, me yacova ni sa wavoliti vuravura na kena veitabana ni kaulotu. E sega sara ni tubu vinaka vakaoqo baleta ni sa taleitaki ena yalo vakayago na itukutuku oqo; ni sa vakaliuca na siga ni vakacecegu ni Turaga, ka sa kauta mai e dua na kauveilatai bibi na kena maroroi, ni sa vinakati kina me tawasei tani mai na veivoli kei ira na lewe i vuravura ena siga ni cakacaka osooso duadua ni macawa. E sega talega ni toso baleta ni sega na veisaqasaqa; ni sa sotava oqori mai na kena itekivu, ka sa kaukauwa sara na veisaqasaqa mai taudaku, ka vaka kina na veilecayaki era vakavuna na tamata era sega ni sorovaki ira vua na Kalou ka ra sa curu mai vakalekaleka ki na isoqosoqo. Me baleta na ituvaki sa vakavuna na nodra inaki kei na nodra sasaga na meca mai taudaku, e ganita me da kaya ena vosa i Tevita na dauvola same, “Kevaka sa sega ni tiko ena noda yasana na Turaga, me kaya mada ko Isireli: kevaka sa sega ni tiko ena noda yasana na Turaga, ni ra sa tu cake na tamata me ra saqati keda: ke ra sa qai tilomi keda bulabula, ni sa waqa mai vei keda na nodra cudru: ke sa qai luvuci keda na wai, ke sa lako e delai keda na uciwai: ke sa qai lako e delai keda na wai voravora. Me vakavinavinakataki na Turaga, o koya sa sega ni soli keda me da laukata e batidra. Sa dro bula na yaloda me vaka na manumanu vuka mai na nodra icori na daucorivuka: sa ramusu na icori, ka da sa dro bula. Na noda ivukevuke sa ena yaca ni Turaga, o koya ka buli lomalagi kei vuravura.”4
GSAM 464Na ivukevuke mai vua na Turaga
GSAM 464.1Sa tukuna na Turaga ni sa biuta e matadra na nona tamata “e dua na katuba sa dola tu, ka sega ni dua na tamata e sogota rawa.” Sa sega gona ni veivakurabuitaki ni sa toso tikoga na itukutuku. Oqo na itukutuku ni Kalou vei ira na tamata, ka na rawata dina na kena inaki. Ena Vakatakila 7:2, na cakacaka ni vakarautaki ira na tamata me ra tu dei ni sa yaco mai na siga levu ni cudru ni Kalou sa vakatakarakarataki ena dua na agilosi “sa lako cake mai na tu ni siga,” se, me vaka na nodra vakadewa eso, “me vaka na cabe ni siga.” Raica na kida ni mataka—sa rairai taumada mai na veitautauri ni rarama mai na tu ni siga; sa cokovata na veika oqo ka sa qai ramase cake me yacova ni sa rairai matata na matanisiga levu. Ni sa cabe cake na “Tui ni Siga” ki na lomalagi e cake sara, sa tubu tikoga na kena rarama, na kena katakata, kei na kena kaukauwa.
GSAM 464.2Sa vakakina na toso ni itukutuku ni ikatolu ni agilosi mai na 1848, ni sa qai vakamatatataki na veidina sa okati kina; mai na gauna oya keimami sa vakaraitaka na tubu matata ka tudei, sa veivakurabuitaki. E sega ni dua tale na vuna keimami rawa ni vakamacalataka kina oqo, ia ni sa vakayacora na Turaga na nona vosa vei ira sa “maroroya na siga ni vakacecegu me kakua ni vakadukadukalitaki,”5 ena gauna oqo ni sa voleka mai na nona veivakabulai, ka ra sa tarova na yavadra mai na cakava na ka era sa vinakata ga ena nona siga tabu na Kalou; ka ra sa maroroya kece kina na “ivakaro ni Kalou” ena “vakabauta nei Jisu,” me vaka sa tukuni ena itukutuku ni ikatolu ni agilosi ena Vakatakila 14. Sa kaya na Turaga me baleti ira oqo ena gusu i Aisea na parofita, “Ena qai cadra mai na nomu rarama me vaka na mataka, ka na tubu kusarawa na nomu bula vinaka: ia na nomu yalododonu [“na Turaga na noda yalododonu.” Jeremaia 23:6] ena liutaki iko; ia na lagilagi ni Turaga ena muri iko me maroroi iko.”6 Ni sa tu na veivakadeitaki vakaoqo, e rawa vakacava me da namaka e dua tale na ka, ia me vuavuaivinaka ga na cakacaka? “Kevaka sa totaki keda na Kalou, ko cei me noda meca?”
GSAM 464Era na tubu vinaka vakacava oqo?
GSAM 464.3Ni da raica na ituvaki ena 1846, ni sa tekivu vola ko Talatala Joseph Bates na imatai ni ivola oya, na imatai sara ni ivola me baleta na siga ni vakacecegu ka tabaka na lewe ni Lotu ni Kavitu ni Lesu Vakarua Mai, ka sa tinikarua veimama ga na sede na ilavo taucoko sa tu vua e vuravura, ka sa gadrevi me vakayagataka oqori ni se bera ni cava na imatai ni nona siga ni volavola; ka da raici Talatala James White tale ni sa tabaka na imatai ni nona ivola lailai, Na Dina ni Gauna Oqo, ena ilavo sa rawata ena tamusuki co ena were ni co mamaca, ka vakauta wale na ivola vei ira kece era na wilika, ka tukuna ni sa itukutuku me kau ki na iyalayala kei vuravura,—ni da raica na veitekivu lalai oqo, e rawa me dua e taroga ena nodra vosa na tamata ena gauna i Emosi, “Ko cei ena vakatuburi Jekope? Ni sa lailai ko koya.”7 Ni da vakatauvatana oqori kei na ituvaki ena 1905, ni sa tabaki tiko na veidina ni itukutuku ena ruasagavulu na vale ni tabaki ivola, sa tu ena veiyasai vuravura, ka ra sa dau cakacaka ena nodra igu taucoko me vakarautaki kina na ivola kece sa gadrevi me wiliki, eda sa kaya dina rawa, Raica, “e dua na katuba sa dola tu” ka sega ni dua na tamata sa sogota rawa me yacova oqo.
GSAM 465.1Me baleti ira ena gauna e liu era nanuma ni na sega sara ni rawata na kena inaki na cakacaka, eda rawa ni kaya, ena vosa ka vunauci ira kina na parofita ko Sakaraia era nanuma me ra vakataotaka na cakacaka ni Kalou ena tarai Jerusalemi tale, “Ko cei sa beca na siga ni veika lalai?”8 Me baleta na veika era sa rairai me vaka na veiulunivanua ni dredre ena nodra sala, sa kaya na Turaga ena gusu ni parofita,—
GSAM 465Sa vakayacori na ulunivanua me vanua buca
GSAM 465.2“Ko cei ko iko, na ulunivanua levu? Ko na yaco mo vanua buca e mata i Serupepeli; ka na kauta mai ko koya na vatu ki delana ena kaila, ka kaya, Me tiko kina na loloma, na loloma.”9 Sa vakaoqo na cakacaka ni itukutuku ni ikatolu ni agilosi, ka na vakakina me yacova ni sa kau mai na “vatu ki delana,” se, ena dua tale na vosa, me yacova ni sa vakaoti na cakacaka.
GSAM 465.3Raici ira mada na lewe vica ena 1846, era dravudravua ena iyau, ka dravudravua ena ka kece vakavo ena vakabauta na Kalou kei na iyau ni dina, ka raica na kena sa tubu me levu vakacava na nodra cakacaka. Vakasamataka na veika ni cakacaka sa tu oqo, na veivola sa vakarautaki oti, vakadewataki, ka tabaki ena veivosa kei vuravura, kei na vica vata na drau na daukaulotu ena volitaki ivola era sa kauta tiko na veivola oqo ki na nodra veivale na tamata, ka kena isau e $400,000 ena veiyabaki. Ni sa tomani tiko na nona veivakalougatataki na Kalou ena cakacaka, eda rawa ni namaka na vuavuaivinaka. Ni sa tu na veika ni cakacaka kei na veitabana oqo, ka sa tubu tiko ena veivula, ni da sa vakararavi vei Karisito, e sega ni dua tale na ka me da namaka vakavo na ka sa seretaka ko Solomoni me baleta na soqosoqo lotu ni Kalou, ni sa lako mai na nona ituvaki e na lekutu, “sa vakararavi ena liga ni nona Daulomani,” ni sa vakaraitaki koya me rai yani, “sa totoka me vaka na vula, sa serau me vaka na matanisiga, ka sa rerevaki me vaka na mataivalu sa vakakuila.”10
GSAM 466Sa vukei ena isolisoli ni parofisai
GSAM 466.1E sega walega ni da sa raica ni sa dolava na sala na nona veivakarautaki na Turaga me tete kina na dina, ka sa salavata na nona veivakalougatataki vakasakiti kei na sasaga me muri na sala sa vakarautaka ko koya, ia ena kena tekivu kei na kena toso na itukutuku ni ikatolu ni agilosi, sa veivosaki ko koya kei ira na nona tamata ena isolisoli ni parofisai. E sega ni dua na ivakatakila vou oqo me sosomitaka na iVolatabu, se me vakatanitaka na ivakavuvuli ni iVolatabu, ia me vakaraitaka na veivanua, ena gauna oqo, sa rerevaki kina na gole tani mai na rawarawa ni kosipeli i Karisito, kei na veivanua era sa voleka kina na tamata me ra rawai ena ivakarau ni gauna oqo, ka vakacegu ena irairai vakalotu ka sega na kena kaukauwa.
GSAM 466.2Ni da raica na ka oqo ena nodra ivakaraitaki na parofita ni gauna e liu,11 ka sa solia vei keda na Turaga me dua na ivakarau me vakatovolei kina na veivakatakilai vakaoqo, eda sa kunea na vuna vata ga sa gadrevi kina na veivakatakilai oqo edaidai me vaka ena gauna oya; oya, ni rawa ena veigauna kece me rawai na tamata me gole tani mai na sala ni dina ena vuku ni ivakavuvuli kei na ivalavala sa kaukauwa ka kilai tani kina na gauna oya. Ni sa vosa na yapositolo ko Paula me baleta na kena vakatakilai na isolisoli sa biuta na Turaga ena soqosoqo lotu, sa kaya ni sa soli oqori “me vakavinakataki sara kina ko ira na yalosavasava, me ia na cakacaka ni veiqaravi, me vakatataki cake na yago i Karisito; me da yacova kece na duavata ni vakabauta, kei na kila na Luve ni Kalou, me da tamata vinaka sara, me yacova na ivakarau ni bula sa sinai vei Karisito; me da kakua ni gone tale, me veitosoyaki, ka veikauyaki ena cagi kece ni ivakavuvuli, ena nodra ilawaki na tamata, kei na nodra vere vakavuku, era sa lawa koto kina me ra veivakacalai; ia ni da vosa dina ena loloma, me da tubu cake vua ena ka kecega, sa ulu ko koya, io ko Karisito: sa tubu mai vua na yago taucoko, sa veisemati vakavinaka ka vauci vata ena ka sa solia na kena isema yadua, me vaka na cakacaka kaukauwa sa vakayacora na tikina yadua ena kena ivakarau, ka sa vakatubura kina na yago me vakatataki koya cake ena loloma.”12
GSAM 467.1Na veivakalewai vata ga sa tau tiko me saqata na kena vakatakilai na isolisoli ni parofisai ena gauna oqo, e rawa ni tau talega ena kaukauwa vata ena gauna e liu; oya, ni sa tu vei keda na iVolatabu, o koya eda sega kina ni gadreva na isolisoli vakaoqo. Ia na iVolatabu vata ga oqo sa tukuna vei keda ni sa biuta ko Karisito na isolisoli oqo ena soqosoqo lotu me cakava na kena cakacaka me yacova ni “sa yaco mai na ka sa vinaka sara [na ituvaki sa vinaka sara],” ka me “kakua ni dravudravua ena dua na isolisoli, ni dou sa waraka na nona lako mai na noda Turaga ko Jisu Karisito.”13
GSAM 467Na cava eda gadrevi ira kina na parofita?
GSAM 467.2E rawa ni ra nanuma na tamata ena gauna e liu ni sa tu vei ira na lawa ni ivalavala dodonu ni Kalou, sa vola na iqaqalo ni ligana ena vatu raraba; ni sa tu vei ira na vunau, na lewa, kei na ivakasala sa tukuna vei Mosese na gusu ni Kalou, ka sa volai vakavinaka; ia na cava tale sa gadrevi? Ia e dina ni sa tu vei ira na veidina uasivi kece oqo, sa vinakata na Kalou me vosa vei ira “ena veigauna kei na veisala e vuqa ena gusudra na nona parofita yalosavasava.”
GSAM 467.3Eda sa kunea ni na ivakadinadina era sa tukuna na veiparofita, me vakataki Aisea, Jeremaia, Isikeli, Taniela, Osea, kei na so tale, era sa vakavuvulitaka kece na yavu levu vata ga me baleta na talairawarawa vua na Kalou; ia na parofita yadua sa tiko na nona ivunauci vakatabakidua vei ira na tamata ena nona gauna, ena vuku ni nodra dau rawai me ra gole tani mai na yavu tabu ka yalosavasava ni ka dodonu ena ivakarau sa kilai levu ena gauna sa soli kina na parofisai.
GSAM 468Na gadrevi ni isolisoli
GSAM 468.1E rawa ni tukuni ni sa tu vei keda na ivakavuvuli uasivi ni iVolatabu ni Veiyalayalati Makawa, ka sa tu talega na nona vosa sara na noda iVakabula, kei na nodra vosa na yapositolo, ia na cava eda gadreva kina e dua tale na rarama? Ia sa dina tikoga ni ko ira na yapositolo yalosavasava vata ga oqo era sa dusia na veisiga mai muri, ni na “yaco mai na veigauna rerevaki,” ka ra na “vakarairai vakalotu, ia era sa cakitaka na kena kaukauwa,” ka ra sa tukuna talega vei keda ni “ra na biuta na vakabauta eso, ka vakarorogo ki na veiyalo dauveivakacalai kei na nodra ivakavuvuli na tevoro.”
GSAM 468.2Ena vuku ni veika kece oqo, ko ira na tamata sa tukuna ko Paula ni sa volavola vei ira mai Cesalonaika, era na sega ni tiko ena butobuto me yaco vakasauri vei ira na siga i Karisito me vaka na daubutako, ia era na luve ni rarama, sa vakaroti me ra “vakatovolea na ka kecega” me baleta na “parofisai,” ka me ra “taura matua na ka sa vinaka.”14 Oqo sa tautauvata kei na kena tukuni vei ira ni ko ira na tamata era na waraka na nona lako mai na Turaga ko Jisu Karisito, ka ra na qai kune ni ra sa vakarau tu ena siga oya, ena tiko vei ira na veivakatakilai “vinaka” ka dina ni isolisoli ni parofisai.
GSAM 468Na ivakatakilakila ni vakataotioti
GSAM 468.3Eda sa tiko ena gauna sa levu kina na ivakatakilakila ena veiyasana kece ni sa voleka sara na siga ni Turaga. Eda sa tiko sara ena gauna me ra tubu mai kina e dua na matatamata era na maroroya kece na ivakaro, ka ra na “taura talega na ivakadinadina kei Jisu”15—na “Yalo ni parofisai.”16 Na cava eda sa kunea? Ni sa tubu mai ena loma ni onosagavulu na yabaki sa oti e dua na matatamata vakaoqo, era sa kauta na itukutuku vakaoqo, ka sa vakatakilai vei ira na isolisoli ni parofisai. Ni da vakatovolea na isolisoli sa vakatakilai ena vukui Marama E. G. White ena ivakarau ni iVolatabu, eda sa raica ni sa donu kina ena ka kecega. Mai na itekivu ki na ivakataotioti, ena veika kece sa vola ko Marama White, sa sega ni kune e dua na iyatuvosa sa solia vakalailai na galala me caka na ivalavala ca, se sa vakadonuya vakalailai sara na gole tani mai na vosa ni Kalou. Na veivolavola oqo sa sega vakadua ni vakalevulevui ira me ra uasivita na iVolatabu, ia era sa vakarota tikoga me vulici vakavinaka sara na vosa ni Kalou, ka dusia ni sai koya na ivakarau levu ena dikevi kina na noda bula ena veilewai mai muri. Ena nona veivolavola sa laveti cake kina vei keda ko Karisito me noda ivakaraitaki duadua ga me da muria. Sa tukuni sara vakamatata ni sai koya duadua ga na noda inuinui ni qaqa eke, na noda idrodro duadua ga mai na cudru sa bera mai, na yaca duadua ga kei na sala duadua ga eda na vakabulai kina.
GSAM 469E dua na ivakacaucau mai na veikilai voleka
GSAM 469.1Me baleti Marama White kei na ituvaki ni nona cakacaka, sa soli eke na veivosa sa tarava, ka vola ena 1877 e dua sa kilai koya ka sa vulica na nona cakacaka ena vuqa na yabaki; ia ni sa oti e rauta ni limasagavulu ka tolu na yabaki ni vakatovolei, na veiyabaki ni vakaraica vakavinaka, au sa vakadonuya vakadua na vakasama kece sa tukuni kina:—
GSAM 469.2“Me baleta na itovo vakarisito nei Ganequ White, au kerea me'u tukuna ni'u nanuma ni'u kila e dua na ka me baleta oqo. Au sa veikilai kei koya ena tinikawalu na yabaki,—sa sivia na veimama ni gauna era sa bula kina na noda tamata vakaisoqosoqo. Au sa dau tiko vakavuqa ena nodratou vuvale, ka so na gauna e vica vata na macawa. Eratou sa dau tiko vakavuqa ena neitou vale kei na neitou vuvale. Au sa lako vata kei iratou voleka ni veivanua kece; au sa tiko vata kei rau vakataki keitou kei na matanalevu, ena soqoni kei na taudaku ni soqoni, ka sa vinaka sara na noqu gauna me'u kila kina e dua na ka me baleta na nodrau bula, na nodrau itovo, kei na yalodrau ko Taciqu kei Ganequ White. Me vaka ni'u sa italatala, au sa dau veitaratara kei na veimataqali tamata kece, kei na veimataqali itovo kece, ka'u sa nanuma kina ni'u rawa ni kila vakalailai na ituvaki ni dua na tamata, ke sa oti mada ga e vica na yabaki ni veikilai voleka.
GSAM 470.1“Au sa kila ni ko Ganequ White sa marama sega ni dau vakalevulevui koya, sa yalomalumalumu, yalololoma, ka itovo vakaturaga. Na veika oqo ena nona itovo sa sega ni ka e vakarairaitaka wale se vulica ga, ia sa tubu totoka ka rawarawa mai na nona itovo dina. Sa sega ni dokadokai koya, sega ni nanuma ni sa yalododonu ga ko koya, ka sega ni vakabauti koya me tamata bibi, me vaka na nodra ivakarau na tamata dau vakalotu vakasivia. Au sa dau veitaratara vakavuqa kei na tamata vakaoqo, ka'u sa dau kunei ira ni ra dau vakalevulevui ira, sinai ena viavialevu, kusarawa me solia na nodra nanuma, dokadokataka na nodra yalosavasava, kei na veika vakaoqo, ia au sa dau kunei Ganequ White ni sa duidui sara mai na veika kece oqo.
GSAM 470E dua na nodra itokani na dravudravua
GSAM 470.2“E rawa ni dua ga na tamata, ko koya mada ga e dravudravua ka lolovira duadua, me lako vua ena galala me vakasalataki ka vakacegui, ka na sega ni vakasevi tani. Sa dau qaravi ira tikoga era sa vakaleqai, era sa dravudravua sara, kei ira era sa rarawa, ka vakarautaka na ka me yaga vei ira, ka vosa ena vukudra.
GSAM 470.3“Au sa sega vakadua ni veikilai kei na dua tale na tamata sa nanuma tikoga na rerevaka na Kalou me vakataki koya. Sa sega ni tekivutaki e dua na ka ni sa sega ni ia taumada na masu vagumatua vua na Kalou. Sa vulica vakavinaka ka vakawasoma tikoga na vosa ni Kalou. Au sa rogoci Ganequ White ni vosa e vica vata na drau na gauna, au sa wilika vakavinaka kece na nona ivakadinadina, ka vuqa vei ira au sa wilika vakavuqa, ia au sa sega vakadua ni kunea e dua na iyatuvosa dukadukali ena kena kece, se dua na ka sa sega ni savasava sara ka vakarisito; sa sega e dua na ka sa vagolea tani mai na iVolatabu kei Karisito; ia au sa kunea kina na veimasuti vagumatua sara me talairawarawa vua na Kalou, me lomani Jisu, me vakabauta na iVolatabu, ka dikeva tikoga. Au sa rawata na veivuke levu vakayalo, ena vuqa na gauna sa sega ni wiliki rawa, mai na ivakadinadina. E dina, au sa sega vakadua ni wilika ka sega ni vakila na veivunauci ena lailai ni noqu vakabauta na Kalou, lailai ni noqu sorovaki au vua, kei na lailai ni noqu gumatua me vakabulai na yalo. Kevaka sa tiko vei au na kila ka kei na yalomatua vakayalo, au sa tukuna ni sa vu mai na Yalo vata kei na iVolatabu na ivakadinadina, ka sa duavata kei na kena ibalebale.
GSAM 470.4“Ena tolusagavulu na yabaki [eda sa kaya rawa oqo ena onosagavulu na yabaki] era sa vakabauta ka wilika tiko na ivakadinadina oqo na noda tamata. Sa cakava vakacava oqo vei ira? Sa vakagolei ira tani li mai na lawa ni Kalou? Sa vakavuna li me ra biuta na vakabauti Karisito? Sa vakavuna li me ra biuta na iVolatabu? Sa vakavuna li me ra tamata ca ka dukadukali? Au sa kila ni na kune ni sa vinaka na nodra bula ni ra vakatauvatani kei na dua ga na isoqosoqo lotu vakarisito.
GSAM 471.1“E dua na ka au sa raica, oya ni ko ira era saqata vakaca sara na nona raivotu ko Ganequ White era sa vakadinata ni sa lotu vakarisito ko koya. Au sa sega ni kila se ra vakadinata rawa vakacava oqo. Era tovolea me ra vakamacalataka ena nodra kaya ni sa vakacalai ko koya. Era sa sega ni dusia rawa e dua na duka ena nona bula taucoko, se dua na iyatuvosa dukadukali ena nona veivolavola kece. Sa dodonu me ra vakadinata ni sa uasivi e levu na ka sa vola, ka ko koya yadua ena muria kece na ka sa tukuna ena dua na lotu vakarisito vinaka, ka na curu dina ki lomalagi. Sa ka veivakurabuitaki sara oqo, kevaka sa iyaya ni tevoro ko koya, ka uqeti koya ko Setani, se kevaka sa dukadukali na nona veivolavola se sa vakasama veilecayaki ga ni lomana.”
GSAM 471Era sa vakadinadinataka na veivolavola ko ira e taudaku
GSAM 471.2Ni sa vakau yani na neimami veivola sa tabaki vakawasoma ka tiko kina na ka sa vola ko Marama White, era sa vakasaqara ko ira sa yalomalumalumu sara, rerevaka na Kalou, ka yalodina vua. Ni ra tukuna na ka era sa wilika, era sa kaya, “Keimami sa taleitaka vakalevu na veika sa vola ko Marama White. Era yaga sara ena bula, ka sinai ena ivakavuvuli sa rawa ni kauta e dua me voleka vua na Turaga, ka vakayacori koya me yalomalumalumu cake, rerevaka cake na Kalou, ka yalodina cake vua. Na veivolavola oqo sa duavata sara kei na iVolatabu, ni keimami sa wilika, sa vaka me sa uqeti dina ko Marama White mai vua na Kalou me volavola ena sala sa cakava tiko.” Sa vakaoqo na ivakadinadina era tukuna e vica vata na ruasagavulu na tamata era sa veivolavolai kei ira na neimami daukaulotu, o ira talega era sa sega sara ni kila vakalailai ni sa soli vei Marama White na nona vakasama ena raivotu tabu.
GSAM 471Na ivurevure ni veisaqasaqa
GSAM 471.3Ni da sa raica na ka sa vakayacora na isolisoli oqo ena lomadra na tamata, sa tarogi, Sa tubu mai vei na veisaqasaqa ki na kena vakatakilai na isolisoli oqo, ka ena vuku ni cava? Ia sa yaco vakacava vei ira era saqata? Ni'u sa vakaraica vakavinaka na ka oqo mai na 1852, au sa kunea ni sa dau tubu vakalevu na veisaqasaqa ki na veivakatakilai oqo mai vei ira era sa vunauci ena vuku ni ca ni nodra itovo, ni nodra ivalavala cala, se ni dua na sala cala ena nodra bula. E vuqa vei ira era a vunauci era a kaya ni ra sega ni ca sara me vaka sa tukuna na ivakadinadina, ka ra na vakaraitaka ni ra sa taura matua rawa na dina e dina ga ni ra na saqata na ivunauci sa soli vei ira. Sa vakaraitaka na gauna ni ra sa cakitaka na nodra vakabauta e lewe levu sara vei ira vakaoqo, ka biuta vakadua na isoqosoqo. Eso era sa raica na nodra cala, ka taura matua cake na dina. Sa qai tarogi, Kevaka sa liutaki ira na Turaga era saqata na isolisoli oqo, na cava me yali kina na nodra bula vakayalo, ka ra vuki tani mai vua na Kalou? Na nona ivakarau na noda iVakabula, ni sa kilai na kau ena vuana. Sa vakadeitaka sara ko koya ni “na kau ca sa sega ni vua vinaka rawa.”
GSAM 472Na druka ni veisaqasaqa
GSAM 472.1Eda sa nanuma na veigauna sa tauyavutaki kina na veisaqasaqa ki na ivakadinadina nei Marama White, ka tukuni ni na vuavuaivinaka sara na nodra cakacaka ena gauna ga era na biuta tani kina na ivakadinadina. Ia sa sega sara ni yaco na ka era sa nuitaka. Ni sa oti e vica na yabaki ni veivala, era sa sega ni vakaraitaka e dua na ivakadinadina ni kena tete na dina ni siga ni vakacecegu e mata i vuravura me sivia na ka era a cakava na kedra mataqali e vasagavulu ka ciwa na yabaki sa oti. Kevaka sa nona cakacaka vakatabakidua na Turaga na nodra cakacaka, na cava sa sega kina ni vuavuaivinaka cake na nodra itukutuku?
GSAM 472Sa evei na vuavuaivinaka?
GSAM 472.2Ia ni da raica na itukutuku sa kacivaki kina ki vuravura na ivakaro ni Kalou kei na vakabauta nei Jisu,—na itukutuku sa salavata kei na kena vakatakilai na isolisoli ni parofisai oqo, kei na kena veivakasalataki, ivakavuvuli, kei na veivunauci,—eda sa raica ni sa toso dei ka tudei mai na kena itekivu sara me yacova na gauna oqo. Ni sa vakarogoci na nona ivakasala na Turaga ena isolisoli oya, ka toso yani ena nona kaukauwa na Turaga, na itukutuku, me vaka keimami sa vakaraitaka, sa wavoliti vuravura, ka sa tete tiko vakatotolo ki na “veimatanitu kecega, kei na veimataqali, kei na duivosavosa, kei na veimata tamata.”
GSAM 473.1Me baleta na kena toso ena gauna sa oti, eda sa kaya rawa, Sa vakayacori na vosa ni Kalou, ni sa kaya ko koya, “Na iyaragi kecega sa buli me saqati iko ena sega ni rawaka.” Sa dina ni sa rairai na liga ni Kalou ena vuavuaivinaka sa salavata kei na kena tekivu kei na kena toso na isoqosoqo levu ni Lesu Vakarua Mai oqo me yacova oqo, ia me baleta na gauna mai muri eda sa vakararavi ki na kena vakayacori dina na nona vosa, “Au sa biuta e matamu e dua na katuba sa dola tu, ka sega ni dua na tamata e sogota rawa.” Ena vakabauta oqo eda sa sere rawa ena yalodei kecega:—