Tuatua Akamata
GSAM 3.1Kua maata te au puka puapinga i roto i te rima o te tangata, e ko te tumu taaku e oronga atu no te kapitianga mai i tetai puka ke atu ki te au puka nei, koia oki, i roto i teia au api te akakite nei au i te au mea e manganui no te au Adventist, e no te au Adventist no te Ra Itu tikai, kare i tukuia ana ki mua i te tangata na roto i teia tu. Kapiti atu ki teia, e manganui tei piri mai ki te angaanga i te au mataiti i muri mai, kare i kite mata i te au mea tei taikuia, kua pati pakari mai kia akakiteia teia au mea e te au kiteanga e te aronga tei mua i roto i te angaanga. No te mea kua kite meitaki au i te angaanga o te taeanga mai i te 1843 e te 1844, e mei te rā 2 no Tianuare 1849 mai kua tutu au i te apiianga, na mua ei Adventist, e mei te 1852 mai ei Adventist no te Ra Itu, e mea rekareka naku kia “tuatua i te au mea taaku i kite e taaku i akarongo.”
GSAM 3.2Kua tuku atu au i tetai akakiteanga no te angaanga o te taeanga mai, tei parare mei te 1831 ki te 1844 ki te au enua maramarama ravarai o te ao nei.
GSAM 3.3Mei te 1845 mai, kua vai tetai au pupu Adventist ke atu tei tutu ana, e te tutu nei rai, i te taeanga vaitata mai o te Mesia. Kare taku akakoroanga i te akakite i te tuatua enua o taua au pupu ravarai; ko taku akakoroanga kia akakite roa i te akamataanga e te tupuanga o te au Adventist no te Ra Itu, ma te akataka tikai i te au ravenga tei tauturu, i raro ake i te akonoanga a te Atua, i te akatupuanga mai mei te putaua e te akamataanga meangiti, i tetai iti tangata. Noatu e vaitata ua ratou e okotai anere tauatini, kua tuatua tetai pae o to ratou au enemi e, “No te itoito e te maroiroi ta ratou e rave nei i te angaanga, ka manako tetai e e rua mirioni ratou.”
GSAM 3.4Ko te aronga tei kite meangiti ua i te tuatua enua o te au Adventist no te Ra Itu, kua kite e mei te 1845 mai kua piri maata a Mrs. E. G. White ki te angaanga, ei vaa tuatua e ei tata. Kua kite katoa ratou e kua piri ki tana angaanga tetai au akaarianga takake, me kore au oronga. Kua rauka te tikaanga naku kia vai i reira e kia kite i te angaanga o teia oronga mei te 50 taime. I roto i teia au api kua akataka au mei te 26 totou taka meitaki na Mrs. White tei tupu tikatika roa.
GSAM 4.1Kapiti atu ki taku au kiteanga uaorai, kua tuku atu katoa au i te akakiteanga a tetai aronga kite mata no runga i ta ratou au kiteanga. Kia maata atu te puapinga o teia au mea ki te tangata tatau ngakau tika, i to te au tuatua manako ua a te aronga kare rava i vai ki reira i taua au atianga ra.
GSAM 4.2Te tuku atu nei au i teia angaanga ki te aronga tatau, ma te manakonako e, na roto i te akameitakianga a te Atua, ka riro te tatauanga i teia au api ei ravenga no te akamaata i te angaanga a te Mesia i roto i te au ngakau e manganui. Te irinaki nei au e, i ta ratou tatauanga, ka akamanako ratou i te au tuatua a Paulo ki to Tesalonia, “E tamata i te au mea ravarai; tapea pakari i tei meitaki.”