Adventist Pioneer
Library
aplib.orgLibrary
Table of Contents
31 / 31
31 / 31

Kauhanyo 28 — Munyako o Si Na Mutu ya Kona ku Kwala

John Norton Loughborough

GSAM 462.1“Ni beile fapil'a hao munyako o bulehile, mi ha ku na mutu ya kona ku u kwala; kakuli u na ni maata a manyinyani, mi u bolokile linzwi la ka, u si ka latula libizo la ka.”1

GSAM 462.2A ki ona manzwi a bulelwa ku bao ba mwa muinelo wa Filadelfia wa Kereke ya evangeli. Kereke ye ki yona ye ne i zule ka ku kutaza ku taha kwa Kreste ko ku atamezi, kamba bao ba ne ba swalezi ka kutiya ze ne ba utwile ka taba yeo; kakuli u bulela ka Kereke ya Sarda (ye ne i li fateñi pili a Filadelfia), a li: “Ha ku li cwalo, hupula mo u amuhezi ni mo u utwezi, mi u swalele ka kutiya, u bake. Haiba ha u na ku libelela, ni ka taha ku wena sina liba, mi ha u na ku ziba hola ye ni ka taha ku wena ka yona.”2

GSAM 462.3Ha ku li cwalo, Kereke ya Sarda ne i utwile tuto ya ku taha ka potlako kwa Mulena. Bao ba ne ba swalezi ka kutiya ze ne ba utwile ba zwelapili mwa niti ha “sibeya lebone” si susiwa, mi ba ba Kereke ya Filadelfia, ye a bulezi ku yona, a li: “Ka ku boloka linzwi la ku itiiseza kwa ka, ni na ni ka ku boloka ku zwa kwa hola ya muliko, ye ka taha fafasi kaufela, ku lika ba ba yahi fafasi. Bona, ni taha ka potlako; swala ka kutiya ze u na ni zona, kuli ku si ke kwa ba mutu ya ku amuha mukutwa wa hao.”3 Ki ku Kereke ye ya Filadelfia, ha ku li cwalo, kwa bulela, a li: “Ni beile fapil'a hao munyako o bulehile, mi ha ku na mutu ya kona ku u kwala.”

GSAM 462.4Cwale, fa ki polelo ye tiile ya Mañolo a Kenile ya kuli bao, ka ketelelo ya Mulimu, ba susueziwa ku ya ku lemusa lifasi ka ku taha kwa Mulena, ni ku kupa batu kuli ba itukise ku kopana ni Mulimu, ba na ni sishemo sa Mulimu se si iketile mwa musebezi wa bona. Batu ba kona ku lika ku ba palelwisa, ku sinya misebezi ya bona, ni ku kwala “munyako wa ku bulela,” kono linzwi la Mulimu li sa utwahala fahalimw'a lilata kaufela, li li: “Ni beile fapil'a hao munyako o bulehile.”

GSAM 463Ku Zwelapili mwa Lilimo ze 74

GSAM 463.1Mwa matali a buka ye a fitile lu bulezi ka bukuswani ka nako ya lilimo ze 74, ku zwa ka 1831 ku isa ka 1905, lu latelela ku zuka ni ku zwelapili kwa mashango a ku taha, sihulu lushango lwa mungelo wa bulalu. Lu bonisize mo lushango lu lu zwelile mwa ku sa zibahali ni bubotana, mi lwa zwelapili ka maata a ekezeha silimo ni silimo, ku fitela ha lu na ni misebezi ya bulumiwa ye likanyelize lifasi. Ha lu si ka atleha cwalo ka ku ba lushango lo lu tabisa lipilu za nama; kakuli fapil'a lona lu twala Sabata ya Mulena, ye ku i boloka ku tisa sifapano se si bukiti, ku tokwa ku tuhela misebezi ya likwebo ni lifasi mwa lizazi la viki le batu ba sebeza hahulu ku ona. Hape ha lu si ka zwelapili ka ku sa hanyezwa; kakuli ku hanyezwa ku bile teñi ku zwa kwa makalelo, ili ku ku maswe hahulu ku zwa kwa ndle, ku kopanela ni matata a tahisizwe ki batu ba ba si ka ineela ku Mulimu, ba ne ba kenile mwa likwata ka nakonyana. Ka za muinelo o tahisizwe ki milelo ni maiteko a lila za kwa ndle, lu kona ku bulela ka manzwi a Davida, muopeli wa Masamu, lu li: “Haiba Mulena n'a si ka ba kwa neku la luna, cwale Isilaele a bulele; haiba Mulena n'a si ka ba kwa neku la luna ha batu ba lu zuhela, inje ba lu mezi lu sa pila, ha buhali bwa bona bu lu tukela. Inje mezi a lu kuyubeti, inje mulapo u fitile fahalimw'a moya wa luna; inje mezi a maata a fitile fahalimw'a moya wa luna. A ku lebohiwe Mulena, ya sa lu neela ku ba lico za meno a bona. Moya wa luna u punyuhile sina nonyana mwa mulabo wa balabi ba linyunywani; mulabo u tumuhile, mi lu punyuhile. Tuso ya luna i mwa libizo la Mulena, ya ezize lihalimu ni lifasi.”4

GSAM 464Tuso mwa Mulena

GSAM 464.1Mulena u bulela kuli u beile fapil'a batu ba hae “munyako o bulehile, mi ha ku na mutu ya kona ku u kwala.” Ha ku makazi, ha ku li cwalo, kuli lushango lu zwelilepili ka kutiya. Ki lushango lwa Mulimu ku batu, mi lu swanela ku atleha. Mwa Sinulo 7:2 musebezi wa ku itukiseza batu kuli ba eme ha lizazi le lituna la buhali bwa Mulimu li taha u swanisizwe ka mungelo “ya nyukelela ku zwa kwa upa,” kamba, sina ba bañwi mo ba toloka, “sina ku caba kwa lizazi.” Bona ku sa kwa lizazi—pili mahlaseli a bonahala kwa upa; a kopana ni ku ekeza liseli ku fitela ha lizazi le lipatalalile li bonahala hande. Ha “Mulena wa Musihali” a nyukelela fa sibaka sa hae se si pahami hahulu, liseli la hae, kufumala ni maata li ekezeha hahulu.

GSAM 464.2Ki mo ku bilezi cwalo ku zwelapili kwa lushango lwa mungelo wa bulalu ku zwa ka 1848, ha liniti ze lu bupa li ne li beezwi ka ku utwahalisa, mi ku zwa fateñi lu bonisize ku hula ko ku bonahala, ko ku tiile, ko ku makaza. Ha lu koni ku talusa taba ye ka se siñwi, konji kuli Mulena u talaleza linzwi la hae ku bao mwa nako ye, ha puluso ya hae i li bukaufi ni ku taha, ba “boloka Sabata kuli ba si i silafatse,”5 mi ba kutisa lihutu la bona kwa ku eza ze ba lata mwa lizazi le li kenile la Mulimu. Cwale, ka “tumelo ya Jesu,” sina mo ku bulelezwi mwa lushango lwa mungelo wa bulalu lwa Sinulo 14, ba boloka “litaelo za Mulimu” kaufela. Ka za bao, Mulena a bulela ka mupolofita Isaya, a li: “Cwale liseli la hao li ka phatima sina makalelo a musihali, mi ku fola kwa hao ku ka taha ka potlako; mi ku luka kwa hao [‘Mulena, ku luka kwa luna.’ Jeremia 23:6] ku ka zamaya fapil'a hao; mi kanya ya Mulena i ka ba mulebeledi wa hao kwa mulaho.”6 Ka lisepiso ze cwalo, lu ne lu kona ku libelela se siñwi cwañi konji kuli musebezi u ka atleha? “Haiba Mulimu u kwa neku la luna, ki mañi ya kona ku lu hanyeza?”

GSAM 464Ba Ba Kona ku Atleha Cwañi?

GSAM 464.3Ha lu talima muinelo wa ka 1846, ha Mukulu Joseph Bates a kalile ku ñola buka yeo ya pili, ye ne li ya pili ku zwa ku Ma-Adventista ba Lizazi la Busupa ka taba ya Sabata, a na feela ni lisente ze 12 ni halefo ili zona mali kaufela a n'a na ni ona fafasi, mi a kupilwe ku a sebezisa lizazi la hae la pili la ku ñola li si ka fela; mi ha lu talima hape Mukulu James White a hatisa pepana ya hae ya pili, Niti ya Cwale, ka mali a n'a sebelelize ka ku kuta bucani mwa simu, a lumela pepa yeo mahala ku kaufela ba ne ba ka i bala, mi a bulela kuli ki lushango lo lu ka ya kwa mafelelezo a lifasi,—ha mutu a talima makalelo a manyinyani ao, a ka buza ka manzwi a batu ba mwa mazazi a Amosi, a li: “Jakobo u ka zuha ka mañi? Kakuli ki yo munyinyani.”7 Ha lu bapanya seo ni muinelo wa ka 1905, ha ku hatisa liniti za lushango ku ezwa mwa mandu a ku hatisa libuka a 20, a mwa libaka ze fapahane za lifasi, hañata a sebeza ka maata a ona kaufela ku fa batu ze ba tokwa ku bala, lu kona ku bulela luli, lu li: Bona “munyako o bulehile” o mutu a si ka u kwala ku fitela cwale.

GSAM 465.1Ka za bao ba mwa linako za kwa mulaho ba ne ba hupula kuli musebezi ha u na ku atleha ni hanyinyani, lu kona ku bulela ka manzwi a mupolofita Zakaria a n'a bulelile ku khalemela ba ne ba hupula ku palelwisa musebezi wa Mulimu wa ku yaha Jerusalema hape, a li: “Ki mañi ya nyefusize lizazi la lika ze nyinyani?”8 Ka za lika ze ne li bonahala sina lilundu za matata mwa nzila ya bona, Mulena a bulela ka mupolofita, a li:—

GSAM 465Lilundu le Li Fetuhile Libala

GSAM 465.2“U mañi, wena lilundu le lituna? Fapil'a Zerubabele u ka fetuha libala; mi yena u ka ntsha licwe la fahalimu, batu ba huwelela, ba li: Sishemo, sishemo ku lona!”9 Ki mo ku bilezi cwalo mwa musebezi wa lushango lwa mungelo wa bulalu, mi ku ka ba cwalo ku fitela ha “licwe la fahalimu” li tiswa, kamba, ka manzwi a mañwi, ku fitela ha musebezi u felile.

GSAM 465.3Mu talime batu ba banyinyani ba ka 1846, ba ne ba li babotana mwa mali ni mwa lika kaufela, konji mwa tumelo ku Mulimu ni mwa buñata bwa niti, mi mu bone mo musebezi wa bona u hulezi. Mu nahane ka lituso ze li teñi cwale, libuka kaufela li lukisizwe, li tolokilwe ni ku hatiswa mwa lipuo ze fapahane za lifasi, ni baabi ba libuka ba mianda ba ba kenya libuka ze mwa mandu a batu, ili za tefo ya $400,000 silimo ni silimo. Ha tuhonolofazo ya Mulimu i zwelapili ku ba fa musebezi, lu kona ku libelela ku atleha. Ka lituso ze ni basebelezi ba ba ekezeha mwedi ni mwedi, ka ku sepa Kreste, lu swanela ku libelela seo feela sa n'a opezi Salumoni ka za Kereke ya Mulimu ha i zwa mwa muinelo wa yona wa kwa lihalaupa, “i isekamezi fa lizoho la Mulatiwa wa yona,” ha a i bonisa i talima kwa ndle, “i nde sina kweli, i kenile sina lizazi, mi i sabisa sina mpi ye na ni lifolaga.”10

GSAM 466Ku Tusiwa ki Mpo wa Bupolofita

GSAM 466.1Ha lu si ka bona feela kuli ketelelo ya Mulena i kwalulezi nzila ya ku hasanya niti, ni kuli tuhonolofazo ya hae ye bonahala i bile ni maiteko a ku latelela linzila za ketelelo ya hae, kono mwa ku zuka ni ku zwelapili kwa lushango lwa mungelo wa bulalu u bulezi ni batu ba hae ka mpo wa bupolofita. Seo ha si si ka ba sinulo se sinca sa ku yola sibaka sa Bibele, kamba sa ku fulumanya lituto za Mañolo, kono ki sa ku bonisa mwa nako ye libaka ze ku na ni kozi ya ku tuhela ku sa tatana kwa evangeli ya Kreste, mwa batu ba li mwa kozi ya ku latelela mikwa ya nako ye, ba ikola ka sibopeho sa bulapeli bo bu si na maata.

GSAM 466.2Ha lu talima taba ye ka mutala wa bapolofita ba kwaikale,11 wo Mulena a lu file ili o muñwi wa milao ya ku lika liponahalo ze cwalo, lu fumana mabaka a swana a kuli liponahalo ze cwalo li tokwa ni cwale sina mwa nako yeo; ili kuli mwa nako ni nako batu ba kona ku zwisiwa mwa nzila ya niti ki lituto ni likezo ze zibahala, ze iketile za nako yeo. Muapositola Paulusi, ha a bulela ka ku bonahala kwa limpo ze Mulena a beile mwa Kereke, u li li teñi “ku petahaza ba ba kenile, ku eza musebezi wa busebelezi, ni ku yaha mubili wa Kreste; ku fitela ha luna kaufela lu fita mwa bumunwi bwa tumelo ni bwa zibo ya Mwan'a Mulimu, ku ba mutu ya petahalile, ku fita fa mulelo wa butuna bwa ku tala kwa Kreste; kuli ku zwa cwale lu si ke lwa sa ba bana, ba ba tsukutliwa ku ya ni ku kutela, ba ba yoliswa ki moya kaufela wa tuto, ka lipunyu za batu ni buhata bwa bona bo ba lalela ka bona ku fosisa; kono, ka ku bulela niti mwa lilato, lu hulele ku yena mwa lika kaufela, yena ya li toho, ili Kreste; ku yena mubili kaufela, o swalisizwe hande ni ku tamiwa hamoho ka tuso ye newa ki silama ni silama, ku ya ka musebezi wa maata o lekana kalulo ni kalulo, u hulisa mubili kuli u iyaha mwa lilato.”12

GSAM 467.1Mabaka a swana a fiwa ku hanyeza ku bonahala kwa mpo wa bupolofita mwa nako ya cwale ne a kona ku fiwa ka maata a swana mwa linako za kwaikale; ili kuli lu na ni Mañolo, ha ku li cwalo ha lu toki limpo ze cwalo. Nihakulicwalo, Mañolo a swana ao a lu taluseza kuli Kreste u beile limpo ze mwa Kereke kuli li eze musebezi wa zona ku fitela ha “se si petahalile [muinelo o petahalile] si tahile,” ni kuli Kereke i swanela ku “sa patelwa mwa mpo ni i li ifi, i libelela ku taha kwa Mulena wa luna Jesu Kreste.”13

GSAM 467Lu Tokwelañi Bapolofita?

GSAM 467.2Batu ba kwaikale ne ba kona ku nahana kuli ba na ni mulao wa Mulimu wa ku luka, o ñozwi ki yena ka munwana wa hae fa matlapa a macwe; kuli ba na ni litaelo, likatulo ni lituto ze ne li bulezwi ku Mushe ka mulomo wa Mulimu, mi ze ne li ñozwi ka tokomelo; cwale ne ku sa tokwañi? Kono, niha ba ne ba na ni liniti kaufela ze nde zeo, Mulimu a tabiswa ki ku bulela ku bona “ka linako ze ñata ni ka mikwa ye fapahane ka bapolofita ba hae ba ba kenile.”

GSAM 467.3Lu fumana kuli bopaki bo ne bu fiwa ki bapolofita ba fapahane, sina Isaya, Jeremia, Ezekiele, Daniele, Hosea ni ba bañwi, ka nako kaufela ne bu luta mulao o mutuna o swana wa ku utwa Mulimu; kono mupolofita ni mupolofita n'a na ni likhalemelo za hae ze iketile ku batu ba nako ya hae, ka ku ba ba ne ba kona ku hulwa kwa milao ye kenile, ye ketezwi Mulimu ya ku luka ki lizo ze ne li zibahala mwa nako ye bupolofita bu ne bu fiwa ka yona.

GSAM 468Ku Tokwa kwa Limpo

GSAM 468.1Niha ku ka bulelwa kuli ha lu na feela ni lituto ze nde za Mañolo a Testamente ya Kale, kono hape ni manzwi a Mupilisi wa luna yena muñi, ni a baapositola, cwale lu tokwelañi liseli le liñwi? Taba i sa li kuli baapositola bao ba ba kenile ki bona ba ne ba supile kwa mazazi a mafelelezo, ha “linako ze tata li ka taha,” ni ha batu ba ka “ba ni sibopeho sa bulapeli, kono ba latula maata a bona,” mi ba lu taluseza hape kuli “ba bañwi ba ka tuhela tumelo, ba utwa mimuya ye fosisa ni lituto za madimona.”

GSAM 468.2Ka ku talima ze kaufela, batu bao Paulusi a bulela ka bona ha a ñolela Batesalonika, ba ba si na ku ba mwa lififi kuli lizazi la Kreste li ba tahele sina liba, kono ba ba ka ba bana ba liseli, ba elezwa ku “lika lika kaufela” za “bupolofita,” ni ku “swala ka kutiya se si nde.”14 Seo si lekana ni ku ba taluseza kuli batu ba ba ka libelela ku taha kwa Mulena Jesu Kreste, mi kwa mafelelezo ba ka fumanwa ba itukiselize lizazi leo, ba ka ba ni liponahalo ze “nde,” za niti, za mpo wa bupolofita mwahalaa bona.

GSAM 468Lisupo za Mafelelezo

GSAM 468.3Lu mwa nako ye lisupo li ñata ka maneku kaufela kuli lizazi la Mulena li atamezi. Lu mwa nako yona ye batu ba ne ba swanela ku zuha, ba ba ka boloka litaelo kaufela, mi hape ba ba ka “ba ni bopaki bwa Jesu”15—ili “Moya wa bupolofita.”16 Lu fumanañi? Kuli mwa lilimo za mafelelezo ze 60 batu ba ba cwalo ba zuhile, ba twala lushango lo lo cwalo, mwahalaa bona mpo wa bupolofita u bonahalile. Ha lu lika mpo wo, sina mo u bonahalile ka Mrs. E. G. White, ka milao ya Bibele, lu boni kuli u fitile muliko mwa lika kaufela. Ku zwa kwa makalelo ku isa kwa mafelelezo, mwa mañolo kaufela a Mrs. White ha ku si ka fumanwa ni i li mulaini u li u muñwi o fa batu tukelo niha i li ye nyinyani ya ku eza sibi, kamba o lumela niha ku li hanyinyani ku zwela kule ni linzwi la Mulimu. Mañolo a ha a si ka ipeya fahalimw'a Bibele, kono a eleza nako kaufela ku ituta linzwi la Mulimu ka tokomelo ye tuna, a li supa ili mulelo o mutuna o litaba za luna li ka likiwa ka ona mwa katulo ya mafelelezo. Mwa mañolo a hae Kreste u holiswa fapil'a luna ili yena feela mutala wo lu swanela ku latelela. U bulelwa ka ku utwahalisa hahulu kuli ki yena feela sepo ya luna ya ku koma fa, yena feela sitabelo sa luna kwa buhali bo bu ka taha, ni libizo li li liñwi feela ni nzila ye lu kona ku piliswa ka yona.

GSAM 469Manzwi a Mutu a Ku Mu Kuteka

GSAM 469.1Ka za Mrs. White ni muinelo wa musebezi wa hae, fa ku fiwa manzwi a latelela, a ne a ñozwi ka 1877 ki mutu ya n'a mu zibahali ni ku ituta musebezi wa hae ka lilimo ze ñata; mi hasamulaho wa ku lika taba ye ka lilimo ze bat'o ba 53, lilimo za ku talima ka tokomelo, ni lumela ka pilu kaufela mihupulo kaufela ye bulezwi mwa manzwi ao:—

GSAM 469.2“Ka za buinelo bwa Sikreste bwa Mme White, ni kupa ku bulela kuli ni nahana kuli ni ziba se siñwi ka bona. Ni mu zibahalile ka lilimo ze 18,—ku fita halefo ya litaba za kwa mulaho za sicaba sa luna. Ni bile mwa lubasi lwa bona nako ni nako, linako ze ñwi ka liviki. Bona ba bile mwa ndu ya luna ni mwa lubasi lwa luna hañata. Ni zameile ni bona kwa libaka ze bat'o ba kaufela; ni bile ni bona mwa butu ni fapil'a batu, mwa likopano ni kwa ndle a likopano, mi ni bile ni menyetla ye minde hahulu ya ku ziba se siñwi ka bupilo, buinelo ni moya wa Ndate ni Mme White. Sina mukutazi ni swanezi ku sebelisana ni batu ba mifuta kaufela, ni ba mikwa kaufela, ku fitela ha ni nahana kuli ni kona ku ahlula se siñwi ka za mutu mo a inezi, sihulu hasamulaho wa ku mu zibahala hande ka lilimo ze ñata.

GSAM 470.1“Ni ziba Mme White ili musali ya sa ipahami, ya ikokobeza, ya na ni pilu ye nde, ni ya kutekeha. Mikwa ye mwa buinelo bwa hae ha i si ye a ikenzisa feela kamba ye a itutile ka maiteko, kono i zwa ka bunolo ni ka ku sa tatana mwa muinelo wa hae wa sibili. Ha a ikuhumusi, ha a ipone ku luka ku fita ba bañwi, mi ha a ipeyi wa butokwa hahulu, sina ba ba fetelele mwa bulapeli mo ba ezanga nako kaufela. Ni kopani hañata ni batu ba ba fetelele cwalo, mi ni ba fumani nako kaufela ba talezi ku ikenzisa, ba talezi buikuhumuso, ba potlakela ku fa mihupulo ya bona, ba ilumbeka ka ku kena kwa bona, ni ze ñwi ze cwalo, kono ni fumani Mme White nako kaufela a fapahane ni ze kaufela.

GSAM 470Mulikani wa Babotana

GSAM 470.2“Mutu kaufela, niha a li mubotana hahulu ni ya inyazize hahulu, u kona ku ya ku yena ka tukuluho ku ya ku kupa likelezo ni ku ombaombiwa, a sa lelekwi. Nako kaufela u babalela ba ba tokwa tuso, ba ba si na se siñwi ni ba ba utwa butuku, a ba fa ze ba tokwa, mi a ba emela mwa litaba za bona.

GSAM 470.3“Ha ni si ka zibahana ni mutu ni a li muñwi ya beya ku saba Mulimu fapil'a hae nako kaufela ka mukwa wo. Ha ku na se si ezwa ku si na pili tapelo ye tiile ku Mulimu. U ituta linzwi la Mulimu ka tokomelo ni ka nako kaufela. Ni utwile Mme White a bulela ka linako za mianda, ni balile bopaki bwa hae kaufela ku zwa kwa makalelo ku isa kwa mafelelezo, bo buñata bwa bona ka linako ze ñata, mi ha ni si ka kona ku fumana mwa bona kaufela ni i li polelo i li iñwi ye maswe, kamba se siñwi se si sa keni ka ku tala kamba se si sa lumelelani ni Sikreste; ha ku na se si hulanya batu kwa Bibele ni ku Kreste. Kono mwa bona ni fumana likupo ze tiile hahulu za ku utwa Mulimu, ku lata Jesu, ku lumela Mañolo ni ku a batlisisa nako kaufela. Ni amuhezi tuso ye tuna ya moya, ka linako ze si na palo, ku zwa mwa bopaki. Luli, ha ni si ka bu bala ku si na ku ikutwa ni khalemelwa ka ku palelwa ki ku sepa Mulimu, ku sa ineela hande ku yena, ni ku sa tiya mwa ku pilisa batu. Haiba ni na ni kahlulo, ni zibo ya ku lemuha lika za moya, ni bulela kuli bopaki bu na ni moya o swana, mi ni manzwi a bona a zamaya ka mukwa o swana ni wa Mañolo.

GSAM 470.4“Ka lilimo ze 30 [cwale lu kona ku bulela kuli lilimo ze 60] bopaki bo bu lumezwi ni ku baliwa mwahalaa batu ba luna. Bu ba ezelizeñi? A bu ba hulile kwa mulao wa Mulimu? A bu ba tahiselize ku tuhela tumelo ku Kreste? A bu ba tahiselize ku lahla Bibele? A bu ba tahiselize ku ba batu ba ba bolile, ba mikwa ye maswe? Ni ziba kuli ha ba bapanyiwa ni Kereke i li ifi ya Sikreste ba ka fumanwa ba si ba banyinyani mwa bunde.

GSAM 471.1“Niti ye nwi ye ni lemuhile ki kuli bahanyezi ba buhali hahulu ba lipono za mupolofita za Mme White ba lumela kuli yena ki Mukreste. Mo ba kona ku lumela seo ha ni ku utwisisi. Ba lika ku lukisa taba yeo ka ku bulela kuli u fosizwe. Ha ba koni ku supa ni i li sisila si li siñwi mwa bupilo bwa hae kaufela, kamba polelo i li iñwi ye maswe mwa mañolo a hae kaufela. Ba swanela ku lumela kuli mañolo a hae a mañata ki a mande hahulu, ni kuli mutu kaufela ya ka pila ka ze a bulela kaufela u ka ba Mukreste yo munde, ya tiisehile ku kena kwa lihalimu. Taba ye ya makaza hahulu, haiba ki sisebeliso sa diabolo, ya susuelizwe ki Satani, kamba haiba mañolo a hae ki a maswe kamba ki mihupulo ya hae feela ye sa tiya.”

GSAM 471Batu Ba Ba Sa Mu Zibi Ba Paka ka Mañolo

GSAM 471.2Ha lipampili za luna ze zwanga ka nako ni nako, ze na ni mañolo a Mrs. White, li lumelwa kwa ndle, li batwa ki batu ba ba ikokobeza hahulu, ba ba saba Mulimu ni ba ba ineela ku yena. Ha ba biha ka ze ba bala, ba li: “Lu tabiswa sihulu ki mañolo a Mrs. White. A tusa hahulu mwa bupilo, a talezi lituto za ku atametsa mutu ku Mulena ni ku mu eza ya ikokobeza hahulu, ya saba Mulimu ni ya ineela ku yena. Mañolo a a zamaya ni Mañolo a Kenile hahulu, kuli ha lu bala ku bonahala kuli Mrs. White u swanela ku ba ya susuelizwe ki Mulimu ku ñola mwa ñolela.” Ki bona bopaki bo bu fumanwa mwa litaba ze mashumi za bao ba ba ñolelana ni basebelezi ba luna ba bulumiwa, bao hape ba ba si na niha i li zibo ye nyinyani ya kuli mihupulo ya Mrs. White i amuhelwa mwa pono ya mupolofita ye kenile.

GSAM 471Mo Ku Hanyeza Ku Zwezi

GSAM 471.3Ka ku talima maikuto a tahisizwe ki mpo wo, ku zuha lipuzo za kuli ku hanyezwa kwa ku bonahala kwa mpo wo ku zwile kai, mi ki kabakalañi? Mi mafelelezo a bao ba hanyezize a bile afi? Ka ku talima taba ye ka tokomelo ku zwa ka 1852, ni fumani kuli ku hanyezwa kwa ponahalo ye, ka buñata, ku zwile ku bao ba khalemezwi ka mafokoli a buinelo, ka mikwa ye maswe, kamba ka nzila ye fosa mwa bupilo bwa bona. Ba bañata ba ne ba khalemezwi ne ba hanyeta, ba li ha ba maswe sina bopaki mo bu ba bonisa, mi ne ba ka bonisa kuli ba kona ku swala niti niha ba zamaya ka ku hanyeta khalemelo ye ba filwe. Nako i bonisize kuli buñata bo butuna bwa ba ba cwalo ba latula tumelo ya bona ni ku tuhela likwata ka ku tala. Ba bañwi ba boni bufosi bwa bona, mi ba swala niti ka kutiya ku fita pili. Ku zuha puzo ye: Haiba ba ba hanyeza mpo wo ba eteziwi ki Mulena, ki kabakalañi ha ba latehelwa ki bupilo bwa bona bwa moya ni ku sutela kule ni Mulimu? Mulao wa Mupilisi wa luna ki kuli kota i swanela ku zibahala ka liceelo za yona. U bulela ka ku tiisa hahulu kuli “kota ye maswe ha i koni ku beya liceelo ze nde.”

GSAM 472Ku Palelwa kwa Bahanyezi

GSAM 472.1Lu hupula linako ze ku hanyezwa ku ne ku lukiselizwe ku lwisa bopaki bwa Mrs. White, ku bulelwa kuli ku atleha ko kutuna ku ka ba ni musebezi wa bona hang feela ha ba felisa bopaki. Nihakulicwalo, ba palelwi ka ku tala ku bona litakazo za bona li talalezwa. Hasamulaho wa lilimo za ku lwantsha, ha ba si ka bonisa ku hasanya niti ya Sabata fapil'a lifasi ku fita mo batu ba mufuta wa bona ba ne ba ezelize lilimo ze 49 kwa mulaho. Haiba musebezi wa bona ne li musebezi o iketile wa Mulena, ki kabakalañi ha lushango lwa bona lu si ka atleha ku fita fa?

GSAM 472Ku Atleha Ku Kai?

GSAM 472.2Kwa neku le liñwi, ha lu talima lushango lo ka lona litaelo za Mulimu ni tumelo ya Jesu li kutazwa ku lifasi,—lushango lo lu swalisizwe ni ponahalo ye ya mpo wa bupolofita, ni likelezo za yona, lituto ni likhalemelo,—lu bona kuli lu zwelilepili ka niti ni ka kutiya ku zwa kwa makalelo a lona ku fitela mwa nako ya cwale. Ka ku utwa likelezo za Mulena ka mpo wo, ni ku zwelapili ka maata a Mulena, lushango, sina mo lu boniselize, lu likanyelize lifasi, mi lu potlakela ku fita ku “sicaba kaufela, ni lusika, ni puo, ni batu.”

GSAM 473.1Ka za ku zwelapili kwa lona mwa nako ye fitile, lu kona ku bulela kuli linzwi la Mulimu li talalezwi ka ku bulela kwa hae kuli: “Ha ku na silwaniso se si lupilwe ku ku lwisa se si ka atleha.” Luli, lizoho la Mulimu li bonahalile mwa ku atleha ko ku bile mwa ku zuka ni ku zwelapili kwa musebezi wo mutuna wa ku taha ku fitela cwale, mi kwa nako ye sa taha lu sepa ku talalezwa ko ku tiile kwa linzwi la hae le li li: “Ni beile fapil'a hao munyako o bulehile, mi ha ku na mutu ya kona ku u kwala.” Ka sepo ye lu kona ku opela ka ku tiiseha kaufela, lu li:—

GSAM 473.2“Kakuli u bile ni luna, Mi u sa li ni luna, Mi u sepisize ku ba ni luna Ku fitela kwa mafelelezo.”

Notes

  1. Sinulo 3:8. ↩
  2. Sinulo 3:3. ↩
  3. Sinulo 3:10, 11. ↩
  4. Masamu 124:1-8. ↩
  5. Isaya 56:1, 2. ↩
  6. Isaya 58:8, 13. ↩
  7. Amosi 7:2. ↩
  8. Zakaria 4:10. ↩
  9. Zakaria 4:7. ↩
  10. Lipina za Salumoni 6:10. ↩
  11. Jakobo 5:10. ↩
  12. Baefese 4:12-16. ↩
  13. 1 Bakorinthe 1:6, 7. ↩
  14. 1 Batesalonika 5:5, 20, 21. ↩
  15. Sinulo 12:17. ↩
  16. Sinulo 19:10. ↩

Note

Back