Adventist Pioneer
Library
aplib.orgLibrary
Table of Contents
01 / 31
01 / 31

Okwanjura

John Norton Loughborough

GSAM 3.1HALI ebitabu bingi ebirukugasa ebyahikire ira omu mikono y’abantu; ensonga yange ey’okwongeraho ekindi eri ngu omu mpapura zinu ningamba ebintu bingi ebirukukwata ha Badventista, kukira muno Abadventista b’ekiro kya mushanju, ebitakabahoga byolekerwe abantu omu mulingo gunu. Ekindi, baingi abaikiriize omurimo omu myaka eyahanyuma, abatayeroliire ebintu ebirukubazibwaho, basabire muno ngu abo abaabandize omu murimo babagambire ebintu binu n’ebi baarabiremu. Nkaba manyiire entambuza y’okwija kwa kabiri omu 1843 na 1844, kandi kuruga ha biro 2 eby’omwezi gw’okubanza, 1849, ntairwe nintebeza enyegesa egi, nk’Omwadventista ha kubanza, kandi kuruga omu 1852 nk’Omwadventista w’ekiro kya mushanju. Nahabweki nikinshemeza “okugamba ebintu ebi nderoliire kandi ebi mpuliire.”

GSAM 3.2Nsooboroire ebirukukwata ha ntambuza y’okwija kwa kabiri, eyaranganire kuruga omu 1831 kuhika omu 1844 omu buli ihanga ery’ensi eryali rikurakurane.

GSAM 3.3Kuruga omu 1845 habaireho ebitebe ebindi eby’Abadventista ebyatebize, kandi ebikitebeza, ngu okwija kwa Kristo kuri haihi. Omu kiikaro ky’okuhondera ebyafaayo by’ebitebe ebi byona, ekigendererwa kyange kibaire kusoborraho muno okuimuka n’okugenda mumaisho kw’Abadventista b’ekiro kya mushanju. Nkira kwoleka ebintu Ruhanga ebi yakozeseze omu kurolerra kwe okukonyera abantu banu kukura, kuruga omu bworo n’omu ntandikwa entaito. N’obukiraaba ngu bali nka mitwaro ikumi yonka, abamu ha barukubarwanisa bagambire bati: “Amaani n’obwekambi ebi bakoresha omu kukora nibisobora kuletera omuntu kuteekereza ngu bali bukaikuru bubiri.”

GSAM 3.4N’abo abamanyire bike ha byafaayo by’Abadventista b’ekiro kya mushanju bamanyire ngu kuruga omu 1845 Muka E. G. White abaire n’ekicweka ekikuru omu ntambuza enu, omu kugamba n’omu kuhandiika. Kandi bamanyire ngu omurimo gwe gubaire n’ebikorwa eby’embaganiza, rundi ebiconco. Ntungire omugisa gw’okubaho n’okwerolera ekiconco kinu nikikora emirundi nka makumi ataano. Omu mpapura zinu njolekere ebyarango ebirukuhika nka abiri na mukaaga Muka White ebi yagambire kandi ebyahikiriire kimu nk’oku yagambire.

GSAM 4.1Okwongereza ha bintu ebi nyowe nyenka nderoliire, ntairwemu n’obuhamya bw’abantu abandi abaayeroliire, oburukukwata ha bi baarabiremu. Ebyabaho nk’ebi bisemerire kuba n’obuzito bwingi hali omusomi ow’omutima ogw’amazima kukira ebigambo ebibazibwa busa abo abatakabahoga ha bintu nk’ebi.

GSAM 4.2Ninkwasa abasomi ekitabu kinu, nininihira ngu, omu mugisa gwa Ruhanga, okusoma empapura zinu kulikonyera omurimo gwa Kristo kukura omu mitima mingi. Kandi ninyikiriza ngu boona obu baliba nibasoma balyeijuka ebigambo bya Paulo hali Abasesalonika: “Mulenge ebintu byona; mukwatire kimu ekirungi.”

GSAM -J. N. Loughborough. Mountain View, California, ebiro 1 eby’omwezi gwa kataano, 1905.

Note

Back